i
Форма : M2S256SlavAndPredPrazdn(163)

^

msword

html

(Перейти на службу в текущем 2024-м году,Вторник,27 августа по новому стилю ) - 14 августа, Вторник, Глас 8-й, Предпразднество Успения Пресвятой Богородицы. Перенесение мощей прп. Феодосия Печерского (1091) + Прор. Михея (из 12-ти пророков) (VIII до Р.Х.) - Служба славословная в Предпразднство

@

14 Августа 2026 года, Четверг, (А137), Глас 3. Пренесе́ние честны́х моще́й преподо́бнаго Феодо́сия, игумена Киевопече́рскаго, в Да́льних пеще́рах почива́ющаго вместе со службой Свята́го проро́ка Михе́я (без знака). Служба Славословная в Предпразднство * ВСЕДНЕ́ВНАЯ ВЕЧЕ́РНЯ. * Псало́м 103: * Вели́кая ектения́: * КАФИЗМА: * Кафизма втораянадесять * Псало́м 85: * Псало́м 86: * Псало́м 87: * Псало́м 88: * Псало́м 89: * Псало́м 90: * Ектения́ ма́лая: * Господи Возвах Глас 4 * Входа нет * Све́те Ти́хий: * В среду вечера, глас 5: * Сподо́би, Го́споди: * Ектения́ проси́тельная: * Стихиры на стиховне Предпра́зднства Успе́ния Пресвяты́я Богоро́дицы, Глас 2: * Моли́тва свято́го Симео́на Богоприи́мца: * Трисвято́е по О́тче наш: * Тропари: * Ектения́ сугу́бая: * Иерей произносит Отпуст * Многоле́тие: * У́ТРЕНЯ: * Псало́м 19: * Псало́м 20: * Трисвято́е по О́тче наш: * Ектения́ сугу́бая (ма́лая): * Шестопса́лмие: * Псалом 3: * Псалом 37: * Псалом 62: * Псалом 87: * Псалом 102: * Псалом 142: * Вели́кая ектения́: * Бог Господь, Глас 4 * Тропари "На Бог Господь": * КАФИЗМЫ: * Кафизма третиянадесять * Псало́м 91: * Псало́м 92: * Псало́м 93: * Псало́м 94: * Псало́м 95: * Псало́м 96: * Псало́м 97: * Псало́м 98: * Псало́м 99: * Псало́м 100: * Ектения́ ма́лая: * Седальны по 1-м стихословии : * Кафизма четвертаянадесять * Псало́м 101: * Псало́м 102: * Псало́м 103: * Псало́м 104: * Ектения́ ма́лая: * Седальны по 2-м стихословии : * Псало́м 50: * КАНОН(4-6-4): * Песнь 1: * Катавасия , Глас 1: * Песнь 3: * Катавасия , Глас 1: * Ектения́ ма́лая: * Кондак Предпра́зднства Успе́ния Пресвяты́я Богоро́дицы, Глас 4: * Икос: * Седальны: * Песнь 4: * Катавасия , Глас 1: * Песнь 5: * Катавасия , Глас 1: * Песнь 6: * Катавасия , Глас 1: * Ектения́ ма́лая: * Кондак Преподо́бнаго Феодо́сия, Глас 8: * Икос: * Песнь 7: * Катавасия , Глас 1: * Песнь 8: * Катавасия , Глас 1: * Песнь Пресвято́й Богоро́дицы: * Песнь 9: * Катавасия , Глас 1: * Ектения́ ма́лая: * Светилен Предпра́зднства Успе́ния Пресвяты́я Богоро́дицы * Светилен Преподо́бнаго Феодо́сия * Ин Светилен Предпра́зднства Успе́ния Пресвяты́я Богоро́дицы * Хвали́тны псалмы́, глас 6: * Славосло́вие вели́кое: * Трисвятое: * Тропари: * Ектения́ сугу́бая: * Ектения́ проси́тельная: * Отпу́ст: * Многоле́тие: * ЧИТА́ЕТСЯ ПЕ́РВЫЙ ЧАС: * Псало́м 5: * Псало́м 89: * Псало́м 100: * Трисвято́е по О́тче наш: * Кондак Предпра́зднства Успе́ния Пресвяты́я Богоро́дицы, Глас 4: * Кондак Предпра́зднства Успе́ния Пресвяты́я Богоро́дицы, Глас 4: * Отпу́ст. * Тре́тий час: * Трисвято́е по О́тче наш: * Псало́м 16: * Псало́м 24: * Псало́м 50: * Трисвято́е по О́тче наш: * Кондак Преподо́бнаго Феодо́сия, Глас 8: * Шесто́й час: * Псало́м 53: * Псало́м 54: * Псало́м 90: * Трисвято́е по О́тче наш: * Кондак Предпра́зднства Успе́ния Пресвяты́я Богоро́дицы, Глас 4: * Боже́ственная литурги́я: * Вели́кая ектения́: * Пе́рвый антифо́н, псало́м 102: * Ектения́ ма́лая: * Второ́й антифо́н, псало́м 145: * Единоро́дный Сы́не: * Ектения́ ма́лая: * Тре́тий антифо́н, Блаже́нны: * Ма́лый вход (с Ева́нгелием): * Тропари: * В храме Господском * [Тропарь Храма] * [Кондак Храма] * В храме Богородичном * В храме святого * [Тропарь Храма] * [Кондак Храма] * Трисвято́е: * Прокимен Преподо́бнаго Феодо́сия, глас 7: * Чтение Апостола: * Аллилуарий Преподо́бнаго Феодо́сия, глас 6: * Чтение Евангелия: * Ектения́ сугу́бая: * Ектения́ об оглаше́нных: * Ектения́ ве́рных, пе́рвая: * Ектения́ ве́рных, втора́я: * Херуви́мская песнь: * Вели́кий вход: * Ектения́ проси́тельная: * Си́мвол ве́ры: * Евхаристи́ческий Кано́н: * Досто́йно есть: * Ектения́ проси́тельная: * Моли́тва Госпо́дня: * Причастен Преподо́бнаго Феодо́сия: * Прича́стие: * Ектения́ заключи́тельная: * Заамво́нная моли́тва: * Псало́м 33: * Иерей произносит Отпуст * Многоле́тие: * Mолитва Преподо́бному Феодо́сию * Полезная информация о памяти Преподо́бнаго Феодо́сия * Полезная информация о памяти проро́ка Михе́я

27 августа 2026 по н. ст.

Ссылка на оригинал - https://cerkva.minei.ru/glas/showSlugba?id=25964&dayId=31394

14 Августа 2026 года, Четверг, (А137), Глас 3. Пренесе́ние честны́х моще́й преподо́бнаго Феодо́сия, игумена Киевопече́рскаго, в Да́льних пеще́рах почива́ющаго вместе со службой Свята́го проро́ка Михе́я (без знака). Служба Славословная в Предпразднство

ВСЕДНЕ́ВНАЯ ВЕЧЕ́РНЯ.

Иерей:
Благослове́н Бог наш, всегда́, ны́не и при́сно, и во ве́ки веко́в.
Хор:
Ами́нь.
Чтец:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́ Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 103:

Чтец:
Благослови́, душе́ моя́, Го́спода; Го́споди, Бо́же мой, возвели́чился еси́ зело́, во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи, и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды. От запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры, и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии; ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце, и собра́шася, и в ло́жах свои́х ля́гут. Изы́дет челове́к на де́ло свое́, и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́: испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́хже несть числа́, живо́тная ма́лая с вели́кими. Та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им, соберу́т; отве́рзшу Тебе́ ру́ку, вся́ческая испо́лнятся бла́гости. Отвра́щшу же Тебе́ лице́, возмяту́тся: отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х. Призира́яй на зе́млю, и творя́й ю́ трясти́ся; прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь. Да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им; благослови́, душе́ моя́, Го́спода.
Со́лнце позна́ за́пад свой; положи́л еси́ тму, и бысть нощь.
Я́ко возвели́чишася дела́ Твоя́, Го́споди, вся прему́дростию сотвори́л еси́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Три́жды)

Вели́кая ектения́:

Диа́кон:
Ми́ром Го́споду помо́лимся.
Хор:
Го́споди, поми́луй.
(На каждое прошение)
Диа́кон:
О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих во_нь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем, Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имярек), честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

КАФИЗМА:

Хор:
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Кафизма втораянадесять

Псало́м 85:

Приклони́, Го́споди, у́хо Твое́, и услы́ши мя́, я́ко ни́щ и убо́г е́смь а́з. Сохрани́ ду́шу мою́, я́ко преподо́бен е́смь: спаси́ раба́ Твоего́, Бо́же мо́й, упова́ющаго на Тя́. Поми́луй мя́, Го́споди, я́ко к Тебе́ воззову́ ве́сь де́нь. Возвесели́ ду́шу раба́ Твоего́, я́ко к Тебе́ взя́х ду́шу мою́. Я́ко Ты́, Го́споди, бла́г и кро́ток, и многоми́лостив все́м призыва́ющым Тя́. Внуши́, Го́споди, моли́тву мою́, и вонми́ гла́су моле́ния моего́. В де́нь ско́рби моея́ воззва́х к Тебе́, я́ко услы́шал мя́ еси́. Не́сть подо́бен Тебе́ в бозе́х, Го́споди, и не́сть по дело́м Твои́м. Вси́ язы́цы, ели́ки сотвори́л еси́, прии́дут и покло́нятся пред Тобо́ю, Го́споди, и просла́вят и́мя Твое́, я́ко ве́лий еси́ Ты́, и творя́й чудеса́, Ты́ еси́ Бо́г Еди́н. Наста́ви мя́, Го́споди, на пу́ть Тво́й, и пойду́ во и́стине Твое́й; да возвесели́тся се́рдце мое́ боя́тися и́мене Твоего́. Испове́мся Тебе́, Го́споди Бо́же мо́й, все́м се́рдцем мои́м, и просла́влю и́мя Твое́ в ве́к: я́ко ми́лость Твоя́ ве́лия на мне́, и изба́вил еси́ ду́шу мою́ от а́да преиспо́днейшаго. Бо́же, законопресту́пницы воста́ша на мя́, и со́нм держа́вных взыска́ша ду́шу мою́, и не предложи́ша Тебе́ пред собо́ю. И Ты́, Го́споди Бо́же мо́й, ще́дрый и ми́лостивый, долготерпели́вый, и многоми́лостивый и и́стинный, при́зри на мя́ и поми́луй мя́, да́ждь держа́ву Твою́ о́троку Твоему́, и спаси́ сы́на рабы́ Твоея́. Сотвори́ со мно́ю зна́мение во бла́го, и да ви́дят ненави́дящии мя́, и постыд́ятся, я́ко Ты́, Го́споди, помо́гл ми́ и уте́шил мя́ еси́.

Псало́м 86:

Основа́ния eго́ на гора́х святы́х; лю́бит Госпо́дь врата́ Сио́ня па́че все́х селе́ний Иа́ковлих. Пресла́вная глаго́лашася о тебе́, гра́де Бо́жий. Помяну́ Раа́в и Вавило́на, ве́дущым мя́, и се́ иноплемен́ницы, и Ти́р, и лю́дие Ефио́пстии, си́и бы́ша та́мо. Ма́ти Сио́н рече́т: челове́к, и челове́к роди́ся в не́м, и То́й основа́ и́, Вы́шний. Госпо́дь пове́сть в писа́нии люде́й, и князе́й си́х бы́вших в не́м. Я́ко веселя́щихся все́х жили́ще в тебе́.

Псало́м 87:

Го́споди Бо́же спасе́ния моего́, во дни́ воззва́х, и в нощи́ пред Тобо́ю. Да вни́дет пред Тя́ моли́тва моя́: приклони́ у́хо Твое́ к моле́нию моему́, я́ко испо́лнися зо́л душа́ моя́, и живо́т мо́й а́ду прибли́жися. Привмене́н бы́х с низходя́щими в ро́в, бы́х я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя́ в ро́ве преиспо́днем, в те́мных и се́ни сме́ртней. На мне́ утверди́ся я́рость Твоя́, и вся́ во́лны Твоя́ наве́л еси́ на мя́. Уда́лил еси́ зна́емых мои́х от Мене́, положи́ша мя́ ме́рзость себе́: пре́дан бы́х и не исхожда́х. О́чи мои́ изнемого́сте от нищеты́, воззва́х к Тебе́, Го́споди, ве́сь де́нь, возде́х к Тебе́ ру́це мои́. Еда́ ме́ртвыми твори́ши чудеса́́ Или́ вра́чеве воскреся́т, и испове́дятся Тебе́́ Еда́ пове́сть кто́ во гро́бе ми́лость Твою́, и и́стину Твою́ в поги́бели́ Еда́ позна́на бу́дут во тьме́ чудеса́ Твоя́, и пра́вда Твоя́ в земли́ забве́нней́ И а́з к Тебе́, Го́споди, воззва́х и у́тро моли́тва моя́ предвари́т Тя́. Вску́ю, Го́споди, отре́еши ду́шу мою́, отвраща́еши лице́ Твое́ от Мене́́ Ни́щ е́смь а́з, и в труде́х от ю́ности моея́; возне́с же ся́, смири́хся, и изнемого́х. На мне́ преидо́ша гне́ви Твои́, устраше́ния Твоя́ возмути́ша мя́, обыдо́ша мя́ я́ко вода́, ве́сь де́нь одержа́ша мя́ вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.
Чтец:
Сла́ва Отцу́ и Сы́ну и Свято́му Ду́ху.
Хор:
И ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Псало́м 88:

Ми́лости Твоя́, Го́споди, во ве́к воспою́, в ро́д и ро́д возвещу́ и́стину Твою́ усты́ мои́ми. Зане́ ре́кл еси́: в ве́к ми́лость сози́ждется, на небесе́х угото́вится и́стина Твоя́. Завеща́х заве́т избра́нным мои́м, кля́хся Дави́ду рабу́ Моему́: до ве́ка угото́ваю се́мя твое́, и сози́жду в ро́д и ро́д престо́л тво́й. Испове́дят небеса́ чудеса́ Твоя́, Го́споди, и́бо и́стину Твою́ в це́ркви святы́х. Я́ко кто́ во о́блацех уравни́тся Го́сподеви́ Уподо́бится Го́сподеви в сыне́х Бо́жиих́ Бо́г прославля́емь в совете́ святы́х, ве́лий и стра́шен е́сть на́д все́ми окре́стными Его́. Го́споди Бо́же Си́л, кто́ подо́бен Тебе́́ Си́лен еси́, Го́споди, и и́стина Твоя́ о́крест Тебе́. Ты́ влады́чествуеши держа́вою морско́ю: возмуще́ние же во́лн eго́ Ты́ укроча́еши. Ты́ смири́л еси́ я́ко я́звена го́рдаго, мы́шцею си́лы Твоея́ расточи́л еси́ враги́ Твоя́. Твоя́ су́ть небеса́, и Твоя́ е́сть земля́, вселе́нную и исполне́ние ея́ Ты́ основа́л еси́. Се́вер и мо́ре Ты́ созда́л еси́, Фаво́р и Ермо́н о и́мени Твое́м возра́дуетася. Твоя́ мы́шца с си́лою: да укрепи́тся рука́ Твоя́, и вознесе́тся десни́ца Твоя́. Пра́вда и судьба́ угото́вание Престо́ла Твоего́: ми́лость и и́стина предъи́дете пред лице́м Твои́м. Бла́жени лю́дие ве́дущии воскликнове́ние: Го́споди, во све́те лица́ Твоего́ по́йдут, и о и́мени Твое́м возра́дуются ве́сь де́нь, и пра́вдою Твое́ю вознесу́тся. Я́ко похвала́ си́лы и́х Ты́ еси́, и во благоволе́нии Твое́м вознесе́тся ро́г на́ш. Я́ко Госпо́дне е́сть заступле́ние, и Свята́го Изра́илева Царя́ на́шего. Тогда́ глаго́лал еси́ в ви́дении сыново́м Твои́м, и ре́кл еси́: положи́х по́мошь на си́льнаго, вознесо́х избра́ннаго от люде́й Мои́х, обрето́х Дави́да раба́ Moeгó, еле́ем святы́м Мои́м пома́зах eго́. И́бо рука́ Моя́ засту́пит eго́, и мы́шца Моя́ укрепи́т eго́, ничто́же успе́ет вра́г на него́, и сы́н беззако́ния не приложи́т озло́бити eго́: и ссеку́ от лица́ eго́ враги́ eго́, и ненави́дящыя eго́ побежду́. И и́стина Моя́ и ми́лость Моя́ с ни́м, и о и́мени Мое́м вознесе́тся ро́г eго́, и положу́ на мо́ри ру́ку eго́, и на река́х десни́цу eго́. То́й призове́т Мя́: Оте́ц мо́й еси́ Ты́, Бо́г мо́й и засту́пник спасе́ния моего́. И А́з пе́рвенца положу́ eго́, высо́ка па́че царе́й земны́х: в ве́к сохраню́ eму́ ми́лость Мою́, и заве́т Мо́й ве́рен eму́, и положу́ в ве́к ве́ка се́мя eго́, и престо́л eго́ я́ко дни́е не́ба. А́ще оста́вят сы́нове eго́ зако́н Мо́й, и в судьба́х Мои́х не по́йдут, а́ще оправда́ния Моя́ оскверня́т, и за́поведей Мои́х не сохраня́т, посещу́ жезло́м беззако́ния и́х, и ра́нами непра́вды и́х, ми́лость же Мою́ не разорю́ от ни́х, ни преврежду́ во и́стине Мое́й, ниже́ оскверню́ заве́та Моего́, и исходя́щих от у́ст Мои́х не отве́ргуся. Еди́ною кля́хся о святе́м Мое́м, а́ще Дави́ду солжу́́ Се́мя eго́ во ве́к пребу́дет, и престо́л eго́, я́ко со́лнце пре́до Мно́ю, и я́ко луна́ соверше́на в ве́к, и Свиде́тель на небеси́ ве́рен. Ты́ же отри́нул еси́ и уничижи́л, негодова́л еси́ пома́заннаго Твоего́, разори́л еси́ заве́т раба́ Твоего́, оскверни́л еси́ на земли́ святы́ню eго́: разори́л еси́ вся́ опло́ты eго́, положи́л еси́ тве́рдая eго́ стра́х. Расхища́ху eго́ вси́ мимоходя́щии путе́м, бы́сть поноше́ние сосе́дом свои́м. Возвы́сил еси́ десни́цу стужа́ющих eму́, возвесели́л еси́ вся́ враги́ eго́: отврати́л еси́ по́мощь меча́ eго́, и не заступи́л еси́ eго́ во бра́ни. Разори́л еси́ от очище́ния eго́, престо́л eго́ на зе́млю пове́ргл еси́, ума́лил еси́ дни́ вре́мене eго́, облия́л еси́ eго́ студо́м. Доко́ле, Го́споди, отвраща́ешися в коне́ц́ Разжже́тся я́ко о́гнь гне́в Тво́й́ Помяни́, ки́й мо́й соста́в, еда́ бо всу́е созда́л еси́ вся́ сы́ны челове́ческия́ Кто́ е́сть челове́к, и́же поживе́т и не у́зрит сме́рти, изба́вит ду́шу свою́ из руки́ а́довы́ Где́ су́ть ми́лости Твоя́ дре́вния, Го́споди, и́миже кля́лся еси́ Дави́ду во и́стине Твое́й́ Помяни́, Го́споди, поноше́ние ра́б Твои́х, е́же удержа́х в не́дре мое́м мно́гих язы́к, и́мже поноси́ша врази́ Твои́, Го́споди, и́мже поноси́ша измене́нию христа́ Твоего́. Благослове́н Госпо́дь во ве́к, бу́ди, бу́ди.
Чтец:
Сла́ва Отцу́ и Сы́ну и Свято́му Ду́ху.
Хор:
И ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Псало́м 89:

Го́споди, прибе́жище бы́л еси́ на́м в ро́д и ро́д. Пре́жде да́же гора́м не бы́ти и созда́тися земли́ и вселе́нней, и от ве́ка и до ве́ка Ты́ еси́. Не отврати́ челове́ка во смире́ние, и ре́кл еси́: обрати́теся, сы́нове челове́честии. Я́ко ты́сяща ле́т пред очи́ма Твои́ма, Го́споди, я́ко де́нь вчера́шний, и́же мимои́де, и стра́жа нощна́я. Уничиже́ния и́х ле́та бу́дут. У́тро я́ко трава́ мимои́дет, у́тро процвете́т и пре́йдет: на ве́чер отпаде́т ожесте́ет и и́зсхнет. Я́ко исчезо́хом гне́вом Твои́м, и я́ростию Твое́ю смути́хомся. Поло́жил еси́ беззако́ния на́ша пред Тобо́ю: ве́к на́ш в просвеще́ние лица́ Твоего́. Я́ко вси́ дни́е на́ши оскуде́ша, и гне́вом Твои́м исчезо́хом, ле́та на́ша я́ко паучи́на поуча́хуся. Дни́е ле́т на́ших, в ни́хже се́дмьдесят ле́т, а́ще же в си́лах, о́смьдесят ле́т, и мно́жае и́х тру́д и боле́знь: я́ко прии́де кро́тость на ны́, и нака́жемся. Кто́ ве́сть держа́ву гне́ва Твоего́, и от стра́ха Твоего́, я́рость Твою́ исчести́́ Десни́цу Твою́ та́ко скажи́ ми́, и окова́нныя се́рдцем в му́дрости. Обрати́ся, Го́споди, доко́ле́ И умоле́н бу́ди на рабы́ Твоя́. Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся́ дни́ на́ша возвесели́хомся, за дни́ в ня́же смири́л ны́ еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х. И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Псало́м 90:

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: засту́пник мо́й еси́ и прибе́жище мое́, Бо́г мо́й, и упова́ю на Него́. Я́ко То́й изба́вит тя́ от се́ти ло́вчи, и от словесе́ мяте́жна, плещма́ Свои́ма осени́т тя́, и под криле́ Его́ наде́ешися: ору́жием обы́дет тя́ и́стина Его́. Не убои́шися от стра́ха нощна́го, от стрелы́ летя́щия во дни́, от ве́щи во тьме́ преходя́шия, от сря́ща, и бе́са полу́деннаго. Паде́т от стра́ны твоея́ ты́сяща, и тьма́ одесну́ю тебе́, к тебе́ же не прибли́жится, оба́че очи́ма твои́ма смо́триши, и воздая́ние гре́шников у́зриши. Я́ко Ты́, Го́споди, упова́ние мое́, Вы́шняго положи́л еси́ прибе́жище Твое́. Не прии́дет к тебе́ зло́, и ра́на не прибли́жится телеси́ твоему́ , я́ко А́нгелом Свои́м запове́сть о тебе́, сохрани́ти тя́ во все́х путе́х твои́х. На рука́х во́змут тя́, да не когда́ преткне́ши о ка́мень но́гу твою́, на а́спида и васили́ска насту́пиши, и попере́ши льва́ и зми́я. Я́ко на Мя́ упова́, и изба́влю и́: покры́ю и́, я́ко позна́ и́мя Мое́. Воззове́т ко Мне́, и услы́шу eго́: с ни́м е́смь в ско́рби, изму́ eго́, и просла́влю eго́, долгото́ю дне́й испо́лню eго́, и явлю́ eму́ спасе́ние Мое́.
Чтец:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Три́жды)

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Твоя́ держа́ва, и Твое́ есть Ца́рство, и си́ла, и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Господи Возвах Глас 4

Хор:
Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.
Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.
Чтец:
  
Стихиры Преподо́бнаго Феодо́сия Глас 4
На 6. Стих:
А́ще беззако́ния на́зриши, Го́споди, Го́споди, кто постои́т?// Я́ко у Тебе́ очище́ние е́сть.
  
