i
Форма : M1S1VoskrBd(5131)

^

msword

html

@

30 Сентября 2024 года, Воскресение, (А161), Глас 7. Служба Воскресная в соединении с бденной службой Слу́жба Собо́ру святы́х зе́мли Черка́сския. * ВСЕНО́ЩНОЕ БДЕ́НИЕ * ВЕЛИ́КАЯ ВЕЧЕ́РНЯ * * Псало́м 103, предначина́тельный: * Вели́кая ектения́: * Блаже́н муж: * Ектения́ ма́лая: * Го́споди, воззва́х, глас 7: * Вход с кади́лом: * Све́те Ти́хий: * Проки́мен воскре́сный: * Паремии святы́х зе́мли Черка́сския: * Ектения́ сугу́бая: * Сподо́би, Го́споди: * Ектения́ проси́тельная: * Лития́: * Стихи́ры на стихо́вне: * Моли́тва свято́го Симео́на Богоприи́мца: * Трисвято́е по О́тче наш: * Тропа́рь Богоро́дицы, глас 4: * Тропарь святы́х зе́мли Черка́сския Глас 5: * Благослове́ние хле́бов: * Псало́м 33: * У́ТРЕНЯ. * Шестопса́лмие: * Псалом 3: * Псалом 37: * Псалом 62: * Псалом 87: * Псалом 102: * Псалом 142: * Вели́кая ектения́: * Бог Госпо́дь, глас 7: * Тропа́рь воскре́сный, глас 7: * Кафи́змы: * Кафи́зма втора́я: * Псало́м 9: * Псалом 10: * Псало́м 11: * Псало́м 12: * Псало́м 13: * Псалом 14: * Псалом 15: * Псалом 16: * Ектения́ ма́лая: * Седа́льны воскре́сные, глас 7: * Кафи́зма тре́тья: * Псало́м 17: * Псало́м 18: * Псало́м 19: * Псало́м 20: * Псало́м 21: * Псало́м 22: * Псало́м 23: * Ектения́ ма́лая: * Седа́льны воскре́сные, глас 7: * Полиеле́й: * Велича́ние: * Тропари́ воскре́сные, глас 5: * Ектения́ ма́лая: * Ипакои́, глас 7: * Седа́лены по полиелее * Степе́нна, глас 7: * 1 Антифо́н: * 2 Антифо́н: * 3 Антифо́н: * Проки́мен и чте́ние Ева́нгелия: * Воскре́сная песнь по Ева́нгелии, глас 6: * Псало́м 50: * Стихи́ра воскре́сная, глас 6: * Кано́н: * Песнь 1: * Катавасия , Глас 4: * Песнь 3: * Катавасия , Глас 4: * Ектения́ ма́лая: * Кондак святы́х зе́мли Черка́сския Глас 6: * И́кос: * Седален святы́х зе́мли Черка́сския Глас 4: * Песнь 4: * Катавасия , Глас 4: * Песнь 5: * Катавасия , Глас 4: * Песнь 6: * Катавасия , Глас 4: * Ектения́ ма́лая: * Кондак октоиха, глас 7 * И́кос: * Песнь 7: * Катавасия , Глас 4: * Песнь 8: * Катавасия , Глас 4: * Песнь Пресвято́й Богоро́дицы: * Песнь 9: * Катавасия , Глас 4: * Ектения́ ма́лая: * Ексапостила́рий воскре́сный пятый: * * Богоро́дичен воскре́сного ексапостила́рия, пятый: * Хвали́тны псалмы́, глас 7: * Славосло́вие вели́кое: * Тропа́рь воскре́сный, глас 1: * Ектения́ сугу́бая: * Ектения́ проси́тельная: * Отпу́ст. * Многоле́тие: * ЧИТА́ЕТСЯ ПЕ́РВЫЙ ЧАС: * Псало́м 5: * Псало́м 89: * Псало́м 100: * Трисвято́е по О́тче наш: * Конда́к, глас 8: * Отпу́ст. * Тре́тий час: * Трисвято́е по О́тче наш: * Псало́м 16: * Псало́м 24: * Псало́м 50: * Трисвято́е по О́тче наш: * Кондак октоиха, глас 7 * Шесто́й час: * Псало́м 53: * Псало́м 54: * Псало́м 90: * Трисвято́е по О́тче наш: * Боже́ственная литурги́я: * Вели́кая ектения́: * Пе́рвый антифо́н, псало́м 102: * Ектения́ ма́лая: * Второ́й антифо́н, псало́м 145: * Единоро́дный Сы́не: * Ектения́ ма́лая: * Тре́тий антифо́н, Блаже́нны: * Ма́лый вход (с Ева́нгелием): * Тропари́ и кондаки́ по вхо́де: * В храме Господском * В храме Богородичном * [Тропарь Храма] * [Конда́к Храма] * В храме Святого * Трисвято́е: * Проки́мен воскре́сный, глaс 7: * Прокимен святы́х зе́мли Черка́сския, глас 4: * Чтение Апостола: * Аллилуа́рий воскре́сный, глас 7: * АЛЛИЛУА́РИЙ святы́х зе́мли Черка́сския, глас 6: * Чтение Евангелия: * Ектения́ сугу́бая: * Ектения́ об оглаше́нных: * Ектения́ ве́рных, пе́рвая: * Ектения́ ве́рных, втора́я: * Херуви́мская песнь: * Вели́кий вход: * Ектения́ проси́тельная: * Си́мвол ве́ры: * Евхаристи́ческий Кано́н: * «Досто́йно есть…»: * Ектения́ проси́тельная: * Моли́тва Госпо́дня: * Прича́стен воскре́сный : * Причастен святы́х зе́мли Черка́сския * Прича́стие: * Во время Причащения людей: * После Причащения людей: * Ектения́ заключи́тельная: * Заамво́нная моли́тва: * Псало́м 33: * Отпу́ст: * Многоле́тие: * Молитва святы́х зе́мли Черка́сския * Полезная иноформация относительно святы́х зе́мли Черка́сския

13 октября 2024 по н. ст.

Ссылка на оригинал - https://cerkva.minei.ru/glas/showSlugba?id=11897&dayId=30711

30 Сентября 2024 года, Воскресение, (А161), Глас 7. Служба Воскресная в соединении с бденной службой Слу́жба Собо́ру святы́х зе́мли Черка́сския.

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Диа́кон:
Воста́ните!
Хор:
Благослови́.
Иере́й:
Сла́ва Святе́й, и Единосу́щней, и Животворя́щей, и Неразде́льней Тро́ице всегда́, ны́не и при́сно, и во ве́ки веко́в.
Хор:
Ами́нь.
  
Священнослужи́тели в алтаре́:

Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́ Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Прииди́те, поклони́мся и припаде́м Ему́.

Псало́м 103, предначина́тельный:

Хор:
Благослови́, душе́ моя́, Го́спода./ Благослове́н еси́, Го́споди./ Го́споди, Бо́же мой, возвели́чился еси́ зело́./ Благослове́н еси́, Го́споди./ Вся прему́дростию сотвори́л еси́./ Сла́ва Ти, Го́споди, сотвори́вшему вся.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)

Вели́кая ектения́:

Диа́кон:
Ми́ром Го́споду помо́лимся.
Хор:
Го́споди, поми́луй.
Диа́кон:
О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих во нь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем, Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имярек), честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Блаже́н муж:

Хор:
Блаже́н муж, и́же не и́де на сове́т нечести́вых.
Аллилу́иа, аллилу́иа, аллилу́иа.
Я́ко весть Госпо́дь путь пра́ведных, и путь нечести́вых поги́бнет.
Аллилу́иа, аллилу́иа, аллилу́иа.
Рабо́тайте Го́сподеви со стра́хом и ра́дуйтеся Ему́ с тре́петом.
Аллилу́иа, аллилу́иа, аллилу́иа.
Блаже́ни вси наде́ющиися Нань.
Аллилу́иа, аллилу́иа, аллилу́иа.
Воскресни́, Го́споди, спаси́ мя, Бо́же мой.
Аллилу́иа, аллилу́иа, аллилу́иа.
Госпо́дне есть спасе́ние, и на лю́дех Твои́х благослове́ние Твое́.
Аллилу́иа, аллилу́иа, аллилу́иа.
Сла́ва Отцу́ и Сы́ну и Свято́му Духу.
Аллилу́иа, аллилу́иа, аллилу́иа.
И ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Твоя́ держа́ва, и Твое́ есть Ца́рство, и си́ла, и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Го́споди, воззва́х, глас 7:

Хор:
Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.
Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.
  
Стихиры воскресные, глас 7:
На10.Стих:
Изведи́ из темни́цы ду́шу мою́, испове́датися и́мени Твоему́.
Стихи́ра:
Прииди́те, возра́дуемся Го́сподеви, сокруши́вшему сме́рти держа́ву, и просвети́вшему челове́ческий ро́д, со безпло́тными зову́ще: Соде́телю и Cпа́се на́ш, сла́ва Тебе́.
Стих:
Мене́ жду́т пра́ведницы, до́ндеже возда́си мне́.
Стихи́ра:
Кре́ст претерпе́л еси́, Спа́се, и погребе́ние на́с ра́ди, сме́ртию же я́ко Бо́г сме́рть умертви́л еси́. Те́мже покланя́емся тридне́вному Воскресе́нию Твоему́: Го́споди, сла́ва Тебе́.
На 8. Стих:
Из глубины́ воззва́х к Тебе́, Го́споди, Го́споди, услы́ши гла́с мо́й.
Стихи́ра:
Апо́столи ви́девше Воскресе́ние Соде́теля, чудя́хуся, пою́ще хвалу́ а́нгельскую: сия́ сла́ва е́сть церко́вная, сие́ бога́тство Ца́рствия: пострада́вый на́с ра́ди, Го́споди, сла́ва Тебе́.
Да бу́дут у́ши Твои́, вне́млюще гла́су моле́ния моего́.
Стихи́ра:
А́ще и я́т бы́л еси́, Христе́, от беззако́нных муже́й: но Ты́ ми еси́ Бо́г, и не постыжду́ся: бие́н бы́л еси́ по плеще́ма, не отмета́юся: на Кресте́ пригвожде́н бы́л еси́, и не таю́: воста́нием Твои́м хвалю́ся: сме́рть бо Твоя́ живо́т мо́й, Всеси́льне и Человеколю́бче Го́споди, сла́ва Тебе́.
  
святы́х зе́мли Черка́сския Глас 4
На 6. Стих:
А́ще беззако́ния на́зриши, Го́споди, Го́споди, кто постои́т?// Я́ко у Тебе́ очище́ние е́сть.
Стихи́ра:
Прииди́те, небе́снии на́ши засту́пницы, святи́телие богому́дрии, му́ченицы добропобе́днии, испове́дницы дерзнове́ннии, преподо́бнии ди́внии, к нам, утеше́ния ва́шего во дни скорбе́й ча́ющим и смире́нно к вам припа́дающим, в ве́ре пра́вей невреди́мо да́же до конца́ стоя́ти умудри́те нас, ко́зней врага́ не боя́тися, земли́ на́шей мир испроси́те у Христа́, и душа́м на́шим ве́лию ми́лость.
Стих:
И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,// упова́ душа́ моя́ на Го́спода.
Стихи́ра:
Прииди́те, лю́дие, ублажи́м избра́нныя Бо́жия, преподобному́ченика Мака́рия, му́ченика Дании́ла, святи́телей Софро́ния и Сильве́стра, та́же Васи́лия и Луку́ священноиспове́дников, ку́пно с новому́ченики, в после́дняя лета́ кровь свою́ за Христа́ проли́вшими. Ны́не бо сии́ Престо́лу Пресвяты́я Тро́ицы предстоя́т, дарова́ти мир душа́м на́шим мо́лятся, и земли́ Черка́сстей дарова́ти ве́лию ми́лость.
На 4. Стих:
От стра́жи у́тренния до но́щи, от стра́жи у́тренния,// да уповае́т Изра́иль на Го́спода.
Стихи́ра:
Прииди́те, ве́рнии, похвалы́ и пе́сни досто́йныя святы́м и новому́чеником земли́ Черка́сския принесе́м, днесь бо свяще́нное торжество́, Небеса́ со а́нгелы ра́дуются, и нас воспева́ти подвиза́ют: услы́шите проше́ния на́ша, уго́дницы Христо́вы всеблаже́ннии, земли́ оте́чествия ва́шего мир да́руйте, и душа́м на́шим ве́лию ми́лость.
Стих:
Я́ко у Го́спода ми́лость, и мно́гое у Него́ избавле́ние,// и Той изба́вит Изра́иля от всех беззако́ний eго́.
Стихи́ра:
Сме́рти теле́сныя не убоя́стеся, Авраа́мие священному́чениче и Дании́ле пресла́вне, за благове́стие побе́ды над сме́ртию с мучи́тели ва́шими срази́вшеся, не да́вше бо свиния́м Би́сера Боже́ственаго потопта́ти, ны́не же Христу́ воскре́сшему о ве́си Мли́евстей усе́рдно моли́теся, в правове́рии и благоче́стии лю́дем пребыва́ти.
На 2. Стих:
Хвали́те Го́спода вси язы́цы,// похвали́те Его́ вси лю́дие.
Стихи́ра:
По́двигом до́брым да́же до конца́ подвиза́выйся, ни мук преще́ния не убоя́лся еси́, ни мучи́телей ласка́тельствам не прилепи́лся еси́ се́рдцем твои́м, Ана́ние прехва́льне, огне́м любве́ я́же по Бо́зе горя́, па́ству твою, Пастыренача́льнику подража́я, до́бре упа́сл еси́, волко́м расхи́тити не дал еси́, тве́рдо вопия́: за ве́ру убо́ стра́жду, до конца и́мам пострада́ти.
Стих:
Я́ко утверди́ся ми́лость Его́ на нас,// и и́стина Госпо́дня пребыва́ет во век.
Стихи́ра:
Сло́во И́стины безбоя́зненно лю́дем рекли́ есте́, преподобному́ченице Рафаи́ло и Андре́е всеблаже́нне, лю́ди Чигири́нския во Правосла́вии стоя́ти подвиза́юще, де́лом бо и сло́вом нечести́выя облича́я, коне́ц ско́рый, а́ще не пока́ются, всем хуля́щим И́мя Бо́жие предрекли́, я́ко дре́внии проро́цы иногда́; во страда́нии свое́м вене́ц му́ченический стяжа́ли есте́, сего́ ра́ди вас усе́рдно ублажа́ем.
  
святы́х зе́мли Черка́сския Глас 8
Сла́ва Отцу́ и Сы́ну и Свято́му Ду́ху.
Стихи́ра:
Весели́ся, гра́де Черка́ссы, лику́йте, преде́лы Чигири́нстии, взыгра́йте, уде́лы Ко́рсунския и Ка́невския, Городи́ще и Сме́ла вкупе со Шпо́лою, Катерино́полем и Ка́менкою хвалу́ досто́йную воспо́йте! Золотоно́шо, Дра́бове и Черноба́евская страна́ возвесели́теся, днесь собо́р соста́вльше Це́ркве земны́я и Небе́сныя. Челове́цы бо со А́нгелы, о́бщий лик сотво́рше, воспева́ют ра́достно всех святы́х земли́ Черка́сския, и страда́льцев за Христа́ но́вых, в ней просия́вших, хваля́ще: моли́теся за ны, новому́ченицы и вси святи́и земли́ на́шея, па́мять ва́шу ны́не почита́ющих.
  
Догма́тик, глас 7:
И ны́не и при́сно и во ве́ки веко́в. Ами́нь.
Ма́ти у́бо позна́лася еси́, па́че естества́, Богоро́дице, пребыла́ же еси́ Де́ва, па́че сло́ва и ра́зума: и чудесе́ рождества́ Твоего́ сказа́ти язы́к не мо́жет. Пресла́вну бо су́щу зача́тию, Чи́стая, непости́жен е́сть о́браз рожде́ния: иде́же бо хо́щет Бо́г, побежда́ется естества́ чи́н. Те́мже Тя́ вси́, Ма́терь Бо́жию ве́дуще, мо́лим Ти ся приле́жно, моли́ спасти́ся душа́м на́шым.

Вход с кади́лом:

Диа́кон:
Прему́дрость, про́сти.

Све́те Ти́хий:

Хор:
Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.
Диа́кон:
Во́нмем.
Иере́й:
Мир всем.
Хор:
И ду́хови твоему́.

Проки́мен воскре́сный:

Диа́кон:
Прему́дрость во́нмем. Проки́мен, глас 6-й:
Госпо́дь воцари́ся, в ле́поту облече́ся.
Хор:
Госпо́дь воцари́ся, в ле́поту облече́ся.
Диа́кон:
Облече́ся Госпо́дь в си́лу, и препоя́сася.
Хор:
Госпо́дь воцари́ся, в ле́поту облече́ся.
(На каждый стих)
Стих 2.
И́бо утверди́ вселе́нную, я́же не подви́жится.
Стих 3.
До́му Твоему́ подоба́ет святы́ня, Го́споди, в долготу́ дний.
Диа́кон:
Госпо́дь воцари́ся.
Хор:
В ле́поту облече́ся.

Паремии святы́х зе́мли Черка́сския:

Диа́кон:
Прему́дрость.
Чтец:
Дея́ний святы́х апо́стол чте́ние
Диа́кон:
Во́нмем.
  
(глава́ 4):
Чтец:
В ты́я дни собра́шася во Иерусали́м кня́зи, ста́рцы, кни́жницы/ и ели́цы бе́ша от ро́да архиере́йска./ И, поста́влыне Петра́ и Иоа́нна посреде́, вопроша́ху:/ ко́ею си́лою или́ ко́им и́менем исцели́ста хрома́го?/ Петр, испо́лнился Ду́ха Свя́та, рече́:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о че́сом сей спасе́ся,/ разу́мно буди́ всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́нем же ине́м спасе́ния;/ несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам./ Ви́дяще же Петро́во дерзнове́ние и Иоа́нново и разуме́вше,/ я́ко челове́ка некни́жна еста́ и проста́, дивля́хуся,/ знаху же их, я́ко со Иису́сом бе́ста;/ ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся друг со дру́гом, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́д не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га?/ Суди́те: не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я,/ ничто́же обре́тше, ка́ко му́чити их, люди́й ра́ди,/ я́ко вси прославля́ху Бо́га о бы́вшем:/ лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния./ Отпу́щена же бы́вша, приидо́ста ко свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре и вся, я́же в них,/ И́же Ду́хом Святы́м усты́ отца́ на́шего Дави́да, о́трока Твоего́, рекл еси́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ изра́илевыми,/ сотвори́ти, ели́ка рука́ Твоя́ и сове́т Твой преднарече́ быти́./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти, и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.
Диа́кон:
Прему́дрость.
Чтец:
К Тимофе́ю посла́ния свята́го апо́стола Па́вла чте́ние
Диа́кон:
Во́нмем.
  
(глава́ 4):
Чтец:
Ча́до Тимофе́е,/ засвиде́тельствую у́бо аз пред Бо́гом и Го́сподем на́шим Иису́с Христо́м,/ хотя́щим суди́ти живы́м и ме́ртвым в явле́нии Его́ и ца́рствии Его́:/ пропове́дуй сло́во,/ насто́й благовре́мение и безвре́менне,/ обличи́, запрети́, умоли́ со вся́ким долготерпе́нием и уче́нием./ Бу́дет бо вре́мя, егда́ здра́ваго уче́ния не послу́шают,/ но по свои́х по́хотех изберу́т себе́ учи́тели, че́шеми слу́хом,/ и от и́стины слух отвратя́т, и к ба́снем укло́нятся./ Ты же трезви́ся о всем, злопостражди́,/ де́ло сотвори́ благове́стника,/ служе́ние твое́ изве́стно сотвори́./ Аз бо уже́ жрен быва́ю,/ и вре́мя моего́ отше́ствия наста́./ По́двигом до́брым подвиза́хся,/ тече́ние сконча́х, ве́ру соблюдо́х./ Про́чее у́бо соблюда́ется мне вене́ц пра́вды,/ его́же возда́ст ми Госпо́дь в день он, пра́ведный Судия́,/ не то́кмо же мне, но и всем возлю́бльшим явле́ние Его́.
Диа́кон:
Прему́дрость.
Чтец:
К Тимофе́ю посла́ния свята́го апо́стола Па́вла чте́ние
Диа́кон:
Во́нмем.
  
(глава́ 11):
Чтец:
Бра́тие,/ и́же ве́рою победи́ша ца́рствия,/ соде́яша пра́вду, получи́ша обетова́ния,/ загради́ша уста́ львов,/ угаси́ша си́лу о́гненную,/ избего́ша о́стрея меча́,/ возмого́ша от не́мощи,/ бы́ша кре́пцы во бране́х,/ обрати́ша в бе́гство полки́ чужди́х./ Прия́ша жены́ от воскресе́ния ме́ртвых свои́х./ Ини́и же избие́ни бы́ша, не прие́мше избавле́ния,/ да лу́чшее воскресе́ние улуча́т./ Друзи́и же руга́нием и ра́нами искуше́ние прия́ша,/ еще́ же и уз и темни́ц./ Ка́мением побие́ни бы́ша,/ претре́ни бы́ша, искуше́ни бы́ша,/ уби́йством меча́ умро́ша,/ проидо́ша в ми́лотех и в ко́зиях ко́жах,/ лишени, скорбяще, озлбблени./ Йхже не бе досто́ин весь мир,/ в пусты́нях скита́ющеся, и в гора́х, и в верте́пах, и в про́пастех земны́х./ И си́и вси, послу́шествовани бы́вше ве́рою, не прия́ша обетова́ния,/ Бо́гу лу́чшее что о нас предзре́вшу,/ да не без нас соверше́нство прии́мут.

Ектения́ сугу́бая:

Диа́кон:
Рце́м вси от всея́ души́, и от всего́ помышле́ния на́шего рцем.
Хор:
Го́споди, поми́луй.
Диа́кон:
Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.
Хор:
Го́споди, поми́луй.
Диа́кон:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Трижды, на каждое прошение)
Диа́кон:
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих настоя́теля, бра́тии и прихо́жан свята́го хра́ма сего́.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Иере́й:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Сподо́би, Го́споди:

 Хор:
Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.
Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.
Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь. 

Ектения́ проси́тельная:

Диа́кон:
Испо́лним вече́рнюю моли́тву на́шу Го́сподеви.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Ве́чера всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и дру́г дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Бла́г и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.
Иере́й:
Мир всем.
Хор:
И ду́хови твоему́.
Диа́кон:
Главы́ на́ша Го́сподеви прикло́ним.
Хор:
Тебе́, Го́споди.
Иере́й:
Бу́ди держа́ва Ца́рствия Твоего́ благослове́на и препросла́влена. Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Лития́:

  
Поется стихира храма
  
Одна из стихир по указанию настоятеля — из числа вечерних литийных стихир храмового святого (как правило, первая), либо та, которая поется по 50-м псалме на полиелейной утрене. В том случае, если храмовый святой не имеет указанных песнопений (например, шестеричная служба), может быть пропета стихира с «Господи, воззвах» или из другого цикла стихир.
  
Далее стихиры святы́х зе́мли Черка́сския Глас 3:
  
Подо́бен: Егда́ от дре́ва:
Хор:
И́на сла́ва со́лнцу, и и́на сла́ва луне́, и́на же сла́ва зве́здам: звезда́ бо от звезды́ ра́знствует во сла́ве.Те́мже на тве́рди церко́вней сия́ют сла́вою многоразли́чною: святи́телие служе́нием непоро́чным, преподо́бнии у́мным де́ланием, блаже́ннии юро́дством Христа́ ра́ди, му́ченицы ку́пно с новому́чениками и испове́дниками земли́ Черка́сския по́двигами до́блими, кровьми́ и испове́данием ве́ры Правосла́вныя, и вси ку́пно при́сно мо́лят мир земли́ на́шей дарова́ти, и ду́шам на́шим ве́лию ми́лость.
Стихира:
Вся ве́дый Госпо́дь, ко Сла́ве Свое́й ве́рныя Cвоя́ предуготовля́я, избра́ вас, я́ко гро́здие зре́лое, от виногра́дника Черка́сскаго возраще́нное, на Трапе́зу Сына Бо́жия. Чрез страда́ния и смерть теле́сную, я́ко Хлеб сла́дкий Христу́ принесе́ни бы́ша, ны́не же с Ним Безсме́ртныя Трапе́зы наслажда́етеся, неради́вое житие́ на́ше ко спасе́нию напра́вите, пра́здник ваш ны́не све́тло соверша́ющих.
Стихира:
Ми́ра су́етнаго вре́менная нивочто́же вмени́л еси́, Бори́се, испове́дниче и страда́льче му́жественне, гла́дом, хла́дом и рабо́тами тя́жкими от безбо́жных гони́телей истяза́емый, венце́м испове́дническим досто́йно венча́лся еси́, многострада́льне, житие́ свое́ му́ченически сконча́в. Те́мже у́бо моли́ся о земне́м уде́ле твое́м свя́те, земли́ Черноба́евстей в ми́ре пожи́ти.
  
Глас 4
Стихира:
Прииди́те, лю́дие, восхва́лим днесь ку́пно с новому́ченики святи́теля Христо́ва Луку́, врача безме́зднаго и ско́раго на по́мощь, ублажи́м ди́внаго во уго́дницех Бо́жиих преподобному́ченика Мака́рия, науча́ющаго лю́ди сохраня́ти чистоту́ ве́ры, воспое́м святи́теля Софро́ния, те́плаго моли́твенника о ду́шах на́ших, возвели́чим му́ченика Дании́ла, му́жественно претерпе́вшаго да́же до сме́рти от еретико́в. Вси бо сии́ мо́лят Го́спода о спасе́нии душ на́ших.
Стихира:
Прииди́те, ве́рнии, хвалу́ воздади́м новому́ченикам и испове́дникам, в земли́ Черка́сстей пострада́вшим, и ве́ру и́стинную до конца́ соблю́дшим, ти́и бо на Небесе́х ны́не наслажда́ются ра́дости неизрече́нныя.
Стихира:
Приди́те, боголю́бцы, возсла́вим иера́рхов достоблаже́нных, Сильве́стра, святи́теля богому́драго и Васи́лия, священноиспове́дника ди́внаго, сии́ бо гра́да Ка́нева небе́сные покрови́телие и земли́ Черка́сския сла́внии засту́пницы, я́же мо́лят Христа́ насле́дники бы́ти нам ра́дости неизрече́нныя.
  
