@
СВЕ́ТЛОЕ ХРИСТО́ВО ВОСКРЕСЕ́НИЕ.БЛАГОВЕЩЕНИЕ
*
КИРИОПА́СХА
*
Полу́нощница
*
Трисвято́е по О́тче наш
*
Псало́м 50:
*
Кано́н Благове́щения, глас 4:
*
Песнь 1:
*
Кано́н Вели́кой Суббо́ты, глас 6:
*
Песнь 1:
*
Катавасия, глас 6:
*
Кано́н Благове́щения, глас 4:
*
Песнь 3:
*
Кано́н Вели́кой Суббо́ты, глас 6:
*
Песнь 3:
*
Катавасия, глас 6:
*
Конда́к Благове́щения, глас 8:
*
И́кос:
*
Седа́лен, глас 1:
*
Другой седа́лен Благове́щения, глaс 8, подо́бен: «Повеле́нное…»:
*
Кано́н Благове́щения, глас 4:
*
Песнь 4:
*
Кано́н Вели́кой Суббо́ты, глас 6:
*
Песнь 4:
*
Катава́сия, глас 6:
*
Кано́н Благове́щения, глас 4:
*
Песнь 5:
*
Кано́н Вели́кой Суббо́ты, глас 6:
*
Песнь 5:
*
Катава́сия, глас 6:
*
Кано́н Благове́щения, глас 4:
*
Песнь 6:
*
Кано́н Вели́кой Суббо́ты, глас 6:
*
Песнь 6:
*
Катава́сия, глас 6:
*
Конда́к, глас 6:
*
Икос:
*
Кано́н Благове́щения, глас 4:
*
Песнь 7:
*
Кано́н Вели́кой Суббо́ты, глас 6:
*
Песнь 7:
*
Катава́сия, глас 6:
*
Кано́н Благове́щения, глас 4:
*
Песнь 8:
*
Кано́н Вели́кой Суббо́ты, глас 6:
*
Песнь 8:
*
Катава́сия, глас 6:
*
Кано́н Благове́щения, глас 4:
*
Песнь 9:
*
Чу́дное священноявле́нному Моисе́ю/ купина́ и огнь показа́ чу́до,/ ища́й же конца́ в прехожде́нии време́н, во Отрокови́це чи́стей, рече́, узрю́./ Е́йже, я́ко Богоро́дице, да рече́тся:// ра́дуйся, Благода́тная, Госпо́дь с Тобо́ю.
*
Кано́н Вели́кой Суббо́ты, глас 6:
*
Да ра́дуется тварь,/ да веселя́тся вси земноро́днии,/ враг бо плени́ся ад:/ с ми́ры жены́ да срета́ют,/ Ада́ма со Е́вою избавля́ю всеро́дна,// и в тре́тий день воскре́сну.
*
Трисвято́е по О́тче наш
*
Тропа́рь, глас 2:
*
Тропа́рь Благове́щения, глас 4:
*
Ма́лая сугу́бая ектения́:
*
Отпу́ст Вели́кой Суббо́ты.
*
Све́тлая Пасха́льная Зау́треня.
*
Кре́стный ход:
*
Пасха́льное нача́ло:
*
Вели́кая ектения́:
*
Канон Пасхальный, глас 1:
*
Песнь 1:
*
Кано́н Благове́щения, глас 4:
*
Песнь 1:
*
Катава́сия Пасхи:
*
Катава́сия Благове́щения, глас 4:
*
Ектения́ ма́лая:
*
Канон Пасхальный, глас 1:
*
Песнь 3:
*
Кано́н Благове́щения, глас 4:
*
Песнь 3:
*
Катава́сия Пасхи:
*
Катава́сия Благове́щения, глас 4:
*
Ектения́ ма́лая:
*
Конда́к, глас 8:
*
И́кос:
*
Ипакои́, глас 4:
*
Канон Пасхальный, глас 1:
*
Песнь 4:
*
Кано́н Благове́щения, глас 4:
*
Песнь 4:
*
Катава́сия Пасхи:
*
Катава́сия Благове́щения, глас 4:
*
Ектения́ ма́лая:
*
Канон Пасхальный, глас 1:
*
Песнь 5:
*
Кано́н Благове́щения, глас 4:
*
Песнь 5
*
Катава́сия Пасхи:
*
Катава́сия Благове́щения, глас 4:
*
Ектения́ ма́лая:
*
Канон Пасхальный, глас 1:
*
Песнь 6:
*
Кано́н Благове́щения, глас 4:
*
Песнь 6:
*
Катава́сия Пасхи:
*
Катава́сия Благове́щения, глас 4:
*
Ектения́ ма́лая:
*
Конда́к Благове́щения, глас 8:
*
И́кос(Благове́щения):
*
Канон Пасхальный, глас 1:
*
Песнь 7:
*
Кано́н Благове́щения, глас 4:
*
Песнь 7
*
Катава́сия Пасхи:
*
Катава́сия Благове́щения, глас 4:
*
Ектения́ ма́лая:
*
Канон Пасхальный, глас 1:
*
Песнь 8:
*
Кано́н Благове́щения, глас 4:
*
Песнь 8
*
Катава́сия Пасхи:
*
Катава́сия Благове́щения, глас 4:
*
Ектения́ ма́лая:
*
Канон Пасхальный, глас 1:
*
Песнь 9:
*
Кано́н Благове́щения, глас 4:
*
Песнь 9
*
Катава́сия:
*
Катава́сия Благове́щения, глас 4:
*
Ектения́ ма́лая:
*
Хвали́тны псалмы́, глас 1:
*
Стихи́ры Благове́щения:
*
Сло́во огласи́тельное Иоа́нна Златоу́стого:
*
Тропа́рь Иоа́нна Златоу́стого, глас 8:
*
Ектения́ сугу́бая:
*
Ектения́ проси́тельная:
*
Пасха́льный отпу́ст.
*
Многоле́тие:
*
Пасха́льные часы́:
*
Ипакои́, глас 4:
*
Конда́к, глас 8:
*
Тропари́, глас 8:
*
Ма́лый воскре́сный отпу́ст:
*
Боже́ственная Литурги́я:
*
Пасха́льное нача́ло:
*
Вели́кая ектения́:
*
Антифо́ны ПА́СХИ:
*
Антифо́н 1-й:
*
Ектения́ ма́лая:
*
Антифо́н 2-й:
*
Ектения́ ма́лая:
*
Антифон 3-й:
*
Вход с Евангелием:
*
По входе:
*
Тропарь праздника, глас 5:
*
Тропа́рь Благовещения, глас 4:
*
Кондaк праздника, глaс 8:
*
Вме́сто Трисвято́го:
*
Прокимен, глас 8:
*
Ектения́ сугу́бая:
*
Ектения́ об оглаше́нных:
*
Ектения́ ве́рных, пе́рвая:
*
Ектения́ ве́рных, втора́я:
*
Херуви́мская песнь:
*
Вели́кий вход:
*
Ектения́ проси́тельная:
*
Си́мвол ве́ры:
*
Евхаристи́ческий Кано́н:
*
Задосто́йник (Вме́сто «Досто́йно…»):
*
Ектения́ проси́тельная:
*
Моли́тва Госпо́дня:
*
Прича́стен Пасхи:
*
Прича́стие:
*
Ектения́ заключи́тельная:
*
Заамво́нная моли́тва:
*
Моли́тва на освяще́ние а́ртоса:
*
Пасха́льный отпу́ст.
*
Моли́тва благослове́ния сы́ра и яиц.
*
Моли́тва благослове́ния мя́са, во святу́ю и вели́кую Неде́лю Па́схи.
*
Пасха́льные часы́:
*
Ипакои́, глас 4:
*
Конда́к, глас 8:
*
Тропари́, глас 8:
*
Ма́лый воскре́сный отпу́ст:
*
Вели́кая Пасха́льная вече́рня.
*
Пасха́льное нача́ло:
*
Вели́кая ектения́:
*
Го́споди, воззва́х, глас 2:
*
Вход с кади́лом:
*
Све́те Тихи́й:
*
Проки́мен вели́кий:
*
Ектения́ сугу́бая:
*
Сподо́би, Го́споди:
*
Ектения́ проси́тельная:
*
Стихи́ры на стихо́вне:
*
Пасха́льный отпу́ст.
*
Многоле́тие:
9 апреля 2254 по н. ст.
СВЕ́ТЛОЕ ХРИСТО́ВО ВОСКРЕСЕ́НИЕ.БЛАГОВЕЩЕНИЕ
При закрытых царских вратах и завесе:
Иерей:
Благослове́н Бог наш всегда́, ны́не и при́сно, и во ве́ки веко́в.
Чтец
Святы́й Бо́же, Святы́й Кре́пкий, Святы́й Безсме́ртный, поми́луй нас.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иерей:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Го́споди, поми́луй.
(12 раз)
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́н Благове́щения, глас 4:
Ирмос:
Отве́рзу уста́ моя́ и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.
(Дважды, с припевом)
Припев:
Пресвята́я Богоро́дице, спаси́ нас.
Тропа́рь:
Да пое́т Тебе́, Влады́чице, дви́жа свире́ль духо́вную, Дави́д, пра́отец Твой:/ послу́шай, Дщи, ра́дованнаго гла́са от А́нгела,// ра́дость бо возвеща́ет Тебе́ неизглаго́ланную.
Припев:
Пресвята́я Богоро́дице, спаси́ нас.
А́нгел возопи́:
Вопию́ Тебе́, веселя́ся,/ приклони́ у́хо Твое́ и вонми́ ми,/ Бо́жие возвеща́ющу безсе́менное зача́тие,/ обрела́ бо еси́ благода́ть пред Бо́гом,// ея́же никогда́же обре́те друга́я, Всечи́стая.
Пресвята́я Богоро́дице, спаси́ нас.
Богоро́дица рече́:
Да разуме́ю, А́нгеле, твои́х глаго́л си́лу,/ ка́ко бу́дет, е́же рекл еси́, глаго́ли я́вственнейше?/ Ка́ко зачну́, Де́ва су́щи, Отрокови́ца?// Ка́ко же и Ма́ти бу́ду Зижди́теля Моего́?
Пресвята́я Богоро́дице, спаси́ нас.
А́нгел возопи́:
Ле́стно мя веща́ти помышля́еши, я́ко мню,/ и ра́дуюся, зря Твое́ утвержде́ние./ Дерза́й, Влады́чице,// Бо́гу бо хотя́щу, удо́бь сконча́ются и пресла́вная.
Кано́н Вели́кой Суббо́ты, глас 6:
Ирмос:
Волно́ю морско́ю/ Скры́вшаго дре́вле,/ гони́теля мучи́теля, под земле́ю скры́ша/ спасе́нных о́троцы;/ но мы, я́ко отрокови́цы,/ Го́сподеви пои́м,// сла́вно бо просла́вися.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
Го́споди Бо́же мой,/ исхо́дное пе́ние, и надгро́бную Тебе́ песнь воспою́,/ погребе́нием Твои́м жи́зни моея́ вхо́ды отве́рзшему,// и сме́ртию смерть и ад умертви́вшему.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
Горе́ Тя на Престо́ле и до́ле во гро́бе,/ преми́рная и подзе́мная, помышля́ющая Спа́се мой,/ зы́бляхуся умерщвле́нием Твои́м:// па́че ума́ бо ви́ден был еси́ мертв, Живонача́льниче.
(Дважды, с припевом)
Припев:
Сла́ва Отцу́ и Сы́ну и Свято́му Ду́ху.
Тропарь:
Да Твоея́ сла́вы вся испо́лниши,/ сшел еси́ в ни́жняя земли́:/ от Тебе́ бо не скры́ся соста́в мой, и́же во Ада́ме, и погребе́н,// истле́вша мя обновля́еши, Человеколю́бче.
И ны́не и при́сно и во ве́ки веко́в. Ами́нь.
Тропарь:
Да Твоея́ сла́вы вся испо́лниши,/ сшел еси́ в ни́жняя земли́:/ от Тебе́ бо не скры́ся соста́в мой, и́же во Ада́ме, и погребе́н,// истле́вша мя обновля́еши, Человеколю́бче.
Хор:
Волно́ю морско́ю/ Скры́вшаго дре́вле,/ гони́теля мучи́теля, под земле́ю скры́ша/ спасе́нных о́троцы;/ но мы, я́ко отрокови́цы,/ Го́сподеви пои́м,// сла́вно бо просла́вися.
Кано́н Благове́щения, глас 4:
Ирмос:
Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.
(Дважды, с припевом)
Припев:
Пресвята́я Богоро́дице, спаси́ нас.
Богоро́дица рече́:
Оскуде́ князь от Иу́ды, вре́мя наста́ про́чее,/ в не́же яви́тся язы́ков наде́жда, Христо́с;// ты же, ка́ко Сего́ рожду́, Де́ва су́щи, скажи́?
Припев:
Пресвята́я Богоро́дице, спаси́ нас.
А́нгел возопи́:
И́щеши от мене́ уве́дети Де́во, о́браз зача́тия Твоего́,/ но той несказа́нен есть:// Дух же Святы́й, зижди́тельною си́лою осени́в Тя, соверши́т.
Пресвята́я Богоро́дице, спаси́ нас.
Богоро́дица рече́:
Моя́ прама́ти, прие́мши ра́зум змии́н, пи́щи Боже́ственныя изгна́на бысть,/ те́мже и Аз бою́ся целова́ния стра́ннаго твоего́,// стыдя́щися поползнове́ния.
Пресвята́я Богоро́дице, спаси́ нас.
А́нгел возопи́:
Бо́жий предста́тель, по́слан есмь Боже́ственный пове́дати Тебе́ сове́т./ Что мене́ бои́шися, Всенепоро́чная, па́че Тебе́ боя́щагося?/ Что благогове́еши мне, Влады́чице,// Тебе́ че́стно благогове́ющему?
Кано́н Вели́кой Суббо́ты, глас 6:
Ирмос:
Тебе́, на вода́х/ пове́сившаго/ всю зе́млю неодержи́мо,/ тварь ви́девши/ на ло́бнем ви́сима,/ у́жасом мно́гим содрога́шеся,/ несть свят,// ра́зве Тебе́ Го́споди, взыва́ющи.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
О́бразы погребе́ния Твоего́ показа́л еси́, виде́ния умно́жив./ Ны́не же сокрове́нная Твоя́ богому́жно уясни́л еси́, и су́щим во а́де Влады́ко,// несть свят, ра́зве Тебе́ Го́споди, взыва́ющим.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
Просте́рл еси́ дла́ни, и соедини́л еси́ дре́вле разстоя́щаяся./ Одея́нием же Спа́се, е́же в плащани́це и во гро́бе,/ окова́нныя разреши́л еси́,// несть свят, ра́зве Тебе́ Го́споди, взыва́ющия.
(Дважды, с припевом)
Сла́ва Отцу́ и Сы́ну и Свято́му Ду́ху.
Тропарь:
Гро́бом и печа́тьми, Невмести́ме,/ содержи́мь был еси́ хоте́нием:/ и́бо си́лу Твою́ де́йствы показа́л еси́,/ богоде́йственно пою́щим:// несть свят, ра́зве Тебе́ Го́споди, Человеколю́бче.
И ны́не и при́сно и во ве́ки веко́в. Ами́нь.
Тропарь:
Гро́бом и печа́тьми, Невмести́ме,/ содержи́мь был еси́ хоте́нием:/ и́бо си́лу Твою́ де́йствы показа́л еси́,/ богоде́йственно пою́щим:// несть свят, ра́зве Тебе́ Го́споди, Человеколю́бче.
Хор:
Тебе́, на вода́х/ пове́сившаго/ всю зе́млю неодержи́мо,/ тварь ви́девши/ на ло́бнем ви́сима,/ у́жасом мно́гим содрога́шеся,/ несть свят,// ра́зве Тебе́ Го́споди, взыва́ющи.
Го́споди, поми́луй.
(Трижды)
Конда́к Благове́щения, глас 8:
Хор:
Взбра́нной Воево́де победи́тельная,/ я́ко изба́вльшеся от злых,/ благода́рственная воспису́ем Ти, раби́ Твои́, Богоро́дице,/ но, я́ко иму́щая держа́ву непобеди́мую,/ от вся́ких нас бед свободи́, да зове́м Ти:// ра́дуйся, Неве́сто Неневе́стная.
А́нгел предста́тель с Небесе́ по́слан бысть рещи́ Богоро́дице: ра́дуйся!/ И со безпло́тным гла́сом воплоща́ема Тя зря, Го́споди, ужаса́шеся/ и стоя́ше, зовы́й к Ней такова́я:/ ра́дуйся, Е́юже ра́дость возсия́ет;/ ра́дуйся, Е́юже кля́тва исче́знет./ Ра́дуйся, па́дшаго Ада́ма воззва́ние;/ ра́дуйся, слез Е́виных избавле́ние./ Ра́дуйся, высото́ неудобовосходи́мая челове́ческими по́мыслы;/ ра́дуйся, глубино́ неудобозри́мая и А́нгельскима очи́ма./ Ра́дуйся, я́ко еси́ Царе́во седа́лище;/ ра́дуйся, я́ко но́сиши нося́щаго вся./ Ра́дуйся, звездо́, явля́ющая Со́лнце;/ ра́дуйся, утро́бо Боже́ственнаго воплоще́ния./ Ра́дуйся, Е́юже обновля́ется тварь;/ ра́дуйся, Е́юже покланя́емся Творцу́.// Ра́дуйся, Неве́сто Неневе́стная.
Гроб Твой Спа́се, во́ини стрегу́щии,/ ме́ртви от облиста́ния я́вльшагося А́нгела бы́ша,/ пропове́дающа жена́м Воскресе́ние./ Тебе́ сла́вим, тли потреби́теля!/ Тебе́ припа́даем, Воскре́сшему из гро́ба,// и Еди́ному Бо́гу на́шему!
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Другой седа́лен Благове́щения, глaс 8, подо́бен: «Повеле́нное…»:
По́слан бысть с Небесе́ Архистрати́г Гаврии́л от Бо́га,/ ско́ро предста́ ко одушевле́нному гра́ду, глаго́ля к Ней я́вственно:/ Зижди́теля прии́меши, Де́во, во утро́бе/ и роди́ши Сего́ непрело́жне с пло́тию./ Те́мже по́слан есмь возвести́ти Тебе́ стра́нное рождество́, Чи́стая,/ и стою́, зовя́ Тебе́:// ра́дуйся, Неве́сто Неневе́стная.
Кано́н Благове́щения, глас 4:
Ирмо́с:
Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.
(Дважды, с припевом)
Припев:
Пресвята́я Богоро́дице, спаси́ нас.
Богоро́дица рече́:
Свяще́нную не́кую Де́ву ражда́ющую слы́шах проро́ка, дре́вле Емману́ила проре́кша;// хощу́ же разуме́ти, ка́ко Божества́ растворе́ние естество́ челове́ческое претерпи́т?
Припев:
Пресвята́я Богоро́дице, спаси́ нас.
А́нгел возопи́:
Яви́ла есть купина́, неопа́льна пребы́вши,/ прие́мши пла́мень, обра́дованная Всепе́тая, на Тебе́ таи́нства пресла́вное:// по рождестве́ бо пребу́деши Чи́стая Присноде́ва.
Пресвята́я Богоро́дице, спаси́ нас.
Богоро́дица рече́:
Освеща́емь сия́нием Бо́га Вседержи́теля,/ и́стины пропове́дниче, глаго́ли, Гаврии́ле, и́стиннейшая:/ ка́ко, нетле́нне бы́вши чистоте́ Мое́й,// Сло́ва рожду́, с пло́тию Безпло́тнаго?
Пресвята́я Богоро́дице, спаси́ нас.
А́нгел возопи́:
Со стра́хом Тебе́, я́ко раб Госпоже́, предстою́,/ с боя́знию, Отрокови́це, ны́не смотри́ти стыжду́ся Тебе́,// я́ко бо дождь на руно́, сни́дет на Тя Сло́во О́тчее, я́ко благоволи́.
