Подождите
готовим последование@
Пятница Светлой седмицы
*
Последование утрени
*
Вели́кая ектения́:
*
Канон Пасхальный, глас 1:
*
Песнь 1:
*
Катава́сия:
*
Песнь 3:
*
Катавасия:
*
Ектения́ ма́лая:
*
Конда́к, глас 8:
*
Седа́лен, гла́с 8. Подо́бный: Прему́дрости Сло́ва:
*
Песнь 4:
*
Катавасия:
*
Песнь 5:
*
Катавасия:
*
Песнь 6:
*
Катавасия:
*
Ектения́ ма́лая:
*
Конда́к, глас 8:
*
И́кос:
*
Синакса́рь на Пресвяту́ю Госпожу́ Влады́чицу Богоро́дицу, живоприе́мный исто́чник.
*
Песнь 7:
*
Катава́сия:
*
Песнь 8:
*
Катава́сия:
*
Песнь 9:
*
Катава́сия:
*
Ектения́ ма́лая:
*
Свети́лен Па́схи, самогла́сен:
*
Хвали́тны псалмы́, глас 6:
*
Ектения́ сугу́бая:
*
Ектения́ проси́тельная:
*
Пасха́льный отпу́ст.
*
И сра́зу пою́тся часы́ Пасха́льные:
*
Пасха́льные часы́:
*
Ипакои́, глас 4:
*
Конда́к, глас 8:
*
Тропари́, глас 8:
*
Ма́лый воскре́сный отпу́ст:
*
Боже́ственная Литурги́я:
*
Пасха́льное нача́ло:
*
Вели́кая ектения́:
*
Антифо́ны ПА́СХИ:
*
Антифо́н 1-й:
*
Ектения́ ма́лая:
*
Антифо́н 2-й:
*
Ектения́ ма́лая:
*
Антифон 3-й:
*
Вход с Евангелием:
*
По входе:
*
Тропарь праздника, глас 5:
*
Ипакои́, глас 4:
*
Кондaк праздника, глaс 8:
*
Вме́сто Трисвято́го:
*
Ектения́ сугу́бая:
*
Ектения́ об оглаше́нных:
*
Ектения́ ве́рных, пе́рвая:
*
Ектения́ ве́рных, втора́я:
*
Херуви́мская песнь:
*
Вели́кий вход:
*
Ектения́ проси́тельная:
*
Си́мвол ве́ры:
*
Евхаристи́ческий Кано́н:
*
Задосто́йник (Вме́сто «Досто́йно…»):
*
Ектения́ проси́тельная:
*
Моли́тва Госпо́дня:
*
Прича́стен Пра́здника:
*
Прича́стие:
*
Ектения́ заключи́тельная:
*
Заамво́нная моли́тва:
*
Пасха́льный отпу́ст.
*
Многоле́тие:
*
Пасха́льные часы́:
*
Ипакои́, глас 4:
*
Конда́к, глас 8:
*
Тропари́, глас 8:
*
Ма́лый воскре́сный отпу́ст:
*
Вели́кая вече́рня.
*
Пасха́льное нача́ло:
*
Вели́кая ектения́:
*
Го́споди, воззва́х, глас 8:
*
Вход с кади́лом:
*
Све́те Тихи́й:
*
Проки́мен вели́кий:
*
Ектения́ сугу́бая:
*
Сподо́би, Го́споди:
*
Ектения́ проси́тельная:
*
Стихи́ры на стихо́вне:
*
Пасха́льный отпу́ст.
25 апреля 2025 по н. ст.
Пре́жде нача́ла, вжига́ет канди́ла и свещы́ параекклисиа́рх. Та́же кле́плет в вели́кий кампа́н, и в про́чыя. И собра́вшымся на́м во хра́м, иере́й полага́ет обы́чный покло́н настоя́телю, и отхо́дит во святы́й олта́рь, и взе́м кади́льницу стои́т пред свято́ю трапе́зою, кроме́ у́бо свяще́нническия оде́жды, епитрахи́лий то́чию возло́жь све́рх ма́нтии, кади́т крестообра́зно, глаго́ля
Иере́й:
Сла́ва Святе́й, и Единосу́щней, и Животворя́щей, и Неразде́льней Тро́ице всегда́, ны́не и при́сно, и во ве́ки веко́в
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Дважды)
На третий раз до середины:
Христо́с воскре́се из ме́ртвых,/ сме́ртию смерть попра́в
Хор:
И су́щим во гробе́х живо́т дарова́в.
Духовенство:
Да воскре́снет Бог, и расточа́тся врази́ Его́,/ и да бежа́т от Лица́ Его́ ненави́дящии Его́.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Я́ко исчеза́ет дым, да исче́знут,/ я́ко та́ет воск от лица́ огня́.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Сей день, его́же сотвори́ Госпо́дь,/ возра́дуемся и возвесели́мся вонь.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Сла́ва Отцу́ и Сы́ну и Свято́му Ду́ху.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
И ны́не и при́сно и во ве́ки веко́в. Ами́нь.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Христо́с воскре́се из ме́ртвых,/ сме́ртию смерть попра́в
Хор:
И су́щим во гробе́х живо́т дарова́в.
Диакон:
Ми́ром Го́споду помо́лимся.
Хор:
Го́споди, поми́луй.
(На каждое прошение)
Диакон:
О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе (ИМЯРЕК), и о Господи́не на́шем, Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея́, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Канон Пасхальный, глас 1:
кано́н Па́сце, со ирмосы́, на 8: и Богоро́дицы, на 6:
Каждение указывается только в начале канона (см. 1 зри во св. и вел. нед. Пасхи вечера, Тип., л. 354), но обыкновенно бывает в начале, после 3 и 6 песни и на 9.
Ирмос:
Воскресе́ния день,/ просвети́мся, лю́дие./ Па́сха, Госпо́дня Па́сха:/ от сме́рти бо к жи́зни,/ и от земли́ к небеси́,/ Христо́с Бог нас преведе́,// побе́дную пою́щия.
(Дважды)
Припев:
Христо́с воскре́се из ме́ртвых.
Очи́стим чу́вствия, и у́зрим/ непристу́пным све́том/ Воскресе́ния, Христа́/ блиста́ющася,/ и ра́дуйтеся, реку́ща,/ я́сно да услы́шим,// побе́дную пою́ще.
(3 раза)
Припев:
Христо́с воскре́се из ме́ртвых.
Небеса́ у́бо досто́йно да веселя́тся,/ земля́ же да ра́дуется,/ да пра́зднует же мир,/ ви́димый же весь и неви́димый:/ Христо́с бо воста́,// весе́лие ве́чное.
(3 раза)
Припев:
Пресвята́я Богоро́дице, спаси́ нас.
Ны́не источи́ ми Де́во Богоро́дице исто́чниче, благода́ть даю́щи Сло́ва, я́ко да воспою́ тя исто́чник, вре́ющий живо́т и благода́ть ве́рным: ты́ бо ипоста́сное сло́во источи́ла еси́.
(Дважды)
Припев:
Пресвята́я Богоро́дице, спаси́ нас.
Врачевство́ па́че естества́, хра́м Тво́й Честна́я, явля́ется все́м Отрокови́це: от сме́рти бо я́вныя притека́ющыя ве́рныя я́ве возставля́ет, и все́м незави́стную то́чит сла́дость.
(Дважды)
Припев:
Пресвята́я Богоро́дице, спаси́ нас.
Излива́еши с небесе́ неистощи́мо благода́ти вои́стинну еди́на: слепе́юща бо твори́ши взира́ти к све́ту, бла́том но́вым, возгласи́вши свы́ше па́че смы́сла Лео́нови.
Припев:
Пресвята́я Богоро́дице, спаси́ нас.
О́бщее любоче́стие челове́чества Честна́я, ра́дуйся Мари́е, ра́дуйся: все́х бо Творе́ц на Тя́, я́коже ка́пля сни́де я́вственно, исто́чник тя́ безсме́ртен показа́в Богоневе́стная.
Воскресе́ния день,/ просвети́мся, лю́дие./ Па́сха, Госпо́дня Па́сха:/ от сме́рти бо к жи́зни,/ и от земли́ к небеси́,/ Христо́с Бог нас преведе́,// побе́дную пою́щия.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Ирмос:
Прииди́те, пи́во пие́м но́вое,/ не от ка́мене непло́дна чудоде́емое,/ но нетле́ния исто́чник/ из гро́ба одожди́вша Христа́,// в Не́мже утвержда́емся.
Припев:
Христо́с воскре́се из ме́ртвых.
Ны́не вся испо́лнишася све́та,/ не́бо же и земля́, и преиспо́дняя:/ да пра́зднует у́бо вся тварь/ воста́ние Христо́во,// в не́мже утвержда́ется.
Припев:
Христо́с воскре́се из ме́ртвых.
Вчера́ спогребо́хся Тебе́ Христе́,/ совостаю́ днесь/ воскре́сшу Тебе́,/ сраспина́хся Тебе́ вчера́,// Сам мя спросла́ви Спа́се во Ца́рствии Твое́м.
Припев:
Пресвята́я Богоро́дице, спаси́ нас.
Све́тлый тя́ святы́й хра́м Влады́ки все́х Отрокови́це ве́м, и нетле́ния исто́чник, во́ду излива́ющ Христа́, от него́же напая́емся.
(Дважды)
Припев:
Пресвята́я Богоро́дице, спаси́ нас.
От Твоея́ благода́ти Влады́чице исто́чниче, Самоде́ржцу дае́ши исхо́дов происхожде́ние содержи́мо лю́те, ка́мене подстоя́ние стра́шное, водо́ю разреши́вшееся.
(Дважды)
Припев:
Пресвята́я Богоро́дице, спаси́ нас.
Тече́т благода́ть незави́стная от Тебе́, Богоро́дице Де́во, оби́льно точа́щая, хроми́и ска́чут о Тебе́, прокаже́нных очища́ется мно́жество, и де́мони угнета́ются.
Припев:
Пресвята́я Богоро́дице, спаси́ нас.
Все́м дае́ши исцеле́ние ве́рным, царе́м, простце́м, ни́щым, князе́м, убо́гим, бога́тым о́бще, во́ду излива́яй исто́чниче разли́чное исцеле́ние
Прииди́те, пи́во пие́м но́вое,/ не от ка́мене непло́дна чудоде́емое,/ но нетле́ния исто́чник/ из гро́ба одожди́вша Христа́,// в Не́мже утвержда́емся.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Для произнесения ектений и совершения каждений диакон (со свечой в руке) во всех случаях исходит из алтаря царскими вратами (во всю Светлую седмицу).
Диакон:
Па́ки и па́ки ми́ром Го́споду помо́лимся.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко Ты еси́ Бог наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
А́ще и во гроб снизше́л еси́, Безсме́ртне,/ но а́дову разруши́л еси́ си́лу,/ и воскре́сл еси́, я́ко победитель, Христе́ Бо́же,/ жена́м мироно́сицам веща́вый: ра́дуйтеся,/ и Твои́м апо́столом мир да́руяй,// па́дшим подая́й воскресе́ние.
Седа́лен, гла́с 8. Подо́бный: Прему́дрости Сло́ва:
Приснотеку́щий исто́чник, и живо́тный, источа́яй струя́ боже́ственный то́к, согла́сно восхва́лим благода́ти прося́ще: на ки́йждо бо де́нь источа́ет исцеле́ния, я́ко ре́к тече́ния показу́яй мале́йшая. Те́мже по до́лгу приступа́юще с любо́вию, ве́рно почерпе́м от исто́чника неисчерпа́емое здра́вие, вои́стинну безсме́ртное, ороша́ющее ве́рно благочести́вых сердца́: устна́ми возопии́м, Ты́ еси́ ве́рных утеше́ние.
Ирмос:
На Боже́ственней стра́жи/ богоглаго́ливый Авваку́м/ да ста́нет с на́ми, и пока́жет/ светоно́сна А́нгела,/ я́сно глаго́люща:/ днесь спасе́ние ми́ру,/ я́ко воскре́се Христо́с,// я́ко всеси́лен.