Стихира святы́х зе́мли Черка́сския Глас 5:
Сла́ва Отцу́ и Сы́ну и Свято́му Ду́ху.
Стихира:
Ра́зум чист и све́тел име́я, я́ко лише́нный о́наго явля́л еси́ себе́, блаже́нне Варфоломе́е, ны́не же воспева́юще по́двиги твоя́, и страда́ния кро́ткия а́гницы Рафаи́лы, преподобному́ченицы Чигири́нския, воспомина́ем, с не́ю же от Лебеди́нския оби́тели му́чениц прехва́льных, Валенти́ну со Смара́гдою днесь почти́м, с ни́ми же Палла́дия, горы́ Афо́нския прозябе́ние честно́е, и Софро́ния, незло́бия пра́вило и терпели́вца изря́днаго, от Ла́вры же Пече́рския Ана́нию, Анато́лия, Иа́кова, И́горя вку́пе со Илиодо́ром, Ипполи́том, Инноке́нтием, Калли́стом, Кассиа́ном, Неофи́том и Феодо́сием и про́чими чернори́зцы пострада́вшими мо́лим: оби́телем, градо́м и ве́сям земли Черка́сския дарова́ти мир и душа́м на́шим спасе́ние.
  
Борогордичен из первого приложения на глас Славы(Глас 5)
И ны́не и при́сно и во ве́ки веко́в. Ами́нь.
Стихира:
Храм и дверь еси́, / пала́та и престо́л Царе́в, / Де́во Всечестна́я, / Е́юже Изба́витель мой, Христо́с Госпо́дь, / во тьме спя́щим яви́ся, / Со́лнце сый пра́вды, просвети́ти хотя́, / я́же созда́ по о́бразу Своему́ руко́ю Свое́ю. / Те́мже, Всепе́тая, / я́ко ма́терне дерзнове́ние к Нему́ стяжа́вшая, / непреста́нно моли́ спасти́ся душа́м на́шим.
Диа́кон:
Спаси́, Бо́же, лю́ди Твоя́ и благослови́ достоя́ние Твое́, посети́ мир Твой ми́лостию и щедро́тами, возвы́си рог христиа́н правосла́вных и низпосли́ на ны ми́лости Твоя́ бога́тыя, моли́твами всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Си́л безпло́тных, честна́го, сла́внаго проро́ка, Предте́чи и Крести́теля Иоа́нна, святы́х сла́вных и всехва́льных Апо́стол, и́же во святы́х оте́ц на́ших и вселе́нских вели́ких учи́телей и святи́телей, Васи́лия Вели́каго, Григо́рия Богосло́ва и Иоа́нна Златоу́стаго, и́же во святы́х отца́ на́шего Никола́я, архиепи́скопа Мирлики́йскаго, чудотво́рца, святы́х равноапо́стольных Мефо́дия и (Имярек), учи́телей слове́нских, святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших: святи́теля Михаи́ла, пе́рваго митрополи́та Ки́евскаго, первосвяти́телей Моско́вских и всея́ Руси́: Петра́, Алекси́я, Ио́ны, Мака́рия, Фили́ппа, И́ова, Ермоге́на и Ти́хона, митрополи́тов Моско́вских Филаре́та, Инноке́нтия и Мака́рия. Святы́х, сла́вных и добропобе́дных му́чеников, новому́чеников и испове́дников Це́ркве Ру́сския: Влади́мира, митрополи́та Ки́евскаго, Вениами́на, митрополи́та Петрогра́дского, Петра́, митрополи́та Крути́цкаго, Иларио́на, архиепи́скопа Вере́йскаго, святы́х ца́рственных страстоте́рпцев, преподобному́чениц вели́кия княги́ни Елисаве́ты и и́нокини Варва́ры, преподо́бных и богоно́сных оте́ц на́ших, преподо́бных оте́ц ста́рцев О́птинских, святы́х пра́ведных Иоа́нна Кроншта́дтскаго и Алекси́я Моско́вскаго, святы́х блаже́нных Ксе́нии Петербу́ржския и Матро́ны Моско́вския, святы́х и пра́ведных богооте́ц Иоаки́ма и А́нны (и святаго имярек, егоже есть храм и егоже есть день), и всех святы́х. Мо́лим Тя́, многоми́лостиве Го́споди, услы́ши нас, гре́шных, моля́щихся Тебе́, и поми́луй нас.
Хор:
Го́споди, поми́луй.
(40 раз)
Диа́кон:
Еще́ мо́лимся о Вели́ком Господи́не и отце́ на́шем Святе́йшем Патриа́рхе Кирилле, и о господи́не на́шем преосвяще́ннейшем митрополи́те (или архиепи́скопе, или епископе имярек) и о всем во Христе́ бра́тстве на́шем, и о вся́кой души́ христиа́нстей, скорбя́щей же и озло́бленней, ми́лости Бо́жия и по́мощи тре́бующей; о покрове́нии гра́да сего́, и живу́щих в нем, о ми́ре, и состоя́нии всего́ мира; о благостоя́нии святы́х Бо́жиих церкве́й; о спасе́нии и по́мощи со тща́нием и стра́хом Бо́жиим тружда́ющихся и служа́щих оте́ц и бра́тий на́ших; о оста́вльшихся и во отше́ствии су́щих; о исцеле́нии в не́мощех лежа́щих; о успе́нии, осла́бе, блаже́нней па́мяти и о оставле́нии грехо́в всех преждеотше́дших оте́ц и бра́тий на́ших, зде лежа́щих и повсю́ду правосла́вных; о избавле́нии плене́нных, и о бра́тиях на́ших во слу́жбах су́щих, и о всех служа́щих и служи́вших во святе́м хра́ме сем рцем.
Хор:
Го́споди, поми́луй.
(50 раз)
Диа́кон:
Еще́ мо́лимся о е́же сохрани́тися гра́ду сему́, и свято́му хра́му сему́, и вся́кому гра́ду и стране́, от гла́да, губи́тельства, тру́са, пото́па, огня́, меча́, наше́ствия иноплеме́нников и междоусо́бныя бра́ни; о е́же ми́лостиву и благоуве́тливу бы́ти благо́му и человеколюби́вому Бо́гу на́шему, отврати́ти вся́кий гнев на ны дви́жимый, и изба́вити ны от належа́щаго и пра́веднаго Своего́ преще́ния и поми́ловати ны́.
Хор:
Го́споди, поми́луй.
(Трижды)
Диа́кон:
Еще́ мо́лимся и о е́же услы́шати Го́споду Бо́гу глас моле́ния нас, гре́шных, и поми́ловати нас.
Хор:
Го́споди, поми́луй.
(Трижды)
Иере́й:
Услы́ши ны, Бо́же, Спа́сителю наш, упова́ние всех конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны. Ми́лостив бо и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.
Иере́й:
Мир всем.
Хор:
И ду́хови твоему́.
Диа́кон:
Главы́ ва́ша Го́сподеви приклони́те.
Хор:
Тебе́, Го́споди.
Иере́й:
Влады́ко многоми́лостиве, Го́споди Иису́се Христе́, Бо́же наш, моли́твами всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Си́л безпло́тных, честна́го, сла́внаго проро́ка, Предте́чи и Крести́теля Иоа́нна, святы́х сла́вных и всехва́льных Апо́стол, и́же во святы́х оте́ц на́ших и вселе́нских вели́ких учи́телей и святи́телей, Васи́лия Вели́каго, Григо́рия Богосло́ва и Иоа́нна Златоу́стаго, и́же во святы́х отца́ на́шего Никола́я, архиепи́скопа Мирлики́йскаго, чудотво́рца, святы́х равноапо́стольных Мефо́дия и (Имярек), учи́телей слове́нских, святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших: святи́теля Михаи́ла, пе́рваго митрополи́та Ки́евскаго, первосвяти́телей Моско́вских и всея́ Руси́: Петра́, Алекси́я, Ио́ны, Мака́рия, Фили́ппа, И́ова, Ермоге́на и Ти́хона, митрополи́тов Моско́вских Филаре́та, Инноке́нтия и Мака́рия. Святы́х, сла́вных и добропобе́дных му́чеников, новому́чеников и испове́дников Це́ркве Ру́сския: Влади́мира, митрополи́та Ки́евскаго, Вениами́на, митрополи́та Петрогра́дского, Петра́, митрополи́та Крути́цкаго, Иларио́на, архиепи́скопа Вере́йскаго, святы́х ца́рственных страстоте́рпцев, преподобному́чениц вели́кия княги́ни Елисаве́ты и и́нокини Варва́ры, преподо́бных и богоно́сных оте́ц на́ших, преподо́бных оте́ц ста́рцев О́птинских, святы́х пра́ведных Иоа́нна Кроншта́дтскаго и Алекси́я Моско́вскаго, святы́х блаже́нных Ксе́нии Петербу́ржския и Матро́ны Моско́вския, святы́х и пра́ведных богооте́ц Иоаки́ма и А́нны (и святаго имярек, егоже есть храм и егоже есть день), и всех святы́х. благоприя́тну сотвори́ моли́тву на́шу, да́руй нам оставле́ние прегреше́ний на́ших, покры́й нас кро́вом крилу́ Твое́ю, отжени́ от нас вся́каго врага́ и супоста́та, умири́ на́шу жизнь. Го́споди, поми́луй нас и мир Твой, и спаси́ ду́ши на́ша, я́ко благ и человеколю́бец.
Хор:
Ами́нь.

Стихи́ры на стихо́вне:

  
Стихи́ры воскре́сные, глас 7:
Стихира:
Воскре́сл еси́ из гро́ба, Спа́се ми́ра, и совоздви́гл еси́ челове́ки с пло́тию Твое́ю: Го́споди, сла́ва Тебе́.
Стих:
Госпо́дь воцари́ся,/ в ле́поту облече́ся.
Воскре́сшему из ме́ртвых, и просвети́вшему вся́, прииди́те поклони́мся: от а́дова бо мучи́тельства на́с свободи́л е́сть, свои́м тридне́вным Воскресе́нием живо́т на́м дарова́вый, и ве́лию ми́лость.
Стих:
И́бо утверди́ вселе́нную,/ я́же не подви́жется.
Во а́д соше́д, Христе́, сме́рть плени́л еси́, и тридне́вен воскре́с, на́с совоскреси́л еси́, сла́вящих Твое́ всеси́льное воста́ние, Го́споди Человеколю́бче.
Стих:
До́му Твоему́ подоба́ет святы́ня,/ Го́споди, в долготу́ дний.
Стра́шен яви́лся еси́, Го́споди, во гро́бе лежя́ я́ко спя́: воскре́с же тридне́вен я́ко си́лен, Ада́ма совоскреси́л еси́ зову́ща: сла́ва Воскресе́нию Твоему́, Еди́не Человеколю́бче.
Сла́ва Отцу́ и Сы́ну и Свято́му Ду́ху
  
Стихира святы́х зе́мли Черка́сския Глас 8:
О́бразы ве́рным, сло́вом, житие́м и к Бо́гу любо́вию яви́шася, священному́ченицы и преподобному́ченицы мно́зи, сердца́ люде́й благочести́вых огне́м ре́вности распаля́я. Ти́и же отце́м свои́м и па́стырем подража́юще, узи́лищ, темни́ц и сме́рти лю́тыя не убоя́шася. Мы же страда́ния их помина́юще, вопие́м: моли́те Бо́га о нас Васи́лие, Пантелеи́моне, Вонифа́тие, Григо́рие, Иу́лие, Ио́сифе и Григо́рие со Стефа́ном, Феодо́том, Григо́рием, Афана́сием, Феофа́ном, Иоа́нном, Кири́ллом, Иа́ковом, Са́ввою и ины́ми мно́гими, отце́в свои́х духо́вных и па́стырей сподви́жники преди́внии.
И ны́не и при́сно и во ве́ки веко́в. Ами́нь.
  
Богородичен святы́х зе́мли Черка́сския:
Влады́чице, приими́ моли́твы раб Твои́х и изба́ви нас от вся́кия ну́жды и печа́ли.

Моли́тва свято́го Симео́на Богоприи́мца:

Хор:
Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Тропа́рь Богоро́дицы, глас 4:

Богоро́дице Де́во, ра́дуйся,/ Благода́тная Мари́е, Госпо́дь с Тобо́ю:/ благослове́на Ты в жена́х/ и благослове́н Плод чре́ва Твоего́,// яко Спа́са родила́ еси душ на́ших.
(Дважды)

Тропарь святы́х зе́мли Черка́сския Глас 5:

Хор:
Всечестны́й Собо́р всеблаже́нных предста́телей на́ших Черка́сскую зе́млю по́двиги и чудесы́ свои́ми озари́вших и кро́вию честно́ю своею и́стину Правосла́вия утверди́вших: новому́чеников и испове́дников, святи́телей и преподо́бных, блаже́нных вку́пе и пра́ведных всих в пе́ниих просла́вим, просвеща́еми доброде́тельми и чудесы́ их пресла́вными, и со умиле́нием к ним возопии́м: уго́дницы Бо́жии возлю́бленнии, моли́теся ко Го́споду спасти́ся душа́м на́шим.

Благослове́ние хле́бов:

Диа́кон:
Го́споду помо́лимся.
Хор:
Го́споди, поми́луй.
Иере́й:
Го́споди Иису́се Христе́ Бо́же наш, благослови́вый пять хле́бов и пять ты́сящ насы́тивый, Сам благослови́ и хле́бы сия́, пшени́цу, вино́ и еле́й; и умно́жи сия́ во гра́де сем и во всем ми́ре Твое́м; и вкуша́ющыя от них ве́рныя освяти́. Я́ко Ты еси́ благословля́яй и освяща́яй вся́ческая, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и Всесвяты́м, и Благи́м, и Животворя́щим Твои́м Ду́хом, ны́не и при́сно и во ве́ки веко́в.
Хор:
Ами́нь. Бу́ди И́мя Госпо́дне благослове́но от ны́не и до ве́ка.
(Трижды)

Псало́м 33:

Хор:
Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/и ли́ца ва́ша не постыдя́тся./ Сей ни́щий воззва́, и Госпо́дь услы́ша и,/ и от все́х скорбе́й его́ спасе́ и./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.
Иере́й:
Благослове́ние Госпо́дне на вас, Того́ благода́тию и человеколю́бием, всегда́, ны́не и при́сно и во ве́ки веко́в.
Хор:
Ами́нь.

У́ТРЕНЯ.

Шестопса́лмие:

Хор:
Сла́ва в вы́шних Бо́гу, и на земли́ мир, в челове́цех благоволе́ние.
(Три́жды)
Го́споди, устне́ мои́ отве́рзеши, и уста́ моя́ возвестя́т хвалу́ Твою́.
(Два́жды)

Псалом 3:

Чтец:
Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.
Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.
Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.
На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.
Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.
На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.
Услы́ши мя, Го́споди, в пра́вде Твое́й и не вни́ди в суд с рабо́м Твои́м.
Услы́ши мя, Го́споди, в пра́вде Твое́й и не вни́ди в суд с рабо́м Твои́м.
Дух Твой Благи́й наста́вит мя на зе́млю пра́ву.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)

Вели́кая ектения́:

Диа́кон:
Ми́ром Го́споду помо́лимся.
Хор:
Го́споди, поми́луй.
(На каждое прошение)
Диа́кон:
О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем, Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея́, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Бог Госпо́дь, глас 7:

Диа́кон:
Бог Госпо́дь, и яви́ся нам, благослове́н Гряды́й во И́мя Госпо́дне.
Стих 1:
Испове́дайтеся Го́сподеви, я́ко благ, я́ко в век ми́лость Его́.
Хор:
Бог Госпо́дь, и яви́ся нам, благослове́н Гряды́й во И́мя Госпо́дне.
(И далее на каждый стих)
Стих 2:
Обыше́дше обыдо́ша мя, и И́менем Госпо́дним противля́хся им.
Стих 3:
Не умру́, но жив бу́ду, и пове́м дела́ Госпо́дня.
Стих 4:
Ка́мень, Его́же небрего́ша зи́ждущии, Сей бы́сть во главу́ у́гла, от Го́спода бысть Сей, и есть ди́вен во очесе́х на́ших.

Тропа́рь воскре́сный, глас 7:

Хор:
Разруши́л еси́ Кресто́м Твои́м сме́рть, отве́рзл еси́ разбо́йнику ра́й: мироно́сицам пла́чь преложи́л еси́, и апо́столом пропове́дати повеле́л еси́: я́ко воскре́сл еси́, Христе́ Бо́же, да́руяй ми́рови ве́лию ми́лость.
Тропарь Собора святы́х зе́мли Черка́сския Глас 5:

Всечестны́й Собо́р всеблаже́нных предста́телей на́ших Черка́сскую зе́млю по́двиги и чудесы́ свои́ми озари́вших и кро́вию честно́ю своею и́стину Правосла́вия утверди́вших: новому́чеников и испове́дников, святи́телей и преподо́бных, блаже́нных вку́пе и пра́ведных всих в пе́ниих просла́вим, просвеща́еми доброде́тельми и чудесы́ их пресла́вными, и со умиле́нием к ним возопии́м: уго́дницы Бо́жии возлю́бленнии, моли́теся ко Го́споду спасти́ся душа́м на́шим.
Сла́ва Отцу́ и Сы́ну и Свято́му Ду́ху
Тропарь Новомучеников святы́х зе́мли Черка́сския Глас 4:

Днесь ра́достно лику́ет Черка́сская земля́, па́мять но́вых му́чеников и испове́дников свои́х прославля́ющи. Ти́и бо кровьми свои́ми ве́ру пред мучи́тели запечатле́ша, и страда́нии до́блими во дни лихоле́тия безбо́жнаго Це́рковь Правосла́вную утверди́ша. Ны́не же мо́лят Всеблага́го Го́спода благослове́нием и ми́ром лю́ди ве́рныя огради́ти, Це́рковь и страну́ на́шу в любви́ и единомы́слии утверди́ти, раско́лы и разделе́ния всеконе́чно упраздни́ти, и душа́м на́шим спасе́ние улучи́ти.
И ны́не и при́сно и во ве́ки веко́в. Ами́нь.
  
Глас 4:
Е́же от ве́ка утае́ное и А́нгелом несве́домое та́инство, Тобо́ю, Богоро́дице, су́щим на земли́ яви́ся Бог, в несли́тном соедине́нии воплоща́емь, и Крест во́лею нас ра́ди восприи́м, и́мже воскреси́в первозда́ннаго, спасе́ от сме́рти ду́ши на́ша.

Кафи́змы:

Хор:
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Кафи́зма втора́я:

Псало́м 9:

Испове́мся Тебе́, Го́споди, всем се́рдцем мои́м, пове́м вся чудеса́ Твоя́. Возвеселю́ся и возра́дуюся о Тебе́, пою́ и́мени Твоему́, Вы́шний. Внегда́ возврати́тися врагу́ моему́ вспять, изнемо́гут и поги́бнут от лица́ Твоего́. Я́ко сотвори́л eси́ суд мой и прю мою́, сел eси́ на Престо́ле, судя́й пра́вду. Запрети́л eси́ язы́ком, и поги́бе нечести́вый, и́мя eго́ потреби́л eси́ в век и в век ве́ка. Врагу́ оскуде́ша oру́жия в коне́ц, и гра́ды разруши́л eси́, поги́бе па́мять eго́ с шу́мом. И Госпо́дь во век пребыва́ет, угото́ва на суд Престо́л Свой, и Той суди́ти и́мать вселе́нней в пра́вду, суди́ти и́мать лю́дем в правоте́. И бысть Госпо́дь прибе́жище убо́гому, помо́щник во благовре́мениих, в ско́рбех. И да упова́ют на Тя зна́ющии и́мя Твое́, я́ко не оста́вил eси́ взыска́ющих Тя, Го́споди. По́йте Го́сподеви, живу́щему в Сио́не, возвести́те во язы́цех начина́ния Его́, я́ко взыска́яй кро́ви их помяну́, не забы́ зва́ния убо́гих. Поми́луй мя, Го́споди, виждь смире́ние мое́ от враг мои́х, вознося́й мя от врат сме́ртных, Я́ко да возвещу́ вся хвалы́ Твоя́ во врате́х дще́ре Сио́ни, возра́дуемся о спасе́нии Твое́м. Углебо́ша язы́цы в па́губе, ю́же сотвори́ша, в се́ти сей, ю́же скры́ша, увязе́ нога́ их. Зна́емь eсть Госпо́дь судьбы́ творя́й, в де́лех руку́ своéю увязе́ гре́шник. Да возвратя́тся гре́шницы во ад, вси язы́цы забыва́ющии Бо́га. Я́ко не до конца́ забве́н бу́дет ни́щий, терпе́ние убо́гих не поги́бнет до конца́. Воскресни́, Го́споди, да не крепи́тся челове́к, да су́дятся язы́цы пред Тобо́ю. Поста́ви, Го́споди, законоположи́теля над ни́ми, да разуме́ют язы́цы, я́ко челове́цы суть. Вску́ю, Го́споди, отстоя́ дале́че, презира́еши во благовре́мениих, в ско́рбех? Внегда́ горди́тися нечести́вому, возгара́ется ни́щий, увяза́ют в сове́тех, я́же помышля́ют. Я́ко хвали́мь eсть гре́шный в по́хотех души́ своея́, и оби́дяй благослови́мь eсть. Раздражи́ Го́спода гре́шный, по мно́жеству гне́ва своего́ не взы́щет, несть Бо́га пред ним. Оскверня́ются путие́ eго́ на вся́ко вре́мя, отъе́млются судьбы́ Твоя́ от лица́ eго́, все́ми враги́ свои́ми облада́ет. Рече́ бо в се́рдце свое́м, не подви́жуся от ро́да в род без зла, eго́же кля́твы уста́ eго́ по́лна суть, и го́рести и льсти, под язы́ком eго́ труд и боле́знь. Приседи́т в лови́тельстве с бога́тыми в та́йных, éже уби́ти непови́ннаго, óчи eго́ на ни́щаго призира́ете. Лови́т в та́йне я́ко лев во огра́де свое́й, лови́т éже восхи́тити ни́щаго, восхи́тити ни́щаго, внегда́ привлещи́ и́ в се́ти свое́й. Смири́т eго́, прекло́нится и паде́т, внегда́ eму́ облада́ти убо́гими. Рече́ бо в се́рдце свое́м: забы́ Бог, отврати́ лице́ Свое́, да не ви́дит до конца́. Воскресни́, Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́. Чесо́ ра́ди прогне́ва нечести́вый Бо́га? Рече́ бо в се́рдце свое́м: не взы́щет. Ви́диши, я́ко Ты боле́знь и я́рость смотря́еши, да пре́дан бу́дет в ру́це Твои́, Тебе́ оста́влен eсть ни́щий, си́ру Ты бу́ди помо́щник. Сокруши́ мы́шцу гре́шному и лука́вому, взы́щется грех eго́ и не обря́щется. Госпо́дь Царь во век и в век ве́ка, поги́бнете, язы́цы, от земли́ Его́. Жела́ние убо́гих услы́шал eси́, Го́споди, угото́ванию се́рдца их внят у́хо Твое́. Суди́ си́ру и смире́ну, да не приложи́т ктому́ велича́тися челове́к на земли́.

Псалом 10:

На Го́спода упова́х, ка́ко рече́те души́ мое́й: превита́й по гора́м, я́ко пти́ца? Я́ко се, гре́шницы наляко́ша лук, угото́ваша стре́лы в ту́ле, состреля́ти во мра́це пра́выя се́рдцем. Зане́ я́же Ты соверши́л eси́, oни́ разруши́ша, пра́ведник же что сотвори́? Госпо́дь во хра́ме святе́м Свое́м. Госпо́дь, на Небеси́ Престо́л Его́, óчи Его́ на ни́щаго призира́ете, ве́жди Его́ испыта́ете сы́ны челове́чeския. Госпо́дь испыта́ет пра́веднаго и нечести́ваго, любя́й же непра́вду ненави́дит свою́ ду́шу. Одожди́т на гре́шники се́ти, oгнь и жу́пел, и дух бу́рен часть ча́ши их. Я́ко пра́веден Госпо́дь, и пра́вды возлюби́, правоты́ ви́де лице́ Его́.
Чтец:
Сла́ва Отцу́ и Сы́ну и Свято́му Ду́ху.
Хор:
И ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Псало́м 11:

Спаси́ мя, Го́споди, я́ко оскуде́ преподо́бный, я́ко ума́лишася и́стины от сыно́в челове́ческих. Су́eтная глаго́ла ки́йждо ко и́скреннему своему́, устне́ льсти́выя в се́рдце, и в се́рдце глаго́лаша зла́я. Потреби́т Госпо́дь вся устны́ льсти́выя, язы́к велере́чивый, ре́кшыя: язы́к наш возвели́чим, устны́ на́ша при нас суть, кто нам Госпо́дь eсть? Стра́сти ра́ди ни́щих и воздыха́ния убо́гих ны́не воскресну́, глаго́лет Госпо́дь, положу́ся во спасе́ние, не обиню́ся о нем. Словеса́ Госпо́дня словеса́ чи́ста, сребро́ разжже́но, искуше́но земли́, очище́но седмери́цею. Ты, Го́споди, сохрани́ши ны и соблюде́ши ны от ро́да сего́ и во век. О́крест нечести́вии хо́дят, по высоте́ Твое́й умно́жил eси́ сы́ны челове́чeския.

Псало́м 12:

Доко́ле, Го́споди, забу́деши мя до конца́? Доко́ле отвраща́еши лице́ Твое́ от менé? Доко́ле положу́ сове́ты в души́ мое́й, боле́зни в се́рдце мое́м день и нощь? Доко́ле вознесе́тся враг мой на мя? При́зри, услы́ши мя, Го́споди Бо́же мой, просвети́ óчи мои́, да не когда́ усну́ в смерть, да не когда́ рече́т враг мой, укрепи́хся на него́. Стужа́ющии ми возра́дуются, а́ще подви́жуся. Аз же на ми́лость Твою́ упова́х, возра́дуется се́рдце мое́ о спасе́нии Твое́м, воспою́ Го́сподеви благоде́явшему мне и пою́ и́мени Го́спода Вы́шняго.

Псало́м 13:

Рече́ безу́мен в се́рдце свое́м: несть Бог. Растле́ша и омерзи́шася в начина́ниих, несть творя́й благосты́ню. Госпо́дь с Небесе́ прини́че на сы́ны челове́чeския, ви́дети, а́ще eсть разумева́яй или́ взыска́яй Бо́га. Вси уклони́шася, вку́пе неключи́ми бы́ша: несть творя́й благосты́ню, несть до eди́наго. Ни ли́ уразуме́ют вси де́лающии беззако́ние, снеда́ющии лю́ди моя́ в снедь хле́ба? Го́спода не призва́ша. Та́мо убоя́шася стра́ха, иде́же не бе страх, я́ко Госпо́дь в ро́де пра́ведных. Сове́т ни́щаго посрами́сте, Госпо́дь же упова́ние eго́ eсть. Кто даст от Сио́на спасе́ние Изра́илево? Внегда́ возврати́т Госпо́дь плене́ние люде́й Свои́х, возра́дуется Иа́ков, и возвесели́тся Изра́иль.
Чтец:
Сла́ва Отцу́ и Сы́ну и Свято́му Ду́ху.
Хор:
И ны́не и при́сно и во ве́ки веко́в. Аминь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Псалом 14:

Го́споди, кто обита́ет в жили́щи Твое́м? Или́ кто всели́тся во святу́ю го́ру Твою́? Ходя́й непоро́чен и де́лаяй пра́вду, глаго́ляй и́стину в се́рдце свое́м. И́же не ульсти́ язы́ком свои́м и не сотвори́ и́скреннему своему́ зла, и поноше́ния не прия́т на бли́жния своя́. Уничиже́н eсть пред ним лука́внуяй, боя́щыя же ся Го́спода сла́вит, клены́йся и́скреннему свое́му и не отмета́яся. Сребра́ своего́ не даде́ в ли́хву и мзды на непови́нных не прия́т. Творя́й сия́ не подви́жится во век.