Кано́н Вели́кой Суббо́ты, глас 6:
Ирмос:
На Кресте́ Твое́/ Боже́ственное истоща́ние/ прови́дя Авваку́м,/ ужа́сся, вопия́ше:/ Ты си́льных пресе́кл еси́/ держа́ву Бла́же,// приобща́яся су́щим во а́де, я́ко Всеси́лен.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
Седьмы́й день днесь освяти́л еси́,/ его́же дре́вле благослови́л еси́ упокое́нием дел:/ прево́диши бо вся́ческая и обновля́еши,// суббо́тствуя Спа́се мой, и назида́я.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
Си́лою лу́чшаго, победи́вшаго Тебе́,/ от пло́ти душа́ Твоя́ раздели́ся,/ растерза́ющи бо обоя́ у́зы,// сме́рти и а́да, Сло́ве, держа́вою Твое́ю.
(Дважды, с припевом)
Припев:
Сла́ва Отцу́ и Сы́ну и Свято́му Ду́ху.
Тропарь:
Ад Сло́ве, срет Тя огорчи́ся,/ челове́ка зря обоже́на,/ уя́звлена ра́нами, и Всесильноде́теля,// стра́шным же зра́ком поги́бе.
И ны́не и при́сно и во ве́ки веко́в. Ами́нь.
Тропарь:
Ад Сло́ве, срет Тя огорчи́ся,/ челове́ка зря обоже́на,/ уя́звлена ра́нами, и Всесильноде́теля,// стра́шным же зра́ком поги́бе.
Хор:
На Кресте́ Твое́/ Боже́ственное истоща́ние/ прови́дя Авваку́м,/ ужа́сся, вопия́ше:/ Ты си́льных пресе́кл еси́/ держа́ву Бла́же,// приобща́яся су́щим во а́де, я́ко Всеси́лен.
Кано́н Благове́щения, глас 4:
Ирмос:
Ужасо́шася вся́ческая о Боже́ственней сла́ве Твое́й, Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.
(Дважды, с припевом)
Припев:
Пресвята́я Богоро́дице, спаси́ нас.
Богоро́дица рече́:
Разуме́ти не могу́ Твои́х слове́с изве́стия:/ чудеса́ бо бы́ша мно́жицею,/ Боже́ственною си́лою чудоде́йствуема,/ зна́мения и о́бразы зако́ннии,// роди́ же де́ва неискусому́жне никогда́же.
Припев:
Пресвята́я Богоро́дице, спаси́ нас.
А́нгел возопи́:
Диви́т, Всенепоро́чная, и стра́нно бо чу́до Твое́,/ еди́на бо Ты всех Царя́ прии́меши во утро́бе воплоща́ема,// и Тя прообразу́ют проро́ческая рече́ния, и гада́ния, и зако́ннии о́бразы.
Пресвята́я Богоро́дице, спаси́ нас.
Богоро́дица рече́:
Все́ми Невмести́мый и все́ми Неви́димый,/ ка́ко сей мо́жет во чре́ве деви́че всели́тися, е́же Сам созда́?// Ка́ко же и зачну́ Бо́га Сло́ва, собезнача́льна Отцу́ и Ду́ху?
Пресвята́я Богоро́дице, спаси́ нас.
А́нгел возопи́:
К Твоему́ пра́отцу Дави́ду обеща́вся/ посади́ти от плода́ Твоего́ чре́ва на престо́ле ца́рства его́,// Иа́ковлю Тя добро́ту, еди́ну избра́ в слове́сное селе́ние.
Кано́н Вели́кой Суббо́ты, глас 6:
Ирмос:
Богоявле́ния Твоего́ Христе́,/ к нам ми́лостивно бы́вшаго,/ Иса́ия Свет ви́дев Невече́рний,/ из но́щи у́треневав взыва́ше:/ воскре́снут ме́ртвии,/ и воста́нут су́щии во гробе́х,// и вси земноро́днии возра́дуются.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
Новотвори́ши земны́я Созда́телю, пе́рстен быв,/ и плащани́ца и гроб явля́ют е́же в Тебе́ Сло́ве, та́инство./ Благообра́зный бо сове́тник, Тебе́ Ро́ждшаго сове́т образу́ет,// в Тебе́ велеле́пно новотворя́щаго мя.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
Сме́ртию сме́ртное,/ погребе́нием тле́нное прелага́еши,/ нетле́нно твори́ши бо,/ боголе́пно безсме́ртно творя́ прия́тие,/ плоть бо Твоя́ истле́ния не ви́де Влады́ко,// ниже́ душа́ Твоя́ во а́де странноле́пно оста́влена бысть.
(Дважды, с припевом)
Сла́ва Отцу́ и Сы́ну и Свято́му Ду́ху.
Тропарь:
Из Небра́чныя проше́д, и прободе́н в ре́бра Соде́телю мой,/ из Нея́ соде́лал еси́ обновле́ние Е́вино, Ада́м быв,/ усну́в па́че естества́ сном есте́ственным,// и жизнь воздви́гнув от сна и тле́ния, я́ко Всеси́лен.
И ны́не и при́сно и во ве́ки веко́в. Ами́нь.
Тропарь:
Из Небра́чныя проше́д, и прободе́н в ре́бра Соде́телю мой,/ из Нея́ соде́лал еси́ обновле́ние Е́вино, Ада́м быв,/ усну́в па́че естества́ сном есте́ственным,// и жизнь воздви́гнув от сна и тле́ния, я́ко Всеси́лен.
Хор:
Богоявле́ния Твоего́ Христе́,/ к нам ми́лостивно бы́вшаго,/ Иса́ия Свет ви́дев Невече́рний,/ из но́щи у́треневав взыва́ше:/ воскре́снут ме́ртвии,/ и воста́нут су́щии во гробе́х,// и вси земноро́днии возра́дуются.
Кано́н Благове́щения, глас 4:
Ирмос:
Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.
(Дважды, с припевом)
Припев:
Пресвята́я Богоро́дице, спаси́ нас.
Богоро́дица рече́:
Глаго́л твои́х, Гаврии́ле, глас ра́дованен прие́мши, весе́лия Боже́ственнаго испо́лнихся:// ра́дость бо пове́даеши и весе́лие возвеща́еши безконе́чное. (Дважды)
Припев:
Пресвята́я Богоро́дице, спаси́ нас.
А́нгел возопи́:
Тебе́ даде́ся ра́дость, Богома́ти Боже́ственная,/ Тебе́, е́же ра́дуйся, вся тварь вопие́т, Богоневе́сто:// Ты бо еди́на Ма́ти Сы́на Бо́жия пронарече́ся, Чи́стая. (Дважды)
Пресвята́я Богоро́дице, спаси́ нас.
Богоро́дица рече́:
Е́вы Мно́ю ны́не да упраздни́тся осужде́ние,/ да возда́стся Мно́ю долг днесь,// Мно́ю заи́мствование дре́внее да да́стся преиспо́лнено.
Пресвята́я Богоро́дице, спаси́ нас.
А́нгел возопи́:
Обеща́ся Бог Авраа́му пра́отцу/ благослови́тися в се́мене его́ язы́ком, Чи́стая,// Тобо́ю же коне́ц обеща́ние прие́млет днесь.
Кано́н Вели́кой Суббо́ты, глас 6:
Ирмос:
Ят бысть,/ но не удержа́н в пе́рсех ки́товых Ио́на:/ Твой бо о́браз нося́,/ Страда́вшаго, и погребе́нию да́вшагося,/ я́ко от черто́га от зве́ря изы́де./ Приглаша́ше же кустоди́и,/ храня́щии су́етная и ло́жная,// ми́лость сию́ оставили есте́.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
Бие́н был еси́, но не раздели́лся еси́ Сло́ве,/ ея́же причасти́лся еси́ пло́ти:/ а́ще бо и разори́ся Твой храм во вре́мя стра́сти,/ но и та́ко еди́н бе соста́в Божества́ и пло́ти Твоея́.// Во обои́х бо Еди́н еси́ Сын, Сло́во Бо́жие, Бог и Челове́к.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
Человекоуби́йственно, но не богоуби́йственно бысть прегреше́ние Ада́мово:/ а́ще бо и пострада́ Твоея́ пло́ти пе́рстное существо́,/ но Божество́ безстра́стно пребы́сть,/ тле́нное же Твое́ на нетле́ние преложи́л еси́,// и нетле́нныя жи́зни показа́л еси́ исто́чник Воскресе́нием.
(Дважды, с припевом)
Сла́ва Отцу́ и Сы́ну и Свято́му Ду́ху.
Тропарь:
Ца́рствует ад, но не ве́чнует над ро́дом челове́ческим:/ Ты бо поло́жся во гро́бе Держа́вне, живонача́льною дла́нию,/ сме́рти ключи́ разве́ргл еси́,/ и пропове́дал еси́ от ве́ка та́мо спя́щим, избавле́ние нело́жное// быв Спа́се, ме́ртвым пе́рвенец.
И ны́не и при́сно и во ве́ки веко́в. Ами́нь.
Тропарь:
Ца́рствует ад, но не ве́чнует над ро́дом челове́ческим:/ Ты бо поло́жся во гро́бе Держа́вне, живонача́льною дла́нию,/ сме́рти ключи́ разве́ргл еси́,/ и пропове́дал еси́ от ве́ка та́мо спя́щим, избавле́ние нело́жное// быв Спа́се, ме́ртвым пе́рвенец.
Хор:
Ят бысть,/ но не удержа́н в пе́рсех ки́товых Ио́на:/ Твой бо о́браз нося́,/ Страда́вшаго, и погребе́нию да́вшагося,/ я́ко от черто́га от зве́ря изы́де./ Приглаша́ше же кустоди́и,/ храня́щии су́етная и ло́жная,// ми́лость сию́ оставили есте́.
Го́споди, поми́луй.
(Трижды)
Бе́здну заключи́вый, мертв зри́тся,/ и сми́рною и плащани́цею обви́вся,/ во гро́бе полага́ется я́ко сме́ртный Безсме́ртный:/ жены́ же приидо́ша пома́зати Его́ ми́ром,/ пла́чущия го́рько и вопию́щия:/ сия́ суббо́та есть преблагослове́нная,// в не́йже Христо́с усну́в, воскре́снет тридне́вен.
Содержа́й вся на Крест вознесе́ся,/ и рыда́ет вся тварь, Того́ ви́дящи на́га ви́сяща на дре́ве,/ со́лнце лучи́ сокры́, и зве́зды отложи́ша свет:/ земля́ же со мно́гим стра́хом поколеба́ся, и мо́ре побеже́,/ и ка́мение распаде́ся, гро́би же мно́ги отверзо́шася,/ и телеса́ воста́ша святы́х муже́й./ Ад ни́зу сте́нет,/ и иуде́е сове́туют оклевета́ти Христо́во Воскресе́ние./ Жены́ же взыва́ют:/ сия́ суббо́та есть преблагослове́нная,// в не́йже Христо́с, усну́в, воскре́снет тридне́вен.
Кано́н Благове́щения, глас 4:
Ирмос:
Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.
(Дважды, с припевом)
Припев:
Пресвята́я Богоро́дице, спаси́ нас.
Богоро́дица рече́:
Свет невеще́ственный пове́дая, в веще́ственне телеси́ совокупля́емь за милосе́рдие мно́гое,/ све́тлое благове́щение, Боже́ственная пропове́дания, ны́не взыва́еши Ми:// благослове́н, Всечи́стая, Плод Твоего́ чре́ва.
Припев:
Пресвята́я Богоро́дице, спаси́ нас.
А́нгел возопи́:
Ра́дуйся, Влады́чице Де́во,/ ра́дуйся, Пречи́стая,/ ра́дуйся, прия́телище Бо́жие,/ ра́дуйся, све́щниче Све́та, Ада́мово воззва́ние,/ Е́вы избавле́ние, горо́ свята́я,// прея́вственное свяще́ние и черто́г безсме́ртия.
Пресвята́я Богоро́дице, спаси́ нас.
Богоро́дица рече́:
Ду́шу очи́сти, те́ло освяти́,/ це́рковь сотвори́ Мя вмести́тельну Бо́га,/ ски́нию Богоукра́шену, одушевле́н храм наи́тием Пресвята́го Ду́ха// и Жи́зни чи́стую Ма́терь.
Пресвята́я Богоро́дице, спаси́ нас.
А́нгел возопи́:
Я́ко многосве́тлую свещу́ и Богоде́ланен черто́г,/ ви́жу Тя ны́не, я́ко злат киво́т,/ зако́на Пода́теля приими́, Богоневе́сто,// благоизво́лившаго челове́ческое изба́вити Тобо́ю тле́нное существо́.
Кано́н Вели́кой Суббо́ты, глас 6:
Ирмос:
Неизрече́нное чу́до,/ в пещи́ изба́вивый/ преподо́бныя о́троки из пла́мене,/ во гро́бе мертв/ бездыха́нен полага́ется,/ во спасе́ние нас пою́щих:/ Изба́вителю Бо́же,// благослове́н еси́.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
Уязви́ся ад, в се́рдце/ прие́м Уя́звеннаго копие́м в ре́бра,/ и воздыха́ет огне́м Боже́ственным иждива́емь,/ во спасе́ние нас пою́щих:// Изба́вителю Бо́же, благослове́н еси́.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
Бога́т гроб,/ в себе́ бо прии́м я́ко спя́ща Соде́теля,/ жи́зни Боже́ственное сокро́вище показа́ся,/ во спасе́ние нас пою́щих:// Изба́вителю Бо́же, благослове́н еси́.
(Дважды, с припевом)
Припев:
Сла́ва Отцу́ и Сы́ну и Свято́му Ду́ху.
Тропарь:
Зако́ном уме́рших/ е́же во гро́бе положе́ние, всех прие́млет Жизнь,/ и сего́ исто́чника показу́ет воста́ния,/ во спасе́ние нас пою́щих:// Изба́вителю Бо́же, благослове́н еси́.
И ны́не и при́сно и во ве́ки веко́в. Ами́нь.
Тропарь:
Еди́но бя́ше неразлу́чное,/ е́же во а́де, и во гро́бе, и во Еде́ме,/ Божество́ Христо́во, со Отце́м и Ду́хом,/ во спасе́ние нас пою́щих:// Изба́вителю Бо́же, благослове́н еси́.
Неизрече́нное чу́до,/ в пещи́ изба́вивый/ преподо́бныя о́троки из пла́мене,/ во гро́бе мертв/ бездыха́нен полага́ется,/ во спасе́ние нас пою́щих:/ Изба́вителю Бо́же,// благослове́н еси́.
Кано́н Благове́щения, глас 4:
Ирмос:
Слы́ши, Отрокови́це, Де́во чи́стая, да рече́т у́бо Гаврии́л, сове́т Вы́шняго дре́вний и́стинный: бу́ди к прия́тию гото́ва Бо́жию, Тобо́ю бо Невмести́мый с челове́ки поживе́. Те́м и, ра́дуяся, вопию́: благослови́те, вся́ дела́ Госпо́дня, Го́спода.
(Дважды, с припевом)
Припев:
Пресвята́я Богоро́дице, спаси́ нас.
Богоро́дица рече́:
Ум всяк побежда́ется земны́х, – отвеща́ Деви́ца, –/ и́щущи, я́же Мне веща́еши, пресла́вная:/ слы́шах твоя́ словеса́, но бою́ся, ужаса́ющися,/ да не ле́стию Мя, я́ко Е́ву, дале́че по́слеши от Бо́га./ Но оба́че се вопию́// благослови́те, вся дела́ Госпо́дня, Го́спода и превозноси́те Его́ во ве́ки.
Припев:
Пресвята́я Богоро́дице, спаси́ нас.
А́нгел возопи́:
Се Тебе́ недоуме́нное разреши́ся, – глаго́лет к сим Гаврии́л, – до́бре бо рекла́, еси́, вещь неудобопости́жна./ Словесе́м Твои́х усте́н повину́ющися про́чее,/ не сумни́ся, я́ко ле́сти, я́коже ве́щи, ве́руй./ Аз бо, ра́дуяся, вопию́:// благослови́те, вся дела́ Госпо́дня, Го́спода и превозноси́те Его́ во ве́ки.
Пресвята́я Богоро́дице, спаси́ нас.
Богоро́дица рече́:
Зако́н сей от Бо́га есть челове́ком, – Непоро́чная а́бие глаго́лет, –/ от о́бщия любве́ рождество́ происхо́дит./ Не вем супру́жника сла́сти всеконе́чно,/ ка́ко, у́бо глаго́леши, я́ко рожду́?/ Бою́ся, еда́ лесть глаго́леши?/ Но оба́че се вопию́:// благослови́те, вся дела́ Госпо́дня, Го́спода и превозноси́те Его́ во ве́ки.
Пресвята́я Богоро́дице, спаси́ нас.
А́нгел возопи́:
Глаго́лы, я́же мне веща́еши, Чи́стая, –/ А́нгел па́ки глаго́лет, –/ обы́чая есть рождества́ челове́ков сме́ртных,/ и́стинно Бо́га Тебе́ обещава́ю,/ па́че сло́ва же и смы́сла воплоща́ема, я́ко весть, из Тебе́./ Те́мже и, ра́дуяся, вопию́:// благослови́те, вся дела́ Госпо́дня, Го́спода и превозноси́те Его́ во ве́ки.
Кано́н Вели́кой Суббо́ты, глас 6:
Ирмос:
Ужасни́ся боя́йся не́бо,/ и да подви́жатся основа́ния земли́:/ се бо в мертвеце́х вменя́ется в вы́шних Живы́й,/ и во гроб мал странноприе́млется./ Его́же о́троцы благослови́те,/ свяще́нницы воспо́йте,// лю́дие превозноси́те во вся ве́ки.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
Разруши́ся Пречи́стый храм,/ па́дшую же совозставля́ет ски́нию:/ Ада́му бо пе́рвому Вторы́й, И́же в вы́шних Живы́й,/ сни́де да́же до а́довых сокро́вищ./ Его́же о́троцы благослови́те,/ свяще́нницы воспо́йте,// лю́дие превозноси́те во вся ве́ки.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
Преста́ де́рзость ученико́в,/ Аримафе́й же изря́дствует Ио́сиф:/ ме́ртва бо и на́га зря, над все́ми Бо́га,/ про́сит и погреба́ет, зовы́й:/ о́троцы благослови́те,/ свяще́нницы воспо́йте,// лю́дие, превозноси́те во вся ве́ки.
(Дважды, с припевом)
Припев:
Благослови́м Отца́, и Сы́на, и Свята́го Ду́ха, Го́спода.
Тропарь:
О чуде́с но́вых!/ О бла́гости!/ О неизрече́ннаго терпе́ния!/ Во́лею бо под земле́ю печатле́ется, И́же в вы́шних Живы́й,/ и я́ко льстец, Бог оклевета́ется./ Его́же о́троцы благослови́те,/ свяще́нницы воспо́йте,// лю́дие превозноси́те во вся ве́ки.
И ны́не и при́сно и во ве́ки веко́в. Ами́нь.
Тропарь:
О чуде́с но́вых!/ О бла́гости!/ О неизрече́ннаго терпе́ния!/ Во́лею бо под земле́ю печатле́ется, И́же в вы́шних Живы́й,/ и я́ко льстец, Бог оклевета́ется./ Его́же о́троцы благослови́те,/ свяще́нницы воспо́йте,// лю́дие превозноси́те во вся ве́ки.
Хор:
Ужасни́ся боя́йся не́бо,/ и да подви́жатся основа́ния земли́:/ се бо в мертвеце́х вменя́ется в вы́шних Живы́й,/ и во гроб мал странноприе́млется./ Его́же о́троцы благослови́те,/ свяще́нницы воспо́йте,// лю́дие превозноси́те во вся ве́ки.
Кано́н Благове́щения, глас 4:
В начале 9-й песни, по традиции, отверзаются царские врата. Совершающий полунощницу иерей с диаконом, совершив каждение вокруг Плащаницы.