Подо́бен: Зва́нный свы́ше:
Стихи́ра:
Егда́ о спасе́нии твое́м по́двиг восприя́л еси́/ и све́том осия́лся еси́ от Небе́с неви́димо, преподо́бне,/ тогда́ лука́вым духо́м прогони́тель яви́ся,/ Бо́гом по́сланное же тебе́ зла́то прие́мь,/ ми́лостыни ще́дрый был еси́ пода́тель тре́бующим,/ пра́здныя сосу́ды жи́тницы напо́лнил еси́,/ оби́димым изба́витель гото́вейший/ и пропове́дник ве́ры Христа́ Бо́га на́шего,/ Его́же моли́ спасти́ и просвети́ти ду́ши на́ша.
Стих:
И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,// упова́ душа́ моя́ на Го́спода.
Стихи́ра:
Зарю́ вели́кую я́ко ви́де,/ я́ве а́нгельскую све́тлость уразуме́в бы́ти,/ явле́ние честны́х твои́х моще́й,/ в стра́се и ра́дости притече́ ско́ро досточу́дный Стефа́н,/ пребыва́я издале́ча зря,/ и ви́де твоя́ соста́вы це́лы и нетле́нны пребы́вшия,/ прославля́ющу тя Христу́ Бо́гу на́шему,/ Его́же моли́ спасти́ и просвети́ти ду́ши на́ша.
На 4. Стих:
От стра́жи у́тренния до но́щи, от стра́жи у́тренния,// да уповае́т Изра́иль на Го́спода.
Стихи́ра:
Егда́ приидо́ша в пеще́ру твою́, преподо́бне,/ хотя́щим пренести́ те́ло твое́,/ тогда́, гроб откры́вше, ра́дующеся,/ ви́деша лежа́щия твоя́ мо́щи святоле́нно,/ соста́вы вся це́лы/ и тле́нию неприча́стны,/ и гла́вныя власы́ присо́хша к главе́,/лице́ же све́тлостно,/ очи́ и устне́ богосло́внеи соедине́ны,/ прославля́ющу тя Христу́ Бо́гу на́шему,/ Его́же моли́ спасти́ и просвети́ти ду́ши на́ша.
Стих:
Я́ко у Го́спода ми́лость, и мно́гое у Него́ избавле́ние,// и Той изба́вит Изра́иля от всех беззако́ний eго́.
  
Стихиры проро́ка Михе́я Глас 4, Подо́бен: Дал еси́ зна́мение:
Стихи́ра:
Го́ру провозгласи́л еси́,/ явле́нну и высоку́,/ Спа́сово пропове́дание,/ на верх яви́тися гор, блаже́нне,/ превысо́кое богоразу́мие проявля́я,/ на ню́же язы́цы ве́рою стека́ющеся,/ усе́рдно прибега́ют,/ и пути́ науча́ются Госпо́дню,/ и спаса́ются спасе́нием ве́чным.
На 2. Стих:
Хвали́те Го́спода вси язы́цы,// похвали́те Его́ вси лю́дие.
Стихи́ра:
Князь изы́дет/ и упасе́т лю́ди Своя́,/ от Вифлее́ма изше́д, проре́кл еси́,/ чу́дный во проро́цех Михе́е,/ язы́ком богодохнове́нным,/ Его́же вои́стинну от дней ве́ка суть исхо́ди;/ и ны́не твое́ прорече́ние сбы́вшееся ви́дяще,/ тобо́ю Глаго́лавшаго/ богому́дренно сла́вим.
Стих:
Я́ко утверди́ся ми́лость Его́ на нас,// и и́стина Госпо́дня пребыва́ет во век.
Стихи́ра:
Престо́лу предстоя́ Бо́жию,/ проро́че всече́стне,/ и радости сподобля́яся,/ и славу зря,/ и пи́щи Боже́ственныя наслажда́яся,/ и весе́лия духо́внаго и ра́дости испо́лнен,/ ве́рою ны́не па́мять твою́ соверша́ющих назира́й,/ напа́стей избавля́я/ непреста́нными моли́твами твои́ми.
Сла́ва Отцу́ и Сы́ну и Свято́му Ду́ху.
  
Подо́бен: Зва́нный свы́ше: , Глас 6:
Приспе́ днесь пра́здник пренесе́ния честны́х твои́х моще́й,/ преподо́бне о́тче наш Феодо́сие,/ созыва́я всех ве́рно торжествова́ти,/ в па́мять твою́ глаго́люще:/ ра́дуйся, Боже́ственнаго Ду́ха жили́ще всеосвяще́нное и сто́лпе благоче́стия./ Ра́дуйся, и́же Бо́гом да́нный тебе́ тала́нт умно́живы́й, преподо́бным похвало́./ Ра́дуйся, ми́ру свети́льниче всесве́тлый и на́ше утеше́ние./ И ны́не, предстоя́ Христо́ву Престо́лу,/ моли́ изба́витися нам от вся́каго гне́ва и скро́би/ и бу́дущую сла́ву получи́ти,/ ве́рно пра́зднующим святу́ю твою́ па́мять.
И ны́не и при́сно и во ве́ки веко́в. Ами́нь.
  
Борогордичен Предпра́зднства Успе́ния Пресвяты́я Богоро́дицы, Глас 4-й:
Всечестно́е Твое́ успе́ние,/ Пресвята́я Де́во Чи́стая,/ А́нгел мно́жество на Небеси́/ и челове́ческий род на земли́, ублажа́ем,/ я́ко Ма́ти была́ еси́ Творца́ всех Христа́ Бо́га,/ Того́ моля́щи о нас/ не преста́й, мо́лимся,/ и́же на Тя с Бо́гом упова́ние поло́жших,/ Богоро́дице Всепе́тая и Неискусобра́чная.

Входа нет

Све́те Ти́хий:

Чтец:
Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.
  
Положив обычный поклон, диакон, аще же несть, священник, глаголет прокимен дне.

В среду вечера, глас 5:

Диа́кон:
Премудрость. Воннмем.
Диа́кон:
Бо́же, во и́мя Твое́ спаси́ мя, / и в си́ле Твое́й суди́ ми.
Хор:
Бо́же, во и́мя Твое́ спаси́ мя, / и в си́ле Твое́й суди́ ми.
Стих:
Бо́же, услы́ши моли́тву мою́, внуши́ глаго́лы уст мои́х.
Хор:
Бо́же, во и́мя Твое́ спаси́ мя, / и в си́ле Твое́й суди́ ми.
Диа́кон:
Бо́же, во и́мя Твое́ спаси́ мя
Хор:
И в си́ле Твое́й суди́ ми.

Сподо́би, Го́споди:

 Чтец:
Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.
Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.
Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Ектения́ проси́тельная:

Диакон:
Испо́лним вече́рнюю моли́тву на́шу Го́сподеви.
Хор:
Го́споди, поми́луй.
Диакон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диакон
Ве́чера всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На ка́ждое проше́ние)
Диакон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иерей:
Я́ко Благ и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.
Иерей:
Мир всем.
Хор:
И ду́хови твоему́.
Диакон:
Главы́ наша Го́сподеви прикло́ним.
Хор:
Тебе́, Го́споди.
Иерей:
Бу́ди держа́ва Ца́рствия Твоего́ благослове́на и препросла́влена. Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Стихиры на стиховне Предпра́зднства Успе́ния Пресвяты́я Богоро́дицы, Глас 2:

  
Подо́бен: До́ме Евфра́фов:
Стихира:
О, чудесе́ но́ваго!/ О, зна́мения стра́ннаго!/ Ка́ко ме́ртвость подъя́т/ живоно́сная Отрокови́ца/ и гро́бом ны́не покрыва́ется!
Стих:
Воскресни́, Го́споди, в поко́й Твой,/ Ты и Киво́т святы́ни Твоея́.
Стихира:
Вся́ко земноро́дных/ естество́ да лику́ет:/ се бо Де́ва,/ Ада́мова Дщи,/ к Небеси́ преставля́ется.
Стих:
Кля́тся Госпо́дь Дави́ду и́стиною/ и не отве́ржется ея́.
Стихира:
Приими́ ми во уме́,/ одр Де́вы,/ лико́м апо́стольским/ благоле́пно окружа́ющим/ и пою́щим исхо́дное.
Сла́ва Отцу́ и Сы́ну и Свято́му Ду́ху.
  
Преподо́бнаго Феодо́сия Глас 8:
Стихира:
Мона́хов мно́жества, наста́вника тя почита́ем, о́тче наш Феодо́сие,/ твое́ю бо стезе́ю вои́стинну пра́во ходи́ти позна́хом./ Бла́жен еси́, Христу́ рабо́тав/ и вра́жию обличи́вый си́лу,/ А́нгелов собесе́дниче, преподо́бных соприча́стниче и пра́ведных,/ с ни́ми же моли́ся Го́сподеви/ поми́ловатися душа́м на́шим.
И ны́не и при́сно и во ве́ки веко́в. Ами́нь.
  
Глас 2
Я́же Небе́с вы́шшая су́щи,/ и Херуви́м сла́внейшая,/ и всея́ тва́ри честне́йшая,/ Я́же премно́гия ра́ди чистоты́/ Присносу́щнаго Существа́ прия́телище бы́вши,/ в Сыно́вне ру́це днесь всесвяту́ю предае́т ду́шу,/ и с Не́ю исполня́ются вся́ческая ра́дости,/ и нам да́рует ве́лию ми́лость.

Моли́тва свято́го Симео́на Богоприи́мца:

Чтец:
Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Тропари:

  
Тропарь Преподо́бнаго Феодо́сия, Глас 8:
Правосла́вия наста́вниче,/ благоче́стия учи́телю и чистоты́,/ вселе́нный свети́льниче,/ архиере́ев богодухнове́нное удобре́ние,/ Феодо́сие прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
  
Тропарь Предпра́зднства Успе́ния Пресвяты́я Богоро́дицы, Глас 4:
Лю́дие, предыгра́йте,/ рука́ми пле́щуще ве́рно,/ и любо́вию собери́теся,/ днесь ра́дующеся/ и све́тло восклица́юще вси весе́лием:/ Бо́жия бо Ма́ти и́мать от земны́х к Вы́шним прейти́ сла́вно,/ Ю́же пе́сньми при́сно я́ко Богоро́дицу сла́вим.

Ектения́ сугу́бая:

Диакон:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Три́жды, на ка́ждое проше́ние)
Диакон:
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем Высокопреосвяще́ннейшем митрополи́те , и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих настоя́теля, бра́тии и прихо́жан свята́го хра́ма сего́.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Иерей:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.
Диакон:
Прему́дрость.
Хор:
Благослови́.
Иерей:
Сый благослове́н Христо́с Бог наш, всегда́, ны́не и при́сно и во ве́ки веко́в.
Хор:
Ами́нь. Утверди́, Бо́же, святу́ю правосла́вную ве́ру, правосла́вных христиа́н во век ве́ка.
Иерей:
Пресвята́я Богоро́дице, спаси́ нас.
Хор:
Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Иерей:
Сла́ва Тебе́, Христе́ Бо́же, Упова́ние на́ше, сла́ва Тебе́.
Хор:
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Го́споди, поми́луй.
(Три́жды)
Благослови́.

Иерей произносит Отпуст

Многоле́тие:

У́ТРЕНЯ:

Иерей:
Благослове́н Бог наш, всегда́, ны́не и при́сно, и во ве́ки веко́в.
Хор:
Ами́нь.
Чтец:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́ Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 19:

Услы́шит тя Госпо́дь в день печа́ли, защи́тит тя и́мя Бо́га Иа́ковля. По́слет ти по́мощь от Свята́го и от Сио́на засту́пит тя. Помяне́т вся́ку же́ртву твою́, и всесожже́ние твое́ ту́чно бу́ди. Даст ти Госпо́дь по се́рдцу твоему́ и весь сове́т твой испо́лнит. Возра́дуемся о спасе́нии твое́м и во и́мя Го́спода Бо́га на́шего возвели́чимся. Испо́лнит Госпо́дь вся проше́ния твоя́. Ны́не позна́х, я́ко спасе́ Госпо́дь христа́ Своего́, услы́шит eго́ с Небесе́ Свята́го Своего́, в си́лах спасе́ние десни́цы Его́. Си́и на колесни́цах, и си́и на ко́нех, мы же во и́мя Го́спода Бо́га на́шего призове́м. Ти́и спя́ти бы́ша и падо́ша, мы же воста́хом и испра́вихомся. Го́споди, спаси́ царя́ и услы́ши ны, во́ньже а́ще день призове́м Тя.

Псало́м 20:

Го́споди, си́лою Твое́ю возвесели́тся царь и о спасе́нии Твое́м возра́дуется зело́. Жела́ние се́рдца eго́ дал еси́ eму́, и хоте́ния устну́ eго́ не́си лиши́л eго́. Я́ко предвари́л еси́ eго́ благослове́нием благосты́нным, положи́л еси́ на главе́ eго́ вене́ц от ка́мене че́стна. Живота́ проси́л есть у Тебе́, и дал еси́ eму́ долготу́ дний во век ве́ка. Ве́лия сла́ва eго́ спасе́нием Твои́м, сла́ву и велеле́пие возложи́ши на него́. Я́ко да́си eму́ благослове́ние во век ве́ка, возвесели́ши eго́ ра́достию с лице́м Твои́м. Я́ко царь упова́ет на Го́спода, и ми́лостию Вы́шняго не подви́жится. Да обря́щется рука́ Твоя́ всем враго́м Твои́м, десни́ца Твоя́ да обря́щет вся ненави́дящия Тебе́. Я́ко положи́ши их я́ко пещь о́гненную во вре́мя лица́ Твоего́, Госпо́дь гне́вом Свои́м смяте́т я́, и сне́сть их огнь. Плод их от земли́ погуби́ши, и се́мя их от сыно́в челове́ческих. Я́ко уклони́ша на Тя зла́я, помы́слиша сове́ты, и́хже не возмо́гут соста́вити. Я́ко положи́ши я́ хребе́т, во избы́тцех Твои́х угото́виши лице́ их. Вознеси́ся, Го́споди, си́лою Твое́ю, воспое́м и пое́м си́лы Твоя́.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.
Чтец:
Спаси́ Го́споди лю́ди Твоя́,/ и благослови́ достоя́ние Твое́,/ побе́ды на сопроти́вныя да́руя,// и Твое́ сохраня́я Кресто́м Твои́м жи́тельство.
Сла́ва Отцу́ и Сы́ну и Свято́му Ду́ху.
Вознесы́йся на Крест во́лею,/ тезоимени́тому Твоему́ но́вому жи́тельству/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ oру́жие ми́ра,// непобеди́мую побе́ду.
И ны́не и при́сно и во ве́ки веко́в. Ами́нь.
Предста́тельство стра́шное и непосты́дное,/ не пре́зри Блага́я моли́тв на́ших, Всепе́тая Богоро́дице,/ утверди́ правосла́вных жи́тельство:/ спаси́ лю́ди Твоя́, и пода́ждь им с небесе́ побе́ду,// зане́ родила́ еси́ Бо́га, еди́на благослове́нная.

Ектения́ сугу́бая (ма́лая):

Иерей:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Трижды, на каждое прошение)
Иерей:
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем Высокопреосвяще́ннейшем митрополии́те (или: архиепи́скопе, или: преосвяще́ннейшем епи́скопе имяре́к), и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся за всю бра́тию и за вся христиа́ны.
Иерей:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь. И́менем Госпо́дним благослови́ о́тче.
Иерей:
Сла́ва Святе́й, и Единосу́щней, и Животворя́щей, и Неразде́льней Тро́ице, всегда́, ны́не и при́сно, и во ве́ки веко́в.
Хор:
Ами́нь.

Шестопса́лмие:

Чтец:
Сла́ва в вы́шних Бо́гу, и на земли́ мир, в челове́цех благоволе́ние.
(Трижды)
Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Дважды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющия ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.
Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.
Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.
На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.
Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ в век вражду́ет, не по беззако́нием на́шим сотвори́л есть нам, ниже́ по грехо́м на́шим возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чествия Его́, благослови́, душе́ моя́, Го́спода.
На вся́ком ме́сте влады́чествия Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щим в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющия души́ мое́й, я́ко аз раб Твой есмь.
Услы́ши мя, Го́споди, в пра́вде Твое́й и не вни́ди в суд с рабо́м Твои́м.
Услы́ши мя, Го́споди, в пра́вде Твое́й и не вни́ди в суд с рабо́м Твои́м.
Дух Твой Благи́й наста́вит мя на зе́млю пра́ву.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)

Вели́кая ектения́:

Диа́кон:
Ми́ром Го́споду помо́лимся.
Хор:
Го́споди, поми́луй.
(На каждое прошение)
Диа́кон:
О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих во_нь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем, Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имярек), честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Бог Господь, Глас 4

Диа́кон:
Бог Госпо́дь, и яви́ся нам, благослове́н Гряды́й во И́мя Госпо́дне.
Стих 1:
Испове́дайтеся Го́сподеви, я́ко благ, я́ко в век ми́лость Его́.
Хор:
Бог Госпо́дь, и яви́ся нам, благослове́н Гряды́й во И́мя Госпо́дне.
(И далее на каждый стих)
Стих 2:
Обыше́дше обыдо́ша мя, и И́менем Госпо́дним противля́хся им.
Стих 3:
Не умру́, но жив бу́ду, и пове́м дела́ Госпо́дня.
Стих 4:
Ка́мень, Его́же небрего́ша зи́ждущии, Сей бы́сть во главу́ у́гла, от Го́спода бысть Сей, и есть ди́вен во очесе́х на́ших.

Тропари "На Бог Господь":

  
Тропарь Предпра́зднства Успе́ния Пресвяты́я Богоро́дицы, Глас 4:
Лю́дие, предыгра́йте,/ рука́ми пле́щуще ве́рно,/ и любо́вию собери́теся,/ днесь ра́дующеся/ и све́тло восклица́юще вси весе́лием:/ Бо́жия бо Ма́ти и́мать от земны́х к Вы́шним прейти́ сла́вно,/ Ю́же пе́сньми при́сно я́ко Богоро́дицу сла́вим.
(Дважды)
Сла́ва Отцу́ и Сы́ну и Свято́му Ду́ху.
  
Тропарь Преподо́бнаго Феодо́сия, Глас 8:
Правосла́вия наста́вниче,/ благоче́стия учи́телю и чистоты́,/ вселе́нный свети́льниче,/ архиере́ев богодухнове́нное удобре́ние,/ Феодо́сие прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.
И ны́не и при́сно и во ве́ки веко́в. Ами́нь.
  
Тропарь Предпра́зднства Успе́ния Пресвяты́я Богоро́дицы, Глас 4:
Лю́дие, предыгра́йте,/ рука́ми пле́щуще ве́рно,/ и любо́вию собери́теся,/ днесь ра́дующеся/ и све́тло восклица́юще вси весе́лием:/ Бо́жия бо Ма́ти и́мать от земны́х к Вы́шним прейти́ сла́вно,/ Ю́же пе́сньми при́сно я́ко Богоро́дицу сла́вим.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

КАФИЗМЫ:

Кафизма третиянадесять

Псало́м 91:

Бла́го е́сть испове́датися Го́сподеви, и пе́ти и́мени Твоему́, Вы́шний: возвеща́ти зау́тра ми́лость Твою́ и и́стину Твою́ на вся́ку но́щь, в десятостру́ннем псалти́ри с пе́снию в гу́слех. Я́ко возвесели́л мя́ еси́, Го́споди, в творе́нии Твое́м, и в де́лех руку́ Твое́ю возра́дуюся. Я́ко возвели́чишася дела́ Твоя́, Го́споди, зело́ углуби́шася помышле́ния Твоя́. Му́ж безу́мен не позна́ет, и неразу́мив не разу́меет си́х. Внегда́ прозябо́ша гре́шницы я́ко трава́, и пронико́ша вси́ де́лающии беззако́ние: я́ко да потребя́тся в ве́к ве́ка. Ты́ же Вы́шний во ве́к, Го́споди. Я́ко се́ врази́ Твои́, Го́споди, я́ко се́ врази́ Твои́ поги́бнут, и разы́дутся вси́ де́лающии беззако́ние. И вознесе́тся я́ко единоро́га ро́г мо́й, и ста́рость моя́ в еле́и масти́те. И воззре́ о́ко мое́ на враги́ моя́, и востаю́щыя на мя́ лука́внующыя услы́шит у́хо мое́. Пра́ведник я́ко фи́никс процвете́т, я́ко ке́др, и́же в Лива́не, умно́жится. Насажде́ни в дому́ Госпо́дни, во дво́рех Бо́га на́шего процвету́т, еще́ умно́жатся в ста́рости масти́те, и благоприе́млюще бу́дут. Да возвестя́т, я́ко пра́в Госпо́дь Бо́г на́ш, и не́сть непра́вды в Не́м.

Псало́м 92:

Госпо́дь воцари́ся, в ле́поту облече́ся: облече́ся Госпо́дь в си́лу и препоя́сася, и́бо утверди́ все́ленную, я́же не подви́жится. Гото́в Престо́л Тво́й отто́ле: от ве́ка Ты́ еси́. Воздвиго́ша ре́ки, Го́споди, воздвиго́ша ре́ки гла́сы своя́; во́змут ре́ки сотре́ния своя́, от гла́сов во́д мно́гих. Ди́вны высоты́ морски́я, ди́вен в высо́ких Госпо́дь. Свиде́ния Твоя́ уве́ришася зело́, до́му Твоему́ подоба́ет святы́ня, Го́споди, в долготу́ дни́й.

Псало́м 93:

Бо́г отмще́ний Госпо́дь, Б́ог отмще́ний не обину́лся е́сть. Вознеси́ся судя́й земли́, возда́ждь воздая́ние го́рдым. Доко́ле гре́шницы, Го́споди, доко́ле гре́шницы восхва́лятся́ Провеща́ют и возглаго́лют непра́вду, возглаго́лют вси́ де́лающии беззако́ние́ Лю́ди Твоя́, Го́споди, смири́ша и достоя́ние Твое́ озло́биша; вдови́цу и си́ра умори́ша и прише́льца уби́ша, и ре́ша: не у́зрит Госпо́дь, ниже́ уразуме́ет Бо́г Иа́ковль. Разуме́йте же безу́мнии в лю́дех и бу́ии не́когда умудри́теся. Насажде́й у́хо, не слы́шит ли́́ Или́ созда́вый о́ко, не сматря́ет ли́́ Наказу́яй язы́ки, не обличи́т ли́, уча́й челове́ка ра́зуму́ Госпо́дь ве́сть помышле́ния челове́ческая, я́ко су́ть су́етна. Блаже́н челове́к, eго́же а́ще нака́жеши, Го́споди, и от зако́на Твоего́ научи́ши eго́, укроти́ти eго́ от дне́й лю́тых, до́ндеже изры́ется гре́шному я́ма. Я́ко не отри́нет Госпо́дь люде́й Свои́х, и достоя́ния Своего́ не оста́вит, до́ндеже пра́вда обрати́тся на су́д, и держа́щиися ея́ вси́ пра́вии се́рдцем. Кто́ воста́нет ми́ на лука́внующыя́ Или́ кто́ спредста́нет ми́ на де́лающыя беззако́ние́ А́ще не Госпо́дь помо́гл бы́ ми́, вма́ле всели́лася бы́ во а́д душа́ моя́. А́ще глаго́лах, подви́жеся нога́ моя́, ми́лость Твоя́, Го́споди, помога́ше ми́. По мно́жеству боле́зней мои́х в се́рдце мое́м, утеше́ния Твоя́ возвесели́ша ду́шу мою́. Да не прибу́дет Тебе́ престо́л беззако́ния, созида́яй тру́д на повеле́ние. Уловя́т на ду́шу пра́ведничу, и кро́вь непови́нную осу́дят. И бы́сть мне́ Госпо́дь в прибе́жище, и Бо́г мо́й в по́мощь упова́ния моего́. И возда́ст и́м Госпо́дь беззако́ние и́х и по лука́вствию и́х погуби́т я́ Госпо́дь Бо́г.
Чтец:
Сла́ва Отцу́ и Сы́ну и Свято́му Ду́ху.
Хор:
И ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Псало́м 94:

Прииди́те, возра́дуемся Го́сподеви, воскли́кнем Бо́гу, спаси́телю на́шему: предвари́м лице́ Его́ во испове́дании, и во псалме́х воскли́кнем Ему́. Я́ко Бо́г ве́лий Госпо́дь, и Ца́рь ве́лий по все́й земли́, я́ко в руце́ Его́ вси́ концы́ земли́, и высоты́ го́р Того́ су́ть. Я́ко Того́ е́сть мо́ре, и То́й сотвори́ е́, и су́шу ру́це Его́ созда́сте. Прииди́те, поклони́мся и припаде́м Ему́, и воспла́чемся пред Го́сподем сотво́ршим на́с: я́ко То́й е́сть Бо́г на́ш, и мы́ лю́дие па́жити Его́, и о́вцы руки́ Его́. Дне́сь а́ще гла́с Его́ услы́шите, не ожесточи́те серде́ц ва́ших, я́ко в прогне́вании, по дни́ искуше́ния в пусты́ни, во́ньже искуси́ша Мя́ отцы́ ва́ши, искуси́ша Мя́, и ви́деша дела́ Моя́. Четы́редесять ле́т негодова́х ро́да того́, и ре́х, при́сно заблужда́ют се́рдцем, ти́и же не позна́ша путе́й Мои́х, я́ко кля́хся во гне́ве Мое́м, а́ще вни́дут в поко́й Мо́й.