Псалом 15:

Сохрани́ мя, Го́споди, я́ко на Тя упова́х. Рех Го́сподеви: Госпо́дь мой eси́ Ты, я́ко благи́х мои́х не тре́буеши. Святы́м, и́же суть на земли́ Его́, удиви́ Госпо́дь вся хоте́ния Своя́ в них. Умно́жишася не́мощи их, по сих ускори́ша: не соберу́ собо́ры их от крове́й, ни помяну́ же име́н их устна́ма мои́ма. Госпо́дь часть достоя́ния моего́ и ча́ши моея́, Ты eси́ устроя́яй достоя́ние мое́ мне. У́жя нападо́ша ми в держа́вных мои́х, и́бо достоя́ние мое́ держа́вно eсть мне. Благословлю́ Го́спода, вразуми́вшаго мя, eще́ же и до но́щи нака́заша мя утро́бы моя́. Предзре́х Го́спода предо мно́ю вы́ну, я́ко одесну́ю менé eсть, да не подви́жуся. Сего́ ра́ди возвесели́ся се́рдце мое́, и возра́довася язы́к мой, eще́ же и плоть моя́ всели́тся на упова́нии. Я́ко не оста́виши ду́шу мою́ во а́де, ниже́ да́си преподо́бному Твоему́ ви́дети истле́ния. Сказа́л ми eси́ пути́ живота́, испо́лниши мя весе́лия с лице́м Твои́м, красота́ в десни́це Твое́й в коне́ц.

Псалом 16:

Услы́ши, Го́споди, пра́вду мою́, вонми́ моле́нию моему́, внуши́ моли́тву мою́ не во устна́х льсти́вых. От лица́ Твоего́ судьба́ моя́ изы́дет, óчи мои́ да ви́дита правоты́. Искуси́л eси́ се́рдце мое́, посети́л eси́ но́щию, искуси́л мя eси́, и не обре́теся во мне непра́вда. Я́ко да не возглаго́лют уста́ моя́ дел челове́ческих, за словеса́ усте́н Твои́х аз сохрани́х пути́ же́стоки. Соверши́ стопы́ моя́ во стезя́х Твои́х, да не подви́жутся стопы́ моя́. Аз воззва́х, я́ко услы́шал мя eси́, Бо́же, приклони́ у́хо Твое́ мне и услы́ши глаго́лы моя́. Удиви́ ми́лости Твоя́, спаса́яй упова́ющыя на Тя от проти́вящихся десни́це Твое́й. Сохрани́ мя, Го́споди, я́ко зе́ницу óка, в кро́ве крилу́ Твоéю покры́еши мя. От лица́ нечести́вых остра́стших мя, врази́ мои́ ду́шу мою́ одержа́ша. Тук свой затвори́ша, уста́ их глаго́лаша горды́ню. Изгоня́щии мя ны́не обыдо́ша мя, óчи свои́ возложи́ша уклони́ти на зе́млю. Объя́ша мя я́ко лев гото́в на лов и я́ко ски́мен обита́яй в та́йных. Воскресни́, Го́споди, предвари́ я́ и запни́ им, изба́ви ду́шу мою́ от нечести́ваго, oру́жие Твое́ от враг руки́ Твоея́, Го́споди, от ма́лых от земли́, раздели́ я́ в животе́ их, и сокрове́нных Твои́х испо́лнися чре́во их, насы́тишася сыно́в, и оста́виша оста́нки младе́нцeм свои́м. Аз же пра́вдою явлю́ся лицу́ Твоему́, насы́щуся, внегда́ яви́ти ми ся сла́ве Твое́й.
Чтец:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Твоя́ держа́ва и Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Хор:
Ами́нь.

Седа́льны воскре́сные, глас 7:

Жи́знь во гро́бе возлежа́ше, и печа́ть на ка́мени надлежа́ше, я́ко Царя́ спя́ща во́ини стрежа́ху Христа́: и а́нгели сла́вляху я́ко Бо́га безсме́ртна, жены́ же взыва́ху: воскре́се Госпо́дь, подая́ ми́рови ве́лию ми́лость.
Стих:
Воскресни́ Го́споди Бо́же мой, да вознесе́тся рука́ Твоя́,/ не забу́ди убо́гих Твои́х до конца́.
Тридне́вным погребе́нием Твои́м плени́вый сме́рть, и истле́вша челове́ка живоно́сным воста́нием Твои́м воскреси́вый, Христе́ Бо́же, я́ко Человеколю́бец, сла́ва Тебе́.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Богородичен:
Я́ко на́шего воскресе́ния сокро́вище, / на Тя наде́ющияся, Всепе́тая, / от ро́ва и глубины́ прегреше́ний возведи́, / Ты бо пови́нныя греху́ спасла́ еси́, / ро́ждшая Спасе́ние на́ше, / Я́же пре́жде рождества́ Де́ва, и в рождестве́ Де́ва, / и по рождестве́ па́ки пребыва́еши Де́ва.
Хор:
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Кафи́зма тре́тья:

Псало́м 17:

Возлюблю́ Тя, Го́споди, кре́посте моя́. Госпо́дь утвержде́ние мое́, и прибе́жище мое́, и Изба́витель Moй, Бог мой, Помо́щник мой, и упова́ю на Него́, Защи́титель мой, и рог спасе́ния моего́, и Засту́пник мой. Хваля́ призову́ Го́спода и от враг мои́х спасу́ся. Одержа́ша мя боле́зни сме́ртныя, и пото́цы беззако́ния смято́ша мя, боле́зни а́довы обыдо́ша мя, предвари́ша мя се́ти сме́ртныя. И внегда́ скорбе́ти ми, призва́х Го́спода, и к Бо́гу моему́ воззва́х, услы́ша от хра́ма Свята́го Своего́ глас мой, и вопль мой пред Ним вни́дет во у́ши Его́. И подви́жеся, и тре́петна бысть земля́, и основа́ния гор смято́шася и подвиго́шася, я́ко прогне́вася на ня Бог. Взы́де дым гне́вом Его́, и огнь от лица́ Его́ воспла́менится, у́глие возгоре́ся от Него́. И приклони́ небеса́, и сни́де, и мрак под нога́ма Его́. И взы́де на Херуви́мы, и лете́, лете́ на крилу́ ве́треню. И положи́ тму закро́в Свой, о́крест Его́ селе́ние Его́, темна́ вода́ во о́блацех возду́шных. От облиста́ния пред Ним о́блацы проидо́ша, град и у́глие о́гненное. И возгреме́ с Небесе́ Госпо́дь и Вы́шний даде́ глас Свой. Низпосла́ стре́лы и разгна́ я́, и мо́лнии умно́жи и смяте́ я́. И яви́шася исто́чницы водни́и, и откры́шася основа́ния вселе́нныя, от запреще́ния Твоего́, Го́споди, от дохнове́ния ду́ха гне́ва Твоего́. Низпосла́ с высоты́, и прия́т мя, восприя́т мя от вод мно́гих. Изба́вит мя от враго́в мои́х си́льных и от ненави́дящих мя, я́ко утверди́шася па́че мене́. Предвари́ша мя в день озлобле́ния моего́, и бысть Госпо́дь утверже́ние мое́. И изведе́ мя на широту́, изба́вит мя, я́ко восхоте́ мя. И возда́ст ми Госпо́дь по пра́вде мое́й и по чистоте́ руку́ мое́ю возда́ст ми. Я́ко сохрани́х пути́ Госпо́дни и не нече́ствовах от Бо́га моего́. Я́ко вся судьбы́ Его́ предо мно́ю и оправда́ния Его́ не отступи́ша от мене́. И бу́ду непоро́чен с Ним, и сохраню́ся от беззако́ния моего́. И возда́ст ми Госпо́дь по пра́вде мое́й и по чистоте́ руку́ мое́ю пред очи́ма Его́. С преподо́бным преподо́бен бу́деши, и с му́жем непови́нным непови́нен бу́деши, и со избра́нным избра́н бу́деши, и со стропти́вым разврати́шися. Я́ко Ты лю́ди смире́нныя спасе́ши и о́чи го́рдых смири́ши. Я́ко Ты просвети́ши свети́льник мой, Го́споди, Бо́же мой, просвети́ши тму мою́. Я́ко Тобо́ю изба́влюся от искуше́ния и Боѓом мои́м прейду́ сте́ну. Бог мой, непоро́чен путь Его́, словеса́ Госпо́дня разжже́на, Защи́титель есть всех упова́ющих на Него́. Я́ко кто бог, ра́зве Го́спода? или́ кто бог, ра́зве Бо́га на́шего? Бог препоясу́яй мя си́лою, и положи́ непоро́чен путь мой. Соверша́яй но́зе мои́, я́ко еле́ни, и на высо́ких поставля́яй мя. Науча́яй ру́це мои́ на брань, и положи́л еси́ лук ме́дян мы́шца моя́. И дал ми еси́ защище́ние спасе́ния, и десни́ца Твоя́ восприя́т мя, и наказа́ние Твое́ испра́вит мя в коне́ц, и наказа́ние Твое́ то мя научи́т. Ушири́л еси́ стопы́ моя́ подо мно́ю, и не изнемого́сте плесне́ мои́. Пожену́ враги́ моя́, и пости́гну я́, и не возвращу́ся, до́ндеже сконча́ются. Оскорблю́ их, и не возмо́гут ста́ти, паду́т под нога́ма мои́ма. И препоя́сал мя еси́ си́лою на брань, спял еси́ вся востаю́щыя на мя под мя. И враго́в мои́х дал ми еси́ хребе́т, и ненави́дящыя мя потреби́л еси́. Воззва́ша, и не бе спаса́яй: ко Го́споду, и не услы́ша их. И истню́ я́ я́ко прах пред лице́м ве́тра, я́ко бре́ние путе́й погла́жду я́. Изба́виши мя от пререка́ния люде́й, поста́виши мя во главу́ язы́ков. Лю́дие, и́хже не ве́дех, рабо́таша ми. В слух у́ха послу́шаша мя. Сы́нове чужди́и солга́ша ми. Сы́нове чужди́и обетша́ша и охромо́ша от стезь свои́х. Жив Госпо́дь, и благослове́н Бог, и да вознесе́тся Бог спасе́ния моего́. Бог дая́й отмще́ние мне и покори́вый лю́ди под мя. Изба́витель мой от враг мои́х гневли́вых, от востаю́щих на мя вознесе́ши мя, от му́жа непра́ведна изба́виши мя. Сего́ ра́ди испове́мся Тебе́ во язы́цех, Го́споди, и и́мени Твоему́ пою́: велича́яй спасе́ния царе́ва, и творя́й ми́лость христу́ Своему́ Дави́ду, и се́мени eго́ до ве́ка.
Чтец:
Сла́ва Отцу́ и Сы́ну и Свято́му Ду́ху.
Хор:
И ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Псало́м 18:

Небеса́ пове́дают сла́ву Бо́жию, творе́ние же руку́ Его́ возвеща́ет твердь. День дни отрыга́ет глаго́л, и нощь но́щи возвеща́ет ра́зум. Не суть ре́чи, ниже́ словеса́, и́хже не слы́шатся гла́си их. Во всю зе́млю изы́де веща́ние их и в концы́ вселе́нныя глаго́лы их. В со́лнце положи́ селе́ние Свое́, и Той, я́ко Жени́х исходя́й от черто́га Своего́, возра́дуется, я́ко Исполи́н тещи́ путь. От кра́я небесе́ исхо́д Его́, и сре́тение Его́ до кра́я небесе́, и несть и́же укры́ется теплоты́ Его́. Зако́н Госпо́день непоро́чен, обраща́яй ду́шы, свиде́тельство Госпо́дне ве́рно, умудря́ющее младе́нцы. Оправда́ния Госпо́дня пра́ва, веселя́щая се́рдце, за́поведь Госпо́дня светла́, просвеща́ющая о́чи. Страх Госпо́день чист, пребыва́яй в век ве́ка: судьбы́ Госпо́дни и́стинны, оправда́ны вку́пе, вожделе́нны па́че зла́та и ка́мене че́стна мно́га, и сла́ждша па́че ме́да и со́та. И́бо раб Твой храни́т я́, внегда́ сохрани́ти я́, воздая́ние мно́го. Грехопаде́ния кто разуме́ет? От та́йных мои́х очи́сти мя, и от чужди́х пощади́ раба́ Твоего́, а́ще не облада́ют мно́ю, тогда́ непоро́чен бу́ду и очи́щуся от греха́ вели́ка. И бу́дут во благоволе́ние словеса́ уст мои́х, и поуче́ние се́рдца моего́ пред Тобо́ю вы́ну, Го́споди, Помо́щниче мой и Изба́вителю мой.

Псало́м 19:

Услы́шит тя Госпо́дь в день печа́ли, защи́тит тя и́мя Бо́га Иа́ковля. По́слет ти по́мощь от Свята́го и от Сио́на засту́пит тя. Помяне́т вся́ку же́ртву твою́, и всесожже́ние твое́ ту́чно бу́ди. Даст ти Госпо́дь по се́рдцу твоему́ и весь сове́т твой испо́лнит. Возра́дуемся о спасе́нии твое́м и во и́мя Го́спода Бо́га на́шего возвели́чимся. Испо́лнит Госпо́дь вся проше́ния твоя́. Ны́не позна́х, я́ко спасе́ Госпо́дь христа́ Своего́, услы́шит eго́ с Небесе́ Свята́го Своего́, в си́лах спасе́ние десни́цы Его́. Си́и на колесни́цах, и си́и на ко́нех, мы же во и́мя Го́спода Бо́га на́шего призове́м. Ти́и спя́ти бы́ша и падо́ша, мы же воста́хом и испра́вихомся. Го́споди, спаси́ царя́ и услы́ши ны, во́ньже а́ще день призове́м Тя.

Псало́м 20:

Го́споди, си́лою Твое́ю возвесели́тся царь и о спасе́нии Твое́м возра́дуется зело́. Жела́ние се́рдца eго́ дал еси́ eму́, и хоте́ния устну́ eго́ не́си лиши́л eго́. Я́ко предвари́л еси́ eго́ благослове́нием благосты́нным, положи́л еси́ на главе́ eго́ вене́ц от ка́мене че́стна. Живота́ проси́л есть у Тебе́, и дал еси́ eму́ долготу́ дний во век ве́ка. Ве́лия сла́ва eго́ спасе́нием Твои́м, сла́ву и велеле́пие возложи́ши на него́. Я́ко да́си eму́ благослове́ние во век ве́ка, возвесели́ши eго́ ра́достию с лице́м Твои́м. Я́ко царь упова́ет на Го́спода, и ми́лостию Вы́шняго не подви́жится. Да обря́щется рука́ Твоя́ всем враго́м Твои́м, десни́ца Твоя́ да обря́щет вся ненави́дящыя Тебе́. Я́ко положи́ши их я́ко пещь о́гненную во вре́мя лица́ Твоего́, Госпо́дь гне́вом Свои́м смяте́т я́, и сне́сть их огнь. Плод их от земли́ погуби́ши, и се́мя их от сыно́в челове́ческих. Я́ко уклони́ша на Тя зла́я, помы́слиша сове́ты, и́хже не возмо́гут соста́вити. Я́ко положи́ши я́ хребе́т, во избы́тцех Твои́х угото́виши лице́ их. Вознеси́ся, Го́споди, си́лою Твое́ю, воспое́м и пое́м си́лы Твоя́.
Чтец:
Сла́ва Отцу́ и Сы́ну и Свято́му Ду́ху.
Хор:
И ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Псало́м 21:

Бо́же, Бо́же мой, вонми́ ми, вску́ю оста́вил мя еси́? Дале́че от спасе́ния моего́ словеса́ грехопаде́ний мои́х. Бо́же мой, воззову́ во дни, и не услы́шиши, и в нощи́, и не в безу́мие мне. Ты же во Святе́м живе́ши, хвало́ Изра́илева. На Тя упова́ша отцы́ на́ши, упова́ша и изба́вил еси́ я́. К Тебе́ воззва́ша, и спасо́шася, на Тя упова́ша, и не постыде́шася. Аз же есмь червь, а не челове́к, поноше́ние челове́ков и уничиже́ние люде́й. Вси ви́дящии мя поруга́ша ми ся, глаго́лаша устна́ми, покива́ша главо́ю: упова́ на Го́спода, да изба́вит eго́, да спасе́т eго́, я́ко хо́щет eго́. Я́ко Ты еси́ исто́ргий мя из чре́ва, упова́ние мое́ от сосцу́ ма́тере моея́. К Тебе́ приве́ржен есмь от ложе́сн, от чре́ва ма́тере моея́ Бог мой еси́ Ты. Да не отсту́пиши от мене́, я́ко скорбь близ, я́ко несть помога́яй ми. Обыдо́ша мя тельцы́ мно́зи, юнцы́ ту́чнии одержа́ша мя. Отверзо́ша на мя уста́ своя́, я́ко лев восхища́яй и рыка́яй. Я́ко вода́ излия́хся, и разсы́пашася вся ко́сти моя́, бысть се́рдце мое́ я́ко воск, та́яй посреде́ чре́ва моего́. И́зсше я́ко скуде́ль кре́пость моя́, и язы́к мой прильпе́ горта́ни моему́, и в персть сме́рти свел мя еси́. Я́ко обыдо́ша мя пси мно́зи, сонм лука́вых одержа́ша мя, ископа́ша ру́це мои́ и но́зе мои́. Исчето́ша вся ко́сти моя́, ти́и же смотри́ша и презре́ша мя. Раздели́ша ри́зы моя́ себе́, и о оде́жди мое́й мета́ша жре́бий. Ты же, Го́споди, не удали́ по́мощь Твою́ от мене́, на заступле́ние мое́ вонми́. Изба́ви от ору́жия ду́шу мою́, и из руки́ пе́сии единоро́дную мою́. Спаси́ мя от уст льво́вых и от рог единоро́жь смире́ние мое́. Пове́м и́мя Твое́ бра́тии мое́й, посреде́ це́ркве воспою́ Тя. Боя́щиися Го́спода, восхвали́те Его́, все се́мя Иа́ковле, просла́вите Его́, да убои́тся же от Него́ все се́мя Изра́илево. Я́ко не уничижи́, ниже́ негодова́ моли́твы ни́щаго, ниже́ отврати́ лице́ Свое́ от мене́, и егда́ воззва́х к Нему́, услы́ша мя. От Тебе́ похвала́ моя́, в це́ркви вели́цей испове́мся Тебе́, моли́твы моя́ возда́м пред боя́щимися Его́. Ядя́т убо́зии и насы́тятся, и восхва́лят Го́спода взыска́ющии Его́, жива́ бу́дут сердца́ их в век ве́ка. Помяну́тся и обратя́тся ко Го́споду вси концы́ земли́, и покло́нятся пред Ним вся оте́чествия язы́к. Я́ко Госпо́дне есть ца́рствие, и Той облада́ет язы́ки. Ядо́ша и поклони́шася вси ту́чнии земли́, пред Ним припаду́т вси низходя́щии в зе́млю, и душа́ моя́ Тому́ живе́т. И се́мя мое́ порабо́тает Ему́, возвести́т Го́сподеви род гряду́щий. И возвестя́т пра́вду Его́ лю́дем ро́ждшымся, я́же сотвори́ Госпо́дь.

Псало́м 22:

Госпо́дь пасе́т мя, и ничто́же мя лиши́т. На ме́сте зла́чне, та́мо всели́ мя, на воде́ поко́йне воспита́ мя. Ду́шу мою́ обрати́, наста́ви мя на стези́ пра́вды, и́мене ра́ди Своего́. А́ще бо и пойду́ посреде́ се́ни сме́ртныя, не убою́ся зла, я́ко Ты со мно́ю еси́, жезл Твой и па́лица Твоя́, та мя уте́шиста. Угото́вал еси́ предо мно́ю трапе́зу сопроти́в стужа́ющым мне, ума́стил еси́ еле́ом главу́ мою́, и ча́ша Твоя́ упоява́ющи мя, я́ко держа́вна. И ми́лость Твоя́ пожене́т мя вся дни живота́ моего́, и е́же всели́ти ми ся в дом Госпо́день, в долготу́ дний.

Псало́м 23:

Госпо́дня земля́, и исполне́ние ея́, вселе́нная и вси живу́щии на ней. Той на моря́х основа́л ю есть, и на река́х угото́вал ю есть. Кто взы́дет на го́ру Госпо́дню? или́ кто ста́нет на ме́сте святе́м Его́? Непови́нен рука́ма и чист се́рдцем, и́же не прия́т всу́е ду́шу свою́, и не кля́тся ле́стию и́скреннему своему́. Сей прии́мет благослове́ние от Го́спода, и ми́лостыню от Бо́га, Спа́са своего́. Сей род и́щущих Го́спода, и́щущих лице́ Бо́га Иа́ковля. Возми́те врата́ кня́зи ва́ша, и возми́теся врата́ ве́чная, и вни́дет Царь сла́вы. Кто есть се́й Царь сла́вы? Госпо́дь кре́пок и си́лен, Госпо́дь си́лен в бра́ни. Возми́те врата́ кня́зи ва́ша, и возми́теся врата́ ве́чная, и вни́дет Царь сла́вы. Кто есть се́й Царь сла́вы? Госпо́дь сил, Той есть Царь сла́вы.
Чтец:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Благ и Человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.

Седа́льны воскре́сные, глас 7:

Запеча́тану гро́бу, живо́т от гро́ба возсия́л еси́, Христе́ Бо́же: и две́рем заключе́нным, ученико́м предста́л еси́ все́х Воскресе́ние, Ду́х Пра́вый те́ми обновля́я на́м, по вели́цей Твое́й ми́лости.
Стих:
Испове́мся Тебе́ Го́споди всем се́рдцем мои́м,/ пове́м вся чудеса́ Твоя́.
На гро́б теча́ху жены́, со слеза́ми Ми́ра Нося́щя: и во́ином стрегу́щым Тя́ все́х Царя́, глаго́лаху к себе́: кто́ отвали́т на́м ка́мень? Воскре́се вели́ка Сове́та А́нгел, попра́вый сме́рть: всеси́льне Го́споди, сла́ва Тебе́.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Богоро́дичен
Ра́дуйся, благода́тная Богоро́дице Де́во, приста́нище и предста́тельство ро́да челове́ческаго, из Тебе́ бо воплоти́ся Изба́витель ми́ра: еди́на бо еси́ Ма́ти и Де́ва, при́сно благослове́на и препросла́влена. Моли́ Христа́ Бо́га ми́р дарова́ти все́й вселе́нней.

Полиеле́й:

Хор:
Хвали́те И́мя Госпо́дне, хвали́те, раби́ Го́спода.
Аллилу́иа, аллилу́иа, аллилу́иа.
Благослове́н Госпо́дь от Сио́на, живы́й во Иерусали́ме.
Аллилу́иа, аллилу́иа, аллилу́иа.
Испове́дайтеся Го́сподеви, я́ко Благ, я́ко в век ми́лость Его́.
Аллилу́иа, аллилу́иа, аллилу́иа.
Испове́дайтеся Бо́гу Небе́сному, я́ко в век ми́лость Его́.
Аллилу́иа, аллилу́иа, аллилу́иа.

Велича́ние:

Духовенство:
Велича́ем вас, святи́телие, преподо́бнии, му́ченицы, испове́дницы и вси святи́и земли́ Черка́сския, и воспева́ем по́двиги и страда́ния ва́ша во утвержде́ние в земли́ на́шей Правосла́вия.
Хор:
Велича́ем вас, святи́телие, преподо́бнии, му́ченицы, испове́дницы и вси святи́и земли́ Черка́сския, и воспева́ем по́двиги и страда́ния ва́ша во утвержде́ние в земли́ на́шей Правосла́вия.
Хор:

Тропари́ воскре́сные, глас 5:

Хор:
Благослове́н еси́, Го́споди,/ научи́ мя оправда́нием Твои́м./
Ангельски́й собо́р удиви́ся,/ зря́ Тебе́ в ме́ртвых вмени́вшася,/ сме́ртную же, Спа́се, кре́пость разори́вша,/ и с Собо́ю Ада́ма воздви́гша,// и от ада вся свобождша.
Благослове́н еси́, Го́споди,/ научи́ мя оправда́нием Твои́м./
Почто́ ми́ра с ми́лостивными слеза́ми,/ о учени́цы растворя́ете?/ Блиста́яйся во гро́бе а́нгел/ мироно́сицам веща́ше:/ ви́дите вы гро́б и уразуме́йте,// Спас бо воскре́се от гро́ба.
Благослове́н еси́, Го́споди,/ научи́ мя оправда́нием Твои́м./
Зело́ ра́но мироно́сицы теча́ху/ ко гро́бу Твоему́ рыда́ющия,/ но предста́ к ним а́нгел, и рече́:/ рыда́ния вре́мя преста́, не пла́чите,// воскресе́ние же апо́столом рцы́те.
Благослове́н еси́, Го́споди,/ научи́ мя оправда́нием Твои́м./
Мироно́сицы жены́, с ми́ры прише́дша/ ко гро́бу Твоему́, Спа́се, рыда́ху,/ а́нгел же к ним рече́, глаго́ля:/ что с ме́ртвыми Жива́го помышля́ете?// Я́ко Бог бо воскре́се от гро́ба.
Сла́ва Отцу́ и Сы́ну и Свято́му Ду́ху./
Поклони́мся Отцу́,/ и Его́ Сы́нови, и Свято́му Ду́ху,/ Святе́й Тро́ице во еди́ном существе́, с Серафи́мы зову́ще:/ Свят, Свят, Свят еси́, Го́споди.
И ны́не и при́сно и во ве́ки веко́в. Ами́нь./
Жизнода́вца ро́ждши,/ греха́, Де́во, Ада́ма изба́вила еси́,/ ра́дость же Е́ве в печа́ли ме́сто подала́ еси́;/ па́дшия же от жи́зни/ к сей напра́ви,// из Тебе́ воплоти́выйся Бог и Челове́к.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Благослови́ся И́мя Твое́, и просла́вися Ца́рство Твое́, Отца́ и Сы́на и Свята́го Ду́ха ны́не и при́сно и во ве́ки веко́в.
Хор:
Ами́нь.