Ирмос:
Я́ко одушевле́нному Бо́жию киво́ту, да ника́коже ко́снется рука́ скве́рных. Устне́ же ве́рных, Богоро́дице, немо́лчно, гла́с а́нгела воспева́юще, с ра́достию да вопию́т: ра́дуйся, Благода́тная, Госпо́дь с Тобо́ю.
(Дважды, с припевом)
Припев:
Пресвята́я Богоро́дице, спаси́ нас.
Тропа́рь:
Па́че смы́сла заче́нши Бо́га, естества́ обы́чая утаи́ся, Отрокови́це,/ Ты бо в рождестве́ ма́терскаго избежа́ла еси́ тле́ннаго естества́/ и превы́шши су́щи./ Те́мже досто́йно слы́шиши:// ра́дуйся, Благода́тная, Госпо́дь с Тобо́ю.
Припев:
Пресвята́я Богоро́дице, спаси́ нас.
Тропа́рь:
Ка́ко то́чиши млеко́, Де́во Чи́стая, не мо́жет изрещи́ язы́к зе́млен,/ стра́нну бо естества́ показу́еши вещь, зако́ннаго рождества́ уста́в прехо́диши./ Те́мже досто́йно слы́шиши:// ра́дуйся, Благода́тная, Госпо́дь с Тобо́ю.
Пресвята́я Богоро́дице, спаси́ нас.
Тропа́рь:
Та́йно во свяще́нных писа́ниих/ глаго́лася о Тебе́, Ма́ти Вы́шняго,/ ле́ствицу бо дре́вле Иа́ков, Тя образу́ющую, ви́дев, рече́:/ степе́нь Бо́жия сия́./ Те́мже досто́йно слы́шиши:// ра́дуйся, Благода́тная, Госпо́дь с Тобо́ю.
Пресвята́я Богоро́дице, спаси́ нас.
Тропа́рь:
Чу́дное священноявле́нному Моисе́ю/ купина́ и огнь показа́ чу́до,/ ища́й же конца́ в прехожде́нии време́н, во Отрокови́це чи́стей, рече́, узрю́./ Е́йже, я́ко Богоро́дице, да рече́тся:// ра́дуйся, Благода́тная, Госпо́дь с Тобо́ю.
Кано́н Вели́кой Суббо́ты, глас 6:
Ирмос:
Не рыда́й Мене́ Ма́ти,/ зря́щи во гро́бе,/ Его́же во чре́ве без се́мене зачала́ еси́ Сы́на:/ воста́ну бо и просла́влюся,/ и вознесу́ со сла́вою, непреста́нно я́ко Бог,// ве́рою и любо́вию Тя велича́ющия.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
В стра́ннем Твое́м рождестве́,/ боле́зней избежа́вше па́че естества́,/ ублажи́хся Безнача́льне Сы́не:/ ны́не же Тя Бо́же мой,/ бездыха́нна зря́щи ме́ртва,/ ору́жием печа́ли растерза́юся лю́те,// но воскресни́, я́ко да возвели́чуся.
(Дважды, с припевом)
Припев:
Сла́ва Тебе́, Бо́же наш, сла́ва Тебе́.
Тропарь:
Земля́ покрыва́ет Мя хотя́ща,/ но устраша́ются а́довы вра́тницы,/ оде́яна ви́дяще оде́ждею окровавле́ною, Ма́ти, отмще́ния:/ враги́ бо Кресто́м порази́в я́ко Бог,// воскре́сну па́ки, и возвели́чу Тя.
(Дважды, с припевом)
Сла́ва Отцу́ и Сы́ну и Свято́му Ду́ху.
Тропарь:
Да ра́дуется тварь,/ да веселя́тся вси земноро́днии,/ враг бо плени́ся ад:/ с ми́ры жены́ да срета́ют,/ Ада́ма со Е́вою избавля́ю всеро́дна,// и в тре́тий день воскре́сну.
И ны́не и при́сно и во ве́ки веко́в. Ами́нь.
Тропарь:
Да ра́дуется тварь,/ да веселя́тся вси земноро́днии,/ враг бо плени́ся ад:/ с ми́ры жены́ да срета́ют,/ Ада́ма со Е́вою избавля́ю всеро́дна,// и в тре́тий день воскре́сну.
При пении катавасии 9-й песни иерей с диаконом поднимают Плащаницу и вносят в алтарь. Вслед за этим царские врата закрываются. Плащаницу полагают на святой престол, где она должна оставаться до отдания Пасхи.
Хор:
Не рыда́й Мене́ Ма́ти,/ зря́щи во гро́бе,/ Его́же во чре́ве без се́мене зачала́ еси́ Сы́на:/ воста́ну бо и просла́влюся,/ и вознесу́ со сла́вою, непреста́нно я́ко Бог,// ве́рою и любо́вию Тя велича́ющия.
Чтец
Святы́й Бо́же, Святы́й Кре́пкий, Святы́й Безсме́ртный, поми́луй нас.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Чтец
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иерей:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Егда́ снизше́л еси́ к сме́рти, Животе́ Безсме́ртный,/ тогда́ ад умертви́л еси́ блиста́нием Божества́./ Егда́ же и уме́ршыя от преиспо́дних воскреси́л еси́,/ вся Си́лы Небе́сныя взыва́ху:// Жизнода́вче, Христе́ Бо́же наш, сла́ва Тебе́.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Тропа́рь Благове́щения, глас 4:
Хор:
Днесь спасе́ния на́шего глави́зна/ и е́же от ве́ка та́инства явле́ние:/ Сын Бо́жий Сын Де́вы быва́ет,/ и Гаврии́л благода́ть благовеству́ет./ Те́мже и мы с ним Богоро́дице возопии́м:/ ра́дуйся, Благода́тная,// Госпо́дь с Тобо́ю.
Ма́лая сугу́бая ектения́:
Иерей:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй,
(трижды, на каждое прошение.)
Иерей:
Еще́ мо́лимся о Вели́ком господи́не и отце́ нашем, Святе́йшем Патриа́рхе (ИМЯРЕК) и о господи́не на́шем высокопреосвяще́ннейшем митрополи́те (или архиепи́скопе, или преосвящ́еннейшем епи́скопе (имярек), и о всей во Христе́ бра́тии на́шей.
Еще́ мо́лимся о богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся за всю бра́тию и за вся христиа́ны.
Иерей:
Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Иерей:
Сла́ва Тебе́, Христе́ Бо́же, Упова́ние на́ше, сла́ва Тебе́.
Хор:
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Го́споди, поми́луй.
(Трижды)
Отпу́ст Вели́кой Суббо́ты.
Иерей:
И́же нас pа́ди и на́шего pа́ди спасе́ния, смиpи́в Себе́ и в на́шy нищетý облече́ся и во́лею Стpа́сти пpетеpпе́ и смеpть вкyси́в и во гpо́бе положи́выйся Хpисто́с, И́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных Апо́стол, и всех святы́х, поми́лyет и спасе́т нас, я́ко Благ и Человеколю́бец.
Хор:
Го́споди, поми́луй.
(Трижды)
Све́тлая Пасха́льная Зау́треня.
Предстоятель принимает в левую руку Крест с пасхальным трисвещником, в правую – кадило.
Ровно в 12 часов (по местному времени) при закрытых царских вратах и завесе священнослужители поют первый раз стихиру:
Воскресе́ние Твое́, Христе́ Спа́се,/ А́нгели пою́т на Небесе́х,/ и нас на земли́ сподо́би/ чи́стым се́рдцем// Тебе́ сла́вити.
При каждом пении стихиры предстоятель в предшествии диакона со свечой совершает каждение вокруг престола.
Во второй раз стихиру поют немного громче:
Воскресе́ние Твое́, Христе́ Спа́се,/ А́нгели пою́т на Небесе́х,/ и нас на земли́ сподо́би/ чи́стым се́рдцем// Тебе́ сла́вити.
Открываются царские врата, и остаются открыты до конца Светлой Седмицы.
В третий раз стихира поется громко и до половины:
Воскресе́ние Твое́, Христе́ Спа́се,/ А́нгели пою́т на Небесе́х,/
Хор завершает:
И нас на земли́ сподо́би/ чи́стым се́рдцем// Тебе́ сла́вити.
Духовенство выходит из алтаря.
Начинается крестный ход, во время которого все непрерывно поют стихиру:
Люди:
Воскресе́ние Твое́, Христе́ Спа́се,/ А́нгели пою́т на Небесе́х,/ и нас на земли́ сподо́би/ чи́стым се́рдцем// Тебе́ сла́вити.
В крестном ходе впереди несут фонарь, за ним несут парой запрестольный Крест и запрестольный образ Божией Матери (таким образом, чтобы тот, кто смотрит на приближающийся крестный ход, видел их расположенными также, как в алтаре (запрестольный Крест – справа, образ Божией Матери – слева)). Далее идут двумя рядами, попарно, хоругвеносцы, певцы, свещеносцы со свечами, диаконы со своими свечами и кадильницами и за ними священники, младшие впереди. В последней паре священников идущий справа несет Евангелие, идущий слева – икону Воскресения. Завершает шествие предстоятель с трисвещником и Крестом. Там, где один священник, допускается мирянам нести на пелена́х иконы Воскресения Христова и Евангелие. (Артос на этом крестном ходе не носят, поскольку он еще не освящен.)
Крестный ход в обычном порядке идет вокруг храма при непрерывном трезвоне.
Обойдя храм, крестный ход останавливается пред закрытыми западными дверями храма. Носящие святыни останавливаются около дверей лицом к западу в следующем порядке: фонарь (по центру, непосредственно перед дверями), затем (от южной стороны к северной) запрестольный Крест, Евангелие, икона Воскресения, запрестольный образ Божией Матери, по сторонам становятся хоругвеносцы и свещеносцы. Предстоятель и сослужа́щие священники становятся пред святынями по чину.
Настоятель, приняв от диакона кадило, при полной тишине совершает каждение святынь, духовенства, певцов и предстоящих и, в заключение, диакона.
Диакон принимает кадило, кадит предстоятеля и возвращает ему кадильницу.
Предстоятель, трижды (а не один раз) крестообразно назна́меновав кадилом затворенные церковные двери, возглашает велегласно:
Иерей:
Сла́ва Святе́й, и Единосу́щней, и Животворя́щей, и Неразде́льней Тро́ице, всегда́, ны́не и при́сно, и во ве́ки веко́в.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Духовенство:
Да воскре́снет Бог, и расточа́тся врази́ Его́,/ и да бежа́т от Лица́ Его́ ненави́дящии Его́.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Я́ко исчеза́ет дым, да исче́знут,/ я́ко та́ет воск от лица́ огня́.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Сей день, его́же сотвори́ Госпо́дь,/ возра́дуемся и возвесели́мся вонь.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Христо́с воскре́се из ме́ртвых,/ сме́ртию смерть попра́в
Хор:
И су́щим во гробе́х живо́т дарова́в.
Открываются двери храма. Все входят в храм и поют праздничные тропари:
Сла́ва Отцу́ и Сы́ну и Свято́му Ду́ху.
Тропарь:
Да ра́дуется тварь,/ да веселя́тся вси земноро́днии,/ враг бо плени́ся ад:/ с ми́ры жены́ да срета́ют,/ Ада́ма со Е́вою избавля́ю всеро́дна,// и в тре́тий день воскре́сну.
И ны́не и при́сно и во ве́ки веко́в. Ами́нь.
Да ра́дуется тварь,/ да веселя́тся вси земноро́днии,/ враг бо плени́ся ад:/ с ми́ры жены́ да срета́ют,/ Ада́ма со Е́вою избавля́ю всеро́дна,// и в тре́тий день воскре́сну.
И поют, пока диакон не выйдет на великую ектению.
Духовенство входит в алтарь.
Диакон:
Ми́ром Го́споду помо́лимся.
Хор:
Го́споди, поми́луй.
(На каждое прошение)
Диакон:
О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе (ИМЯРЕК), и о Господи́не на́шем, Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея́, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Канон Пасхальный, глас 1:
Пасхальный канон поется полностью хором: и ирмосы, и припевы, и тропари, и катавасии.
На каждой песни канона совершается каждение.
При соборном служении каждение совершают все иереи поочередно (а при большом числе иереев – попарно).
Ирмос:
Воскресе́ния день,/ просвети́мся, лю́дие./ Па́сха, Госпо́дня Па́сха:/ от сме́рти бо к жи́зни,/ и от земли́ к небеси́,/ Христо́с Бог нас преведе́,// побе́дную пою́щия.
(Дважды, с припевом)
Припев:
Христо́с воскре́се из ме́ртвых.
Очи́стим чу́вствия, и у́зрим/ непристу́пным све́том/ Воскресе́ния, Христа́/ блиста́ющася,/ и ра́дуйтеся, реку́ща,/ я́сно да услы́шим,// побе́дную пою́ще.
(Трижды, с припевом)
Припев:
Христо́с воскре́се из ме́ртвых.
Небеса́ у́бо досто́йно да веселя́тся,/ земля́ же да ра́дуется,/ да пра́зднует же мир,/ ви́димый же весь и неви́димый:/ Христо́с бо воста́,// весе́лие ве́чное.
(Трижды, с припевом)
Кано́н Благове́щения, глас 4:
Ирмо́с:
Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́, ра́дуяся, Тоя́ чудеса́.
(Дважды, с припевом)
Припев:
Пресвята́я Богоро́дице, спаси́ нас.
Тропа́рь:
Да пое́т Тебе́, Влады́чице, дви́жа свире́ль духо́вную, Дави́д, пра́отец Твой:/ послу́шай, Дщи, ра́дованнаго гла́са от А́нгела,// ра́дость бо возвеща́ет Тебе́ неизглаго́ланную.
(Дважды, с припевом)
Припев:
Пресвята́я Богоро́дице, спаси́ нас.
А́нгел возопи́:
Вопию́ Тебе́, веселя́ся,/ приклони́ у́хо Твое́ и вонми́ ми,/ Бо́жие возвеща́ющу безсе́менное зача́тие,/ обрела́ бо еси́ благода́ть пред Бо́гом,// ея́же никогда́же обре́те друга́я, Всечи́стая.
(Дважды, с припевом)
Припев:
Сла́ва Отцу́, и Сы́ну, и Свято́му Ду́ху.
Богоро́дица рече́:
Да разуме́ю, А́нгеле, твои́х глаго́л си́лу,/ ка́ко бу́дет, е́же рекл еси́, глаго́ли я́вственнейше?/ Ка́ко зачну́, Де́ва су́щи, Отрокови́ца?// Ка́ко же и Ма́ти бу́ду Зижди́теля Моего́?
И ны́не и при́сно и во ве́ки веко́в, ами́нь.
А́нгел возопи́:
Ле́стно мя веща́ти помышля́еши, я́ко мню,/ и ра́дуюся, зря Твое́ утвержде́ние./ Дерза́й, Влады́чице,// Бо́гу бо хотя́щу, удо́бь сконча́ются и пресла́вная.
Воскресе́ния день,/ просвети́мся, лю́дие./ Па́сха, Госпо́дня Па́сха:/ от сме́рти бо к жи́зни,/ и от земли́ к небеси́,/ Христо́с Бог нас преведе́,// побе́дную пою́щия.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Катава́сия Благове́щения, глас 4:
Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́, ра́дуяся, Тоя́ чудеса́.
Для произнесения ектений и совершения каждений диакон (со свечой в руке) во всех случаях исходит из алтаря царскими вратами (во всю Светлую седмицу).
Диакон:
Па́ки и па́ки ми́ром Го́споду помо́лимся.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко Твоя́ держа́ва, и Твое́ есть Ца́рство, и си́ла, и сла́ва Отца́, и Сы́на, и Свята́го Ду́ха, ны́не и при́сно, и во ве́ки веко́в.
Канон Пасхальный, глас 1:
Ирмос:
Прииди́те, пи́во пие́м но́вое,/ не от ка́мене непло́дна чудоде́емое,/ но нетле́ния исто́чник/ из гро́ба одожди́вша Христа́,// в Не́мже утвержда́емся.
(Дважды, с припевом)
Припев:
Христо́с воскре́се из ме́ртвых.
Ны́не вся испо́лнишася све́та,/ не́бо же и земля́, и преиспо́дняя:/ да пра́зднует у́бо вся тварь/ воста́ние Христо́во,// в не́мже утвержда́ется.
(Трижды, с припевом)
Припев:
Христо́с воскре́се из ме́ртвых.
Вчера́ спогребо́хся Тебе́ Христе́,/ совостаю́ днесь/ воскре́сшу Тебе́,/ сраспина́хся Тебе́ вчера́,// Сам мя спросла́ви Спа́се во Ца́рствии Твое́м.
(Трижды, с припевом)
Кано́н Благове́щения, глас 4:
Ирмо́с:
Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
(Дважды, с припевом)
Припев:
Пресвята́я Богоро́дице, спаси́ нас.
Богоро́дица рече́:
Оскуде́ князь от Иу́ды, вре́мя наста́ про́чее,/ в не́же яви́тся язы́ков наде́жда, Христо́с;// ты же, ка́ко Сего́ рожду́, Де́ва су́щи, скажи́?
(Дважды, с припевом)
Припев:
Пресвята́я Богоро́дице, спаси́ нас.
А́нгел возопи́:
И́щеши от мене́ уве́дети Де́во, о́браз зача́тия Твоего́,/ но той несказа́нен есть:// Дух же Святы́й, зижди́тельною си́лою осени́в Тя, соверши́т.
(Дважды, с припевом)
Припев:
Сла́ва Отцу́, и Сы́ну, и Свято́му Ду́ху.
Богоро́дица рече́:
Моя́ прама́ти, прие́мши ра́зум змии́н, пи́щи Боже́ственныя изгна́на бысть,/ те́мже и Аз бою́ся целова́ния стра́ннаго твоего́,// стыдя́щися поползнове́ния.
Припев:
И ны́не и при́сно и во ве́ки веко́в, ами́нь.
А́нгел возопи́:
Бо́жий предста́тель, по́слан есмь Боже́ственный пове́дати Тебе́ сове́т./ Что мене́ бои́шися, Всенепоро́чная, па́че Тебе́ боя́щагося?/ Что благогове́еши мне, Влады́чице,// Тебе́ че́стно благогове́ющему?
Прииди́те, пи́во пие́м но́вое,/ не от ка́мене непло́дна чудоде́емое,/ но нетле́ния исто́чник/ из гро́ба одожди́вша Христа́,// в Не́мже утвержда́емся.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Катава́сия Благове́щения, глас 4:
Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Диакон:
Па́ки и па́ки ми́ром Го́споду помо́лимся.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко Ты еси́ Бог наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
А́ще и во гроб снизше́л еси́, Безсме́ртне,/ но а́дову разруши́л еси́ си́лу,/ и воскре́сл еси́, я́ко победитель, Христе́ Бо́же,/ жена́м мироно́сицам веща́вый: ра́дуйтеся,/ и Твои́м апо́столом мир да́руяй,// па́дшим подая́й воскресе́ние.
Е́же пре́жде со́лнца Со́лнце заше́дшее иногда́ во гроб,/ предвари́ша ко у́тру, и́щущия я́ко дне мироно́сицы де́вы,/ и друга́ ко друзе́й вопия́ху:/ о други́ни! Прииди́те, воня́ми пома́жем те́ло живоно́сное и погребе́ное,/ плоть воскреси́вшаго па́дшаго Ада́ма, лежа́щую во гро́бе./ И́дем, потщи́мся я́коже волсви́, и поклони́мся,/ и принесе́м ми́ра я́ко да́ры, не в пелена́х, но в плащани́це обви́тому,/ и пла́чим, и возопии́м: о Влады́ко, воста́ни,// па́дшим подая́й воскресе́ние.