(Дважды)
Припев:
Христо́с воскре́се из ме́ртвых.
Му́жеский у́бо пол,/ я́ко разве́рзый де́вственную утро́бу,/ яви́ся Христо́с:/ я́ко челове́к же,/ А́гнец нарече́ся:/ непоро́чен же,/ я́ко невку́сен скве́рны,/ на́ша Па́сха,/ и я́ко Бог и́стинен// соверше́н рече́ся.
(Дважды)
Припев:
Христо́с воскре́се из ме́ртвых.
Я́ко единоле́тный а́гнец,/ благослове́нный нам вене́ц Христо́с,/ во́лею за всех закла́н бысть,/ Па́сха чисти́тельная,/ и па́ки из гро́ба кра́сное// пра́вды нам возсия́ Со́лнце.
(Дважды)
Припев:
Христо́с воскре́се из ме́ртвых.
Богооте́ц у́бо Дави́д/ пред се́нным ковче́гом скака́ше игра́я,/ лю́дие же Бо́жии святи́и,/ образо́в сбытие́ зря́ще,/ весели́мся Боже́ственне,/ я́ко воскре́се Христо́с,// я́ко Всеси́лен.
(Дважды)
Припев:
Пресвята́я Богоро́дице, спаси́ нас.
Па́че песка́ вои́стинну, и ка́плий дожде́вных, бы́ша Богоро́дице мно́жества, исто́чника де́л Твои́х, непреста́нно теку́щая на всю́ зе́млю бога́тно, и вся́каго боля́ща лю́те ско́ро исцеля́ющая.
(Дважды)
Припев:
Пресвята́я Богоро́дице, спаси́ нас.
На стесне́нный жены́ от карки́на сосе́ц, вода́ возлива́ется Де́во, исто́чника Твоего́ Влады́чице, и а́бие преста́ша стра́сти смертоно́сныя струе́ю, и карки́н про́сто изы́ти позна́.
(Дважды)
Припев:
Пресвята́я Богоро́дице, спаси́ нас.
Недомы́слимое в Тебе́, и па́че естества́ соде́янное е́сть я́вственно Богоро́дице: вода́ бо быва́ет исто́чника Твоего́ исцеле́ние, неду́гом смертоно́сным проти́вное, его́же естество́ я́ве никогда́же ве́дяше.
Припев:
Пресвята́я Богоро́дице, спаси́ нас.
При́сно умерщвля́ет мя́ вра́г сла́стными прило́ги, Влады́чице исто́чниче Богоро́дице, не пре́зри, предвари́ ско́рая по́моще: сего́ же се́тей мя́ изба́ви, да воспою́ Тя при́сно многопе́тую.
На Боже́ственней стра́жи/ богоглаго́ливый Авваку́м/ да ста́нет с на́ми, и пока́жет/ светоно́сна А́нгела,/ я́сно глаго́люща:/ днесь спасе́ние ми́ру,/ я́ко воскре́се Христо́с,// я́ко всеси́лен.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Ирмос:
У́тренюем у́треннюю глубоку́,/ и вме́сто ми́ра песнь принесе́м Влады́це,/ и Христа́ у́зрим/ пра́вды Со́лнце,// всем жизнь возсия́юща.
(Дважды)
Припев:
Христо́с воскре́се из ме́ртвых.
Безме́рное Твое́ благоутро́бие,/ а́довыми у́зами содержи́мии зря́ще,/ к све́ту идя́ху Христе́,/ весе́лыми нога́ми,// Па́сху хва́ляще ве́чную.
(3 раза)
Припев:
Христо́с воскре́се из ме́ртвых.
Присту́пим свещено́снии,/ исходя́щу Христу́ из гро́ба, я́ко жениху́,/ и спра́зднуем любопра́зднственными чи́нми// Па́сху Бо́жию спаси́тельную.
(3 раза)
Припев:
Пресвята́я Богоро́дице, спаси́ нас.
Глаго́ланная Де́во Отрокови́це, исто́чника Твоего́ вои́стинну чудеса́, ужаса́ют челове́ков помышле́ние: па́че бо естества́ су́ть, вся́ ве́рныя освяща́ющая.
(Дважды)
Припев:
Пресвята́я Богоро́дице, спаси́ нас.
Повествова́ руно́, ма́нна и Силоа́м, и ка́мень точа́щь, Соломо́нов притво́р, благода́ть Твою́, Иорда́нския во́ды, и исто́чник самаряны́ни.
(Дважды)
Припев:
Пресвята́я Богоро́дице, спаси́ нас.
Ка́пли Твоя́ Отрокови́це Де́во, я́же исто́чника, и ме́ртваго оживи́ша, па́че сло́ва соде́янное и смы́сла: вся́ бо Твоя́ Всечи́стая, сло́во побежда́ют челове́ческое.
Припев:
Пресвята́я Богоро́дице, спаси́ нас.
Стра́сти моя́ Отрокови́це исцели́, кровотече́ния исто́чник изсуша́ющи, и лю́тое пла́мене возжже́ние, и здра́вия преложе́ние, исхо́дов сою́з, и чревотече́ние.
У́тренюем у́треннюю глубоку́,/ и вме́сто ми́ра песнь принесе́м Влады́це,/ и Христа́ у́зрим/ пра́вды Со́лнце,// всем жизнь возсия́юща.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Ирмос:
Снизше́л еси́ в преиспо́дняя земли́,/ и сокруши́л еси́ вереи́ ве́чныя,/ содержа́щия свя́занныя, Христе́,/ и тридне́вен, я́ко от ки́та Ио́на,// воскре́сл еси́ от гро́ба.
(Дважды)
Припев:
Христо́с воскре́се из ме́ртвых.
Сохрани́в це́ла зна́мения Христе́,/ воскре́сл еси́ от гро́ба,/ ключи́ Де́вы не вреди́вый в рождестве́ Твое́м,// и отве́рзл еси́ нам ра́йския две́ри.
(3 раза)
Припев:
Христо́с воскре́се из ме́ртвых.
Спа́се мой,/ живо́е же и неже́ртвенное заколе́ние,/ я́ко Бог Сам Себе́/ во́лею приве́л Отцу́,/ совоскреси́л еси́ всеро́днаго Ада́ма,// воскре́с от гро́ба.
(3 раза)
Припев:
Пресвята́я Богоро́дице, спаси́ нас.
Словеса́ сло́ва, я́ко вои́стинну исто́чника, воспева́ем Тя́ Чи́стая: прему́дрости бо глубину́ я́ко па́че сло́ва ражда́еши, пове́сивша на возду́се тече́ния, и зе́млю на воде́.
(Дважды)
Припев:
Пресвята́я Богоро́дице, спаси́ нас.
Подшла́ еси́ ле́ствиц несе́ние, оте́млющее сокруше́ние и́же та́мо живопи́сцов, о всесвяты́й исто́чниче! спаса́яй лю́ди от тру́са до́му па́дшыя.
(Дважды)
Припев:
Пресвята́я Богоро́дице, спаси́ нас.
Утро́бы неродя́щыя непло́дством пре́жде, разреша́еши я́ве, исто́чника Твоего́ струя́ми: и́бо я́ко роди́вшая Влады́ку все́х. и рожде́ния подае́ши.
Припев:
Пресвята́я Богоро́дице, спаси́ нас.
Ни сло́во, ни у́м, ниже́ язы́к Твое́ возмо́гут Чи́стая Рождество́ похвали́ти, но немощству́ют в Тебе́, и облича́ется филосо́фов че́стность, и ри́торов красота́.
Снизше́л еси́ в преиспо́дняя земли́,/ и сокруши́л еси́ вереи́ ве́чныя,/ содержа́щия свя́занныя, Христе́,/ и тридне́вен, я́ко от ки́та Ио́на,// воскре́сл еси́ от гро́ба.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Диакон:
Па́ки и па́ки ми́ром Го́споду помо́лимся.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Ты бо еси́ Царь ми́ра, и Спас душ на́ших, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
От неистощи́мыя Ты́, исто́чниче богоблагода́тный, подае́ши ми́, точа́щи во́ды Твоея́ благода́ти, приснотеку́щий па́че сло́ва: я́ко бо Сло́во ро́ждшая па́че смы́сла, молю́ Ти ся, ороси́ мя благода́тию, да зову́ Ти: ра́дуйся, водо́ спаси́тельная.
Нескве́рная Богоро́дице, ро́ждшая Сло́во О́тчее, пре́жде ве́к нетле́нно ро́ждшееся, разшири́ моя́ уста́, Чи́стая, спривнося́щи мя́ к Твоему́ похвале́нию, я́ко да восхвалю́ Тя, зовы́й исто́чнику Твоему́ сия́: ра́дуйся, исто́чниче ра́дости непреста́емыя: ра́дуйся, то́че добро́ты неизрече́нныя. ра́дуйся, неду́гов разли́чных разреше́ние: ра́дуйся страсте́й вся́ких потопле́ние. Ра́дуйся струе́ светови́днейшая, здра́вы творя́щая ве́рныя: ра́дуйся водо́ благода́тнейшая неду́гующым многоразли́чно. Ра́дуйся ча́ше ма́нны живото́чныя: ра́дуйся ба́не и не́ктарю богоизлия́нный. Ра́дуйся водо́, прему́дрости неве́дение оте́млющая: ра́дуйся растворе́ние се́рдца, пи́щу боже́ственную излива́ющее. Ра́дуйся приста́нище неможе́ния источа́ющая: ра́дуйся пла́мень неду́гования угаша́ющая. Ра́дуйся водо́ спаси́тельная.
Синакса́рь на Пресвяту́ю Госпожу́ Влады́чицу Богоро́дицу, живоприе́мный исто́чник.