Ипакои́, глас 7:

И́же на́ш зра́к восприе́мый, и претерпе́вый Кре́ст пло́тски, спаси́ мя воскресе́нием Твои́м, Христе́ Бо́же, я́ко Человеколю́бец.

Седа́лены по полиелее

  
Седален святы́х зе́мли Черка́сския по 1-м стихословии
  
Собору Черкасских святых Глас 5:
Свети́ла пресла́внии на тве́рди церко́вней яви́лися есте́, Собо́ре всечестны́й предста́телей на́ших преди́вных, по́двиги свои́ми святы́ми зе́млю на́шу озари́вших, святи́телей и испове́дников, му́чеников дре́вних и но́вых, преподо́бных и пра́ведных. Сии́ бо земли́ Черка́сския и Це́ркви Правосла́вныя духо́вное украше́ние и от зол огражде́ние.
  
Седален святы́х зе́мли Черка́сския по 2-м стихословии
  
новомученикам черкасским Глас 1:
Ве́рнии Бо́гови да́же до сме́рти яви́лися есте́, новому́ченицы прехва́льнии, ни страда́ния бо, ни гоне́ния, ни сама́ смерть не возмого́ша разлучи́ти вас от любве́ Христо́вы, ны́не же с Ним соца́рствующе, грехо́в мно́жества проще́ния испроси́те нам, Це́рковь Бо́жию в земли́ Черка́сстей сохраня́юще.
Сла́ва Отцу́ и Сы́ну и Свято́му Ду́ху./
  
Седален святы́х зе́мли Черка́сския
  
Глас 5:
Хвали́те и́мя Госпо́дне, хвали́те, раби́ Го́спода, стоя́щии во хра́ме Госпо́дни, во дво́рех до́му Бо́га на́шего. Хвали́те Ди́внаго во святы́х Свои́х Бо́га, да́вшаго земли́ на́шей моли́твенников пла́менных, стопы́ на́ша направля́ющих ко благоче́стию, сердца́ на́ша дви́жущих ко славосло́вию Тро́ицы Единосу́щныя и Неразде́льныя.
И ны́не и при́сно и во ве́ки веко́в. Ами́нь./
  
Богоро́дичен:
Досто́йно есть велича́ти Тя, Пресвята́я Де́во, пе́сньми благоле́пными, и пра́ведно есть моли́тися Тебе́, Влады́чице Богоро́дице: пе́ния на́ша с с́онмом святы́х и новому́чеников земли́ Черка́сския приноси́мыя Тебе́ приими́, покры́й нас от вся́каго зла честны́м Твои́м омофо́ром, и Сы́ну Твоему́ Боже́ственному Сы́ну помоли́ся, я́ко да Це́рковь Правосла́вную сохрани́т от нахожде́ний вра́жиих.

Степе́нна, глас 7:

1 Антифо́н:

Хор:
Пле́н Сио́нь от ле́сти обрати́в, и мене́, Спа́се, оживи́, изъима́я рабо́тныя стра́сти.
(Два́жды)
В ю́г се́яй ско́рби по́стныя со сле́зами, се́й ра́достныя по́жнет рукоя́ти присноживопита́ния.
(Два́жды)
Сла́ва Отцу́ и Сы́ну и Свято́му Ду́ху.
Святы́м Ду́хом исто́чник Боже́ственных сокро́вищ, от Него́же прему́дрость, ра́зум, стра́х: Тому́ хвала́ и сла́ва, че́сть и держа́ва.
И ны́не и при́сно и во ве́ки веко́в. Ами́нь.
Святы́м Ду́хом исто́чник Боже́ственных сокро́вищ, от Него́же прему́дрость, ра́зум, стра́х: Тому́ хвала́ и сла́ва, че́сть и держа́ва.

2 Антифо́н:

А́ще не Госпо́дь сози́ждет до́м душе́вный, всу́е тружда́емся: ра́зве бо того́ ни дея́ние, ни сло́во соверша́ется.
(Дважды)
Плода́ чре́вна, святи́и духодви́жно прозяба́ют оте́ческая преда́ния, сыноположе́ния.
(Дважды)
Сла́ва Отцу́ и Сы́ну и Свято́му Ду́ху.
Святы́м Ду́хом, вся́ческая е́же бы́ти и́мут: пре́жде бо все́х Бо́г, все́х Госпо́дьство, Све́т непристу́пен, Живо́т все́х.
И ны́не и при́сно и во ве́ки веко́в. Ами́нь.
Святы́м Ду́хом, вся́ческая е́же бы́ти и́мут: пре́жде бо все́х Бо́г, все́х Госпо́дьство, Све́т непристу́пен, Живо́т все́х.

3 Антифо́н:

Боя́щиися Го́спода, пути́ живота́ обре́тше, ны́не и при́сно ублажа́ются сла́вою нетле́нною.
(Дважды)
О́крест трапе́зы Твоея́, я́ко сте́блие ви́дя исча́дия Твоя́, ра́дуйся и весели́ся, приводя́ сия́ Христо́ви Пастыренача́льнику (пастыренача́льниче).
(Дважды)
Сла́ва Отцу́ и Сы́ну и Свято́му Ду́ху.
Святы́м Ду́хом глубина́ дарова́ний, бога́тство сла́вы, суде́б глубина́ ве́лия: единосла́вен Отцу́, и Сы́ну, служи́мь бо.
И ны́не и при́сно и во ве́ки веко́в. Ами́нь.
Святы́м Ду́хом глубина́ дарова́ний, бога́тство сла́вы, суде́б глубина́ ве́лия: единосла́вен Отцу́, и Сы́ну, служи́мь бо.

Проки́мен и чте́ние Ева́нгелия:

Диа́кон:
Вонмем. Премудрость вонмем, прокимен, глас седмый:
Воскре́сни́ Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.
Хор:
Воскре́сни́ Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.
Диа́кон:
Испове́мся Тебе́ Го́споди все́м се́рдцем мои́м, пове́м вся чудеса́ Твоя.
Хор:
Воскре́сни́ Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.
Диа́кон:
Воскре́сни́ Го́споди Бо́же мо́й, да вознесе́тся рука́ Твоя́
Хор:
не забу́ди убо́гих Твои́х до конца́.
Диа́кон:
Го́споду помо́лимся.
Хор:
Го́споди, поми́луй.
Иере́й:
Я́ко Свят еси́ Бо́же наш, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.
Диа́кон:
Вся́кое дыха́ние да хва́лит Го́спода.
Хор:
Вся́кое дыха́ние да хва́лит Го́спода.
Диа́кон:
Хвали́те Бо́га во святы́х Его́, хвали́те Его́ во устверже́нии си́лы Его́.
Хор:
Вся́кое дыха́ние да хва́лит Го́спода.
Диа́кон:
Вся́кое дыха́ние.
Хор:
Да хва́лит Го́спода.
Диа́кон:
И о сподо́битися нам слы́шанию Свята́го Ева́нгелиа, Го́спода Бо́га мо́лим.
Хор:
Го́споди, поми́луй.
(Трижды)
Диа́кон:
Прему́дрость, про́сти, услы́шим Свята́го Ева́нгелия.
Иере́й
Мир всем.
Хор:
И ду́хови твоему́.
Иере́й:
От Луки́ Свята́го Ева́нгелия чте́ние.
Хор:
Сла́ва, Тебе́, Го́споди, сла́ва Тебе́.
Диа́кон:
Во́нмем.
  
(Евангелие воскресное 5-е, зачало 113.,Лк.24:12-35:)
Иере́й:
Во вре́мя о́но, Петр воста́в тече́ ко гро́бу и прини́к ви́де ри́зы еди́ны лежа́щя, и оты́де, в себе́ дивя́ся бы́вшему. И се два от них бе́ста иду́ща в то́йже день в весь отстоя́щу ста́дий шестьдеся́т от Иерусали́ма, е́йже и́мя Еммау́с, и та бесе́доваста к себе́ о всех сих приклю́чшихся. И бысть бесе́дующема и́ма и совопроща́ющемася, и Сам Иису́с прибли́жися идя́ше с ни́ма, о́чи же ею́ держа́стеся, да Его́ не позна́ета. Рече́ же к ни́ма: что суть словеса́ сия́, о ни́хже стяза́етася к себе́ иду́ща, и еста́ дря́хла? Отвеща́в же еди́н, ему́же и́мя Клео́па, рече́ к Нему́: Ты ли еди́н пришле́ц еси́ во Иерусали́м, и не уве́де бы́вших в нем во дни сия́? И рече́ и́ма: ки́их? О́на же ре́ста Ему́: я́же о Иису́се Назаряни́не, И́же бысть муж проро́к, си́лен де́лом и сло́вом пред Бо́гом и все́ми людьми́, ка́ко преда́ша Его́ архиере́и и кня́зи на́ши на осужде́ние сме́рти и распя́ша Его́. Мы же наде́яхомся, я́ко Сей есть хотя́ изба́вити Изра́иля, но и над все́ми си́ми, тре́тий сей день и́мать днесь, отне́лиже сия́ бы́ша. Но и жены́ не́кия от нас ужаси́ша ны, бы́вшыя ра́но у гро́ба, и не обре́тше телесе́ Его́, приидо́ша, глаго́люще, и явле́ние А́нгел ви́девше, и́же глаго́лют Его́ жи́ва. И идо́ша не́цыи от нас ко гро́бу и обрето́ша та́ко, я́коже и жены́ ре́ша, Самого́ же не ви́деша. И Той рече́ к нима: о несмы́сленная и ко́сная се́рдцем, е́же ве́ровати о всех, я́же глаго́лаша проро́цы. Не сия́ ли подоба́ше пострада́ти Христу́ и вни́ти в сла́ву Свою́? И наче́н от Моисе́а и от всех проро́к, сказа́ше и́ма от всех Писа́ний я́же о Нем. И прибли́жишася в весь, в ню́же идя́ста, и Той творя́шеся далеча́йше ити́. И ну́ждаста Его́, глаго́люще: обля́зи с на́ма, я́ко к ве́черу есть, и преклони́лся есть день. И вни́де с ни́ма облещи́. И бысть я́ко возлеже́ с ни́ма, и прии́м хлеб благослови́, и преломи́в дая́ше и́ма. О́нема же отверзо́стеся о́чи, и позна́ста Его́, и Той неви́димь бысть и́ма. И реко́ста к себе́: не се́рдце ли на́ю горя́ бе в на́ю, егда́ глаго́лаше на́ма на пути́ и я́ко ска́зоваше на́ма Писа́ния? И воста́вша в той час, возврати́стася во Иерусали́м и обрето́ста совоку́плены единагона́десяте и и́же бя́ху с ни́ми, глаго́лющих, я́ко вои́стинну воста́ Госпо́дь и яви́ся Си́мону. И та пове́даста, я́же бы́ша на пути́, и я́ко позна́ся и́ма в преломле́нии хле́ба.
Хор:
Сла́ва, Тебе́, Го́споди, сла́ва Тебе́.

Воскре́сная песнь по Ева́нгелии, глас 6:

Воскресе́ние Христо́во ви́девше,/ поклони́мся Свято́му Го́споду Иису́су,/ еди́ному безгре́шному,/ Кресту́ Твоему́ покланя́емся, Христе́,/ и свято́е Воскресе́ние Твое́ пое́м и сла́вим:/ Ты бо еси́ Бог наш,/ ра́зве Тебе́ ино́го не зна́ем,/ и́мя Твое́ имену́ем./ Прииди́те вси ве́рнии,/ поклони́мся Свято́му Христо́ву Воскресе́нию:/ се бо прии́де Кресто́м ра́дость всему́ ми́ру./ Всегда́ благословя́ще Го́спода,/ пое́м Воскресе́ние Его́:/ распя́тие бо претерпе́в,// сме́ртию смерть разруши́.

Псало́м 50:

Чтец:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.
  
Глас 6:
Хор:

Сла́ва Отцу́ и Сы́ну и Свято́му Ду́ху.

/ Моли́твами апо́столов,/ Ми́лостиве, очи́сти// мно́жество согреше́ний на́ших.

И ны́не и при́сно и во ве́ки веко́в. Ами́нь.

/ Моли́твами Богоро́дицы,/ Ми́лостиве, очи́сти// мно́жество согреше́ний на́ших.
Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра воскре́сная, глас 6:

Воскре́с Иису́с от гро́ба,/ я́коже прорече́,/ даде́ нам живо́т ве́чный// и ве́лию ми́лость.
Диа́кон:
Спаси́, Бо́же, лю́ди Твоя́ и благослови́ достоя́ние Твое́, посети́ мир Твой ми́лостию и щедро́тами, возвы́си рог христиа́н правосла́вных и низпосли́ на ны ми́лости Твоя́ бога́тыя, моли́твами всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Си́л безпло́тных, честна́го, сла́внаго проро́ка, Предте́чи и Крести́теля Иоа́нна, святы́х сла́вных и всехва́льных Апо́стол, и́же во святы́х оте́ц на́ших и вселе́нских вели́ких учи́телей и святи́телей, Васи́лия Вели́каго, Григо́рия Богосло́ва и Иоа́нна Златоу́стаго, и́же во святы́х отца́ на́шего Никола́я, архиепи́скопа Мирлики́йскаго, чудотво́рца, святы́х равноапо́стольных Мефо́дия и (Имярек), учи́телей слове́нских, святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших: святи́теля Михаи́ла, пе́рвого митрополи́та Ки́евскаго, первосвяти́телей Моско́вских и всея́ Руси́: Петра́, Алекси́я, Ио́ны, Мака́рия, Фили́ппа, И́ова, Ермоге́на и Ти́хона, митрополи́тов Моско́вских Филаре́та, Инноке́нтия и Мака́рия. Святы́х, сла́вных и добропобе́дных му́чеников, новому́чеников и испове́дников Це́ркве Ру́сския: Влади́мира, митрополи́та Ки́евскаго, Вениами́на, митрополи́та Петрогра́дского, Петра́, митрополи́та Крути́цкаго, Иларио́на, архиепи́скопа Вере́йскаго, святы́х ца́рственных страстоте́рпцев, преподобному́чениц вели́кия княги́ни Елисаве́ты и и́нокини Варва́ры, преподо́бных и богоно́сных оте́ц на́ших, преподо́бных оте́ц ста́рцев О́птинских, святы́х пра́ведных Иоа́нна Кроншта́дтскаго и Алекси́я Моско́вскаго, святы́х блаже́нных Ксе́нии Петербу́ржския и Матро́ны Моско́вския, святы́х и пра́ведных богооте́ц Иоаки́ма и А́нны (и святаго имярек, егоже есть храм и егоже есть день), и всех святы́х. Мо́лим Тя́, многоми́лостиве Го́споди, услы́ши нас, гре́шных, моля́щихся Тебе́, и поми́луй нас.
Хор:
Го́споди, поми́луй.
(12 раз)
Иере́й:
Ми́лостию и щедро́тами и человеколю́бием единоро́днаго Твоего́ Сы́на, с Ни́мже благослове́н еси́, со Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Хор:
Ами́нь.

Кано́н:

Песнь 1:

  
Канон Воскре́сный, глас 7:
Хор:
Ирмо́с:
Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ пе́снь побе́дную.
Чтец:
Припев:
Сла́ва, Го́споди, свято́му Воскресе́нию Твоему́.
Тропарь:
Осуди́ся сме́ртное мучи́тельство Дре́вом, непра́ведною сме́ртию осужде́ну Ти́, Го́споди: отню́дуже кня́зь тьмы́ Тебе́ не одоле́в, пра́ведно изгна́н бы́сть.
Припев:
Сла́ва, Го́споди, свято́му Воскресе́нию Твоему́.
Тропарь:
А́д Тебе́ прибли́жися, и зубы́ не возмо́г сте́рти те́ло Твое́, челюстьми́ сокруши́ся. Отню́дуже Спа́се, боле́зни разру́ш сме́ртныя, воскре́сл еси́ тридне́вен.
Припев:
Пресвята́я Богоро́дице, спаси́ нас.
Богоро́дичен
Разреши́шася боле́зни прама́тере Евы: боле́зни бо избежа́вше, неискусому́жно родила́ еси́. Отню́дуже я́ве Богоро́дицу, Пречи́стая, ве́дуще Тя́, вси́ сла́вим.
  
Кано́н Богоро́дицы из Окто́иха, глас 7:
Припев:
Пресвята́я Богоро́дице, спаси́ нас.
Тропарь:
Бе́здну ро́ждшая благоутро́бия, Де́во, ду́шу мою́ озари́ светоно́сным Твои́м сия́нием, я́ко да досто́йно воспою́ Твои́х чуде́с бе́здну.
Припев:
Пресвята́я Богоро́дице, спаси́ нас.
Тропарь:
Стрело́ю грехо́вною уя́звлены на́с Сло́во ви́дев, я́ко Благоде́тель уще́дри: отню́дуже несказа́нно соедини́ся, Всечи́стая, пло́тию, и́же из Тебе́ (пло́ти я́же из тебе́) Пребоже́ственный.
  
Канон святы́х зе́мли Черка́сския(На 8), Глас 6:
Припев:
Вси святи́и земли́ Черка́сския, моли́те Бо́га о нас.
Тропарь:
Прославля́яй при́сно вся святы́я, Бо́же наш, ны́не и нас, недосто́йных, сподо́би сы́новне просла́вити святы́х сро́дников на́ших, святи́телей, му́чеников и преподо́бных, ку́пно с новому́чениками и испове́дниками земли́ Черка́сския, я́же Це́рковь Правосла́вная воспита́.
(Трижды)
Припев:
Вси святи́и земли́ Черка́сския, моли́те Бо́га о нас.
Тропарь:
Отверзти уста наша не́мощныя помози́те нам на славосло́вие ва́ше, да по достоя́нию велича́ти вас возмо́жем, вси святи́и, в земли́ Черка́сстей просия́вшии и кровьми́ свои́ми ри́зу церко́вную убели́вшии, благоче́стия свети́льницы, я́же Це́рковь Правосла́вная воспита́.
(Трижды)
Сла́ва Отцу́ и Сы́ну и Свято́му Ду́ху.
Христа́ Го́спода при́сно моли́те, богоизбра́нный собо́ре и всепе́тый, да ми́лостию Свое́ю сохрани́т род христиа́нский, и ми́ром огради́т зе́млю Черка́сскую. Вы бо есте́ засту́пницы на́ши небе́сныя, я́же Це́рковь Правосла́вная воспита́.
И ны́не и при́сно и во ве́ки веко́в. Ами́нь.
Богородичен:
Воспева́юще Покро́в Твой, Ма́ти Де́во, и́мже от злых избавле́ние прия́хом, Тя при́сно мо́лим в Правосла́вии ны недви́жимы утверди́ти, назида́ние прие́млюще от иску́сных в по́двизех святы́х земли́ на́шея, я́же Це́рковь Правосла́вная воспита́.

Катавасия , Глас 4:

Ирмос:
Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся све́тло торжеству́я,// и воспою́ ра́дуяся Тоя́ чудеса́.

Песнь 3:

  
Канон Воскре́сный, глас 7:
Хор:
Ирмо́с:
В нача́ле небеса́ всеси́льным Сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом всю́ си́лу и́х, на недви́жимем мя́ ка́мени испове́дания Твоего́ утверди́.
Чтец:
Припев:
Сла́ва, Го́споди, свято́му Воскресе́нию Твоему́.
Тропарь:
Ты́ возше́д на Дре́во, о на́с боле́знуеши во́лею, благоутро́бне Спа́се, и терпи́ши я́зву, примире́ния хода́тайственну, и спасе́ния ве́рным: е́юже Твоему́, Ми́лостиве, вси́ примири́хомся Роди́телю.
Припев:
Сла́ва, Го́споди, свято́му Воскресе́нию Твоему́.
Тропарь:
Ты́ мя очи́стив от я́звы, душе́ю уя́звленнаго зми́евым угрызе́нием, Христе́, и показа́л еси́ све́т, во тьме́ дре́вле мне́ слежа́щу и во тле́нии: кресто́м бо во а́д соше́д, мене́ совоскреси́л еси́.
Припев:
Пресвята́я Богоро́дице, спаси́ нас.
Богоро́дичен
Неискусому́жныя Твоея́ Ма́тере мольба́ми ми́р ми́рови пода́ждь, Спа́се, и несказа́нныя Твоея́ сла́вы славосло́вящыя Тя́ сподо́би.
  
Кано́н Богоро́дицы из Окто́иха, глас 7:
Припе́в:
Пресвята́я Богоро́дице, спаси́ нас.
Тропарь:
Зми́й поползы́й из Еде́ма, мене́ обоже́ния жела́нием прельсти́в, ве́рже в зе́млю: но И́же ми́лостив, и естество́м благоутро́бен, уще́дрив богосоде́ла, во чре́во твое́ все́лься, и подо́бен мне́ бы́в, Ма́ти Де́во.
Припе́в:
Пресвята́я Богоро́дице, спаси́ нас.
Тропарь:
Благослове́н пло́д Твоего́ чре́ва, Де́во Богоро́дице, все́х ра́досте, ра́дость бо всему́ ми́ру родила́ еси́, и весе́лие вои́стинну разгоня́ющее печа́ль грехо́вную, Богоневе́сто.
  
Канон святы́х зе́мли Черка́сския(На 8), Глас 6:
Припев:
Вси святи́и земли́ Черка́сския, моли́те Бо́га о нас.
Тропарь:
А́нгелов соприча́стники бы́ти упова́ем моли́твами ва́шими, адама́нты ве́ры, в земли́ Черка́сстей я́вленнии, святи́телие ди́вныя, преподо́бнии и богоно́снии отцы́ и ма́тери, му́ченицы добропобе́днии, новому́ченицы и испове́дницы ду́хом кре́пцыи. Сего́ ра́ди мо́лим вас: во Правосла́вии утверди́те ча́да ва́ша духо́вныя.
(Трижды)
Припев:
Вси святи́и земли́ Черка́сския, моли́те Бо́га о нас.
Тропарь:
Ли́ка предста́телие богои́збраннаго со́нма святы́х земли́ Черка́сския, у Престо́ла Вседержи́теля предстоя́щии, Мака́рие преподобному́чениче, и ты, му́чениче Дании́ле, моли́теся ко Го́споду, да от бед изба́вит люди Своя́, и в Правосла́вии утверди́т ча́да ва́ша духо́вныя.
(Трижды)
Сла́ва Отцу́ и Сы́ну и Свято́му Ду́ху.
У Престо́ла Тро́ицы Живонача́льныя моли́твою и ве́рою совоку́пленнии, святи́и трие́ му́ченицы, Влади́мире, Паи́сие и Са́вво, ва́шими те́плыми моли́твами бу́дите хода́таи на́шего спасе́ния, и в Правосла́вии утверди́те ча́да ва́ша духо́вныя.
И ны́не и при́сно и во ве́ки веко́в. Ами́нь.
Богородичен:
Попече́нием Тво́им Ма́терним, Бого́родице, тьму грехо́в на́ших отго́ниши, от вся́каго зла огражда́еши Це́рковь и зе́млю Черка́сскую, к Сы́ну Твоему́ и Бо́гу за ны моля́щи, е́же во Правосла́вии утверди́ти ча́да Твоя́.

Катавасия , Глас 4:

Ирмос:
Твоя́ песносло́вцы, Богоро́дице,/ живы́й и незави́стный Исто́чниче,/ ли́к себе́ совоку́пльшыя духо́вно утверди́/ в Боже́ственней Твое́й сла́ве,// венце́в сла́вы сподо́би.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Ты еси́ Бог наш, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Кондак святы́х зе́мли Черка́сския Глас 6:

Хода́таи о нас неусы́пнии, предста́телие земли́ Черка́сския сла́внии, святи́телие, преподо́бнии, му́ченицы и испове́дницы всепе́тии, не пре́зрите моле́ний недосто́йных чад ва́ших, но поспеши́те на по́мощь нам, во умиле́нии днесь взыва́ющим: ускори́те на моли́тву и потщи́теся на умоле́ние, моля́шеся непреста́нно о ве́рою чту́щих вас.

И́кос:

Собо́ра всечестна́го святы́х земли́ Черка́сския па́мять чту́ще, вене́ц слове́сный исплете́м и пе́сньми восхва́лим Боже́ственнаго Уте́шителя, дарова́вшаго благода́ть Свою́ кому́ждо на по́льзу, и любо́вию всесоверше́ннейшею ороси́вшаго сердца́ ве́рных Свои́х. Сего́ ра́ди Го́спода песносло́вяще, ублажа́ем вас, засту́пницы на́ши, вы же непреста́нно моли́теся о ве́рою чту́щих вас.

Седален святы́х зе́мли Черка́сския Глас 4:

Богокра́сный ли́че, сонм и́збранный святы́х уго́дников Бо́жиих, земли́ Черка́сския во́инство непобеди́мое, о Це́ркви вои́нствующей и ра́тниках ея́, епи́скопех, свяще́нницех и диа́конех, чи́не мона́хов и миря́н сосло́вии, в преде́лах Черка́сских житие́ свое́ провожда́ющих, непреста́нно Христу́ моли́теся, да во благоче́стии оте́честем и ве́ре И́стинней до сконча́ния ве́ка непоколеби́ми пребу́дем.
Хор:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Не умолчи́м никогда́, Пресвята́я Де́во, во бра́нех духо́вных по́мощь нам Тобо́ю подае́мую воспева́ти, о́бразы бо Свои́ми зе́млю на́шу благослови́ла еси́, моле́ния на́ша пред ни́ми непреста́нно возноси́мыя Своему́ Сы́ну прино́сиши, от нужд и обстоя́ний разли́чных нас избавля́еши, Влады́чице Всепе́тая.

Песнь 4:

  
Канон Воскре́сный, глас 7:
Хор:
Ирмо́с:
О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче.
Чтец:
Припев:
Сла́ва, Го́споди, свято́му Воскресе́нию Твоему́.
Тропарь:
Бо́га распина́ема пло́тию зря́щи тва́рь растаява́шеся стра́хом: но содержи́тельною дла́нию на́с ра́ди Распя́таго, кре́пко держи́ма бе́.
Припев:
Сла́ва, Го́споди, свято́му Воскресе́нию Твоему́.
Тропарь:
Сме́ртию сме́рть разоре́на лежи́т окая́нная без дыха́ния: Живота́ бо не терпя́щи Боже́ственнаго прираже́ния, умерщвля́ется кре́пкий13, и да́руется все́м воскресе́ние.
Припев:
Пресвята́я Богоро́дице, спаси́ нас.
Богоро́дичен
Боже́ственнаго рождества́ Твоего́, Чи́стая, вся́кий естества́ чи́н превосхо́дит чу́до: Бо́га бо преесте́ственне зачала́ еси́ во чре́ве, и ро́ждши пребыва́еши при́сно Де́ва.
  