Предвари́вшия у́тро я́же о Мари́и,/ и обре́тшия ка́мень отвале́н от гро́ба,/ слы́шаху от А́нгела: во све́те присносу́щнем Су́щаго,/ с ме́ртвыми что и́щете, я́ко челове́ка?/ Ви́дите гро́бныя пелены́, тецы́те и ми́ру пропове́дите,/ я́ко воста́ Госпо́дь, умертви́вый смерть,// я́ко есть Сын Бо́га, спаса́ющаго род челове́ческий.
Канон Пасхальный, глас 1:
Ирмос:
На Боже́ственней стра́жи/ богоглаго́ливый Авваку́м/ да ста́нет с на́ми, и пока́жет/ светоно́сна А́нгела,/ я́сно глаго́люща:/ днесь спасе́ние ми́ру,/ я́ко воскре́се Христо́с,// я́ко всеси́лен.
(Дважды, с припевом)
Припев:
Христо́с воскре́се из ме́ртвых.
Му́жеский у́бо пол,/ я́ко разве́рзый де́вственную утро́бу,/ яви́ся Христо́с:/ я́ко челове́к же,/ А́гнец нарече́ся:/ непоро́чен же,/ я́ко невку́сен скве́рны,/ на́ша Па́сха,/ и я́ко Бог и́стинен// соверше́н рече́ся.
(Дважды, с припевом)
Припев:
Христо́с воскре́се из ме́ртвых.
Я́ко единоле́тный а́гнец,/ благослове́нный нам вене́ц Христо́с,/ во́лею за всех закла́н бысть,/ Па́сха чисти́тельная,/ и па́ки из гро́ба кра́сное// пра́вды нам возсия́ Со́лнце.
(Дважды, с припевом)
Припев:
Христо́с воскре́се из ме́ртвых.
Богооте́ц у́бо Дави́д/ пред се́нным ковче́гом скака́ше игра́я,/ лю́дие же Бо́жии святи́и,/ образо́в сбытие́ зря́ще,/ весели́мся Боже́ственне,/ я́ко воскре́се Христо́с,// я́ко Всеси́лен.
(Дважды, с припевом)
Кано́н Благове́щения, глас 4:
Ирмо́с:
Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спа́се зову́щия:/ сла́ва, Христе́, си́ле Твое́й.
Припев:
Пресвята́я Богоро́дице, спаси́ нас.
Богоро́дица рече́:
Свяще́нную не́кую Де́ву ражда́ющую слы́шах проро́ка, дре́вле Емману́ила проре́кша;/ хощу́ же разуме́ти, ка́ко Божества́ растворе́ние естество́ челове́ческое претерпи́т?
Припев:
Пресвята́я Богоро́дице, спаси́ нас.
А́нгел возопи́:
Яви́ла е́сть купина́, неопа́льна пребы́вши,/ прие́мши пла́мень, обра́дованная Всепе́тая, на Тебе́ та́инства пресла́вное:/ по рождестве́ бо пребу́деши Чи́стая Присноде́ва.
Припев:
Сла́ва Отцу́, и Сы́ну, и Свято́му Ду́ху.
Богоро́дица рече́:
Освеща́емь сия́нием Бо́га Вседержи́теля,/ и́стины пропове́дниче, глаго́ли, Гаврии́ле, и́стиннейшя:/ ка́ко, нетле́ние бы́вши чистоте́ Мое́й,/ Сло́ва рожду́, с пло́тию Безпло́тнаго?
Припев:
И ны́не и при́сно и во ве́ки веко́в, ами́нь.
А́нгел возопи́:
Со стра́хом Тебе́, я́ко раб Госпоже́, предстою́,/ с боя́знию, Отрокови́це, ны́не смотри́ти стыжду́ся Тебе́,/ я́ко бо до́ждь на руно́, сни́дет на Тя Сло́во О́тчее, я́ко благоволи́.
На Боже́ственней стра́жи/ богоглаго́ливый Авваку́м/ да ста́нет с на́ми, и пока́жет/ светоно́сна А́нгела,/ я́сно глаго́люща:/ днесь спасе́ние ми́ру,/ я́ко воскре́се Христо́с,// я́ко всеси́лен.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Катава́сия Благове́щения, глас 4:
Ирмо́с:
Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:// сла́ва, Христе́, си́ле Твое́й.
Диакон:
Па́ки и па́ки ми́ром Го́споду помо́лимся.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко Благ и Человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Канон Пасхальный, глас 1:
Ирмос:
У́тренюем у́треннюю глубоку́,/ и вме́сто ми́ра песнь принесе́м Влады́це,/ и Христа́ у́зрим/ пра́вды Со́лнце,// всем жизнь возсия́юща.
(Дважды, с припевом)
Припев:
Христо́с воскре́се из ме́ртвых.
Безме́рное Твое́ благоутро́бие,/ а́довыми у́зами содержи́мии зря́ще,/ к све́ту идя́ху Христе́,/ весе́лыми нога́ми,// Па́сху хва́ляще ве́чную.
(Трижды, с припевом)
Припев:
Христо́с воскре́се из ме́ртвых.
Присту́пим свещено́снии,/ исходя́щу Христу́ из гро́ба, я́ко жениху́,/ и спра́зднуем любопра́зднственными чи́нми// Па́сху Бо́жию спаси́тельную.
(Трижды, с припевом)
Кано́н Благове́щения, глас 4:
Ирмо́с:
Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя// мир подава́ющая.
(Дважды, с припевом)
Припев:
Пресвята́я Богоро́дице, спаси́ нас.
Богоро́дица рече́:
Разуме́ти не могу́ Твои́х слове́с изве́стия:/ чудеса́ бо бы́ша мно́жицею,/ Боже́ственною си́лою чудоде́йствуема,/ зна́мения и о́бразы зако́ннии,// роди́ же де́ва неискусому́жне никогда́же.
(Дважды, с припевом)
Припев:
Пресвята́я Богоро́дице, спаси́ нас.
А́нгел возопи́:
Диви́т, Всенепоро́чная, и стра́нно бо чу́до Твое́,/ еди́на бо Ты всех Царя́ прии́меши во утро́бе воплоща́ема,// и Тя прообразу́ют проро́ческая рече́ния, и гада́ния, и зако́ннии о́бразы.
(Дважды, с припевом)
Припев:
Сла́ва Отцу́, и Сы́ну, и Свято́му Ду́ху.
Богоро́дица рече́:
Все́ми Невмести́мый и все́ми Неви́димый,/ ка́ко сей мо́жет во чре́ве деви́че всели́тися, е́же Сам созда́?// Ка́ко же и зачну́ Бо́га Сло́ва, собезнача́льна Отцу́ и Ду́ху?
Припев:
И ны́не и при́сно и во ве́ки веко́в, ами́нь.
А́нгел возопи́:
К Твоему́ пра́отцу Дави́ду обеща́вся/ посади́ти от плода́ Твоего́ чре́ва на престо́ле ца́рства его́,// Иа́ковлю Тя добро́ту, еди́ну избра́ в слове́сное селе́ние.
У́тренюем у́треннюю глубоку́,/ и вме́сто ми́ра песнь принесе́м Влады́це,/ и Христа́ у́зрим/ пра́вды Со́лнце,// всем жизнь возсия́юща.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Катава́сия Благове́щения, глас 4:
Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя// мир подава́ющая.
Диакон:
Па́ки и па́ки ми́ром Го́споду помо́лимся.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко святи́ся и просла́вися пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Канон Пасхальный, глас 1:
Ирмос:
Снизше́л еси́ в преиспо́дняя земли́,/ и сокруши́л еси́ вереи́ ве́чныя,/ содержа́щия свя́занныя, Христе́,/ и тридне́вен, я́ко от ки́та Ио́на,// воскре́сл еси́ от гро́ба.
(Дважды, с припевом)
Припев:
Христо́с воскре́се из ме́ртвых.
Сохрани́в це́ла зна́мения Христе́,/ воскре́сл еси́ от гро́ба,/ ключи́ Де́вы не вреди́вый в рождестве́ Твое́м,// и отве́рзл еси́ нам ра́йския две́ри.
(Трижды, с припевом)
Припев:
Христо́с воскре́се из ме́ртвых.
Спа́се мой,/ живо́е же и неже́ртвенное заколе́ние,/ я́ко Бог Сам Себе́/ во́лею приве́л Отцу́,/ совоскреси́л еси́ всеро́днаго Ада́ма,// воскре́с от гро́ба.
(Трижды, с припевом)
Кано́н Благове́щения, глас 4:
Ирмо́с:
Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя,// Иису́се, Царю́ сил.
(Дважды, с припевом)
Припев:
Пресвята́я Богоро́дице, спаси́ нас.
Богоро́дица рече́:
Глаго́л твои́х, Гаврии́ле, глас ра́дованен прие́мши, весе́лия Боже́ственнаго испо́лнихся:// ра́дость бо пове́даеши и весе́лие возвеща́еши безконе́чное.
(Дважды, с припевом)
Припев:
Пресвята́я Богоро́дице, спаси́ нас.
А́нгел возопи́:
Тебе́ даде́ся ра́дость, Богома́ти Боже́ственная,/ Тебе́, е́же ра́дуйся, вся тварь вопие́т, Богоневе́сто:// Ты бо еди́на Ма́ти Сы́на Бо́жия пронарече́ся, Чи́стая.
(Дважды, с припевом)
Припев:
Сла́ва Отцу́, и Сы́ну, и Свято́му Ду́ху.
Богоро́дица рече́:
Е́вы Мно́ю ны́не да упраздни́тся осужде́ние,/ да возда́стся Мно́ю долг днесь,// Мно́ю заи́мствование дре́внее да да́стся преиспо́лнено.
Припев:
И ны́не и при́сно и во ве́ки веко́в, ами́нь.
А́нгел возопи́:
Обеща́ся Бог Авраа́му пра́отцу/ благослови́тися в се́мене его́ язы́ком, Чи́стая,// Тобо́ю же коне́ц обеща́ние прие́млет днесь.
Снизше́л еси́ в преиспо́дняя земли́,/ и сокруши́л еси́ вереи́ ве́чныя,/ содержа́щия свя́занныя, Христе́,/ и тридне́вен, я́ко от ки́та Ио́на,// воскре́сл еси́ от гро́ба.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Катава́сия Благове́щения, глас 4:
Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя,// Иису́се, Царю́ сил.
Диакон:
Па́ки и па́ки ми́ром Го́споду помо́лимся.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Ты бо еси́ Царь ми́ра, и Спас душ на́ших, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Конда́к Благове́щения, глас 8:
Взбра́нной Воево́де победи́тельная,/ я́ко изба́вльшеся от злых,/ благода́рственная воспису́ем Ти, раби́ Твои́, Богоро́дице,/ но, я́ко иму́щая держа́ву непобеди́мую,/ от вся́ких нас бед свободи́, да зове́м Ти:// ра́дуйся, Неве́сто Неневе́стная.
А́нгел предста́тель с Небесе́ по́слан бысть рещи́ Богоро́дице: ра́дуйся!/ И со безпло́тным гла́сом воплоща́ема Тя зря, Го́споди, ужаса́шеся/ и стоя́ше, зовы́й к Ней такова́я:/ ра́дуйся, Е́юже ра́дость возсия́ет;/ ра́дуйся, Е́юже кля́тва исче́знет./ Ра́дуйся, па́дшаго Ада́ма воззва́ние;/ ра́дуйся, слез Е́виных избавле́ние./ Ра́дуйся, высото́ неудобовосходи́мая челове́ческими по́мыслы;/ ра́дуйся, глубино́ неудобозри́мая и А́нгельскима очи́ма./ Ра́дуйся, я́ко еси́ Царе́во седа́лище;/ ра́дуйся, я́ко но́сиши нося́щаго вся./ Ра́дуйся, звездо́, явля́ющая Со́лнце;/ ра́дуйся, утро́бо Боже́ственнаго воплоще́ния./ Ра́дуйся, Е́юже обновля́ется тварь;/ ра́дуйся, Е́юже покланя́емся Творцу́.// Ра́дуйся, Неве́сто Неневе́стная.
Диа́кон:
Во́нмем. Прему́дрость во́нмем, проки́мен, глас четве́ртый: Благовести́те день от дне/ спасе́ние Бо́га на́шего.
Хор:
Благовести́те день от дне/ спасе́ние Бо́га на́шего.
Диа́кон:
Воспо́йте Го́сподеви песнь но́ву, воспо́йте Го́сподеви, вся земля́.
Хор:
Благовести́те день от дне/ спасе́ние Бо́га на́шего.
Диа́кон:
Благовести́те день от дне/
Хор:
Спасе́ние Бо́га на́шего.
Диа́кон:
Го́споду помо́лимся.
Иере́й:
Я́ко Свят еси́ Бо́же наш, и во святы́х почива́еши, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Диа́кон:
Вся́кое дыха́ние да хва́лит Го́спода.
Хор:
Вся́кое дыха́ние да хва́лит Го́спода.
Диа́кон:
Хвали́те Бо́га во святы́х Его́, хвали́те Его́ во устверже́нии си́лы Его́.
Хор:
Вся́кое дыха́ние да хва́лит Го́спода.
Диа́кон:
Вся́кое дыха́ние.
Хор:
Да хва́лит Го́спода.
Диа́кон:
И о сподо́битися нам слы́шанию Свята́го Ева́нгелиа, Го́спода Бо́га мо́лим.
Хор:
Го́споди, поми́луй.
(Три́жды)
Диа́кон:
Прему́дрость, про́сти, услы́шим Свята́го Ева́нгелия.
Иере́й:
От Луки́ Свята́го Ева́нгелия чте́ние.
Хор:
Сла́ва, Тебе́, Го́споди, сла́ва Тебе́.
Иере́й:
Во дни о́ны, воста́вши, Мариа́м, и́де в го́рняя со тща́нием, во град Иу́дов. И вни́де в дом Заха́риин, и целова́ Елисаве́т. И бысть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́: и испо́лнися Ду́ха Свя́та Елисаве́т. И возопи́ гла́сом ве́лиим, и рече́: благослове́на Ты в жена́х, и благослове́н плод чре́ва Твоего́. И отку́ду мне сие́, да прии́де Ма́ти Го́спода моего́ ко мне? Се бо, я́ко бысть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м. И блаже́нна Ве́ровавшая, яко бу́дет соверше́ние глаго́ланным Ей от Го́спода. И рече́ Мариа́м: вели́чит душа́ Моя́ Го́спода, и возра́довася дух Мой о Бо́зе Спа́се Мое́м. Я́ко призре́ на смире́ние Рабы́ Своея́: се бо, отны́не ублажа́т Мя вси ро́ди. Я́ко сотвори́ Мне вели́чие Си́льный, и свя́то и́мя Его́. Пребы́сть же Мариа́мь с нею я́ко три ме́сяцы, и возврати́ся в дом Свой.
Хор:
Сла́ва, Тебе́, Го́споди, сла́ва Тебе́.
Воскресе́ние Христо́во ви́девше,/ поклони́мся Свято́му Го́споду Иису́су,/ еди́ному безгре́шному,/ Кресту́ Твоему́ покланя́емся, Христе́,/ и свято́е Воскресе́ние Твое́ пое́м и сла́вим:/ Ты бо еси́ Бог наш,/ ра́зве Тебе́ ино́го не зна́ем,/ и́мя Твое́ имену́ем./ Прииди́те вси ве́рнии,/ поклони́мся Свято́му Христо́ву Воскресе́нию:/ се бо прии́де Кресто́м ра́дость всему́ ми́ру./ Всегда́ благословя́ще Го́спода,/ пое́м Воскресе́ние Его́:/ распя́тие бо претерпе́в,// сме́ртию смерть разруши́.
(Трижды)
Воскре́с Иису́с от гро́ба,/ я́коже прорече́,/ даде́ нам живо́т ве́чный// и ве́лию ми́лость.
(Трижды)
Канон Пасхальный, глас 1:
Ирмос:
О́троки от пе́щи изба́вивый,/ быв Челове́к,/ стра́ждет я́ко сме́ртен,/ и стра́стию сме́ртное,/ в нетле́ния облачи́т благоле́пие,/ Еди́н благослове́н// отце́в Бог, и препросла́влен.
(Дважды, с припевом)
Припев:
Христо́с воскре́се из ме́ртвых.
Жены́ с ми́ры богому́дрыя в след Тебе́ теча́ху:/ Его́же, я́ко ме́ртва, со слеза́ми иска́ху,/ поклони́шася ра́дующияся Живо́му Бо́гу,/ и Па́сху та́йную// Твои́м, Христе́, ученико́м благовести́ша.
(Дважды, с припевом)
Припев:
Христо́с воскре́се из ме́ртвых.
Сме́рти пра́зднуем умерщвле́ние,/ а́дово разруше́ние,/ ино́го жития́ ве́чнаго нача́ло,/ и игра́юще пое́м Вино́внаго,/ Еди́наго благослове́ннаго// отце́в Бо́га, и препросла́вленнаго.
(Дважды, с припевом)
Припев:
Христо́с воскре́се из ме́ртвых.
Я́ко вои́стинну свяще́нная,/ и всепра́зднственная сия́ спаси́тельная нощь,/ и светоза́рная,/ светоно́снаго дне,/ воста́ния су́щи провозве́стница:// в не́йже безле́тный Свет из гро́ба пло́тски всем возсия́.
(Дважды, с припевом)
Кано́н Благове́щения, глас 4:
Ирмо́с:
Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси́.
(Дважды, с припевом)
Припев:
Пресвята́я Богоро́дице, спаси́ нас.
Богоро́дица рече́:
Свет невеще́ственный пове́дая, в веще́ственне телеси́ совокупля́емь за милосе́рдие мно́гое,/ све́тлое благове́щение, Боже́ственная пропове́дания, ны́не взыва́еши Ми:// благослове́н, Всечи́стая, Плод Твоего́ чре́ва.
(Дважды, с припевом)
Припев:
Пресвята́я Богоро́дице, спаси́ нас.
А́нгел возопи́:
Ра́дуйся, Влады́чице Де́во,/ ра́дуйся, Пречи́стая,/ ра́дуйся, прия́телище Бо́жие,/ ра́дуйся, све́щниче Све́та, Ада́мово воззва́ние,/ Е́вы избавле́ние, горо́ свята́я,// прея́вственное свяще́ние и черто́г безсме́ртия.
(Дважды, с припевом)
Припев:
Сла́ва Отцу́, и Сы́ну, и Свято́му Ду́ху.
Богоро́дица рече́:
Ду́шу очи́сти, те́ло освяти́,/ це́рковь сотвори́ Мя вмести́тельну Бо́га,/ ски́нию Богоукра́шену, одушевле́н храм наи́тием Пресвята́го Ду́ха// и Жи́зни чи́стую Ма́терь.
Припев:
И ны́не и при́сно и во ве́ки веко́в, ами́нь.
А́нгел возопи́:
Я́ко многосве́тлую свещу́ и Богоде́ланен черто́г,/ ви́жу Тя ны́не, я́ко злат киво́т,/ зако́на Пода́теля приими́, Богоневе́сто,// благоизво́лившаго челове́ческое изба́вити Тобо́ю тле́нное существо́.
О́троки от пе́щи изба́вивый,/ быв Челове́к,/ стра́ждет я́ко сме́ртен,/ и стра́стию сме́ртное,/ в нетле́ния облачи́т благоле́пие,/ Еди́н благослове́н// отце́в Бог, и препросла́влен.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Катава́сия Благове́щения, глас 4:
Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси́.
Диакон:
Па́ки и па́ки ми́ром Го́споду помо́лимся.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Бу́ди держа́ва Ца́рствия Твоего́ благослове́нна и препросла́вленна, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Канон Пасхальный, глас 1:
Ирмос:
Сей нарече́нный и святы́й день,/ Еди́н суббо́т Царь и Госпо́дь,/ пра́здников пра́здник/ и торжество́ есть торже́ств,// во́ньже благослови́м Христа́ во ве́ки.
(Дважды, с припевом)
Припев:
Христо́с воскре́се из ме́ртвых.