Псало́м 95:

Воспо́йте Го́сподеви пе́снь но́ву, воспо́йте Го́сподеви вся́ земля́, воспо́йте Го́сподеви, благослови́те и́мя Его́, благовести́те де́нь от дне́ спасе́ние Его́. Возвести́те во язы́цех сла́ву Его́, во все́х лю́дех чудеса́ Его́. Я́ко ве́лий Госпо́дь и хва́лен зело́, стра́шен е́сть над все́ми бо́ги. Я́ко вси́ бо́зи язы́к бе́сове: Госпо́дь же небе́са сотвори́. Испове́дание и красота́ пред Ни́м, святы́ня и великоле́пие во святи́ле Его́. Принеси́те Го́сподеви оте́чествия язы́к, принеси́те Го́сподеви сла́ву и че́сть. Принеси́те Го́сподеви сла́ву и́мени Его́, возми́те же́ртвы, и входи́те во дворы́ Его́. Поклони́теся Го́сподеви во дворе́ святе́м Его́, да подви́жится от лица́ Его́ вся́ земля́. Рцы́те во язы́цех, я́ко Госпо́дь воцари́ся, и́бо испра́ви вселе́нную, я́же не подви́жится: су́дит лю́дем пра́востию. Да возвеселя́тся небеса́, и ра́дуется земля́, да подви́жится мо́ре и исполне́ние eго́. Возра́дуются поля́, и вся́ я́же на ни́х: тогда́ возра́дуются вся́ древа́ дубра́вная от лица́ Госпо́дня, я́ко гряде́т, я́ко гряде́т суди́ти земли́, суди́ти вселе́нней в пра́вду, и лю́дем и́стиною Свое́ю.

Псало́м 96:

Госпо́дь воцари́ся, да ра́дуется земля́, да веселя́тся о́строви мно́зи. О́блак и мра́к о́крест Eго́, пра́вда и судьба́ исправле́ние Престо́ла Его́. О́гнь пред Ни́м предъи́дет, и попали́т о́крест враги́ Его́. Освети́ша мо́лния Его́ вселе́нную: ви́де, и подви́жеся земля́. Го́ры я́ко во́ск раста́яша от лица́ Госпо́дня, от лица́ Го́спода всея́ земли́. Возвести́ша небеса́ пра́вду Его́, и ви́деша вси́ лю́дие сла́ву Его́. Да постыдя́тся вси́ кла́няющиися истука́нным, хваля́щиися о и́долех свои́х; поклони́теся Ему́ вси́ А́нгели Его́. Слы́ша и возвесели́ся Сио́н, и возра́довашася дще́ри Иуде́йския, суде́б ради́ Твои́х, Го́споди, я́ко Ты́ Госпо́дь вы́шний над все́ю земле́ю, зело́ превозне́слся еси́ над все́ми бо́ги. Лю́бящии Го́спода, ненави́дите зла́я, храни́т Госпо́дь ду́шы преподо́бных Свои́х, из руки́ гре́шничи изба́вит я́. Све́т возсия́ пра́веднику, и пра́вым се́рдцем весе́лие. Весели́теся, пра́веднии, о Го́споде и испове́дайте па́мять Святы́ни Его́.
Чтец:
Сла́ва Отцу́ и Сы́ну и Свято́му Ду́ху.
Хор:
И ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Псало́м 97:

Воспо́йте Го́сподеви пе́снь но́ву, я́ко ди́вна сотвори́ Госпо́дь: спасе́ Его́ десни́ца Его́, и мы́шца свята́я Его́. Сказа́ Госпо́дь спасе́ние Свое́, пред язы́ки откры́ пра́вду Свою́. Помяну́ ми́лость Свою́ Иа́кову, и и́стину Свою́ до́му Изра́илеву, ви́деша вси́ концы́ земли́ спасе́ние Бо́га на́шего. Воскли́кните Бо́гови вся́ земля́, воспо́йте, и ра́дуйтеся, и по́йте. По́йте Го́сподеви в гу́слех, в гу́слех и гла́се псало́мсте. В труба́х ко́ваных и гла́сом трубы́ ро́жаны воструби́те пред Царе́м Го́сподем. Да подви́жится мо́ре и исполне́ние eго́, вселе́нная и вси́ живу́щии на не́й. Ре́ки воспле́щут руко́ю вку́пе, го́ры возра́дуются от лица́ Госпо́дня, я́ко гряде́т, я́ко и́дет суди́ти земли́, суди́ти вселе́нней в пра́вду, и лю́дем пра́востию.

Псало́м 98:

Госпо́дь воцари́ся, да гне́ваются лю́дие: Седя́й на Херуви́мех, да подви́жится земля́. Госпо́дь в Сио́не вели́к, и высо́к е́сть над все́ми людьми́. Да испове́дятся и́мени Твоему́ вели́кому, я́ко стра́шно и свя́то е́сть. И че́сть царе́ва су́д лю́бит; Ты́ угото́вал еси́ правоты́, су́д и пра́вду во Иа́кове Ты́ сотвори́л еси́. Возноси́те Го́спода Бо́га на́шего, и покланя́йтеся подно́жию ногу́ Его́, я́ко свя́то е́сть. Моисе́й и Ааро́н во иере́ех Его́, и Саму́ил в призыва́ющих и́мя Его́: призыва́ху Го́спода, и То́й послу́шаше и́х. В столпе́ о́блачне глаго́лаше к ни́м: я́ко храня́ху свиде́ния Его́ и повеле́ния Его́, я́же даде́ и́м. Го́споди Бо́же на́ш, Ты́ послу́шал еси́ и́х: Бо́же, ты́ ми́лостив быва́л еси́ и́м, и мща́я на вся́ начина́ния и́х. Возноси́те Го́спода Бо́га на́шего, и покланя́йтеся в горе́ святе́й Его́, я́ко Свя́т Госпо́дь Бо́г на́ш.

Псало́м 99:

Воскли́кните Бо́гови вся́ земля́, рабо́тайте Го́сподеви в весе́лии, вни́дите пред Ни́м в ра́дости. Уве́дите, я́ко Госпо́дь то́й е́сть Бо́г на́ш: То́й сотвори́ на́с, а не мы́, мы́ же лю́дие Его́ и о́вцы па́жити Его́. Вни́дите во врата́ Его́ во испове́дании, во дворы́ Его́ в пе́ниих: испове́дайтеся Ему́, хвали́те и́мя Его́. Я́ко бла́г Госпо́дь, в ве́к ми́лость Его́, и да́же до ро́да и ро́да и́стина Его́.

Псало́м 100:

Ми́лость и су́д воспою́ Тебе́, Го́споди. Пою́ и разуме́ю в пути́ непоро́чне, когда́ прии́деши ко мне́́ Прехожда́х в незло́бии се́рдца моего́ посреде́ до́му моего́. Не предлага́х пред очи́ма мои́ма ве́щь законопресту́пную: творя́щыя преступле́ние возненави́дех. Не прильпе́ мне́ се́рдце стропти́во, уклоня́ющагося от Мене́ лука́ваго не позна́х. Оклевета́ющаго та́й и́скренняго своего́, сего́ изгоня́х: го́рдым о́ком, и несы́тым се́рдцем, с си́м не ядя́х. О́чи мои́ на ве́рныя земли́, посажда́ти я́ со мно́ю: ходя́й по пути́ непоро́чну, се́й ми́ служа́ше. Не живя́ше посреде́ до́му моего́ творя́й горды́ню, глаго́ляй непра́ведная, не исправля́ше пред очи́ма мои́ма. Во у́трия избива́х вся́ гре́шныя земли́, е́же потреби́ти от гра́да Госпо́дня вся́ де́лающыя беззако́ние.
Чтец:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Три́жды)

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Твоя́ держа́ва, и Твое́ есть Ца́рство, и си́ла, и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Седальны по 1-м стихословии :

  
Преподо́бнаго Феодо́сия , Глас 1:
  
Подо́бен: Гроб Твой, Спа́се:
Гроб, иде́же поло́жен был еси́ в це́ркви твое́й, преподо́бне,/ благоуха́ние испуща́ет приходя́щим ве́рою,/ и па́мять твоя́ весели́т сердца́ ве́рных./ Тем, Влады́це предстоя́, о́тче, помина́й нас,/ ве́рою творя́щих па́мять твою́ светоно́сную и всеосвяще́нную.
(Дважды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
  
Предпра́зднства Успе́ния Пресвяты́я Богоро́дицы , Глас 4:
  
Подо́бен: Удиви́ся Ио́сиф:
Ши́ршая небе́с я́вльшися на земли́, Ро́ждшая пло́тию всех Соде́теля,/ ны́не в са́мая Небеса́ от земли́ преставля́ется,/ пра́ведных у́бо ду́ши, смотря́юще Тя, а́нгельстии же ли́цы, зря́ще,/ я́ко Ца́ри́це, хвалу́ досто́йно всегда́ Тебе́ прино́сят./ Те́мже моля́щи не преста́й о воспева́ющих Тя.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Кафизма четвертаянадесять

Псало́м 101:

Го́споди, услы́ши моли́тву мою́, и во́пль мо́й к Тебе́ да прии́дет. Не отврати́ лица́ Твоего́ от Мене́: во́ньже а́ще де́нь скорблю́, приклони́ ко мне́ у́хо Твое́: во́ньже а́ще де́нь призову́ Тя́, ско́ро услы́ши мя́. Я́ко исчезо́ша я́ко ды́м дни́е мои́, и ко́сти моя́ я́ко суши́ло сосхо́шася. Уя́звен бы́х я́ко трава́, и и́зсше се́рдце мое́, я́ко забы́х сне́сти хле́б мо́й. От гла́са воздыха́ния моего́ прильпе́ ко́сть моя́ пло́ти мое́й. Уподо́бихся нея́сыти пусты́нней, бы́х я́ко нощны́й вра́н на ны́рищи . Бде́х и бы́х я́ко пти́ца осо́бящаяся на зде́ . Ве́сь де́нь поноша́ху ми́ врази́ мои́, и хваля́щии мя́ мно́ю кленя́хуся. Зане́ пе́пел я́ко хле́б ядя́х, и питие́ мое́ с пла́чем растворя́х. От лица́ гне́ва Твоего́ и я́рости Твоея́: я́ко возне́с низве́ргл мя́ еси́. Дни́е мои́ я́ко се́нь уклони́шася, и а́з я́ко се́но изсхо́х. Ты́ же, Го́споди, во ве́к пребыва́еши, и па́мять Твоя́ в ро́д и ро́д. Ты́ воскре́с уще́дриши Сио́на, я́ко вре́мя уще́дрити eго́, я́ко прии́де вре́мя: я́ко благоволи́ша раби́ Твои́ ка́мение eго́, и пе́рсть eго́ уще́дрят. И убоя́тся язы́цы и́мене Госпо́дня, и вси́ ца́рие зе́мстии сла́вы Твоея́. Я́ко сози́ждет Госпо́дь Сио́на, и яви́тся во сла́ве Свое́й. Призре́ на моли́тву смире́нных, и не уничижи́ моле́ния и́х. Да напи́шется сие́ в ро́д и́н, и лю́дие зижде́мии восхва́лят Го́спода, яко прини́че с высоты́ святы́я Своея́, Госпо́дь с небесе́ на зе́млю призре́, услы́шати воздыха́ние окова́нных, разреши́ти сы́ны умерщвле́нных, возвести́ти в Сио́не и́мя Госпо́дне, и хвалу́ Его́ во Иерусали́ме. Внегда́ собра́тися лю́дем вку́пе, и царе́м, е́же рабо́тати Го́сподеви. Отвеща́ eму́ на пути́ кре́пости eго́: умале́ние дне́й мои́х возвести́ ми́. Не возведи́ мене́ в преполове́ние дне́й мои́х: в ро́де родо́в ле́та Твоя́. В нача́лех Ты́, Го́споди, зе́млю основа́л еси́, и дела́ руку́ Твое́ю су́ть небеса́. Та́ поги́бнут, Ты́ же пребыва́еши: и вся́, я́ко ри́за обетша́ют, и я́ко оде́жду свие́ши я́ и изменя́тся. Ты́ же то́йжде еси́, и ле́та Твоя́ не оскуде́ют. Сы́нове ра́б Твои́х вселя́тся, и се́мя и́х во ве́к испра́вится.

Псало́м 102:

Благослови́, душе́ моя́, Го́спода, и вся́ вну́тренняя моя́ и́мя свято́е Его́. Благослови́, душе́ моя́, Го́спода, и не забыва́й все́х воздая́ний Его́, очища́ющаго вся́ беззако́ния твоя́, исцеля́ющаго вся́ неду́ги твоя́, избавля́ющаго от истле́ния живо́т тво́й, венча́ющаго тя́ ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ все́м оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́. Ще́др и ми́лостив Госпо́дь, долготерпели́в и многоми́лостив. Не до конца́ прогне́вается, ниже́ во ве́к вражду́ет, не по беззако́нием на́шим сотвори́л е́сть на́м, ниже́ по грехо́м на́шым возда́л е́сть на́м. Я́ко по высоте́ небе́сней от земли́, утверди́л е́сть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил е́сть от на́с беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко То́й позна́ созда́ние на́ше, помяну́, я́ко пе́рсть есмы́. Челове́к, я́ко трава́ дни́е eго́, я́ко цве́т се́льный, та́ко оцвете́т, я́ко ду́х про́йде в не́м, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на небеси́ угото́ва Престо́л Сво́й, и Ца́рство Его́ все́ми облада́ет. Благослови́те Го́спода вси́ А́нгели Его́, си́льнии кре́постию, творя́щии сло́во Его́, услы́шати гла́с слове́с Его́. Благослови́те Гос́пода вся́ си́лы Его́, слуги́ Его́, творя́щии во́лю Его́. Благослови́те Го́спода вся́ дела́ Его́, на вся́ком ме́сте влады́чества Его́, благослови́, душе́ моя́, Го́спода.
Чтец:
Сла́ва Отцу́ и Сы́ну и Свято́му Ду́ху.
Хор:
И ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Псало́м 103:

Благослови́, душе́ моя́, Го́спода. Го́споди, Бо́же мо́й, возвели́чился еси́ зело́, во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в ве́к ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ и́м. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ го́р про́йдут во́ды. Напая́ют вся́ зве́ри се́льныя, жду́т она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т гла́с. Напая́яй го́ры от превы́спренних Свои́х, от плода́ де́л Твои́х насы́тится земля́. Прозяба́яй траву́ ското́м, и зла́к на слу́жбу челове́ком, извести́ хле́б от земли́. И вино́ весели́т се́рдце челове́ка, ума́стити лице́ еле́ем, и хле́б се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л е́сть луну́ во времена́, со́лнце позна́ за́пад сво́й. Положи́л еси́ тму́, и бы́сть но́щь, в не́йже про́йдут вси́ зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся́ прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже не́сть числа́, живо́тная ма́лая с вели́кими, та́мо корабли́ препла́вают, зми́й се́й, eго́же созда́л еси́ руга́тися eму́. Вся́ к Тебе́ ча́ют, да́ти пи́щу и́м во бла́го вре́мя. Да́вшу Тебе́ и́м соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши ду́х и́х, и исче́знут, и в пе́рсть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже е́смь, да услади́тся Ему́ бесе́да моя́, а́з же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти и́м. Благослови́, душе́ моя́, Го́спода.
Чтец:
Сла́ва Отцу́ и Сы́ну и Свято́му Ду́ху.
Хор:
И ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Псало́м 104:

Испове́дайтеся Го́сподеви, и призыва́йте и́мя Его́, возвести́те во язы́цех дела́ Его́. Воспо́йте Ему́ и по́йте Ему́, пове́дите вся́ чудеса́ Его́. Хвали́теся о и́мени святе́м Его́, да возвесели́тся се́рдце и́щущих Го́спода. Взыщи́те Го́спода, и утверди́теся, взыщи́те лица́ Его́ вы́ну. Помяни́те чудеса́ Его́, я́же сотвори́, чудеса́ Его́, и судьбы́ у́ст Его́. Се́мя Авраа́мле раби́ Его́, сы́нове Иа́ковли избра́ннии Его́. То́й Госпо́дь Бо́г на́ш, по все́й земли́ судьбы́ Его́. Помяну́ в ве́к заве́т Сво́й, сло́во, е́же запове́да в ты́сящы родо́в, е́же завеща́ Авра́аму, и кля́тву Свою́ Исаа́ку. И поста́ви ю́ Иа́кову в повеле́ние, и Изра́илю в заве́т ве́чен, глаго́ля: тебе́ да́м зе́млю Ханаа́ню, у́же достоя́ния ва́шего, внегда́ бы́ти и́м ма́лым число́м, мале́йшым и прише́льцем в не́й. И преидо́ша от язы́ка в язы́к, и от ца́рствия в лю́ди и́ны. Не оста́ви челове́ка оби́дети и́х, и обличи́ о ни́х цари́. Не прикаса́йтеся пома́занным Мои́м, и во проро́цех Мои́х не лука́внуйте. И призва́ гла́д на зе́млю, вся́ко утверже́ние хле́бное сотры́. Посла́ пред ни́ми челове́ка: в раба́ про́дан бы́сть Ио́сиф. Смири́ша во око́вах но́зе eго́, желе́зо про́йде душа́ eго́, до́ндеже прии́де сло́во Его́, сло́во Госпо́дне разжже́ eго́. Посла́ ца́рь и разреши́ eго́: кня́зь лю́дей, и оста́ви eго́ . Поста́ви eго́ господи́на до́му своему́, и кня́зя всему́ стяжа́нию своему́, наказа́ти кня́зи eго́ я́ко себе́, и ста́рцы eго́ умудри́ти. И вни́де Изра́иль во Еги́пет, и Иа́ков прише́льствова в зе́млю Ха́мову. И возрасти́ лю́ди своя́ зело́, и укрепи́ я́ па́че враго́в и́х. Преврати́ се́рдце и́х возненави́дети лю́ди Его́, ле́сть сотвори́ти в рабе́х Его́. Посла́ Моисе́а раба́ Своего́, Ааро́на, eго́же избра́ Себе́. Положи́ в ни́х словеса́ зна́мений Свои́х, и чуде́с Свои́х в земли́ Ха́мове. Посла́ тму́ и помрачи́, я́ко преогорчи́ша словеса́ Его́. Преложи́ во́ды и́х в кро́вь, и измори́ ры́бы и́х. Воскипе́ земля́ и́х жа́бами в сокро́вищницах царе́й и́х. Рече́, и приидо́ша пе́сия му́хи, и скни́пы во вся́ преде́лы и́х. Положи́ дожди́ и́х гра́ды, о́гнь попаля́ющ в земли́ и́х, и порази́ виногра́ды и́х и смо́квы и́х, и сотры́ вся́кое дре́во преде́л и́х. Рече́, и приидо́ша пру́зи и гу́сеницы, и́мже не бе́ числа́. И снедо́ша вся́ку траву́ в земли́ и́х, и поядо́ша вся́к пло́д земли́ и́х. И порази́ вся́каго пе́рвенца в земли́ и́х, нача́ток вся́каго труда́ и́х, и изведе́ я́ с сребро́м и зла́том, и не бе́ в коле́нах и́х боля́й. Возвесели́ся Еги́пет во исхожде́нии и́х, я́ко нападе́ стр́ах и́х на ня́. Распростре́ о́блак в покро́в и́м и о́гнь, е́же просвети́ти и́м но́щию. Проси́ша и приидо́ша кра́стели, и хле́ба небе́снаго насы́ти я́, разве́рзе ка́мень и потеко́ша во́ды, потеко́ша в безво́дных ре́ки, я́ко помяну́ сло́во свято́е Свое́, е́же ко Авраа́му, рабу́ Своему́. И изведе́ лю́ди Своя́ в ра́дости, и избра́нныя Своя́ в весе́лии. И даде́ и́м страны́ язы́к, и труды́ люде́й насле́доваша, я́ко да сохраня́т оправда́ния Его́ и зако́на Его́ взы́щут.
Чтец:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Три́жды)

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко благ и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.

Седальны по 2-м стихословии :

  
Преподо́бнаго Феодо́сия , Глас 5:
  
Подо́бен: Собезнача́льное Сло́во:
Ра́дуется Це́рковь Христо́ва, я́ко на све́щник свяще́нный взира́ющи,/ и, свети́льника светоно́сна и Боже́ственное сокро́вище,/ ра́ку моще́й твои́х, иму́щи,/ вся созыва́ет в па́мять твою́ сла́вит и Го́спода,/ Его́же моли́ спасти́ся душа́м на́шим.
(Дважды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
  
Предпра́зднства Успе́ния Пресвяты́я Богоро́дицы , Глас 5:
  
Подо́бен: Собезнача́льное Сло́во:
А́нгел мно́жества славосло́вят Тя,/ и челове́ческий род предпра́зднственная воспева́ет Ти,/ я́ко преста́вилася еси́ от земли́ к Ро́ждшемуся из Тебе́, Богоро́дице Чи́стая,/ и мо́лишися приле́жно изба́вится от бед/ ве́рою соверша́ющим Твое́, Де́во, преставле́ние.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

КАНОН(4-6-4):

Песнь 1:

  
Канон Предпра́зднства Успе́ния Пресвяты́я Богоро́дицы , Глас 5(на 4):
Ирмо́с:
Коня́ я вса́дника в мо́ре Че́рмное/ сокруша́яй бра́ни мы́шцею высо́кою/ Христос истрясе́, Изра́иля же спасе́,/ побе́дную песнь пою́ща.
Припев:
Пресвята́я Богоро́дице, спаси́ нас.
Тропа́рь:
Гро́бу, Де́ву прие́мшу, присту́пим, ве́рнии,/ благово́ния боже́ственна прия́ти тща́щеся:/ в сем бо изли́лся Мирополо́жницы дыха́ющее благово́ние, ду́ши благоуха́ющее.
Припев:
Пресвята́я Богоро́дице, спаси́ нас.
Тропа́рь:
Взя́тся Сио́н из горы́, Сио́н одушевле́нный,/ и почи́ во гра́де Гефсима́нии, я́ко одушевле́н,/ Бо́га Безсме́ртнаго прие́мши, в не́дрех нетле́нных почи́ти.
Припев:
Пресвята́я Богоро́дице, спаси́ нас.
Тропа́рь:
Трубы́ возшуме́вше Богоно́сных му́жей,/ воззови́те вельми́ апо́стольская уста́:/ Си́лы, возми́те врата́, приими́те Цари́цу в лу́чшая.
  