Кано́н Богоро́дицы из Окто́иха, глас 7:
Припе́в:
Пресвята́я Богоро́дице, спаси́ нас.
Тропарь:
Тле́нную мою́ пло́ть и сме́ртную, Всечи́стая Богома́ти, из чре́ва Твоего́ несказа́нно прие́м Благи́й, и обезтле́нив сию́, ве́чне Себе́ связа́л е́сть.
Припе́в:
Пресвята́я Богоро́дице, спаси́ нас.
Тропарь:
Бо́га воплоща́ема из Тебе́ зря́ще, Де́во, ужаса́хуся стра́хом ли́цы а́нгельстии, и я́ко Ма́терь Бо́жию немо́лчными пе́сньми Тя́ почита́ют.
  
Канон святы́х зе́мли Черка́сския(На 8), Глас 6:
Припев:
Вси святи́и земли́ Черка́сския, моли́те Бо́га о нас.
Тропарь:
Ре́вность по Бо́зе име́я, я́коже и проро́к Илия́, казначе́й не́когда оби́тели Золотоно́шския стяжа́ сокро́вища небе́сная. Егда́ же поста́ви тя Госпо́дь на служе́ние святи́тельское, вся́каго власть иму́щаго учил еси́ пра́во ходи́ти в зако́не Госпо́дни, заступа́ти немощны́я, си́рых и вдови́ц от напа́сти избавля́ти, к ни́щим ми́лостивым бы́ти, Софро́ние достосла́вне, моли́ся от тя́жких и лю́тых нам спасти́ся.
(Дважды)
Припев:
Вси святи́и земли́ Черка́сския, моли́те Бо́га о нас.
Тропарь:
Испове́дника Христо́ва досто́йно воспева́ем ны́не, во святи́телех сла́внаго Васи́лия, архиере́я града Ка́нева, Ева́нгелия глаго́лов ве́чных возвести́теля, смире́нием бога́того, в годи́ну гоне́ний Це́ркви ре́вностно служи́вшаго и мно́гих и́стинному богосло́вию научи́вшаго, взыва́юще: моли́твами твои́ми, о́тче, от тя́жких и лю́тых ны спаси́.
(Дважды)
Припев:
Вси святи́и земли́ Черка́сския, моли́те Бо́га о нас.
Тропарь:
Ны́не взыва́ем к вам, до́брии во́ини Христо́ви, священному́ченицы Ко́рсунстии, Льве пресви́тере и Алекси́е диа́коне, и́мате бо му́дрость от Го́спода Це́рковь Бо́жию защища́ти от безбо́жных гони́телей и раско́ла учи́телей, от тя́жких и лю́тых ны спаси́те.
(Дважды)
Сла́ва Отцу́ и Сы́ну и Свято́му Ду́ху.
Отверго́стеся лжесвиде́тельств на святи́теля Константи́на, не убоя́вшеся стра́шных преще́ний, священному́ченицы Алекса́ндре и Васи́лие, со ины́ми му́чениками земли́ Городи́щенския, пра́вду Бо́жию возлюби́ли есте́ па́че обе́щанных земны́х благ. Тем же мо́лим вас: от тя́жких и лю́тых ны спаси́те.
И ны́не и при́сно и во ве́ки веко́в. Ами́нь.
Богородичен:
Ши́ршая небе́с, Де́во и Ма́ти Бо́жия, а́нгельских чино́в по благода́ти вы́шшая и сла́вою Боже́ственною преукра́шенная, покры́й нас Твои́м честны́м омофо́ром и от тя́жких и лю́тых ны спаси́.

Катавасия , Глас 4:

Ирмос:
Седя́й в сла́ве/ на Престо́ле Божества́,/ во о́блаце ле́гце/ прии́де Иису́с Пребоже́ственный,/ нетле́нною дла́нию, и спасе́ зову́щыя:// сла́ва, Христе́, си́ле Твое́й.

Песнь 5:

  
Канон Воскре́сный, глас 7:
Хор:
Ирмо́с:
Но́щь не светла́ неве́рным, Христе́, ве́рным же просвеще́ние в сла́дости слове́с Твои́х: Сего́ ра́ди к Тебе́ у́тренюю, и воспева́ю Твое́ Божество́.
Чтец:
Припев:
Сла́ва, Го́споди, свято́му Воскресе́нию Твоему́.
Тропарь:
За Твоя́ рабы́ продае́шися, Христе́, и по лани́те ударе́ние терпи́ши, свобо́де хода́тайственно пою́щым: к Тебе́ у́тренюю, и воспева́ю Твое́ Божество́.
Припев:
Сла́ва, Го́споди, свято́му Воскресе́нию Твоему́.
Тропарь:
Боже́ственною Твое́ю си́лою, Христе́, не́мощию плотско́ю кре́пкаго низложи́л еси́, и победи́теля мя́ сме́рти, Спа́се, воскресе́нием показа́л еси́.
Припев:
Пресвята́я Богоро́дице, спаси́ нас.
Богоро́дичен
Бо́га родила́ еси́, Ма́ти Чи́стая, воплоще́ннаго из Тебе́ Боголе́пно, Всепе́тая: поне́же не позна́ла еси́ му́жеска по́ла, но от Свята́го ражда́еши Ду́ха.
  
Кано́н Богоро́дицы из Окто́иха, глас 7:
Припе́в:
Пресвята́я Богоро́дице, спаси́ нас.
Тропарь:
Ле́ствицу узре́в Иа́ков, к высоте́ утвержде́ну, о́бразу научи́ся, неискусобра́чная Тебе́: Тобо́ю бо Бо́г челове́ком приобщи́ся, Всечи́стая Влады́чице.
Припе́в:
Пресвята́я Богоро́дице, спаси́ нас.
Тропарь:
Избавле́ние ве́чное Тобо́ю, Де́во, ны́не обре́тше усе́рдно зове́м Ти́: е́же ра́дуйся, Богоневе́стная: и Твои́м све́том возра́довавшеся, Всепе́тая, пе́сньми Тя́ пое́м.
  
Канон святы́х зе́мли Черка́сския(На 8), Глас 6:
Припев:
Вси святи́и земли́ Черка́сския, моли́те Бо́га о нас.
Тропарь:
Ублажа́ем вас, свети́льницы пресве́тлии земли́ Черка́сския, собо́р святы́й соста́вльшии: святи́телие, му́ченицы и преподо́бнии, у́тренюем вам ны́не: моли́те Христа́ о почита́ющих па́мять ва́шу.
(Дважды)
Припев:
Вси святи́и земли́ Черка́сския, моли́те Бо́га о нас.
Тропарь:
Чигирина́ украше́ние драгоце́нное, игу́мение сла́вная Рафаи́ло, с Варфоломе́ем блаже́нным, апо́столу тезоимени́тым! Припа́дающе к моще́м ва́шим, коле́на се́рдца преклоня́ем и мо́лимся сле́зно: моли́те Христа́ о почита́ющих па́мять ва́шу.
(Дважды)
Припев:
Вси святи́и земли́ Черка́сския, моли́те Бо́га о нас.
Тропарь:
Евге́ние, Григо́рие и Варна́во, священному́ченицы до́блии, со мно́гими ины́ми му́чениками от земли́ Черка́сския происходя́щими заточе́ннии, во страда́ниях и го́рьких рабо́тах на острове́х Солове́цких подвиза́вшиися, к покая́нию и доброде́тельному житию́ подви́гните нас, да сподо́бимся при́сно прославля́ти Го́спода. сего́ ра́ди моли́те Христа́ о почита́ющих па́мять ва́шу.
(Дважды)
Сла́ва Отцу́ и Сы́ну и Свято́му Ду́ху.
Ра́дуется сла́вный град Ка́нев и весе́лия исполня́ется вся земля́ Черка́сская, моли́твами укрепля́емая святи́телей богому́дрых, Сильве́стра, писа́теля духо́внаго и Васи́лия, испове́дника хра́браго. К ни́мже взыва́ем ны́не: моли́те Христа́ о почита́ющих па́мять ва́шу.
И ны́не и при́сно и во ве́ки веко́в. Ами́нь.
Богородичен:
Красото́ Це́ркви, Богоро́дице! Стена́ необори́мая и Покро́в всемощны́й явила́ся еси́ новому́ченикам и всем подви́жникам Черка́сским, Пресвята́я Де́во, те́мже Тя велича́ем, почита́юще па́мять их.

Катавасия , Глас 4:

Ирмос:
Ужасо́шася вся́ческая/ о Боже́ственней сла́ве Твое́й:/ Ты́ бо, неискусобра́чная Де́во,/ име́ла еси́ во утро́бе над все́ми Бо́га,/ и родила́ еси́ безле́тнаго Сы́на,/ все́м воспева́ющым Тя́// ми́р подава́ющая.

Песнь 6:

  
Канон Воскре́сный, глас 7:
Хор:
Ирмо́с:
Пла́вающаго в молве́ жите́йских попече́ний, с корабле́м потопля́ема грехи́, и душетле́нному зве́рю примета́ема, я́ко Ио́на, Христе́, вопию́ Ти: из смертоно́сныя глубины́ возведи́ мя.
Чтец:
Припев:
Сла́ва, Го́споди, свято́му Воскресе́нию Твоему́.
Тропарь:
Воспомина́ху Тя́ заключе́нныя во а́де ду́шы, и оста́вльшыяся пра́ведных, и от Тебе́ спасе́ния моля́хуся: е́же кресто́м, Христе́, по́дал еси́ преиспо́дним, прише́д я́ко Благоутро́бен.
Припев:
Сла́ва, Го́споди, свято́му Воскресе́нию Твоему́.
Тропарь:
Ко одушевле́нному Твоему́ и нерукотворе́нному хра́му, разруше́ну бы́вшу страда́ньми, воззре́ти па́ки ли́к апо́стольский отча́яся: но па́че наде́жды покло́нься, воскре́сша повсю́ду пропове́да.
Припев:
Пресвята́я Богоро́дице, спаси́ нас.
Богоро́дичен
Неизрече́ннаго рождества́ Твоего́ всенепоро́чнаго о́браз, Де́во Богоневе́стная, и́же на́с ра́ди, кто́ от челове́к сказа́ти возмо́жет? Я́ко Бо́г неопи́санне, Сло́во соедини́вся Тебе́, пло́ть из Тебе́ бы́сть.
  
Кано́н Богоро́дицы из Окто́иха, глас 7:
Припе́в:
Пресвята́я Богоро́дице, спаси́ нас.
Тропарь:
Зако́ннии Тя́ о́бразы, и проро́ческая прорече́ния я́ве предвозвеща́ху, хотя́щую роди́ти благоде́теля, Чи́стая, всея́ тва́ри, многоча́стне и многообра́зне благоде́йствовавшаго ве́рно воспева́ющих Тя́.
Припе́в:
Пресвята́я Богоро́дице, спаси́ нас.
Тропарь:
Устра́ншагося дре́вле наве́том человекоуби́йцы, Ада́ма первозда́ннаго ра́йския Боже́ственныя сла́дости, Неискусобра́чная па́ки возвела́ еси́, ро́ждши и́же от преступле́ния на́с изба́вившаго.
  
Канон святы́х зе́мли Черка́сския(На 8), Глас 6:
Припев:
Вси святи́и земли́ Черка́сския, моли́те Бо́га о нас.
Тропарь:
А́нгеле земны́й и челове́че небе́сный, преподобному́чениче Мака́рие, от ю́ности Христа́ возлюби́вый и до после́днего издыха́ния Ему́ ве́рный пребы́вый, испроси́ у Го́спода моли́твами свои́ми, уго́дниче Бо́жий, ве́лию ми́лость пою́щим: Ди́вен Бог во святы́х Свои́х, зе́млю Черка́сскую благослови́вый.
(Трижды)
Припев:
Вси святи́и земли́ Черка́сския, моли́те Бо́га о нас.
Тропарь:
Святи́телю о́тче Софро́ние, освяти́ся земля́ на́ша твои́ми моли́твами и по́двигами, и ны́не при́зри на лю́ди, я́же с ве́рою и любо́вию про́сят по́мощи твоея́ и заступле́ния, пою́ще: Ди́вен Бог во святы́х Свои́х, зе́млю Черка́сскую благослови́вый.
(Трижды)
Сла́ва Отцу́ и Сы́ну и Свято́му Ду́ху.
Святи́телю о́тче Луко́, врачу́ и испове́дниче, любве́ преиспо́лненный, ты во окре́стных зе́млях гра́да Черка́сс лю́ди утеша́л еси́, и от боле́зней душе́вных и теле́сных тех исцеля́л еси́. И ны́не бу́ди ми́лостивый цели́тель ду́ша́м и телесе́м всем, ве́рно моля́щимтися и воспева́ющих Христа́: Ди́вен Бог во святы́х Свои́х, зе́млю Черка́сскую благослови́вый.
И ны́не и при́сно и во ве́ки веко́в. Ами́нь.
Богородичен:
К Тебе́ прибега́юще, Преблагослове́нная Богоро́дице, спаса́емся вси. Ра́зве Тебе́, Присноде́во, ины́я по́мощи не и́мамы. Ты еси́ похвала́ му́чеников и испове́дников. Ве́мы Тя, Пресла́вная, я́ко Храни́тельницу ми́ра, кре́пость и ра́дование воспева́ющих Сы́на Твоего́: Ди́вен Бог во святы́х Свои́х, зе́млю Черка́сскую благослови́вый.

Катавасия , Глас 4:

Ирмос:
Боже́ственное сие́ и всечестно́е/ соверша́юще пра́зднество,/ богому́дрии Богома́тере,/ прииди́те рука́ми воспле́щим,// от Нея́ ро́ждшагося Бо́га сла́вим.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Ты бо еси́ Ца́рь ми́ра и Спас душ на́ших, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Кондак октоиха, глас 7

Не ктому́ держа́ва сме́ртная возмо́жет держа́ти челове́ки: Христо́с бо сни́де сокруша́я и разоря́я си́лы ея́. Связу́емь быва́ет а́д, проро́цы согла́сно ра́дуются: предста́, глаго́люще, Спа́с су́щым в ве́ре, изыди́те ве́рнии в воскресе́ние.

И́кос:

Вострепета́ша до́ле преиспо́дняя дне́сь, а́д и сме́рть Еди́наго от Тро́ицы: земля́ поколеба́ся, вра́тницы же а́довы ви́девше Тя́ ужасо́шася: вся́ же тва́рь со проро́ки ра́дующися пое́т Тебе́ побе́дную пе́снь, изба́вителю Бо́гу на́шему, разруши́вшему ны́не сме́ртную си́лу. Да воскли́кнем и возопии́м ко Ада́му, и к су́щым из Ада́ма: дре́во сего́ па́ки введе́. Изыди́те ве́рнии в воскресе́ние.

Песнь 7:

  
Канон Воскре́сный, глас 7:
Хор:
Ирмо́с:
Пе́щь о́троцы огнепа́льну дре́вле росоточа́щу показа́ша, Еди́наго Бо́га воспева́юще, и глаго́люще: превозноси́мый отце́в Бо́г, и препросла́влен.
Чтец:
Припев:
Сла́ва, Го́споди, свято́му Воскресе́нию Твоему́.
Тропарь:
Дре́вом умерщвля́ется Ада́м, во́лею преслуша́ние соде́лав: послуша́нием же Христо́вым па́ки обновля́емь е́сть. Мене́ бо ра́ди распина́ется Сы́н Бо́жий, препросла́вленный.
Припев:
Сла́ва, Го́споди, свято́му Воскресе́нию Твоему́.
Тропарь:
Тебе́ воскре́сшаго Христе́, из гро́ба, тва́рь вся́ воспе́: Ты́ бо жи́знь су́щым во а́де процве́л еси́, ме́ртвым воскресе́ние, и́же во тьме́, Све́т препросла́вленный.
Припев:
Пресвята́я Богоро́дице, спаси́ нас.
Богоро́дичен
Ра́дуйся, Дщи́ Ада́ма тле́ннаго. Ра́дуйся, еди́на Богоневе́сто. Ра́дуйся, е́юже тля́ изгна́на бы́сть, я́же Бо́га ро́ждши: Его́же моли́, Чи́стая, спасти́ся все́м на́м.
  
Кано́н Богоро́дицы из Окто́иха, глас 7:
Припе́в:
Пресвята́я Богоро́дице, спаси́ нас.
Тропарь:
Преиспещре́ну, позлаще́ну у́тварь Тя́ иму́щу возлюби́ Созда́тель Тво́й, Де́во, и Госпо́дь: превозноси́мый отце́в Бо́г и препросла́влен.
Припе́в:
Пресвята́я Богоро́дице, спаси́ нас.
Тропарь:
Очища́ется Отрокови́це, у́гль дре́вле Иса́иа прие́м: знамена́тельне Твое́ рождество́ ви́дев, превозноси́маго отце́в Бо́га, и препросла́влена.
  
Канон святы́х зе́мли Черка́сския(На 8), Глас 6:
Припев:
Вси святи́и земли́ Черка́сския, моли́те Бо́га о нас.
Тропарь:
И́стины пропове́дницы, моли́твенницы на́ша неуста́ннии, предста́телие земли́ Черка́сския сла́внии, испроси́те нам дар коему́ждо на по́льзу, да досто́йно сла́вим Го́спода: отце́в и наш Бо́же, благослове́н еси́.
(Трижды)
Припев:
Вси святи́и земли́ Черка́сския, моли́те Бо́га о нас.
Тропарь:
Мно́жество благоче́стия подви́жников и му́чеников земли́ Черка́сския, ри́зы своя́ убели́вших кро́вию А́гнца Боже́ственнаго, ку́пно со испове́дниками до́блими, зве́зды всесве́тлыя не́ба церко́внаго, нело́жно со́брании ве́рою, приведо́стеся ко Христу́, пресла́вных чуде́с Бо́жиих яви́шася свиде́телие, пою́ще песнь хвале́бную: отце́в и наш Бо́же, благослове́н еси́.
(Трижды)
Сла́ва Отцу́ и Сы́ну и Свято́му Ду́ху.
Предстоя́ще и моля́щеся Христу́, святи́и уго́дницы Черка́сстии, очи́стите нас от грехо́в на́ших моли́твами ва́шими, да не с ми́ром осужде́ни бу́дем, но ра́дость ве́чную улу́чити возмо́жем, пою́ще: отце́в и наш Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен:
О, Ма́ти Бо́жия, на Твой наде́ющися Покро́в, уми́льно вопие́м Ти, моля́щеся: сохрани́ ве́ру Правосла́вную и святы́ни Бо́жия от поруга́ния. Утеше́ние пода́ждь, Игу́мение земли́ Черка́сския, пою́щим: отце́в и наш Бо́же, благослове́н еси́.

Катавасия , Глас 4:

Ирмос:
Не послужи́ша тва́ри богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся пою́ще:// препе́тый отце́в Госпо́дь и Бо́г благослове́н еси́.

Песнь 8:

  
Канон Воскре́сный, глас 7:
Хор:
Ирмо́с:
Неопа́льная огню́ в Сина́и прича́щшаяся Купина́, Бо́га яви́ медленоязы́чному и гугни́вому Моисе́ови, и о́троки ре́вность Бо́жия три́ непребори́мыя во огни́ певцы́ показа́: вся́ дела́ Госпо́дня Го́спода по́йте, и превозноси́те во вся́ ве́ки.
Чтец:
Припев:
Сла́ва, Го́споди, свято́му Воскресе́нию Твоему́.
Тропарь:
Пречи́стый А́гнец слове́сный за ми́р закла́н бы́в, преста́ви я́же по зако́ну приноси́мая, очи́стив сего́ кроме́ прегреше́ний я́ко Бо́г, при́сно зову́ща: вся́ дела́ Госпо́дня Го́спода по́йте, и превозноси́те во вся́ ве́ки.
Припев:
Сла́ва, Го́споди, свято́му Воскресе́нию Твоему́.
Тропарь:
Нетле́нна не су́щи пре́жде стра́сти, восприя́тая от Созда́теля пло́ть на́ша, по стра́сти и воскресе́нии неприкоснове́нна тле́нию устро́ися, и сме́ртныя обновля́ет, зову́щыя: вся́ дела́ Госпо́дня Го́спода по́йте, и превозноси́те во вся́ ве́ки.
Припев:
Пресвята́я Богоро́дице, спаси́ нас.
Богоро́дичен
Твое́ чисто́тное и всенепоро́чное, Де́во, скве́рное и ме́рзское вселе́нныя очи́сти, и была́ еси́ на́шего примире́ния к Бо́гу вина́, Пречи́стая: те́мже Тя́, Де́во, вся́ дела́ благослови́м, и превозно́сим во вся́ ве́ки.
  
Кано́н Богоро́дицы из Окто́иха, глас 7:
Припе́в:
Пресвята́я Богоро́дице, спаси́ нас.
Тропарь:
Све́том рождества́ Твоего́, странноле́пно вселе́нную просвети́ла еси́, Богороди́тельнице, су́ща бо вои́стинну Бо́га на объя́тиях но́сиши Твои́х, просвеща́юща ве́рныя при́сно зову́щыя: вся́ дела́ Госпо́дня Го́спода по́йте, и превозноси́те во вся́ ве́ки.
Припе́в:
Пресвята́я Богоро́дице, спаси́ нас.
Тропарь:
Пое́м, Чи́стая, благоче́стно Твое́ чре́во, Бо́га вмести́вшее несказа́нно воплоща́ема, да́вшаго все́м ве́рным богоразу́мия просвеще́ние, при́сно зову́щым: вся́ дела́ Госпо́дня Го́спода по́йте, и превозноси́те во вся́ ве́ки.
  
Канон святы́х зе́мли Черка́сския(На 8), Глас 6:
Припев:
Вси святи́и земли́ Черка́сския, моли́те Бо́га о нас.
Тропарь:
Днесь пе́сни свяще́нныя прино́сим, венцы́ слове́сныя исплета́юще новому́ченикам, испове́дникам и всем святы́м земли́ Черка́сския. Ти́и бо нас жития́ми и по́двигами свои́ми науча́ют, ка́ко должно́ Го́спода пе́ти во вся ве́ки.
(Трижды)
Припев:
Вси святи́и земли́ Черка́сския, моли́те Бо́га о нас.
Тропарь:
Весели́ся, Черка́сская страно́, в тебе бо Госпо́дь яви́ уго́дники Своя́: преподобному́ченика Мака́рия Ка́невскаго, му́ченика Дании́ла Мли́евскаго, святи́тели ди́вныя Софро́ния и Сильве́стра, священноиспове́дники Васи́лия и Луку́ врача́, я́же нас науча́ют Го́спода пе́ти во вся ве́ки.
(Трижды)
Благословим Отца и Сына и Святаго Духа, Господа
Испове́дуем, взира́юще на сонм уго́дников Бо́жиих в земли́ на́шей просия́вших, Еди́ницу Тричи́сленную, Тро́ицу Единосу́щную правосла́вно пою́ще, непресеко́мо Пребоже́ственное Естество́, трисве́тлую, невече́рнюю зарю́, Еди́ну нетле́нную нам свет возсия́вшую, да сла́вим Ю во вся ве́ки.
И ны́не и при́сно и во ве́ки веко́в. Ами́нь.
Богородичен:
Жизнода́вца Ма́ти, Пресвята́я Де́во, изведи́ нас из ро́ва поги́бели, и уврачу́й на́ша грехо́вныя я́звы, да неосужде́нно сподо́бимся прославля́ти благоче́стия христиа́нскаго свети́льники и новому́ченики Сы́на Твоего́ и Бо́га на́шего, я́же я́ко зве́зды на тве́рди церко́вней возсия́ша в земли́ Черка́сстей, во вся ве́ки.

Катавасия , Глас 4:

Хор:
Хва́лим, благослови́м, покланя́емся Го́сподеви, пою́ще и превоз-нося́ще во вся ве́ки.
Ирмос:
О́троки благочести́выя в пещи́,/ Рождество́ Богоро́дичо спасло́ е́сть:/ тогда́ у́бо образу́емое,/ ны́не же де́йствуемое,/ вселе́нную всю́ воздвиза́ет пе́ти Тебе́:/ Го́спода по́йте дела́,// и превозноси́те Его́ во вся́ ве́ки.
Диакон:
Богоро́дицу и Ма́терь Све́та в пе́снех возвели́чим.

Песнь Пресвято́й Богоро́дицы:

Хор:
Вели́чит душа́ Моя́ Го́спода,/ и возра́довася дух Мой о Бо́зе Спа́се Мое́м.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Я́ко призре́ на смире́ние рабы́ Своея́,/ се бо от ны́не ублажа́т Мя вси ро́ди.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Я́ко сотвори́ Мне вели́чие Си́льный,/ и свя́то И́мя Его́, и ми́лость Его́ в ро́ды родо́в боя́щимся Его́.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Сотвори́ держа́ву мы́шцею Свое́ю,/ расточи́ го́рдыя мы́слию се́рдца их.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Низложи́ си́льныя со престо́л, и вознесе́ смире́нныя;/ а́лчущия испо́лни благ, и богатя́щияся отпусти́ тщи.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Восприя́т Изра́иля о́трока Своего́, помяну́ти ми́лости,/ я́коже глаго́ла ко отце́м на́шим, Авраа́му и се́мени его́, да́же до ве́ка.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.

Песнь 9:

  
Канон Воскре́сный, глас 7:
Хор:
Ирмо́с:
Нетле́ния искуше́нием ро́ждшая, и всехитрецу́ Сло́ву пло́ть взаимода́вшая, Ма́ти неискусому́жная Де́во Богоро́дице: Прия́телище Нестерпи́маго, Село́ Невмести́маго Зижди́теля Твоего́, Тя́ велича́ем.
Чтец:
Припев:
Сла́ва, Го́споди, свято́му Воскресе́нию Твоему́.
Тропарь:
И́же Божеству́ стра́сть прилага́ющии, заусти́теся вси́ чуждему́дреннии: Го́спода бо сла́вы пло́тию распя́та, не распя́та же естество́м Боже́ственным, я́ко во двою́ естеству́ Еди́наго велича́ем.
Припев:
Сла́ва, Го́споди, свято́му Воскресе́нию Твоему́.
Тропарь:
И́же телесе́м воста́нию неве́рующии, ко Христо́ву ше́дше гро́бу, научи́теся: я́ко умерщвле́на бы́сть, и воскре́се па́ки пло́ть Жизнода́вца, во увере́ние после́дняго воскресе́ния, на не́же упова́ем.
Припев:
Пресвята́я Тро́ице, Бо́же наш, сла́ва Тебе́.
Богоро́дичен
Не Боже́ств Тро́ицу, но Ипоста́сей, ниже́ еди́ницу Ли́ц, но Божества́ чту́ще, ссеца́ем же Сию́ деля́щих: слива́ем же па́ки, слия́ние дерза́ющих на Сию́, Ю́же велича́ем.
  