Чтец:
В пято́к Све́тлыя седми́цы, пра́зднуем обновле́ние хра́ма Пресвяты́я и Госпожи́ на́шея Богоро́дицы, имену́емаго живоно́снаго исто́чника. Еще́ же па́мять твори́м изря́дных и па́че естества́ чуде́с бы́вших, во о́ном хра́ме от Богома́тере. Се́й у́бо хра́м пе́рвее основа́ся от царя́ Льва́ Вели́каго, и́же и Маке́лл именова́ся. Се́й поне́же бя́ше бла́г и смире́н челове́к, за до́брое свое́ наме́рение и ми́лостивное, е́же имя́ше, пре́жде не́же бы́ти царю́, обрета́яйся во о́ном ме́сте, обре́те еди́наго челове́ка слепа́го, не ви́дяща ка́мо ити́: и взе́м его́ за ру́ку, ведя́ше. Дости́гшима же обои́ма та́мо бли́з, иде́же бя́ше се́й исто́чник, возжада́ слепы́й, и моля́ше льва́, да ороси́т его́: и́же идя́ во вну́треннее о́ное ле́са, иде́же бя́ше древе́с и насажде́ний разли́чных испо́лнено, иска́ше воды́, и не обрета́яй исто́чника, обраща́шеся а́ки отягча́емь. И слы́шит гла́с свы́ше глаго́лющь: о Льве́! не уныва́й, зане́ вода́, ея́же и́щеши, бли́з тебе́ е́сть, и обрати́ся обрести́ ю́. И Ле́в у́бо обраща́яйся, и ища́й мно́го, не обре́те ея́. И па́ки слы́шит ра́вный пе́рвому гла́с, и глаго́лет ему́: царю́ Льве́, вни́ди во вну́треннюю ча́сть загуще́ннаго сего́ ле́са, и возми́ свои́ма рука́ма от сея́ му́тныя воды́, и исцели́ жа́жду слепа́го, и пома́жи и помраче́нныя его́ о́чи: и а́бие позна́еши, ка́я е́смь, и от мно́гаго вре́мене живу́ на се́м ме́сте. Ле́в у́бо сотвори́ я́коже гла́с повеле́ ему́, и а́бие воззре́ слепы́й. И по Богома́тере прорече́нию, по ма́ле вре́мени бы́сть ца́рь Ле́в: и созда́ та́мо у исто́чника хра́м пе́рвый, бога́тою руко́ю, я́коже зри́тся дне́сь. И поне́же быва́ху чудеса́ множа́йшая на вся́кий де́нь, по мно́гих ле́тех иустиниа́н вели́кий самоде́ржец гре́ческий, поне́же пострада́ зело́ от не́мощи водотру́дия, и обре́те та́мо исцеле́ние свое́, хотя́ да́ти воздая́ние Ма́тери Бо́жией, па́ки созда́ о́ный пе́рвый хра́м, и сотвори́ и велича́йший и красне́йший, и́же от мно́гих тру́сов внегда́ разсе́деся, последи́ ца́рь Васи́лий Македо́нский, и сы́н его́ Ле́в Му́дрый, па́ки созда́ша и испра́виша и. Во вре́мя и́х се́й исто́чник мно́га чудеса́ де́йствова: и во́д задержа́ния, и пти́сы, и ины́я тмочи́сленныя стра́сти исцели́: карки́нския стра́сти, и кровотече́ния мно́гих родо́в, и́миже стражда́ху царе́вны и ины́я жены́, и разли́чныя огне́вицы, и ины́я боле́зни, и я́звы неисце́льныя, и непло́дныя разреши́: я́ко и цари́ца Зои́ непло́ды су́щи прия́т да́р от сего́ исто́чника, сы́на Константи́на Порфироге́нита. Воскреси́ же и ме́ртваго, и́же бе́ от Фессали́и, и приходя́ ко свято́му исто́чнику у́мре на пути́. Егда́ же хотя́ше умре́ти, запове́да кора́блеником взя́ти его́ та́мо во хра́м исто́чника, и возлия́ти на него́ три́ ка́ди от о́ныя воды́, и тогда́ погребсти́ его́. Е́же творя́ще кора́бленицы, и возлива́юще на него́ во́ду, а́бие воскре́се ме́ртвый. По мно́гом же вре́мени, хотя́ па́сти вели́кий хра́м о́ный, яви́ся Богоро́дица, и держа́ше его́, до́ндеже изы́де во́н все́ мно́жество люде́й, и никто́же вреди́ся. Та́яжде свята́я вода́ пива́ема, мно́гия бесну́емыя исцели́: и от темни́цы челове́ки свя́занныя разреши́. Исцели́ же и царя́ Льва́ от каменозая́тия, и жены́ его́ Феофа́ны угаси́ зе́льнейшую огне́вицу. И бра́та его́ Стефа́на разреши́ от пти́сныя не́мощи. Дарова́ же и слу́х Иоа́нну патриа́рху Иерусали́мскому. Исцели́ еще́ и си́льную огне́вицу Патри́киа Тара́сиа, и ма́тере его́ Магистри́ссы, и сы́на Стилиа́нова исцели́ от водозадержа́ния. И не́кую жену́ и́менем Схи́зину свободи́ от чревоболе́ния. И царя́ Рома́на исцели́, от разреше́ния и связа́ния чре́ва та́яжде вода́, подо́бне и жену́ его́. Призва́нием же то́кмо исцели́ всесвята́я мона́ха Пе́перин, и ученика́ его́ в Халде́и. Подо́бне и мона́ха Матфе́а, и Меле́тиа, и́хже оболга́ша царю́, свободи́ от гне́ва: Патри́киа же и Протоспафа́риа, и ины́я тмочи́сленныя кто́ испове́дати мо́жет? Не́сть же пра́ведно не воспомина́ти и исцеле́ния Исхи́ова: ниже́ ки́й язы́к мо́жет пове́дати, ели́ка чудеса́ та́яжде вода́ де́йствова, и да́же до дне́сь де́йствует, па́че ка́плей дожде́вных, и па́че зве́зд небе́сных, и листо́в мно́жества, я́же в на́ша времена́ ви́дехом. Еще́ исцели́ и ины́я смертоно́сныя боле́зни, прока́зы, свербо́ты па́че естества́, и опухле́ния же́нская, и душе́вныя стра́сти мно́гия исцели́, и разли́чныя очны́я боле́зни. Еще́ же исцели́ вара́гга Иоа́нна от воднотрудова́ния, и друга́го вара́гга исцели́ от злы́х я́зв, и священномона́ха Ма́рка от о́спы, и каменозая́тия мона́ха Заха́рию. И ина́я мно́жайшая чудеса́, я́же не возмо́жно е́сть исчи́слити, я́же де́йствова и де́йствует непреста́нно. Твоея́ Ма́тере моли́твами, Христе́ Бо́же на́ш поми́луй на́с. Ами́нь.
Воскресе́ние Христо́во ви́девше,/ поклони́мся Свято́му Го́споду Иису́су,/ еди́ному безгре́шному,/ Кресту́ Твоему́ покланя́емся, Христе́,/ и свято́е Воскресе́ние Твое́ пое́м и сла́вим:/ Ты бо еси́ Бог наш,/ ра́зве Тебе́ ино́го не зна́ем,/ и́мя Твое́ имену́ем./ Прииди́те вси ве́рнии,/ поклони́мся Свято́му Христо́ву Воскресе́нию:/ се бо прии́де Кресто́м ра́дость всему́ ми́ру./ Всегда́ благословя́ще Го́спода,/ пое́м Воскресе́ние Его́:/ распя́тие бо претерпе́в,// сме́ртию смерть разруши́.
(Трижды)
Воскре́с Иису́с от гро́ба,/ я́коже прорече́,/ даде́ нам живо́т ве́чный// и ве́лию ми́лость.
(Трижды)
Ирмос:
О́троки от пе́щи изба́вивый,/ быв Челове́к,/ стра́ждет я́ко сме́ртен,/ и стра́стию сме́ртное,/ в нетле́ния облачи́т благоле́пие,/ Еди́н благослове́н// отце́в Бог, и препросла́влен.
(Дважды)
Припев:
Христо́с воскре́се из ме́ртвых.
Жены́ с ми́ры богому́дрыя в след Тебе́ теча́ху:/ Его́же, я́ко ме́ртва, со слеза́ми иска́ху,/ поклони́шася ра́дующияся Живо́му Бо́гу,/ и Па́сху та́йную// Твои́м, Христе́, ученико́м благовести́ша.
(Дважды)
Припев:
Христо́с воскре́се из ме́ртвых.
Сме́рти пра́зднуем умерщвле́ние,/ а́дово разруше́ние,/ ино́го жития́ ве́чнаго нача́ло,/ и игра́юще пое́м Вино́внаго,/ Еди́наго благослове́ннаго// отце́в Бо́га, и препросла́вленнаго.
(Дважды)
Припев:
Христо́с воскре́се из ме́ртвых.
Я́ко вои́стинну свяще́нная,/ и всепра́зднственная сия́ спаси́тельная нощь,/ и светоза́рная,/ светоно́снаго дне,/ воста́ния су́щи провозве́стница:// в не́йже безле́тный Свет из гро́ба пло́тски всем возсия́.
(Дважды)
Припев:
Пресвята́я Богоро́дице, спаси́ нас.
Почерпи́те неду́гующии исцеле́ния: Всечи́стая бо то́чит от боже́ственнаго исто́чника сла́дость и́стинную, пото́к сла́дости вои́стинну вре́ющий, те́мже и ве́рою то́ки незави́стныя поче́рпем вси́.
(Дважды)
Припев:
Пресвята́я Богоро́дице, спаси́ нас.
Удивля́ют слы́шащыя Влады́чице, стра́нная Твоя́ чудеса́, вся́ ве́рныя: немы́я бо и глухи́я, я́ко благоглаго́ливыя показу́ет вода́ Твоя́, стра́ждущыя же лю́те врачу́ет, и исцеле́ние да́рует.
(Дважды)
Припев:
Пресвята́я Богоро́дице, спаси́ нас.
Возво́диши от пе́щи скорбе́й, ороша́ющи вода́ми от стра́ннаго исто́чника, приступа́ющыя к Тебе́ Чи́стая: карки́нския бо ра́ны свобожда́ется челове́к, прокаже́нна же исцеля́еши, и распале́ние угаси́ла еси́.
Припев:
Пресвята́я Богоро́дице, спаси́ нас.
Ю́ноши и отрокови́цы Влады́чицу, и вси́ челове́цы ве́рою от души́ восхва́лим све́тло: сокруше́ния бо гное́виц, и вре́ды лука́вых, и ото́ки, и разсла́бленнаго исцели́.
О́троки от пе́щи изба́вивый,/ быв Челове́к,/ стра́ждет я́ко сме́ртен,/ и стра́стию сме́ртное,/ в нетле́ния облачи́т благоле́пие,/ Еди́н благослове́н// отце́в Бог, и препросла́влен.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Ирмос:
Сей нарече́нный и святы́й день,/ Еди́н суббо́т Царь и Госпо́дь,/ пра́здников пра́здник/ и торжество́ есть торже́ств,// во́ньже благослови́м Христа́ во ве́ки.
(Дважды)
Припев:
Христо́с воскре́се из ме́ртвых.
Прииди́те, но́ваго виногра́да рожде́ния,/ Боже́ственнаго весе́лия,/ в наро́читом дни Воскресе́ния,/ Ца́рствия Христо́ва приобщи́мся,/ пою́ще Его́// я́ко Бо́га во ве́ки.
(Дважды)
Припев:
Христо́с воскре́се из ме́ртвых.
Возведи́ о́крест о́чи твои́, Сио́не, и виждь:/ се бо приидо́ша к тебе́,/ я́ко богосве́тлая свети́ла,/ от за́пада, и се́вера, и мо́ря,/ и восто́ка ча́да твоя́,// в тебе́ благословя́щая Христа́ во ве́ки.
(Дважды)
Припев:
Пресвята́я Тро́ице, Бо́же наш, сла́ва Тебе́.
Тро́ичен:
О́тче Вседержи́телю, и Сло́ве, и Ду́ше,/ треми́ соединя́емое во Ипоста́сех Естество́,/ Пресу́щественне и Пребоже́ственне,/ в Тя крести́хомся,// и Тя благослови́м во вся ве́ки.
(Дважды)
Припев:
Пресвята́я Богоро́дице, спаси́ нас.
Боже́ственную исто́чник и честну́ю во́ду излива́ет Тво́й Де́во: водны́х бо тече́ние вспяща́ет зело́, призыва́нием боже́ственным благода́ти. те́мже тя́ почита́ем, исто́чниче, во ве́ки.
(Дважды)
Припев:
Пресвята́я Богоро́дице, спаси́ нас.
Вси́ честну́ю живото́чную во́ду воспои́м му́дренне: злодыха́ния бо то́к по страна́м уставля́ет, и свобо́дное твори́т происхожде́ние. Оле Твои́х чуде́с, Чи́стая Богороди́тельнице!
(Дважды)
Припев:
Пресвята́я Богоро́дице, спаси́ нас.
Ка́я, Всепе́тая, восхва́лят уста́ Рождества́ Твоего́ стра́нное? Но и у́м ки́й бы чуде́с исто́чник изсле́довал, и сло́во изглаго́лало? не́сть естеству́ кре́пость, Твои́м чуди́тися.
Припев:
Пресвята́я Богоро́дице, спаси́ нас.
Вся́ о Тебе́ сме́рти держа́ва разори́ся внеза́пу, о Цари́це и Госпоже́: и́бо Царя́ Безсме́ртнаго, живо́т Ты́ источи́ла еси́, во́ду, ма́нну, Христа́ во ве́ки.
Сей нарече́нный и святы́й день,/ Еди́н суббо́т Царь и Госпо́дь,/ пра́здников пра́здник/ и торжество́ есть торже́ств,// во́ньже благослови́м Христа́ во ве́ки.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Диакон:
Вели́чит душа́ моя́/ воскре́сшаго тридне́вно от гро́ба// Христа́ Жизнодавца.
Ирмос:
Свети́ся, свети́ся,/ но́вый Иерусали́ме:/ сла́ва бо Госпо́дня/ на тебе́ возсия́./ Лику́й ны́не/ и весели́ся, Сио́не./ Ты же, Чи́стая, красу́йся, Богоро́дице,// о воста́нии Рождества́ Твоего́.
Припев:
Вели́чит душа́ моя́/ во́лею страда́вша, и погребе́на,// и воскре́сшаго тридне́вно от гро́ба.
Ирмос:
Свети́ся, свети́ся,/ но́вый Иерусали́ме:/ сла́ва бо Госпо́дня/ на тебе́ возсия́./ Лику́й ны́не/ и весели́ся, Сио́не./ Ты же, Чи́стая, красу́йся, Богоро́дице,// о воста́нии Рождества́ Твоего́.
Припев:
Христо́с но́вая Па́сха,/ Же́ртва жива́я,/ А́гнец Бо́жий,// взе́мляй грехи́ ми́ра.
Тропарь:
О Боже́ственнаго, о любе́знаго,/ о сладча́йшаго Твоего́ гла́са!/ С на́ми бо нело́жно/ обеща́лся еси́ бы́ти,/ до сконча́ния ве́ка Христе́:/ Его́же, ве́рнии,// утвержде́ние наде́жди иму́ще, ра́дуемся.
Припев:
А́нгел вопия́ше Благода́тней:/ Чи́стая Де́во, ра́дуйся!/ И па́ки реку́: ра́дуйся!/ Твой Сын воскре́се/ тридне́вен от гро́ба,/ и ме́ртвыя воздви́гнувый:// лю́дие, весели́теся.
Тропарь:
О Боже́ственнаго, о любе́знаго,/ о сладча́йшаго Твоего́ гла́са!/ С на́ми бо нело́жно/ обеща́лся еси́ бы́ти,/ до сконча́ния ве́ка Христе́:/ Его́же, ве́рнии,// утвержде́ние наде́жди иму́ще, ра́дуемся.
Припев:
Возбуди́л еси́ усну́в ме́ртвыя от ве́ка,// ца́рски рыка́вый я́ко от Иу́ды лев.
Тропарь:
О Боже́ственнаго, о любе́знаго,/ о сладча́йшаго Твоего́ гла́са!/ С на́ми бо нело́жно/ обеща́лся еси́ бы́ти,/ до сконча́ния ве́ка Христе́:/ Его́же, ве́рнии,// утвержде́ние наде́жди иму́ще, ра́дуемся.
Припев:
Магдали́на Мари́я притече́ ко гро́бу,/ и Христа́ ви́девши,// я́ко вертогра́даря вопроша́ше.
Тропарь:
О Па́сха ве́лия и свяще́ннейшая, Христе́!/ О му́дросте, и Сло́ве Бо́жий, и си́ло!/ Подава́й нам и́стее Тебе́ причаща́тися,// в невече́рнем дни Ца́рствия Твоего́.
Припев:
А́нгел облиста́яй жена́м вопия́ше:// преста́ните от слез, я́ко Христо́с воскре́се.
Тропарь:
О Па́сха ве́лия и свяще́ннейшая, Христе́!/ О му́дросте, и Сло́ве Бо́жий, и си́ло!/ Подава́й нам и́стее Тебе́ причаща́тися,// в невече́рнем дни Ца́рствия Твоего́.
Припев:
Христо́с воскре́се, смерть попра́вый,/ и ме́ртвыя воздви́гнувый,// лю́дие весели́теся.
Тропарь:
О Па́сха ве́лия и свяще́ннейшая, Христе́!/ О му́дросте, и Сло́ве Бо́жий, и си́ло!/ Подава́й нам и́стее Тебе́ причаща́тися,// в невече́рнем дни Ца́рствия Твоего́.
Припев:
Днесь вся́ка тварь весели́тся и ра́дуется:// я́ко Христо́с воскре́се, и ад плени́ся.
Тропарь:
Во́ды вся́ превосхо́дит, Отрокови́це Чи́стая, исто́чника Твоего́ вода́, я́ве да́рующая свобожде́ние неду́гов лю́тых, и душа́м вся́кое здра́вие, я́ко па́че естества́ излива́емая.
Припев:
Днесь Влады́ка плени́ а́да,// воздви́гнувый ю́зники, я́же от ве́ка имя́ше лю́те одержи́мыя.
Тропарь:
Во́ды вся́ превосхо́дит, Отрокови́це Чи́стая, исто́чника Твоего́ вода́, я́ве да́рующая свобожде́ние неду́гов лю́тых, и душа́м вся́кое здра́вие, я́ко па́че естества́ излива́емая.
Припев:
Вели́чит душа́ моя́// Триипоста́снаго и Неразде́льнаго Божества́ держа́ву.
Тропарь:
Реши́тель неду́гов но́вый се́ Силоа́м, исто́чника Твоего́ Де́во, зри́м вси́: о́чи бо прие́млет огня́, вси́ же здра́вие при́сно к животу́ прие́млем.
Припев:
Ра́дуйся, Де́во, ра́дуйся,/ ра́дуйся, Благослове́нная,/ ра́дуйся, Препросла́вленная!// Твой бо Сын воскре́се тридне́вен от гро́ба.
Тропарь:
Здра́вия и́щущии притецы́те ко исто́чнику: Отрокови́ца бо Де́ва жи́тельствует при воде́. Лику́й и весели́ся ве́рных мно́жество си́це, я́коже подоба́ет: и́же бо прии́дет к хра́му, воздая́ние проше́ний прие́млет.
Припев:
Ра́дуйся, Де́во, ра́дуйся,/ ра́дуйся, Благослове́нная,/ ра́дуйся, Препросла́вленная!// Твой бо Сын воскре́се тридне́вен от гро́ба.
Возвы́сися исто́чника Твоего́ вода́ вы́ше небе́с, и земли́ бе́здны то́ки претече́: сия́ е́сть пи́ща души́, питие́ ве́рных, ме́д из ка́мене, и ма́нны раздая́ние.
Припев:
Ра́дуйся, Де́во, ра́дуйся,/ ра́дуйся, Благослове́нная,/ ра́дуйся, Препросла́вленная!// Твой бо Сын воскре́се тридне́вен от гро́ба.
Тропарь:
Весели́ши Де́во царя́ преесте́ственне, источа́ющи благода́ть от исто́чника присносу́щную, сему́ подава́ющи на враги́ кре́пость, побе́ды при́сно, здра́вие и ми́р, и проше́ний исполне́ние.
Свети́ся, свети́ся,/ но́вый Иерусали́ме:/ сла́ва бо Госпо́дня/ на тебе́ возсия́./ Лику́й ны́не/ и весели́ся, Сио́не./ Ты же, Чи́стая, красу́йся, Богоро́дице,// о воста́нии Рождества́ Твоего́.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Диакон:
Па́ки и па́ки ми́ром Го́споду помо́лимся.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко Тя хва́лят вся Си́лы Небе́сныя, Отца́, и Сы́на, и Свята́го Ду́ха, и Тебе́ сла́ву возсылают, ны́не и при́сно, и во ве́ки веко́в.
Свети́лен Па́схи, самогла́сен:
Пло́тию усну́в,/ я́ко мертв,/ Царю́ и Го́споди,/ тридне́вен воскре́сл еси́,/ Ада́ма воздви́г от тли,/ и упраздни́в смерть:/ Па́сха нетле́ния,// ми́ра спасе́ние.
Исто́чник еси́ вои́стинну воды́ живы́я, Влады́чице: измыва́еши у́бо неду́ги ду́ш и теле́с лю́тыя, прикоснове́нием Твои́м еди́ным то́кмо, во́ду спасе́ния Христа́ излива́ющи.
Хвали́тны псалмы́, глас 6:
Хор:
Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.
Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.
Стихиры воскресные, глас 6:
На 8. Стих:
Сотвори́ти в них суд напи́сан:/ сла́ва сия́ бу́дет всем преподо́бным Его́.
Стихира:
Кре́ст Тво́й Го́споди, жи́знь и воскре́сние лю́дем Твои́м е́сть, и наде́ющеся на́нь, Тебе́ воскре́сшаго Бо́га на́шего пое́м: поми́луй на́с.
Стих:
Хвали́те Бо́га во святы́х Его́,/ хвали́те Его́ в утверже́нии си́лы Его́.
Стихира:
Погребе́ние Твое́ Влады́ко, ра́й отве́рзе ро́ду челове́ческому: и от истле́ния изба́вльшеся, Тебе́ воскре́сшаго Бо́га на́шего пое́м: поми́луй на́с.
На 6. Стих:
Хвали́те Его́ на си́лах Его́,/ хвали́те Его́ по мно́жеству вели́чествия Его́.
Стихира:
Со Отце́м и Ду́хом Христа́ воспои́м, воскре́сшаго из ме́ртвых, и к Нему́ вопии́м: Ты́ живо́т еси́ на́ш, и воскре́сние, поми́луй на́с.
Стих:
Хвали́те Его́ во гла́се тру́бнем,/ хвали́те Его́ во псалти́ри и гу́слех.
Стихира:
Тридне́вен воскре́сл еси́ Христе́ от гро́ба я́коже пи́сано е́сть, совоздви́гнувый пра́отца на́шего. Те́мже Тя́ и сла́вит ро́д челове́ческий, и воспева́ет Твое́ Воскре́сние.
И Богоро́дицы стихи́ры, гла́с 2. Подо́бен: До́ме Евфра́фов:
Стих:
Да воскре́снет Бог,/ и расточа́тся врази́ Его́.
Хор:
Вода́ исто́чника, спаси́тельная е́сть все́м немощству́ющым: присту́пим ве́рою, благода́ть почерпе́м.
Стих:
Я́ко исчеза́ет дым,/ да исче́знут.
Хор:
Кла́дязь живото́чный исто́чника безсме́ртнаго, приступа́ющым любо́вию, исцеле́ний подае́т излия́ние неисчерпа́емое.
Стих:
Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.
Хор:
Укрепля́ет ду́шы вода́ Де́выя: и́же в скве́рнах страсте́й, притеце́м ко Отрокови́це, и сия́ измы́ем.
Стих:
Сей день, его́же сотвори Госпо́дь,/ возра́дуемся и возвесели́мся в онь.
Хор:
Ру́чка свяще́нная, и ма́нна незави́стная из пречи́стыя утро́бы, излива́ет Влады́ку: потре́бу вся́ческую поче́рпем.
Стих:
Да воскре́снет Бог,/ и расточа́тся врази́ Его́.
Хор:
Па́сха/ свяще́нная нам днесь показа́ся;/ Па́сха но́ва свята́я;/ Па́сха та́инственная;/ Па́сха всечестна́я./ Па́сха Христо́с Изба́витель;/ Па́сха непоро́чная;/ Па́сха вели́кая;/ Па́сха ве́рных./ Па́сха две́ри ра́йския нам отверза́ющая.// Па́сха всех освяща́ющая ве́рных.
Стих:
Я́ко исчеза́ет дым,/ да исче́знут.
Хор:
Прииди́те/ от виде́ния жены́ благове́стницы,/ и Сио́ну рцы́те:/ приими́/ от нас ра́дости благове́щения, Воскресе́ния Христо́ва:/ красу́йся, лику́й/ и ра́дуйся, Иерусали́ме,/ Царя́ Христа́ узре́в из гро́ба,/ я́ко жениха́ происходя́ща.
Стих:
Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.
Хор:
Мироно́сицы жены́,/ у́тру глубоку́,/ предста́вша гро́бу Живода́вца,/ обрето́ша А́нгела/ на ка́мени седя́ща,/ и той провеща́в им,/ си́це глаго́лаше:/ что и́щете Жива́го с ме́ртвыми;/ что пла́чете Нетле́ннаго во тли?// Ше́дше, пропове́дите ученико́м Его́.
Стих:
Сей день, его́же сотвори Госпо́дь,/ возра́дуемся и возвесели́мся в онь.
Хор:
Па́сха кра́сная,/ Па́сха, Госпо́дня Па́сха!/ Па́сха всечестна́я/ нам возсия́. Па́сха,/ ра́достию друг дру́га обы́мем./ О Па́сха!/ Избавле́ние ско́рби,/ и́бо из гро́ба днесь,/ я́ко от черто́га/ возсия́в Христо́с,/ жены́ ра́дости испо́лни, глаго́ля:/ пропове́дите апо́столом.
Чтец:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Хор:
Воскресе́ния день,/ и просвети́мся торжество́м,/ и друг дру́га обы́мем./ Рцем бра́тие,/ и ненави́дящим нас,/ прости́м вся Воскресе́нием,/ и та́ко возопии́м:/ Христо́с воскре́се из ме́ртвых,/ сме́ртию смерть попра́в,// и су́щим во гробе́х живо́т дарова́в.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Диакон:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Трижды, на каждое прошение)
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (ИМЯРЕК), и о Господи́не на́шем Высокопреосвяще́ннейшем митрополите (или: архиепи́скопе, или: преосвяще́ннейшем епи́скопе имярек), и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.
Еще́ мо́лимся о ми́лости, жи́зни, мире, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих настоя́теля, бра́тии и прихо́жан свята́го хра́ма сего́.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Иерей:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Диакон:
Испо́лним у́тренюю моли́тву на́шу Го́сподеви.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Дне́ всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение.)
Диакон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и друг дру́га, и весь живо́т наш Христу́ Бо́гу предади́м.
Иерей:
Я́ко Благ и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Диакон:
Главы́ на́ша Го́сподеви прикло́ним.
Иерей:
Твое́ бо е́сть, е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Иерей:
Сый благослове́н Христо́с Бог наш, всегда́, ны́не и при́сно и во ве́ки веко́в.
Хор:
Ами́нь. Утверди́, Бо́же, святу́ю правосла́вную ве́ру, правосла́вных христиа́н во век ве́ка.
Иерей держа Крест с трисвечником поет в алтаре со всем духовенством:
Христо́с воскре́се из ме́ртвых,/ сме́ртию смерть попра́в//
Хор:
И су́щим во гробе́х живо́т дарова́в.
Иерей выйдя на амвон с крестом и трисвечником:
Христо́с воскресы́й из ме́ртвых, сме́ртию смерть попра́вый и су́щим во гробе́х живо́т дарова́вый: и́стинный Бог наш, моли́твами Пречи́стыя Своея́ Ма́тере и всех святы́х, поми́лует и спасе́т нас, я́ко Благ и Человеколю́бец.
И осеняет предстоящих Крестом и трисвещником на три стороны, громко произнося при каждом осенении:
Иерей:
Христо́с воскре́се!
И сра́зу пою́тся часы́ Пасха́льные:
Часы Пасхальные поются полностью (без чтения).
Иерей:
Благослове́н Бог наш, всегда́, ны́не и при́сно и во ве́ки веко́в.
Хор:
Ами́нь. Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Воскресе́ние Христо́во ви́девше,/ поклони́мся Свято́му Го́споду Иису́су,/ еди́ному безгре́шному,/ Кресту́ Твоему́ покланя́емся, Христе́,/ и свято́е Воскресе́ние Твое́ пое́м и сла́вим:/ Ты бо еси́ Бог наш,/ ра́зве Тебе́ ино́го не зна́ем,/ и́мя Твое́ имену́ем./ Прииди́те вси ве́рнии,/ поклони́мся Свято́му Христо́ву Воскресе́нию:/ се бо прии́де Кресто́м ра́дость всему́ ми́ру./ Всегда́ благословя́ще Го́спода,/ пое́м Воскресе́ние Его́:/ распя́тие бо претерпе́в,// сме́ртию смерть разруши́.
(Трижды)
Предвари́вшия у́тро, я́же о Мари́и,/ и обре́тшия ка́мень отвале́н от гро́ба,/ слы́шаху от А́нгела: во све́те присносу́щнем Су́щаго/ с ме́ртвыми что и́щете, я́ко челове́ка?/ Ви́дите гро́бныя пелены́, тецы́те и ми́ру пропове́дите,/ я́ко воста́ Госпо́дь, умертви́вый смерть,// я́ко есть Сын Бо́га, спаса́ющаго род челове́ческий.
А́ще и во гроб снизше́л еси́, Безсме́ртне,/ но а́дову разруши́л еси́ си́лу/ и воскре́сл еси́, я́ко Победи́тель, Христе́ Бо́же,/ жена́м мироно́сицам веща́вый: ра́дуйтеся!/ И Твои́м апо́столом мир да́руяй,// па́дшим подая́й воскресе́ние.
Во гро́бе пло́тски, во а́де же с душе́ю я́ко Бог,/ в раи́ же с разбо́йником, и на Престо́ле был еси́ Христе́, со Отце́м и Ду́хом,// вся исполня́яй, неопи́санный.
Сла́ва Отцу́ и Сы́ну и Свято́му Ду́ху.
Я́ко Живоно́сец, я́ко рая́ красне́йший,/ вои́стину и черто́га вся́каго ца́рскаго показа́ся светле́йший, Христе́, гроб Твой,// исто́чник на́шего воскресе́ния.
И ны́не и при́сно и во ве́ки веко́в. Ами́нь.
Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:// благослове́нна Ты в жена́х еси́, Всенепоро́чная Влады́чице.
Го́споди, поми́луй.
(40 раз)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
И́менем Госпо́дним благослови́, о́тче.
Иерей:
Моли́твами святы́х оте́ц на́ших, Го́споди, Иису́се Христе́, Бо́же наш, поми́луй нас.
Хор:
Ами́нь. Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Ма́лый воскре́сный отпу́ст:
Иерей выйдя на амвон с крестом без трисвечника:
Воскресы́й из ме́ртвых Христо́с, И́стинный Бог наш, моли́твами Пречи́стыя Своея́ Ма́тере, преподо́бных и богоно́сных оте́ц на́ших и всех святы́х, поми́лует и спасе́т нас, я́ко Благ и Человеколю́бец.
Такой чин полагается совершать на Светлой седмице вместо 1-го, 3-го, 6-го и 9-го часа, полунощницы и повечерия.
Диакон:
Благослови́ влады́ко.
Иерей:
Благослове́но Ца́рство Отца́, и Сы́на, и Свята́го Ду́ха, ны́не и при́сно, и во ве́ки веко́в.
Иерей, стоит пред престолом с Крестом и трисвещником в левой руке и кадилом в правой, а диакон на горнем месте со свечой.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Иерей кадит престол спереди и поет с духовенством:
Духовенство:
Да воскре́снет Бог, и расточа́тся врази́ Его́,/ и да бежа́т от Лица́ Его́ ненави́дящии Его́.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Иерей кадит престол с южной стороны и поет с духовенством:
Духовенство:
Я́ко исчеза́ет дым, да исче́знут,/ я́ко та́ет воск от лица́ огня́.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Иерей кадит престол с восточной стороны и поет с духовенством:
Духовенство:
Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Иерей кадит престол с северной стороны и поет с духовенством:
Духовенство:
Сей день, его́же сотвори́ Госпо́дь,/ возра́дуемся и возвесели́мся вонь.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Иерей продолжает каждение алтаря, иконостаса и молящихся и поет с духовенством:
Духовенство:
Сла́ва Отцу́ и Сы́ну и Свято́му Ду́ху.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
И ны́не и при́сно и во ве́ки веко́в. Ами́нь.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Христо́с воскре́се из ме́ртвых,/ сме́ртию смерть попра́в
Хор:
И су́щим во гробе́х живо́т дарова́в.
Иерей, совершая каждение молящихся, приветствует их пасхальным приветствием: «Христос Воскресе!»
Диакон:
Ми́ром Го́споду помо́лимся.
Хор:
Го́споди, поми́луй.
(На каждое прошение)
Диакон:
О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе (ИМЯРЕК), и о Господи́не на́шем, Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея́, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Стих 1:
Воскли́кните/ Го́сподеви вся земля́.
Припев:
Моли́твами Богоро́дицы, Спа́се спаси́ нас.
Стих тотже:
Воскли́кните Го́сподеви вся земля́,/ по́йте же и́мени Его́, дади́те сла́ву хвале́ Его́.
Припев:
Моли́твами Богоро́дицы, Спа́се спаси́ нас.
Стих 2:
Рцы́те Бо́гу: коль стра́шна дела́ Твоя́,/ во мно́жестве си́лы Твоея́ со́лжут Тебе́ врази́ Твои́.
Припев:
Моли́твами Богоро́дицы, Спа́се спаси́ нас.
Стих 3:
Вся земля́ да покло́нится Тебе́,/ и пое́т Тебе́, да пое́т же и́мени Твоему́ Вы́шний.
Припев:
Моли́твами Богоро́дицы, Спа́се спаси́ нас.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Припев:
Моли́твами Богоро́дицы, Спа́се спаси́ нас.
Диакон:
Па́ки и па́ки ми́ром Го́споду помо́лимся.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко Твоя́ держа́ва и Твое́ есть ца́рство и си́ла и сла́ва, Отца́ и Сы́на, и Свята́го Ду́ха, ны́не и при́сно, и во ве́ки веко́в.
Стих 1:
Бо́же уще́дри ны/ и благослови́ ны.
Припев:
Спаси́ ны, Сы́не Бо́жий, воскресы́й из ме́ртвых, пою́щия Ти: Аллилу́иа.
(Единожды)
Стих тотже:
Бо́же, уще́дри ны, и благослови́ ны,/ просвети лице Твое́ на ны, и поми́луй ны.
Припев:
Спаси́ ны, Сы́не Бо́жий, воскресы́й из ме́ртвых, пою́щия Ти: Аллилу́иа.
(Единожды)
Стих 2:
Да позна́ем на земли́ путь Твой,/ во всех язы́цех спасе́ние Твое́.
Припев:
Спаси́ ны, Сы́не Бо́жий, воскресы́й из ме́ртвых, пою́щия Ти: Аллилу́иа.
(Единожды)
Стих 3:
Да испове́дятся Тебе́ лю́дие Бо́же,/ да испове́дятся Тебе́ лю́дие вси.
Припев:
Спаси́ ны, Сы́не Бо́жий, воскресы́й из ме́ртвых, пою́щия Ти: Аллилу́иа.
(Единожды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Единоро́дный Сы́не и Сло́ве Бо́жий, Безсме́ртен Сый/ и изво́ливый спасе́ния на́шего ра́ди/ воплоти́тися от Святы́я Богоро́дицы и Присноде́вы Мари́и,/ непрело́жно вочелове́чивыйся,/ распны́йся же, Христе́ Бо́же, сме́ртию смерть попра́вый,/ Еди́н Сый Святы́я Тро́ицы,// спрославля́емый Отцу́ и Свято́му Ду́ху, спаси́ нас.
Диакон:
Па́ки и па́ки ми́ром Го́споду помо́лимся.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диакон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко Бла́г и Человеколю́бец Бог еси́, и Тебе́ сла́ву воссыла́ем, Отцу́ и Сы́ну, и Свято́му Ду́ху, ны́не и при́сно, и во ве́ки веко́в.
Стих 1:
Да воскре́снет Бог,/ и расточа́тся врази́ Его́.
Тропарь:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Единожды)
Стих тотже:
Да воскре́снет Бог, и расточа́тся врази́ Его́,/ и да бежа́т от лица́ Его́ ненави́дящии Его́.
Тропарь:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Единожды)
Стих 2:
Я́ко исчеза́ет дым, да исче́знут,/ я́ко та́ет воск от лица́ огня́.
Тропарь:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Единожды)
Стих 3:
Та́ко да поги́бнут гре́шницы от лица́ Бо́жия,/ а пра́ведницы да возвеселя́тся, да возра́дуются пред Бо́гом.
Тропарь:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Единожды)
Диакон:
Прему́дрость, про́сти.
Входный стих:
В це́рквах благослови́те Бо́га, Го́спода от исто́чник Изра́илевых.
«Прииди́те, поклони́мся...» не поется (кроме архиерейских богослужений), но сразу:
Тропарь праздника, глас 5:
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Предвари́вшия у́тро, я́же о Мари́и,/ и обре́тшия ка́мень отвале́н от гро́ба,/ слы́шаху от А́нгела: во све́те присносу́щнем Су́щаго/ с ме́ртвыми что и́щете, я́ко челове́ка?/ Ви́дите гро́бныя пелены́, тецы́те и ми́ру пропове́дите,/ я́ко воста́ Госпо́дь, умертви́вый смерть,// я́ко есть Сын Бо́га, спаса́ющаго род челове́ческий.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Кондaк праздника, глaс 8:
А́ще и во гроб снизше́л еси́, Безсме́ртне,/ но а́дову разруши́л еси́ си́лу/ и воскре́сл еси́, я́ко Победи́тель, Христе́ Бо́же,/ жена́м мироно́сицам веща́вый: ра́дуйтеся!/ И Твои́м апо́столом мир да́руяй,// па́дшим подая́й воскресе́ние.
Диакон:
Го́споду помо́лимся.
Иерей:
Я́ко свят еси́, Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно.
Диакон:
Го́споди, спаси́ благочести́выя.
Хор:
Го́споди, спаси́ благочести́выя
Ели́цы во Христа́ крести́стеся, во Христа́ облеко́стеся. Аллилу́ия.
(Трижды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Во Христа́ облеко́стеся. Аллилу́ия.
Ели́цы во Христа́ крести́стеся, во Христа́ облеко́стеся. Аллилу́ия.
Чтец:
Прокимен, глас осьмы́й:
Во всю́ зе́млю изы́де веща́ние и́х, и в концы́ вселе́нныя глаго́лы и́х.
Хор:
Во всю́ зе́млю изы́де веща́ние и́х, и в концы́ вселе́нныя глаго́лы и́х.
Чтец:
Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.
Хор:
Во всю́ зе́млю изы́де веща́ние и́х, и в концы́ вселе́нныя глаго́лы и́х.
Чтец:
Прокимен, глас 3. Песнь Богородицы: Величит душа Моя Господа, / и возрадовася дух Мой о Бозе Спасе Моем.
Хор:
Величит душа Моя Господа, / и возрадовася дух Мой о Бозе Спасе Моем.
Чтец:
Дея́ний святы́х апо́стол чте́ние.
В Светлую Пятницу (Деян., зач. 7)
Чтец:
Во дни о́ны, вку́пе Петр и Иоа́нн восхожда́ста во святи́лище на моли́тву в час девя́тый. И не́кий муж, хром от чре́ва ма́тере своея́ сый, носи́мь быва́ше, его́же полага́ху по вся дни пред две́рьми церко́вными, реко́мыми Кра́сными, проси́ти ми́лостыни от входя́щих в це́рковь. И́же ви́дев Петра́ и Иоа́нна хотя́щыя вни́ти в це́рковь, проша́ше ми́лостыни. Воззре́в же Петр нань со Иоа́нном, рече́: воззри́ на ны. Он же прилежа́ше и́ма, мня не́что от нею́ прия́ти. Рече́ же Петр: сребра́ и зла́та несть у мене́, но е́же и́мам, сие́ ти даю́, во и́мя Иису́са Христа́ Назоре́а воста́ни и ходи́. И емь его́ за десну́ю ру́ку воздви́же, а́бие же утверди́стеся его́ плесне́ и гле́зне, и вскочи́в ста и хожда́ше, и вни́де с ни́ма в це́рковь, ходя́ и скачя́ и хваля́ Бо́га.
Бра́тие, сие́ да му́дрствуется в вас, е́же и во Христе́ Иису́се, И́же во о́бразе Бо́жии сый, не восхище́нием непщева́ бы́ти ра́вен Бо́гу. Но Себе́ ума́лил, зрак раба́ прии́м, в подо́бии челове́честем быв, и о́бразом обре́теся я́коже челове́к. Смири́л Себе́, послушли́в быв да́же до сме́рти, сме́рти же кре́стныя. Те́мже и Бог Его́ превознесе́ и дарова́ Ему́ и́мя, е́же па́че вся́каго и́мене, да о и́мени Иису́сове вся́ко коле́но поклони́тся небе́сных и земны́х и преиспо́дних, и всяк язы́к испове́сть, я́ко Госпо́дь Иису́с Христо́с в сла́ву Бо́га Отца́.
Чтец:
Аллилу́ия, Глас первый. Испове́дят небеса́ чудеса́ Твоя́ Го́споди.
Хор:
Аллилу́ия, аллилу́ия, аллилу́ия.
Чтец:
Бо́г прославля́емь в сове́те святы́х.
Хор:
Аллилу́ия, аллилу́ия, аллилу́ия
Чтец:
Аллилуиа, Глас осьмы́й: Слы́ши дщи́ и ви́ждь и приклони́ у́хо твое́.
Хор:
Аллилу́ия, аллилу́ия, аллилу́ия.
Диакон:
Благослови́, влады́ко, благовести́теля, свята́го сла́внаго и всехва́льнаго апо́стола и евангели́ста Иоанна. [1]
Иерей:
Бог моли́твами свята́го сла́внаго, всехва́льнаго апо́стола и евангели́ста Иоа́нна, да даст тебе́ глаго́л, благовеству́ющему си́лою мно́гою, во исполне́ние Ева́нгелия возлю́бленаго Сы́на Своего́, Го́спода на́шего Иису́са Христа́.
Прему́дрость, про́сти, услы́шим свята́го Ева́нгелия.
Диакон:
От Иоа́нна Свята́го Ева́нгелия чте́ние.
Хор:
Сла́ва Тебе́, Го́споди, сла́ва Тебе́.
Диа́кон:
Во вре́мя о́но, сни́де Иису́с в Капернау́м Сам и Ма́ти Его́, и бра́тия Его́ и ученицы́ Его́, и ту не мно́ги дни пребы́ша. И близ бе Па́сха иуде́йска, и взы́де во Иерусали́м Иису́с и обре́те в це́ркви продаю́щыя о́вцы и волы́ и го́луби, и пе́няжники седя́щыя. И сотвори́ бичь от ве́рвий, вся изгна́ из це́ркве, о́вцы и волы́, и торжнико́м разсы́па пе́нязи и дски опрове́рже. И продаю́щым го́луби рече́: возьми́те сия́ отсю́ду и не твори́те до́му Отца́ Моего́ до́му ку́пленаго. Помяну́ша же ученицы́ Его́, я́ко пи́сано есть: жа́лость до́му Твоего́ снесть Мя. Отвеща́ша же иуде́е и ре́ша Ему́: ко́е зна́мение явля́еши нам, я́ко сия́ твори́ши? Отвеща́ Иису́с и рече́ им: разорите́ це́рковь сию́, и тре́ми де́ньми воздви́гну ю́. Ре́ша же иуде́е: четы́редесять и шестию́ лет создана́ бысть це́рковь сия́, и Ты ли тре́ми де́ньми воздви́гнеши ю́? Он же глаго́лаше о це́ркви те́ла Своего́. Егда́ у́бо воста́ от ме́ртвых, помяну́ша ученицы́ Его́, я́ко се глаго́лаше, и ве́роваша Писа́нию и словеси́, е́же рече́ Иису́с.
Во вре́мя о́но, вни́де Иису́с в весь не́кую, жена́ же не́кая и́менем Ма́рфа прия́т Его́ в дом свой. И сестра́ ей бе нарица́емая Мари́а, я́же и се́дши при ногу́ Иису́сову, слы́шаше сло́во Его́. Ма́рфа же мо́лвяше о мно́зе слу́жбе, ста́вши же рече́: Го́споди, не бреже́ши ли, я́ко сестра́ моя́ еди́ну мя оста́ви служи́ти; рцы у́бо ей, да ми помо́жет. Отвеща́в же Иису́с, рече́ ей: Ма́рфо, Ма́рфо, пече́шися и мо́лвиши о мно́зе. Еди́но же есть на потре́бу. Мари́а же благу́ю часть избра́, я́же не оты́мется от нея́. Бысть же егда́ глаго́лаше сия́, воздви́гши не́кая жена́ глас от наро́да, рече́ Ему́: блаже́но чре́во носи́вшее Тя, и сосца́, я́же еси́ ссал. Он же рече́: те́мже у́бо блаже́ни слы́шащии сло́во Бо́жие, и храня́ще е́.
Хор:
Сла́ва Тебе́, Го́споди, сла́ва Тебе́.
Диа́кон:
Рце́м вси от всея́ души́, и от всего́ помышле́ния на́шего рцем.
Диа́кон:
Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.
Диа́кон:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Три́жды, на каждое прошение)
Диа́кон:
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (ИМЯРЕК), и о Господи́не на́шем Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о бра́тиях на́ших, свяще́нницех, священномона́сех, и всем во Христе́ бра́тстве на́шем.
Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих настоя́теля, бра́тии и прихо́жан свята́го хра́ма сего́.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Иере́й:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Диа́кон:
Помоли́теся, оглаше́ннии, Го́сподеви.
Хор:
Го́споди, поми́луй.
(На каждое прошение)
Диа́кон:
Ве́рнии, о оглаше́нных помо́лимся, да Госпо́дь поми́лует их.
Огласи́т их сло́вом и́стины.
Откры́ет им Ева́нгелие пра́вды.
Соедини́т их святе́й Свое́й собо́рней и апо́стольстей Це́ркви.
Спаси́, поми́луй, заступи́ и сохрани́ их, Бо́же, Твое́ю благода́тию.
Оглаше́ннии, главы ва́ша Го́сподеви приклони́те.
Иере́й:
Да и ти́и с на́ми сла́вят пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Ектения́ ве́рных, пе́рвая:
Диа́кон:
Ели́цы оглаше́ннии, изыди́те.
Пе́рвый:
Ели́цы оглаше́ннии, изыди́те.
Да никто от оглаше́нных, ели́цы ве́рнии, па́ки и па́ки ми́ром Го́споду помо́лимся.
(Если служит один диакон, то все прошения возглашает подряд:
Диа́кон:
Ели́цы оглаше́ннии, изыди́те. Оглаше́ннии, изыди́те. Ели́цы. оглаше́ннии, изыди́те. Да никто от оглаше́нных, ели́цы ве́рнии, па́ки и па́ки ми́ром Го́споду помо́лимся.)
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Иере́й:
Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Ектения́ ве́рных, втора́я:
Диа́кон:
Па́ки и па́ки, ми́ром Го́споду помо́лимся.
Хор:
Го́споди, поми́луй.
(На ка́ждое проше́ние)
Диа́кон:
О свы́шнем ми́ре и спасе́нии душ на́ших, Го́споду помо́лимся.
О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Иере́й:
Я́ко да под держа́вою Твое́ю всегда́ храни́ми, Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
И́же Херуви́мы та́йно образу́юще и животворя́щей Тро́ице Трисвяту́ю песнь припева́юще, вся́кое ны́не жите́йское отложи́м попече́ние.
Диа́кон:
Вели́каго господи́на и отца́ на́шего (ИМЯРЕК-р.п.), Святе́йшаго Патриа́рха всея́ Ру́си, и господи́на на́шего (Высо́ко-) Преосвяще́ннейшаго (имярек), (архи-)епи́скопа (митрополита (титул)), да помяне́т Госпо́дь Бог во Ца́рствии Свое́м всегда́, ны́не и при́сно, и во ве́ки веко́в.
Иере́й:
Преосвяще́нныя митрополи́ты, архиепи́скопы и епи́скопы, и весь свяще́ннический и мона́шеский чин, и при́чет церко́вный, бра́тию свята́го хра́ма сего́, всех вас, правосла́вных христиа́н, да помяне́т Госпо́дь Бог во Ца́рствии Свое́м, всегда́, ны́не и при́сно, и во ве́ки веко́в.
Хор:
Ами́нь. Я́ко да Царя́ всех поды́мем, а́нгельскими неви́димо дориноси́ма чи́нми. Аллилу́иа, аллилу́иа, аллилу́иа.
Диа́кон:
Испо́лним моли́тву на́шу Го́сподеви.
Хор:
Го́споди, поми́луй.
(На каждое прошение)
Диа́кон:
О предложе́нных Честны́х Даре́х, Го́споду помо́лимся.
О святе́м хра́ме сем, и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Диа́кон:
Дне всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и дру́г дру́га, и весь живо́т наш Христу́ Бо́гу предади́м.
Иере́й:
Щедро́тами Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Диа́кон:
Возлю́бим друг дру́га, да единомы́слием испове́мы.
Хор:
Отца́, и Сы́на, и Свята́го Ду́ха,/ Тро́ицу единосу́щную/ и неразде́льную.
Диа́кон:
Две́ри, две́ри, прему́дростию во́нмем.
Лю́ди:
Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.
Диа́кон:
Ста́нем до́бре, ста́нем со стра́хом, во́нмем, свято́е возноше́ние в ми́ре приноси́ти.
Хор:
Ми́лость ми́ра,/ же́ртву хвале́ния.
Иере́й:
Благода́ть Го́спода на́шего Иису́са Христа́, и любы́ Бо́га и Отца́, и прича́стие Свята́го Ду́ха, бу́ди со все́ми ва́ми.
Иере́й:
Горе́ име́им сердца́.
Иере́й:
Благодари́м Го́спода.
Хор:
Досто́йно и пра́ведно есть/ покланя́тися Отцу́ и Сы́ну, и Свято́му Ду́ху,// Тро́ице единосу́щней и неразде́льней.
Иере́й:
Побе́дную песнь пою́ще, вопию́ще, взыва́юще и глаго́люще.
Хор:
Свят, свят, свят Госпо́дь Савао́ф,/ испо́лнь не́бо и земля́ сла́вы Твоея́;/ оса́нна в вы́шних,/ благослове́н Гряды́й во и́мя Госпо́дне,/ оса́нна в вы́шних.
Иере́й:
Приими́те, яди́те, сие́ есть Те́ло Мое́, е́же за вы ломи́мое во оставле́ние грехо́в.
Иере́й:
Пи́йте от нея́ вси, сия́ есть Кровь Моя́ Но́ваго Заве́та, я́же за вы и за мно́гия излива́емая, во оставле́ние грехо́в.
Иере́й:
Твоя́ от Твои́х Тебе́ принося́ще, о всех и за вся.
Хор:
Тебе́ пое́м,/ Тебе́ благослови́м,/ Тебе́ благодари́м, Го́споди,/ и мо́лим Ти ся, Бо́же наш.
Иере́й:
Изря́дно о Пресвяте́й, Пречи́стей, Преблагослове́нней, Сла́вней Влады́чице на́шей Богоро́дице и Присноде́ве Мари́и.
Задосто́йник (Вме́сто «Досто́йно…»):
Хор:
А́нгел вопия́ше Благода́тней:/ Чи́стая Де́во, ра́дуйся!/ И па́ки реку́: ра́дуйся!/ Твой Сын воскре́се/ тридне́вен от гро́ба,/ и ме́ртвыя воздви́гнувый:// лю́дие, весели́теся.
Свети́ся, свети́ся,/ но́вый Иерусали́ме:/ сла́ва бо Госпо́дня/ на тебе́ возсия́./ Лику́й ны́не/ и весели́ся, Сио́не./ Ты же, Чи́стая, красу́йся, Богоро́дице,// о воста́нии Рождества́ Твоего́.
Иере́й:
В пе́рвых помяни́, Го́споди, вели́каго господи́на и отца́ на́шего имярек, Святе́йшаго Патриа́рха всея́ Руси́, и господи́на на́шего (Высо́ко-) Преосвяще́ннейшаго (имярек), (архи-)епи́скопа (митрополита (титул)), и́хже да́руй святы́м Твои́м це́рквам, в ми́ре, це́лых, честны́х, здра́вых, долгоде́нствующих, пра́во пра́вящих сло́во Твоея́ и́стины.
Иере́й:
И даждь нам еди́неми усты́ и еди́нем се́рдцем сла́вити и воспева́ти пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Иере́й:
И да бу́дут ми́лости вели́каго Бо́га и Спа́са на́шего Иису́са Христа́ со все́ми ва́ми.
Диа́кон:
Вся святы́я помяну́вше, па́ки и па́ки ми́ром Го́споду помо́лимся.
Хор:
Го́споди, поми́луй.
(На каждое прошение)
Диа́кон:
О принесе́нных и освяще́нных Честны́х Даре́х, Го́споду помо́лимся.
Я́ко да человеколю́бец Бог наш, прие́м я́ во святы́й и пренебе́сный и мы́сленный Свой же́ртвенник, в воню́ благоуха́ния духо́внаго, возниспо́слет нам Боже́ственную благода́ть и дар Свята́го Ду́ха, помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Диа́кон:
Дне всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Соедине́ние ве́ры и прича́стие Свята́го Ду́ха испроси́вше, са́ми себе́, и друг дру́га, и весь живо́т наш Христу́ Бо́гу предади́м.
Иере́й:
И сподо́би нас, Влады́ко, со дерзнове́нием, неосужде́нно сме́ти призыва́ти Тебе́, Небе́снаго Бо́га Отца́, и глаго́лати:
Лю́ди:
О́тче наш, И́же еси́ на небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Диа́кон:
Главы́ ва́ша Го́сподеви приклони́те.
Иере́й:
Благода́тию, и щедро́тами, и человеколю́бием Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Хор:
Еди́н свят,/ еди́н Госпо́дь,/ Иису́с Христо́с,/ во сла́ву Бо́га Отца́./ Ами́нь.
Хор:
Те́ло Христо́во приими́те, исто́чника безсме́ртнаго вкуси́те.
Чашу спасения прииму и Имя Господне призову.
Аллилу́ия, аллилу́ия, аллилу́ия.
Диа́кон:
Со стра́хом Бо́жиим и ве́рою приступи́те.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Единожды)
Иере́й:
Ве́рую, Го́споди, и испове́дую, я́ко Ты еси́ вои́стинну Христо́с, Сын Бо́га жива́го, прише́дый в мир гре́шныя спасти́, от ни́хже пе́рвый есмь аз. Еще́ ве́рую, я́ко сие́ есть са́мое пречи́стое Те́ло Твое́, и сия́ есть са́мая честна́я Кровь Твоя́. Молю́ся у́бо Тебе́: поми́луй мя и прости́ ми прегреше́ния моя́, во́льная и нево́льная, я́же сло́вом, я́же де́лом, я́же ве́дением и неве́дением, и сподо́би мя неосужде́нно причастити́ся пречи́стых Твои́х Та́инств, во оставле́ние грехо́в и в жизнь ве́чную. Ами́нь.
Ве́чери Твоея́ та́йныя днесь, Сы́не Бо́жий, прича́стника мя приими́; не бо враго́м Твои́м та́йну пове́м, ни лобза́ния Ти дам, я́ко Иу́да, но я́ко разбо́йник испове́даю Тя: помяни́ мя, Го́споди, во Ца́рствии Твое́м.
Да не в суд или́ во осужде́ние бу́дет мне причаще́ние Святы́х Твои́х Та́ин, Го́споди, но во исцеле́ние души́ и те́ла.
Во время Причащения людей:
Хор:
Те́ло Христо́во приими́те, исто́чника безсме́ртнаго вкуси́те.
Хор:
Аллилу́ия, аллилу́ия, аллилу́ия.
Иере́й:
Спаси́, Бо́же, лю́ди Твоя́, и благослови́ достоя́ние Твое́.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Единожды, протяжно)
Иере́й:
Всегда́, ны́не и при́сно, и во ве́ки веко́в.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Единожды, протяжно)
Ектения́ заключи́тельная:
Диа́кон:
Про́сти прии́мше Боже́ственных, святы́х, пречи́стых, безсме́ртных, небе́сных и животворя́щих, стра́шных Христо́вых Та́ин, досто́йно благодари́м Го́спода.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диа́кон:
День весь соверше́н, свят, ми́рен и безгре́шен испроси́вше, са́ми себе́ и друг дру́га, и весь живо́т наш Христу́ Бо́гу предади́м.
Иере́й:
Я́ко Ты еси́ освяще́ние на́ше, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Иере́й:
С ми́ром изы́дем.
Диа́кон:
Го́споду помо́лимся.
Иере́й:
Благословля́яй благословя́щия Тя, Го́споди, и освяща́яй на Тя упова́ющия, спаси́ лю́ди Твоя́ и благослови́ достоя́ние Твое́, исполне́ние Це́ркве Твоея́ сохрани́, освяти́ лю́бящия благоле́пие до́му Твоего́: Ты тех возпросла́ви Боже́ственною Твое́ю си́лою, и не оста́ви нас, упова́ющих на Тя. Мир мiрови Твоему́ да́руй, це́рквам Твои́м, свяще́нником, во́инству и всем лю́дем Твои́м. Я́ко вся́кое дая́ние бла́го, и всяк дар соверше́н свы́ше есть, сходя́й от Тебе́ Отца́ све́тов, и Тебе́ сла́ву, и благодаре́ние, и поклоне́ние возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(12 раз)
Иере́й:
Благослове́ние Госпо́дне на ва́с, Того́ благода́тию и человеколю́бием, всегда́, ны́не и при́сно, и во ве́ки веко́в.
Иерей:
Христо́с воскре́се из ме́ртвых,/ сме́ртию смерть попра́в//
Хор:
И су́щим во гробе́х живо́т дарова́в.
Иерей выйдя на амвон с крестом и трисвечником:
Христо́с воскресы́й из ме́ртвых, сме́ртию смерть попра́вый и су́щим во гробе́х живо́т дарова́вый: и́стинный Бог наш, моли́твами Пречи́стыя Своея́ Ма́тере и всех святы́х, поми́лует и спасе́т нас, я́ко Благ и Человеколю́бец.
И осеняет предстоящих Крестом и трисвещником на три стороны, громко произнося при каждом осенении:
Иерей:
Христо́с воскре́се!
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поскору)
И нам дарова́ живо́т ве́чный, покланя́емся Его́ тридне́вному Воскресе́нию.
Часы Пасхальные поются полностью (без чтения).
Иерей:
Благослове́н Бог наш, всегда́, ны́не и при́сно и во ве́ки веко́в.
Хор:
Ами́нь. Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Воскресе́ние Христо́во ви́девше,/ поклони́мся Свято́му Го́споду Иису́су,/ еди́ному безгре́шному,/ Кресту́ Твоему́ покланя́емся, Христе́,/ и свято́е Воскресе́ние Твое́ пое́м и сла́вим:/ Ты бо еси́ Бог наш,/ ра́зве Тебе́ ино́го не зна́ем,/ и́мя Твое́ имену́ем./ Прииди́те вси ве́рнии,/ поклони́мся Свято́му Христо́ву Воскресе́нию:/ се бо прии́де Кресто́м ра́дость всему́ ми́ру./ Всегда́ благословя́ще Го́спода,/ пое́м Воскресе́ние Его́:/ распя́тие бо претерпе́в,// сме́ртию смерть разруши́.
(Трижды)
Предвари́вшия у́тро, я́же о Мари́и,/ и обре́тшия ка́мень отвале́н от гро́ба,/ слы́шаху от А́нгела: во све́те присносу́щнем Су́щаго/ с ме́ртвыми что и́щете, я́ко челове́ка?/ Ви́дите гро́бныя пелены́, тецы́те и ми́ру пропове́дите,/ я́ко воста́ Госпо́дь, умертви́вый смерть,// я́ко есть Сын Бо́га, спаса́ющаго род челове́ческий.
А́ще и во гроб снизше́л еси́, Безсме́ртне,/ но а́дову разруши́л еси́ си́лу/ и воскре́сл еси́, я́ко Победи́тель, Христе́ Бо́же,/ жена́м мироно́сицам веща́вый: ра́дуйтеся!/ И Твои́м апо́столом мир да́руяй,// па́дшим подая́й воскресе́ние.
Во гро́бе пло́тски, во а́де же с душе́ю я́ко Бог,/ в раи́ же с разбо́йником, и на Престо́ле был еси́ Христе́, со Отце́м и Ду́хом,// вся исполня́яй, неопи́санный.
Сла́ва Отцу́ и Сы́ну и Свято́му Ду́ху.
Я́ко Живоно́сец, я́ко рая́ красне́йший,/ вои́стину и черто́га вся́каго ца́рскаго показа́ся светле́йший, Христе́, гроб Твой,// исто́чник на́шего воскресе́ния.
И ны́не и при́сно и во ве́ки веко́в. Ами́нь.
Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:// благослове́нна Ты в жена́х еси́, Всенепоро́чная Влады́чице.
Го́споди, поми́луй.
(40 раз)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
И́менем Госпо́дним благослови́, о́тче.
Иерей:
Моли́твами святы́х оте́ц на́ших, Го́споди, Иису́се Христе́, Бо́же наш, поми́луй нас.
Хор:
Ами́нь. Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Ма́лый воскре́сный отпу́ст:
Иерей выйдя на амвон с крестом без трисвечника:
Воскресы́й из ме́ртвых Христо́с, И́стинный Бог наш, моли́твами Пречи́стыя Своея́ Ма́тере, преподо́бных и богоно́сных оте́ц на́ших и всех святы́х, поми́лует и спасе́т нас, я́ко Благ и Человеколю́бец.
Такой чин полагается совершать на Светлой седмице вместо 1-го, 3-го, 6-го и 9-го часа, полунощницы и повечерия.
Перед вечерней – 9-й час по пасхальному чину.
По окончании 9-го часа облаченный во все священнические одежды иерей (при соборном служении – предстоятель), став пред престолом с кадилом в правой руке, с Крестом и трисвещником в левой, творит крест кадилом и возглашает:
Пое́м настоя́щее после́дование, бы́вшее от господи́на Ники́фора калли́ста ксанфопу́ла. На Пресвяту́ю Госпожу́ Влады́чицу Богоро́дицу Живоприе́мный Исто́чник. Не бо́ обрето́хом в Ти́пице сицева́го после́дования, но положи́ся любве́ ра́ди Пресвяты́я Богоро́дицы.
Иере́й:
Благослове́н Бог наш всегда́, ны́не и при́сно и во ве́ки веко́в.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды)
Духовенство:
Да воскре́снет Бог, и расточа́тся врази́ Его́,/ и да бежа́т от Лица́ Его́ ненави́дящии Его́.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Я́ко исчеза́ет дым, да исче́знут,/ я́ко та́ет воск от лица́ огня́.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Сей день, его́же сотвори́ Госпо́дь,/ возра́дуемся и возвесели́мся вонь.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Сла́ва Отцу́ и Сы́ну и Свято́му Ду́ху.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
И ны́не и при́сно и во ве́ки веко́в. Ами́нь.
Хор:
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
Духовенство:
Христо́с воскре́се из ме́ртвых,/ сме́ртию смерть попра́в
Хор:
И су́щим во гробе́х живо́т дарова́в.
Диакон:
Ми́ром Го́споду помо́лимся.
Хор:
Го́споди, поми́луй. (
На каждое прошение)
Диакон:
О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе (ИМЯРЕК), и о Господи́не на́шем, Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея́, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Иерей:
Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Го́споди, воззва́х, глас 8:
Хор:
Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.
Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.
Стихи́ры воскре́сные, глас 8:
На 6. Стих:
А́ще беззако́ния на́зриши, Го́споди, Го́споди, кто постои́т?// Я́ко у Тебе́ очище́ние е́сть.
Стихи́ра:
Вече́рнюю пе́снь, и слове́сную слу́жбу, Тебе́ Христе́ прино́сим: я́ко благоволи́л еси́ поми́ловати на́с воскре́снием.
Стих:
И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,// упова́ душа́ моя́ на Го́спода.
Стихи́ра:
Го́споди, Го́споди, не отве́ржи на́с от Твоего́ лица́: но благоволи́ поми́ловати на́с Воскре́снием.
На 4. Стих:
От стра́жи у́тренния до но́щи, от стра́жи у́тренния,// да уповае́т Изра́иль на Го́спода.
Стихи́ра:
Ра́дуйся, Сио́не святы́й, ма́ти Церкве́й, Бо́жие жили́ще, ты́ бо прия́л еси́ пе́рвый, оставле́ние грехо́в, воскре́снием.
И восто́чны 3 (Анатолиевы), гла́с то́йже.
Стих:
Я́ко у Го́спода ми́лость, и мно́гое у Него́ избавле́ние,// и Той изба́вит Изра́иля от всех беззако́ний eго́.
Стихи́ра:
Е́же от Бо́га Отца́ Сло́во, пре́жде ве́к ро́ждшееся, в после́дняя же времена́, То́ежде от Неискусобра́чныя вопло́щшееся во́лею, распя́тие сме́ртное претерпе́: и дре́вле умерщвле́ннаго челове́ка спасе́ Свои́м Воскре́снием.
На 2. Стих:
Хвали́те Го́спода вси язы́цы,// похвали́те Его́ вси лю́дие.
Стихи́ра:
Е́же из ме́ртвых Твое́ Воскре́сние славосло́вим Христе́, и́мже свободи́л еси́ Ада́мский ро́д от а́дова мучи́тельства: и дарова́л еси́ ми́рови я́ко Бо́г жи́знь ве́чную, и ве́лию ми́лость.
Стих:
Я́ко утверди́ся ми́лость Его́ на нас,// и и́стина Госпо́дня пребыва́ет во век.
Стихи́ра:
Сла́ва Тебе́ Христе́ Спа́се, Сы́не Бо́жий единоро́дный, пригвозди́выйся на Кресте́, и воскресы́й из гро́ба тридне́вен.
Чтец:
Сла́ва Отцу́ и Сы́ну и Свято́му Ду́ху.
Хор:
Тебе́ сла́вим Го́споди, во́лею на́с ра́ди Кре́ст претерпе́вшаго, и Тебе́ покланя́емся Всеси́льне Спа́се: не отве́ржи на́с от лица́ Твоего́, но услы́ши и спаси́ ны Воскре́снием Твои́м, Человеколю́бче.
Чтец:
И ны́не и при́сно и во ве́ки веко́в. Ами́нь.
Богоро́дичен:
Ца́рь Небе́сный за человеколю́бие на земли́ яви́ся, и с челове́ки поживе́: от Де́вы бо Чи́стыя пло́ть прие́мый, и из Нея́ проше́дый с восприя́тием: еди́н е́сть Сы́н, сугу́б естество́м, но не ипоста́сию. Те́мже соверше́нна Того́ Бо́га, и соверше́нна Челове́ка вои́стинну пропове́дающе, испове́дуем Христа́ Бо́га на́шего: Его́же моли́ Ма́ти Безневе́стная, поми́ловатися душа́м на́шым.
Диа́кон:
Прему́дрость, про́сти.
Хор:
Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.
Диа́кон:
Прему́дрость во́нмем. Проки́мен вели́кий, глас осьмый:
Да́л еси́ достоя́ние боя́щымся Тебе́ Го́споди.
Хор:
Да́л еси́ достоя́ние боя́щымся Тебе́ Го́споди.
Диа́кон:
От коне́ц земли́ к Тебе́ воззва́х
Хор:
Да́л еси́ достоя́ние боя́щымся Тебе́ Го́споди.
Стих 2.
Покры́юся в кро́ве кри́л Твои́х.
Да́л еси́ достоя́ние боя́щымся Тебе́ Го́споди.
Стих 3.
Та́ко воспою́ и́мени Твоему́ во ве́ки.
Да́л еси́ достоя́ние боя́щымся Тебе́ Го́споди.
Диа́кон:
Да́л еси́ достоя́ние
Хор:
боя́щымся Тебе́ Го́споди.
Диа́кон:
Рце́м вси от всея́ души́, и от всего́ помышле́ния на́шего рцем.
Диа́кон:
Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.
Диа́кон:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Три́жды, на каждое прошение)
Диа́кон:
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (ИМЯРЕК), и о Господи́не на́шем Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о бра́тиях на́ших, свяще́нницех, священномона́сех, и всем во Христе́ бра́тстве на́шем.
Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих настоя́теля, бра́тии и прихо́жан свята́го хра́ма сего́.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Иере́й:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.
Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.
Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.
Диа́кон:
Испо́лним вече́рнюю моли́тву на́шу Го́сподеви.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Диа́кон:
Ве́чера всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и дру́г дру́га, и весь живо́т наш Христу́ Бо́гу предади́м.
Иере́й:
Я́ко Бла́г и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Диа́кон:
Главы́ на́ша Го́сподеви прикло́ним.
Иере́й:
Бу́ди держа́ва Ца́рствия Твоего́ благослове́на и препросла́влена. Отца́ и Сы́на и Свята́го Ду́ха, ны́не и при́сно и во ве́ки веко́в.
Стихи́ра воскре́сная, глас осьмый:
Стихира:
Возше́л еси́ на Кре́ст Иису́се, снизше́дый с небесе́: прише́л еси́ на сме́рть Животе́ безсме́ртный, к су́щым во тьме́ Све́т и́стинный: к па́дшым все́х Воскре́сние, просвеще́ние, и Спа́се на́ш, сла́ва Тебе́.
Стих:
Да воскре́снет Бог,/ и расточа́тся врази́ Его́.
Па́сха/ свяще́нная нам днесь показа́ся;/ Па́сха но́ва свята́я;/ Па́сха та́инственная;/ Па́сха всечестна́я./ Па́сха Христо́с Изба́витель;/ Па́сха непоро́чная;/ Па́сха вели́кая;/ Па́сха ве́рных./ Па́сха две́ри ра́йския нам отверза́ющая.// Па́сха всех освяща́ющая ве́рных.
Стих:
Я́ко исчеза́ет дым,/ да исче́знут.
Прииди́те/ от виде́ния жены́ благове́стницы,/ и Сио́ну рцы́те:/ приими́/ от нас ра́дости благове́щения, Воскресе́ния Христо́ва:/ красу́йся, лику́й/ и ра́дуйся, Иерусали́ме,/ Царя́ Христа́ узре́в из гро́ба,/ я́ко жениха́ происходя́ща.
Стих:
Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.
Мироно́сицы жены́,/ у́тру глубоку́,/ предста́вша гро́бу Живода́вца,/ обрето́ша А́нгела/ на ка́мени седя́ща,/ и той провеща́в им,/ си́це глаго́лаше:/ что и́щете Жива́го с ме́ртвыми;/ что пла́чете Нетле́ннаго во тли?// Ше́дше, пропове́дите ученико́м Его́.
Стих:
Сей день, его́же сотвори Госпо́дь,/ возра́дуемся и возвесели́мся в онь.
Па́сха кра́сная,/ Па́сха, Госпо́дня Па́сха!/ Па́сха всечестна́я/ нам возсия́. Па́сха,/ ра́достию друг дру́га обы́мем./ О Па́сха!/ Избавле́ние ско́рби,/ и́бо из гро́ба днесь,/ я́ко от черто́га/ возсия́в Христо́с,/ жены́ ра́дости испо́лни, глаго́ля:/ пропове́дите апо́столом.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Воскресе́ния день,/ и просвети́мся торжество́м,/ и друг дру́га обы́мем./ Рцем бра́тие,/ и ненави́дящим нас,/ прости́м вся Воскресе́нием,/ и та́ко возопии́м:/ Христо́с воскре́се из ме́ртвых,/ сме́ртию смерть попра́в,// и су́щим во гробе́х живо́т дарова́в.
Христо́с воскре́се из ме́ртвых,/ сме́ртию смерть попра́в// и су́щим во гробе́х живо́т дарова́в.
(Трижды, поско́ру)
Иерей:
Сый благослове́н Христо́с Бог наш, всегда́, ны́не и при́сно и во ве́ки веко́в.
Хор:
Ами́нь. Утверди́, Бо́же, святу́ю правосла́вную ве́ру, правосла́вных христиа́н во век ве́ка.
Иерей держа Крест с трисвечником поет в алтаре со всем духовенством:
Христо́с воскре́се из ме́ртвых,/ сме́ртию смерть попра́в//
Хор:
И су́щим во гробе́х живо́т дарова́в.
Иерей выйдя на амвон с крестом и трисвечником:
Христо́с воскресы́й из ме́ртвых, сме́ртию смерть попра́вый и су́щим во гробе́х живо́т дарова́вый: и́стинный Бог наш, моли́твами Пречи́стыя Своея́ Ма́тере и всех святы́х, поми́лует и спасе́т нас, я́ко Благ и Человеколю́бец.
И осеняет предстоящих Крестом и трисвещником на три стороны, громко произнося при каждом осенении:
Иерей:
Христо́с воскре́се!
(Трижды)
Люди:
Воистину воскресе!
(Трижды)