Канон Преподо́бнаго Феодо́сия(На 6), Глас 4:
Припев:
Преподо́бне о́тче Феодо́сие, моли́ Бо́га о нас.
Тропарь:
Пренесе́ния твоего́ честну́ю восхваля́ющу ми, о́тче преблаже́нне, па́мять,/ с Небесе́ просвеще́ние пода́ти мне моли́, Феодо́сие,/ и душетле́нных прегреше́ний проще́ние.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
После́довати восхоте́в Го́споду, блаже́нне,/ ко преподо́бному Анто́нию прише́л еси́,/ с ни́мже в пеще́ре затвори́вся ми́ра кроме́,/ Бо́гу неотлуче́н пребы́л еси́.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
Поревнова́в Вели́кому Феодо́сию,/ о́бщаго жити́я нача́льнику, нра́вом и житие́м, преподо́бне,/ того́ после́дуя по́двигом и трудо́м,/ Влады́це Христу́ благоугоди́л еси́.
(Дважды)
  
Канон проро́ка Михе́я(На 4), Глас 8:
Припев:
Святы́й проро́че Бо́жий Михе́е, моли́ Бо́га о нас.
Тропарь:
Я́ко зерца́ло вои́стинну чи́сто Бо́жие и Боже́ственных сый,/ Зижди́телю предстои́ши, блаже́нне,/ Его́же моли́ от бед спасти́ ве́рою пою́щия тя.
Припев:
Святы́й проро́че Бо́жий Михе́е, моли́ Бо́га о нас.
Тропарь:
Ра́зума испо́лнен духо́внаго сый, Михе́е, и прему́дрости от Бога,/ бу́дущих научи́лся еси́, я́ко чист ум, преизря́дне.
Сла́ва Отцу́ и Сы́ну и Свято́му Ду́ху.
Тропарь:
Проро́чество пропове́дая благоче́стно,/ Го́спода рекл еси́ с Небесе́ на земли́ яви́тися, блаже́нне,/ пиша́ е́же к нам Того́ явлени́е.
И ны́не и при́сно и во ве́ки веко́в. Ами́нь.
  
Богоро́дичен:
Избавля́я яви́ся на земли́ пе́рвее плене́нный,/ напосле́док дней пло́ти прия́тием, Богома́ти,/ пре́жде век познава́емый.

Катавасия , Глас 1:

Ирмос:
Преукраше́нная Боже́ственною сла́вою, / свяще́нная и сла́вная, Де́во, па́мять Твоя́ / вся собра́ к весе́лию ве́рныя, / начина́ющей Мариа́ме с ли́ки и тимпа́ны / Твоему́́ пою́щия Единоро́дному: / сла́вно я́ко просла́вися.

Песнь 3:

  
Канон Предпра́зднства Успе́ния Пресвяты́я Богоро́дицы , Глас 5(на 4):
Ирмо́с:
Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х,/ Це́рковь Твою́ утверди́, Еди́не Бла́же и Человеколю́бче.
Припев:
Пресвята́я Богоро́дице, спаси́ нас.
Тропа́рь:
Пе́сни надгро́бныя ны́не возсле́м Чисте́й, Зижди́теля Богороди́тельнице,/ и со Безпло́тными во́инствы одр живоно́сный окружи́м, ра́дующеся,/ я́ко престо́л Боже́ственный Святы́й.
Припев:
Пресвята́я Богоро́дице, спаси́ нас.
Тропа́рь:
Лежа́щу и просте́рту ви́дяще, очи́ смежа́щу,/ живопода́тельный, Боже́ственный и при́сный исто́чник,/ прииди́те, ве́рными сердцы́ сле́зы точа́ще,/ прикосне́мся Сея́ нетле́нному телеси́.
Припев:
Пресвята́я Богоро́дице, спаси́ нас.
Тропа́рь:
Боже́ственное и благоро́дное Бо́жие жили́ще, седа́лище вои́стинну/ и град одушевле́н всех Царя́ вои́стинну,/ пода́ждь всех согреше́ний на́ших па́мятию Твое́ю оставле́ние/ и от бед спаси́.
  
Канон Преподо́бнаго Феодо́сия(На 6), Глас 4:
Припев:
Преподо́бне о́тче Феодо́сие, моли́ Бо́га о нас.
Тропарь:
Свет немерца́ющий возсия́ тебе́, я́ко пра́веднику,/ его́же от ю́ности пра́вым се́рдцем взыска́л еси́, Феодо́сие./ сего́ ра́ди во Све́те непристу́пнем ве́чно весели́шися.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
Собра́ся тогда́ мно́жество и́ночествующих с наста́вником,/ е́же пренести́ мо́щи преподо́бнаго Феодо́сия,/ с ни́ми и мы днесь в па́мять пренесе́ния его́ духо́вно пра́зднуем.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
Многоле́тное поще́ние, я́ко в чужде́м телеси́,/ страда́льчески преше́д, ко Го́споду взы́де,/ насыща́тися пи́щи нетле́нныя со все́ми святы́ми.
(Дважды)
  
Канон проро́ка Михе́я(На 4), Глас 8:
Припев:
Святы́й проро́че Бо́жий Михе́е, моли́ Бо́га о нас.
Тропарь:
Язы́к твой трость Боже́ственнаго Ду́ха бысть,/ и́мже нам бу́дущих яви́л еси́ сбытие́.
Припев:
Святы́й проро́че Бо́жий Михе́е, моли́ Бо́га о нас.
Тропарь:
Ты Преве́чнаго, плоть бы́вша, показа́л еси́ в Вифлее́ме,/ Кня́зя всех, и Спа́са, и Наста́вника.
Сла́ва Отцу́ и Сы́ну и Свято́му Ду́ху.
Тропарь:
Таи́нник изве́стен су́щим па́че ума́ нам был еси́,/ проро́ческими, сла́вне проро́че, просвеще́ньми озаря́емь.
И ны́не и при́сно и во ве́ки веко́в. Ами́нь.
  
Богоро́дичен:
Гора́ явле́ннейша Ты была́ еси́, Пречи́стая,/ на ню́же возше́д, Госпо́дь яви́ся,/ к НЕ́йже ны́не прибега́ем.

Катавасия , Глас 1:

Ирмос:
Соде́тельная и содержи́тельная всех / Бо́жия му́дросте и си́ло, / непрекло́нну, недви́жиму Це́рковь утверди́, Христе́, / Еди́н бо еси́ Свят, / во святы́х почива́яй.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Ты еси́ Бог наш, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Кондак Предпра́зднства Успе́ния Пресвяты́я Богоро́дицы, Глас 4:

  
Подо́бен: Яви́лся еси́ днесь:
Хор:
В сла́вней па́мяти Твое́й/ вселе́нная, невеще́ственным Ду́хом испещре́на,/ у́мно с весе́лием зове́т Тебе́:/ ра́дуйся, Де́во,/ христиа́н похвало.

Икос:

И́же на о́блацех све́тло от всех коне́ц/ собра́вый Своя́ боже́ственныя апо́столы к те́лу Твое́му, Чи́стая,/ показа́ Тя всем, Богоро́дицу,/ и стра́шен черто́г преукра́шен, Бог и Сын Твой быв,/ взем ду́шу Твою́ на ру́ку пречи́стую, положи́л есть в рай:/ та́мо бо живо́тное есть дре́во,/ от него́же я́дше, ме́ртвеннии безсме́ртие обрето́ша Тобо́ю./ Те́мже и вопие́м Тебе́:/ ра́дуйся, Де́во, христиа́н похвало́.

Седальны:

  
Седален Преподо́бнаго Феодо́сия , Глас 4:
  
Подо́бен: Яви́лся еси́ днесь:
Па́мять боя́щихся Бо́га весели́т ве́рных,/ прииди́те у́бо, и мы в па́мять пренесе́ния преподо́бнаго отца́ на́шего Феодо́сия/ воспое́м Бо́га, сего́ просла́вльшаго.
Сла́ва Отцу́ и Сы́ну и Свято́му Ду́ху.
  
Седален проро́ка Михе́я , Глас 1:
  
Подо́бен: Гроб Твой, Спа́се:
Ду́хом, му́дре, просве́щся Святы́м,/ проре́кл еси́ я́ве бу́дущих ра́зум,/ уясни́в неудобопости́жная, о Михе́е пребога́те:/ изы́дет бо от Вифлее́ма Князь и Вождь,/ И́же упасе́т лю́ди Своя́, Христо́с,/ ты проре́кл еси́.
И ны́не и при́сно и во ве́ки веко́в. Ами́нь.
  
Седален Предпра́зднства Успе́ния Пресвяты́я Богоро́дицы , Глас 4:
  
Подо́бен: Ско́ро предвари́:
Богородичен:
Де́вы отрокови́цы, предвоспо́йте,/ ма́тери, похвали́те,/ и вси воспо́йте песнь происхо́дную, успе́ние Де́вы и Ма́тере Госпо́дни/ пе́сньми богокра́сными предсоверша́юще боже́ственне:/ преставля́ется бо сла́вно к Небе́сным.

Песнь 4:

  
Канон Предпра́зднства Успе́ния Пресвяты́я Богоро́дицы , Глас 5(на 4):
Ирмо́с:
Боже́ственное Твое́ разуме́в истоща́ние прозорли́во,/Авваку́м, Христе́, со тре́петом вопия́ше Тебе́:/ во спасе́ние люде́й Твои́х,/ спасти́ пома́занныя Твоя́ прише́л еси́.
Припев:
Пресвята́я Богоро́дице, спаси́ нас.
Тропа́рь:
Небе́снии ли́цы веселя́тся и уготовля́ются Бо́жию Чи́стую Ма́терь прия́ти,/ Цари́цу все́ми тва́рьми благоче́стно госпо́дствующую.
Припев:
Пресвята́я Богоро́дице, спаси́ нас.
Тропа́рь:
Да уклоня́тся возду́шнии ду́си,/ да отсту́пит же са́мый мироде́ржец,/ да па́дает посра́млен, ви́дя возноша́ему Бо́жию Ма́терь.
Припев:
Пресвята́я Богоро́дице, спаси́ нас.
Тропа́рь:
Не ктому́ о́бразно в гада́ниих, свяще́нники ковче́г заве́та носи́м есть:/ святы́ми апо́столы вои́стинну Бо́жия Ма́ти носима есть.
  
Канон Преподо́бнаго Феодо́сия(На 6), Глас 4:
Припев:
Преподо́бне о́тче Феодо́сие, моли́ Бо́га о нас.
Тропарь:
Умертви́в плотско́е мудрова́ние,/ страсте́й мо́ре мяте́жное изсуши́л еси́,/ еди́ною наде́ждею ве́чных благ укрепи́вся,/ я́же ны́не прия́л еси́, преподо́бне, изве́стно.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
Несть ле́по овца́м своего́ лише́нным бы́ти па́стыря,/ ни па́стырю та́кожде своя́ о́вцы оставля́ти,/ твои́ ученицы́, собра́вшеся, глаго́лаху, о́тче Феодо́сие.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
Не добро́ есть пребыва́ти учи́телю на́шему/ вне оби́тели и це́ркве свое́й, ю́же сам осно́вал есть,/ твои́ ученицы́ глаго́лаху, о́тче преподо́бне.
(Дважды)
  
Канон проро́ка Михе́я(На 4), Глас 8:
Припев:
Святы́й проро́че Бо́жий Михе́е, моли́ Бо́га о нас.
Тропарь:
Сия́ньми свы́ше Боже́ственнаго дохнове́ния озаря́емь,/ бу́дущая возвести́л еси́, я́ко настоя́щая зря, достосла́вне.
Припев:
Святы́й проро́че Бо́жий Михе́е, моли́ Бо́га о нас.
Тропарь:
От Сио́на изы́де зако́н, я́коже проре́кл еси́, Богоблаже́нне,/ и протече́ концы́, Госпо́дне сло́во пропове́дуя.
Сла́ва Отцу́ и Сы́ну и Свято́му Ду́ху.
Тропарь:
Госпо́дствовати яви́ся в дому́ Иа́ковли всех Госпо́дь/ и в сла́ве и́мене я́ко Па́стырь упаса́ет, всеблаже́нне, лю́ди Своя́.
И ны́не и при́сно и во ве́ки веко́в. Ами́нь.
  
Богоро́дичен:
Дави́дово отро́дие, Ма́ти Бо́жия и Зижди́теля ве́руема бысть:/ плоть у́бо Сего́, бы́вша от Нея́, несказа́нно породи́.

Катавасия , Глас 1:

Ирмос:
Ре́чи проро́ков и гада́ния / воплоще́ние прояви́ша от Де́вы Твое́, Христе́, / сия́ние блиста́ния Твоего́ во свет язы́ков изы́дет, / и возгласи́т Тебе́ бе́здна с весе́лием: / си́ле Твое́й сла́ва, Человеколю́бче.

Песнь 5:

  
Канон Предпра́зднства Успе́ния Пресвяты́я Богоро́дицы , Глас 5(на 4):
Ирмо́с:
Одея́йся све́том, я́ко ри́зою,/ к Тебе́ у́тренюю и Тебе́ зову́:/ ду́шу мою́ просвети́ омраче́нную, Христе́,/ я́ко Еди́н Благоутро́бен.
Припев:
Пресвята́я Богоро́дице, спаси́ нас.
Тропа́рь:
Чи́стое Ду́ха Пресвята́го боже́ственное селе́ние,/ на Сина́йстей горе́ быв, дохну́,/ и всю тварь па́че естества́ просвети́.
Припев:
Пресвята́я Богоро́дице, спаси́ нас.
Тропа́рь:
Всего́ Боже́ства была́ еси́ жили́ще,/ те́мже Тя Божество́ всю, Ма́ти, до конца́ преста́ви,/ от земли́, Богороди́тельнице, к Небеси́ прехо́дну.
Припев:
Пресвята́я Богоро́дице, спаси́ нас.
Тропа́рь:
Иису́с Пребоже́ственный сла́вы Госпо́дь,/ от Твоего́ чре́ва рожде́йся за милосе́рдие,/ Сам Тя преста́ви от земли́, Богома́ти, с душе́ю и те́лом.
  
Канон Преподо́бнаго Феодо́сия(На 6), Глас 4:
Припев:
Преподо́бне о́тче Феодо́сие, моли́ Бо́га о нас.
Тропарь:
Просвети́ся днесь пресла́вно храм Богома́тере,/ прие́м своего́ служи́теля преподо́бнаго,/ сия́юща светови́дно и лучи́ исцеле́ний испуща́юща всем неоску́дно/ с ве́рою к нему приходя́щим.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
Благо́е совеща́ние ва́ше, о богоблаже́ннии отцы,/ кра́сное совокупле́ние, по́стнический собо́ре,/ я́ко потща́стеся пренести́ ва́шего па́стыря и учи́теля,/ светоза́рнаго свети́льника, бо́драго ума́.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
Ме́сто, иде́же поло́жены́ бы́ша честны́я мо́щи твоя́, преподо́бне, прокопа́вше,/ егда́ обрето́ша, а́бие наслади́шася благоуха́ния Ду́ха Свята́го,/ оби́льным исцеле́нием всех сердца́ веселя́щаго.
(Дважды)
  
Канон проро́ка Михе́я(На 4), Глас 8:
Припев:
Святы́й проро́че Бо́жий Михе́е, моли́ Бо́га о нас.
Тропарь:
Возлюби́л еси́ в след Го́спода ходи́ти,/ гото́в быв в путе́х Его, прему́дре.
Припев:
Святы́й проро́че Бо́жий Михе́е, моли́ Бо́га о нас.
Тропарь:
Разуме́л еси́ хотя́щее бы́ти спасе́ние/ всем язы́ком от иуде́й, чу́дне.
Сла́ва Отцу́ и Сы́ну и Свято́му Ду́ху.
Тропарь:
Благода́ть зря, пропове́дал еси́, Богоявле́нне:/ к не́йже прибега́ют язы́к стада́ и спаса́ются.
И ны́не и при́сно и во ве́ки веко́в. Ами́нь.
  
Богоро́дичен:
Ме́сто Госпо́дне Ты была́, еси́, Богома́ти:/ от нея́же изы́де мир от ле́сти избавля́яй.

Катавасия , Глас 1:

Ирмос:
Бо́жию и неизрече́нную добро́ту / доброде́телей Твои́х, Христе́, испове́м: / от Присносу́щныя бо Сла́вы / Соприсносу́щное и Ипоста́сное возсия́вый Сия́ние, / из де́вственныя утро́бы / су́щим во тьме и се́ни вопло́щся, / возсия́л еси́, Со́лнце.

Песнь 6:

  
Канон Предпра́зднства Успе́ния Пресвяты́я Богоро́дицы , Глас 5(на 4):
Ирмо́с:
Неи́стовствующееся бу́рею душетле́нною,/ Влады́ко Христе́, страсте́й мо́ре укроти́/ и от тли возведи́ мя,/ я́ко Благоутро́бен.
Припев:
Пресвята́я Богоро́дице, спаси́ нас.
Тропа́рь:
Со А́нгелы теце́м,/ со Арха́нгелы же, и Властьми́, и Нача́лы,/ и Престо́лы, и Си́лами в Сио́н, вели́кое чу́до у́зрим.
Припев:
Пресвята́я Богоро́дице, спаси́ нас.
Тропа́рь:
Яже Живота́ Роди́тельница,/ ка́ко подъя́т сме́рть тле́нну, убежа́вши вся́кия тли?/ Но вои́стинну Твоя́ па́че естества́, Чи́стая Де́во, та́инства.
Припев:
Пресвята́я Богоро́дице, спаси́ нас.
Тропа́рь:
Сио́няне ели́цы, свещи́ возжжи́те,/ све́том Обложе́нную, прииди́те, усря́щем в Гефсима́нии/ и Си́ю пе́сньми проводим.
  
Канон Преподо́бнаго Феодо́сия(На 6), Глас 4:
Припев:
Преподо́бне о́тче Феодо́сие, моли́ Бо́га о нас.
Тропарь:
Прииди́те, ве́рнии, пе́сни духо́вныя принося́ще,/ Феодо́сия любо́вию ублажи́м и по до́лгу воспое́м,/ па́мять пренесе́ния его́ све́тло пра́зднующе.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
Воспое́м све́тлаго, изря́днаго в чудесе́х,/ вели́каго в доброде́телех, до́бляго житие́м,/ сла́внаго уго́дника Христо́ва и Пречи́стыя Богоро́дицы, блаже́ннаго Феодо́сия.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
На Небесе́х ны́не ликовству́я со а́нгельскими во́инствы ра́достно,/ о́тче пребога́те Феодо́сие,/ благода́ть и спасе́ние дарова́ти моли́ся любо́вию пою́щим тя.
(Дважды)
  
Канон проро́ка Михе́я(На 4), Глас 8:
Припев:
Святы́й проро́че Бо́жий Михе́е, моли́ Бо́га о нас.
Тропарь:
Зако́ном повину́яся Бо́жиим,/ обличи́л еси́ вся преступа́ющий,/ храня́ зако́н, пресла́вне.
(Дважды)
Сла́ва Отцу́ и Сы́ну и Свято́му Ду́ху.
Тропарь:
Михе́е боже́ственный и честны́й Ду́ха орга́н,/ мольба́ми твои́ми от бед ве́рныя сохрани́.
И ны́не и при́сно и во ве́ки веко́в. Ами́нь.
  
Богоро́дичен:
Иу́дов Ты дом све́тел, Де́во, сотвори́ла еси́,/ Возсия́вшаго от свята́го Твоего́ чре́ва я́вльши.

Катавасия , Глас 1:

Ирмос:
Морски́й пучиноро́дный ки́тов вну́тренний огнь – / тридне́внаго Твоего́ погребе́ния проображе́ние, / его́же Ио́на проро́к показа́ся. / Спасе́н бо, я́ко и предпосла́ся, неврежде́н, вопия́ше: / пожру́ Ти со гла́сом хвале́ния, Го́споди.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Ты бо еси́ Ца́рь ми́ра и Спас душ на́ших, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Кондак Преподо́бнаго Феодо́сия, Глас 8:

  
Подо́бен: Взбра́нной:
Хор:
Насле́дник отце́в был еси́, преподо́бне,/ тех после́дуя жити́ю и уче́нию,/ обы́чаю и воздержа́нию,/ моли́тве же и предстоя́нию./ С ни́миже, име́я дерзнове́ние ко Го́споду,/ проще́ние согреше́ний и спасе́ние испроси́ вопи́ющим ти:/ ра́дуйся, о́тче Феодо́сие.

Икос:

А́нгельски пожи́в на земли́, преподо́бне,/ А́нгелов похвалы́ на Небеси́ сподо́бился еси́:/ ка́ко у́бо воспою́ твое́ пресве́тлое житие́ и премно́гия твоя́ доброде́тели,/ зна́мения же и чудеса́, и́миже вся просвеща́еши, я́ко со́лнце?/ Те́мже вопи́ю тебе́ такова́я:/ ра́дуйся, от младе́нства Христу́ после́довавый;/ ра́дуйся, вся земна́я я́ко уме́ты вмени́вый;/ ра́дуйся, прило́ги страсте́й умертви́вый;/ ра́дуйся, обличи́вый нача́ла тьмы и вла́сти;/ ра́дуйся, Небе́сных взыска́вый па́че земных;/ ра́дуйся, вожделе́вый прему́дрости Бо́жия;/ ра́дуйся, сподо́бивыйся зре́ти Непостижи́маго;/ ра́дуйся, Тро́ицы Пресвяты́я пропове́дниче;/ ра́дуйся, Богоро́дицы служи́телю;/ ра́дуйся, и́ноков сла́во и похвало́;/ ра́дуйся, и́мже изба́вля́емся от вре́да вра́жия;/ ра́дуйся, о не́мже спаса́емся вси./ Ра́дуйся, о́тче Феодо́сие.

Песнь 7:

  
Канон Предпра́зднства Успе́ния Пресвяты́я Богоро́дицы , Глас 5(на 4):
Ирмо́с:
Превозноси́мый отце́в Госпо́дь/ пла́мень угаси́, о́троки ороси́,/ согла́сно пою́щия:/ Бо́же, благосло́вен еси́.
Припев:
Пресвята́я Богоро́дице, спаси́ нас.
Тропа́рь:
Свяще́нничестии собо́ри, люде́й составле́ния,/ отрокови́цы, вся де́вы, лику́юще, воспо́йте Де́вы преставле́ние боже́ственное.
Припев:
Пресвята́я Богоро́дице, спаси́ нас.
Тропа́рь:
Зако́на и благода́ти лу́чшии,/ Богороди́тельницы успе́ние хвали́те, пою́ще, согла́сно воспева́юще:/ Бо́же, благослове́н еси́.
Припев:
Пресвята́я Богоро́дице, спаси́ нас.
Тропа́рь:
В Сио́н Пречи́стая преставля́ется днесь,/ святы́х во свята́я, гора́ свята́я и вели́кая, Е́йже вопие́м:/ ра́дуйся, Пренепоро́чная.
  
Канон Преподо́бнаго Феодо́сия(На 6), Глас 4:
Припев:
Преподо́бне о́тче Феодо́сие, моли́ Бо́га о нас.
Тропарь:
Ми́ра попече́ние отри́нув и сла́ву его́ нивочто́же вмени́в,/ сла́вы бу́дущия взыска́л еси́,/ молча́нием возлюби́в Бо́гу угоди́ти на земли́./ Тем Той тя просла́ви, преподо́бне, на Небесе́х.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
Плотски́я страсти́ от ю́ности возненави́дев и су́етную красоту́ попра́в,/ поще́нием к Бо́гу превозвы́сился еси́,/ и ны́не, со А́нгелы предстоя́ Го́сподеви,/ моли́ о чту́щих па́мять твою́.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
Явля́ешися, преподо́бне, сокруше́нному хулы́ ра́ди Васи́лию,/ возвеща́я ему́, коли́кия сла́вы лиши́ся;/ его́же на свою ра́ку положи́ти повеле́в,/ сего́ в том часе́ исцели́л еси́.
(Дважды)
  
Канон проро́ка Михе́я(На 4), Глас 8:
Припев:
Святы́й проро́че Бо́жий Михе́е, моли́ Бо́га о нас.
Тропарь:
Потре́бен яви́лся еси́ Влады́це всех и до́блейший,/ суровство́ владу́щих облича́я и уча́, и вопия́, достосла́вне:/ оте́ц на́ших Бо́же, благослове́н еси́.
(Дважды)
Сла́ва Отцу́ и Сы́ну и Свято́му Ду́ху.
Тропарь:
Блиста́я луча́ми жити́я боже́ственнаго,/ и чисте́йший проро́к показа́лся еси́ боже́ственнаго явле́ния, воспева́я, блаже́нне:/ оте́ц на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
  
Богоро́дичен:
Равноде́телен Ро́ждшему, равноси́льное Сло́во, Соприсносу́щное,/ во утро́бе Де́вы О́тчим благоволе́нием зи́ждется я́ко Челове́к,/ отце́в Бог благослове́нный.

Катавасия , Глас 1:

Ирмос:
Безсту́дней я́рости же и огню́ / Боже́ственное жела́ние сопротивля́яся, / огнь у́бо ороша́ше, / я́рости же смея́шеся, / Богодохнове́нною слове́с ною преподо́бных тривеща́нною цевни́цею / противовеща́я мусики́йским орга́ном посреди́ пла́мене: / препросла́вленный отце́в и наш Бо́же, благо слове́н еси́.

Песнь 8:

  
Канон Предпра́зднства Успе́ния Пресвяты́я Богоро́дицы , Глас 5(на 4):
Ирмо́с:
Тебе́, Вседе́телю,/ в пещи́ о́троцы, всеми́рный лик спле́тше, поя́ху:/ дела́ вся́кая, Го́спода по́йте/ и превозноси́те во вся ве́ки.
Припев:
Пресвята́я Богоро́дице, спаси́ нас.
Тропа́рь:
Цари́це всех жен, Де́во,/ мольбу́ принеси́ Христу́ о соверша́ющих любо́вию па́мять Твою́ си́ю/ и превознося́щих во вся ве́ки.
Припев:
Пресвята́я Богоро́дице, спаси́ нас.
Тропа́рь:
Я́ко светови́дно, освяще́нное добро́тою Божества́ лице́ Твое́, Пренепоро́чная,/ сла́вою сия́ющее боже́ственнаго де́вства,/ преукраше́ннаго во вся ве́ки.
Припев:
Пресвята́я Богоро́дице, спаси́ нас.
Тропа́рь:
Глаго́лати не могу, изумева́юся, и трепе́щу, и весьма́ соску́товаюся, Твоя́ превели́кая,/ но, любо́вь, Де́во, зря́щи,/ Боже́ственными возмзди́ дарова́нии непреста́нно.
  
Канон Преподо́бнаго Феодо́сия(На 6), Глас 4:
Припев:
Преподо́бне о́тче Феодо́сие, моли́ Бо́га о нас.
Тропарь:
Душе́ю живы́й в Вы́шних,/ в земли́ и́щущим явля́еши честны́я твоя́ мо́щи,/ я́же ви́девше це́лы и нетле́нны и благоуха́ние испуща́ющия,/ возра́довашася ду́хом, глаго́люще:/ Го́спода по́йте, дела́, и превозноси́те его́ во ве́ки.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
Подо́бно есть нам всегда́ очи́ма на́шима ви́де́ти честну́ю ра́ку отца́ на́шего Феодо́сия/ и досто́йное поклоне́ние всегда́ тому́ приноси́ти,/ пренося́щии честны́я мо́щи глаго́лаху, пою́ще:/ Го́спода по́йте, дела́, и превозноси́те его́ во ве́ки.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
Ме́сто, на не́мже сам пре́жде сме́рти свое́й проре́кл еси́ положе́ну тебе́ бы́ти,/ прие́мше ны́не честно́е те́ло твое́,/ исцеле́ние подава́ет приходя́щим с ве́рою.
(Дважды)
  
Канон проро́ка Михе́я(На 4), Глас 8:
Припев:
Святы́й проро́че Бо́жий Михе́е, моли́ Бо́га о нас.
Тропарь:
От нача́ла сый ве́ка, Бо́жие Сло́во яви́ся,/ избавля́я су́щия от Ада́ма, я́коже Михе́й прорече́:/ Го́спода по́йте и превозноси́те Его́ во ве́ки.
Припев:
Святы́й проро́че Бо́жий Михе́е, моли́ Бо́га о нас.
Тропарь:
Мы́сленно науча́емь, вопия́л еси́:/ Воли́тель ми́лости Влады́ка, я́ко Ми́лостив, ка́яся о непра́вдах/ ве́рою пою́щих и превознося́щих его́ во ве́ки.
Благословим Отца и Сына и Святаго Духа, Господа
Тропарь:
Я́коже светла́ мо́лния, яви́лся еси́, Бо́жию зарю́ прие́м,/ и я́ко зерца́ло чи́сто быв, Михе́е,/ Го́спода по́йте, вопия́, и превозноси́те его́ во ве́ки.
И ны́не и при́сно и во ве́ки веко́в. Ами́нь.
  
Богоро́дичен:
Кре́пко утеше́ние, Де́во, е́же от Тебе́ Рожде́ннаго иму́ще,/ де́ржим апо́стольски честно́е испове́дание,/ Го́спода пою́ще и превознося́ще его́ во ве́ки.

Катавасия , Глас 1:

Хор:
Хва́лим, благослови́м, покланя́емся Го́сподеви, пою́ще и превоз-нося́ще во вся ве́ки.
Ирмос:
Пла́мень ороша́ющ преподо́бныя, / злочести́выя же попаля́ющ, / А́нгел Бо́жий всемо́щный показа́ отроко́м, / живонача́льный же исто́чник соде́ла Богоро́дицу, / тлю сме́рти и живо́т точа́щу пою́щим: / Соде́теля еди́наго пои́м, изба́вленнии, / и превозно́сим во вся ве́ки.
Диа́кон:
Богоро́дицу и Ма́терь Све́та в пе́снех возвели́чим.

Песнь Пресвято́й Богоро́дицы:

Хор:
Вели́чит душа́ Моя́ Го́спода,/ и возра́довася дух Мой о Бо́зе Спа́се Мое́м.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Я́ко призре́ на смире́ние рабы́ Своея́,/ се бо от ны́не ублажа́т Мя вси ро́ди.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Я́ко сотвори́ Мне вели́чие Си́льный,/ и свя́то И́мя Его́, и ми́лость Его́ в ро́ды родо́в боя́щимся Его́.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Сотвори́ держа́ву мы́шцею Свое́ю,/ расточи́ го́рдыя мы́слию се́рдца их.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Низложи́ си́льныя со престо́л, и вознесе́ смире́нныя;/ а́лчущия испо́лни благ, и богатя́щияся отпусти́ тщи.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Восприя́т Изра́иля о́трока Своего́, помяну́ти ми́лости,/ я́коже глаго́ла ко отце́м на́шим, Авраа́му и се́мени его́, да́же до ве́ка.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.

Песнь 9:

  
Канон Предпра́зднства Успе́ния Пресвяты́я Богоро́дицы , Глас 5(на 4):
Ирмо́с:
Иса́ие, ликуй,/ Де́ва име́ во чре́ве и роди́ Сы́на Емману́ила,/ Бо́га же и Челове́ка, Восто́к имя Ему́,/ Его́же велича́юще, Де́ву ублажа́ем.
Припев:
Пресвята́я Богоро́дице, спаси́ нас.
Тропа́рь:
Бла́гоже, бла́гоже Ты укра́шена, Неве́сто, Богома́ти Де́во:/ о Тебе́ бо поползнове́ние испра́вися Ада́мово/ и Е́вино побежде́ние всегуби́тельное./ Тем Тя вси пе́сньми непреста́нно велича́ем.
Припев:
Пресвята́я Богоро́дице, спаси́ нас.
Тропа́рь:
Сла́ву по достоя́нию Тебе́ Бог подава́ет, я́ко Влады́ка Твой, Де́во,/ мы же что Тебе́ принесе́м, худи́и?/ Но приими́ то́чию усе́рдие/ и Тя любо́вию чту́щих, я́ко Богоро́дицу, сохраня́й.
Припев:
Пресвята́я Богоро́дице, спаси́ нас.
Тропа́рь:
Я́коже Вы́шний, соше́д, про́йде из боку Твое́ю, Де́во,/ нас посети́л есть, из Тебе́, Богоневе́сто,/ подо́бящися ему́, посети́ от Небе́сных черто́г певцы́ Твоя́ па́мятию Твое́ю.
  
Канон Преподо́бнаго Феодо́сия(На 6), Глас 4:
Припев:
Преподо́бне о́тче Феодо́сие, моли́ Бо́га о нас.
Тропарь:
Победи́тель мироде́ржца, кня́зя тьмы, яви́лся еси́,/ вражде́бныя его́ стре́лы ору́жием кре́стным и ве́рою до конца́ сокруши́в, взыва́я:/ Бог нам прибе́жище и си́ла.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
Ты па́стырь и́стинный Христо́ва стада был еси́,/ о не́мже моли́ти не преста́й всегда́, преподо́бне,/ дарова́ти нам согреше́ний оставле́ние,/ Боже́ственное заступле́ние и ве́чное ра́дование.
(Дважды)
Припев:
Преподо́бне о́тче Феодо́сие, моли́ Бо́га о нас.
Тропарь:
Прозря́ исхожде́ние свое́ от те́ла и бу́дущее тебе́ воздая́ние от Бо́га,/ моли́лся еси́ приле́жно, преподо́бне, о ста́де твое́м/ и сих ско́рбных уте́шил еси́, глаго́ля:/ се обеща́ю вам, бра́тие и отцы́,/ я́ко а́ще и те́лом отхожду́ от вас,/ но ду́хом при́сно бу́ду с ва́ми.
(Дважды)
  
Канон проро́ка Михе́я(На 4), Глас 8:
Припев:
Святы́й проро́че Бо́жий Михе́е, моли́ Бо́га о нас.
Тропарь:
Уму́ нетле́нному и чисте́йшему, луча́ми благоче́стия сия́я,/ о ми́ре моля́ся, при́сно предстои́ши.
Припев:
Святы́й проро́че Бо́жий Михе́е, моли́ Бо́га о нас.
Тропарь:
Наста́ светоно́сная па́мять твоя́, проро́че,/ проро́ческими дарова́нии испо́лнена/ и ре́ки покая́ния источа́ющи.
Сла́ва Отцу́ и Сы́ну и Свято́му Ду́ху.
Тропарь:
Спа́са, ми́рови прише́дша по твое́му прорече́нию,/ обожа́емь па́че ума́,/ весе́лия, блаже́нне, наслажда́ешися.
И ны́не и при́сно и во ве́ки веко́в. Ами́нь.
  
Богоро́дичен:
Я́ко всех превы́шши и чисте́йши,/ скве́рны души́ моея́ очи́сти,/ я́ко Бо́га заче́нши Преблага́го.

Катавасия , Глас 1:

Ирмос:
Побежда́ются естества́ уста́вы / в Тебе́, Де́во Чи́стая, / де́вствует бо рождество́ и живо́т предобруча́ет смерть: / по рождестве́ Де́ва и по сме́рти жива́, / спаса́еши при́сно, Богоро́дице, насле́дие Твое́.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Тя хва́лят вся си́лы небе́сныя, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Светилен Предпра́зднства Успе́ния Пресвяты́я Богоро́дицы

  
Подо́бен: Не́бо звезда́ми:
Хор:
А́нгели и па́стыри поя́ху рождество́ Твое́ пе́рвее,/ и ны́не а́нгельстии чи́ни, и апо́стольский лик, и всяк язы́к, Де́во,/ успе́ние Твое́ пою́т.
Сла́ва Отцу́ и Сы́ну и Свято́му Ду́ху.

Светилен Преподо́бнаго Феодо́сия

  
Подо́бен: Не́бо звезда́ми:
Хор:
Па́мять пренесе́ния честны́х твои́х моще́й днесь пра́зднующе, вопие́м:/ со А́нгелы предстоя́ в дерзнове́нии мно́зе,/ всех нас, о́тче, помина́й ко Влады́це Христу́.
(Дважды)
И ны́не и при́сно и во ве́ки веко́в. Ами́нь.

Ин Светилен Предпра́зднства Успе́ния Пресвяты́я Богоро́дицы

  
Подо́бен: Жены́, услы́шите:
Хор:
Твоего́ честна́го успе́ния па́мять пресве́тлую торжеству́юще,/ любо́вию воспева́ем, Богоро́дице:/ Ты же, я́ко Ма́ти Пречи́стая,/ к Сы́ну отходя́щи в сла́ве Твое́й и Го́споду,/ о христиа́нех моли́, ве́рою Тя воспева́ющих.

Хвали́тны псалмы́, глас 6:

Хор:
Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.
Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.
  
Стихиры Предпра́зднства Успе́ния Пресвяты́я Богоро́дицы, Глас 6
На 6. Стих:
Сотвори́ти в них суд напи́сан./ Сла́ва сия́ бу́дет всем преподо́бным Его́.
Глаго́лом Боже́ственнаго Гаврии́ла после́дующе, / ра́дуйся, Тебе́ зове́м, Чи́стая: / Ты́ у́бо Пресвята́я и Ма́ти Госпо́дня, / к Сему́ преста́вльшися, // помина́й о воспева́ющих Тя́.
Стих:
Хвали́те Бо́га во святы́х Его́,/ хвали́те Его́ во утверже́нии си́лы Его́.
Неизме́рная Прему́дрость Бо́жия / храм Себе́ па́че ума́, Богоро́дице, созда́, / из Тебе́ Ду́хом Святы́м, / и ны́не Тя́ к невеще́ственным селе́нием // преста́ви, Всепе́тая.
На 4. Стих:
Хвали́те Его́ на си́лах Его́,/ хвали́те Его́ по мно́жеству вели́чествия Его́.
Стихира:
Раб, ны́не прихожду́ к Тебе́, Ма́тери всех Бо́га, / от вся́ких изба́витися напа́стей моля́ся, / но, о Богороди́тельнице, / ца́рствующи с Сы́ном Твои́м, // христиа́нский род сохраня́й.
  
Стихиры Преподо́бнаго Феодо́сия, Глас 8
  
Подо́бен: О, пресла́внаго чудесе́:
Стих:
Хвали́те Его́ во гла́се тру́бнем,/ хвали́те Его́ во псалти́ри и гу́слех.
Стихира:
Преподо́бне о́тче Феодо́сие,/ па́стыря тя поста́ви Госпо́дь/ Своему́ ста́ду;/ ты бо, себе́ назда́в/ на основа́нии доброде́телей,/ це́рковь бы́ти Бо́гу, блаже́нне, сподо́бися,/ всегда́ разу́мному Све́ту предстоя́,/ по достоя́нию от Него́ прославля́емь./ Те́мже тя чти́м и ублажа́ем.
На 2. Стих:
Хвали́те Его́ в тимпа́не и ли́це,/ хвали́те Его́ во стру́нах и орга́не.
Стихира:
Преподо́бне о́тче Феодо́сие,/ ты усе́рдно Бо́гу послужи́л еси́,/ и́ночествовав молча́нием/ и воздержа́нием ше́ствуя,/ смире́нием украша́йся/ и все́ми доброде́тельми просвеще́н,/ ве́чных благ получи́л еси́./ Тем и мы, честну́ю твою́ обстоя́ще ра́ку,/ тя прославля́ем.
Стих:
Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.
Стихира:
Преподо́бне о́тче Феодо́сие,/ а́ще и те́лом отлучи́лся еси́ от нас,/ но ду́хом с на́ми всегда́ пребыва́еши;/ се бо, и по сме́рти явля́яся, нас посеща́еши,/ от напа́стей изба́вля́я/ и печа́льныя утеша́я,/ поги́бшая явля́я/ и больны́я исцеля́я предста́тельством твои́м./ Те́мже тя вси́ ве́рою ублажа́ем.
Сла́ва Отцу́ и Сы́ну и Свято́му Ду́ху
  
Глас 6:
Стихира:
Днесь архиере́е, с чи́ны свяще́нных прише́дше,/ и мно́жество и́ночествующих, и благове́рных наро́ди/ прия́ша от пеще́ры пречестны́я твоя́ мо́щи, о́тче Феодо́сие,/ со свеща́ми и фимиа́мом, че́стно провожда́юще,/ в богозда́нную це́рковь прине́сше,/ положи́ша свяще́нно./ Его́же мы ле́тное воспомина́ние пра́зднуем/ и, велегла́сно пою́ще, взыва́ем ти:/ я́ко Престо́лу Христо́ву предстоя́, преподо́бне,/ не преста́й моля́ся изба́витися всем от вся́каго вреда́ вра́жия/ и спасти́ся душа́м на́шим.
И ны́не и при́сно и во ве́ки веко́в. Ами́нь.
  
Глас 3:
Богородичен:
Прииди́те, вси концы́ земни́и, / честно́е преставле́ние Богома́тере восхва́лим: / в ру́це бо Сы́на ду́шу непоро́чную положи́. / Те́мже святы́м успе́нием Ея́ мір оживотвори́вся, / во псалме́х, и пе́ниих, и пе́снех духо́вных // со Безпло́тными и апо́столы пра́зднует све́тло.

Славосло́вие вели́кое:

Хор:
Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.
На всяк день благословлю́ Тя, и восхвалю́ И́мя Твое́ во ве́ки, и в век ве́ка.
Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.
Бу́ди, Го́споди, ми́лость Твоя́ на нас, я́коже упова́хом на Тя.
Благослове́н еси́, Го́споди, научи́ мя оправда́нием Твои́м.
(Трижды)
Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Трисвятое:

Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Святы́й Безсме́ртный, поми́луй нас.
Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропари:

  
Тропарь Преподо́бнаго Феодо́сия, Глас 8:
Правосла́вия наста́вниче,/ благоче́стия учи́телю и чистоты́,/ вселе́нный свети́льниче,/ архиере́ев богодухнове́нное удобре́ние,/ Феодо́сие прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
  
Тропарь Предпра́зднства Успе́ния Пресвяты́я Богоро́дицы, Глас 4:
Лю́дие, предыгра́йте,/ рука́ми пле́щуще ве́рно,/ и любо́вию собери́теся,/ днесь ра́дующеся/ и све́тло восклица́юще вси весе́лием:/ Бо́жия бо Ма́ти и́мать от земны́х к Вы́шним прейти́ сла́вно,/ Ю́же пе́сньми при́сно я́ко Богоро́дицу сла́вим.

Ектения́ сугу́бая:

Диа́кон:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Трижды, на каждое прошение)
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем Высокопреосвяще́ннейшем митрополите (или: архиепи́скопе, или: преосвяще́ннейшем епи́скопе имярек), и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.
Еще́ мо́лимся о ми́лости, жи́зни, мире, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих настоя́теля, бра́тии и прихо́жан свята́го хра́ма сего́.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Иере́й:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Ектения́ проси́тельная:

Диа́кон:
Испо́лним у́тренюю моли́тву на́шу Го́сподеви.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Дне́ всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение.)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Бог ми́лости и ще́дрот и человеколю́бия еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.
Иере́й:
Мир всем.
Хор:
И ду́хови твоему́.
Диа́кон:
Главы́ на́ша Го́сподеви прикло́ним.
Хор:
Тебе́, Господи.
Иере́й:
Твое́ бо е́сть, е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.
Диа́кон:
Прему́дрость.
Хор:
Благослови́.
Иере́й:
Сый благослове́н Христо́с Бог наш, всегда́, ны́не и при́сно и во ве́ки веко́в.
Хор:
Ами́нь. Утверди́, Бо́же, святу́ю правосла́вную ве́ру, правосла́вных христиа́н во век ве́ка.
Иере́й:
Пресвята́я Богоро́дице, спаси́ нас.
Хор:
Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Иере́й:
Сла́ва Тебе́, Христе́ Бо́же, Упова́ние на́ше, сла́ва Тебе́.
Хор:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Го́споди, поми́луй.
(Трижды)
Благослови́.

Отпу́ст:

Иере́й:
Христо́с, И́стинный Бог наш, моли́твами Пречи́стыя Своея́ Ма́тере…

Многоле́тие:

ЧИТА́ЕТСЯ ПЕ́РВЫЙ ЧАС:

Чтец:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 5:

Глаго́лы моя́ внуши́, Го́споди, разуме́й зва́ние мое́. Вонми́ гла́су моле́ния моего́, Царю́ мой и Бо́же мой, я́ко к Тебе́ помолю́ся, Го́споди. Зау́тра услы́ши глас мой, зау́тра предста́ну Ти, и у́зриши мя. Я́ко Бог не хотя́й беззако́ния, Ты еси́: не присели́тся к Тебе́ лука́внуяй, ниже́ пребу́дут беззако́нницы пред очи́ма Твои́ма: возненави́дел еси́ вся де́лающия беззако́ние. Погуби́ши вся глаго́лющия лжу: му́жа крове́й и льсти́ва гнуша́ется Госпо́дь. Аз же мно́жеством ми́лости Твоея́, вни́ду в дом Твой, поклоню́ся ко хра́му свято́му Твоему́, в стра́се Твое́м. Го́споди, наста́ви мя пра́вдою Твое́ю, враг мои́х ра́ди испра́ви пред Тобо́ю путь мой. Я́ко несть во усте́х их и́стины, се́рдце их су́етно, гроб отве́рст горта́нь их: язы́ки свои́ми льща́ху. Суди́ им, Бо́же, да отпаду́т от мы́слей свои́х, по мно́жеству нече́стия их изри́ни я́, я́ко преогорчи́ша Тя, Го́споди. И да возвеселя́тся вси упова́ющии на Тя, во век возра́дуются, и всели́шися в них, и похва́лятся о Тебе́ лю́бящии и́мя Твое́. Я́ко Ты благослови́ши пра́ведника, Го́споди: я́ко ору́жием благоволе́ния венча́л еси́ нас.

Псало́м 89:

Го́споди, прибе́жище был еси́ нам в род и род. Пре́жде да́же гора́м не бы́ти и созда́тися земли́ и вселе́нней, и от ве́ка и до ве́ка Ты еси́. Не отврати́ челове́ка во смире́ние, и рекл еси́: обрати́теся, сы́нове челове́честии. Я́ко ты́сяща лет пред очи́ма Твои́ма, Го́споди, я́ко день вчера́шний, и́же мимои́де, и стра́жа нощна́я. Уничиже́ния их ле́та бу́дут. Утро я́ко трава́ мимои́дет, у́тро процвете́т и пре́йдет: на ве́чер отпаде́т ожесте́ет и и́зсхнет. Я́ко исче́зохом гне́вом Твои́м, и я́ростию Твое́ю смути́хомся. Положи́л еси́ беззако́ния на́ша пред Тобо́ю: век наш в просвеще́ние лица́ Твоего́. Я́ко вси дни́е на́ши оскуде́ша, и гне́вом Твои́м исчезо́хом, ле́та на́ша я́ко паучи́на поуча́хуся. Дни́е лет на́ших, в ни́хже се́дмьдесят лет, а́ще же в си́лах, о́смьдесят лет, и мно́жае их труд и боле́знь: я́ко прии́де кро́тость на ны, и нака́жемся. Кто весть держа́ву гне́ва Твоего́, и от стра́ха Твоего́, я́рость Твою́ исчести́? Десни́цу Твою́ та́ко скажи́ ми, и окова́нныя се́рдцем в му́дрости. Обрати́ся, Го́споди, доко́ле? И умоле́н бу́ди на рабы́ Твоя́. Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны их. И бу́ди све́тлость Го́спода Бо́га на́шего на нас, и дела́ рук на́ших испра́ви на нас, и де́ло рук на́ших испра́ви.

Псало́м 100:

Ми́лость и суд воспою́ Тебе́, Го́споди. Пою́ и разуме́ю в пути́ непоро́чне, когда́ прии́деши ко мне? Прехожда́х в незло́бии се́рдца моего́ посреде́ до́му моего́. Не предлага́х пред очи́ма мои́ма вещь законопресту́пную: творя́щия преступле́ние возненави́дех. Не прильпе́ мне се́рдце стропти́во, уклоня́ющагося от мене́ лука́ваго не позна́х. Оклевета́ющаго тай и́скренняго своего́, сего́ изгоня́х: го́рдым о́ком, и несы́тым се́рдцем, с сим не ядя́х. О́чи мои́ на ве́рныя земли́, посажда́ти я́ со мно́ю: ходя́й по пути́ непоро́чну, сей ми служа́ше. Не живя́ше посреде́ до́му моего́ творя́й горды́ню, глаго́ляй непра́ведная, не исправля́ше пред очи́ма мои́ма. Во у́трия избива́х вся гре́шныя земли́, е́же потреби́ти от гра́да Госпо́дня вся де́лающия беззако́ние.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Три́жды)
Го́споди, поми́луй.
(Три́жды)
  
Тропарь Предпра́зднства Успе́ния Пресвяты́я Богоро́дицы, Глас 4:
Лю́дие, предыгра́йте,/ рука́ми пле́щуще ве́рно,/ и любо́вию собери́теся,/ днесь ра́дующеся/ и све́тло восклица́юще вси весе́лием:/ Бо́жия бо Ма́ти и́мать от земны́х к Вы́шним прейти́ сла́вно,/ Ю́же пе́сньми при́сно я́ко Богоро́дицу сла́вим.
Сла́ва Отцу́ и Сы́ну и Свято́му Ду́ху.
  
Тропарь Преподо́бнаго Феодо́сия, Глас 8:
Правосла́вия наста́вниче,/ благоче́стия учи́телю и чистоты́,/ вселе́нный свети́льниче,/ архиере́ев богодухнове́нное удобре́ние,/ Феодо́сие прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.
Чтец:
И ны́не и при́сно и во ве́ки веко́в. Ами́нь.
Что Тя нарече́м, о Благода́тная? Не́бо, я́ко возсия́ла еси́ Со́лнце Пра́вды. Рай, я́ко прозябла́ еси́ цвет нетле́ния Де́ву, я́ко пребыла́ еси́ нетле́нна. Чи́стую Ма́терь, я́ко име́ла еси́ на святы́х Твои́х объя́тиях Сы́на, всех Бо́га. Того́ моли́ спасти́ся душа́м на́шим.
Стопы́ моя́ напра́ви по словеси́ Твоему́ и да не облада́ет мно́ю вся́кое беззако́ние. Изба́ви мя от клеветы́ челове́ческия, и сохраню́ за́поведи Твоя́. Лице́ Твое́ просвети́ на раба́ Твоего́ и нау́чи мя оправда́нием Твои́м.
Да испо́лнятся уста́ моя́ хвале́ния Твоего́, Го́споди, я́ко да воспою́ сла́ву Твою́, весь день великоле́пие Твое́.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Кондак Предпра́зднства Успе́ния Пресвяты́я Богоро́дицы, Глас 4:

  
Подо́бен: Яви́лся еси́ днесь:
Хор:
В сла́вней па́мяти Твое́й/ вселе́нная, невеще́ственным Ду́хом испещре́на,/ у́мно с весе́лием зове́т Тебе́:/ ра́дуйся, Де́во,/ христиа́н похвало.
Ко а́ду, Спа́се мой, соше́л еси́,/ и врата́ сокруши́вый я́ко всеси́лен,/ уме́рших, я́ко Созда́тель, совоскреси́л еси́,/ и сме́рти жа́ло сокруши́л еси́,/ и Ада́м от кля́твы изба́влен бысть, Человеколю́бче;/ те́мже вси зове́м:// спаси́ нас, Го́споди.
Го́споди, поми́луй.
(40 раз)
И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.
Го́споди поми́луй.
(Три́жды.)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
И́менем Госпо́дним благослови́, о́тче.
Иере́й:
Бо́же, уще́дри ны и благослови́ ны, просвети́ лице́ Твое́ на ны и поми́луй ны.
Чтец:
Ами́нь.
Иере́й:
Христе́, Све́те И́стинный, просвеща́яй и освяща́яй вся́каго челове́ка, гряду́щаго в мир, да зна́менается на нас свет лица́ Твоего́, да в нем у́зрим Свет Непристу́пный: и испра́ви стопы́ на́ша к де́ланию за́поведей Твои́х, моли́твами Пречи́стыя Твоея́ Ма́тере, и всех Твои́х святы́х, ами́нь.

Кондак Предпра́зднства Успе́ния Пресвяты́я Богоро́дицы, Глас 4:

  
Подо́бен: Яви́лся еси́ днесь:
Хор:
В сла́вней па́мяти Твое́й/ вселе́нная, невеще́ственным Ду́хом испещре́на,/ у́мно с весе́лием зове́т Тебе́:/ ра́дуйся, Де́во,/ христиа́н похвало.
Иере́й:
Сла́ва Тебе́, Христе́ Бо́же, упова́ние на́ше, сла́ва Тебе́.
Хор:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Го́споди, поми́луй.
(Три́жды)
Благослови́.

Отпу́ст.

Иере́й:
Христо́с, и́стинный Бог наш, моли́твами пречи́стыя Своея́ Ма́тере, преподо́бных и Богоно́сных оте́ц на́ших и всех святы́х, поми́лует и спасе́т нас, я́ко Благ и Человеколю́бец.
Хор:
Го́споди, поми́луй.
(Три́жды)

Тре́тий час:

Иере́й:
Благослове́н Бог наш всегда́, ны́не и при́сно, и во ве́ки веко́в.
Чтец:
Ами́нь. Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.
Чтец:
Ами́нь.
Го́споди, поми́луй.
(12 раз)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 16:

Услы́ши, Го́споди, пра́вду мою́, вонми́ моле́нию моему́, внуши́ моли́тву мою́ не во устна́х льсти́вых. От лица́ Твоего́ судьба́ моя́ изы́дет, óчи мои́ да ви́дита правоты́. Искуси́л eси́ се́рдце мое́, посети́л eси́ но́щию, искуси́л мя eси́, и не обре́теся во мне непра́вда. Я́ко да не возглаго́лют уста́ моя́ дел челове́ческих, за словеса́ усте́н Твои́х аз сохрани́х пути́ же́стоки. Соверши́ стопы́ моя́ во стезя́х Твои́х, да не подви́жутся стопы́ моя́. Аз воззва́х, я́ко услы́шал мя eси́, Бо́же, приклони́ у́хо Твое́ мне и услы́ши глаго́лы моя́. Удиви́ ми́лости Твоя́, спаса́яй упова́ющия на Тя от проти́вящихся десни́це Твое́й. Сохрани́ мя, Го́споди, я́ко зе́ницу óка, в кро́ве крилу́ Твоéю покры́еши мя. От лица́ нечести́вых остра́стших мя, врази́ мои́ ду́шу мою́ одержа́ша. Тук свой затвори́ша, уста́ их глаго́лаша горды́ню. Изгоня́щии мя ны́не обыдо́ша мя, óчи свои́ возложи́ша уклони́ти на зе́млю. Объя́ша мя я́ко лев гото́в на лов и я́ко ски́мен обита́яй в та́йных. Воскресни́, Го́споди, предвари́ я́ и запни́ им, изба́ви ду́шу мою́ от нечести́ваго, oру́жие Твое́ от враг руки́ Твоея́. Го́споди, от ма́лых от земли́, раздели́ я́ в животе́ их, и сокрове́нных Твои́х испо́лнися чре́во их, насы́тишася сыно́в, и оста́виша оста́нки младе́нцeм свои́м. Аз же пра́вдою явлю́ся лицу́ Твоему́, насы́щуся, внегда́ яви́ти ми ся сла́ве Твое́й.

Псало́м 24:

К Тебе́, Го́споди, воздвиго́х ду́шу мою́, Бо́же мой, на Тя упова́х, да не постыжу́ся во век, ниже́ да посмею́т ми ся врази́ мои́, и́бо вси терпя́щии Тя не постыдя́тся. Да постыдя́тся беззако́ннующии вотще́. Пути́ Твоя́, Го́споди, скажи́ ми, и стезя́м Твои́м научи́ мя. Наста́ви мя на и́стину Твою́, и научи́ мя, я́ко Ты еси́ Бог Спас мой, и Тебе́ терпе́х весь день. Помяни́ щедро́ты Твоя́, Го́споди, и ми́лости Твоя́, я́ко от ве́ка суть. Грех ю́ности моея́, и неве́дения моего́ не помяни́, по ми́лости Твое́й помяни́ мя Ты, ра́ди бла́гости Твоея́, Го́споди. Благ и прав Госпо́дь, сего́ ра́ди законоположи́т согреша́ющим на пути́. Наста́вит кро́ткия на суд, научи́т кро́ткия путе́м Свои́м. Вси путие́ Госпо́дни ми́лость и и́стина, взыска́ющим заве́та Его́, и свиде́ния Его́. Ра́ди и́мене Твоего́, Го́споди, и очи́сти грех мой, мног бо есть. Кто есть челове́к боя́йся Го́спода? Законоположи́т eму́ на пути́, eго́же изво́ли. Душа́ eго́ во благи́х водвори́тся, и се́мя eго́ насле́дит зе́млю. Держа́ва Госпо́дь боя́щихся Его́, и заве́т Его́ яви́т им. О́чи мои́ вы́ну ко Го́споду, я́ко Той исто́ргнет от се́ти но́зе мои́. При́зри на мя и поми́луй мя, я́ко единоро́д и нищ есмь аз. Ско́рби се́рдца моего́ умно́жишася, от нужд мои́х изведи́ мя. Виждь смире́ние мое́, и труд мой, и оста́ви вся грехи́ моя́. Виждь враги́ моя́, я́ко умно́жишася, и ненавиде́нием непра́ведным возненави́деша мя. Сохрани́ ду́шу мою́, и изба́ви мя, да не постыжу́ся, я́ко упова́х на Тя. Незло́бивии и пра́вии прилепля́хуся мне, я́ко потерпе́х Тя, Го́споди. Изба́ви, Бо́же, Изра́иля от всех скорбе́й eго́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Три́жды)
Го́споди, поми́луй.
(Три́жды)
  
Тропарь Предпра́зднства Успе́ния Пресвяты́я Богоро́дицы, Глас 4:
Лю́дие, предыгра́йте,/ рука́ми пле́щуще ве́рно,/ и любо́вию собери́теся,/ днесь ра́дующеся/ и све́тло восклица́юще вси весе́лием:/ Бо́жия бо Ма́ти и́мать от земны́х к Вы́шним прейти́ сла́вно,/ Ю́же пе́сньми при́сно я́ко Богоро́дицу сла́вим.
Сла́ва Отцу́ и Сы́ну и Свято́му Ду́ху.
  
Тропарь Преподо́бнаго Феодо́сия, Глас 8:
Правосла́вия наста́вниче,/ благоче́стия учи́телю и чистоты́,/ вселе́нный свети́льниче,/ архиере́ев богодухнове́нное удобре́ние,/ Феодо́сие прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.
И ны́не и при́сно и во ве́ки веко́в. Ами́нь.
Богоро́дице, Ты еси́ лоза́ и́стинная, возрасти́вшая нам Плод живота́, Тебе́ мо́лимся: моли́ся, Влады́чице, со святы́ми апо́столы поми́ловати ду́ши на́ша.
Госпо́дь Бог благослове́н, благослове́н Госпо́дь день дне,/ поспеши́т нам Бог спасе́ний на́ших, Бог наш, Бог спаса́ти.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Кондак Преподо́бнаго Феодо́сия, Глас 8:

  
Подо́бен: Взбра́нной:
Хор:
Насле́дник отце́в был еси́, преподо́бне,/ тех после́дуя жити́ю и уче́нию,/ обы́чаю и воздержа́нию,/ моли́тве же и предстоя́нию./ С ни́миже, име́я дерзнове́ние ко Го́споду,/ проще́ние согреше́ний и спасе́ние испроси́ вопи́ющим ти:/ ра́дуйся, о́тче Феодо́сие.
Го́споди, поми́луй.
(40 раз)
И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.
Го́споди поми́луй.
(Три́жды.)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
И́менем Госпо́дним благослови́, о́тче.
Иере́й:
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас.
Чтец:
Ами́нь. Влады́ко Бо́же О́тче Вседержи́телю, Го́споди Сы́не Единоро́дный Иису́се Христе́, и Святы́й Ду́ше, Еди́но Боже́ство, Еди́на Си́ла, поми́луй мя, гре́шнаго, и и́миже ве́си судьба́ми, спаси́ мя, недосто́йнаго раба́ Твоего́, я́ко благослове́н еси́ во ве́ки веко́в, ами́нь.

Шесто́й час:

Чтец:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 53:

Бо́же, во и́мя Твое́ спаси́ мя, и в си́ле Твое́й суди́ ми. Бо́же, услы́ши моли́тву мою́, внуши́ глаго́лы уст мои́х. Я́ко чу́ждии воста́ша на мя и кре́пции взыска́ша ду́шу мою́, и не предложи́ша Бо́га пред собо́ю. Се бо Бог помога́ет ми, и Госпо́дь Засту́пник души́ мое́й. Отврати́т зла́я враго́м мои́м, и́стиною Твое́ю потреби́ их. Во́лею пожру́ Тебе́, испове́мся и́мени Твоему́, Го́споди, я́ко бла́го, я́ко от вся́кия печа́ли изба́вил мя еси́, и на враги́ моя́ воззре́ о́ко мое́.

Псало́м 54:

Внуши́, Бо́же, моли́тву мою́ и не пре́зри моле́ния моего́. Вонми́ ми и услы́ши мя: возскорбе́х печа́лию мое́ю и смято́хся. От гла́са вра́жия и от стуже́ния гре́шнича, я́ко уклони́ша на мя беззако́ние и во гне́ве враждова́ху ми. Се́рдце мое́ смяте́ся во мне и боя́знь сме́рти нападе́ на мя. Страх и тре́пет прии́де на мя и покры́ мя тьма. И рех: кто даст ми криле́, я́ко голубине́, и полещу́, и почи́ю? Се удали́хся бе́гая и водвори́хся в пусты́ни. Ча́ях Бо́га, спаса́ющаго мя от малоду́шия и от бу́ри. Потопи́, Го́споди, и раздели́ язы́ки их: я́ко ви́дех беззако́ние и пререка́ние во гра́де. Днем и но́щию обы́дет и́ по стена́м eго́. Беззако́ние и труд посреде́ eго́ и непра́вда. И не оскуде́ от стогн eго́ ли́хва и лесть. Я́ко а́ще бы враг поноси́л ми, претерпе́л бых у́бо, и а́ще бы ненави́дяй мя на мя велере́чевал, укры́л бых ся от него́. Ты же, челове́че равноду́шне, влады́ко мой и зна́емый мой, и́же ку́пно наслажда́лся еси́ со мно́ю бра́шен, в дому́ Бо́жии ходи́хом единомышле́нием. Да прии́дет же смерть на ня, и да сни́дут во ад жи́ви, я́ко лука́вство в жили́щах их, посреде́ их. Аз к Бо́гу воззва́х, и Госпо́дь услы́ша мя. Ве́чер и зау́тра, и полу́дне пове́м, и возвещу́, и услы́шит глас мой. Изба́вит ми́ром ду́шу мою́ от приближа́ющихся мне, я́ко во мно́зе бя́ху со мно́ю. Услы́шит Бог и смири́т я́, Сый пре́жде век. Несть бо им измене́ния, я́ко не убоя́шася Бо́га. Простре́ ру́ку свою́ на воздая́ние, оскверни́ша заве́т Его́. Раздели́шася от гне́ва лица́ Его́, и прибли́жишася сердца́ их, умя́кнуша словеса́ их па́че еле́а, и та суть стре́лы. Возве́рзи на Го́спода печа́ль твою́, и Той тя препита́ет, не даст в век молвы́ пра́веднику. Ты же, Бо́же, низведе́ши их во студене́ц истле́ния, му́жие крове́й и льсти не преполовя́т дней свои́х. Аз же, Го́споди, упова́ю на Тя.

Псало́м 90:

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: Засту́пник мой еси́ и Прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи и от словесе́ мяте́жна, плещма́ Свои́ма осени́т тя, и под криле́ Его́ наде́ешися: ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тме преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тма одесну́ю тебе́, к тебе́ же не прибли́жится, оба́че очи́ма твои́ма смо́триши, и воздая́ние гре́шников у́зриши. Я́ко Ты, Го́споди, упова́ние мое́, Вы́шняго положи́л еси́ прибе́жище твое́. Не прии́дет к тебе́ зло и ра́на не прибли́жится телеси́ твоему́, я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́, на а́спида и васили́ска насту́пиши, и попере́ши льва и зми́я. Я́ко на Мя упова́ и изба́влю и́, покры́ю и́, я́ко позна́ и́мя Мое́. Воззове́т ко Мне и услы́шу eго́, с ним есмь в ско́рби, изму́ eго́ и просла́влю eго́, долгото́ю дний испо́лню eго́ и явлю́ eму́ спасе́ние Мое́.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Три́жды)
Го́споди, поми́луй.
(Три́жды)
  
Тропарь Предпра́зднства Успе́ния Пресвяты́я Богоро́дицы, Глас 4:
Лю́дие, предыгра́йте,/ рука́ми пле́щуще ве́рно,/ и любо́вию собери́теся,/ днесь ра́дующеся/ и све́тло восклица́юще вси весе́лием:/ Бо́жия бо Ма́ти и́мать от земны́х к Вы́шним прейти́ сла́вно,/ Ю́же пе́сньми при́сно я́ко Богоро́дицу сла́вим.
Сла́ва Отцу́ и Сы́ну и Свято́му Ду́ху.
  
Тропарь Преподо́бнаго Феодо́сия, Глас 8:
Правосла́вия наста́вниче,/ благоче́стия учи́телю и чистоты́,/ вселе́нный свети́льниче,/ архиере́ев богодухнове́нное удобре́ние,/ Феодо́сие прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.
И ны́не и при́сно и во ве́ки веко́в. Ами́нь.
Я́ко не и́мамы дерзнове́ния за премно́гия грехи́ на́ша, Ты и́же от Тебе́ Ро́ждшагося моли́, Богоро́дице Де́во, мно́го бо мо́жет моле́ние Ма́тернее ко благосе́рдию Влады́ки. Не пре́зри гре́шных мольбы́, Всечи́стая, я́ко ми́лостив есть и спасти́ моги́й, И́же и страда́ти о нас изво́ливый.
Ско́ро да предваря́т ны щедро́ты Твоя́, Го́споди, я́ко обнища́хом зело́; помози́ нам, Бо́же, Спа́се наш, сла́вы ра́ди И́мене Твоего́, Го́споди, изба́ви нас и очи́сти грехи́ на́ша, И́мене ра́ди Твоего́.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Кондак Предпра́зднства Успе́ния Пресвяты́я Богоро́дицы, Глас 4:

  
Подо́бен: Яви́лся еси́ днесь:
Хор:
В сла́вней па́мяти Твое́й/ вселе́нная, невеще́ственным Ду́хом испещре́на,/ у́мно с весе́лием зове́т Тебе́:/ ра́дуйся, Де́во,/ христиа́н похвало.
Го́споди, поми́луй.
(40 раз)
И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.
Го́споди поми́луй.
(Три́жды.)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
И́менем Госпо́дним благослови́, о́тче.
Иере́й:
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас.
Чтец:
Ами́нь. Бо́же и Го́споди сил и всея́ тва́ри Соде́телю, И́же за милосе́рдие безприкла́дныя ми́лости Твоея́ Единоро́днаго Сы́на Твоего́, Го́спода на́шего Иису́са Христа́, низпосла́вый на спасе́ние ро́да на́шего, и честны́м Его́ Кресто́м рукописа́ние грех на́ших растерза́вый, и победи́вый тем нача́ла и вла́сти тьмы. Сам, Влады́ко Человеколю́бче, приими́ и нас, гре́шных, благода́рственныя сия́ и моле́бныя моли́твы и изба́ви нас от вся́каго всегуби́тельнаго и мра́чнаго прегреше́ния и всех озло́бити нас и́щущих ви́димых и неви́димых враг. Пригвозди́ стра́ху Твоему́ пло́ти на́ша и не уклони́ серде́ц на́ших в словеса́ или́ помышле́ния лука́вствия, но любо́вию Твое́ю уязви́ ду́ши на́ша, да, к Тебе́ всегда́ взира́юще и е́же от Тебе́ све́том наставля́еми, Тебе́, непристу́пнаго и присносу́щнаго зря́ще Све́та, непреста́нное Тебе́ испове́дание и благодаре́ние возсыла́ем, Безнача́льному Отцу́ со Единоро́дным Твои́м Сы́ном и Всесвяты́м, и Благи́м, и Животворя́щим Твои́м Ду́хом ны́не, и при́сно, и во ве́ки веко́в, ами́нь.

Боже́ственная литурги́я:

Диа́кон:
Благослови́, влады́ко.
Иере́й:
Благослове́но Ца́рство Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Аминь.

Вели́кая ектения́:

Диа́кон:
Ми́ром Го́споду помо́лимся.
Хор:
Го́споди, поми́луй.
(На каждое прошение)
Диа́кон:
О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих во_нь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем, Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имярек), честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Пе́рвый антифо́н, псало́м 102:

Хор:
Благослови́, душе́ моя́, Го́спода,/ благослове́н еси́ Го́споди./
Благослови́, душе́ моя́, Го́спода,/ и вся вну́тренняя моя́/ и́мя свя́тое Его́./ Благослови́, душе́ моя́, Го́спода,/ и не забыва́й всех воздая́ний Его́,/ очища́ющаго вся беззако́ния твоя́,/ исцеля́ющаго вся неду́ги твоя́,/ избавля́ющаго от истле́ния живо́т твой,/ венча́ющаго тя ми́лостию и щедро́тами,/ исполня́ющаго во благи́х жела́ние твое́:/ обнови́тся я́ко о́рля ю́ность твоя́./ Творя́й ми́лостыни Госпо́дь,/ и судьбу́ всем оби́димым./ Сказа́ пути́ Своя́ Моисе́ови,/ сыново́м Изра́илевым хоте́ния Своя́:/ Щедр и Ми́лостив Госпо́дь,/ Долготерпели́в и Многоми́лостив./ Не до конца́ прогне́вается,/ ниже́ в век вражду́ет,/ не по беззако́нием на́шим сотвори́л есть нам,/ ниже́ по грехо́м на́шим возда́л есть нам./ Я́ко по высоте́ небе́сней от земли́,/ утверди́л есть Госпо́дь ми́лость Свою́ на боя́щихся Его́./ Ели́ко отстоя́т восто́цы от за́пад,/ уда́лил есть от нас беззако́ния на́ша./ Я́коже ще́дрит оте́ц сы́ны,/ уще́дри Госпо́дь боя́щихся Его́./ Я́ко Той позна́ созда́ние на́ше,/ помяну́, я́ко персть есмы́./ Челове́к, я́ко трава́ дни́е eго́,/ я́ко цвет се́льный, та́ко оцвете́т,/ я́ко дух про́йде в нем,/ и не бу́дет, и не позна́ет ктому́ ме́ста своего́./ Ми́лость же Госпо́дня от ве́ка и до ве́ка на боя́щихся Его́,/ и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́./ Госпо́дь на Небеси́ угото́ва Престо́л Свой,/ и Ца́рство Его́ все́ми облада́ет./ Благослови́те Го́спода вси А́нгели Его́,/ си́льнии кре́постию, творя́щии сло́во Его́, услы́шати глас слове́с Его́./ Благослови́те Го́спода вся Си́лы Его́,/ слуги́ Его́, творя́щии во́лю Его́./ Благослови́те Го́спода вся дела́ Его́, на вся́ком ме́сте влады́чествия Его́./
Благослови́, душе́ моя́, Го́спода,/ и вся вну́тренняя моя́/ и́мя свя́тое Его́.// Благослове́н еси́, Го́споди.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Твоя́ держа́ва, и Твое́ есть Ца́рство, и си́ла, и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Второ́й антифо́н, псало́м 145:

Хор:
Хвали́, душе́ моя́, Го́спода./ Восхвалю́ Го́спода в животе́ мое́м,/ пою́ Бо́гу моему́, до́ндеже есмь./ Не наде́йтеся на кня́зи, на сы́ны челове́ческия,/ в ни́хже несть спасе́ния./ Изы́дет дух eго́/ и возврати́тся в зе́млю свою́./ В той день поги́бнут вся помышле́ния eго́./ Блаже́н, eму́же Бог Иа́ковль Помо́щник его́,/ упова́ние eго́ на Го́спода Бо́га своего́,/ сотво́ршаго не́бо и зе́млю,/ мо́ре и вся, я́же в них,/ храня́щаго и́стину в век,/ творя́щаго суд оби́димым,/ даю́щаго пи́щу а́лчущим./ Госпо́дь реши́т окова́нныя./ Госпо́дь умудря́ет слепцы́./ Госпо́дь возво́дит низве́рженныя./ Госпо́дь лю́бит пра́ведники./ Госпо́дь храни́т прише́льцы,/ си́ра и вдову́ прии́мет/ и путь гре́шных погуби́т./ Воцари́тся Госпо́дь во век,// Бог твой, Сио́не, в род и род.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Единоро́дный Сы́не:

Единоро́дный Сы́не и Сло́ве Бо́жий, Безсме́ртен Сый/ и изво́ливый спасе́ния на́шего ра́ди/ воплоти́тися от Святы́я Богоро́дицы и Присноде́вы Мари́и,/ непрело́жно вочелове́чивыйся,/ распны́йся же, Христе́ Бо́же, сме́ртию смерть попра́вый,/ Еди́н Сый Святы́я Тро́ицы,// спрославля́емый Отцу́ и Свято́му Ду́ху, спаси́ нас.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко благ и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.