Кано́н Богоро́дицы из Окто́иха, глас 7:
Припе́в:
Пресвята́я Богоро́дице, спаси́ нас.
Тропарь:
Ра́дости на́м ве́чныя хода́таица и весе́лия яви́лася еси́, Присноде́во Отрокови́це, Изба́вителя ро́ждши, и́стиною и Ду́хом Боже́ственным Того́ чту́щих, я́ко Бо́га избавля́ющаго.
Припе́в:
Пресвята́я Богоро́дице, спаси́ нас.
Тропарь:
Поя́ Дави́д, Тво́й пра́отец, Пречи́стая, Тя́ ковче́г имену́ет Святы́ни Боже́ственныя, преесте́ственне Бо́га вмести́вшую, во Оте́ческих Седя́щаго не́дрех, Его́же непреста́нно ве́рнии велича́ем.
  
Канон святы́х зе́мли Черка́сския(На 8), Глас 6:
Припев:
Велича́й, душе́ моя́, добропобе́дных му́чеников, зе́млю на́шу кро́вию свое́ю освяти́вших.
Тропарь:
Небе́снаго Иерусали́ма гра́ждане достоблаже́ннии, святи́телие Софро́ние и Сильве́стре, таи́нники свяще́ннии Бо́жия Сло́ва, мона́шескаго жития́ и богосло́вия рачи́телие, не оста́вите ны, ча́да ва́ша духо́вныя, но Пастыренача́льника Христа́ моли́те, да сохрани́т Це́рковь Свою́ Святу́ю в земли́ Черка́сстей до сконча́ния ве́ка.
(Дважды)
Припев:
Велича́й, душе́ моя́, добропобе́дных му́чеников, зе́млю на́шу кро́вию свое́ю освяти́вших.
Тропарь:
Испове́дника и святи́теля Луку́ достодо́лжно пе́сньми свяще́нными восхва́лим, сего́ зна́ем, я́ко гра́да на́шего духо́вное украше́ние, врача́ любому́дра, любо́вию бога́таго, и раско́лов тлетво́рных обличи́теля. С ни́мже ку́пно воспое́м и Васи́лия, архиере́я Ка́невскаго, ду́хом си́льнаго. Ве́руем, я́ко сии́ мо́лят, да сохрани́т Госпо́дь Це́рковь Свою́ Святу́ю в земли́ Черка́сстей до сконча́ния ве́ка.
(Дважды)
Припев:
Велича́й, душе́ моя́, добропобе́дных му́чеников, зе́млю на́шу кро́вию свое́ю освяти́вших.
Тропарь:
Кого́ убою́ся? А́ще воста́нет на мя брань, на Го́спода аз упова́ю. Сии́ глаго́лы псалмопе́вца в сердца́х свои́х сложи́ли есте́, Мака́рие му́чениче преподо́бне, Дании́ле досточу́дне, Рафаи́ло, неве́сто Христо́ва достосла́вная, и лик добропобе́дный новому́чеников и испове́дников, егда́ клеветы́, зауше́ния и бие́ния, и ра́ны до́блестно претерпева́ли есте́ Го́спода ра́ди. Его́же ны́не моли́те, да сохрани́т Це́рковь Свою́ в земли́ Черка́сстей до сконча́ния ве́ка.
(Дважды)
Сла́ва Отцу́ и Сы́ну и Свято́му Ду́ху.
А́нгельски просла́вим Триипоста́сное естество́, и Неразде́льную сла́ву, и в Божестве́ Еди́ном пое́мую непреста́нно на Небеси́ и на земли́ Тро́ицу Неразлу́чную, с Сы́ном Отцу́ и Ду́ху покланя́ющеся благоче́стно, да сохрани́т Це́рковь Свою́ Святу́ю в земли́ Черка́сстей до сконча́ния ве́ка.
И ны́не и при́сно и во ве́ки веко́в. Ами́нь.
Богородичен:
Ми́лостивая Влады́чице Богоро́дице, помози́ лю́дем, в ско́рбех и обстоя́ниях под Покро́в Твой честны́й притека́ющим, покры́й, соблюди́ на Тя по Бо́зе упова́ющих, моли́ Сы́на Твоего́, Пречи́стая, да сохрани́т Це́рковь Свою́ Святу́ю в земли́ Черка́сстей до сконча́ния ве́ка.

Катавасия , Глас 4:

Ирмос:
Вся́к земноро́дный/ да взыгра́ется Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, всеблаже́нная Богоро́дице,// Чи́стая Присноде́во.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, помилуй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помя́нувше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Тя хва́лят вся си́лы небе́сныя, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.
Диа́кон:
Свят Госпо́дь Бог наш.
Хор:
Свят Госпо́дь Бог наш.
Диа́кон:
Я́ко Свят Госпо́дь Бог наш.
Хор:
Свят Госпо́дь Бог наш.
Диа́кон:
Над все́ми людьми́ Бог наш.
Хор:
Свят Госпо́дь Бог наш.

Ексапостила́рий воскре́сный пятый:

Живо́т и Пу́ть, Христо́с воста́ из ме́ртвых, Клео́пе и Луце́ спутеше́ствова, и́маже и позна́ся во Еммау́се, преломля́я хле́б: ею́же ду́шы и сердца́ горя́ща бя́ху, егда́ те́ма глаго́лаше на пути́, и писа́ния ска́зоваше, я́же претерпе́. с ни́маже, воста́, зове́м, яви́ся же и Петро́ви.
Сла́ва Отцу́ и Сы́ну и Свято́му Ду́ху.

Днесь ра́дости духо́вныя исполня́емся, в пе́снех хва́ляще свети́ла незаходи́мыя земли́ Черка́сския и таи́нники свяще́нныя Боже́ственнаго Сло́ва, Христа́ сла́вяще, сих просвети́вшаго, и в ско́рбех и обстоя́ниях помо́щники нам дарова́вшаго.
И ны́не и при́сно и во ве́ки веко́в. Ами́нь.

Богоро́дичен воскре́сного ексапостила́рия, пятый:

Пою́ безчи́сленную Твою́ ми́лость, Тво́рче мо́й, я́ко Себе́ истощи́л еси́, понести́ и спасти́ челове́ческое естество́ озло́бленное: и Бо́г сы́й, изво́лил еси́, от Чи́стыя Богоотрокови́цы, по мне́ бы́ти, и сни́ти да́же до а́да, хотя́ ми́ спасти́ся, моли́твами ро́ждшия Тя́, Влады́ко всеще́дрый.

Хвали́тны псалмы́, глас 7:

Хор:
Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.
Хвали́те Его́ вси А́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.
  
Стихиры воскресные, глас 7:
На 8. Стих:
Сотвори́ти в них суд напи́сан:/ сла́ва сия́ бу́дет всем преподо́бным Его́.
Стихира:
Воскре́се Христо́с из ме́ртвых, разру́ш сме́ртныя у́зы: благовести́ земле́, ра́дость ве́лию, по́йте Небеса́ Бо́жию сла́ву.
Стих:
Хвали́те Бо́га во святы́х Его́,/ хвали́те Его́ в утверже́нии си́лы Его́.
Стихира:
Воскресе́ние Христо́во ви́девше, поклони́мся свято́му Го́споду Иису́су: еди́ному безгре́шному.
На 6. Стих:
Хвали́те Его́ на си́лах Его́,/ хвали́те Его́ по мно́жеству вели́чествия Его́.
Стихира:
Христо́ву воскресе́нию кла́няющеся не преста́ем: то́й бо спа́сл е́сть на́с от беззако́ний на́ших, Святы́й Госпо́дь Иису́с, явле́й воскресе́ние.
Стих:
Хвали́те Его́ во гла́се тру́бнем,/ хвали́те Его́ во псалти́ри и гу́слех.
Стихира:
Что́ возда́мы Го́сподеви о все́х, я́же воздаде́ на́м? На́с ра́ди Бо́г в челове́цех, за истле́вшее естество́ Сло́во пло́ть бы́сть, и всели́ся в ны́, к неблагода́рным, Благоде́тель: к пле́нником, Свободи́тель: ко и́же во тьме́ седя́щым, Со́лнце Пра́вды: на Кресте́, безстра́стный: во а́де, све́т: в сме́рти, живо́т: воскресе́ние, па́дших ра́ди. К Нему́же возопии́м: Бо́же на́ш, сла́ва Тебе́.
  
Стихиры святы́х зе́мли Черка́сския Глас8:
На 4. Стих:
Хвали́те Его́ в тимпа́не и ли́це, / хвали́те Его́ во стру́нах и орга́не.
Стихира:
О пресла́внаго чудесе́! Собо́р достосла́вный от всех преде́л земли́ Черка́сския явле́нный, лик соста́вльше, Го́сподеви мо́лятся о утвержде́нии ве́ры Правосла́вныя в стране́ на́шей, о вся́каго де́ла поле́знаго, пра́веднаго и Бо́гови уго́днаго успея́нии, плодо́в земны́х изоби́лии и вре́менех ми́рных, да поживе́м, Христа́ благодаря́ще о вели́ких ми́лостех, благоче́стия свети́льников Черка́сских моли́твами нам явле́нных.
Стих:
Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.
Стихира:
Днесь град Черка́ссы ва́шу па́мять пра́зднует, сему́ бо яви́стеся столпи́ и утвержде́ние, святи́телие, па́стырие и учи́телие, му́ченицы добропобе́днии, богоно́сцы преподо́бнии, испове́дницы и моли́твенницы достосла́внии.
Стих:
Свяще́нницы Твои́ облеку́тся в пра́вду и преподо́бнии Твои́ возра́дуются.
Стихира:
Святи́и сро́дницы на́ши, земли́ Черка́сския цвети́ духо́внии, похва́ла на́ша и утвержде́ние! Ва́ми Це́рковь на́ша хва́лится, я́ко сокро́вище неоску́дное стяжа́вши вас, жития́ бо ва́ша и чудеса́ мно́гая прославля́ют просла́вльшаго вас Христа́. Его́же моли́те приле́жно дарова́ти ду́шам на́шим ве́лию ми́лость.
Стих:
Честна́ пред Го́сподем смерть преподо́бных Его́.
Стихира:
Глас8: Ве́ры броня́ми вооружи́вшеся и во оде́жду спасе́ния оде́явшеся, святи́и врага́ побежда́ют, душа́ми чи́стыми, кро́вию убе́ленными, ко́зни сего́ и сети́, ве́рным лю́дем на поги́бель соплете́нныя, а́ки паучи́ну растерза́юще, путь ко спасе́нию нам показу́ют, святи́телем и иере́ем пра́вило ве́ры и в И́стине стоя́ния о́браз явля́ются днесь, и́ночествующим во бра́нех побо́рницы быва́ют, и мирски́х люде́й в ско́рбех уте́шители, и мо́лятся о нас, па́мять их ны́не пра́зднующих.
  
У́тренняя евангельская стихи́ра, гла́с 5:
Сла́ва Отцу́ и Сы́ну и Свято́му Ду́ху.
О прему́дрых суде́б Твои́х Христе́! ка́ко Петру́ у́бо плащани́цами еди́неми да́л еси́ разуме́ти Твое́ воскре́сние? Луце́ же и Клео́пе спутьше́ствуя бесе́довал еси́, и бесе́дуяй не а́бие себе́ явля́еши: те́мже и поноси́м быва́еши, я́ко еди́н прише́льствуяй во Иерусали́м, и не причаща́яйся в коне́ц сове́та и́х: но и́же вся́ к созда́ния по́льзе стро́я, и я́же о Тебе́ проро́чествия откры́л еси́, и внегда́ благослови́ти хле́б позна́лся еси́ и́м, и́хже и пре́жде того́ сердца́ к позна́нию Твоему́ распала́стася: и́же и ученико́м со́бранным уже́ я́сно пропове́даста Твое́ воскре́сние, и́мже поми́луй на́с.
Хор:
И ныне и присно и во веки веков. Аминь.
Глас 2

Преблагослове́нна еси́, Богоро́дице Де́во,/ Вопло́щшим бо ся из Тебе́ ад плени́ся,/ Ада́м воззва́ся,/ кля́тва потреби́ся,/ Е́ва свободи́ся,/ сме́рть умертви́ся, и мы ожи́хом./ Тем воспева́юще вопие́м:/ благослове́н Христо́с Бог,// благоволи́вый та́ко, сла́ва Тебе́.

Иере́й:
Слава Тебе, показавшему нам свет.

Славосло́вие вели́кое:

Хор:
Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.
На всяк день благословлю́ Тя, и восхвалю́ И́мя Твое́ во ве́ки, и в век ве́ка.
Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.
Бу́ди, Го́споди, ми́лость Твоя́ на нас, я́коже упова́хом на Тя.
Благослове́н еси́, Го́споди, научи́ мя оправда́нием Твои́м.
(Три́жды)
Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Святы́й Безсме́ртный, поми́луй нас.
Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь воскре́сный, глас 1:

Хор:
Днесь Спасе́ние ми́ру бысть,/ пое́м Воскре́сшему из гро́ба,/ и Нача́льнику жи́зни на́шея:/ разруши́в бо сме́ртию смерть,// побе́ду даде́ нам и ве́лию ми́лость.

Ектения́ сугу́бая:

Диа́кон:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Трижды, на каждое прошение)
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем Высокопреосвяще́ннейшем митрополите (или: архиепи́скопе, или: преосвяще́ннейшем епи́скопе имярек), и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.
Еще́ мо́лимся о ми́лости, жи́зни, мире, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих настоя́теля, бра́тии и прихо́жан свята́го хра́ма сего́.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Иере́й:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Ектения́ проси́тельная:

Диа́кон:
Испо́лним у́тренюю моли́тву на́шу Го́сподеви.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Дне́ всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Благ и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.
Иере́й:
Мир всем.
Хор:
И ду́хови твоему́.
Диа́кон:
Главы́ на́ша Го́сподеви прикло́ним.
Хор:
Тебе́, Господи.
Иере́й:
Твое́ бо е́сть, е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.
Диа́кон:
Прему́дрость.
Хор:
Благослови́.
Иере́й:
Сый благослове́н Христо́с Бог наш, всегда́, ны́не и при́сно и во ве́ки веко́в.
Хор:
Ами́нь. Утверди́, Бо́же, святу́ю правосла́вную ве́ру, правосла́вных христиа́н во век ве́ка.
Иере́й:
Пресвята́я Богоро́дице, спаси́ нас.
Хор:
Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Иере́й:
Сла́ва Тебе́, Христе́ Бо́же, Упова́ние на́ше, сла́ва Тебе́.
Хор:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Го́споди, поми́луй.
(Три́жды)
Благослови́.

Отпу́ст.

Иере́й:
Воскресы́й из ме́ртвых Христо́с, И́стинный Бог наш…

Многоле́тие:

ЧИТА́ЕТСЯ ПЕ́РВЫЙ ЧАС:

Чтец:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 5:

Глаго́лы моя́ внуши́, Го́споди, разуме́й зва́ние мое́. Вонми́ гла́су моле́ния моего́, Царю́ мой и Бо́же мой, я́ко к Тебе́ помолю́ся, Го́споди. Зау́тра услы́ши глас мой, зау́тра предста́ну Ти, и у́зриши мя. Я́ко Бог не хотя́й беззако́ния, Ты еси́: не присели́тся к Тебе́ лука́внуяй, ниже́ пребу́дут беззако́нницы пред очи́ма Твои́ма: возненави́дел еси́ вся де́лающыя беззако́ние. Погуби́ши вся глаго́лющыя лжу: му́жа крове́й и льсти́ва гнуша́ется Госпо́дь. Аз же мно́жеством ми́лости Твоея́, вни́ду в дом Твой, поклоню́ся ко хра́му свято́му Твоему́, в стра́се Твое́м. Го́споди, наста́ви мя пра́вдою Твое́ю, враг мои́х ра́ди испра́ви пред Тобо́ю путь мой. Я́ко несть во усте́х их и́стины, се́рдце их су́етно, гроб отве́рст горта́нь их: язы́ки свои́ми льща́ху. Суди́ им, Бо́же, да отпаду́т от мы́слей свои́х, по мно́жеству нече́стия их изри́ни я́, я́ко преогорчи́ша Тя, Го́споди. И да возвеселя́тся вси упова́ющии на Тя, во век возра́дуются, и всели́шися в них, и похва́лятся о Тебе́ лю́бящии и́мя Твое́. Я́ко Ты благослови́ши пра́ведника, Го́споди: я́ко ору́жием благоволе́ния венча́л еси́ нас.

Псало́м 89:

Го́споди, прибе́жище был еси́ нам в род и род. Пре́жде да́же гора́м не бы́ти и созда́тися земли́ и вселе́нней, и от ве́ка и до ве́ка Ты еси́. Не отврати́ челове́ка во смире́ние, и рекл еси́: обрати́теся, сы́нове челове́честии. Я́ко ты́сяща лет пред очи́ма Твои́ма, Го́споди, я́ко день вчера́шний, и́же мимои́де, и стра́жа нощна́я. Уничиже́ния их ле́та бу́дут. Утро я́ко трава́ мимои́дет, у́тро процвете́т и пре́йдет: на ве́чер отпаде́т ожесте́ет и и́зсхнет. Я́ко исче́зохом гне́вом Твои́м, и я́ростию Твое́ю смути́хомся. Положи́л еси́ беззако́ния на́ша пред Тобо́ю: век наш в просвеще́ние лица́ Твоего́. Я́ко вси дни́е на́ши оскуде́ша, и гне́вом Твои́м исчезо́хом, ле́та на́ша я́ко паучи́на поуча́хуся. Дни́е лет на́ших, в ни́хже се́дмьдесят лет, а́ще же в си́лах, о́смьдесят лет, и мно́жае их труд и боле́знь: я́ко прии́де кро́тость на ны, и нака́жемся. Кто весть держа́ву гне́ва Твоего́, и от стра́ха Твоего́, я́рость Твою́ исчести́? Десни́цу Твою́ та́ко скажи́ ми, и окова́нныя се́рдцем в му́дрости. Обрати́ся, Го́споди, доко́ле? И умоле́н бу́ди на рабы́ Твоя́. Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны их. И бу́ди све́тлость Го́спода Бо́га на́шего на нас, и дела́ рук на́ших испра́ви на нас, и де́ло рук на́ших испра́ви.

Псало́м 100:

Ми́лость и суд воспою́ Тебе́, Го́споди. Пою́ и разуме́ю в пути́ непоро́чне, когда́ прии́деши ко мне? Прехожда́х в незло́бии се́рдца моего́ посреде́ до́му моего́. Не предлага́х пред очи́ма мои́ма вещь законопресту́пную: творя́щыя преступле́ние возненави́дех. Не прильпе́ мне се́рдце стропти́во, уклоня́ющагося от мене́ лука́ваго не позна́х. Оклевета́ющаго тай и́скренняго своего́, сего́ изгоня́х: го́рдым о́ком, и несы́тым се́рдцем, с сим не ядя́х. О́чи мои́ на ве́рныя земли́, посажда́ти я́ со мно́ю: ходя́й по пути́ непоро́чну, сей ми служа́ше. Не живя́ше посреде́ до́му моего́ творя́й горды́ню, глаго́ляй непра́ведная, не исправля́ше пред очи́ма мои́ма. Во у́трия избива́х вся гре́шныя земли́, е́же потреби́ти от гра́да Госпо́дня вся де́лающыя беззако́ние.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
  
Тропа́рь воскре́сный, глас 7:
Разруши́л еси́ Кресто́м Твои́м сме́рть, отве́рзл еси́ разбо́йнику ра́й: мироно́сицам пла́чь преложи́л еси́, и апо́столом пропове́дати повеле́л еси́: я́ко воскре́сл еси́, Христе́ Бо́же, да́руяй ми́рови ве́лию ми́лость.
Сла́ва Отцу́ и Сы́ну и Свято́му Ду́ху.
  
Тропарь святы́х зе́мли Черка́сския Глас 5:
Всечестны́й Собо́р всеблаже́нных предста́телей на́ших Черка́сскую зе́млю по́двиги и чудесы́ свои́ми озари́вших и кро́вию честно́ю своею и́стину Правосла́вия утверди́вших: новому́чеников и испове́дников, святи́телей и преподо́бных, блаже́нных вку́пе и пра́ведных всих в пе́ниих просла́вим, просвеща́еми доброде́тельми и чудесы́ их пресла́вными, и со умиле́нием к ним возопии́м: уго́дницы Бо́жии возлю́бленнии, моли́теся ко Го́споду спасти́ся душа́м на́шим.
И ны́не и при́сно и во ве́ки веко́в. Ами́нь.
Что Тя нарече́м, о Благода́тная? Не́бо, я́ко возсия́ла еси́ Со́лнце Пра́вды. Рай, я́ко прозябла́ еси́ цвет нетле́ния Де́ву, я́ко пребыла́ еси́ нетле́нна. Чи́стую Ма́терь, я́ко име́ла еси́ на святы́х Твои́х объя́тиях Сы́на, всех Бо́га. Того́ моли́ спасти́ся душа́м на́шим.
Стопы́ моя́ напра́ви по словеси́ Твоему́ и да не облада́ет мно́ю вся́кое беззако́ние. Изба́ви мя от клеветы́ челове́ческия, и сохраню́ за́поведи Твоя́. Лице́ Твое́ просвети́ на раба́ Твоего́ и нау́чи мя оправда́нием Твои́м.
Да испо́лнятся уста́ моя́ хвале́ния Твоего́, Го́споди, я́ко да воспою́ сла́ву Твою́, весь день великоле́пие Твое́.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.
  
Кондак святы́х зе́мли Черка́сския Глас 6:
Хода́таи о нас неусы́пнии, предста́телие земли́ Черка́сския сла́внии, святи́телие, преподо́бнии, му́ченицы и испове́дницы всепе́тии, не пре́зрите моле́ний недосто́йных чад ва́ших, но поспеши́те на по́мощь нам, во умиле́нии днесь взыва́ющим: ускори́те на моли́тву и потщи́теся на умоле́ние, моля́шеся непреста́нно о ве́рою чту́щих вас.
Го́споди, поми́луй.
(40 раз)
И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.
Го́споди поми́луй.
(Трижды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
И́менем Госпо́дним благослови́, о́тче.
Иере́й:
Бо́же, уще́дри ны и благослови́ ны, просвети́ лице́ Твое́ на ны и поми́луй ны.
Чтец:
Ами́нь.
Иере́й:
Христе́, Све́те И́стинный, просвеща́яй и освяща́яй вся́каго челове́ка, гряду́щаго в мир, да зна́менается на нас свет лица́ Твоего́, да в нем у́зрим Свет Непристу́пный: и испра́ви стопы́ на́ша к де́ланию за́поведей Твои́х, моли́твами Пречи́стыя Твоея́ Ма́тере, и всех Твои́х святы́х, ами́нь.

Конда́к, глас 8:

Взбра́нной Воево́де победи́тельная,/ я́ко изба́вльшеся от злы́х,/ благода́рственная воспису́ем Ти́ раби́ Твои́, Богоро́дице;/ но я́ко иму́щая держа́ву непобеди́мую,/ от вся́ких на́с бе́д свободи́, да зове́м Ти́:// ра́дуйся, Неве́сто Неневе́стная.
Иере́й:
Сла́ва Тебе́, Христе́ Бо́же, упова́ние на́ше, сла́ва Тебе́.
Хор:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Го́споди, поми́луй.
(Три́жды.)
Благослови́.

Отпу́ст.

Иере́й:
Воскресы́й из ме́ртвых, Христо́с, и́стинный Бог наш, моли́твами пречи́стыя Своея́ Ма́тере, преподо́бных и Богоно́сных оте́ц на́ших и всех святы́х, поми́лует и спасе́т нас, я́ко Благ и Человеколю́бец.
Хор:
Го́споди, поми́луй.
(Трижды)

Тре́тий час:

Иере́й:
Благослове́н Бог наш всегда́, ны́не и при́сно, и во ве́ки веко́в.
Чтец:
Ами́нь. Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь. Го́споди, поми́луй.
(12 раз)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 16:

Услы́ши, Го́споди, пра́вду мою́, вонми́ моле́нию моему́, внуши́ моли́тву мою́ не во устна́х льсти́вых. От лица́ Твоего́ судьба́ моя́ изы́дет, óчи мои́ да ви́дита правоты́. Искуси́л eси́ се́рдце мое́, посети́л eси́ но́щию, искуси́л мя eси́, и не обре́теся во мне непра́вда. Я́ко да не возглаго́лют уста́ моя́ дел челове́ческих, за словеса́ усте́н Твои́х аз сохрани́х пути́ же́стоки. Соверши́ стопы́ моя́ во стезя́х Твои́х, да не подви́жутся стопы́ моя́. Аз воззва́х, я́ко услы́шал мя eси́, Бо́же, приклони́ у́хо Твое́ мне и услы́ши глаго́лы моя́. Удиви́ ми́лости Твоя́, спаса́яй упова́ющыя на Тя от проти́вящихся десни́це Твое́й. Сохрани́ мя, Го́споди, я́ко зе́ницу óка, в кро́ве крилу́ Твоéю покры́еши мя. От лица́ нечести́вых остра́стших мя, врази́ мои́ ду́шу мою́ одержа́ша. Тук свой затвори́ша, уста́ их глаго́лаша горды́ню. Изгоня́щии мя ны́не обыдо́ша мя, óчи свои́ возложи́ша уклони́ти на зе́млю. Объя́ша мя я́ко лев гото́в на лов и я́ко ски́мен обита́яй в та́йных. Воскресни́, Го́споди, предвари́ я́ и запни́ им, изба́ви ду́шу мою́ от нечести́ваго, oру́жие Твое́ от враг руки́ Твоея́. Го́споди, от ма́лых от земли́, раздели́ я́ в животе́ их, и сокрове́нных Твои́х испо́лнися чре́во их, насы́тишася сыно́в, и оста́виша оста́нки младе́нцeм свои́м. Аз же пра́вдою явлю́ся лицу́ Твоему́, насы́щуся, внегда́ яви́ти ми ся сла́ве Твое́й.