Прииди́те, но́ваго виногра́да рожде́ния,/ Боже́ственнаго весе́лия,/ в наро́читом дни Воскресе́ния,/ Ца́рствия Христо́ва приобщи́мся,/ пою́ще Его́// я́ко Бо́га во ве́ки.
(Трижды, с припевом)
Припев:
Христо́с воскре́се из ме́ртвых.
Возведи́ о́крест о́чи твои́, Сио́не, и виждь:/ се бо приидо́ша к тебе́,/ я́ко богосве́тлая свети́ла,/ от за́пада, и се́вера, и мо́ря,/ и восто́ка ча́да твоя́,// в тебе́ благословя́щая Христа́ во ве́ки.
(Трижды, с припевом)
Припев:
Пресвята́я Тро́ице, Бо́же наш, сла́ва Тебе́.
Тро́ичен:
О́тче Вседержи́телю, и Сло́ве, и Ду́ше,/ треми́ соединя́емое во Ипоста́сех Естество́,/ Пресу́щественне и Пребоже́ственне,/ в Тя крести́хомся,// и Тя благослови́м во вся ве́ки.
Кано́н Благове́щения, глас 4:
Ирмо́с:
Слы́ши, Отрокови́це, Де́во чи́стая,/ да рече́т у́бо Гаврии́л/ сове́т Вы́шняго дре́вний и́стинный:/ бу́ди к прия́тию гото́ва Бо́жию,/ Тобо́ю бо Невмести́мый с челове́ки поживе́./ Тем и, ра́дуяся вопию́:// благослови́те, вся дела́ Госпо́дня, Го́спода.
(Дважды, с припевом)
Припев:
Пресвята́я Богоро́дице, спаси́ нас.
Богоро́дица рече́:
Ум всяк побежда́ется земны́х, – отвеща́ Деви́ца, –/ и́щущи, я́же Мне веща́еши, пресла́вная:/ слы́шах твоя́ словеса́, но бою́ся, ужаса́ющися,/ да не ле́стию Мя, я́ко Е́ву, дале́че по́слеши от Бо́га./ Но оба́че се вопию́// благослови́те, вся дела́ Госпо́дня, Го́спода и превозноси́те Его́ во ве́ки.
(Дважды, с припевом)
Припев:
Пресвята́я Богоро́дице, спаси́ нас.
А́нгел возопи́:
Се Тебе́ недоуме́нное разреши́ся, – глаго́лет к сим Гаврии́л, – до́бре бо рекла́, еси́, вещь неудобопости́жна./ Словесе́м Твои́х усте́н повину́ющися про́чее,/ не сумни́ся, я́ко ле́сти, я́коже ве́щи, ве́руй./ Аз бо, ра́дуяся, вопию́:// благослови́те, вся дела́ Госпо́дня, Го́спода и превозноси́те Его́ во ве́ки.
(Дважды, с припевом)
Припев:
Благослови́м Отца́, и Сы́на, и Свята́го Ду́ха, Го́спода.
Богоро́дица рече́:
Зако́н сей от Бо́га есть челове́ком, – Непоро́чная а́бие глаго́лет, –/ от о́бщия любве́ рождество́ происхо́дит./ Не вем супру́жника сла́сти всеконе́чно,/ ка́ко, у́бо глаго́леши, я́ко рожду́?/ Бою́ся, еда́ лесть глаго́леши?/ Но оба́че се вопию́:// благослови́те, вся дела́ Госпо́дня, Го́спода и превозноси́те Его́ во ве́ки.
Припев:
И ны́не и при́сно и во ве́ки веко́в, ами́нь.
А́нгел возопи́:
Глаго́лы, я́же мне веща́еши, Чи́стая, –/ А́нгел па́ки глаго́лет, –/ обы́чая есть рождества́ челове́ков сме́ртных,/ и́стинно Бо́га Тебе́ обещава́ю,/ па́че сло́ва же и смы́сла воплоща́ема, я́ко весть, из Тебе́./ Те́мже и, ра́дуяся, вопию́:// благослови́те, вся дела́ Госпо́дня, Го́спода и превозноси́те Его́ во ве́ки.
Сей нарече́нный и святы́й день,/ Еди́н суббо́т Царь и Госпо́дь,/ пра́здников пра́здник/ и торжество́ есть торже́ств,// во́ньже благослови́м Христа́ во ве́ки.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Катава́сия Благове́щения, глас 4:
Ирмо́с:
Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси́.
Диакон:
Па́ки и па́ки ми́ром Го́споду помо́лимся.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко благослови́ся и́мя Твое́, и просла́вися Ца́рство Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Канон Пасхальный, глас 1:
Диакон:
Вели́чит душа́ моя́/ воскре́сшаго тридне́вно от гро́ба// Христа́ Жизнодавца.
Ирмос:
Свети́ся, свети́ся,/ но́вый Иерусали́ме:/ сла́ва бо Госпо́дня/ на тебе́ возсия́./ Лику́й ны́не/ и весели́ся, Сио́не./ Ты же, Чи́стая, красу́йся, Богоро́дице,// о воста́нии Рождества́ Твоего́.
Припев:
Вели́чит душа́ моя́/ воскре́сшаго тридне́вно от гро́ба// Христа́ Жизнодавца.
Ирмос:
Свети́ся, свети́ся,/ но́вый Иерусали́ме:/ сла́ва бо Госпо́дня/ на тебе́ возсия́./ Лику́й ны́не/ и весели́ся, Сио́не./ Ты же, Чи́стая, красу́йся, Богоро́дице,// о воста́нии Рождества́ Твоего́.
Припев:
Христо́с но́вая Па́сха,/ Же́ртва жива́я,/ А́гнец Бо́жий,// взе́мляй грехи́ ми́ра.
Тропарь:
О Боже́ственнаго, о любе́знаго,/ о сладча́йшаго Твоего́ гла́са!/ С на́ми бо нело́жно/ обеща́лся еси́ бы́ти,/ до сконча́ния ве́ка Христе́:/ Его́же, ве́рнии,// утвержде́ние наде́жди иму́ще, ра́дуемся.
Припев:
А́нгел вопия́ше Благода́тней:/ Чи́стая Де́во, ра́дуйся!/ И па́ки реку́: ра́дуйся!/ Твой Сын воскре́се/ тридне́вен от гро́ба,/ и ме́ртвыя воздви́гнувый:// лю́дие, весели́теся.
Тропарь:
О Боже́ственнаго, о любе́знаго,/ о сладча́йшаго Твоего́ гла́са!/ С на́ми бо нело́жно/ обеща́лся еси́ бы́ти,/ до сконча́ния ве́ка Христе́:/ Его́же, ве́рнии,// утвержде́ние наде́жди иму́ще, ра́дуемся.
Припев:
А́нгел облиста́яй жена́м вопия́ше:// преста́ните от слез, я́ко Христо́с воскре́се.
Тропарь:
О Боже́ственнаго, о любе́знаго,/ о сладча́йшаго Твоего́ гла́са!/ С на́ми бо нело́жно/ обеща́лся еси́ бы́ти,/ до сконча́ния ве́ка Христе́:/ Его́же, ве́рнии,// утвержде́ние наде́жди иму́ще, ра́дуемся.
Припев:
Днесь Влады́ка плени́ а́да,// воздви́гнувый ю́зники, я́же от ве́ка имя́ше лю́те одержи́мыя.
Тропарь:
О Па́сха ве́лия и свяще́ннейшая, Христе́!/ О му́дросте, и Сло́ве Бо́жий, и си́ло!/ Подава́й нам и́стее Тебе́ причаща́тися,// в невече́рнем дни Ца́рствия Твоего́.
Припев:
Вели́чит душа́ моя́// Триипоста́снаго и Неразде́льнаго Божества́ держа́ву.
Тропарь:
О Па́сха ве́лия и свяще́ннейшая, Христе́!/ О му́дросте, и Сло́ве Бо́жий, и си́ло!/ Подава́й нам и́стее Тебе́ причаща́тися,// в невече́рнем дни Ца́рствия Твоего́.
Припев:
Ра́дуйся, Де́во, ра́дуйся,/ ра́дуйся, Благослове́нная,/ ра́дуйся, Препросла́вленная!// Твой бо Сын воскре́се тридне́вен от гро́ба.
Тропарь:
О Па́сха ве́лия и свяще́ннейшая, Христе́!/ О му́дросте, и Сло́ве Бо́жий, и си́ло!/ Подава́й нам и́стее Тебе́ причаща́тися,// в невече́рнем дни Ца́рствия Твоего́.
Кано́н Благове́щения, глас 4:
Благовеству́й, земле́, ра́дость ве́лию,/ хвали́те, Небеса́, Бо́жию сла́ву.
Ирмо́с:
Я́ко одушевле́нному Бо́жию киво́ту,/ да ника́коже ко́снется рука́ скве́рных./ Устне́ же ве́рных, Богоро́дице, немо́лчно,/ глас А́нгела воспева́юще,/ с ра́достию да вопию́т:/ ра́дуйся, Благода́тная,// Госпо́дь с Тобо́ю.
(Дважды, с припевом)
Хор пое́т припе́вы, чтец чита́ет тропари́:
Припев:
Благовеству́й, земле́, ра́дость ве́лию,/ хвали́те, Небеса́, Бо́жию сла́ву.
Тропа́рь:
Па́че смы́сла заче́нши Бо́га, естества́ обы́чая утаи́ся, Отрокови́це,/ Ты бо в рождестве́ ма́терскаго избежа́ла еси́ тле́ннаго естества́/ и превы́шши су́щи./ Те́мже досто́йно слы́шиши:// ра́дуйся, Благода́тная, Госпо́дь с Тобо́ю.
(Дважды, с припевом)
Припев:
Благовеству́й, земле́, ра́дость ве́лию,/ хвали́те, Небеса́, Бо́жию сла́ву.
Тропа́рь:
Ка́ко то́чиши млеко́, Де́во Чи́стая, не мо́жет изрещи́ язы́к зе́млен,/ стра́нну бо естества́ показу́еши вещь, зако́ннаго рождества́ уста́в прехо́диши./ Те́мже досто́йно слы́шиши:// ра́дуйся, Благода́тная, Госпо́дь с Тобо́ю.
(Дважды, с припевом)
Припев:
Сла́ва Отцу́, и Сы́ну, и Свято́му Ду́ху.
Тропа́рь:
Та́йно во свяще́нных писа́ниих/ глаго́лася о Тебе́, Ма́ти Вы́шняго,/ ле́ствицу бо дре́вле Иа́ков, Тя образу́ющую, ви́дев, рече́:/ степе́нь Бо́жия сия́./ Те́мже досто́йно слы́шиши:// ра́дуйся, Благода́тная, Госпо́дь с Тобо́ю.
Припев:
И ны́не и при́сно и во ве́ки веко́в, ами́нь.
Тропа́рь:
Чу́дное священноявле́нному Моисе́ю/ купина́ и огнь показа́ чу́до,/ ища́й же конца́ в прехожде́нии време́н, во Отрокови́це чи́стей, рече́, узрю́./ Е́йже, я́ко Богоро́дице, да рече́тся:// ра́дуйся, Благода́тная, Госпо́дь с Тобо́ю.
Хор:
Свети́ся, свети́ся,/ но́вый Иерусали́ме:/ сла́ва бо Госпо́дня/ на тебе́ возсия́./ Лику́й ны́не/ и весели́ся, Сио́не./ Ты же, Чи́стая, красу́йся, Богоро́дице,// о воста́нии Рождества́ Твоего́.
(Единожды)
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Катава́сия Благове́щения, глас 4:
Припев:
Благовеству́й, земле́, ра́дость ве́лию,/ хвали́те, Небеса́, Бо́жию сла́ву.
Я́ко одушевле́нному Бо́жию киво́ту,/ да ника́коже ко́снется рука́ скве́рных./ Устне́ же ве́рных, Богоро́дице, немо́лчно,/ глас А́нгела воспева́юще,/ с ра́достию да вопию́т:/ ра́дуйся, Благода́тная,// Госпо́дь с Тобо́ю.
Диакон:
Па́ки и па́ки ми́ром Го́споду помо́лимся.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко Тя хва́лят вся Си́лы Небе́сныя, Отца́, и Сы́на, и Свята́го Ду́ха, и Тебе́ сла́ву возсылают, ны́не и при́сно, и во ве́ки веко́в.
Ексапостила́рий(Свети́лен Пасхальный):
Пло́тию усну́в,/ я́ко мертв,/ Царю́ и Го́споди,/ тридне́вен воскре́сл еси́,/ Ада́ма воздви́г от тли,/ и упраздни́в смерть:/ Па́сха нетле́ния,// ми́ра спасе́ние.
Свети́лен Благове́щения, подо́бен: «Со ученики́…»:
А́нгельских сил Архистрати́г/ по́слан бысть от Бо́га Вседержи́теля к Чи́стей и Де́ве/ благовести́ти стра́нное и неизрече́нное чу́до:/ зане́ Бог, я́ко Челове́к, из Нея́ младоде́йствуется без се́мене,/ назида́яй весь челове́ческий род.// Лю́дие, благовести́те обновле́ние ми́ра.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Друго́й свети́лен Благове́щения, подо́бен: «Жены́, услы́шите…»:
Е́же от ве́ка днесь познава́ется та́инство Бо́жие:/ Бог Сло́во Сын Де́вы Мари́и за милосе́рдие быва́ет,/ и ра́дость благове́щения Гаврии́л провещава́ет./ С ни́мже возопие́м Ей:// ра́дуйся, Ма́ти Госпо́дня.
Хвали́тны псалмы́, глас 1:
Хор:
Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.
Хор:
Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.
На хвали́тех стихи́ры воскре́сны, гла́с 1:
Сти́х:
Сотвори́ти в ни́х су́д напи́сан: сла́ва сия́ бу́дет все́м преподо́бным Его́.
Стихира:
Пое́м Твою́, Христе́, спаси́тельную стра́сть, и сла́вим Твое́ Воскресе́ние.
Сти́х:
Хвали́те Бо́га во святы́х Его́, хвали́те Его́ во утверже́нии си́лы Его́.
Стихира:
Кре́ст претерпе́вый, и сме́рть упраздни́вый, и воскресы́й из ме́ртвых, умири́ на́шу жи́знь Го́споди, я́ко еди́н Всеси́лен.
Сти́х:
Хвали́те Его́ на си́лах Его́, хвали́те Его́ по мно́жеству вели́чествия Его́.
Стихира:
А́да плени́вый, и челове́ка воскреси́вый, Воскресе́нием Твои́м, Христе́, сподо́би на́с чи́стым се́рдцем Тебе́ пе́ти и сла́вити.
Сти́х:
Хвали́те Его́ во гла́се тру́бнем: хвали́те Его́ во псалти́ри и гу́слех.
Стихира:
Боголе́пное Твое́ снисхожде́ние сла́вяще, пое́м Тя́, Христе́. Роди́лся еси́ от Де́вы, и не разлуче́н бы́л еси́ от Отца́, пострада́л еси́ я́ко челове́к, и во́лею претерпе́л еси́ Кре́ст, воскре́сл еси́ от гро́ба, я́ко от черто́га произше́д да спасе́ши ми́р, Го́споди, сла́ва Тебе́.
Глас 1, подо́бен: «Небе́сных чино́в…»:
На 4. Стих:
Хвали́те Его́ на си́лах Его́,/ хвали́те Его́ по мно́жеству вели́чествия Его́.
Стихира:
С Небе́сных круго́в слете́в Гаврии́л в Назаре́т,/ прии́де к Де́ве Мари́и,/ вопия́ Ей: ра́дуйся!/ Зачне́ши Сы́на, Ада́ма дре́внейшаго,/ Творца́ веко́в и Изба́вителя/ вопию́щих Тебе́:// ра́дуйся, Чи́стая.
Стих:
Хвали́те Его́ во гла́се тру́бнем,/ хвали́те Его́ во псалти́ри и гу́слех.
Стихира:
Соприсносу́щное Сло́во Пребезнача́льного Отца́,/ не разлучи́вся Го́рних,/ ны́не предста́ до́льным, ра́ди кра́йняго благоутро́бия,/ ми́лость прие́м, е́же на ны поползнове́ния,/ и, Ада́мову нищету́ восприе́м,// вообрази́ся в чужде́е.
На 2. Стих:
Благовести́те день от дне/ спасе́ние Бо́га на́шего.
Стихира:
Гаврии́л, Де́ве благове́стие с Небесе́ прине́с,/ вопия́ше: ра́дуйся!/ Зачне́ши во чре́ве Твое́м/ Тобо́ю вмести́маго,/ Невмести́маго же все́ми,/ и ражда́ющая яви́шися// от Отца́ пре́жде денни́цы возсия́вшаго.
Воспо́йте Го́сподеви песнь но́ву,/ воспо́йте Го́сподеви, вся земля́.
Стихира:
Пресу́щественное Сло́во,/ пло́тию всели́вся в Тя/ О́тчим сове́том, Богоро́дице Де́во,/ назда́ род, и́же по нам,/ па́дший от дре́вния кля́твы./ Тем – е́же ра́дуйся – Тебе́ вси, Ма́ти Христо́ва,// со А́нгелом вопие́м ве́рно.
Стих:
Да воскре́снет Бог,/ и расточа́тся врази́ Его́.
Хор:
Па́сха/ свяще́нная нам днесь показа́ся;/ Па́сха но́ва свята́я;/ Па́сха та́инственная;/ Па́сха всечестна́я./ Па́сха Христо́с Изба́витель;/ Па́сха непоро́чная;/ Па́сха вели́кая;/ Па́сха ве́рных./ Па́сха две́ри ра́йския нам отверза́ющая.// Па́сха всех освяща́ющая ве́рных.
Стих:
Я́ко исчеза́ет дым,/ да исче́знут.
Хор:
Прииди́те/ от виде́ния жены́ благове́стницы,/ и Сио́ну рцы́те:/ приими́/ от нас ра́дости благове́щения, Воскресе́ния Христо́ва:/ красу́йся, лику́й/ и ра́дуйся, Иерусали́ме,/ Царя́ Христа́ узре́в из гро́ба,/ я́ко жениха́ происходя́ща.
Стих:
Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.
Хор:
Мироно́сицы жены́,/ у́тру глубоку́,/ предста́вша гро́бу Живода́вца,/ обрето́ша А́нгела/ на ка́мени седя́ща,/ и той провеща́в им,/ си́це глаго́лаше:/ что и́щете Жива́го с ме́ртвыми;/ что пла́чете Нетле́ннаго во тли?// Ше́дше, пропове́дите ученико́м Его́.
Стих:
Сей день, его́же сотвори Госпо́дь,/ возра́дуемся и возвесели́мся в онь.
Хор:
Па́сха кра́сная,/ Па́сха, Госпо́дня Па́сха!/ Па́сха всечестна́я/ нам возсия́. Па́сха,/ ра́достию друг дру́га обы́мем./ О Па́сха!/ Избавле́ние ско́рби,/ и́бо из гро́ба днесь,/ я́ко от черто́га/ возсия́в Христо́с,/ жены́ ра́дости испо́лни, глаго́ля:/ пропове́дите апо́столом.
Чтец:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Хор:
Воскресе́ния день,/ и просвети́мся торжество́м,/ и друг дру́га обы́мем./ Рцем бра́тие,/ и ненави́дящим нас,/ прости́м вся Воскресе́нием,/ и та́ко возопии́м:/ Христо́с воскре́се из ме́ртвых,/ сме́ртию смерть попра́в,// и су́щим во гробе́х живо́т дарова́в.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Во время пения стихир Пасхи священнослужители начинают христосоваться между собою в алтаре.
Священнослужители, похристосовавшись между собой в алтаре, исходят на солею.
Предстоятель выходит с Крестом и трисвещником, произносит от себя краткое общее приветствие предстоящим и заканчивает его троекратным осенением Крестом и трисвещником на три стороны возглашая:
Иерей:
Христос воскре́се!