Тре́тий антифо́н, Блаже́нны:

Хор:
Во Ца́рствии Твое́м помяни́ нас, Го́споди, егда́ прии́деши, во Ца́рствии Твое́м.
На 12:
Блаже́ни ни́щии ду́хом, я́ко тех есть Ца́рство Небе́сное.
Блаже́ни пла́чущии, я́ко ти́и уте́шатся.
На 10:
Блаже́ни кро́тции, я́ко ти́и насле́дят зе́млю.
Блаже́ни а́лчущии и жа́ждущии пра́вды, я́ко ти́и насы́тятся.
На 8:
Блаже́ни ми́лостивии, я́ко ти́и поми́ловани бу́дут.
  
Песнь 3 Канона Предпра́зднства Успе́ния Пресвяты́я Богоро́дицы, Глас 5:
Ирмо́с:
Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х,/ Це́рковь Твою́ утверди́, Еди́не Бла́же и Человеколю́бче.
Блаже́ни чи́стии се́рдцем, я́ко ти́и Бо́га у́зрят.
Тропарь:
Пе́сни надгро́бныя ны́не возсле́м Чисте́й, Зижди́теля Богороди́тельнице,/ и со Безпло́тными во́инствы одр живоно́сный окружи́м, ра́дующеся,/ я́ко престо́л Боже́ственный Святы́й.
На 6:
Блаже́ни миротво́рцы, я́ко ти́и сы́нове Бо́жии нареку́тся.
Тропарь:
Лежа́щу и просте́рту ви́дяще, очи́ смежа́щу,/ живопода́тельный, Боже́ственный и при́сный исто́чник,/ прииди́те, ве́рными сердцы́ сле́зы точа́ще,/ прикосне́мся Сея́ нетле́нному телеси́.
Блаже́ни изгна́ни пра́вды ра́ди, я́ко тех есть Ца́рство Небе́сное.
Тропарь:
Боже́ственное и благоро́дное Бо́жие жили́ще, седа́лище вои́стинну/ и град одушевле́н всех Царя́ вои́стинну,/ пода́ждь всех согреше́ний на́ших па́мятию Твое́ю оставле́ние/ и от бед спаси́.
На 4:
Блаже́ни есте́, егда́ поно́сят вам, и изжену́т, и реку́т всяк зол глаго́л на вы, лжу́ще Мене́ ра́ди.
  
Песнь 6 Канона Преподо́бнаго Феодо́сия, Глас 4:
Тропарь:
Прииди́те, ве́рнии, пе́сни духо́вныя принося́ще,/ Феодо́сия любо́вию ублажи́м и по до́лгу воспое́м,/ па́мять пренесе́ния его́ све́тло пра́зднующе.
Ра́дуйтеся и весели́теся, я́ко мзда ва́ша мно́га на Небесе́х.
Тропарь:
Воспое́м све́тлаго, изря́днаго в чудесе́х,/ вели́каго в доброде́телех, до́бляго житие́м,/ сла́внаго уго́дника Христо́ва и Пречи́стыя Богоро́дицы, блаже́ннаго Феодо́сия.
Сла́ва Отцу́ и Сы́ну и Свято́му Ду́ху.
Тропарь:
На Небесе́х ны́не ликовству́я со а́нгельскими во́инствы ра́достно,/ о́тче пребога́те Феодо́сие,/ благода́ть и спасе́ние дарова́ти моли́ся любо́вию пою́щим тя.
И ны́не и при́сно и во ве́ки веко́в. Ами́нь.
Богородичен:
Ума́ моего́ уврачу́й сокруше́ние, Всенепоро́чная,/ исцели́ страсти́ душй мое́й и уны́ния тьму потреби́,/ я́ко да во хвале́нии Тя пою́, Присноблаже́нную, Богоро́дице Всепе́тая.

Ма́лый вход (с Ева́нгелием):

Диа́кон:
Прему́дрость, про́сти.
Хор:
Прииди́те, поклони́мся и припаде́м ко Христу́. Спаси́ ны, Сы́не Бо́жий, во святы́х ди́вен сый, пою́щия Ти: Аллилу́иа.

Тропари:

В храме Господском

[Тропарь Храма]

  
Тропарь праздника, Глас 4:
Лю́дие, предыгра́йте,/ рука́ми пле́щуще ве́рно,/ и любо́вию собери́теся,/ днесь ра́дующеся/ и све́тло восклица́юще вси весе́лием:/ Бо́жия бо Ма́ти и́мать от земны́х к Вы́шним прейти́ сла́вно,/ Ю́же пе́сньми при́сно я́ко Богоро́дицу сла́вим.
  
Тропарь Преподо́бнаго Феодо́сия, Глас 8:
Правосла́вия наста́вниче,/ благоче́стия учи́телю и чистоты́,/ вселе́нный свети́льниче,/ архиере́ев богодухнове́нное удобре́ние,/ Феодо́сие прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

[Кондак Храма]

Сла́ва Отцу́ и Сы́ну и Свято́му Ду́ху.
  
Кондак Преподо́бнаго Феодо́сия, Глас 8:
Насле́дник отце́в был еси́, преподо́бне,/ тех после́дуя жити́ю и уче́нию,/ обы́чаю и воздержа́нию,/ моли́тве же и предстоя́нию./ С ни́миже, име́я дерзнове́ние ко Го́споду,/ проще́ние согреше́ний и спасе́ние испроси́ вопи́ющим ти:/ ра́дуйся, о́тче Феодо́сие.
И ны́не и при́сно и во ве́ки веко́в. Ами́нь.
  
Кондак праздника, Глас 4:
В сла́вней па́мяти Твое́й/ вселе́нная, невеще́ственным Ду́хом испещре́на,/ у́мно с весе́лием зове́т Тебе́:/ ра́дуйся, Де́во,/ христиа́н похвало.

В храме Богородичном

  
Примечание. Тропарь и кондак храма Богородицы не поются в предпразднства и попразднства Богородичных двунадесятых праздников.
  
Тропарь праздника, Глас 4:
Лю́дие, предыгра́йте,/ рука́ми пле́щуще ве́рно,/ и любо́вию собери́теся,/ днесь ра́дующеся/ и све́тло восклица́юще вси весе́лием:/ Бо́жия бо Ма́ти и́мать от земны́х к Вы́шним прейти́ сла́вно,/ Ю́же пе́сньми при́сно я́ко Богоро́дицу сла́вим.
  
Тропарь Преподо́бнаго Феодо́сия, Глас 8:
Правосла́вия наста́вниче,/ благоче́стия учи́телю и чистоты́,/ вселе́нный свети́льниче,/ архиере́ев богодухнове́нное удобре́ние,/ Феодо́сие прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.
Сла́ва Отцу́ и Сы́ну и Свято́му Ду́ху.
  
Кондак Преподо́бнаго Феодо́сия, Глас 8:
Насле́дник отце́в был еси́, преподо́бне,/ тех после́дуя жити́ю и уче́нию,/ обы́чаю и воздержа́нию,/ моли́тве же и предстоя́нию./ С ни́миже, име́я дерзнове́ние ко Го́споду,/ проще́ние согреше́ний и спасе́ние испроси́ вопи́ющим ти:/ ра́дуйся, о́тче Феодо́сие.
И ны́не и при́сно и во ве́ки веко́в. Ами́нь.
  
Кондак праздника, Глас 4:
В сла́вней па́мяти Твое́й/ вселе́нная, невеще́ственным Ду́хом испещре́на,/ у́мно с весе́лием зове́т Тебе́:/ ра́дуйся, Де́во,/ христиа́н похвало.

В храме святого

  
Тропарь праздника, Глас 4:
Лю́дие, предыгра́йте,/ рука́ми пле́щуще ве́рно,/ и любо́вию собери́теся,/ днесь ра́дующеся/ и све́тло восклица́юще вси весе́лием:/ Бо́жия бо Ма́ти и́мать от земны́х к Вы́шним прейти́ сла́вно,/ Ю́же пе́сньми при́сно я́ко Богоро́дицу сла́вим.

[Тропарь Храма]

  
Тропарь Преподо́бнаго Феодо́сия, Глас 8:
Правосла́вия наста́вниче,/ благоче́стия учи́телю и чистоты́,/ вселе́нный свети́льниче,/ архиере́ев богодухнове́нное удобре́ние,/ Феодо́сие прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

[Кондак Храма]

Сла́ва Отцу́ и Сы́ну и Свято́му Ду́ху.
  
Кондак Преподо́бнаго Феодо́сия, Глас 8:
Насле́дник отце́в был еси́, преподо́бне,/ тех после́дуя жити́ю и уче́нию,/ обы́чаю и воздержа́нию,/ моли́тве же и предстоя́нию./ С ни́миже, име́я дерзнове́ние ко Го́споду,/ проще́ние согреше́ний и спасе́ние испроси́ вопи́ющим ти:/ ра́дуйся, о́тче Феодо́сие.
И ны́не и при́сно и во ве́ки веко́в. Ами́нь.
  
Кондак праздника, Глас 4:
В сла́вней па́мяти Твое́й/ вселе́нная, невеще́ственным Ду́хом испещре́на,/ у́мно с весе́лием зове́т Тебе́:/ ра́дуйся, Де́во,/ христиа́н похвало.
Диа́кон:
Го́споду помо́лимся.
Хор:
Го́споди, поми́луй.
Иере́й:
Я́ко Свят́ еси́, Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно.
Диа́кон:
Го́споди, спаси́ благочести́выя.
Хор:
Го́споди, спаси́ благочести́выя.
Диа́кон:
И услы́ши ны.
Хор:
И услы́ши ны.
Диа́кон:
И во ве́ки веко́в.
Хор:
Ами́нь.

Трисвято́е:

Хор:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Три́жды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Святы́й Безсме́ртный, поми́луй нас.
Святы́й Бо́же, Святы́й Кре́пкий, Святы́й Безсме́ртный, поми́луй нас.
Диа́кон:
Во́нмем.
Иере́й:
Мир всем.
Чтец:
И ду́хови твоему́.
Диа́кон:
Прему́дрость.

Прокимен Преподо́бнаго Феодо́сия, глас 7:

Чтец:
Прокимен, глас седьмы́й: Честна́ пред Го́сподем/ сме́рть преподо́бных его́.
Хор:
Честна́ пред Го́сподем/ сме́рть преподо́бных его́.
Чтец:
Что возда́м Го́сподеви о всех, я́же воздаде́ ми?
Хор:
Честна́ пред Го́сподем/ сме́рть преподо́бных его́.
Чтец:
Честна́ пред Го́сподем
Хор:
сме́рть преподо́бных его́.

Чтение Апостола:

Диа́кон:
Прему́дрость.
Чтец:
К Кори́нфяном втора́го посла́ния свята́го апо́стола Па́вла чте́ние.
Диа́кон:
Во́нмем.
  
Чтение дня (Зачало 190,2 Кор.10:7-18):
Чтец:
Бра́тие, а́ще кто наде́ется себе́ Христо́ва бы́ти, да помышля́ет па́ки от себе́, зане́ я́коже он Христо́в, та́кожде и мы Христо́вы. А́ще бо и ли́шше что похвалю́ся о вла́сти на́шей, ю́же даде́ нам Госпо́дь в созда́ние, а не на разоре́ние ва́ше, не постыжу́ся. Но да не явлю́ся, я́ко страшя́ вас посла́ньми. Я́ко посла́ния у́бо, рече́, тя́жка и кре́пка, а прише́ствие те́ла не́мощно, и сло́во уничиже́нно. Сие́ да помышля́ет таковы́й, я́ко я́цы же есмы́ сло́вом посла́ний, отстоя́ще, такови́и и ту су́ще есмы́ де́лом. Не сме́ем бо суди́ти, или́ прикла́довати себе́ ины́м хва́лящым себе́ саме́х, но са́ми в себе́ себе́ измеря́юще, и прилага́юще себе́, себе́ не разумева́ют. Мы же не в безме́рная похва́лимся, но по ме́ре пра́вила, его́же раздели́ нам Бог ме́ру, достиза́ти да́же и до вас. Не я́ко бо не дося́жуще до вас, па́че простира́ем себе́, да́же бо и до вас достиго́хом благове́стием Христо́вым. Не в безме́рная хва́лящеся, ниже́ в чужди́х труде́х, упова́ние же иму́ще, расту́щей ве́ре ва́шей, в вас велича́тися по пра́вилу на́шему изоби́льно, во е́же и в да́льших вас страна́х благовести́ти, не чужи́м пра́вилом в гото́вая похвали́тися. Хваля́йся же, о Го́споде да хва́лится. Не хваля́й бо себе́ сей иску́сен, но его́же Бог восхваля́ет.
  
Чтение за пятницу 15 августа (Зачало 192,2 Кор.11:5-21):
Чтец:
Бра́тие, непщу́ю ничи́мже лиши́тися пре́дних Апо́стол. А́ще бо и неве́жда сло́вом, но не ра́зумом, но везде́ я́вльшеся о всем в вас. Или́ грех сотвори́х себе́ смиря́я, да вы вознесе́теся, я́ко ту́не Бо́жие Благовествова́ние благовести́х вам? От ины́х церкве́й уи́м, прии́м обро́к к ва́шему служе́нию, и прише́д к вам, и в ску́дости быв, не стужи́х ни еди́ному. Ску́дость бо мою́ испо́лниша бра́тия, прише́дше от Македо́нии, и во всем без стуже́ния вам себе́ соблюдо́х и соблюду́. Есть и́стина Христо́ва во мне, я́ко похвале́ние сие́ не загради́тся о мне в страна́х Аха́йстех. Почто́? Зане́ не люблю́ ли вас? Бог весть. А е́же творю́, и сотворю́, да отсеку́ вину́ хотя́щым вины́, да о не́мже хва́лятся, обря́щутся я́коже и мы. Такови́и бо лжи́ви апо́столи, де́лателе льсти́вии, преобразу́ющеся во Апо́столы Христо́вы. И не ди́вно: сам бо сатана́ преобразу́ется во А́нгела све́тла. Не ве́лие у́бо, а́ще и служи́телие его́ преобразу́ются я́ко служи́тели пра́вды, и́мже кончи́на бу́дет по дело́м их. Па́ки глаго́лю, да никто́же мнит мя безу́мна бы́ти, а́ще ли ни, поне́ я́ко безу́мна приими́те мя, да и аз ма́ло что похвалю́ся. А е́же глаго́лю, не глаго́лю по Го́споде, но я́ко в безу́мии в сей ча́сти похвалы́. Поне́же мно́зи хва́лятся по пло́ти, и аз похвалю́ся. Любе́зно бо прие́млете безу́мныя, му́дри су́ще. Прие́млете бо, а́ще кто вас порабоща́ет, а́ще кто пояда́ет, а́ще кто не вле́поту прото́рит, а́ще кто по лицу́ бие́т вы, а́ще кто велича́ется. По досажде́нию глаго́лю, зане́ а́ки мы изнемого́хом.
  
Чтение Преподо́бнаго Феодо́сия (Зачало 213,Гал.5:22-6:2):
Чтец:
Бра́тие, плод духо́вный есть любы́, ра́дость, мир, долготерпе́ние, бла́гость, милосе́рдие, ве́ра, кро́тость, воздержа́ние: на таковы́х несть зако́на. А и́же Христо́вы суть, плоть распя́ша со страстьми́ и похотьми́. А́ще живе́м ду́хом, ду́хом и да хо́дим. Не быва́им тщесла́вни, друг дру́га раздража́юще, друг дру́гу зави́дяще. Бра́тие, а́ще и впаде́т челове́к в не́кое прегреше́ние, вы духо́внии исправля́йте такова́го ду́хом кро́тости: блюды́й себе́, да не и ты искуше́н бу́деши. Друг дру́га тяготы́ носи́те, и та́ко испо́лните зако́н Христо́в.
Иере́й:
Мир ти.
Чтец:
И ду́хови твоему́.
Диа́кон:
Прему́дрость.

Аллилуарий Преподо́бнаго Феодо́сия, глас 6:

Чтец:
Аллилу́ия, глас шесты́й:
Хор:
Аллилу́ия, аллилу́ия, аллилу́ия.
Чтец:
Блаже́н муж, боя́йся Го́спода, / в за́поведех Его́ восхо́щет зело́.
Хор:
Аллилу́ия, аллилу́ия, аллилу́ия.
Чтец:
Си́льно на земли́ бу́дет се́мя его́.
Хор:
Аллилу́ия, аллилу́ия, аллилу́ия.
Диа́кон:
Благослови́, влады́ко, благовести́теля свята́го Апо́стола и Евангели́ста Ма́рка
Иере́й:
Бог, моли́твами свята́го, сла́внаго, всехва́льнаго Апо́стола и Евангели́ста Ма́рка, да да́ст тебе́ глаго́л благовеству́ющему си́лою мно́гою, во исполне́ние Ева́нгелия возлю́бленнаго Сы́на Своего́, Го́спода на́шего Иису́са Христа́.
Диа́кон:
Аминь.
2й диа́кон:
Прему́дрость, про́сти, услы́шим свята́го Ева́нгелия.
Иере́й:
Мир всем.
Хор:
И ду́хови твоему́.
Диа́кон:
От Ма́рка Свята́го Ева́нгелия чте́ние.
Хор:
Сла́ва Тебе́, Го́споди, сла́ва Тебе́.
2й диа́кон:
Во́нмем.

Чтение Евангелия:

  
Чтение дня (зачало 14.,Мк.3:28-35)
Диа́кон:
Рече́ Госпо́дь: ами́нь глаго́лю вам, я́ко вся отпу́стятся согреше́ния сыно́м челове́ческим, и хуле́ния, ели́ка а́ще восху́лят, а и́же восху́лит на Ду́ха Свята́го, не и́мать отпуще́ния во ве́ки, но пови́нен есть ве́чному суду́. Зане́ глаго́лаху: ду́ха нечи́стаго и́мать. Приидо́ша у́бо Ма́ти и бра́тия Его́, и вне стоя́ще посла́ша к Нему́, зову́ще Его́. И седя́ше наро́д о Нем. Ре́ша же Ему́: се Ма́ти Твоя́ и бра́тия Твоя́ и сестры́ Твоя́ вне и́щут Тебе́. И отвеща́ им, глаго́ля: кто есть ма́ти Моя́, или́ бра́тия Моя́? И согля́дав о́крест Себе́ седя́щыя, глаго́ла: се ма́ти Моя́ и бра́тия Моя́, и́же бо а́ще сотвори́т во́лю Бо́жию, сей брат Мой и сестра́ Моя́ и ма́ти Ми есть.
  
Чтение за пятницу 15 августа (зачало 15.,Мк.4:1-9)
Диа́кон:
Во вре́мя о́но, нача́т Иису́с учи́ти при мо́ри, и собра́ся к Нему́ наро́д мног, я́коже Самому́ вле́зшу в кора́бль, седе́ти в мо́ри, и весь наро́д при мо́ри на земли́ бя́ше. И уча́ше их при́тчами мно́го и глаго́лаше им во уче́нии Свое́м: слы́шите, се изы́де се́яй се́яти, и бысть егда́ се́яше, о́во паде́ при пути́, и приидо́ша пти́цы, и позоба́ша е́. Друго́е же паде́ на ка́мени, иде́же не имя́ше земли́ мно́ги, и а́бие прозябе́, зане́ не имя́ше глубины́ земны́я. Со́лнцу же возсия́вшу присвя́де, и зане́ не имя́ше ко́рене, и́зсше. И друго́е паде́ в те́рнии, и взы́де те́рние, и подави́ е́, и плода́ не даст. И друго́е паде́ на земли́ до́брей, и дая́ше плод восходя́щь и расту́щь, и припло́доваше на три́десять, и на шестьдеся́т, и на сто. И глаго́лаше: име́яй у́ши слы́шати да слы́шит.
  
Чтение Преподо́бнаго Феодо́сия (зачало 24.,Лк.6:17-23А):
Диа́кон:
Во вре́мя о́но, ста Иису́с на ме́сте ра́вне, и наро́д учени́к Его́, и мно́жество мно́го люде́й от всея́ Иуде́и и Иерусали́ма, и помо́рия Ти́рска и Сидо́нска, и́же приидо́ша послу́шати Его́ и исцели́тися от неду́г свои́х, и стра́ждущии от дух нечи́стых, и исцеля́хуся. И весь наро́д иска́ше прикаса́тися Ему́, я́ко си́ла от Него́ исхожда́ше, и исцеля́ше вся. И той возве́д о́чи свои́ на ученики́ своя́, глаго́лаше: блаже́ни ни́щии ду́хом, я́ко ва́ше есть Ца́рствие Бо́жие. Блаже́ни, а́лчущии ны́не, я́ко насы́титеся. Блаже́ни, пла́чущии ны́не, я́ко возсмее́теся. Блаже́ни бу́дете, егда́ возненави́дят вас челове́цы, и егда́ разлуча́т вы и поно́сят, и пронесу́т и́мя ва́ше я́ко зло, Сы́на Челове́ческаго ра́ди. Возра́дуйтеся в той день и взыгра́йте, се бо мзда ва́ша мно́га на небеси́.
Хор:
Сла́ва Тебе́, Го́споди, сла́ва Тебе́.

Ектения́ сугу́бая:

Диа́кон:
Рце́м вси от всея́ души́, и от всего́ помышле́ния на́шего рцем.
Хор:
Го́споди, поми́луй.
Диа́кон:
Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.
Хор:
Го́споди, поми́луй.
Диа́кон:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Три́жды, на каждое прошение)
Диа́кон:
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о бра́тиях на́ших, свяще́нницех, священномона́сех, и всем во Христе́ бра́тстве на́шем.
Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих настоя́теля, бра́тии и прихо́жан свята́го хра́ма сего́.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Иере́й:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Ектения́ об оглаше́нных:

Диа́кон:
Помоли́теся, оглаше́ннии, Го́сподеви.
Хор:
Го́споди, поми́луй.
(На каждое прошение)
Диа́кон:
Ве́рнии, о оглаше́нных помо́лимся, да Госпо́дь поми́лует их.
Огласи́т их сло́вом и́стины.
Откры́ет им Ева́нгелие пра́вды.
Соедини́т их святе́й Свое́й собо́рней и апо́стольстей Це́ркви.
Спаси́, поми́луй, заступи́ и сохрани́ их, Бо́же, Твое́ю благода́тию.
Оглаше́ннии, главы ва́ша Го́сподеви приклони́те.
Хор:
Тебе́, Го́споди.
Иере́й:
Да и ти́и с на́ми сла́вят пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Хор:
Ами́нь.