Псало́м 24:

К Тебе́, Го́споди, воздвиго́х ду́шу мою́, Бо́же мой, на Тя упова́х, да не постыжу́ся во век, ниже́ да посмею́т ми ся врази́ мои́, и́бо вси терпя́щии Тя не постыдя́тся. Да постыдя́тся беззако́ннующии вотще́. Пути́ Твоя́, Го́споди, скажи́ ми, и стезя́м Твои́м научи́ мя. Наста́ви мя на и́стину Твою́, и научи́ мя, я́ко Ты еси́ Бог Спас мой, и Тебе́ терпе́х весь день. Помяни́ щедро́ты Твоя́, Го́споди, и ми́лости Твоя́, я́ко от ве́ка суть. Грех ю́ности моея́, и неве́дения моего́ не помяни́, по ми́лости Твое́й помяни́ мя Ты, ра́ди бла́гости Твоея́, Го́споди. Благ и прав Госпо́дь, сего́ ра́ди законоположи́т согреша́ющым на пути́. Наста́вит кро́ткия на суд, научи́т кро́ткия путе́м Свои́м. Вси путие́ Госпо́дни ми́лость и и́стина, взыска́ющым заве́та Его́, и свиде́ния Его́. Ра́ди и́мене Твоего́, Го́споди, и очи́сти грех мой, мног бо есть. Кто есть челове́к боя́йся Го́спода? Законоположи́т eму́ на пути́, eго́же изво́ли. Душа́ eго́ во благи́х водвори́тся, и се́мя eго́ насле́дит зе́млю. Держа́ва Госпо́дь боя́щихся Его́, и заве́т Его́ яви́т им. О́чи мои́ вы́ну ко Го́споду, я́ко Той исто́ргнет от се́ти но́зе мои́. При́зри на мя и поми́луй мя, я́ко единоро́д и нищ есмь аз. Ско́рби се́рдца моего́ умно́жишася, от нужд мои́х изведи́ мя. Виждь смире́ние мое́, и труд мой, и оста́ви вся грехи́ моя́. Виждь враги́ моя́, я́ко умно́жишася, и ненавиде́нием непра́ведным возненави́деша мя. Сохрани́ ду́шу мою́, и изба́ви мя, да не постыжу́ся, я́ко упова́х на Тя. Незло́бивии и пра́вии прилепля́хуся мне, я́ко потерпе́х Тя, Го́споди. Изба́ви, Бо́же, Изра́иля от всех скорбе́й eго́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
  
Тропа́рь воскре́сный, глас 7:
Разруши́л еси́ Кресто́м Твои́м сме́рть, отве́рзл еси́ разбо́йнику ра́й: мироно́сицам пла́чь преложи́л еси́, и апо́столом пропове́дати повеле́л еси́: я́ко воскре́сл еси́, Христе́ Бо́же, да́руяй ми́рови ве́лию ми́лость.
Сла́ва Отцу́ и Сы́ну и Свято́му Ду́ху.
  
Тропарь святы́х зе́мли Черка́сския Глас 5:
Всечестны́й Собо́р всеблаже́нных предста́телей на́ших Черка́сскую зе́млю по́двиги и чудесы́ свои́ми озари́вших и кро́вию честно́ю своею и́стину Правосла́вия утверди́вших: новому́чеников и испове́дников, святи́телей и преподо́бных, блаже́нных вку́пе и пра́ведных всих в пе́ниих просла́вим, просвеща́еми доброде́тельми и чудесы́ их пресла́вными, и со умиле́нием к ним возопии́м: уго́дницы Бо́жии возлю́бленнии, моли́теся ко Го́споду спасти́ся душа́м на́шим.
И ны́не и при́сно и во ве́ки веко́в. Ами́нь.
Богоро́дице, Ты еси́ лоза́ и́стинная, возрасти́вшая нам Плод живота́, Тебе́ мо́лимся: моли́ся, Влады́чице, со святы́ми апо́столы поми́ловати ду́ши на́ша.
Госпо́дь Бог благослове́н, благослове́н Госпо́дь день дне,/ поспеши́т нам Бог спасе́ний на́ших, Бог наш, Бог спаса́ти.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Кондак октоиха, глас 7

Не ктому́ держа́ва сме́ртная возмо́жет держа́ти челове́ки: Христо́с бо сни́де сокруша́я и разоря́я си́лы ея́. Связу́емь быва́ет а́д, проро́цы согла́сно ра́дуются: предста́, глаго́люще, Спа́с су́щым в ве́ре, изыди́те ве́рнии в воскресе́ние.
Го́споди, поми́луй.
(40 раз)
И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.
Го́споди поми́луй.
(Трижды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
И́менем Госпо́дним благослови́, о́тче.
Иере́й:
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас.
Чтец:
Ами́нь. Влады́ко Бо́же О́тче Вседержи́телю, Го́споди Сы́не Единоро́дный Иису́се Христе́, и Святы́й Ду́ше, Еди́но Боже́ство, Еди́на Си́ла, поми́луй мя, гре́шнаго, и и́миже ве́си судьба́ми, спаси́ мя, недосто́йнаго раба́ Твоего́, я́ко благослове́н еси́ во ве́ки веко́в, ами́нь.

Шесто́й час:

Чтец:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 53:

Бо́же, во и́мя Твое́ спаси́ мя, и в си́ле Твое́й суди́ ми. Бо́же, услы́ши моли́тву мою́, внуши́ глаго́лы уст мои́х. Я́ко чу́ждии воста́ша на мя и кре́пцыи взыска́ша ду́шу мою́, и не предложи́ша Бо́га пред собо́ю. Се бо Бог помога́ет ми, и Госпо́дь Засту́пник души́ мое́й. Отврати́т зла́я враго́м мои́м, и́стиною Твое́ю потреби́ их. Во́лею пожру́ Тебе́, испове́мся и́мени Твоему́, Го́споди, я́ко бла́го, я́ко от вся́кия печа́ли изба́вил мя еси́, и на враги́ моя́ воззре́ о́ко мое́.

Псало́м 54:

Внуши́, Бо́же, моли́тву мою́ и не пре́зри моле́ния моего́. Вонми́ ми и услы́ши мя: возскорбе́х печа́лию мое́ю и смято́хся. От гла́са вра́жия и от стуже́ния гре́шнича, я́ко уклони́ша на мя беззако́ние и во гне́ве враждова́ху ми. Се́рдце мое́ смяте́ся во мне и боя́знь сме́рти нападе́ на мя. Страх и тре́пет прии́де на мя и покры́ мя тьма. И рех: кто даст ми криле́, я́ко голубине́, и полещу́, и почи́ю? Се удали́хся бе́гая и водвори́хся в пусты́ни. Ча́ях Бо́га, спаса́ющаго мя от малоду́шия и от бу́ри. Потопи́, Го́споди, и раздели́ язы́ки их: я́ко ви́дех беззако́ние и пререка́ние во гра́де. Днем и но́щию обы́дет и́ по стена́м eго́. Беззако́ние и труд посреде́ eго́ и непра́вда. И не оскуде́ от стогн eго́ ли́хва и лесть. Я́ко а́ще бы враг поноси́л ми, претерпе́л бых у́бо, и а́ще бы ненави́дяй мя на мя велере́чевал, укры́л бых ся от него́. Ты же, челове́че равноду́шне, влады́ко мой и зна́емый мой, и́же ку́пно наслажда́лся еси́ со мно́ю бра́шен, в дому́ Бо́жии ходи́хом единомышле́нием. Да прии́дет же смерть на ня, и да сни́дут во ад жи́ви, я́ко лука́вство в жили́щах их, посреде́ их. Аз к Бо́гу воззва́х, и Госпо́дь услы́ша мя. Ве́чер и зау́тра, и полу́дне пове́м, и возвещу́, и услы́шит глас мой. Изба́вит ми́ром ду́шу мою́ от приближа́ющихся мне, я́ко во мно́зе бя́ху со мно́ю. Услы́шит Бог и смири́т я́, Сый пре́жде век. Несть бо им измене́ния, я́ко не убоя́шася Бо́га. Простре́ ру́ку свою́ на воздая́ние, оскверни́ша заве́т Его́. Раздели́шася от гне́ва лица́ Его́, и прибли́жишася сердца́ их, умя́кнуша словеса́ их па́че еле́а, и та суть стре́лы. Возве́рзи на Го́спода печа́ль твою́, и Той тя препита́ет, не даст в век молвы́ пра́веднику. Ты же, Бо́же, низведе́ши их во студене́ц истле́ния, му́жие крове́й и льсти не преполовя́т дней свои́х. Аз же, Го́споди, упова́ю на Тя.

Псало́м 90:

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: Засту́пник мой еси́ и Прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи и от словесе́ мяте́жна, плещма́ Свои́ма осени́т тя, и под криле́ Его́ наде́ешися: ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тме преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тма одесну́ю тебе́, к тебе́ же не прибли́жится, оба́че очи́ма твои́ма смо́триши, и воздая́ние гре́шников у́зриши. Я́ко Ты, Го́споди, упова́ние мое́, Вы́шняго положи́л еси́ прибе́жище твое́. Не прии́дет к тебе́ зло и ра́на не прибли́жится телеси́ твоему́, я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́, на а́спида и васили́ска насту́пиши, и попере́ши льва и зми́я. Я́ко на Мя упова́ и изба́влю и́, покры́ю и́, я́ко позна́ и́мя Мое́. Воззове́т ко Мне и услы́шу eго́, с ним есмь в ско́рби, изму́ eго́ и просла́влю eго́, долгото́ю дний испо́лню eго́ и явлю́ eму́ спасе́ние Мое́.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
  
Тропа́рь воскре́сный, глас 7:
Разруши́л еси́ Кресто́м Твои́м сме́рть, отве́рзл еси́ разбо́йнику ра́й: мироно́сицам пла́чь преложи́л еси́, и апо́столом пропове́дати повеле́л еси́: я́ко воскре́сл еси́, Христе́ Бо́же, да́руяй ми́рови ве́лию ми́лость.
Сла́ва Отцу́ и Сы́ну и Свято́му Ду́ху.
  
Тропарь святы́х зе́мли Черка́сския Глас 5:
Всечестны́й Собо́р всеблаже́нных предста́телей на́ших Черка́сскую зе́млю по́двиги и чудесы́ свои́ми озари́вших и кро́вию честно́ю своею и́стину Правосла́вия утверди́вших: новому́чеников и испове́дников, святи́телей и преподо́бных, блаже́нных вку́пе и пра́ведных всих в пе́ниих просла́вим, просвеща́еми доброде́тельми и чудесы́ их пресла́вными, и со умиле́нием к ним возопии́м: уго́дницы Бо́жии возлю́бленнии, моли́теся ко Го́споду спасти́ся душа́м на́шим.
И ны́не и при́сно и во ве́ки веко́в. Ами́нь.
Я́ко не и́мамы дерзнове́ния за премно́гия грехи́ на́ша, Ты и́же от Тебе́ Ро́ждшагося моли́, Богоро́дице Де́во, мно́го бо мо́жет моле́ние Ма́тернее ко благосе́рдию Влады́ки. Не пре́зри гре́шных мольбы́, Всечи́стая, я́ко ми́лостив есть и спасти́ моги́й, И́же и страда́ти о нас изво́ливый.
Ско́ро да предваря́т ны щедро́ты Твоя́, Го́споди, я́ко обнища́хом зело́; помози́ нам, Бо́же, Спа́се наш, сла́вы ра́ди И́мене Твоего́, Го́споди, изба́ви нас и очи́сти грехи́ на́ша, И́мене ра́ди Твоего́.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.
  
Кондак святы́х зе́мли Черка́сския Глас 6:
Хода́таи о нас неусы́пнии, предста́телие земли́ Черка́сския сла́внии, святи́телие, преподо́бнии, му́ченицы и испове́дницы всепе́тии, не пре́зрите моле́ний недосто́йных чад ва́ших, но поспеши́те на по́мощь нам, во умиле́нии днесь взыва́ющим: ускори́те на моли́тву и потщи́теся на умоле́ние, моля́шеся непреста́нно о ве́рою чту́щих вас.
Го́споди, поми́луй.
(40 раз)
И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.
Го́споди поми́луй.
(Трижды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
И́менем Госпо́дним благослови́, о́тче.
Иере́й:
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас.
Чтец:
Ами́нь. Бо́же и Го́споди сил и всея́ тва́ри Соде́телю, И́же за милосе́рдие безприкла́дныя ми́лости Твоея́ Единоро́днаго Сы́на Твоего́, Го́спода на́шего Иису́са Христа́, низпосла́вый на спасе́ние ро́да на́шего, и честны́м Его́ Кресто́м рукописа́ние грех на́ших растерза́вый, и победи́вый тем нача́ла и вла́сти тьмы. Сам, Влады́ко Человеколю́бче, приими́ и нас, гре́шных, благода́рственныя сия́ и моле́бныя моли́твы и изба́ви нас от вся́каго всегуби́тельнаго и мра́чнаго прегреше́ния и всех озло́бити нас и́щущих ви́димых и неви́димых враг. Пригвозди́ стра́ху Твоему́ пло́ти на́ша и не уклони́ серде́ц на́ших в словеса́ или́ помышле́ния лука́вствия, но любо́вию Твое́ю уязви́ ду́ши на́ша, да, к Тебе́ всегда́ взира́юще и е́же от Тебе́ све́том наставля́еми, Тебе́, непристу́пнаго и присносу́щнаго зря́ще Све́та, непреста́нное Тебе́ испове́дание и благодаре́ние возсыла́ем, Безнача́льному Отцу́ со Единоро́дным Твои́м Сы́ном и Всесвяты́м, и Благи́м, и Животворя́щим Твои́м Ду́хом ны́не, и при́сно, и во ве́ки веко́в, ами́нь.

Боже́ственная литурги́я:

Диа́кон:
Благослови́, влады́ко.
Иере́й:
Благослове́но Ца́рство Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Аминь.

Вели́кая ектения́:

Диа́кон:
Ми́ром Го́споду помо́лимся.
Хор:
Го́споди, поми́луй.
Диа́кон:
О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих во_нь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем, Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имярек), честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Пе́рвый антифо́н, псало́м 102:

Хор:
Благослови́, душе́ моя́, Го́спода,/ благослове́н еси́ Го́споди./
Благослови́, душе́ моя́, Го́спода,/ и вся вну́тренняя моя́/ и́мя свя́тое Его́./ Благослови́, душе́ моя́, Го́спода,/ и не забыва́й всех воздая́ний Его́,/ очища́ющаго вся беззако́ния твоя́,/ исцеля́ющаго вся неду́ги твоя́,/ избавля́ющаго от истле́ния живо́т твой,/ венча́ющаго тя ми́лостию и щедро́тами,/ исполня́ющаго во благи́х жела́ние твое́:/ обнови́тся я́ко о́рля ю́ность твоя́./ Творя́й ми́лостыни Госпо́дь,/ и судьбу́ всем оби́димым./ Сказа́ пути́ Своя́ Моисе́ови,/ сыново́м Изра́илевым хоте́ния Своя́:/ Щедр и Ми́лостив Госпо́дь,/ Долготерпели́в и Многоми́лостив./ Не до конца́ прогне́вается,/ ниже́ во век вражду́ет,/ не по беззако́нием на́шим сотвори́л есть нам,/ ниже́ по грехо́м на́шим возда́л есть нам./ Я́ко по высоте́ небе́сней от земли́,/ утверди́л есть Госпо́дь ми́лость Свою́ на боя́щихся Его́./ Ели́ко отстоя́т восто́цы от за́пад,/ уда́лил есть от нас беззако́ния на́ша./ Я́коже ще́дрит оте́ц сы́ны,/ уще́дри Госпо́дь боя́щихся Его́./ Я́ко Той позна́ созда́ние на́ше,/ помяну́, я́ко персть есмы́./ Челове́к, я́ко трава́ дни́е eго́,/ я́ко цвет се́льный, та́ко оцвете́т,/ я́ко дух про́йде в нем,/ и не бу́дет, и не позна́ет ктому́ ме́ста своего́./ Ми́лость же Госпо́дня от ве́ка и до ве́ка на боя́щихся Его́,/ и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́./ Госпо́дь на Небеси́ угото́ва Престо́л Свой,/ и Ца́рство Его́ все́ми облада́ет./ Благослови́те Го́спода вси А́нгели Его́,/ си́льнии кре́постию, творя́щии сло́во Его́, услы́шати глас слове́с Его́./ Благослови́те Го́спода вся Си́лы Его́,/ слуги́ Его́, творя́щии во́лю Его́./ Благослови́те Го́спода вся дела́ Его́, на вся́ком ме́сте влады́чества Его́./
Благослови́, душе́ моя́, Го́спода,/ и вся вну́тренняя моя́/ и́мя свя́тое Его́.// Благослове́н еси́, Го́споди.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Твоя́ держа́ва, и Твое́ есть Ца́рство, и си́ла, и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Второ́й антифо́н, псало́м 145:

Хор:
Хвали́, душе́ моя́, Го́спода./ Восхвалю́ Го́спода в животе́ мое́м,/ пою́ Бо́гу моему́, до́ндеже есмь./ Не наде́йтеся на кня́зи, на сы́ны челове́ческия,/ в ни́хже несть спасе́ния./ Изы́дет дух eго́/ и возврати́тся в зе́млю свою́./ В той день поги́бнут вся помышле́ния eго́./ Блаже́н, eму́же Бог Иа́ковль Помо́щник его́,/ упова́ние eго́ на Го́спода Бо́га своего́,/ сотво́ршаго не́бо и зе́млю,/ мо́ре и вся, я́же в них,/ храня́щаго и́стину в век,/ творя́щаго суд оби́димым,/ даю́щаго пи́щу а́лчущим./ Госпо́дь реши́т окова́нныя./ Госпо́дь умудря́ет слепцы́./ Госпо́дь возво́дит низве́рженныя./ Госпо́дь лю́бит пра́ведники./ Госпо́дь храни́т прише́льцы,/ си́ра и вдову́ прии́мет/ и путь гре́шных погуби́т./ Воцари́тся Госпо́дь во век,// Бог твой, Сио́не, в род и род.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Единоро́дный Сы́не:

Единоро́дный Сы́не и Сло́ве Бо́жий, Безсме́ртен Сый/ и изво́ливый спасе́ния на́шего ра́ди/ воплоти́тися от Святы́я Богоро́дицы и Присноде́вы Мари́и,/ непрело́жно вочелове́чивыйся,/ распны́йся же, Христе́ Бо́же, сме́ртию смерть попра́вый,/ Еди́н Сый Святы́я Тро́ицы,// спрославля́емый Отцу́ и Свято́му Ду́ху, спаси́ нас.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко благ и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.

Тре́тий антифо́н, Блаже́нны:

Хор:
Во Ца́рствии Твое́м помяни́ нас, Го́споди, егда́ прии́деши, во Ца́рствии Твое́м.
На 12:
Блаже́ни ни́щии ду́хом, я́ко тех есть Ца́рство Небе́сное.
Блаже́ни пла́чущии, я́ко ти́и уте́шатся.
На 10:
Блаже́ни кро́тции, я́ко ти́и насле́дят зе́млю.
  
Воскре́сные, глас 7:
Тропарь:
Красе́н бе́ и до́бр в сне́дь, и́же мене́ умертви́вый пло́д: Христо́с е́сть Дре́во Живо́тное, от Него́же яды́й не умира́ю, но вопию́ с разбо́йником: помяни́ мя, Го́споди, во Ца́рствии Твое́м.
Блаже́ни а́лчущии и жа́ждущии пра́вды, я́ко ти́и насы́тятся.
Тропарь:
На Кре́ст возне́сся, Ще́дре, Ада́мово рукописа́ние дре́вняго греха́ загла́дил еси́, и спа́сл еси́ от пре́лести ве́сь ро́д челове́ческий. Те́мже воспева́ем Тя́, Благоде́телю Го́споди.
На 8:
Блаже́ни ми́лостивии, я́ко ти́и поми́ловани бу́дут.
Тропарь:
Пригвозди́л еси́ на Кресте́, Ще́дре, грехи́ на́шя, Христе́, и Твое́ю сме́ртию сме́рть умертви́л еси́ воздви́гнувый уме́ршыя из ме́ртвых: те́мже покланя́емся Твоему́ свято́му воскресе́нию.
Блаже́ни чи́стии се́рдцем, я́ко ти́и Бо́га у́зрят.
Тропарь:
Излия́ я́д зми́й в слу́хи Е́вины иногда́: Христо́с же на Дре́ве кре́стнем источи́л е́сть ми́рови жи́зни сла́дость. Те́мже взыва́ем: помяни́ на́с, Го́споди, во Ца́рствии Твое́м.
На 6
Блаже́ни миротво́рцы, я́ко ти́и сы́нове Бо́жии нареку́тся.
Тропарь:
Во гро́бе я́ко сме́ртен положе́н бы́л еси́, Животе́ все́х Христе́: и вереи́ а́довы сломи́л еси́: и воскре́с во сла́ве тридне́вен я́ко си́лен, все́х просвети́л еси́: сла́ва Твоему́ воста́нию.
Блаже́ни изгна́ни пра́вды ра́ди, я́ко тех есть Ца́рство Небе́сное.
Тропарь:
Госпо́дь воскре́с тридне́вен из ме́ртвых, дарова́ ми́р Сво́й ученико́м, и си́х благослови́в посла́ ре́к: вся́ приведи́те во Ца́рствие Мое́.
На 4:
Блаже́ни есте́, егда́ поно́сят вам, и изжену́т, и реку́т всяк зол глаго́л на вы, лжу́ще Мене́ ра́ди.
  
Блаженны святы́х зе́мли Черка́сския , Глас 6
А́нгелов соприча́стники бы́ти упова́ем моли́твами ва́шими, адама́нты ве́ры, в земли́ Черка́сстей я́вленнии, святи́телие ди́вныя, преподо́бнии и богоно́снии отцы́ и ма́тери, му́ченицы добропобе́днии, новому́ченицы и испове́дницы ду́хом кре́пцыи. Сего́ ра́ди мо́лим вас: во Правосла́вии утверди́те ча́да ва́ша духо́вныя.
Ра́дуйтеся и весели́теся, я́ко мзда ва́ша мно́га на Небесе́х.
Тропарь:
Ли́ка предста́телие богои́збраннаго со́нма святы́х земли́ Черка́сския, у Престо́ла Вседержи́теля предстоя́щии, Мака́рие преподобному́чениче, и ты, му́чениче Дании́ле, моли́теся ко Го́споду, да от бед изба́вит люди Своя́, и в Правосла́вии утверди́т ча́да ва́ша духо́вныя.
Сла́ва Отцу́ и Сы́ну и Свято́му Ду́ху.
Тро́ичен:
У Престо́ла Тро́ицы Живонача́льныя моли́твою и ве́рою совоку́пленнии, святи́и трие́ му́ченицы, Влади́мире, Паи́сие и Са́вво, ва́шими те́плыми моли́твами бу́дите хода́таи на́шего спасе́ния, и в Правосла́вии утверди́те ча́да ва́ша духо́вныя.
И ны́не и при́сно и во ве́ки веко́в. Ами́нь.
Богоро́дичен
Попече́нием Тво́им Ма́терним, Бого́родице, тьму грехо́в на́ших отго́ниши, от вся́каго зла огражда́еши Це́рковь и зе́млю Черка́сскую, к Сы́ну Твоему́ и Бо́гу за ны моля́щи, е́же во Правосла́вии утверди́ти ча́да Твоя́.

Ма́лый вход (с Ева́нгелием):

Диа́кон:
Прему́дрость, про́сти.
Хор:
Прииди́те, поклони́мся и припаде́м ко Христу́. Спаси́ ны, Сы́не Бо́жий, Воскресый из ме́ртвых, пою́щия Ти: аллилу́иа.

Тропари́ и кондаки́ по вхо́де:

В храме Господском

  
Тропа́рь воскре́сный, глас 7:
Разруши́л еси́ Кресто́м Твои́м сме́рть, отве́рзл еси́ разбо́йнику ра́й: мироно́сицам пла́чь преложи́л еси́, и апо́столом пропове́дати повеле́л еси́: я́ко воскре́сл еси́, Христе́ Бо́же, да́руяй ми́рови ве́лию ми́лость.
  
Тропарь святы́х зе́мли Черка́сския Глас 5:
Всечестны́й Собо́р всеблаже́нных предста́телей на́ших Черка́сскую зе́млю по́двиги и чудесы́ свои́ми озари́вших и кро́вию честно́ю своею и́стину Правосла́вия утверди́вших: новому́чеников и испове́дников, святи́телей и преподо́бных, блаже́нных вку́пе и пра́ведных всих в пе́ниих просла́вим, просвеща́еми доброде́тельми и чудесы́ их пресла́вными, и со умиле́нием к ним возопии́м: уго́дницы Бо́жии возлю́бленнии, моли́теся ко Го́споду спасти́ся душа́м на́шим.
Сла́ва Отцу́ и Сы́ну и Свято́му Ду́ху.
  
Кондак святы́х зе́мли Черка́сския Глас 6:
Хода́таи о нас неусы́пнии, предста́телие земли́ Черка́сския сла́внии, святи́телие, преподо́бнии, му́ченицы и испове́дницы всепе́тии, не пре́зрите моле́ний недосто́йных чад ва́ших, но поспеши́те на по́мощь нам, во умиле́нии днесь взыва́ющим: ускори́те на моли́тву и потщи́теся на умоле́ние, моля́шеся непреста́нно о ве́рою чту́щих вас.
И ныне и присно и во веки веков. Аминь.
  
Кондак октоиха, глас 7
Не ктому́ держа́ва сме́ртная возмо́жет держа́ти челове́ки: Христо́с бо сни́де сокруша́я и разоря́я си́лы ея́. Связу́емь быва́ет а́д, проро́цы согла́сно ра́дуются: предста́, глаго́люще, Спа́с су́щым в ве́ре, изыди́те ве́рнии в воскресе́ние.

В храме Богородичном

  
Тропа́рь воскре́сный, глас 7:
Разруши́л еси́ Кресто́м Твои́м сме́рть, отве́рзл еси́ разбо́йнику ра́й: мироно́сицам пла́чь преложи́л еси́, и апо́столом пропове́дати повеле́л еси́: я́ко воскре́сл еси́, Христе́ Бо́же, да́руяй ми́рови ве́лию ми́лость.

[Тропарь Храма]

  
Тропарь святы́х зе́мли Черка́сския Глас 5:
Всечестны́й Собо́р всеблаже́нных предста́телей на́ших Черка́сскую зе́млю по́двиги и чудесы́ свои́ми озари́вших и кро́вию честно́ю своею и́стину Правосла́вия утверди́вших: новому́чеников и испове́дников, святи́телей и преподо́бных, блаже́нных вку́пе и пра́ведных всих в пе́ниих просла́вим, просвеща́еми доброде́тельми и чудесы́ их пресла́вными, и со умиле́нием к ним возопии́м: уго́дницы Бо́жии возлю́бленнии, моли́теся ко Го́споду спасти́ся душа́м на́шим.
  
Кондак октоиха, глас 7
Не ктому́ держа́ва сме́ртная возмо́жет держа́ти челове́ки: Христо́с бо сни́де сокруша́я и разоря́я си́лы ея́. Связу́емь быва́ет а́д, проро́цы согла́сно ра́дуются: предста́, глаго́люще, Спа́с су́щым в ве́ре, изыди́те ве́рнии в воскресе́ние.
Сла́ва Отцу́ и Сы́ну и Свято́му Ду́ху.
  
Кондак святы́х зе́мли Черка́сския Глас 6:
Хода́таи о нас неусы́пнии, предста́телие земли́ Черка́сския сла́внии, святи́телие, преподо́бнии, му́ченицы и испове́дницы всепе́тии, не пре́зрите моле́ний недосто́йных чад ва́ших, но поспеши́те на по́мощь нам, во умиле́нии днесь взыва́ющим: ускори́те на моли́тву и потщи́теся на умоле́ние, моля́шеся непреста́нно о ве́рою чту́щих вас.
И ныне и присно и во веки веков. Аминь.