Люди:
Вои́стину воскре́се!
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, неспешно)
Предстоятель относит Крест с трисвечником в алтарь и выходит на амвон для чтения Огласительного слова свт. Иоанна Златоустого.
Сло́во огласи́тельное Иоа́нна Златоу́стого:
Иерей:
И́же во святы́х отца́ на́шего Иоа́нна, Архиепи́скопа Константинопо́льскаго, Златоу́стаго, сло́во Огласи́тельное во святы́й и светоно́сный Де́нь пресла́внаго и спаси́тельнаго Христа́ Бо́га на́шего Воскресе́ния.
А́ще кто благочести́в и боголюби́в, да наслади́тся сего́ до́браго и све́тлаго торжества́. А́ще кто раб благоразу́мный, да вни́дет ра́дуяся в ра́дость Го́спода своего́. А́ще кто потруди́ся постя́ся, да восприи́мет ны́не дина́рий. А́ще кто от пе́рваго часа́ де́лал есть, да прии́мет днесь пра́ведный долг. А́ще кто по тре́тием часе́ прии́де, благодаря́ да пра́зднует. А́ще кто по шесто́м часе́ дости́же, ничто́же да сумни́тся, и́бо ничи́мже отщетева́ется. А́ще кто лиши́ся и девя́таго часа́, да присту́пит, ничто́же сумня́ся, ничто́же боя́ся. А́ще кто то́чию дости́же, и во единонадеся́тый час, да не устраши́тся замедле́ния: любочести́в бо Сый Влады́ка, прие́млет после́дняго я́коже и пе́рваго: упокоева́ет в единонадеся́тый час прише́дшаго, я́коже де́лавшаго от пе́рваго часа́. И после́дняго ми́лует, и пе́рвому угожда́ет, и о́ному дае́т, и сему́ да́рствует, и дела́ прие́млет, и наме́рение целу́ет, и дея́ние почита́ет, и предложе́ние хва́лит. Те́мже у́бо вни́дите вси в ра́дость Го́спода своего́: и пе́рвии и втори́и, мзду приими́те. Бога́тии и убо́зии, друг со дру́гом лику́йте. Возде́ржницы и лени́вии, день почти́те. Пости́вшиися и непости́вшиися, возвесели́теся днесь. Трапе́за испо́лнена, наслади́теся вси. Теле́ц упита́нный, никто́же да изы́дет а́лчай, вси наслади́теся пи́ра ве́ры: вси восприими́те бога́тство бла́гости. Никто́же да рыда́ет убо́жества, яви́ся бо о́бщее Ца́рство. Никто́же да пла́чет прегреше́ний, проще́ние бо от гро́ба возсия́. Никто́же да убои́тся сме́рти, свободи́ бо нас Спа́сова смерть. Угаси́ ю́, И́же от нея́ держи́мый. Плени́ а́да, Соше́дый во ад. Огорчи́ его́ вкуси́вша пло́ти Его́. И сие́ предприе́мый Иса́иа возопи́: ад, глаго́лет, огорчи́ся, срет Тя до́ле. Огорчи́ся, и́бо упраздни́ся. Огорчи́ся, и́бо пору́ган бысть. Огорчи́ся, и́бо умертви́ся. Огорчи́ся, и́бо низложи́ся. Огорчи́ся, и́бо связа́ся. Прия́т те́ло, и Бо́гу прирази́ся. Прия́т зе́млю, и сре́те Не́бо. Прия́т е́же ви́дяше, и впаде́ во е́же не ви́дяше. Где твое́, сме́рте, жа́ло; где твоя́, а́де, побе́да? Воскре́се Христо́с, и ты низве́рглся еси́. Воскре́се Христо́с, и падо́ша де́мони. Воскре́се Христо́с, и ра́дуются А́нгели. Воскре́се Христо́с, и жизнь жи́тельствует. Воскре́се Христо́с, и ме́ртвый ни еди́н во гро́бе. Христо́с бо воста́в от ме́ртвых, Нача́ток усо́пших бысть. Тому́ сла́ва и держа́ва, во ве́ки веко́в. Ами́нь.
Тропа́рь Иоа́нна Златоу́стого, глас 8:
Хор:
Уст твои́х, я́коже све́тлость огня́/ возсия́вши, благода́ть вселе́нную просвети́:/ не сребролю́бия ми́рови сокро́вища сниска́,/ высоту́ нам смиреному́дрия показа́,/ но твои́ми словесы́ наказу́я, о́тче Иоа́нне Златоу́сте,// моли́ Сло́ва, Христа́ Бо́га, спасти́ся душа́м на́шим.
Диакон:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Трижды, на каждое прошение)
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (ИМЯРЕК), и о Господи́не на́шем Высокопреосвяще́ннейшем митрополите (или: архиепи́скопе, или: преосвяще́ннейшем епи́скопе имярек), и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.
Еще́ мо́лимся о ми́лости, жи́зни, мире, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих настоя́теля, бра́тии и прихо́жан свята́го хра́ма сего́.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Иерей:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Диакон:
Испо́лним у́тренюю моли́тву на́шу Го́сподеви.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Дне́ всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение.)
Диакон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и друг дру́га, и весь живо́т наш Христу́ Бо́гу предади́м.
Иерей:
Я́ко Благ и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Диакон:
Главы́ на́ша Го́сподеви прикло́ним.
Иерей:
Твое́ бо е́сть, е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Иерей:
Сый благослове́н Христо́с Бог наш, всегда́, ны́не и при́сно и во ве́ки веко́в.
Хор:
Ами́нь. Утверди́, Бо́же, святу́ю правосла́вную ве́ру, правосла́вных христиа́н во век ве́ка.
Иерей держа Крест с трисвечником поет в алтаре со всем духовенством:
Иерей:
Христо́с воскре́се из ме́ртвых,/ сме́ртию смерть попра́в//
Хор:
И су́щим во гробе́х живо́т дарова́в.
Иерей выйдя на амвон с крестом и трисвечником:
Христо́с воскресы́й из ме́ртвых, сме́ртию смерть попра́вый и су́щим во гробе́х живо́т дарова́вый: и́стинный Бог наш, моли́твами Пречи́стыя Своея́ Ма́тере и всех святы́х, поми́лует и спасе́т нас, я́ко Благ и Человеколю́бец.
И осеняет предстоящих Крестом и трисвещником на три стороны, громко произнося при каждом осенении:
Иерей:
Христо́с воскре́се!
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
И нам дарова́ живо́т ве́чный, покланя́емся Его́ тридне́вному Воскресе́нию.
И сра́зу пою́тся часы́ Пасха́льные:
Часы Пасхальные поются полностью (без чтения).
Иерей:
Благослове́н Бог наш, всегда́, ны́не и при́сно и во ве́ки веко́в.
Хор:
Ами́нь. Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Воскресе́ние Христо́во ви́девше,/ поклони́мся Свято́му Го́споду Иису́су,/ еди́ному безгре́шному,/ Кресту́ Твоему́ покланя́емся, Христе́,/ и свято́е Воскресе́ние Твое́ пое́м и сла́вим:/ Ты бо еси́ Бог наш,/ ра́зве Тебе́ ино́го не зна́ем,/ и́мя Твое́ имену́ем./ Прииди́те вси ве́рнии,/ поклони́мся Свято́му Христо́ву Воскресе́нию:/ се бо прии́де Кресто́м ра́дость всему́ ми́ру./ Всегда́ благословя́ще Го́спода,/ пое́м Воскресе́ние Его́:/ распя́тие бо претерпе́в,// сме́ртию смерть разруши́.
(Трижды)
Предвари́вшия у́тро, я́же о Мари́и,/ и обре́тшия ка́мень отвале́н от гро́ба,/ слы́шаху от А́нгела: во све́те присносу́щнем Су́щаго/ с ме́ртвыми что и́щете, я́ко челове́ка?/ Ви́дите гро́бныя пелены́, тецы́те и ми́ру пропове́дите,/ я́ко воста́ Госпо́дь, умертви́вый смерть,// я́ко есть Сын Бо́га, спаса́ющаго род челове́ческий.
А́ще и во гроб снизше́л еси́, Безсме́ртне,/ но а́дову разруши́л еси́ си́лу/ и воскре́сл еси́, я́ко Победи́тель, Христе́ Бо́же,/ жена́м мироно́сицам веща́вый: ра́дуйтеся!/ И Твои́м апо́столом мир да́руяй,// па́дшим подая́й воскресе́ние.
Во гро́бе пло́тски, во а́де же с душе́ю я́ко Бог,/ в раи́ же с разбо́йником, и на Престо́ле был еси́ Христе́, со Отце́м и Ду́хом,// вся исполня́яй, неопи́санный.
Сла́ва Отцу́ и Сы́ну и Свято́му Ду́ху.
Я́ко Живоно́сец, я́ко рая́ красне́йший,/ вои́стину и черто́га вся́каго ца́рскаго показа́ся светле́йший, Христе́, гроб Твой,// исто́чник на́шего воскресе́ния.
И ны́не и при́сно и во ве́ки веко́в. Ами́нь.
Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:// благослове́нна Ты в жена́х еси́, Всенепоро́чная Влады́чице.
Го́споди, поми́луй.
(40 раз)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
И́менем Госпо́дним благослови́, о́тче.
Иерей:
Моли́твами святы́х оте́ц на́ших, Го́споди, Иису́се Христе́, Бо́же наш, поми́луй нас.
Хор:
Ами́нь. Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Ма́лый воскре́сный отпу́ст:
Иерей выйдя на амвон с крестом без трисвечника:
Воскресы́й из ме́ртвых Христо́с, И́стинный Бог наш, моли́твами Пречи́стыя Своея́ Ма́тере, преподо́бных и богоно́сных оте́ц на́ших и всех святы́х, поми́лует и спасе́т нас, я́ко Благ и Человеколю́бец.
Такой чин полагается совершать на Светлой седмице вместо 1-го, 3-го, 6-го и 9-го часа, полунощницы и повечерия.
Диакон:
Благослови́ влады́ко.
Иерей:
Благослове́но Ца́рство Отца́, и Сы́на, и Свята́го Ду́ха, ны́не и при́сно, и во ве́ки веко́в.
Иерей, стоит пред престолом с Крестом и трисвещником в левой руке и кадилом в правой, а диакон на горнем месте со свечой.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Хор:
Иерей кадит престол спереди и поет с духовенством:
Да воскре́снет Бог, и расточа́тся врази́ Его́,/ и да бежа́т от Лица́ Его́ ненави́дящии Его́.
Духовенство:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Хор:
Иерей кадит престол с южной стороны и поет с духовенством:
Духовенство:
Я́ко исчеза́ет дым, да исче́знут,/ я́ко та́ет воск от лица́ огня́.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Иерей кадит престол с восточной стороны и поет с духовенством:
Духовенство:
Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Иерей кадит престол с северной стороны и поет с духовенством:
Духовенство:
Сей день, его́же сотвори́ Госпо́дь,/ возра́дуемся и возвесели́мся вонь.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Иерей продолжает каждение алтаря, иконостаса и молящихся и поет с духовенством:
Духовенство:
Сла́ва Отцу́ и Сы́ну и Свято́му Ду́ху.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
И ны́не и при́сно и во ве́ки веко́в. Ами́нь.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Христо́с воскре́се из ме́ртвых,/ сме́ртию смерть попра́в
Хор:
И су́щим во гробе́х живо́т дарова́в.
Иерей, совершая каждение молящихся, приветствует их пасхальным приветствием: «Христос Воскресе!»
Диакон:
Ми́ром Го́споду помо́лимся.
Хор:
Го́споди, поми́луй.
(На каждое прошение)
Диакон:
О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе (ИМЯРЕК), и о Господи́не на́шем, Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея́, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Стих 1:
Воскли́кните/ Го́сподеви вся земля́.
Припев:
Моли́твами Богоро́дицы, Спа́се спаси́ нас.
Стих тотже:
Воскли́кните Го́сподеви вся земля́,/ по́йте же и́мени Его́, дади́те сла́ву хвале́ Его́.
Припев:
Моли́твами Богоро́дицы, Спа́се спаси́ нас.
Стих 2:
Рцы́те Бо́гу: коль стра́шна дела́ Твоя́,/ во мно́жестве си́лы Твоея́ со́лжут Тебе́ врази́ Твои́.
Припев:
Моли́твами Богоро́дицы, Спа́се спаси́ нас.
Стих 3:
Вся земля́ да покло́нится Тебе́,/ и пое́т Тебе́, да пое́т же и́мени Твоему́ Вы́шний.
Припев:
Моли́твами Богоро́дицы, Спа́се спаси́ нас.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Припев:
Моли́твами Богоро́дицы, Спа́се спаси́ нас.
Диакон:
Па́ки и па́ки ми́ром Го́споду помо́лимся.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко Твоя́ держа́ва и Твое́ есть ца́рство и си́ла и сла́ва, Отца́ и Сы́на, и Свята́го Ду́ха, ны́не и при́сно, и во ве́ки веко́в.
Стих 1:
Бо́же уще́дри ны/ и благослови́ ны.
Припев:
Спаси́ ны, Сы́не Бо́жий, воскресы́й из ме́ртвых, пою́щия Ти: Аллилу́иа.
(Единожды)
Стих тотже:
Бо́же, уще́дри ны, и благослови́ ны,/ просвети лице Твое́ на ны, и поми́луй ны.
Припев:
Спаси́ ны, Сы́не Бо́жий, воскресы́й из ме́ртвых, пою́щия Ти: Аллилу́иа.
(Единожды)
Стих 2:
Да позна́ем на земли́ путь Твой,/ во всех язы́цех спасе́ние Твое́.
Припев:
Спаси́ ны, Сы́не Бо́жий, воскресы́й из ме́ртвых, пою́щия Ти: Аллилу́иа.
(Единожды)
Стих 3:
Да испове́дятся Тебе́ лю́дие Бо́же,/ да испове́дятся Тебе́ лю́дие вси.
Припев:
Спаси́ ны, Сы́не Бо́жий, воскресы́й из ме́ртвых, пою́щия Ти: Аллилу́иа.
(Единожды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Хор:
Единоро́дный Сы́не и Сло́ве Бо́жий, Безсме́ртен Сый/ и изво́ливый спасе́ния на́шего ра́ди/ воплоти́тися от Святы́я Богоро́дицы и Присноде́вы Мари́и,/ непрело́жно вочелове́чивыйся,/ распны́йся же, Христе́ Бо́же, сме́ртию смерть попра́вый,/ Еди́н Сый Святы́я Тро́ицы,// спрославля́емый Отцу́ и Свято́му Ду́ху, спаси́ нас.
Диакон:
Па́ки и па́ки ми́ром Го́споду помо́лимся.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко Бла́г и Человеколю́бец Бог еси́, и Тебе́ сла́ву воссыла́ем, Отцу́ и Сы́ну, и Свято́му Ду́ху, ны́не и при́сно, и во ве́ки веко́в.
Стих 1:
Да воскре́снет Бог,/ и расточа́тся врази́ Его́.
Тропарь:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Единожды)
Стих тотже:
Да воскре́снет Бог, и расточа́тся врази́ Его́,/ и да бежа́т от лица́ Его́ ненави́дящии Его́.
Тропарь:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Единожды)
Стих 2:
Я́ко исчеза́ет дым, да исче́знут,/ я́ко та́ет воск от лица́ огня́.
Тропарь:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Единожды)
Стих 3:
Та́ко да поги́бнут гре́шницы от лица́ Бо́жия,/ а пра́ведницы да возвеселя́тся, да возра́дуются пред Бо́гом.
Тропарь:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Единожды)
Диакон:
Прему́дрость, про́сти.
Входный стих:
В це́рквах благослови́те Бо́га, Го́спода от исто́чник Изра́илевых.
«Прииди́те, поклони́мся...» не поется (кроме архиерейских богослужений), но сразу:
Тропарь праздника, глас 5:
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Сла́ва Отцу́ и Сы́ну и Свято́му Ду́ху
Тропа́рь Благовещения, глас 4:
Днесь спасе́ния на́шего глави́зна/ и е́же от ве́ка та́инства явле́ние:/ Сын Бо́жий Сын Де́вы быва́ет,/ и Гаврии́л благода́ть благовеству́ет./ Те́мже и мы с ним Богоро́дице возопии́м:/ ра́дуйся, Благода́тная,// Госпо́дь с Тобо́ю.
И ны́не и при́сно и во ве́ки веко́в. Ами́нь.
Кондaк праздника, глaс 8:
А́ще и во гроб снизше́л еси́, Безсме́ртне,/ но а́дову разруши́л еси́ си́лу/ и воскре́сл еси́, я́ко Победи́тель, Христе́ Бо́же,/ жена́м мироно́сицам веща́вый: ра́дуйтеся!/ И Твои́м апо́столом мир да́руяй,// па́дшим подая́й воскресе́ние.
Диакон:
Го́споду помо́лимся.
Иерей:
Я́ко свят еси́, Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно.
Диакон:
Го́споди, спаси́ благочести́выя.
Хор:
Го́споди, спаси́ благочести́выя
Ели́цы во Христа́ крести́стеся, во Христа́ облеко́стеся. Аллилу́ия.
(Трижды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Во Христа́ облеко́стеся. Аллилу́ия.
Ели́цы во Христа́ крести́стеся, во Христа́ облеко́стеся. Аллилу́ия.
Чтец:
Прокимен, глас осьмы́й: Сей день его́же сотвори́ Госпо́дь,/ возра́дуемся и возвесели́мся в онь.
Хор:
Сей день его́же сотвори́ Госпо́дь,/ возра́дуемся и возвесели́мся в онь.
Чтец:
Испове́дайтеся Го́сподеви, я́ко Благ, я́ко в век ми́лость Его́.
Хор:
Сей день его́же сотвори́ Госпо́дь,/ возра́дуемся и возвесели́мся в онь.
Чтец:
Проки́мен, глас четве́ртый: Благовести́те день от дне спасе́ние Бо́га на́шего.
Хор:
Благовести́те день от дне спасе́ние Бо́га на́шего.
Чтец:
Дея́ний святы́х апо́стол чте́ние.
В Светлое Воскресение (Деян., зач. 1)
Чтец:
Пе́рвое у́бо сло́во сотвори́х о всех, о Фео́филе, я́же нача́т Иису́с твори́ти же и учи́ти. Да́же до дне, во́ньже, запове́дав Апо́столом Ду́хом Святы́м, и́хже избра́, вознесе́ся. Пред ни́миже и поста́ви Себе́ жи́ва по страда́нии Свое́м, во мно́зех [и́стинных] зна́мениих, де́ньми четы́редесятьми явля́яся им, и глаго́ля я́же о Ца́рствии Бо́жии: С ни́миже и яды́й, повеле́ им от Иерусали́ма не отлуча́тися, но жда́ти обетова́ния О́тча, е́же слы́шасте от Мене́: я́ко Иоанн у́бо крести́л есть водо́ю, вы же и́мате крести́тися Ду́хом Святы́м, не по мно́зех сих днех. Они́ же у́бо соше́дшеся, вопроша́ху Его́, глаго́люще: Го́споди, а́ще в ле́то сие́ устроя́еши ца́рствие Изра́илево? Рече́ же к ним: несть ва́ше разуме́ти времена́ и ле́та, я́же Оте́ц положи́ во Свое́й вла́сти: Но прии́мете си́лу, наше́дшу Свято́му Ду́ху на вы, и бу́дете Ми свиде́тели во Иерусали́ме же и во всей Иуде́и и Самари́и, и да́же до после́дних земли́.
(Евр., зач. 306, гл. 2, стт. 11-18):
Бра́тие, святя́й и освяща́емии, от Еди́наго вси, ея́же ра́ди вины́ не стыди́тся бра́тию нарица́ти их, глаго́ля: возвещу́ И́мя Твое́ бра́тии Мое́й, посреде́ Це́ркве воспою́ Тя. И па́ки: Аз бу́ду наде́яся Нань. И па́ки: се Аз и де́ти, я́же Ми дал есть Бог. Поне́же у́бо де́ти приобщи́шася пло́ти и кро́ви, и Той прии́скренне приобщи́ся те́хже, да сме́ртию упраздни́т иму́щаго держа́ву сме́рти, си́речь диа́вола, и изба́вит сих, ели́цы стра́хом сме́рти чрез все житие́ пови́нни бе́ша рабо́те. Не от А́нгел у́бо когда́ прие́млет, но от се́мене Авраа́мова прие́млет; отню́дуже до́лжен бе по всему́ подо́битися бра́тии, да ми́лостив бу́дет и ве́рен первосвяще́нник в тех, я́же к Бо́гу, во е́же очи́стити грехи́ людски́я. В не́мже бо пострада́, Сам искуше́н быв, мо́жет и искуша́емым помощи́
Чтец:
Глас четве́ртый: Аллилу́ия, аллилу́ия, аллилу́ия.
Хор:
Аллилу́ия, аллилу́ия, аллилу́ия.
Чтец:
Ты воскре́с уще́дриши Сио́на.
Хор:
Аллилу́ия, аллилу́ия, аллилу́ия
Чтец:
Глас пе́рвый:Сни́дет, я́ко дождь на руно́, и, я́ко ка́пля, ка́плющая на зе́млю.
Хор:
Аллилу́ия, аллилу́ия, аллилу́ия.
Диакон:
Благослови́, влады́ко, благовести́теля, свята́го сла́внаго и всехва́льнаго апо́стола и евангели́ста Иоанна.
Иерей:
Бог моли́твами свята́го сла́внаго, всехва́льнаго апо́стола и евангели́ста Иоа́нна, да даст тебе́ глаго́л, благовеству́ющему си́лою мно́гою, во исполне́ние Ева́нгелия возлю́бленаго Сы́на Своего́, Го́спода на́шего Иису́са Христа́.
Прему́дрость, про́сти, услы́шим свята́го Ева́нгелия.
Диакон:
От Иоа́нна свята́го Ева́нгелия чте́ние.
Хор:
Сла́ва Тебе́, Го́споди, сла́ва Тебе́.
Диа́кон:
В нача́ле бе Сло́во, и Сло́во бе к Бо́гу, и Бог бе Сло́во. Сей бе искони́ к Бо́гу. Вся Тем бы́ша, и без Него́ ничто́же бысть, е́же бысть. В Том живо́т бе, и живо́т бе свет челове́ком. И свет во тьме све́тится, и тьма его́ не объят. Бысть челове́к по́слан от Бо́га, и́мя ему́ Иоа́нн. Сей прии́де во свиде́тельство, да свиде́тельствует о Све́те, да вси ве́ру и́мут Ему́. Не бе той свет, но да свиде́тельствует о Све́те. Бе Свет и́стинный, И́же просвеща́ет вся́каго челове́ка гряду́щаго в мир. В ми́ре бе, и мир Тем бысть, и мир Его́ не позна́. Во своя́ прии́де, и свои́ Его́ не прия́ша. Ели́цы же прия́ша Его́, даде́ им о́бласть ча́дом Бо́жиим бы́ти, ве́рующим во и́мя Его́. И́же не от кро́ве, ни от по́хоти плотски́я, ни от по́хоти му́жеския, но от Бо́га роди́шася. И Сло́во плоть бысть, и всели́ся в ны, и ви́дехом сла́ву Его́, сла́ву я́ко Единоро́днаго от Отца́, испо́лнь благода́ти и и́стины. Иоа́нн свиде́тельствует о Нем и воззва́, глаго́ля: Сей бе, Его́же рех, И́же по мне Гряды́й, пре́до мно́ю бысть, я́ко пе́рвее мене́ бе. И от исполне́ния Его́ мы вси прия́хом, и благода́ть воз благода́ть: Я́ко зако́н Моисе́ом дан бысть, благода́ть же и и́стина Иису́с Христо́м бысть.
(Лк., зач. 3, гл. 1, стт. 24-38):
Во дне́х о́нех зача́т Eлисаве́т, жена́ Заха́риина, и тая́шеся ме́сяц пять, глаго́лющи: я́ко та́ко мне сотвори́ Госпо́дь во дни, в ня́же призре́ отъя́ти поноше́ние мое́ в челове́цех. В ме́сяц же шесты́й по́слан бысть А́нгел Гаврии́л от Бо́га во град Галиле́йский, eму́же и́мя Назаре́т, к Де́ве обруче́нней му́жеви, eму́же и́мя Ио́сиф, от до́му Дави́дова, и и́мя Де́ве, Мариа́м. И вшед к Ней А́нгел, рече́: ра́дуйся Благода́тная, Госпо́дь с Тобо́ю, благослове́на Ты в жена́х. Oна́ же ви́девши смути́ся о словеси́ eго́, и помышля́ше, каково́ бу́дет целова́ние сие́. И рече́ А́нгел Eй: не бо́йся Мариа́м, обре́те бо благода́ть от Бо́га. И се зачне́ши во чре́ве, и роди́ши Сы́на, и нарече́ши и́мя Eму́ Иису́с. Сей бу́дет ве́лий, и Сын Вы́шняго нарече́тся, и даст Eму́ Госпо́дь Бог престо́л Дави́да oтца́ Eго́, и воцари́тся в дому́ Иа́ковли во ве́ки, и Ца́рствию Eго́ не бу́дет конца́. Рече́ же Мариа́м ко А́нгелу: ка́ко бу́дет сие́, иде́же му́жа не зна́ю? И отвеща́в А́нгел, рече́ Eй: Дух Святы́й на́йдет на Тя, и си́ла Вы́шняго осени́т Тя, те́мже и ражда́емое Свя́то, нарече́тся Сын Бо́жий. И се Eлисаве́т, ю́жика Твоя́, и та зача́т сы́на в ста́рости свое́й, и сей ме́сяц шесты́й eсть eй, нарица́емей непло́ды. Я́ко не изнемо́жет от Бо́га всяк глаго́л. Рече́ же Мариа́м: се раба́ Госпо́дня, бу́ди Мне по глаго́лу твоему́. И оты́де от Нея́ А́нгел.
Хор:
Сла́ва Тебе́, Го́споди, сла́ва Тебе́.
Диа́кон:
Рце́м вси от всея́ души́, и от всего́ помышле́ния на́шего рцем.
Диа́кон:
Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.
Диа́кон:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Три́жды, на каждое прошение)
Диа́кон:
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (ИМЯРЕК), и о Господи́не на́шем Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о бра́тиях на́ших, свяще́нницех, священномона́сех, и всем во Христе́ бра́тстве на́шем.
Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих настоя́теля, бра́тии и прихо́жан свята́го хра́ма сего́.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Иере́й:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Диа́кон:
Помоли́теся, оглаше́ннии, Го́сподеви.
Хор:
Го́споди, поми́луй.
(На каждое прошение)
Диа́кон:
Ве́рнии, о оглаше́нных помо́лимся, да Госпо́дь поми́лует их.
Огласи́т их сло́вом и́стины.
Откры́ет им Ева́нгелие пра́вды.
Соедини́т их святе́й Свое́й собо́рней и апо́стольстей Це́ркви.
Спаси́, поми́луй, заступи́ и сохрани́ их, Бо́же, Твое́ю благода́тию.
Оглаше́ннии, главы ва́ша Го́сподеви приклони́те.
Иере́й:
Да и ти́и с на́ми сла́вят пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Ектения́ ве́рных, пе́рвая:
Диа́кон:
Ели́цы оглаше́ннии, изыди́те.
Второ́й диа́кон:
Оглаше́ннии, изыди́те.
Пе́рвый:
Ели́цы оглаше́ннии, изыди́те.
Сно́ва второ́й:
Да никто от оглаше́нных, ели́цы ве́рнии, па́ки и па́ки ми́ром Го́споду помо́лимся.
(Если служит один диакон, то все прошения возглашает подряд:
Диа́кон:
Ели́цы оглаше́ннии, изыди́те. Оглаше́ннии, изыди́те. Ели́цы. оглаше́ннии, изыди́те. Да никто от оглаше́нных, ели́цы ве́рнии, па́ки и па́ки ми́ром Го́споду помо́лимся.)
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Иере́й:
Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Ектения́ ве́рных, втора́я:
Диа́кон:
Па́ки и па́ки, ми́ром Го́споду помо́лимся.
Хор:
Го́споди, поми́луй.
(На ка́ждое проше́ние)
Диа́кон:
О свы́шнем ми́ре и спасе́нии душ на́ших, Го́споду помо́лимся.
О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Иере́й:
Я́ко да под держа́вою Твое́ю всегда́ храни́ми, Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
И́же Херуви́мы та́йно образу́юще и животворя́щей Тро́ице Трисвяту́ю песнь припева́юще, вся́кое ны́не жите́йское отложи́м попече́ние.
Диа́кон:
Вели́каго господи́на и отца́ на́шего (ИМЯРЕК-р.п.), Святе́йшаго Патриа́рха всея́ Ру́си, и господи́на на́шего (Высо́ко-) Преосвяще́ннейшаго (имярек), (архи-)епи́скопа (митрополита (титул)), да помяне́т Госпо́дь Бог во Ца́рствии Свое́м всегда́, ны́не и при́сно, и во ве́ки веко́в.
Иере́й:
Преосвяще́нныя митрополи́ты, архиепи́скопы и епи́скопы, и весь свяще́ннический и мона́шеский чин, и при́чет церко́вный, бра́тию свята́го хра́ма сего́, всех вас, правосла́вных христиа́н, да помяне́т Госпо́дь Бог во Ца́рствии Свое́м, всегда́, ны́не и при́сно, и во ве́ки веко́в.
Хор:
Ами́нь. Я́ко да Царя́ всех поды́мем, а́нгельскими неви́димо дориноси́ма чи́нми. Аллилу́иа, аллилу́иа, аллилу́иа.
Диа́кон:
Испо́лним моли́тву на́шу Го́сподеви.
Хор:
Го́споди, поми́луй.
(На каждое прошение)
Диа́кон:
О предложе́нных Честны́х Даре́х, Го́споду помо́лимся.
О святе́м хра́ме сем, и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Диа́кон:
Дне всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и дру́г дру́га, и весь живо́т наш Христу́ Бо́гу предади́м.
Иере́й:
Щедро́тами Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Диа́кон:
Возлю́бим друг дру́га, да единомы́слием испове́мы.
Хор:
Отца́, и Сы́на, и Свята́го Ду́ха,/ Тро́ицу единосу́щную/ и неразде́льную.
Диа́кон:
Две́ри, две́ри, прему́дростию во́нмем.
Лю́ди:
Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.
Диа́кон:
Ста́нем до́бре, ста́нем со стра́хом, во́нмем, свято́е возноше́ние в ми́ре приноси́ти.
Хор:
Ми́лость ми́ра,/ же́ртву хвале́ния.
Иере́й:
Благода́ть Го́спода на́шего Иису́са Христа́, и любы́ Бо́га и Отца́, и прича́стие Свята́го Ду́ха, бу́ди со все́ми ва́ми.
Иере́й:
Горе́ име́им сердца́.
Иере́й:
Благодари́м Го́спода.
Хор:
Досто́йно и пра́ведно есть/ покланя́тися Отцу́ и Сы́ну, и Свято́му Ду́ху,// Тро́ице единосу́щней и неразде́льней.
Иере́й:
Побе́дную песнь пою́ще, вопию́ще, взыва́юще и глаго́люще.
Хор:
Свят, свят, свят Госпо́дь Савао́ф,/ испо́лнь не́бо и земля́ сла́вы Твоея́;/ оса́нна в вы́шних,/ благослове́н Гряды́й во и́мя Госпо́дне,/ оса́нна в вы́шних.
Иере́й:
Приими́те, яди́те, сие́ есть Те́ло Мое́, е́же за вы ломи́мое во оставле́ние грехо́в.
Иере́й:
Пи́йте от нея́ вси, сия́ есть Кровь Моя́ Но́ваго Заве́та, я́же за вы и за мно́гия излива́емая, во оставле́ние грехо́в.
Иере́й:
Твоя́ от Твои́х Тебе́ принося́ще, о всех и за вся.
Хор:
Тебе́ пое́м,/ Тебе́ благослови́м,/ Тебе́ благодари́м, Го́споди,/ и мо́лим Ти ся, Бо́же наш.
Иере́й:
Изря́дно о Пресвяте́й, Пречи́стей, Преблагослове́нней, Сла́вней Влады́чице на́шей Богоро́дице и Присноде́ве Мари́и.
Задосто́йник (Вме́сто «Досто́йно…»):
Хор:
А́нгел вопия́ше Благода́тней:/ Чи́стая Де́во, ра́дуйся!/ И па́ки реку́: ра́дуйся!/ Твой Сын воскре́се/ тридне́вен от гро́ба,/ и ме́ртвыя воздви́гнувый:// лю́дие, весели́теся.
Свети́ся, свети́ся,/ но́вый Иерусали́ме:/ сла́ва бо Госпо́дня/ на тебе́ возсия́./ Лику́й ны́не/ и весели́ся, Сио́не./ Ты же, Чи́стая, красу́йся, Богоро́дице,// о воста́нии Рождества́ Твоего́.
Иере́й:
В пе́рвых помяни́, Го́споди, вели́каго господи́на и отца́ на́шего имярек, Святе́йшаго Патриа́рха всея́ Руси́, и господи́на на́шего (Высо́ко-) Преосвяще́ннейшаго (имярек), (архи-)епи́скопа (митрополита (титул)), и́хже да́руй святы́м Твои́м це́рквам, в ми́ре, це́лых, честны́х, здра́вых, долгоде́нствующих, пра́во пра́вящих сло́во Твоея́ и́стины.
Иере́й:
И даждь нам еди́неми усты́ и еди́нем се́рдцем сла́вити и воспева́ти пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Иере́й:
И да бу́дут ми́лости вели́каго Бо́га и Спа́са на́шего Иису́са Христа́ со все́ми ва́ми.
Диа́кон:
Вся святы́я помяну́вше, па́ки и па́ки ми́ром Го́споду помо́лимся.
Хор:
Го́споди, поми́луй.
(На каждое прошение)
Диа́кон:
О принесе́нных и освяще́нных Честны́х Даре́х, Го́споду помо́лимся.
Я́ко да человеколю́бец Бог наш, прие́м я́ во святы́й и пренебе́сный и мы́сленный Свой же́ртвенник, в воню́ благоуха́ния духо́внаго, возниспо́слет нам Боже́ственную благода́ть и дар Свята́го Ду́ха, помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Диа́кон:
Дне всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Соедине́ние ве́ры и прича́стие Свята́го Ду́ха испроси́вше, са́ми себе́, и друг дру́га, и весь живо́т наш Христу́ Бо́гу предади́м.
Иере́й:
И сподо́би нас, Влады́ко, со дерзнове́нием, неосужде́нно сме́ти призыва́ти Тебе́, Небе́снаго Бо́га Отца́, и глаго́лати:
Лю́ди:
О́тче наш, И́же еси́ на небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Диа́кон:
Главы́ ва́ша Го́сподеви приклони́те.
Иере́й:
Благода́тию, и щедро́тами, и человеколю́бием Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Хор:
Еди́н свят,/ еди́н Госпо́дь,/ Иису́с Христо́с,/ во сла́ву Бо́га Отца́./ Ами́нь.
Хор:
Те́ло Христо́во приими́те, исто́чника безсме́ртнаго вкуси́те.
Аллилу́ия, аллилу́ия, аллилу́ия.
Диа́кон:
Со стра́хом Бо́жиим и ве́рою приступи́те.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Единожды)
Иере́й:
Ве́рую, Го́споди, и испове́дую, я́ко Ты еси́ вои́стинну Христо́с, Сын Бо́га жива́го, прише́дый в мир гре́шныя спасти́, от ни́хже пе́рвый есмь аз. Еще́ ве́рую, я́ко сие́ есть са́мое пречи́стое Те́ло Твое́, и сия́ есть са́мая честна́я Кровь Твоя́. Молю́ся у́бо Тебе́: поми́луй мя и прости́ ми прегреше́ния моя́, во́льная и нево́льная, я́же сло́вом, я́же де́лом, я́же ве́дением и неве́дением, и сподо́би мя неосужде́нно причастити́ся пречи́стых Твои́х Та́инств, во оставле́ние грехо́в и в жизнь ве́чную. Ами́нь.
Ве́чери Твоея́ та́йныя днесь, Сы́не Бо́жий, прича́стника мя приими́; не бо враго́м Твои́м та́йну пове́м, ни лобза́ния Ти дам, я́ко Иу́да, но я́ко разбо́йник испове́даю Тя: помяни́ мя, Го́споди, во Ца́рствии Твое́м.
Да не в суд или́ во осужде́ние бу́дет мне причаще́ние Святы́х Твои́х Та́ин, Го́споди, но во исцеле́ние души́ и те́ла.
Во время Причащения людей:
Хор:
Те́ло Христо́во приими́те, исто́чника безсме́ртнаго вкуси́те.
Хор:
Аллилу́ия, аллилу́ия, аллилу́ия.
Иере́й:
Спаси́, Бо́же, лю́ди Твоя́, и благослови́ достоя́ние Твое́.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Единожды, протяжно)
Иере́й:
Всегда́, ны́не и при́сно, и во ве́ки веко́в.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Единожды, протяжно)
Ектения́ заключи́тельная:
Диа́кон:
Про́сти прии́мше Боже́ственных, святы́х, пречи́стых, безсме́ртных, небе́сных и животворя́щих, стра́шных Христо́вых Та́ин, досто́йно благодари́м Го́спода.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диа́кон:
День весь соверше́н, свят, ми́рен и безгре́шен испроси́вше, са́ми себе́ и друг дру́га, и весь живо́т наш Христу́ Бо́гу предади́м.
Иере́й:
Я́ко Ты еси́ освяще́ние на́ше, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Иере́й:
С ми́ром изы́дем.
Диа́кон:
Го́споду помо́лимся.
Иере́й:
Благословля́яй благословя́щия Тя, Го́споди, и освяща́яй на Тя упова́ющия, спаси́ лю́ди Твоя́ и благослови́ достоя́ние Твое́, исполне́ние Це́ркве Твоея́ сохрани́, освяти́ лю́бящия благоле́пие до́му Твоего́: Ты тех возпросла́ви Боже́ственною Твое́ю си́лою, и не оста́ви нас, упова́ющих на Тя. Мир мiрови Твоему́ да́руй, це́рквам Твои́м, свяще́нником, во́инству и всем лю́дем Твои́м. Я́ко вся́кое дая́ние бла́го, и всяк дар соверше́н свы́ше есть, сходя́й от Тебе́ Отца́ све́тов, и Тебе́ сла́ву, и благодаре́ние, и поклоне́ние возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Моли́тва на освяще́ние а́ртоса:
Диакон:
Го́споду помо́лимся.
Иерей:
Бо́же всеси́льный и Го́споди Вседержи́телю, и́же рабо́м Твои́м Моисе́ом во исхо́де Изра́илеве от Еги́пта, и в освобожде́нии люде́й Твои́х от го́рькия рабо́ты фарао́новы, а́гнца закла́ти повеле́л еси́, прообразу́я на кресте́ закла́ннаго во́лею нас де́ля А́гнца, взе́млющаго всего́ мiра грехи́, возлю́бленнаго Сы́на Твоего́, Го́спода на́шего Иису́са Христа́. Ты и ны́не, смире́нно мо́лим Тя, при́зри на хлеб сей, и благослови́, и освяти́ его́. И́бо и мы, раби́ Твои́, в честь и сла́ву, и в воспомина́ние сла́внаго воскресе́ния того́жде Сы́на Твоего́ Го́спода на́шего Иису́са Христа́, И́мже от ве́чныя рабо́ты вра́жия и от а́довых нереши́мых уз разреше́ние, свобо́ду и преведе́ние улучи́хом, пред Твои́м вели́чеством ны́не во всесве́тлый сей, пресла́вный и спаси́тельный день Па́схи, сей прино́сим: нас же сего́ принося́щих, и того́ лобза́ющих, и от него́ вкуша́ющих, Твоему́ небе́сному благослове́нию прича́стники бы́ти сотвори́ и вся́кую боле́знь и неду́г от нас Твое́ю си́лою отжени́, здра́вие всем подава́я. Ты бо еси́ исто́чник благослове́ния и цельба́м пода́тель, и Тебе́ сла́ву возсыла́ем Безнача́льному Отцу́, со Единоро́дным Твои́м Сы́ном, и Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в.
Иерей кропит артос священною водою, говоря:
Иерей:
Благословля́ется и освяща́ется а́ртос сей, окропле́нием воды́ сея́ свяще́нныя, во и́мя Отца́ и Сы́на и Свята́го Ду́ха. Ами́нь.
(Трижды.)
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(12 раз)
Иере́й:
Благослове́ние Госпо́дне на ва́с, Того́ благода́тию и человеколю́бием, всегда́, ны́не и при́сно, и во ве́ки веко́в.
Иерей:
Христо́с воскре́се из ме́ртвых,/ сме́ртию смерть попра́в//
Хор:
И су́щим во гробе́х живо́т дарова́в.
Иерей выйдя на амвон с крестом и трисвечником:
Христо́с воскресы́й из ме́ртвых, сме́ртию смерть попра́вый и су́щим во гробе́х живо́т дарова́вый: и́стинный Бог наш, моли́твами Пречи́стыя Своея́ Ма́тере и всех святы́х, поми́лует и спасе́т нас, я́ко Благ и Человеколю́бец.
И осеняет предстоящих Крестом и трисвещником на три стороны, громко произнося при каждом осенении:
Иерей:
Христо́с воскре́се!
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поскору)
И нам дарова́ живо́т ве́чный, покланя́емся Его́ тридне́вному Воскресе́нию.
Моли́тва благослове́ния сы́ра и яиц.
Диакон:
Го́споду помо́лимся.
Иерей:
Влады́ко Го́споди Бо́же наш, зижди́телю и соде́телю всех, благослови́ млеко́ огусте́вшее, с ни́мже и я́ица, и нас соблюди́ во бла́гости Твое́й, я́ко да причаща́ющеся их, Твои́х незави́стно пода́тельных даро́в испо́лнимся, и неизглаго́ланныя Твоея́ бла́гости: я́ко Твоя́ держа́ва, и Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Моли́тва благослове́ния мя́са, во святу́ю и вели́кую Неде́лю Па́схи.
Иерей:
Благослове́н Бог наш, всегда́, ны́не и при́сно и во ве́ки веко́в.
Хор:
Ами́нь. Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Диакон:
Го́споду помо́лимся.
Иерей:
При́зри Го́споди Иису́се Христе́ Бо́же наш, на бра́шна мяс, и освяти́ я́, я́коже освяти́л еси́ овна́, его́же Тебе́ приведе́ ве́рный Авраа́м, и а́гнца, его́же Тебе́ А́вель во всепло́дие принесе́: подо́бне и тельца́ упита́ннаго, его́же жре́ти повеле́л еси́ сы́нови Твоему́ заблу́ждшему, и па́ки к Тебе́ возвра́щшемуся: да я́коже той сподо́бися Твоея́ бла́гости наслади́тися, си́це и освяще́нных от Тебе́, и благослове́нных наслади́мся в пи́щу всех нас. Ты бо еси́ и́стинная пи́ща, и пода́тель благи́х, и Тебе́ сла́ву возсыла́ем со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в. Ами́нь.
Часы Пасхальные поются полностью (без чтения).
Иерей:
Благослове́н Бог наш, всегда́, ны́не и при́сно и во ве́ки веко́в.
Хор:
Ами́нь. Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Воскресе́ние Христо́во ви́девше,/ поклони́мся Свято́му Го́споду Иису́су,/ еди́ному безгре́шному,/ Кресту́ Твоему́ покланя́емся, Христе́,/ и свято́е Воскресе́ние Твое́ пое́м и сла́вим:/ Ты бо еси́ Бог наш,/ ра́зве Тебе́ ино́го не зна́ем,/ и́мя Твое́ имену́ем./ Прииди́те вси ве́рнии,/ поклони́мся Свято́му Христо́ву Воскресе́нию:/ се бо прии́де Кресто́м ра́дость всему́ ми́ру./ Всегда́ благословя́ще Го́спода,/ пое́м Воскресе́ние Его́:/ распя́тие бо претерпе́в,// сме́ртию смерть разруши́.
(Трижды)
Предвари́вшия у́тро, я́же о Мари́и,/ и обре́тшия ка́мень отвале́н от гро́ба,/ слы́шаху от А́нгела: во све́те присносу́щнем Су́щаго/ с ме́ртвыми что и́щете, я́ко челове́ка?/ Ви́дите гро́бныя пелены́, тецы́те и ми́ру пропове́дите,/ я́ко воста́ Госпо́дь, умертви́вый смерть,// я́ко есть Сын Бо́га, спаса́ющаго род челове́ческий.
А́ще и во гроб снизше́л еси́, Безсме́ртне,/ но а́дову разруши́л еси́ си́лу/ и воскре́сл еси́, я́ко Победи́тель, Христе́ Бо́же,/ жена́м мироно́сицам веща́вый: ра́дуйтеся!/ И Твои́м апо́столом мир да́руяй,// па́дшим подая́й воскресе́ние.
Во гро́бе пло́тски, во а́де же с душе́ю я́ко Бог,/ в раи́ же с разбо́йником, и на Престо́ле был еси́ Христе́, со Отце́м и Ду́хом,// вся исполня́яй, неопи́санный.
Сла́ва Отцу́ и Сы́ну и Свято́му Ду́ху.
Я́ко Живоно́сец, я́ко рая́ красне́йший,/ вои́стину и черто́га вся́каго ца́рскаго показа́ся светле́йший, Христе́, гроб Твой,// исто́чник на́шего воскресе́ния.
И ны́не и при́сно и во ве́ки веко́в. Ами́нь.
Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:// благослове́нна Ты в жена́х еси́, Всенепоро́чная Влады́чице.
Го́споди, поми́луй.
(40 раз)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
И́менем Госпо́дним благослови́, о́тче.
Иерей:
Моли́твами святы́х оте́ц на́ших, Го́споди, Иису́се Христе́, Бо́же наш, поми́луй нас.
Хор:
Ами́нь. Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Ма́лый воскре́сный отпу́ст:
Иерей выйдя на амвон с крестом без трисвечника:
Воскресы́й из ме́ртвых Христо́с, И́стинный Бог наш, моли́твами Пречи́стыя Своея́ Ма́тере, преподо́бных и богоно́сных оте́ц на́ших и всех святы́х, поми́лует и спасе́т нас, я́ко Благ и Человеколю́бец.
Такой чин полагается совершать на Светлой седмице вместо 1-го, 3-го, 6-го и 9-го часа, полунощницы и повечерия.
Вели́кая Пасха́льная вече́рня.
Перед вечерней – 9-й час по пасхальному чину.
По окончании 9-го часа облаченный во все священнические одежды иерей (при соборном служении – предстоятель), став пред престолом с кадилом в правой руке, с Крестом и трисвещником в левой, творит крест кадилом и возглашает:
Иере́й:
Благослове́н Бог наш всегда́, ны́не и при́сно и во ве́ки веко́в.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Духовенство:
Да воскре́снет Бог, и расточа́тся врази́ Его́,/ и да бежа́т от Лица́ Его́
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Я́ко исчеза́ет дым, да исче́знут,/ я́ко та́ет воск от лица́ огня́.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Сей день, его́же сотвори́ Госпо́дь,/ возра́дуемся и возвесели́мся вонь.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Сла́ва Отцу́ и Сы́ну и Свято́му Ду́ху.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
И ны́не и при́сно и во ве́ки веко́в. Ами́нь.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Христо́с воскре́се из ме́ртвых,/ сме́ртию смерть попра́в
Хор:
И су́щим во гробе́х живо́т дарова́в.
Диакон:
Ми́ром Го́споду помо́лимся.
Хор:
Го́споди, поми́луй.
(На каждое прошение)
Диакон:
О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе (ИМЯРЕК), и о Господи́не на́шем, Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея́, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Го́споди, воззва́х, глас 2:
Хор:
Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.
Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.
Чтец:
Стихи́ры воскре́сные, глас 2:
На 6. Стих:
А́ще беззако́ния на́зриши, Го́споди, Го́споди, кто постои́т?// Я́ко у Тебе́ очище́ние е́сть.
Стихи́ра:
Пре́жде век от Отца́ ро́ждшемуся Бо́жию Сло́ву,/ вопло́щшемуся от Де́вы Мари́и,/ прииди́те, поклони́мся./ Крест бо претерпе́в,/ погребе́нию предаде́ся, я́ко Сам восхоте́,/ и воскре́се из ме́ртвых,// спасе́ мя заблужда́ющаго челове́ка.
Стих:
И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,// упова́ душа́ моя́ на Го́спода.
Стихи́ра:
Христо́с Спас наш,/ е́же на ны рукописа́ние пригвозди́в на Кресте́ загла́ди,/ и сме́рную держа́ву упраздни́,// поклоня́емся Его́ тридне́вному Воскресе́нию.
На 4. Стих:
От стра́жи у́тренния до но́щи, от стра́жи у́тренния,// да уповае́т Изра́иль на Го́спода.
Стихи́ра:
Со Арха́нгелы воспои́м Христо́во Воскресе́ние,/ Той бо есть Изба́витель и Спас душ на́ших,/ и в сла́ве стра́шней и кре́пцей си́ле,// па́ки гряде́т суди́ти ми́ру, его́же созда́.
Стих:
Я́ко у Го́спода ми́лость, и мно́гое у Него́ избавле́ние,// и Той изба́вит Изра́иля от всех беззако́ний eго́.
Стихи́ра:
Тебе́ Распе́ншагося и Погребе́ннаго,/ А́нгел пропове́да Влады́ку, и глаго́лаше жена́м:/ прииди́те ви́дите, иде́же лежа́ше Госпо́дь,/ воскре́се бо, я́коже рече́, я́ко Всеси́лен./ Те́мже Тебе́ поклоня́емся, Еди́ному Безсме́ртному,// Жизнода́вче Христе́, поми́луй нас.
На 2. Стих:
Хвали́те Го́спода вси язы́цы,// похвали́те Его́ вси лю́дие.
Стихи́ра:
Кресто́м Твои́м упраздни́л еси́,/ ю́же от дре́ва кля́тву,/ погребе́нием Твои́м умертви́л еси́ сме́рти держа́ву,/ воста́нием же Твои́м просвети́л еси́ род челове́ческий./ Сего́ ра́ди вопие́м Ти:// Благоде́телю Христе́ Бо́же наш, сла́ва Тебе́.
Стих:
Я́ко утверди́ся ми́лость Его́ на нас,// и и́стина Госпо́дня пребыва́ет во век.
Стихи́ра:
Отверзо́шася Тебе́, Го́споди,/ стра́хом врата́ сме́ртная,/ вра́тницы же а́довы ви́девше Тя, убоя́шася,/ врата́ бо ме́дная сокруши́л еси́,/ и вереи́ желе́зныя стерл еси́,/ и изве́л еси́ нас от тмы и се́ни сме́ртныя,// и у́зы на́ша растерза́л еси́.
Сла́ва Отцу́ и Сы́ну и Свято́му Ду́ху.
Спаси́тельную песнь пою́ще, от уст возсле́м./ Прииди́те вси в дому́ Госпо́днем припаде́м, глаго́люще:/ на дре́ве Распны́йся, и из ме́ртвых Воскресы́й,/ и Сый в не́дрех О́тчих,// очи́сти грехи́ на́ша.
И ны́не и при́сно и во ве́ки веко́в. Ами́нь.
Догма́тик:
Пре́йде сень зако́нная,/ благода́ти прише́дши,/ я́коже бо купина́ не сгара́ше опаля́ема,/ та́ко Де́ва родила́ еси́/ и Де́ва пребыла́ еси́./ Вме́сто столпа́ о́гненнаго,/ пра́ведное возсия́ Со́лнце,/ вме́сто Моисе́я, Христо́с,/ Спасе́ние душ на́ших.
Диа́кон:
Прему́дрость, про́сти.
Хор:
Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.
Диа́кон:
Прему́дрость во́нмем. Проки́мен вели́кий, глас 7-й:
Кто Бог ве́лий, я́ко Бог наш?/ Ты еси́ Бог творя́й чудеса́.
Хор:
Кто Бог ве́лий, я́ко Бог наш?/ Ты еси́ Бог творя́й чудеса́.
Диа́кон:
Сказа́л еси́ в лю́дех си́лу Твою́.
Хор:
Кто Бог ве́лий, я́ко Бог наш?/ Ты еси́ Бог творя́й чудеса́.
Стих 2.
И рех: ны́не нача́х, сия́ изме́на десни́цы Вы́шняго.
Кто Бог ве́лий, я́ко Бог наш?/ Ты еси́ Бог творя́й чудеса́.
Стих 3.
Помяну́х дела́ Госпо́дня, я́ко помяну́ от нач́ала чудеса́ Твоя́.
Кто Бог ве́лий, я́ко Бог наш?/ Ты еси́ Бог творя́й чудеса́.
Диа́кон:
Кто Бог ве́лий, я́ко Бог наш?/
Хор:
Ты еси́ Бог творя́й чудеса́.
Диакон:
И о сподо́битися нам слы́шанию свята́го Ева́нгелиа, Го́спода Бо́га мо́лим.
Хор:
Го́споди, поми́луй.
(Три́жды)
Иере́й:
От Иоа́нна свята́го Ева́нгелия чте́ние.
Хор:
Сла́ва Тебе́, Го́споди, сла́ва Тебе́.
Иерей:
Су́щу по́зде в день той во еди́ну от суббо́т, и две́рем затворе́нным, иде́же бя́ху ученицы́ Его́ со́брани, стра́ха ра́ди иуде́йска, прии́де Иису́с и ста посреде́, и глаго́ла им: мир вам. И сие́ рек, показа́ им ру́це и но́зе, и ре́бра Своя́. Возра́довашася у́бо ученицы́, ви́девше Го́спода. Рече́ же им Иису́с па́ки: мир вам. Я́коже посла́ Мя Оте́ц, и Аз посыла́ю вы. И сие́ рек, ду́ну и глаго́ла им: приими́те Дух Свят. И́мже отпустите́ грехи́, отпу́стятся им, и и́мже держите́, держа́тся. Фома́ же, еди́н от обоюна́десяте, глаго́лемый Близне́ц, не бе ту с ни́ми, егда́ прии́де Иису́с. Глаго́лаху же ему́ друзи́и ученицы: ви́дехом Го́спода. Он же рече́ им: а́ще не ви́жу на руку́ Его́ я́звы гвозди́нныя, и вложу́ пе́рста моего́ в я́звы гвозди́нныя, и вложу́ ру́ку мою́ в ре́бра Его́, не иму́ ве́ры.
Хор:
Сла́ва Тебе́, Го́споди, сла́ва Тебе́.
Диа́кон:
Рце́м вси от всея́ души́, и от всего́ помышле́ния на́шего рцем.
Диа́кон:
Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.
Диа́кон:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Три́жды, на каждое прошение)
Диа́кон:
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (ИМЯРЕК), и о Господи́не на́шем Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о бра́тиях на́ших, свяще́нницех, священномона́сех, и всем во Христе́ бра́тстве на́шем.
Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих настоя́теля, бра́тии и прихо́жан свята́го хра́ма сего́.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Иере́й:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.
Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.
Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.
Диа́кон:
Испо́лним вече́рнюю моли́тву на́шу Го́сподеви.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диа́кон:
Ве́чера всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и дру́г дру́га, и весь живо́т наш Христу́ Бо́гу предади́м.
Иере́й:
Я́ко Бла́г и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Диа́кон:
Главы́ на́ша Го́сподеви прикло́ним.
Иере́й:
Бу́ди держа́ва Ца́рствия Твоего́ благослове́на и препросла́влена. Отца́ и Сы́на и Свята́го Ду́ха, ны́не и при́сно и во ве́ки веко́в.
Чтец:
Стихи́ра воскре́сная, глас 2:
Стихира:
Воскресе́ние Твое́, Христе́ Спа́се,/ всю просвети́ вселе́нную,/ и призва́л еси́ Твое́ созда́ние,// Всеси́льне Го́споди, сла́ва Тебе́.
Стих:
Да воскре́снет Бог,/ и расточа́тся врази́ Его́.
Па́сха/ свяще́нная нам днесь показа́ся;/ Па́сха но́ва свята́я;/ Па́сха та́инственная;/ Па́сха всечестна́я./ Па́сха Христо́с Изба́витель;/ Па́сха непоро́чная;/ Па́сха вели́кая;/ Па́сха ве́рных./ Па́сха две́ри ра́йския нам отверза́ющая.// Па́сха всех освяща́ющая ве́рных.
Стих:
Я́ко исчеза́ет дым,/ да исче́знут.
Прииди́те/ от виде́ния жены́ благове́стницы,/ и Сио́ну рцы́те:/ приими́/ от нас ра́дости благове́щения, Воскресе́ния Христо́ва:/ красу́йся, лику́й/ и ра́дуйся, Иерусали́ме,/ Царя́ Христа́ узре́в из гро́ба,/ я́ко жениха́ происходя́ща.
Стих:
Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.
Мироно́сицы жены́,/ у́тру глубоку́,/ предста́вша гро́бу Живода́вца,/ обрето́ша А́нгела/ на ка́мени седя́ща,/ и той провеща́в им,/ си́це глаго́лаше:/ что и́щете Жива́го с ме́ртвыми;/ что пла́чете Нетле́ннаго во тли?// Ше́дше, пропове́дите ученико́м Его́.
Стих:
Сей день, его́же сотвори Госпо́дь,/ возра́дуемся и возвесели́мся в онь.
Па́сха кра́сная,/ Па́сха, Госпо́дня Па́сха!/ Па́сха всечестна́я/ нам возсия́. Па́сха,/ ра́достию друг дру́га обы́мем./ О Па́сха!/ Избавле́ние ско́рби,/ и́бо из гро́ба днесь,/ я́ко от черто́га/ возсия́в Христо́с,/ жены́ ра́дости испо́лни, глаго́ля:/ пропове́дите апо́столом.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Воскресе́ния день,/ и просвети́мся торжество́м,/ и друг дру́га обы́мем./ Рцем бра́тие,/ и ненави́дящим нас,/ прости́м вся Воскресе́нием,/ и та́ко возопии́м:/ Христо́с воскре́се из ме́ртвых,/ сме́ртию смерть попра́в,// и су́щим во гробе́х живо́т дарова́в.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Иерей:
Сый благослове́н Христо́с Бог наш, всегда́, ны́не и при́сно и во ве́ки веко́в.
Хор:
Ами́нь. Утверди́, Бо́же, святу́ю правосла́вную ве́ру, правосла́вных христиа́н во век ве́ка.
Иерей держа Крест с трисвечником поет в алтаре со всем духовенством:
Христо́с воскре́се из ме́ртвых,/ сме́ртию смерть попра́в//
Хор:
И су́щим во гробе́х живо́т дарова́в.
Иерей выйдя на амвон с крестом и трисвечником:
Христо́с воскресы́й из ме́ртвых, сме́ртию смерть попра́вый и су́щим во гробе́х живо́т дарова́вый: и́стинный Бог наш, моли́твами Пречи́стыя Своея́ Ма́тере и всех святы́х, поми́лует и спасе́т нас, я́ко Благ и Человеколю́бец.
И осеняет предстоящих Крестом и трисвещником на три стороны, громко произнося при каждом осенении:
Иерей:
Христо́с воскре́се!
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
И нам дарова́ живо́т ве́чный, покланя́емся Его́ тридне́вному Воскресе́нию.