Ектения́ ве́рных, пе́рвая:

Диа́кон:
Ели́цы оглаше́ннии, изыди́те, оглаше́ннии, изыди́те, ели́цы оглаше́ннии, изыди́те, да никто от оглаше́нных, ели́цы ве́рнии, па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Прему́дрость.
Иере́й:
Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.

Ектения́ ве́рных, втора́я:

Диа́кон:
Па́ки и па́ки, ми́ром Го́споду помо́лимся.
Хор:
Го́споди, поми́луй.
(На ка́ждое проше́ние)
Диа́кон:
О свы́шнем ми́ре и спасе́нии душ на́ших, Го́споду помо́лимся.
О ми́ре всего́ мира, благостоя́нии святы́х Бо́жиих церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Прему́дрость.
Иере́й:
Я́ко да под держа́вою Твое́ю всегда́ храни́ми, Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.

Херуви́мская песнь:

Хор:
И́же Херуви́мы та́йно образу́юще и животворя́щей Тро́ице Трисвяту́ю песнь припева́юще, вся́кое ны́не жите́йское отложи́м попече́ние.

Вели́кий вход:

Диа́кон:
Вели́каго господи́на и отца́ на́шего (Имярек), Святе́йшаго Патриа́рха всея́ Ру́си, и господи́на на́шего (Высо́ко-) Преосвяще́ннейшаго (имярек), (архи-)епи́скопа (митрополита (титул)), да помяне́т Госпо́дь Бог во Ца́рствии Свое́м всегда́, ны́не и при́сно, и во ве́ки веко́в.
Иере́й:
Преосвяще́нныя митрополи́ты, архиепи́скопы и епи́скопы, и весь свяще́ннический и мона́шеский чин, и при́чет церко́вный, бра́тию свята́го хра́ма сего́, всех вас, правосла́вных христиа́н, да помяне́т Госпо́дь Бог во Ца́рствии Свое́м, всегда́, ны́не и при́сно, и во ве́ки веко́в.
Хор:
Ами́нь. Я́ко да Царя́ всех поды́мем, А́нгельскими неви́димо дориноси́ма чи́нми. Аллилу́иа, аллилу́иа, аллилу́иа.

Ектения́ проси́тельная:

Диа́кон:
Испо́лним моли́тву на́шу Го́сподеви.
Хор:
Го́споди, поми́луй.
(На каждое прошение)
Диа́кон:
О предложе́нных Честны́х Даре́х, Го́споду помо́лимся.
О святе́м хра́ме сем, и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Дне всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и дру́г дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Щедро́тами Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Хор:
Ами́нь.
Иере́й:
Мир всем.
Хор:
И ду́хови твоему́.
Диа́кон:
Возлю́бим друг дру́га, да единомы́слием испове́мы.
Хор:
Отца́, и Сы́на, и Свята́го Ду́ха, Тро́ицу единосу́щную и неразде́льную.
Диа́кон:
Две́ри, две́ри, прему́дростию во́нмем.

Си́мвол ве́ры:

Лю́ди:
Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Евхаристи́ческий Кано́н:

Диа́кон:
Ста́нем до́бре, ста́нем со стра́хом, во́нмем, свято́е возноше́ние в ми́ре приноси́ти.
Хор:
Ми́лость ми́ра, же́ртву хвале́ния.
Иере́й:
Благода́ть Го́спода на́шего Иису́са Христа́, и любы́ Бо́га и Отца́, и прича́стие Свята́го Ду́ха, бу́ди со все́ми ва́ми.
Хор:
И со ду́хом твои́м.
Иере́й:
Горе́ име́им сердца́.
Хор:
И́мамы ко Го́споду.
Иере́й:
Благодари́м Го́спода.
Хор:
Досто́йно и пра́ведно есть покланя́тися Отцу́ и Сы́ну, и Свято́му Ду́ху, Тро́ице единосу́щней и неразде́льней.
Иере́й:
Побе́дную песнь пою́ще, вопию́ще, взыва́юще и глаго́люще.
Хор:
Свят, свят, свят Госпо́дь Савао́ф, испо́лнь не́бо и земля́ сла́вы Твоея́; оса́нна в вы́шних, благослове́н Гряды́й во и́мя Госпо́дне, оса́нна в вы́шних.
Иере́й:
Приими́те, яди́те, сие́ есть Те́ло Мое́, е́же за вы ломи́мое во оставле́ние грехо́в.
Хор:
Ами́нь.
Иере́й:
Пи́йте от нея́ вси, сия́ есть Кровь Моя́ Но́ваго Заве́та, я́же за вы и за мно́гия излива́емая, во оставле́ние грехо́в.
Хор:
Ами́нь.
Иере́й:
Твоя́ от Твои́х Тебе́ принося́ще, о всех и за вся.
Хор:
Тебе́ пое́м, Тебе́ благослови́м, Тебе́ благодари́м, Го́споди, и мо́лим Ти ся, Бо́же наш.
Иере́й:
Изря́дно о Пресвяте́й, Пречи́стей, Преблагослове́нней, Сла́вней Влады́чице на́шей Богоро́дице и Присноде́ве Мари́и.

Досто́йно есть:

Хор:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и славне́йшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Иере́й:
В пе́рвых помяни́, Го́споди, вели́каго господи́на и отца́ на́шего (Имярек), Святе́йшаго Патриа́рха всея́ Руси́, и господи́на на́шего (Высо́ко-) Преосвяще́ннейшаго (Имярек), (архи-)епи́скопа (митрополита (титул)), и́хже да́руй святы́м Твои́м це́рквам, в ми́ре, це́лых, честны́х, здра́вых, долгоде́нствующих, пра́во пра́вящих сло́во Твоея́ и́стины.
Хор:
И всех, и вся.
Иере́й:
И даждь нам еди́неми усты́ и еди́нем се́рдцем сла́вити и воспева́ти пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Хор:
Ами́нь.
Иере́й:
И да бу́дут ми́лости вели́каго Бо́га и Спа́са на́шего Иису́са Христа́ со все́ми ва́ми.
Хор:
И со ду́хом твои́м.

Ектения́ проси́тельная:

Диа́кон:
Вся святы́я помяну́вше, па́ки и па́ки ми́ром Го́споду помо́лимся.
Хор:
Го́споди, поми́луй.
(На каждое прошение)
Диа́кон:
О принесе́нных и освяще́нных Честны́х Даре́х, Го́споду помо́лимся.
Я́ко да человеколю́бец Бог наш, прие́м я́ во святы́й и пренебе́сный и мы́сленный Свой же́ртвенник, в воню́ благоуха́ния духо́внаго, возниспо́слет нам Боже́ственную благода́ть и дар Свята́го Ду́ха, помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Дне всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Соедине́ние ве́ры и прича́стие Свята́го Ду́ха испроси́вше, са́ми себе́, и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
И сподо́би нас, Влады́ко, со дерзнове́нием, неосужде́нно сме́ти призыва́ти Тебе́, Небе́снаго Бо́га Отца́, и глаго́лати:

Моли́тва Госпо́дня:

Лю́ди:
О́тче наш, И́же еси́ на небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Хор:
Ами́нь.
Иере́й:
Мир всем.
Хор:
И ду́хови твоему́.
Диа́кон:
Главы́ ва́ша Го́сподеви приклони́те.
Хор:
Тебе́, Го́споди.
Иере́й:
Благода́тию, и щедро́тами, и человеколю́бием Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Хор:
Ами́нь.
Диа́кон:
Во́нмем.
Иере́й:
Свята́я святы́м.
Хор:
Еди́н свят,/ еди́н Госпо́дь,/ Иису́с Христо́с,/ во сла́ву Бо́га Отца́./ Ами́нь.

Причастен Преподо́бнаго Феодо́сия:

Хор:
В па́мять ве́чную бу́дет пра́ведник,/ от слу́ха зла не убои́тся.
Аллилуйа
(Трижды)

Прича́стие:

Диа́кон:
Со стра́хом Бо́жиим и ве́рою приступи́те.
Хор:
Благослове́н Гряды́й во и́мя Госпо́дне, Бог Госпо́дь и яви́ся нам.
Иере́й:
Ве́рую, Го́споди, и испове́дую, я́ко Ты еси́ вои́стинну Христо́с, Сын Бо́га жива́го, прише́дый в мир гре́шныя спасти́, от ни́хже пе́рвый есмь аз. Еще́ ве́рую, я́ко сие́ есть са́мое пречи́стое Те́ло Твое́, и сия́ есть са́мая честна́я Кровь Твоя́. Молю́ся у́бо Тебе́: поми́луй мя и прости́ ми прегреше́ния моя́, во́льная и нево́льная, я́же сло́вом, я́же де́лом, я́же ве́дением и неве́дением, и сподо́би мя неосужде́нно причастити́ся пречи́стых Твои́х Та́инств, во оставле́ние грехо́в и в жизнь ве́чную. Ами́нь.
Ве́чери Твоея́ та́йныя днесь, Сы́не Бо́жий, прича́стника мя приими́; не бо враго́м Твои́м та́йну пове́м, ни лобза́ния Ти дам, я́ко Иу́да, но я́ко разбо́йник испове́даю Тя: помяни́ мя, Го́споди, во Ца́рствии Твое́м.
Да не в суд или́ во осужде́ние бу́дет мне причаще́ние Святы́х Твои́х Та́ин, Го́споди, но во исцеле́ние души́ и те́ла.
  
Во время Причащения людей:
Хор:
Те́ло Христо́во приими́те, Источника безсме́ртнаго вкусите.
  
После Причащения людей:
Хор:
Аллилу́ия, аллилу́ия, аллилу́ия.
Иере́й:
Спаси́, Бо́же, лю́ди Твоя́, и благослови́ достоя́ние Твое́.
Хор:
Ви́дехом свет и́стинный,/ прия́хом Ду́ха Небе́снаго,/ обрето́хом ве́ру и́стинную,/ неразде́льней Тро́ице покланя́емся,// Та бо нас спасла́ есть.
Иере́й:
Всегда́, ны́не и при́сно, и во ве́ки веко́в.
Хор:
Ами́нь. Да испо́лнятся уста́ на́ша/ хвале́ния Твоего́ Го́споди,/ я́ко да пое́м сла́ву Твою́,/ я́ко сподо́бил еси́ нас причасти́тися/ Святы́м Твои́м, Боже́ственным, безсме́ртным и животворя́щим Та́йнам,/ соблюди́ нас во Твое́й святы́ни/ весь день поуча́тися пра́вде Твое́й.// Аллилу́иа, аллилу́иа, аллилу́иа.

Ектения́ заключи́тельная:

Диа́кон:
Про́сти прии́мше Боже́ственных, святы́х, пречи́стых, безсме́ртных, небе́сных и животворя́щих, стра́шных Христо́вых Та́ин, досто́йно благодари́м Го́спода.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
День весь соверше́н, свят, ми́рен и безгре́шен испроси́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Ты еси́ освяще́ние на́ше, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.
Иере́й:
С ми́ром изы́дем.
Хор:
О и́мени Госпо́дни.
Диа́кон:
Го́споду помо́лимся.
Хор:
Го́споди, поми́луй.

Заамво́нная моли́тва:

Иере́й:
Благословля́яй благословя́щия Тя, Го́споди, и освяща́яй на Тя упова́ющия, спаси́ лю́ди Твоя́ и благослови́ достоя́ние Твое́, исполне́ние Це́ркве Твоея́ сохрани́, освяти́ лю́бящия благоле́пие до́му Твоего́: Ты тех возпросла́ви Боже́ственною Твое́ю си́лою, и не оста́ви нас, упова́ющих на Тя. Мир мирови Твоему́ да́руй, це́рквам Твои́м, свяще́нником, во́инству и всем лю́дем Твои́м. Я́ко вся́кое дая́ние бла́го, и всяк дар соверше́н свы́ше есть, сходя́й от Тебе́ Отца́ све́тов, и Тебе́ сла́ву, и благодаре́ние, и поклоне́ние возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь. Бу́ди И́мя Госпо́дне благослове́но от ны́не и до ве́ка.
(Три́жды)

Псало́м 33:

Хор:
Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тции, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и,/ и от все́х скорбе́й его́ спасе́ и./ Ополчи́тся А́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода не лиша́тся вся́каго бла́га./ Прииди́те, ча́да, послу́шайте мене́,/ стра́ху Госпо́дню научу́ вас./ Кто́ есть челове́к хотя́й живо́т,/ любя́й дни ви́дети бла́ги?/ Удержи́ язы́к твой от зла,/ и устне́ твои́, е́же не глаго́лати льсти./ Уклони́ся от зла и сотвори́ бла́го./ Взыщи́ ми́ра, и пожени́ и́./ О́чи Госпо́дни на пра́ведныя,/ и у́ши Его́ в моли́тву их./ Лице́ же Госпо́дне на творя́щия зла́я,/ е́же потреби́ти от земли́ па́мять их./ Воззва́ша пра́веднии, и Госпо́дь услы́ша их,/ и от всех скорбе́й их изба́ви их./ Близ Госпо́дь сокруше́нных се́рдцем,/ и смире́нныя ду́хом спасе́т./ Мно́ги ско́рби пра́ведным,/ и от всех их изба́вит я́ Госпо́дь./ Храни́т Госпо́дь вся ко́сти их,/ ни еди́на от них сокруши́тся./ Смерть гре́шников люта́,/ и ненави́дящии пра́веднаго прегре́шат./ Изба́вит Госпо́дь ду́ши раб Свои́х,/ и не прегреша́т// вси, упова́ющии на Него́.
Иере́й:
Благослове́ние Госпо́дне на ва́с, Того́ благода́тию и человеколю́бием, всегда́, ны́не и при́сно, и во ве́ки веко́в.
Хор:
Ами́нь.
Иере́й:
Сла́ва Тебе́, Христе́ Бо́же, упова́ние на́ше, сла́ва Тебе́.
Хор:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Го́споди, поми́луй.
(Три́жды)
Благослови́.

Иерей произносит Отпуст

Многоле́тие:

Mолитва Преподо́бному Феодо́сию

О свяще́нная главо́, А́нгеле земны́й и челове́че Небе́сный, преподо́бне и Богоно́сне о́тче наш Феодо́сие, изря́дный слуго́ Пресвяты́я Богоро́дицы, во и́мя ея́ свято́е оби́тель пречу́дну на гора́х Пече́рских сооруди́вый и в ней чуде́с мно́жеством просия́вый! Моли́м тя со усе́рдием мно́гим: моли́ся за нас ко Го́споду Бо́гу и испроси́ нам от Него́ вели́кия и бога́тыя ми́лости: ве́ру пра́ву, наде́жду спасе́ния несомне́нну, любо́вь ко всем нелицеме́рну, благоче́стие непоко́леби́мое, душ и теле́с здра́вие, жите́йских потре́б дово́льство, и да не во зло обрати́м блага́я, дару́емая нам от щедрода́тельныя его́ десни́цы, но в сла́ву И́мене́ его́ свята́го и во спасе́ние на́ше. Сохрани́, уго́дниче Бо́жий, предста́тельством твои́м святы́м страну́ на́шу, Це́рковь Православноросси́йскую, град твой и Ла́вру твою́ невреди́мы от вся́каго зла, и вся лю́ди, притека́ющия на поклоне́ние к честно́му твое́му гро́бу и пребыва́ющия во святе́й оби́тели твое́й, осени́ Небе́сным твои́м благосло́вением и от вся́ких зол и бед ми́лостивно изба́ви. Наипа́че же в час кончи́ны на́шея покажи́ нам многомо́щное твое́ покрови́тельство: да изба́вимся моли́тва́ми твои́ми ко Го́споду вла́сти лю́таго мироде́ржца и сподо́бимся насле́дити Ца́рство Небе́сное. Яви́ нам, о́тче, благосе́рдие твое́ и не оста́ви нас, си́рых и безпо́мощных, да вы́ну славосло́вим ди́внаго во святы́х Свои́х Бо́га, Отца́, и Сы́на, и Свята́го Ду́ха, и твое́ свято́е заступле́ние, во ве́ки веков. Ами́нь.

Полезная информация о памяти Преподо́бнаго Феодо́сия

Перенесение святых мощей преподобного Феодосия Печерского произошло через семнадцать лет после его Блаженной кончины (†1074). В 1091 году на совете братии Киево-Печерского монастыря во главе с игуменом Иоанном было решено раскрыть место погребения преподобного Феодосия и перенести его святые мощи в соборный Успенский храм. Найти святые мощи было поручено преподобному Нестору Летописцу, который впоследствии описал их обретение.

За три дня до праздника Успения Пресвятой Богородицы игумен Иоанн отвел преподобного Нестора к пещере преподобного Феодосия. Осмотрев пещеру, они определили место, где нужно копать. Игумен обители запретил преподобному Нестору сообщать братии о раскопках, пока святые мощи не будут обретены. В помощь ему отец игумен разрешил взять, кого он захочет. На следующий день преподобный Нестор взял с собой двух братий. Пропев псалмы, он первым начал дело, а утомившись, передал лопату другому иноку. Так иноки копали до полуночи. Их охватило чувство сожаления. В это время ударили в монастырский колокол, созывая братию на молитву, и в тот же миг преподобный Нестор обнаружил святые мощи. Тем временем два инока тайно наблюдали за пещерой. Когда ударил колокол к утрени, они увидели над пещерой три огненных столпа, которые как дуги перегнулись к куполу храма и остановились над ним. Чудесное знамение видел в эту ночь и епископ Владимирский Стефан, который в 1074–1078 годах был игуменом Печерского монастыря. Он находился тогда в Киеве в Кловском монастыре и знал о скором перенесении святых мощей преподобного Феодосия. Когда епископ Стефан увидел ночью над пещерой большое зарево, то подумал, что начали перенесение без него. Тотчас он сел на коня и вместе с Климентом, игуменом Кловского монастыря, отправился к пещере преподобного.

Когда они приблизились к пещере, то увидели над ней множество свечей, но, подъехав совсем близко, не видели уже ничего.

Обретя гроб преподобного Феодосия, святой Нестор послал за игуменом Иоанном, чтобы он изъял мощи. Игумен монастыря пришел с двумя братиями. Все вместе открыли гроб и обрели нетленные мощи преподобного Феодосия. Преподобный Нестор повествует об этом так: «Мы, преклонившись, увидели мощи преподобного. Все составы их были целы, лицо преподобного было светлое, глаза сомкнуты, губы соединены, волосы присохли к голове. Мы положили мощи на мантию и на плечах вынесли на верх пещеры».

14 августа, к празднику Успения Пресвятой Богородицы, собрались епископы – Переяславльский Ефрем, Владимирский Стефан, Черниговский Иоанн, Юрьевский Марин и Полоцкий Антоний, а также игумены многих монастырей с иноками и множество православных мирян. Честные мощи преподобного Феодосия были перенесены с подобающими почестями в приготовленное место на правой стороне притвора Успенского собора обители.

Во время перенесения святых мощей шествие останавливалось для отдыха. Мощи были поставлены на пень дерева. Позднее на этом месте был построен храм во имя преподобного Феодосия, и он был расположен так, что пень оказался на месте престола.

От гробницы преподобного Феодосия происходили исцеления болящих, во множестве притекавших к святым мощам.

Полезная информация о памяти проро́ка Михе́я

Святой пророк Михей Второй ветхозаветный был шестым из 12 малых пророков и происходил из колена Иудина. Имя Михей в переводе с еврейского означает «кто, как Бог?» – выражение превосходства Бога в высшей степени над миром тварным. В отличие от пророка Михея Первого, пророчествовавшего в дни святого пророка Илии и при царях Иоасафате иудейском и Ахаве израильском за 130 лет до него, пророк Михей возвещал волю Божию при царях иудейских Иоанафане, Ахазе и праведном Езекии (740–695 гг. до Рождества Христова), был современником пророков Осии, Амоса, Исаии и назывался Морасфитянином. Это наименование было получено им по месту его родины – города Морасфи, который упоминается в Библии как Морешеф-Геф (Мих.1:14) и находился к югу от Иерусалима близ города Елевферополя. Хотя Михей был пророком иудейского царства, но многие его пророчества относятся к царству израильскому. Он смотрел на оба эти царства как на единое потомство патриарха Иакова и не был равнодушен к их судьбам. Пророчества, содержащиеся в книге Михея, были произносимы святым пророком в разное время, но, главным образом, при царе Езекии.

Обличая единоплеменников в их пороках, в принятии нечестивых языческих обычаев, в идолопоклонстве и забвении ими истинного Бога, пророк Михей грозил им судом Божиим и будущими бедствиями. Язык его обличений и пророчеств отличается простотой, прямотой и образностью выражений, он выражает глубокую скорбь о «жестоковыйности» израильского народа и его бедствиях в будущем.

Книга пророка Михея начинается возвещением о разрушении Самарии за ее идолопоклонство. Затем пророк обращается с такой же угрозой и к Иерусалиму за нечестие иудеев, а также преступления вельмож, князей и судей. «Горе замышляющим беззаконие и на ложах своих придумывающим злодеяния, которые совершаются утром на рассвете, потому что есть в руке их сила» (Мих.2:1). Пророк Михей обличает лжепророков, вводящих народ в заблуждение и из корыстных целей льстящих ему.

Он произносит над нечестивыми грозный Божий суд: «Посему за вас Сион распахан будет, как поле, и Иерусалим будет грудой развалин, и гора дома сего будет лесистым холмом» (Мих.3:12).

Самария и Израиль еще при жизни пророка Михея закончили свое существование при нашествии царя ассирийского Сеннахерима, жители их уведены были в плен в 722 году до Рождества Христова, земля их была опустошена, и города превратились в груды развалин. Пророк Михей утешает жителей Иерусалима, чтобы они не впали в отчаяние от предстоящей подобной участи пророчествованием о возвышении священной горы Сионской и грядущем мире. «И будет в последние дни: гора дома Господня поставлена будет во главу и возвысится над холмами, и потекут к ней народы» (Мих.4:1). Здесь, по мнению многих святых отцов, кроме исторического пророчества о возвращении иудеев из Вавилонского плена предсказывается распространение Евангельской проповеди среди евреев и язычников. «И пойдут многие народы, и скажут: приидите, и взойдем на гору Господню и в дом Бога Иаковлева... ибо от Сиона выйдет закон и слово Господне – из Иерусалима» (Мих.4:2). Пророку Михею принадлежит радостное предвещение о рождении Мессии – Иисуса Христа, Сына Божия, для прославления имени Божия и во исполнение всех обетований его: «И ты Вифлеем-Ефрафа, мал ли ты между тысячами Иудиными? Из тебя произойдет Мне Тот, Который должен быть Владыкою в Израиле и Которого происхождение из начала, от дней вечных» (Мих.5:2). Пророк назидает свой народ, призывая его к следованию путем добродетели: «О человек! сказано тебе, что – добро и чего требует от тебя Господь: действовать справедливо, любить дела милосердия и смиренномудренно ходить пред Богом твоим» (Мих.6:8). Возглашая неизреченную любовь и милосердие к впадающим в грех и немощным людям, пророк Михей как бы указывает на сущность своего имени: «Кто Бог, как Ты, прощающий беззаконие и не вменяющий преступления остатку наследия Своего» (Мих.7:18).

Святой пророк Михей совершал пророческое служение около 50 лет; преставился он в глубокой старости около 695 года до Рождества Христова, о чем узнаем из книги пророка Иеремии, который так же пророчествовал Иерусалиму скорые бедствия и Вавилонский плен: «И из старейшин земли встали некоторые и сказали всему народному собранию: «Михей Морасфитянин пророчествовал во дни Езекии, царя Иудейского... Умертвили ли его за это Езекия, царь Иудейский и весь Иуда? Не убоялся ли он Господа и не умолял ли Господа? И Господь отменил бедствие, которое изрек на них; а мы хотим сделать большое зло душам

нашим» (Иер.26:18–20). Мощи святого пророка Михея были обретены в IV веке по Рождестве Христовом вместе с мощами пророка Аввакума епископом Елевферопольским Зевином близ Елевферополя во время царствования византийского императора святого Феодосия Великого (379–395).