[Конда́к Храма]

В храме Святого

  
Тропа́рь воскре́сный, глас 7:
Разруши́л еси́ Кресто́м Твои́м сме́рть, отве́рзл еси́ разбо́йнику ра́й: мироно́сицам пла́чь преложи́л еси́, и апо́столом пропове́дати повеле́л еси́: я́ко воскре́сл еси́, Христе́ Бо́же, да́руяй ми́рови ве́лию ми́лость.
  
Поскольку в храме служилось бдение, тропарь и кондак храма не поются в храме святого
  
Тропарь святы́х зе́мли Черка́сския Глас 5:
Всечестны́й Собо́р всеблаже́нных предста́телей на́ших Черка́сскую зе́млю по́двиги и чудесы́ свои́ми озари́вших и кро́вию честно́ю своею и́стину Правосла́вия утверди́вших: новому́чеников и испове́дников, святи́телей и преподо́бных, блаже́нных вку́пе и пра́ведных всих в пе́ниих просла́вим, просвеща́еми доброде́тельми и чудесы́ их пресла́вными, и со умиле́нием к ним возопии́м: уго́дницы Бо́жии возлю́бленнии, моли́теся ко Го́споду спасти́ся душа́м на́шим.
  
Кондак октоиха, глас 7
Не ктому́ держа́ва сме́ртная возмо́жет держа́ти челове́ки: Христо́с бо сни́де сокруша́я и разоря́я си́лы ея́. Связу́емь быва́ет а́д, проро́цы согла́сно ра́дуются: предста́, глаго́люще, Спа́с су́щым в ве́ре, изыди́те ве́рнии в воскресе́ние.
Сла́ва Отцу́ и Сы́ну и Свято́му Ду́ху.
  
Кондак святы́х зе́мли Черка́сския Глас 6:
Хода́таи о нас неусы́пнии, предста́телие земли́ Черка́сския сла́внии, святи́телие, преподо́бнии, му́ченицы и испове́дницы всепе́тии, не пре́зрите моле́ний недосто́йных чад ва́ших, но поспеши́те на по́мощь нам, во умиле́нии днесь взыва́ющим: ускори́те на моли́тву и потщи́теся на умоле́ние, моля́шеся непреста́нно о ве́рою чту́щих вас.
И ныне и присно и во веки веков. Аминь.
  
Кондáк Богоро́дицы, глaс 6:
Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я,/ на по́мощь нас, ве́рно зову́щих Ти;/ ускори́ на моли́тву и потщи́ся на умоле́ние,// предста́тельствующи при́сно, Богоро́дице, чту́щих Тя.
Диа́кон:
Го́споду помо́лимся.
Хор:
Го́споди, поми́луй.
Иере́й:
Я́ко Свят́ еси́, Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно.
Диа́кон:
Го́споди, спаси́ благочести́выя.
Хор:
Го́споди, спаси́ благочести́выя.
Диа́кон:
И услы́ши ны.
Хор:
И услы́ши ны.
Диа́кон:
И во ве́ки веко́в.
Хор:
Ами́нь.

Трисвято́е:

Хор:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Три́жды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Святы́й Безсме́ртный, поми́луй нас.
Святы́й Бо́же, Святы́й Кре́пкий, Святы́й Безсме́ртный, поми́луй нас.
Диа́кон:
Во́нмем.
Иере́й:
Мир всем.
Чтец:
И ду́хови твоему́.
Диа́кон:
Прему́дрость.

Проки́мен воскре́сный, глaс 7:

Чтец:
Проки́мен, глас седмый:
Госпо́дь кре́пость лю́дем Свои́м даст, / Госпо́дь благослови́т лю́ди Своя́ ми́ром.
Хор:
Госпо́дь кре́пость лю́дем Свои́м даст, / Госпо́дь благослови́т лю́ди Своя́ ми́ром.
Чтец:
Принеси́те Го́сподеви сы́нове Бо́жии, принеси́те Го́сподеви сы́ны о́вни.
Хор:
Госпо́дь кре́пость лю́дем Свои́м даст, / Госпо́дь благослови́т лю́ди Своя́ ми́ром.

Прокимен святы́х зе́мли Черка́сския, глас 4:

Чтец:
Прокимен, глас четве́ртый: Воззва́ша пра́веднии, и Госпо́дь услы́ша их.
Хор:
Воззва́ша пра́веднии / и Госпо́дь услы́ша их.

Чтение Апостола:

Диа́кон:
Прему́дрость.
Чтец:
К Кори́нфяном втора́го посла́ния свята́го апо́стола Па́вла чте́ние.
Диа́кон:
Во́нмем.
  
Чтение дня (Зачало 181,2 Кор.6:1-10):
Чтец:
Бра́тие, поспе́шствующе мо́лим, не вотще́ благода́ть Бо́жию прия́ти вам. Глаго́лет бо: во вре́мя прия́тно послу́шах тебе́, и в день спасе́ния помого́х ти. Се ны́не вре́мя благоприя́тно, се ны́не день спасе́ния. Ни еди́но ни в че́мже даю́ще претыка́ние, да служе́ние безпоро́чно бу́дет, но во всем представля́юще себе́ я́коже Бо́жия слуги́, в терпе́нии мно́зе, в ско́рбех, в беда́х, в теснота́х, в ра́нах, в темни́цах, в нестрое́ниих, в труде́х, во бде́ниих, в поще́ниих, во очище́нии, в ра́зуме, в долготерпе́нии, в бла́гости, в Ду́се Свя́те, в любви́ нелицеме́рне, в словеси́ и́стины, в си́ле Бо́жией, ору́жии пра́вды десны́ми и шу́ими, сла́вою и безче́стием, гажде́нием и благохвале́нием, я́ко лестцы́, и и́стинни, я́ко незна́еми, и познава́еми, я́ко умира́юще, и се жи́ви есмы́, я́ко наказу́еми, а не умерщвля́еми, я́ко скорбя́ще, при́сно же ра́дующеся, я́ко ни́щи, а мно́гих богатя́ще, я́ко ничто́же иму́ще, а вся содержа́ще.
  
Чтение святы́х зе́мли Черка́сския (Зачало 99,Рим.8:28-39):
Чтец:
Бра́тие, ве́мы я́ко лю́бящым Бо́га вся поспешеству́ют во благо́е, су́щым по предуве́дению зва́нным. И́хже бо предуве́де, тех и предуста́ви сообра́зным бы́ти о́бразу Сы́на Своего́, я́ко бы́ти Ему́ перворо́дну во мно́гих бра́тиях. А и́хже предуста́ви, тех и призва́, а и́хже призва́, сих и оправда́, а и́хже оправда́, сих и просла́ви. Что у́бо рече́м к сим, а́ще Бог по нас, кто на ны? И́же у́бо Своего́ Сы́на не пощаде́, но за ны вся пре́дал есть Его́, ка́ко у́бо не и с Ним вся нам да́рствует? Кто пое́млет на избра́нныя Бо́жия? Бог оправда́яй. Кто осужда́яй? Христо́с Иису́с уме́рый, па́че же и воскресы́й, И́же и есть одесну́ю Бо́га, И́же и хода́тайствует о нас. Кто ны разлучи́т от любве́ Бо́жия? Скорбь ли, или́ теснота́, или́ гоне́ние, или́ глад, или́ нагота́, или́ беда́, или́ мечь? Я́коже есть пи́сано: я́ко Тебе́ ра́ди умерщвля́еми есмы́ весь день, вмени́хомся я́коже о́вцы заколе́ния. Но о сих всех препобежда́ем за Возлю́бльшаго ны. Извести́хся бо, я́ко ни смерть, ни живо́т, ни А́нгели, ни Нача́ла, ниже́ Си́лы, ни настоя́щая, ни гряду́щая, ни высота́, ни глубина́, ни и́на тварь ка́я возмо́жет нас разлучи́ти от любве́ Бо́жия, я́же о Христе́ Иису́се Го́споде на́шем.
Иере́й:
Мир ти.
Чтец:
И ду́хови твоему́.
Диа́кон:
Прему́дрость.

Аллилуа́рий воскре́сный, глас 7:

Чтец:
Глас седмый: Аллилу́ия, аллилу́ия, аллилу́ия.
Хор:
Аллилу́ия, аллилу́ия, аллилу́ия.
Чтец:
Бла́го есть испове́датися Го́сподеви и пе́ти И́мени Твоему́, Вы́шний.
Хор:
Аллилу́ия, аллилу́ия, аллилу́ия.

АЛЛИЛУА́РИЙ святы́х зе́мли Черка́сския, глас 6:

Чтец:
Аллилу́ия, глас шесты́й: Тебе́ ра́ди, Го́споди, умервщля́еми есмы́ весь день.
Хор:
Аллилу́ия, аллилу́ия, аллилу́ия.
Диа́кон:
Благослови́, влады́ко, благовести́теля свята́го Апо́стола и Евангели́ста Луки́
Иере́й:
Бог, моли́твами свята́го, сла́внаго, всехва́льнаго Апо́стола и Евангели́ста Луки́, да да́ст тебе́ глаго́л благовеству́ющему си́лою мно́гою, во исполне́ние Ева́нгелия возлю́бленнаго Сы́на Своего́, Го́спода на́шего Иису́са Христа́.
Диа́кон:
Аминь.
2й диа́кон:
Прему́дрость, про́сти, услы́шим свята́го Ева́нгелия.
Иере́й:
Мир всем.
Хор:
И ду́хови твоему́.
Диа́кон:
От Луки́ Свята́го Ева́нгелия чте́ние.
Хор:
Сла́ва Тебе́, Го́споди, сла́ва Тебе́.
2й диа́кон:
Во́нмем.

Чтение Евангелия:

  
Чтение дня (зачало 26.,Лк.6:31-36)
Диа́кон:
Рече́ Госпо́дь: я́коже хо́щете да творя́т вам челове́цы, и вы твори́те им та́кожде. И а́ще лю́бите лю́бящыя вы, ка́я вам благода́ть есть? И́бо и гре́шницы лю́бящыя их лю́бят. И а́ще благотворите́ благотворя́щым вам, ка́я вам благода́ть есть? И́бо и гре́шницы то́жде творя́т. И а́ще взаи́м даете́, от ни́хже ча́ете восприя́ти, ка́я вам благода́ть есть, и́бо и гре́шницы гре́шником взаи́м дава́ют, да восприи́мут ра́вная. Оба́че люби́те враги́ ва́ша, и благотвори́те, и взаи́м да́йте, ничесо́же ча́юще, и бу́дет мзда ва́ша мно́га, и бу́дете сы́нове Вы́шняго, я́ко Той благ есть на безблагода́тныя и злы́я. Бу́дите у́бо милосе́рди, я́коже и Оте́ц ваш милосе́рд есть.
  
Чтение святы́х зе́мли Черка́сския (зачало 106.,Лк.21:12-19):
Диа́кон:
Рече́ Госпо́дь Свои́м ученико́м: внемли́те от челове́к, возложа́т на вы ру́ки своя́ и иждену́т, предаю́ще на со́нмища и темни́цы, ведо́мы к царе́м и влады́кам, и́мене Моего́ ра́ди, прилучи́тся же вам во свиде́тельство. Положи́те у́бо на сердца́х ва́ших, не пре́жде поуча́тися отвещава́ти. Аз бо дам вам уста́ и прему́дрость, е́йже не возмо́гут проти́витися или́ отвеща́ти вси противля́ющиися вам. Пре́дани же бу́дете и роди́тели и бра́тиею и ро́дом и дру́ги, и умертвя́т от вас. И бу́дете ненави́дими от всех и́мене Моего́ ра́ди. И влас главы́ ва́шея не поги́бнет. В терпе́нии ва́шем стяжи́те ду́шы ва́ша.
Хор:
Сла́ва Тебе́, Го́споди, сла́ва Тебе́.

Ектения́ сугу́бая:

Диа́кон:
Рце́м вси от всея́ души́, и от всего́ помышле́ния на́шего рцем.
Хор:
Го́споди, поми́луй.
Диа́кон:
Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.
Хор:
Го́споди, поми́луй.
Диа́кон:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Трижды, на каждое прошение)
Диа́кон:
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о бра́тиях на́ших, свяще́нницех, священномона́сех, и всем во Христе́ бра́тстве на́шем.
Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих настоя́теля, бра́тии и прихо́жан свята́го хра́ма сего́.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Иере́й:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Ектения́ об оглаше́нных:

Диа́кон:
Помоли́теся, оглаше́ннии, Го́сподеви.
Хор:
Го́споди, поми́луй.
(На каждое прошение)
Диа́кон:
Ве́рнии, о оглаше́нных помо́лимся, да Госпо́дь поми́лует их.
Огласи́т их сло́вом и́стины.
Откры́ет им Ева́нгелие пра́вды.
Соедини́т их святе́й Свое́й собо́рней и апо́стольстей Це́ркви.
Спаси́, поми́луй, заступи́ и сохрани́ их, Бо́же, Твое́ю благода́тию.
Оглаше́ннии, главы ва́ша Го́сподеви приклони́те.
Хор:
Тебе́, Го́споди.
Иере́й:
Да и ти́и с на́ми сла́вят пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Хор:
Ами́нь.

Ектения́ ве́рных, пе́рвая:

Диа́кон:
Ели́цы оглаше́ннии, изыди́те, оглаше́ннии, изыди́те, ели́цы оглаше́ннии, изыди́те, да никто от оглаше́нных, ели́цы ве́рнии, па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Прему́дрость.
Иере́й:
Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.

Ектения́ ве́рных, втора́я:

Диа́кон:
Па́ки и па́ки, ми́ром Го́споду помо́лимся.
Хор:
Го́споди, поми́луй.
(На каждое прошение)
Диа́кон:
О свы́шнем ми́ре и спасе́нии душ на́ших, Го́споду помо́лимся.
О ми́ре всего́ мира, благостоя́нии святы́х Бо́жиих церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Прему́дрость.
Иере́й:
Я́ко да под держа́вою Твое́ю всегда́ храни́ми, Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.

Херуви́мская песнь:

Хор:
И́же Херуви́мы та́йно образу́юще и животворя́щей Тро́ице Трисвяту́ю песнь припева́юще, вся́кое ны́не жите́йское отложи́м попече́ние.

Вели́кий вход:

Диа́кон:
Вели́каго господи́на и отца́ на́шего (Имярек), Святе́йшаго Патриа́рха всея́ Ру́си, и господи́на на́шего (Высо́ко-) Преосвяще́ннейшаго (имярек), (архи-)епи́скопа (митрополита (титул)), да помяне́т Госпо́дь Бог во Ца́рствии Свое́м всегда́, ны́не и при́сно, и во ве́ки веко́в.
Иере́й:
Преосвяще́нныя митрополи́ты, архиепи́скопы и епи́скопы, и весь свяще́ннический и мона́шеский чин, и при́чет церко́вный, бра́тию свята́го хра́ма сего́, всех вас, правосла́вных христиа́н, да помяне́т Госпо́дь Бог во Ца́рствии Свое́м, всегда́, ны́не и при́сно, и во ве́ки веко́в.
Хор:
Ами́нь. Я́ко да Царя́ всех поды́мем, а́нгельскими неви́димо дориноси́ма чи́нми. Аллилу́иа, аллилу́иа, аллилу́иа.

Ектения́ проси́тельная:

Диа́кон:
Испо́лним моли́тву на́шу Го́сподеви.
Хор:
Го́споди, поми́луй.
(На каждое прошение)
Диа́кон:
О предложе́нных Честны́х Даре́х, Го́споду помо́лимся.
О святе́м хра́ме сем, и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Дне всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и дру́г дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Щедро́тами Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Хор:
Ами́нь.
Иере́й:
Мир всем.
Хор:
И ду́хови твоему́.
Диа́кон:
Возлю́бим друг дру́га, да единомы́слием испове́мы.
Хор:
Отца́, и Сы́на, и Свята́го Ду́ха, Тро́ицу единосу́щную и неразде́льную.
Диа́кон:
Две́ри, две́ри, прему́дростию во́нмем.

Си́мвол ве́ры:

Лю́ди:
Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Евхаристи́ческий Кано́н:

Диа́кон:
Ста́нем до́бре, ста́нем со стра́хом, во́нмем, свято́е возноше́ние в ми́ре приноси́ти.
Хор:
Ми́лость ми́ра, же́ртву хвале́ния.
Иере́й:
Благода́ть Го́спода на́шего Иису́са Христа́, и любы́ Бо́га и Отца́, и прича́стие Свята́го Ду́ха, бу́ди со все́ми ва́ми.
Хор:
И со ду́хом твои́м.
Иере́й:
Горе́ име́им сердца́.
Хор:
И́мамы ко Го́споду.
Иере́й:
Благодари́м Го́спода.
Хор:
Досто́йно и пра́ведно есть покланя́тися Отцу́ и Сы́ну, и Свято́му Ду́ху, Тро́ице единосу́щней и неразде́льней.
Иере́й:
Побе́дную песнь пою́ще, вопию́ще, взыва́юще и глаго́люще.
Хор:
Свят, свят, свят Госпо́дь Савао́ф, испо́лнь не́бо и земля́ сла́вы Твоея́; оса́нна в вы́шних, благослове́н Гряды́й во и́мя Госпо́дне, оса́нна в вы́шних.
Иере́й:
Приими́те, яди́те, сие́ есть Те́ло Мое́, е́же за вы ломи́мое во оставле́ние грехо́в.
Хор:
Ами́нь.
Иере́й:
Пи́йте от нея́ вси, сия́ есть Кровь Моя́ Но́ваго Заве́та, я́же за вы и за мно́гия излива́емая, во оставле́ние грехо́в.
Хор:
Ами́нь.
Иере́й:
Твоя́ от Твои́х Тебе́ принося́ще, о всех и за вся.
Хор:
Тебе́ пое́м, Тебе́ благослови́м, Тебе́ благодари́м, Го́споди, и мо́лим Ти ся, Бо́же наш.
Иере́й:
Изря́дно о Пресвяте́й, Пречи́стей, Преблагослове́нней, Сла́вней Влады́чице на́шей Богоро́дице и Присноде́ве Мари́и.

«Досто́йно есть…»:

Хор:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и славне́йшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Иере́й:
В пе́рвых помяни́, Го́споди, вели́каго господи́на и отца́ на́шего имярек, Святе́йшаго Патриа́рха всея́ Руси́, и господи́на на́шего (Высо́ко-) Преосвяще́ннейшаго (имярек), (архи-)епи́скопа (митрополита (титул)), и́хже да́руй святы́м Твои́м це́рквам, в ми́ре, це́лых, честны́х, здра́вых, долгоде́нствующих, пра́во пра́вящих сло́во Твоея́ и́стины.
Хор:
И всех, и вся.
Иере́й:
И даждь нам еди́неми усты́ и еди́нем се́рдцем сла́вити и воспева́ти пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Хор:
Ами́нь.
Иере́й:
И да бу́дут ми́лости вели́каго Бо́га и Спа́са на́шего Иису́са Христа́ со все́ми ва́ми.
Хор:
И со ду́хом твои́м.

Ектения́ проси́тельная:

Диа́кон:
Вся святы́я помяну́вше, па́ки и па́ки ми́ром Го́споду помо́лимся.
Хор:
Го́споди, поми́луй.
(На каждое прошение)
Диа́кон:
О принесе́нных и освяще́нных Честны́х Даре́х, Го́споду помо́лимся.
Я́ко да человеколю́бец Бог наш, прие́м я́ во святы́й и пренебе́сный и мы́сленный Свой же́ртвенник, в воню́ благоуха́ния духо́внаго, возниспо́слет нам Боже́ственную благода́ть и дар Свята́го Ду́ха, помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Дне всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Соедине́ние ве́ры и прича́стие Свята́го Ду́ха испроси́вше, са́ми себе́, и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
И сподо́би нас, Влады́ко, со дерзнове́нием, неосужде́нно сме́ти призыва́ти Тебе́, Небе́снаго Бо́га Отца́, и глаго́лати:

Моли́тва Госпо́дня:

Лю́ди:
О́тче наш, И́же еси́ на небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Хор:
Ами́нь.
Иере́й:
Мир всем.
Хор:
И ду́хови твоему́.
Диа́кон:
Главы́ ва́ша Го́сподеви приклони́те.
Хор:
Тебе́, Го́споди.
Иере́й:
Благода́тию, и щедро́тами, и человеколю́бием Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Хор:
Ами́нь.
Диа́кон:
Во́нмем.
Иере́й:
Свята́я святы́м.
Хор:
Еди́н свят,/ еди́н Госпо́дь,/ Иису́с Христо́с,/ во сла́ву Бо́га Отца́./ Ами́нь.

Прича́стен воскре́сный :

Хвали́те Го́спода с небе́с, хвали́те Его в вы́шних.

Причастен святы́х зе́мли Черка́сския

Ра́дуйтеся Пра́веднии о Го́споде, пра́вым подоба́ет похвала́.
Аллилу́ия.
(Трижды)

Прича́стие:

Диа́кон:
Со стра́хом Бо́жиим и ве́рою приступи́те.
Хор:
Благослове́н Гряды́й во и́мя Госпо́дне, Бог Госпо́дь и яви́ся нам.
Иере́й:
Ве́рую, Го́споди, и испове́дую, я́ко Ты еси́ вои́стинну Христо́с, Сын Бо́га жива́го, прише́дый в мир гре́шныя спасти́, от ни́хже пе́рвый есмь аз. Еще́ ве́рую, я́ко сие́ есть са́мое пречи́стое Те́ло Твое́, и сия́ есть са́мая честна́я Кровь Твоя́. Молю́ся у́бо Тебе́: поми́луй мя и прости́ ми прегреше́ния моя́, во́льная и нево́льная, я́же сло́вом, я́же де́лом, я́же ве́дением и неве́дением, и сподо́би мя неосужде́нно причастити́ся пречи́стых Твои́х Та́инств, во оставле́ние грехо́в и в жизнь ве́чную. Ами́нь.
Ве́чери Твоея́ та́йныя днесь, Сы́не Бо́жий, прича́стника мя приими́; не бо враго́м Твои́м та́йну пове́м, ни лобза́ния Ти дам, я́ко Иу́да, но я́ко разбо́йник испове́даю Тя: помяни́ мя, Го́споди, во Ца́рствии Твое́м.
Да не в суд или́ во осужде́ние бу́дет мне причаще́ние Святы́х Твои́х Та́ин, Го́споди, но во исцеле́ние души́ и те́ла.

Во время Причащения людей:

Хор:
Те́ло Христо́во приими́те, Источника безсме́ртнаго вкусите.

После Причащения людей:

Хор:
Аллилу́ия, аллилу́ия, аллилу́ия.
Иере́й:
Спаси́, Бо́же, лю́ди Твоя́, и благослови́ достоя́ние Твое́.
Хор:
Ви́дехом свет и́стинный,/ прия́хом Ду́ха Небе́снаго,/ обрето́хом ве́ру и́стинную,/ неразде́льней Тро́ице покланя́емся,// Та бо нас спасла́ есть.
Иере́й:
Всегда́, ны́не и при́сно, и во ве́ки веко́в.
Хор:
Ами́нь. Да испо́лнятся уста́ на́ша/ хвале́ния Твоего́ Го́споди,/ я́ко да пое́м сла́ву Твою́,/ я́ко сподо́бил еси́ нас причасти́тися/ Святы́м Твои́м, Боже́ственным, безсме́ртным и животворя́щим Та́йнам,/ соблюди́ нас во Твое́й святы́ни/ весь день поуча́тися пра́вде Твое́й.// Аллилу́иа, аллилу́иа, аллилу́иа.

Ектения́ заключи́тельная:

Диа́кон:
Про́сти прии́мше Боже́ственных, святы́х, пречи́стых, безсме́ртных, небе́сных и животворя́щих, стра́шных Христо́вых Та́ин, досто́йно благодари́м Го́спода.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
День весь соверше́н, свят, ми́рен и безгре́шен испроси́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Ты еси́ освяще́ние на́ше, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.
Иере́й:
С ми́ром изы́дем.
Хор:
О и́мени Госпо́дни.
Диа́кон:
Го́споду помо́лимся.
Хор:
Го́споди, поми́луй.

Заамво́нная моли́тва:

Иере́й:
Благословля́яй благословя́щия Тя, Го́споди, и освяща́яй на Тя упова́ющия, спаси́ лю́ди Твоя́ и благослови́ достоя́ние Твое́, исполне́ние Це́ркве Твоея́ сохрани́, освяти́ лю́бящия благоле́пие до́му Твоего́: Ты тех возпросла́ви Боже́ственною Твое́ю си́лою, и не оста́ви нас, упова́ющих на Тя. Мир мирови Твоему́ да́руй, це́рквам Твои́м, свяще́нником, во́инству и всем лю́дем Твои́м. Я́ко вся́кое дая́ние бла́го, и всяк дар соверше́н свы́ше есть, сходя́й от Тебе́ Отца́ све́тов, и Тебе́ сла́ву, и благодаре́ние, и поклоне́ние возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь. Бу́ди И́мя Госпо́дне благослове́но от ны́не и до ве́ка.
(Трижды)

Псало́м 33:

Хор:
Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и,/ и от все́х скорбе́й его́ спасе́ и./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода не лиша́тся вся́каго бла́га./ Прииди́те, ча́да, послу́шайте мене́,/ стра́ху Госпо́дню научу́ вас./ Кто́ есть челове́к хотя́й живо́т,/ любя́й дни ви́дети бла́ги?/ Удержи́ язы́к твой от зла,/ и устне́ твои́, е́же не глаго́лати льсти./ Уклони́ся от зла и сотвори́ бла́го./ Взыщи́ ми́ра, и пожени́ и́./ О́чи Госпо́дни на пра́ведныя,/ и у́ши Его́ в моли́тву их./ Лице́ же Госпо́дне на творя́щия зла́я,/ е́же потреби́ти от земли́ па́мять их./ Воззва́ша пра́веднии, и Госпо́дь услы́ша их,/ и от всех скорбе́й их изба́ви их./ Близ Госпо́дь сокруше́нных се́рдцем,/ и смире́нныя ду́хом спасе́т./ Мно́ги ско́рби пра́ведным,/ и от всех их изба́вит я́ Госпо́дь./ Храни́т Госпо́дь вся ко́сти их,/ ни еди́на от них сокруши́тся./ Смерть гре́шников люта́,/ и ненави́дящии пра́веднаго прегре́шат./ Изба́вит Госпо́дь ду́шы раб Свои́х,/ и не прегреша́т// вси, упова́ющии на Него́.
Иере́й:
Благослове́ние Госпо́дне на ва́с, Того́ благода́тию и человеколю́бием, всегда́, ны́не и при́сно, и во ве́ки веко́в.
Хор:
Ами́нь.
Иере́й:
Сла́ва Тебе́, Христе́ Бо́же, упова́ние на́ше, сла́ва Тебе́.
Хор:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Го́споди, поми́луй.
(Три́жды)
Благослови́.

Отпу́ст: