i
Форма : M1S1Bd(270)

^

msword

html

@

1 Ноября 2024 года (14 Ноября 2024 года по н.ст.), Четверг, (А193), Глас 3. Святы́х и чудотво́рцов безсре́бреников Космы́ и Дамиа́на, и́же от Аси́и. Служба Бденнная * ВСЕНО́ЩНОЕ БДЕ́НИЕ * ВЕЛИ́КАЯ ВЕЧЕ́РНЯ * Псало́м 103, предначина́тельный: * Вели́кая ектения́: * Блаже́н муж: * Ектения́ ма́лая: * Господи Возвах Глас 6: * Вход с кади́лом: * Све́те Тихи́й: * В среду вечера, глас 5: * Пареми́и: * Ектения́ сугу́бая: * Сподо́би, Го́споди: * Ектения́ проси́тельная: * Лития: * Поется стихира храма * Стихиры на стиховне чудотво́рцов и безсре́бреников Космы́ и Дамиа́на, Глас 2: * Моли́тва свято́го Симео́на Богоприи́мца: * Трисвято́е по О́тче наш: * Тропарь чудотво́рцов и безсре́бреников Космы́ и Дамиа́на, Глас 8 : * Тропа́рь, глас 4: * Благослове́ние хле́бов: * Псало́м 33: * УТРЕНЯ: * Чтец глаголет шестопсалмие (псалмы 3, 37, 62, 87, 102, 142). * Вели́кая ектения́: * Бог Господь, Глас 8: * Тропарь чудотво́рцов и безсре́бреников Космы́ и Дамиа́на, Глас 8 : * КАФИЗМЫ: * Кафизма третиянадесять * Псало́м 91: * Псало́м 92: * Псало́м 93: * Псало́м 94: * Псало́м 95: * Псало́м 96: * Псало́м 97: * Псало́м 98: * Псало́м 99: * Псало́м 100: * Ектения́ ма́лая: * Седален по 1-м стихословии чудотво́рцов и безсре́бреников Космы́ и Дамиа́на , Глас 4: * Кафизма четвертаянадесять * Псало́м 101: * Псало́м 102: * Псало́м 103: * Псало́м 104: * Ектения́ ма́лая: * Седален по 2-м стихословии чудотво́рцов и безсре́бреников Космы́ и Дамиа́на , Глас 8: * Полиеле́й: * Величание чудотво́рцов и безсре́бреников Космы́ и Дамиа́на: * Псало́м избра́нный: * Ектения́ ма́лая: * Седален по полиелеи чудотво́рцов и безсре́бреников Космы́ и Дамиа́на , Глас 8: * Степе́нна, глас 4: * 1 Антифо́н: * Проки́мен и чте́ние Ева́нгелия: * Псало́м 50: * Стихира, Глас 1: * КАНОН(6-8): * Пе́снь 1. * Катавасия , Глас 4: * Пе́снь 3. * Катавасия , Глас 4: * Ектения́ ма́лая: * Седален чудотво́рцов и безсре́бреников Космы́ и Дамиа́на , Глас 8: * Пе́снь 4. * Катавасия , Глас 4: * Пе́снь 5. * Катавасия , Глас 4: * Пе́снь 6. * Катавасия , Глас 4: * Ектения́ ма́лая: * Кондак чудотво́рцов и безсре́бреников Космы́ и Дамиа́на, Глас 2: * Икос: * Пе́снь 7. * Катавасия , Глас 4: * Пе́снь 8. * Катавасия , Глас 4: * Песнь Пресвято́й Богоро́дицы: * Пе́снь 9. * Катавасия , Глас 4: * Ектения́ ма́лая: * Светилен чудотво́рцов и безсре́бреников Космы́ и Дамиа́на * Хвали́тны псалмы́, глас 1: * Славосло́вие вели́кое: * Трисвятое: * Тропарь чудотво́рцов и безсре́бреников Космы́ и Дамиа́на, Глас 8: * Ектения́ сугу́бая: * Ектения́ проси́тельная: * Отпу́ст: * Многоле́тие: * ЧИТА́ЕТСЯ ПЕ́РВЫЙ ЧАС: * Псало́м 5: * Псало́м 89: * Псало́м 100: * Тропарь чудотво́рцов и безсре́бреников Космы́ и Дамиа́на, Глас 8: * Трисвято́е по О́тче наш: * Кондак чудотво́рцов и безсре́бреников Космы́ и Дамиа́на, Глас 2: * Конда́к, глас 8: * Отпу́ст. * Тре́тий час: * Трисвято́е по О́тче наш: * Псало́м 16: * Псало́м 24: * Псало́м 50: * Тропарь чудотво́рцов и безсре́бреников Космы́ и Дамиа́на, Глас 8: * Трисвято́е по О́тче наш: * Кондак чудотво́рцов и безсре́бреников Космы́ и Дамиа́на, Глас 2: * Шесто́й час: * Псало́м 53: * Псало́м 54: * Псало́м 90: * Тропарь чудотво́рцов и безсре́бреников Космы́ и Дамиа́на, Глас 8: * Трисвято́е по О́тче наш: * Кондак чудотво́рцов и безсре́бреников Космы́ и Дамиа́на, Глас 2: * Боже́ственная литурги́я: * Вели́кая ектения́: * Пе́рвый антифо́н, псало́м 102: * Ектения́ ма́лая: * Второ́й антифо́н, псало́м 145: * Единоро́дный Сы́не: * Ектения́ ма́лая: * Тре́тий антифо́н, Блаже́нны: * Ма́лый вход (с Ева́нгелием): * В храме Господском И Богородичном * В храме Святого * Богоро́дичен, гла́с 6‑й: * Трисвято́е: * Прокимен чудотво́рцов и безсре́бреников Космы́ и Дамиа́на, глас 4: * Чтение Апостола: * Аллилуарий чудотво́рцов и безсре́бреников Космы́ и Дамиа́на, глас 2: * Чтение Евангелия: * Ектения́ сугу́бая: * Ектения́ об оглаше́нных: * Ектения́ ве́рных, пе́рвая: * Ектения́ ве́рных, втора́я: * Херуви́мская песнь: * Вели́кий вход: * Ектения́ проси́тельная: * Си́мвол ве́ры: * Евхаристи́ческий Кано́н: * Досто́йно есть: * Ектения́ проси́тельная: * Моли́тва Госпо́дня: * Причастен чудотво́рцов и безсре́бреников Космы́ и Дамиа́на: * Прича́стие: * Ектения́ заключи́тельная: * Заамво́нная моли́тва: * Псало́м 33: * Иерей произносит Отпуст * [Многолетие] * Полезная информация о празднике чудотво́рцов и безсре́бреников Космы́ и Дамиа́на

14 ноября 2024 по н. ст.

Ссылка на оригинал - https://cerkva.minei.ru/glas/showSlugba?id=369&dayId=30743

1 Ноября 2024 года (14 Ноября 2024 года по н.ст.), Четверг, (А193), Глас 3. Святы́х и чудотво́рцов безсре́бреников Космы́ и Дамиа́на, и́же от Аси́и. Служба Бденнная

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Диа́кон:
Воста́ните!
Хор:
Благослови.
Иере́й:
Сла́ва Святе́й, и Единосу́щней, и Животворя́щей, и Неразде́льней Тро́ице всегда́, ны́не и при́сно, и во ве́ки веко́в.
Хор:
Ами́нь.
  
Священнослужи́тели в алтаре́:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́ Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Прииди́те, поклони́мся и припаде́м Ему́.

Псало́м 103, предначина́тельный:

Благослови́, душе́ моя́, Го́спода. Го́споди, Бо́же мо́й, возвели́чился еси́ зело́, во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в ве́к ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ и́м. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ го́р про́йдут во́ды. Напая́ют вся́ зве́ри се́льныя, жду́т она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т гла́с. Напая́яй го́ры от превы́спренних Свои́х, от плода́ де́л Твои́х насы́тится земля́. Прозяба́яй траву́ ското́м, и зла́к на слу́жбу челове́ком, извести́ хле́б от земли́. И вино́ весели́т се́рдце челове́ка, ума́стити лице́ еле́ем, и хле́б се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л е́сть луну́ во времена́, со́лнце позна́ за́пад сво́й. Положи́л еси́ тму́, и бы́сть но́щь, в не́йже про́йдут вси́ зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся́ прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже не́сть числа́, живо́тная ма́лая с вели́кими, та́мо корабли́ препла́вают, зми́й се́й, eго́же созда́л еси́ руга́тися eму́. Вся́ к Тебе́ ча́ют, да́ти пи́щу и́м во бла́го вре́мя. Да́вшу Тебе́ и́м соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши ду́х и́х, и исче́знут, и в пе́рсть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже е́смь, да услади́тся Ему́ бесе́да моя́, а́з же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти и́м. Благослови́, душе́ моя́, Го́спода.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Три́жды)
  
В это время священник уходит в Алтарь, а диакон выходит северными дверями на амвон и произносит великую ектению. Если нет диакона, священник остается и произносит ектению сам.

Вели́кая ектения́:

Диа́кон:
Ми́ром Го́споду помо́лимся.
Хор:
Го́споди, поми́луй.
(На каждое прошение)
Диа́кон:
О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих во нь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем, Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имярек), честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Блаже́н муж:

Хор:
Блаже́н муж, и́же не и́де на сове́т нечести́вых.
Аллилу́иа, аллилу́иа, аллилу́иа.
Я́ко весть Госпо́дь путь пра́ведных, и путь нечести́вых поги́бнет.
Аллилу́иа, аллилу́иа, аллилу́иа.
Рабо́тайте Го́сподеви со стра́хом и ра́дуйтеся Ему́ с тре́петом.
Аллилу́иа, аллилу́иа, аллилу́иа.
Блаже́ни вси наде́ющиися Нань.
Аллилу́иа, аллилу́иа, аллилу́иа.
Воскресни́, Го́споди, спаси́ мя, Бо́же мой.
Аллилу́иа, аллилу́иа, аллилу́иа.
Госпо́дне есть спасе́ние, и на лю́дех Твои́х благослове́ние Твое́.
Аллилу́иа, аллилу́иа, аллилу́иа.
Сла́ва Отцу́ и Сы́ну и Свято́му Духу.
Аллилу́иа, аллилу́иа, аллилу́иа.
И ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа.
Аллилу́иа, аллилу́иа, аллилу́иа, сла́ва Тебе́ Бо́же.
(Три́жды) 

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Твоя́ держа́ва, и Твое́ есть Ца́рство, и си́ла, и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Господи Возвах Глас 6:

Хор:
Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.
Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.
Чтец или Хор
Положи́, Го́споди, хране́ние усто́м мои́м и две́рь огражде́ния о устна́х мои́х.
Не уклони́ се́рдце мое́ в словеса́ лука́вствия, непщева́ти вины́ о гресе́х
С челове́ки де́лающими беззако́ние; и не сочту́ся со избра́нными их.
Нака́жет мя пра́ведник ми́лостию и обличи́т мя, eле́й же гре́шнаго да не нама́стит главы́ моея́;
Яко eще́ и моли́тва моя во благоволе́ниих их, пожéрты бы́ша при ка́мени судии́ их;
Услы́шатся глаго́лы мои, я́ко возмого́ша, я́ко то́лща земли́ просе́деся на земли́, расточи́шася ко́сти их при а́де.
Яко к тебе́, Го́споди, Го́споди, óчи мои́; на тя упова́х, не отими́ ду́шу мою́;
Сохрани́ мя от се́ти, ю́же соста́виша ми, и от собла́зн де́лающих беззако́ние.
Паду́т во мре́жу свою́ гре́шницы; eди́н éсмь аз, до́ндеже прейду́.
Гла́сом мои́м ко Го́споду воззва́х, гла́сом мои́м ко Го́споду помолихся.
Пролию́ пре́д ним моле́ние мое́, печа́ль мою́ пре́д ни́м возвещу́.
Внегда́ изчеза́ти от менé ду́ху моему́, и ты позна́л eси́ стeзи́ моя;
На пути́ сем, по нему́же хожда́х, скры́ша се́ть мне́.
Сматря́х одесну́ю и возгля́дах, и не бе зна́яй мене́; поги́бе бе́гство от менé, и не́сть взыска́яй ду́шу мою.
Воззва́х к тебе, Го́споди, рех; ты eси́ упова́ние мое, ча́сть моя eси́ на земли́ живы́х.
Вонми́ моле́нию моему, я́ко смири́хся зело́;
Изба́ви мя от гоня́щих мя, я́ко укрепи́шася па́че менé.
Изведи́ из темни́цы ду́шу мою, испове́датися и́мени Твоему́.
Мене́ жду́т пpа́ведницы, до́ндеже возда́си мне́.
Из глубины́ воззва́х к Тебе, Го́споди, Го́споди, услы́ши гла́с мо́й.
Да бу́дут у́ши Твои вне́млюще гла́су моле́ния моего́.
  
Стихиры чудотво́рцов и безсре́бреников Космы́ и Дамиа́на Глас 6:
На 8. Стих:
Из глубины́ воззва́х к Тебе́, Го́споди,// Го́споди, услы́ши глас мой.
Стихира:
Всю́ отложи́вше на Небесе́х надежду,/ сокро́вище некра́домо себе́ святи́и сокро́вищствоваша:/ ту́не прия́ша, ту́не даю́т неду́гующим врачева́ния./ Зла́та или́ сребра́ ева́нгельски не стяжа́ша,/ челове́ком же и ското́м благодея́ния препода́ша,/ да все́ми послушли́ви бы́вше Христу,/ со дерзнове́нием мо́лятся о душа́х на́ших.
Стих:
Да бу́дут у́ши Твои́// вне́млюще гла́су моле́ния моего́.
Стихира:
Всю́ отложи́вше на Небесе́х надежду,/ сокро́вище некра́домо себе́ святи́и сокро́вищствоваша:/ ту́не прия́ша, ту́не даю́т неду́гующим врачева́ния./ Зла́та или́ сребра́ ева́нгельски не стяжа́ша,/ челове́ком же и ското́м благодея́ния препода́ша,/ да все́ми послушли́ви бы́вше Христу,/ со дерзнове́нием мо́лятся о душа́х на́ших.
На 6. Стих:
А́ще беззако́ния на́зриши, Го́споди, Го́споди, кто постои́т?// Я́ко у Тебе́ очище́ние е́сть.
Стихира:
Ве́щи возгнуша́шася на земли́ тле́емыя,/ Небе́сножи́телие же во пло́ти/ я́коже А́нгели яви́шася,/ единому́дреннии сожи́теле,/ сопру́г единонра́вный святы́х и единоду́шный./ Те́мже стра́ждущим всем врачева́ния подаю́т,/ безсре́бренно да́рующе благодея́ния тре́бующим,/ я́же ле́тным сим досто́йно почти́м пра́здником,/ Христу́ со дерзнове́нием моля́щияся/ о душа́х на́ших.
Стих:
И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,// упова́ душа́ моя́ на Го́спода.
Стихира:
Ве́щи возгнуша́шася на земли́ тле́емыя,/ Небе́сножи́телие же во пло́ти/ я́коже А́нгели яви́шася,/ единому́дреннии сожи́теле,/ сопру́г единонра́вный святы́х и единоду́шный./ Те́мже стра́ждущим всем врачева́ния подаю́т,/ безсре́бренно да́рующе благодея́ния тре́бующим,/ я́же ле́тным сим досто́йно почти́м пра́здником,/ Христу́ со дерзнове́нием моля́щияся/ о душа́х на́ших.
На 4. Стих:
От стра́жи у́тренния до но́щи, от стра́жи у́тренния,// да уповае́т Изра́иль на Го́спода.
Стихира:
Всю все́льшая в себе́ Тро́ицу, дво́ица приснопа́мятная,/ Косма́ и Дамиа́н Богому́дрии,/ я́ко пото́цы источа́ют от исто́чника живоно́снаго/ во́ды врачева́ний;/ и́хже и мо́щи стра́сти осяза́нием врачу́ют,/ и са́мая то́кмо имена́/ неду́ги от челове́ков отго́нят,/ всех притека́ющих спаси́тельная приста́нища о Христе́,/ и со дерзнове́нием мо́лятся о душа́х на́ших.
Стих:
Я́ко у Го́спода ми́лость, и мно́гое у Него́ избавле́ние,// и Той изба́вит Изра́иля от всех беззако́ний eго́.
Стихира:
Всю все́льшая в себе́ Тро́ицу, дво́ица приснопа́мятная,/ Косма́ и Дамиа́н Богому́дрии,/ я́ко пото́цы источа́ют от исто́чника живоно́снаго/ во́ды врачева́ний;/ и́хже и мо́щи стра́сти осяза́нием врачу́ют,/ и са́мая то́кмо имена́/ неду́ги от челове́ков отго́нят,/ всех притека́ющих спаси́тельная приста́нища о Христе́,/ и со дерзнове́нием мо́лятся о душа́х на́ших.
На 2. Стих:
Хвали́те Го́спода вси язы́цы,// похвали́те Его́ вси лю́дие.
Стихира:
Все отри́нувше стра́стное мучи́тельство/ и вся́ко размышле́ние лука́ваго зми́я попра́вше о Христе́,/ святи́и безме́здницы, Космо́ и Дамиа́не,/ светообра́зни яви́стеся, я́ко свети́ла,/ озаря́юще всю подсо́лнечную Богозна́меньми всегда́,/ тьму отгоня́юще и неду́ги благода́тию/ и всем спаси́телие явля́ющеся,/ ве́рою неукло́нною/ творя́щим сла́вную па́мять ва́шу, прему́дрии.
Стих:
Я́ко утверди́ся ми́лость Его́ на нас,// и и́стина Госпо́дня пребыва́ет во век.
Стихира:
Все отри́нувше стра́стное мучи́тельство/ и вся́ко размышле́ние лука́ваго зми́я попра́вше о Христе́,/ святи́и безме́здницы, Космо́ и Дамиа́не,/ светообра́зни яви́стеся, я́ко свети́ла,/ озаря́юще всю подсо́лнечную Богозна́меньми всегда́,/ тьму отгоня́юще и неду́ги благода́тию/ и всем спаси́телие явля́ющеся,/ ве́рою неукло́нною/ творя́щим сла́вную па́мять ва́шу, прему́дрии.
  
Глас 6:
Сла́ва Отцу́ и Сы́ну и Свято́му Ду́ху
Стихира:
Безконе́чна есть святы́х благода́ть,/ ю́же от Христа́ прия́ша,/ те́мже и мо́щи их/ от Боже́ственныя си́лы непреста́нно де́йствуют чудеса́,/ и́хже и имена́, ве́рою призыва́ема,/ неисце́льныя боле́зни исцеля́ют./ И́миже, Го́споди, и нас душе́вных и теле́сных страсте́й свободи́,/ я́ко Человеколю́бец.
И ны́не и при́сно и во ве́ки веко́в. Ами́нь.
  
Догматик на глас Славы, Глас 6:
Кто Тебе́ не ублажи́т, Пресвята́я Де́во? / кто ли не воспое́т Твоего́ Пречи́стаго Рождества́? / безле́тно бо от Отца́ возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щся: / естество́м Бог Сый / и естество́м быв Челове́к нас ра́ди; / не во двою́ лицу́ разделя́емый, / но во двою́ естеству́ / несли́тно познава́емый. / Того́ моли́, Чи́стая Всеблаже́нная, / поми́ловатися душа́м на́шим.

Вход с кади́лом:

Диа́кон:
Прему́дрость, про́сти.

Све́те Тихи́й:

Хор:
Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.
Диа́кон:
Во́нмем.
Иере́й:
Мир всем.
Хор:
И ду́хови твоему́.
  
Положив обычный поклон, диакон, аще же несть, священник, глаголет прокимен дне.

В среду вечера, глас 5:

Диа́кон:
Премудрость. Воннмем.
Диа́кон:
Бо́же, во и́мя Твое́ спаси́ мя, / и в си́ле Твое́й суди́ ми.
Хор:
Бо́же, во и́мя Твое́ спаси́ мя, / и в си́ле Твое́й суди́ ми.
Стих:
Бо́же, услы́ши моли́тву мою́, внуши́ глаго́лы уст мои́х.
Хор:
Бо́же, во и́мя Твое́ спаси́ мя, / и в си́ле Твое́й суди́ ми.
Диа́кон:
Бо́же, во и́мя Твое́ спаси́ мя
Хор:
И в си́ле Твое́й суди́ ми.

Пареми́и:

  
Паремии чудотво́рцов и безсре́бреников Космы́ и Дамиа́на:
Диа́кон:
Прему́дрость.
Чтец:
Проро́чества Иса́иина чте́ние.
Диа́кон:
Во́нмем.
  
Ис 43:9–14
Чтец:
Та́ко глаго́лет Госпо́дь: вси язы́ цы собра́шася вку́пе, и соберу́тся кня́зи от них. Кто возвести́т сия́ в них? Или́ я́же от нача́ла, кто слы́шана сотвори́т вам? Да приведу́т свиде́тели своя́, и оправдя́тся, и да услы́шат, и да реку́т и́стину.Бу́дите Ми свиде ́ тели, и Аз Свиде ́ тель, глаго́ лет Госпо́ дь Бог, и О ́ трок Его́ же избра́х. Да позна́ ете, и ве ́ руете Ми, и разуме ́ ете, я́ко Аз есмь, пре ́ жде Мене́ не бысть ин бог и по Мне не бу ́ дет. Аз есмь Бог, и несть ра ́ зве Мене́ спаса́яй. Аз возвести́х и спасо́х; уничижи́х, и не бе в вас чу́ждий. Вы Мне свиде́тели, и Аз Госпо́дь Бог, и еще ́ от нача ́ ла Аз есмь, и несть от рук Мои ́ х избавля ́ яй. Сотворю́, и кто отврати́т то? Си́це глаго́лет Госпо́дь Бог, избавля́яй вас, Святы́й Изра́илев.
Диа́кон:
Прему́дрость.
Чтец:
Прему́дрости Соломо́новы чте́ние.
Диа́кон:
Во́нмем.
  
Прем 3:1–9
Чтец:
Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их, и е́же от нас ше́ствие сокруше́ние, они же суть в ми́ре. И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бог искуси́ я́ и обре́те их досто́йны Себе́. Я́ко зла́то в горни́ ле, искуси́ их и, я ́ ко всепло́дие же́ртвенное, прия́т я́. И во вре́мя посеще́ния их возсия́ют и, я́ко и́скры по сте́блию, потеку́т. Су́дят язы́ ком, и облада́ ют людьми́, и воцари́ тся Госпо́дь в них во ве ́ ки. Наде́ющиися Нань разуме ́ ют и ́ стину, и ве ́ рнии в любви ́ пребу ́ дут Ему ́ . Я́ ко бла года́ть и ми́лость в преподо́бных Его́, и посеще́ние во избра́нных Его́.
Диа́кон:
Прему́дрость.
Чтец:
Прему́дрости Соломо́новы чте́ние.
Диа́кон:
Во́нмем.
  
Прем 5:15–24; 6:1–3
Чтец:
Пра́ведницы во ве́ки живу́т, и в Го́споде мзда их, и попече́ние их у Вы́ шняго. Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я́ и мы́шцею защити́т их. Прии́мет всеору́жие рве́ние Свое́ и вооружи́т тварь в месть враго́м. Облече́тся в броня́ пра́вды и возложи́т шлем, суд нелицеме́рен. Прии́мет щит непобеди́мый, преподо́бие. Поостри́т же напра́сный гнев во ору́жие; спобо́рет же с ним мир на безу́мныя. По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т. И от каменоме́тныя я́рости испо́лнь паду́т гра́ды, вознегоду́ет на них вода́ морска́я, ре́ки же потопя́т я́ на́гло. Сопроти́в ста́нет им дух си́лы и, я́ко ви́хор, разве́ет их и опустоши́т всю зе́млю беззако́ние, и злоде́йство преврати́т престо́лы си́льных. Слы́ шите у́бо, ца́рие, и разуме́йте, навы́кните судии́ конце́в земли́. Внуши́те, держа́щии мно́жества и гордя́щиися о наро́ дех язы́ков, я́ко дана́ есть от Го́ спода держа́ва вам и си́ ла от Вы́ шняго.

Ектения́ сугу́бая:

Диа́кон:
Рце́м вси от всея́ души́, и от всего́ помышле́ния на́шего рцем.
Хор:
Го́споди, поми́луй.
Диа́кон:
Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.
Хор:
Го́споди, поми́луй.
Диа́кон:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Трижды, на каждое прошение)
Диа́кон:
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих настоя́теля, бра́тии и прихо́жан свята́го хра́ма сего́.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Иере́й:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Сподо́би, Го́споди:

 Хор:
Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.
Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.
Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь. 

Ектения́ проси́тельная:

Диа́кон:
Испо́лним вече́рнюю моли́тву на́шу Го́сподеви.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Ве́чера всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и дру́г дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Бла́г и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.
Иере́й:
Мир всем.
Хор:
И ду́хови твоему́.
Диа́кон:
Главы́ на́ша Го́сподеви прикло́ним.
Хор:
Тебе́, Го́споди.
Иере́й:
Бу́ди держа́ва Ца́рствия Твоего́ благослове́на и препросла́влена. Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Лития:

Поется стихира храма

Одна из стихир по указанию настоятеля — из числа вечерних литийных стихир храмового святого (как правило, первая), либо та, которая поется по 50-м псалме на полиелейной утрене. В том случае, если храмовый святой не имеет указанных песнопений (например, шестеричная служба), может быть пропета стихира с «Господи, воззвах» или из другого цикла стихир.
  
Стихиры чудотво́рцов и безсре́бреников Космы́ и Дамиа́на:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Диа́кон:
Спаси́, Бо́же, лю́ди Твоя́ и благослови́ достоя́ние Твое́, посети́ мир Твой ми́лостию и щедро́тами, возвы́си рог христиа́н правосла́вных и низпосли́ на ны ми́лости Твоя́ бога́тыя, моли́твами всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Си́л безпло́тных, честна́го, сла́внаго проро́ка, Предте́чи и Крести́теля Иоа́нна, святы́х сла́вных и всехва́льных Апо́стол, и́же во святы́х оте́ц на́ших и вселе́нских вели́ких учи́телей и святи́телей, Васи́лия Вели́каго, Григо́рия Богосло́ва и Иоа́нна Златоу́стаго, и́же во святы́х отца́ на́шего Никола́я, архиепи́скопа Мирлики́йскаго, чудотво́рца, святы́х равноапо́стольных Мефо́дия и Кири́лла, учи́телей слове́нских, святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших: святи́теля Михаи́ла, пе́рвого митрополи́та Ки́евскаго, первосвяти́телей Моско́вских и всея́ Руси́: Петра́, Алекси́я, Ио́ны, Мака́рия, Фили́ппа, И́ова, Ермоге́на и Ти́хона, митрополи́тов Моско́вских Филаре́та, Инноке́нтия и Мака́рия. Святы́х, сла́вных и добропобе́дных му́чеников, новому́чеников и испове́дников Це́ркве Ру́сския: Влади́мира, митрополи́та Ки́евскаго, Вениами́на, митрополи́та Петрогра́дского, Петра́, митрополи́та Крути́цкаго, Иларио́на, архиепи́скопа Вере́йскаго, святы́х ца́рственных страстоте́рпцев, преподобному́чениц вели́кия княги́ни Елисаве́ты и и́нокини Варва́ры, преподо́бных и богоно́сных оте́ц на́ших, преподо́бных оте́ц ста́рцев О́птинских, святы́х пра́ведных Иоа́нна Кроншта́дтскаго и Алекси́я Моско́вскаго, святы́х блаже́нных Ксе́нии Петербу́ржския и Матро́ны Моско́вския, святы́х и пра́ведных богооте́ц Иоаки́ма и А́нны (и святаго имярек, егоже есть храм и егоже есть день), и всех святы́х. Мо́лим Тя́, многоми́лостиве Го́споди, услы́ши нас, гре́шных, моля́щихся Тебе́, и поми́луй нас.
Хор:
Го́споди, поми́луй.
(40 раз)
Диа́кон:
Еще́ мо́лимся о Вели́ком Господи́не и отце́ на́шем Святе́йшем Патриа́рхе (Имярек), и о господи́не на́шем преосвяще́ннейшем митрополи́те (или архиепи́скопе, или епископе имярек) и о всем во Христе́ бра́тстве на́шем, и о вся́кой души́ христиа́нстей, скорбя́щей же и озло́бленней, ми́лости Бо́жия и по́мощи тре́бующей; о покрове́нии гра́да сего́, и живу́щих в нем, о ми́ре, и состоя́нии всего́ мира; о благостоя́нии святы́х Бо́жиих церкве́й; о спасе́нии и по́мощи со тща́нием и стра́хом Бо́жиим тружда́ющихся и служа́щих оте́ц и бра́тий на́ших; о оста́вльшихся и во отше́ствии су́щих; о исцеле́нии в не́мощех лежа́щих; о успе́нии, осла́бе, блаже́нней па́мяти и о оставле́нии грехо́в всех преждеотше́дших оте́ц и бра́тий на́ших, зде лежа́щих и повсю́ду правосла́вных; о избавле́нии плене́нных, и о бра́тиях на́ших во слу́жбах су́щих, и о всех служа́щих и служи́вших во святе́м хра́ме сем рцем.
Хор:
Го́споди, поми́луй.
(50 раз)
Диа́кон:
Еще́ мо́лимся о е́же сохрани́тися гра́ду сему́, и свято́му хра́му сему́, и вся́кому гра́ду и стране́, от гла́да, губи́тельства, тру́са, пото́па, огня́, меча́, наше́ствия иноплеме́нников и междоусо́бныя бра́ни; о е́же ми́лостиву и благоуве́тливу бы́ти благо́му и человеколюби́вому Бо́гу на́шему, отврати́ти вся́кий гнев на ны дви́жимый, и изба́вити ны от належа́щаго и пра́веднаго Своего́ преще́ния и поми́ловати ны́.
Хор:
Го́споди, поми́луй.
(Трижды)
Диа́кон:
Еще́ мо́лимся и о е́же услы́шати Го́споду Бо́гу глас моле́ния нас, гре́шных, и поми́ловати нас.
Хор:
Го́споди, поми́луй.
(Трижды)
Иере́й:
Услы́ши ны, Бо́же, Спа́сителю наш, упова́ние всех конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны. Ми́лостив бо и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.
Иере́й:
Мир всем.
Хор:
И ду́хови твоему́.
Диа́кон:
Главы́ ва́ша Го́сподеви приклони́те.
Хор:
Тебе́, Го́споди.
Иере́й:
Влады́ко многоми́лостиве, Го́споди Иису́се Христе́, Бо́же наш, моли́твами всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Си́л безпло́тных, честна́го, сла́внаго проро́ка, Предте́чи и Крести́теля Иоа́нна, святы́х сла́вных и всехва́льных Апо́стол, и́же во святы́х оте́ц на́ших и вселе́нских вели́ких учи́телей и святи́телей, Васи́лия Вели́каго, Григо́рия Богосло́ва и Иоа́нна Златоу́стаго, и́же во святы́х отца́ на́шего Никола́я, архиепи́скопа Мирлики́йскаго, чудотво́рца, святы́х равноапо́стольных Мефо́дия и Кири́лла, учи́телей слове́нских, святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших: святи́теля Михаи́ла, пе́рвого митрополи́та Ки́евскаго, первосвяти́телей Моско́вских и всея́ Руси́: Петра́, Алекси́я, Ио́ны, Мака́рия, Фили́ппа, И́ова, Ермоге́на и Ти́хона, митрополи́тов Моско́вских Филаре́та, Инноке́нтия и Мака́рия. Святы́х, сла́вных и добропобе́дных му́чеников, новому́чеников и испове́дников Це́ркве Ру́сския: Влади́мира, митрополи́та Ки́евскаго, Вениами́на, митрополи́та Петрогра́дского, Петра́, митрополи́та Крути́цкаго, Иларио́на, архиепи́скопа Вере́йскаго, святы́х ца́рственных страстоте́рпцев, преподобному́чениц вели́кия княги́ни Елисаве́ты и и́нокини Варва́ры, преподо́бных и богоно́сных оте́ц на́ших, преподо́бных оте́ц ста́рцев О́птинских, святы́х пра́ведных Иоа́нна Кроншта́дтскаго и Алекси́я Моско́вскаго, святы́х блаже́нных Ксе́нии Петербу́ржския и Матро́ны Моско́вския, святы́х и пра́ведных богооте́ц Иоаки́ма и А́нны (и святаго имярек, егоже есть храм и егоже есть день), и всех святы́х. благоприя́тну сотвори́ моли́тву на́шу, да́руй нам оставле́ние прегреше́ний на́ших, покры́й нас кро́вом крилу́ Твое́ю, отжени́ от нас вся́каго врага́ и супоста́та, умири́ на́шу жизнь. Го́споди, поми́луй нас и мир Твой, и спаси́ ду́ши на́ша, я́ко благ и человеколю́бец.
Хор:
Ами́нь.

Стихиры на стиховне чудотво́рцов и безсре́бреников Космы́ и Дамиа́на, Глас 2:

Стихира:
Исто́чник исцеле́ний/ еди́наго то́кмо в ле́те исцелева́ше,/ храм же безсре́бреников все мно́жество исцеля́ет неду́гующих,/ неоску́дно бо есть и неиждива́емое бога́тство святы́х./ Тех моли́твами, Христе́, поми́луй нас.
Стихира:
Любо́вию Боже́етвенною/ и жела́нием бу́дущих де́тельне пожи́вше,/ спаси́тельныя пути́ испра́висте./ Те́мже, чистоту́ душе́вную нескве́рно соблю́дше,/ ве́щным до конца́ противоста́сте;/ Ду́хом же Боже́ственным позлати́вшеся,/ беззла́тно исцеле́ние неду́гующим подаете́,/ дво́ица свяще́нная, светоза́рный соу́зе6,/ просвеще́нный Боже́ственный сопру́же, безсре́бреницы,/ в ско́рбех и неду́зех посеща́юще нас/ и душ на́ших неду́ги безме́здно врачу́юще.
Стих:
Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.
Стихира:
Вели́ких сподо́бльшеся даро́в, всехва́льнии,/ в смире́нном житии́ на земли́ пожи́сте;/ и, проходя́ще всю́ду,/ ту́не неду́гующих стра́сти врачу́юще,/ яви́стеся Ангелов собесе́дницы,/ Космо́ с Дамиа́ном мудрым, бра́тия прекра́сная,/ и на́ша стра́сти моли́твами ва́шими уврачи́те.
Сла́ва Отцу́ и Сы́ну и Свято́му Ду́ху.
  
Глас 6:
Стихира:
Всегда́ иму́ще Христа́, де́йствующа в вас,/ святи́и безсре́бреницы,/ чудоде́йствуете в ми́ре,/ немощству́ющия врачу́ете,/ и́бо врачевство́ ва́ше исто́чник есть неисчерпа́емый:/ че́рплемь же, па́че преистека́ет/ и, излива́емь, изоби́лует;/ на ки́йждо день истощава́емь, и умножа́ется,/ всем подая́ и неоскудева́емь пребыва́я;/ и че́рплющии насыща́ются врачева́ний,/ то́йжде пребыва́ет неиждиву́щ./ Что у́бо вас нарече́м?/ Цели́тельных ли враче́в душ же и теле́с?/ Цели́телей страсте́й неисце́льных,/ ту́не исцеля́ющих всех,/ прие́мших дарова́ние от Спа́са Христа́,/ подаю́щаго нам ве́лию ми́лость.
И ны́не и при́сно и во ве́ки веко́в. Ами́нь.
Богородичен:
Никто́же, притека́яй к Тебе́,/ посра́млен от Тебе́ исхо́дит,/ Пречи́стая Богоро́дице Де́во,/ но про́сит благода́ти/ и прие́млет дарова́ние к поле́зному проше́нию.

Моли́тва свято́го Симео́на Богоприи́мца:

Чтец:
Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Тропарь чудотво́рцов и безсре́бреников Космы́ и Дамиа́на, Глас 8 :

Святи́и безсре́бреницы и чудотво́рцы, Космо́ и Дамиа́не,/ посети́те не́мощи на́ша:/ ту́не прия́сте, ту́не дади́те нам.
(Дважды)

Тропа́рь, глас 4:

Хор:
Богоро́дице Де́во, ра́дуйся,/ Благода́тная Мари́е, Госпо́дь с Тобо́ю:/ благослове́на Ты в жена́х/ и благослове́н Плод чре́ва Твоего́,// яко Спа́са родила́ еси душ на́ших.

Благослове́ние хле́бов:

Диа́кон:
Го́споду помо́лимся.
Хор:
Го́споди, поми́луй.
Иере́й:
Го́споди Иису́се Христе́ Бо́же наш, благослови́вый пять хле́бов и пять ты́сящ насы́тивый, Сам благослови́ и хле́бы сия́, пшени́цу, вино́ и еле́й; и умно́жи сия́ во гра́де сем и во всем ми́ре Твое́м; и вкуша́ющыя от них ве́рныя освяти́. Я́ко Ты еси́ благословля́яй и освяща́яй вся́ческая, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и Всесвяты́м, и Благи́м, и Животворя́щим Твои́м Ду́хом, ны́не и при́сно и во ве́ки веко́в.
Хор:
Ами́нь.
Бу́ди И́мя Госпо́дне благослове́но от ны́не и до ве́ка.
(Трижды)

Псало́м 33:

Хор:
Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и,/ и от все́х скорбе́й его́ спасе́ и./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.
Иере́й:
Благослове́ние Госпо́дне на вас, Того́ благода́тию и человеколю́бием, всегда́, ны́не и при́сно и во ве́ки веко́в.
Хор:
Ами́нь.

УТРЕНЯ:

Сла́ва в вы́шних Бо́гу, и на земли́ мир, в челове́цех благоволе́ние.
(Три́жды)
Го́споди, устне́ мои́ отве́рзеши, и уста́ моя́ возвестя́т хвалу́ Твою́.
(Два́жды)

Чтец глаголет шестопсалмие (псалмы 3, 37, 62, 87, 102, 142).

  
Во время шестопсалмия иерей читает 12 утренних молитв: 6 перед престолом, 6 перед Царскими вратами.
  
Псалом 3:
Чтец:
Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.
Аз усну́х, и спах, воста́х, я́ко Госпо́дь засту́пит мя.
  
Псалом 37:
Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.
Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.
  
Псалом 62:
Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.
На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
  
Псалом 87:
Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.
Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.
  
Псалом 102:
Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.
На вся́ком ме́сте влады́чества Его́, благослови́, душе́ моя́, Го́спода.
  
Псалом 142:
Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.
Услы́ши мя, Го́споди, в пра́вде Твое́й и не вни́ди в суд с рабо́м Твои́м.
Услы́ши мя, Го́споди, в пра́вде Твое́й и не вни́ди в суд с рабо́м Твои́м.
Дух Твой Благи́й наста́вит мя на зе́млю пра́ву.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)

Вели́кая ектения́:

Диа́кон:
Ми́ром Го́споду помо́лимся.
Хор:
Го́споди, поми́луй.
(На каждое прошение)
Диа́кон:
О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем, Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея́, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Бог Господь, Глас 8:

Диа́кон:
Бог Госпо́дь, и яви́ся нам, благослове́н Гряды́й во И́мя Госпо́дне.
Стих 1:
Испове́дайтеся Го́сподеви, я́ко благ, я́ко в век ми́лость Его́.
Хор:
Бог Госпо́дь, и яви́ся нам, благослове́н Гряды́й во И́мя Госпо́дне.
(И далее на каждый стих)
Стих 2:
Обыше́дше обыдо́ша мя, и И́менем Госпо́дним противля́хся им.
Стих 3:
Не умру́, но жив бу́ду, и пове́м дела́ Госпо́дня.
Стих 4:
Ка́мень, Его́же небрего́ша зи́ждущии, Сей бы́сть во главу́ у́гла, от Го́спода бысть Сей, и есть ди́вен во очесе́х на́ших.

Тропарь чудотво́рцов и безсре́бреников Космы́ и Дамиа́на, Глас 8 :

Святи́и безсре́бреницы и чудотво́рцы, Космо́ и Дамиа́не,/ посети́те не́мощи на́ша:/ ту́не прия́сте, ту́не дади́те нам.
(Дважды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
  
Богородичен из третьего приложения по гласу Тропаря
И́же нас ра́ди рожде́йся от Де́вы / и, распя́тие претерпе́в, Благи́й, / испрове́ргий сме́ртию смерть / и Воскресе́ние явле́й я́ко Бог, / не пре́зри, я́же созда́л еси́ руко́ю Твое́ю, / яви́ человеколю́бие Твое́, Ми́лостиве. / Приими́ ро́ждшую Тя, Богоро́дицу, моля́щуюся за ны, / и спаси́, Спа́се наш, лю́ди отча́янныя.

КАФИЗМЫ:

Хор:
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Кафизма третиянадесять

Псало́м 91:

Бла́го е́сть испове́датися Го́сподеви, и пе́ти и́мени Твоему́, Вы́шний: возвеща́ти зау́тра ми́лость Твою́ и и́стину Твою́ на вся́ку но́щь, в десятостру́ннем псалти́ри с пе́снию в гу́слех. Я́ко возвесели́л мя́ еси́, Го́споди, в творе́нии Твое́м, и в де́лех руку́ Твое́ю возра́дуюся. Я́ко возвели́чишася дела́ Твоя́, Го́споди, зело́ углуби́шася помышле́ния Твоя́. Му́ж безу́мен не позна́ет, и неразу́мив не разу́меет си́х. Внегда́ прозябо́ша гре́шницы я́ко трава́, и пронико́ша вси́ де́лающии беззако́ние: я́ко да потребя́тся в ве́к ве́ка. Ты́ же Вы́шний во ве́к, Го́споди. Я́ко се́ врази́ Твои́, Го́споди, я́ко се́ врази́ Твои́ поги́бнут, и разы́дутся вси́ де́лающии беззако́ние. И вознесе́тся я́ко единоро́га ро́г мо́й, и ста́рость моя́ в еле́и масти́те. И воззре́ о́ко мое́ на враги́ моя́, и востаю́щыя на мя́ лука́внующыя услы́шит у́хо мое́. Пра́ведник я́ко фи́никс процвете́т, я́ко ке́др, и́же в Лива́не, умно́жится. Насажде́ни в дому́ Госпо́дни, во дво́рех Бо́га на́шего процвету́т, еще́ умно́жатся в ста́рости масти́те, и благоприе́млюще бу́дут. Да возвестя́т, я́ко пра́в Госпо́дь Бо́г на́ш, и не́сть непра́вды в Не́м.

Псало́м 92:

Госпо́дь воцари́ся, в ле́поту облече́ся: облече́ся Госпо́дь в си́лу и препоя́сася, и́бо утверди́ все́ленную, я́же не подви́жится. Гото́в Престо́л Тво́й отто́ле: от ве́ка Ты́ еси́. Воздвиго́ша ре́ки, Го́споди, воздвиго́ша ре́ки гла́сы своя́; во́змут ре́ки сотре́ния своя́, от гла́сов во́д мно́гих. Ди́вны высоты́ морски́я, ди́вен в высо́ких Госпо́дь. Свиде́ния Твоя́ уве́ришася зело́, до́му Твоему́ подоба́ет святы́ня, Го́споди, в долготу́ дни́й.

Псало́м 93:

Бо́г отмще́ний Госпо́дь, Б́ог отмще́ний не обину́лся е́сть. Вознеси́ся судя́й земли́, возда́ждь воздая́ние го́рдым. Доко́ле гре́шницы, Го́споди, доко́ле гре́шницы восхва́лятся́ Провеща́ют и возглаго́лют непра́вду, возглаго́лют вси́ де́лающии беззако́ние́ Лю́ди Твоя́, Го́споди, смири́ша и достоя́ние Твое́ озло́биша; вдови́цу и си́ра умори́ша и прише́льца уби́ша, и ре́ша: не у́зрит Госпо́дь, ниже́ уразуме́ет Бо́г Иа́ковль. Разуме́йте же безу́мнии в лю́дех и бу́ии не́когда умудри́теся. Насажде́й у́хо, не слы́шит ли́́ Или́ созда́вый о́ко, не сматря́ет ли́́ Наказу́яй язы́ки, не обличи́т ли́, уча́й челове́ка ра́зуму́ Госпо́дь ве́сть помышле́ния челове́ческая, я́ко су́ть су́етна. Блаже́н челове́к, eго́же а́ще нака́жеши, Го́споди, и от зако́на Твоего́ научи́ши eго́, укроти́ти eго́ от дне́й лю́тых, до́ндеже изры́ется гре́шному я́ма. Я́ко не отри́нет Госпо́дь люде́й Свои́х, и достоя́ния Своего́ не оста́вит, до́ндеже пра́вда обрати́тся на су́д, и держа́щиися ея́ вси́ пра́вии се́рдцем. Кто́ воста́нет ми́ на лука́внующыя́ Или́ кто́ спредста́нет ми́ на де́лающыя беззако́ние́ А́ще не Госпо́дь помо́гл бы́ ми́, вма́ле всели́лася бы́ во а́д душа́ моя́. А́ще глаго́лах, подви́жеся нога́ моя́, ми́лость Твоя́, Го́споди, помога́ше ми́. По мно́жеству боле́зней мои́х в се́рдце мое́м, утеше́ния Твоя́ возвесели́ша ду́шу мою́. Да не прибу́дет Тебе́ престо́л беззако́ния, созида́яй тру́д на повеле́ние. Уловя́т на ду́шу пра́ведничу, и кро́вь непови́нную осу́дят. И бы́сть мне́ Госпо́дь в прибе́жище, и Бо́г мо́й в по́мощь упова́ния моего́. И возда́ст и́м Госпо́дь беззако́ние и́х и по лука́вствию и́х погуби́т я́ Госпо́дь Бо́г.
Чтец:
Сла́ва Отцу́ и Сы́ну и Свято́му Ду́ху.
Хор:
И ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Псало́м 94:

Прииди́те, возра́дуемся Го́сподеви, воскли́кнем Бо́гу, спаси́телю на́шему: предвари́м лице́ Его́ во испове́дании, и во псалме́х воскли́кнем Ему́. Я́ко Бо́г ве́лий Госпо́дь, и Ца́рь ве́лий по все́й земли́, я́ко в руце́ Его́ вси́ концы́ земли́, и высоты́ го́р Того́ су́ть. Я́ко Того́ е́сть мо́ре, и То́й сотвори́ е́, и су́шу ру́це Его́ созда́сте. Прииди́те, поклони́мся и припаде́м Ему́, и воспла́чемся пред Го́сподем сотво́ршим на́с: я́ко То́й е́сть Бо́г на́ш, и мы́ лю́дие па́жити Его́, и о́вцы руки́ Его́. Дне́сь а́ще гла́с Его́ услы́шите, не ожесточи́те серде́ц ва́ших, я́ко в прогне́вании, по дни́ искуше́ния в пусты́ни, во́ньже искуси́ша Мя́ отцы́ ва́ши, искуси́ша Мя́, и ви́деша дела́ Моя́. Четы́редесять ле́т негодова́х ро́да того́, и ре́х, при́сно заблужда́ют се́рдцем, ти́и же не позна́ша путе́й Мои́х, я́ко кля́хся во гне́ве Мое́м, а́ще вни́дут в поко́й Мо́й.

Псало́м 95:

Воспо́йте Го́сподеви пе́снь но́ву, воспо́йте Го́сподеви вся́ земля́, воспо́йте Го́сподеви, благослови́те и́мя Его́, благовести́те де́нь от дне́ спасе́ние Его́. Возвести́те во язы́цех сла́ву Его́, во все́х лю́дех чудеса́ Его́. Я́ко ве́лий Госпо́дь и хва́лен зело́, стра́шен е́сть над все́ми бо́ги. Я́ко вси́ бо́зи язы́к бе́сове: Госпо́дь же небе́са сотвори́. Испове́дание и красота́ пред Ни́м, святы́ня и великоле́пие во святи́ле Его́. Принеси́те Го́сподеви оте́чествия язы́к, принеси́те Го́сподеви сла́ву и че́сть. Принеси́те Го́сподеви сла́ву и́мени Его́, возми́те же́ртвы, и входи́те во дворы́ Его́. Поклони́теся Го́сподеви во дворе́ святе́м Его́, да подви́жится от лица́ Его́ вся́ земля́. Рцы́те во язы́цех, я́ко Госпо́дь воцари́ся, и́бо испра́ви вселе́нную, я́же не подви́жится: су́дит лю́дем пра́востию. Да возвеселя́тся небеса́, и ра́дуется земля́, да подви́жится мо́ре и исполне́ние eго́. Возра́дуются поля́, и вся́ я́же на ни́х: тогда́ возра́дуются вся́ древа́ дубра́вная от лица́ Госпо́дня, я́ко гряде́т, я́ко гряде́т суди́ти земли́, суди́ти вселе́нней в пра́вду, и лю́дем и́стиною Свое́ю.

Псало́м 96:

Госпо́дь воцари́ся, да ра́дуется земля́, да веселя́тся о́строви мно́зи. О́блак и мра́к о́крест Eго́, пра́вда и судьба́ исправле́ние Престо́ла Его́. О́гнь пред Ни́м предъи́дет, и попали́т о́крест враги́ Его́. Освети́ша мо́лния Его́ вселе́нную: ви́де, и подви́жеся земля́. Го́ры я́ко во́ск раста́яша от лица́ Госпо́дня, от лица́ Го́спода всея́ земли́. Возвести́ша небеса́ пра́вду Его́, и ви́деша вси́ лю́дие сла́ву Его́. Да постыдя́тся вси́ кла́няющиися истука́нным, хваля́щиися о и́долех свои́х; поклони́теся Ему́ вси́ А́нгели Его́. Слы́ша и возвесели́ся Сио́н, и возра́довашася дще́ри Иуде́йския, суде́б ради́ Твои́х, Го́споди, я́ко Ты́ Госпо́дь вы́шний над все́ю земле́ю, зело́ превозне́слся еси́ над все́ми бо́ги. Лю́бящии Го́спода, ненави́дите зла́я, храни́т Госпо́дь ду́шы преподо́бных Свои́х, из руки́ гре́шничи изба́вит я́. Све́т возсия́ пра́веднику, и пра́вым се́рдцем весе́лие. Весели́теся, пра́веднии, о Го́споде и испове́дайте па́мять Святы́ни Его́.
Чтец:
Сла́ва Отцу́ и Сы́ну и Свято́му Ду́ху.
Хор:
И ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Псало́м 97:

Воспо́йте Го́сподеви пе́снь но́ву, я́ко ди́вна сотвори́ Госпо́дь: спасе́ Его́ десни́ца Его́, и мы́шца свята́я Его́. Сказа́ Госпо́дь спасе́ние Свое́, пред язы́ки откры́ пра́вду Свою́. Помяну́ ми́лость Свою́ Иа́кову, и и́стину Свою́ до́му Изра́илеву, ви́деша вси́ концы́ земли́ спасе́ние Бо́га на́шего. Воскли́кните Бо́гови вся́ земля́, воспо́йте, и ра́дуйтеся, и по́йте. По́йте Го́сподеви в гу́слех, в гу́слех и гла́се псало́мсте. В труба́х ко́ваных и гла́сом трубы́ ро́жаны воструби́те пред Царе́м Го́сподем. Да подви́жится мо́ре и исполне́ние eго́, вселе́нная и вси́ живу́щии на не́й. Ре́ки воспле́щут руко́ю вку́пе, го́ры возра́дуются от лица́ Госпо́дня, я́ко гряде́т, я́ко и́дет суди́ти земли́, суди́ти вселе́нней в пра́вду, и лю́дем пра́востию.

Псало́м 98:

Госпо́дь воцари́ся, да гне́ваются лю́дие: Седя́й на Херуви́мех, да подви́жится земля́. Госпо́дь в Сио́не вели́к, и высо́к е́сть над все́ми людьми́. Да испове́дятся и́мени Твоему́ вели́кому, я́ко стра́шно и свя́то е́сть. И че́сть царе́ва су́д лю́бит; Ты́ угото́вал еси́ правоты́, су́д и пра́вду во Иа́кове Ты́ сотвори́л еси́. Возноси́те Го́спода Бо́га на́шего, и покланя́йтеся подно́жию ногу́ Его́, я́ко свя́то е́сть. Моисе́й и Ааро́н во иере́ех Его́, и Саму́ил в призыва́ющих и́мя Его́: призыва́ху Го́спода, и То́й послу́шаше и́х. В столпе́ о́блачне глаго́лаше к ни́м: я́ко храня́ху свиде́ния Его́ и повеле́ния Его́, я́же даде́ и́м. Го́споди Бо́же на́ш, Ты́ послу́шал еси́ и́х: Бо́же, ты́ ми́лостив быва́л еси́ и́м, и мща́я на вся́ начина́ния и́х. Возноси́те Го́спода Бо́га на́шего, и покланя́йтеся в горе́ святе́й Его́, я́ко Свя́т Госпо́дь Бо́г на́ш.

Псало́м 99:

Воскли́кните Бо́гови вся́ земля́, рабо́тайте Го́сподеви в весе́лии, вни́дите пред Ни́м в ра́дости. Уве́дите, я́ко Госпо́дь то́й е́сть Бо́г на́ш: То́й сотвори́ на́с, а не мы́, мы́ же лю́дие Его́ и о́вцы па́жити Его́. Вни́дите во врата́ Его́ во испове́дании, во дворы́ Его́ в пе́ниих: испове́дайтеся Ему́, хвали́те и́мя Его́. Я́ко бла́г Госпо́дь, в ве́к ми́лость Его́, и да́же до ро́да и ро́да и́стина Его́.

Псало́м 100:

Ми́лость и су́д воспою́ Тебе́, Го́споди. Пою́ и разуме́ю в пути́ непоро́чне, когда́ прии́деши ко мне́́ Прехожда́х в незло́бии се́рдца моего́ посреде́ до́му моего́. Не предлага́х пред очи́ма мои́ма ве́щь законопресту́пную: творя́щыя преступле́ние возненави́дех. Не прильпе́ мне́ се́рдце стропти́во, уклоня́ющагося от Мене́ лука́ваго не позна́х. Оклевета́ющаго та́й и́скренняго своего́, сего́ изгоня́х: го́рдым о́ком, и несы́тым се́рдцем, с си́м не ядя́х. О́чи мои́ на ве́рныя земли́, посажда́ти я́ со мно́ю: ходя́й по пути́ непоро́чну, се́й ми́ служа́ше. Не живя́ше посреде́ до́му моего́ творя́й горды́ню, глаго́ляй непра́ведная, не исправля́ше пред очи́ма мои́ма. Во у́трия избива́х вся́ гре́шныя земли́, е́же потреби́ти от гра́да Госпо́дня вся́ де́лающыя беззако́ние.
Чтец:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Три́жды)

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Твоя́ держа́ва, и Твое́ есть Ца́рство, и си́ла, и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Седален по 1-м стихословии чудотво́рцов и безсре́бреников Космы́ и Дамиа́на , Глас 4:

  
Подо́бен: Ско́ро предвари́:
В ми́ре Богоуго́дно житие́ стяжа́вше, богатносве́тнии,/ исцеле́ния нам, радость прие́млющим,/ извеще́ние святы́м, че́стне научи́вшеся, подаете́:/ яви́стеся бо, пресла́внии, вра́чеве боля́щих,/ Христу́, споспешеству́ющу вам, Космо́ и Дамиа́не, святи́и безме́здницы.
(Дважды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Богородичен:
Пое́м тя, Богоневе́сто и Ма́ти Христа́ Бо́га,/ сла́вяще Рождество́ Твое́ непостижи́мое,/ и́мже изба́вихомся от ле́сти диа́воли и вся́ческих бед,/ Влады́чице Богоро́дице, и ве́рно взыва́ем:/ поми́луй ста́до Твое́, Еди́на Всепе́тая.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Кафизма четвертаянадесять

Псало́м 101:

Го́споди, услы́ши моли́тву мою́, и во́пль мо́й к Тебе́ да прии́дет. Не отврати́ лица́ Твоего́ от Мене́: во́ньже а́ще де́нь скорблю́, приклони́ ко мне́ у́хо Твое́: во́ньже а́ще де́нь призову́ Тя́, ско́ро услы́ши мя́. Я́ко исчезо́ша я́ко ды́м дни́е мои́, и ко́сти моя́ я́ко суши́ло сосхо́шася. Уя́звен бы́х я́ко трава́, и и́зсше се́рдце мое́, я́ко забы́х сне́сти хле́б мо́й. От гла́са воздыха́ния моего́ прильпе́ ко́сть моя́ пло́ти мое́й. Уподо́бихся нея́сыти пусты́нней, бы́х я́ко нощны́й вра́н на ны́рищи . Бде́х и бы́х я́ко пти́ца осо́бящаяся на зде́ . Ве́сь де́нь поноша́ху ми́ врази́ мои́, и хваля́щии мя́ мно́ю кленя́хуся. Зане́ пе́пел я́ко хле́б ядя́х, и питие́ мое́ с пла́чем растворя́х. От лица́ гне́ва Твоего́ и я́рости Твоея́: я́ко возне́с низве́ргл мя́ еси́. Дни́е мои́ я́ко се́нь уклони́шася, и а́з я́ко се́но изсхо́х. Ты́ же, Го́споди, во ве́к пребыва́еши, и па́мять Твоя́ в ро́д и ро́д. Ты́ воскре́с уще́дриши Сио́на, я́ко вре́мя уще́дрити eго́, я́ко прии́де вре́мя: я́ко благоволи́ша раби́ Твои́ ка́мение eго́, и пе́рсть eго́ уще́дрят. И убоя́тся язы́цы и́мене Госпо́дня, и вси́ ца́рие зе́мстии сла́вы Твоея́. Я́ко сози́ждет Госпо́дь Сио́на, и яви́тся во сла́ве Свое́й. Призре́ на моли́тву смире́нных, и не уничижи́ моле́ния и́х. Да напи́шется сие́ в ро́д и́н, и лю́дие зижде́мии восхва́лят Го́спода, яко прини́че с высоты́ святы́я Своея́, Госпо́дь с небесе́ на зе́млю призре́, услы́шати воздыха́ние окова́нных, разреши́ти сы́ны умерщвле́нных, возвести́ти в Сио́не и́мя Госпо́дне, и хвалу́ Его́ во Иерусали́ме. Внегда́ собра́тися лю́дем вку́пе, и царе́м, е́же рабо́тати Го́сподеви. Отвеща́ eму́ на пути́ кре́пости eго́: умале́ние дне́й мои́х возвести́ ми́. Не возведи́ мене́ в преполове́ние дне́й мои́х: в ро́де родо́в ле́та Твоя́. В нача́лех Ты́, Го́споди, зе́млю основа́л еси́, и дела́ руку́ Твое́ю су́ть небеса́. Та́ поги́бнут, Ты́ же пребыва́еши: и вся́, я́ко ри́за обетша́ют, и я́ко оде́жду свие́ши я́ и изменя́тся. Ты́ же то́йжде еси́, и ле́та Твоя́ не оскуде́ют. Сы́нове ра́б Твои́х вселя́тся, и се́мя и́х во ве́к испра́вится.

Псало́м 102:

Благослови́, душе́ моя́, Го́спода, и вся́ вну́тренняя моя́ и́мя свято́е Его́. Благослови́, душе́ моя́, Го́спода, и не забыва́й все́х воздая́ний Его́, очища́ющаго вся́ беззако́ния твоя́, исцеля́ющаго вся́ неду́ги твоя́, избавля́ющаго от истле́ния живо́т тво́й, венча́ющаго тя́ ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ все́м оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́. Ще́др и ми́лостив Госпо́дь, долготерпели́в и многоми́лостив. Не до конца́ прогне́вается, ниже́ во ве́к вражду́ет, не по беззако́нием на́шим сотвори́л е́сть на́м, ниже́ по грехо́м на́шым возда́л е́сть на́м. Я́ко по высоте́ небе́сней от земли́, утверди́л е́сть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил е́сть от на́с беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко То́й позна́ созда́ние на́ше, помяну́, я́ко пе́рсть есмы́. Челове́к, я́ко трава́ дни́е eго́, я́ко цве́т се́льный, та́ко оцвете́т, я́ко ду́х про́йде в не́м, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на небеси́ угото́ва Престо́л Сво́й, и Ца́рство Его́ все́ми облада́ет. Благослови́те Го́спода вси́ А́нгели Его́, си́льнии кре́постию, творя́щии сло́во Его́, услы́шати гла́с слове́с Его́. Благослови́те Гос́пода вся́ си́лы Его́, слуги́ Его́, творя́щии во́лю Его́. Благослови́те Го́спода вся́ дела́ Его́, на вся́ком ме́сте влады́чества Его́, благослови́, душе́ моя́, Го́спода.
Чтец:
Сла́ва Отцу́ и Сы́ну и Свято́му Ду́ху.
Хор:
И ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Псало́м 103:

Благослови́, душе́ моя́, Го́спода. Го́споди, Бо́же мо́й, возвели́чился еси́ зело́, во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в ве́к ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ и́м. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ го́р про́йдут во́ды. Напая́ют вся́ зве́ри се́льныя, жду́т она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т гла́с. Напая́яй го́ры от превы́спренних Свои́х, от плода́ де́л Твои́х насы́тится земля́. Прозяба́яй траву́ ското́м, и зла́к на слу́жбу челове́ком, извести́ хле́б от земли́. И вино́ весели́т се́рдце челове́ка, ума́стити лице́ еле́ем, и хле́б се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л е́сть луну́ во времена́, со́лнце позна́ за́пад сво́й. Положи́л еси́ тму́, и бы́сть но́щь, в не́йже про́йдут вси́ зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся́ прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже не́сть числа́, живо́тная ма́лая с вели́кими, та́мо корабли́ препла́вают, зми́й се́й, eго́же созда́л еси́ руга́тися eму́. Вся́ к Тебе́ ча́ют, да́ти пи́щу и́м во бла́го вре́мя. Да́вшу Тебе́ и́м соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши ду́х и́х, и исче́знут, и в пе́рсть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже е́смь, да услади́тся Ему́ бесе́да моя́, а́з же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти и́м. Благослови́, душе́ моя́, Го́спода.
Чтец:
Сла́ва Отцу́ и Сы́ну и Свято́му Ду́ху.
Хор:
И ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Трижды)
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху.
Чтец:
И ны́не и при́сно и во ве́ки веко́в. Ами́нь.

Псало́м 104:

Испове́дайтеся Го́сподеви, и призыва́йте и́мя Его́, возвести́те во язы́цех дела́ Его́. Воспо́йте Ему́ и по́йте Ему́, пове́дите вся́ чудеса́ Его́. Хвали́теся о и́мени святе́м Его́, да возвесели́тся се́рдце и́щущих Го́спода. Взыщи́те Го́спода, и утверди́теся, взыщи́те лица́ Его́ вы́ну. Помяни́те чудеса́ Его́, я́же сотвори́, чудеса́ Его́, и судьбы́ у́ст Его́. Се́мя Авраа́мле раби́ Его́, сы́нове Иа́ковли избра́ннии Его́. То́й Госпо́дь Бо́г на́ш, по все́й земли́ судьбы́ Его́. Помяну́ в ве́к заве́т Сво́й, сло́во, е́же запове́да в ты́сящы родо́в, е́же завеща́ Авра́аму, и кля́тву Свою́ Исаа́ку. И поста́ви ю́ Иа́кову в повеле́ние, и Изра́илю в заве́т ве́чен, глаго́ля: тебе́ да́м зе́млю Ханаа́ню, у́же достоя́ния ва́шего, внегда́ бы́ти и́м ма́лым число́м, мале́йшым и прише́льцем в не́й. И преидо́ша от язы́ка в язы́к, и от ца́рствия в лю́ди и́ны. Не оста́ви челове́ка оби́дети и́х, и обличи́ о ни́х цари́. Не прикаса́йтеся пома́занным Мои́м, и во проро́цех Мои́х не лука́внуйте. И призва́ гла́д на зе́млю, вся́ко утверже́ние хле́бное сотры́. Посла́ пред ни́ми челове́ка: в раба́ про́дан бы́сть Ио́сиф. Смири́ша во око́вах но́зе eго́, желе́зо про́йде душа́ eго́, до́ндеже прии́де сло́во Его́, сло́во Госпо́дне разжже́ eго́. Посла́ ца́рь и разреши́ eго́: кня́зь лю́дей, и оста́ви eго́ . Поста́ви eго́ господи́на до́му своему́, и кня́зя всему́ стяжа́нию своему́, наказа́ти кня́зи eго́ я́ко себе́, и ста́рцы eго́ умудри́ти. И вни́де Изра́иль во Еги́пет, и Иа́ков прише́льствова в зе́млю Ха́мову. И возрасти́ лю́ди своя́ зело́, и укрепи́ я́ па́че враго́в и́х. Преврати́ се́рдце и́х возненави́дети лю́ди Его́, ле́сть сотвори́ти в рабе́х Его́. Посла́ Моисе́а раба́ Своего́, Ааро́на, eго́же избра́ Себе́. Положи́ в ни́х словеса́ зна́мений Свои́х, и чуде́с Свои́х в земли́ Ха́мове. Посла́ тму́ и помрачи́, я́ко преогорчи́ша словеса́ Его́. Преложи́ во́ды и́х в кро́вь, и измори́ ры́бы и́х. Воскипе́ земля́ и́х жа́бами в сокро́вищницах царе́й и́х. Рече́, и приидо́ша пе́сия му́хи, и скни́пы во вся́ преде́лы и́х. Положи́ дожди́ и́х гра́ды, о́гнь попаля́ющ в земли́ и́х, и порази́ виногра́ды и́х и смо́квы и́х, и сотры́ вся́кое дре́во преде́л и́х. Рече́, и приидо́ша пру́зи и гу́сеницы, и́мже не бе́ числа́. И снедо́ша вся́ку траву́ в земли́ и́х, и поядо́ша вся́к пло́д земли́ и́х. И порази́ вся́каго пе́рвенца в земли́ и́х, нача́ток вся́каго труда́ и́х, и изведе́ я́ с сребро́м и зла́том, и не бе́ в коле́нах и́х боля́й. Возвесели́ся Еги́пет во исхожде́нии и́х, я́ко нападе́ стр́ах и́х на ня́. Распростре́ о́блак в покро́в и́м и о́гнь, е́же просвети́ти и́м но́щию. Проси́ша и приидо́ша кра́стели, и хле́ба небе́снаго насы́ти я́, разве́рзе ка́мень и потеко́ша во́ды, потеко́ша в безво́дных ре́ки, я́ко помяну́ сло́во свято́е Свое́, е́же ко Авраа́му, рабу́ Своему́. И изведе́ лю́ди Своя́ в ра́дости, и избра́нныя Своя́ в весе́лии. И даде́ и́м страны́ язы́к, и труды́ люде́й насле́доваша, я́ко да сохраня́т оправда́ния Его́ и зако́на Его́ взы́щут.
Чтец:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Три́жды)

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко благ и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.

Седален по 2-м стихословии чудотво́рцов и безсре́бреников Космы́ и Дамиа́на , Глас 8:

  
Подо́бен: Повеле́нное та́йно:
От безме́здных сокро́вищ чудеса́ содева́юще,/ пречи́стых даро́в благода́тных яви́стеся раче́нием Боголе́пне,/ бога́тство восприе́мше Небе́сное и сла́ву оста́вльше земну́ю./ Тем песнь прино́сим всех Соде́телю,/ благода́ть дарова́вшему вам исцеле́ний.
(Дважды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Богородичен:
Непреме́ннаго Бога я́ко ро́ждшая,/ измене́ннаго мя при́сно грехо́м,/ утверди́ се́рдце мое́, Блага́я, моли́твами ма́терними Твои́ми,/ я́ко да и аз зову́ Ти, Богоро́дице Мари́е:/ поми́луй ста́до Твое, е́же стяжа́ла еси́, Всенепоро́чная.

Полиеле́й:

Хор:
Хвали́те И́мя Госпо́дне, хвали́те, раби́ Го́спода.
Аллилу́иа, аллилу́иа, аллилу́иа.
Благослове́н Госпо́дь от Сио́на, живы́й во Иерусали́ме.
Аллилу́иа, аллилу́иа, аллилу́иа.
Испове́дайтеся Го́сподеви, я́ко Благ, я́ко в век ми́лость Его́.
Аллилу́иа, аллилу́иа, аллилу́иа.
Испове́дайтеся Бо́гу Небе́сному, я́ко в век ми́лость Его́.
Аллилу́иа, аллилу́иа, аллилу́иа.

Величание чудотво́рцов и безсре́бреников Космы́ и Дамиа́на:

Духовенство
Велича́ем вас,/ чудотво́рцы сла́внии, Космо́ и Дамиа́не,/ и чтим святу́ю па́мять ва́шу,/ наста́вницы заблу́ждшим, исцели́тели боля́щим/ и собесе́дницы А́нгелом.
Хор:
Велича́ем вас,/ чудотво́рцы сла́внии, Космо́ и Дамиа́не,/ и чтим святу́ю па́мять ва́шу,/ наста́вницы заблу́ждшим, исцели́тели боля́щим/ и собесе́дницы А́нгелом.

Псало́м избра́нный:

Хор:
Помяни́, Го́споди, Дави́да и всю кро́тость его./ Я́ко кля́тся Го́сподеви, обеща́ся Бо́гу Иа́ковлю./ Се, слы́шахом я во Евфра́фе, обрето́хом я в поля́х дубра́вы./ Пресла́вная глаго́лашася о тебе́, гра́де Бо́жий./ Бог посреде́ его́, и не подви́жится./ Кля́тся Госпо́дь Дави́ду и́стиною, и не отве́ржется ея./ От плода́ чре́ва твоего́ посажду́ на престо́ле твое́м./ Я́ко избра́ Госпо́дь Сио́на, изво́ли его́ в жили́ще себе́./ Освяти́л есть селе́ние Свое́ Вы́шний./ Святы́ня и велеле́пота во святи́ле его́./ Свят храм твой, ди́вен в пра́вде./ До́му Твоему́ подоба́ет святы́ня, Го́споди, в долготу́ дней./ Помяну́ и́мя Твое́ во вся́ком ро́де и ро́де.// Благослове́н Госпо́дь во век, и в век ве́ка.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа,// сла́ва Тебе́, Бо́же.
(Дважды)
Духовенство
Аллилу́иа, аллилу́иа, аллилу́иа,// сла́ва Тебе́, Бо́же. (Единожды)
Духовенство
Велича́ем вас,/ чудотво́рцы сла́внии, Космо́ и Дамиа́не,/ и чтим святу́ю па́мять ва́шу,/ наста́вницы заблу́ждшим, исцели́тели боля́щим/ и собесе́дницы А́нгелом.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Благослови́ся И́мя Твое́, и просла́вися Ца́рство Твое́, Отца́ и Сы́на и Свята́го Ду́ха ны́не и при́сно и во ве́ки веко́в.
Хор:
Ами́нь.

Седален по полиелеи чудотво́рцов и безсре́бреников Космы́ и Дамиа́на , Глас 8:

  
Подо́бен: Прему́дрости:
Исцеле́ний да́телие и чудотво́рцы/ и чуде́с свети́льники светоприе́мнии всем яви́стеся духо́вною благодатию:/ страсте́й бо пла́мень ве́рою прохлажда́ете/ и ве́рных в ней смысл согрева́ете./ Тем врачевство́ душе́вное стяжа́вше, Боже́ственную це́рковь ва́шу,/ к ней же прибега́юще, вопие́м:/ Богоно́сцы безсре́бреницы,/ моли́те Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять ва́шу.
(Дважды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Богородичен:
Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е Рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му Рождеству́ Твоему́.

Степе́нна, глас 4:

1 Антифо́н:

Хор:
От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.
Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Проки́мен и чте́ние Ева́нгелия:

Диа́кон:
Вонмем. Премудрость вонмем, прокимен, глас четве́ртый:
Святы́м, и́же суть на земли́ Его́, удиви́ Господь вся хоте́ния Своя́ в них.
Хор:
Святы́м, и́же суть на земли́ Его́, удиви́ Господь вся хоте́ния Своя́ в них.
Диа́кон:
Предзре́х Го́спода пре́до мно́ю вы́ну, я́ко одесну́ю мене́ есть, да не подви́жуся.
Хор:
Святы́м, и́же суть на земли́ Его́, удиви́ Господь вся хоте́ния Своя́ в них.
Диа́кон:
Святы́м, и́же суть на земли́ Его́
Хор:
удиви́ Господь вся хоте́ния Своя́ в них.
Диа́кон:
Го́споду помо́лимся.
Хор:
Го́споди, поми́луй.
Иере́й:
Я́ко Свят еси́ Бо́же наш, и во святы́х почиваеши, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.
Диа́кон:
Вся́кое дыха́ние да хва́лит Го́спода.
Хор:
Вся́кое дыха́ние да хва́лит Го́спода.
Диа́кон:
Хвали́те Бо́га во святы́х Его́, хвали́те Его́ во устверже́нии си́лы Его́.
Хор:
Вся́кое дыха́ние да хва́лит Го́спода.
Диа́кон:
Вся́кое дыха́ние.
Хор:
Да хва́лит Го́спода.
Диа́кон:
И о сподо́битися нам слы́шанию Свята́го Ева́нгелия, Го́спода Бо́га мо́лим.
Хор:
Го́споди, поми́луй.
(Трижды)
Диа́кон:
Прему́дрость, про́сти, услы́шим Свята́го Ева́нгелия.
Иере́й
Мир всем.
Хор:
И ду́хови твоему́.
Иере́й:
От Ма́рка Свята́го Ева́нгелия чте́ние.
Хор:
Сла́ва, Тебе́, Го́споди, сла́ва Тебе́.
Диа́кон:
Во́нмем.
  
(зачало 23.,Мк.6:7-13)
Иере́й:
Во вре́мя о́но, призва́ Иису́с обана́десяте, и нача́т их посыла́ти два два, и дая́ше им власть над ду́хи нечи́стыми. И запове́да им, да ничесо́же во́змут на путь, то́кмо жезл еди́н, ни пи́ры, ни хле́ба, ни при по́ясе ме́ди, но обуве́ни в санда́лия, и не облачи́тися в две ри́зе. И глаго́лаше им: иде́же а́ще вни́дете в дом, ту пребыва́йте, до́ндеже изы́дете отту́ду. И ели́цы а́ще не прии́мут вы, ниже́ послу́шают вас, исходя́ще отту́ду, оттряси́те прах, и́же под нога́ми ва́шими, во свиде́тельство им. Ами́нь глаго́лю вам, отра́днее бу́дет Содо́мом и Гомо́рром в день су́дный, не́же гра́ду тому́. И изше́дше пропове́даху, да пока́ются. И бе́сы мно́ги изгоня́ху, и ма́заху ма́слом мно́ги неду́жныя, и изцелева́ху.
Хор:
Сла́ва, Тебе́, Го́споди, сла́ва Тебе́.

Псало́м 50:

Чтец:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.
  
Глас 6:
Хор:
Сла́ва Отцу́ и Сы́ну и Свято́му Ду́ху./
Моли́твами чудотво́рцов и безсре́бреников Космы́ и Дамиа́на,/ Ми́лостиве, очи́сти// мно́жество согреше́ний на́ших.
И ны́не и при́сно и во ве́ки веко́в. Ами́нь./
Моли́твами Богоро́дицы,/ Ми́лостиве, очи́сти// мно́жество согреше́ний на́ших.
Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихира, Глас 1:

Светоза́рная, и свята́я, и благообра́зная му́чеников, и́мярек, всепра́зднственная па́мять, я́же всю́ зе́млю просвеща́ющи, мра́к грехо́вный отгоня́ющи, лечба́м благода́ть источа́ет.
Диа́кон:
Спаси́, Бо́же, лю́ди Твоя́ и благослови́ достоя́ние Твое́, посети́ мир Твой ми́лостию и щедро́тами, возвы́си рог христиа́н правосла́вных и низпосли́ на ны ми́лости Твоя́ бога́тыя, моли́твами всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Си́л безпло́тных, честна́го, сла́внаго проро́ка, Предте́чи и Крести́теля Иоа́нна, святы́х сла́вных и всехва́льных Апо́стол, и́же во святы́х оте́ц на́ших и вселе́нских вели́ких учи́телей и святи́телей, Васи́лия Вели́каго, Григо́рия Богосло́ва и Иоа́нна Златоу́стаго, и́же во святы́х отца́ на́шего Никола́я, архиепи́скопа Мирлики́йскаго, чудотво́рца, святы́х равноапо́стольных Мефо́дия и Кири́лла, учи́телей слове́нских, святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших: святи́теля Михаи́ла, пе́рвого митрополи́та Ки́евскаго, первосвяти́телей Моско́вских и всея́ Руси́: Петра́, Алекси́я, Ио́ны, Мака́рия, Фили́ппа, И́ова, Ермоге́на и Ти́хона, митрополи́тов Моско́вских Филаре́та, Инноке́нтия и Мака́рия. Святы́х, сла́вных и добропобе́дных му́чеников, новому́чеников и испове́дников Росси́йских: Влади́мира, митрополи́та Ки́евскаго, Вениами́на, митрополи́та Петрогра́дского, Петра́, митрополи́та Крути́цкаго, Иларио́на, архиепи́скопа Вере́йскаго, святы́х ца́рственных страстоте́рпцев, преподобному́чениц вели́кия княги́ни Елисаве́ты и и́нокини Варва́ры, преподо́бных и богоно́сных оте́ц на́ших, преподо́бных оте́ц ста́рцев О́птинских, святы́х пра́ведных Иоа́нна Кроншта́дтскаго и Алекси́я Моско́вскаго, святы́х блаже́нных Ксе́нии Петербу́ржския и Матро́ны Моско́вския, святы́х и пра́ведных богооте́ц Иоаки́ма и А́нны (и святаго имярек, егоже есть храм и егоже есть день), и всех святы́х. Мо́лим Тя́, многоми́лостиве Го́споди, услы́ши нас, гре́шных, моля́щихся Тебе́, и поми́луй нас.
Хор:
Го́споди, поми́луй.
(12 раз)
Иере́й:
Ми́лостию и щедро́тами и человеколю́бием единоро́днаго Твоего́ Сы́на, с Ни́мже благослове́н еси́, со Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Хор:
Ами́нь.

КАНОН(6-8):

Пе́снь 1.

  
Канон Пресвятой Богородице(На 6), глас 8
Ирмо́с:
Во́ду проше́д я́ко су́шу, / и еги́петскаго зла́ избежа́в, / изра́ильтянин вопия́ше: // Изба́вителю и Бо́гу на́шему пои́м.
(Дважды)
  
Хор или чтец:
Припев:
Пресвята́я Богоро́дице, спаси́ нас.
Тропарь:
Мно́гими содержи́мь напа́стьми, к Тебе́ прибега́ю, спасе́ния иски́й: о Ма́ти Сло́ва и Де́во, от тя́жких и лю́тых мя́ спаси́.
Припев:
Пресвята́я Богоро́дице, спаси́ нас.
Тропарь:
Страсте́й мя́ смуща́ют прило́зи, мно́гаго уны́ния испо́лнити мою́ ду́шу; умири́, Отрокови́це, тишино́ю Сы́на и Бо́га Твоего́, Всенепоро́чная.
Припев:
Пресвята́я Богоро́дице, спаси́ нас.
Тропарь:
Спа́са ро́ждшую Тя́ и Бо́га, молю́, Де́во, изба́витися ми́ лю́тых; к Тебе́ бо ны́не прибега́я, простира́ю и ду́шу и помышле́ние.
Припев:
Пресвята́я Богоро́дице, спаси́ нас.
Тропарь:
Неду́гующа те́лом и душе́ю, посеще́ния Боже́ственнаго и промышле́ния от Тебе́ сподо́би, еди́на Богома́ти, я́ко блага́я, Блага́го же Роди́тельница.
  
Канон 1-й чудотво́рцов и безсре́бреников Космы́ и Дамиа́на(На 4), Глас 6:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Озаря́еми сла́вою Боже́ственною, Богосве́тлии безсре́бреницы,/ озари́те на́ша ду́ши, разоря́юще страстну́ю мглу,/ я́ко да вас ве́рою почита́ем.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Тлетво́рных очи́щшеся пе́рвее страсте́й боле́зней преложе́нием,/ очища́ете на́ша лю́тыя неду́ги, му́дрии,/ и боле́зни душе́вныя облегча́ете.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
От всех Влады́ки дар прия́сте, святи́и, чуде́с дарова́ния,/ на́ша исцели́те мно́гия и неудобьисце́льныя пло́ти стра́сти, моли́мся.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Моле́ние, безсре́бреницы и вра́чеве, Бо́гу принеси́те,/ я́ко да изба́вит ны искуше́ний и скорбе́й мно́гих/ и тре́петнаго и стра́шнаго тогда́ муче́ния.
  
Канон 2-й чудотво́рцов и безсре́бреников Космы́ и Дамиа́на(На 4), Глас 1:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
От благода́ти Нача́льныя Тро́ицы,/ дво́ица чу́дная и честна́я свеща́ема,/ всем исцеле́ния приходя́щим ве́рно подае́т, при́сно источа́ющи.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Тайноучи́ми живоно́сным словесе́м,/ я́ко свети́ла в ми́ре возсия́вше,/ страстну́ю мглу удо́бь разгоня́ете теплото́ю ве́ры, всеблаже́ннии.
Сла́ва Отцу́ и Сы́ну и Свято́му Ду́ху.
Тропарь:
Зако́ну покаря́ющеся Спа́сову, всесла́внии,/ сладостра́стие у́бо плотско́е отри́нуша:/ доброде́тельными же душа́ми светле́йше просвеща́ющеся,/ в ми́ре преизя́ществоваша, досточу́днии.
И ны́не и при́сно и во ве́ки веко́в. Ами́нь.
Богородичен:
Во все́го челове́ка в Твою́ утро́бу всели́выйся, Богома́ти, неизрече́нне облече́ся,/ из Отца́ возсия́вый Сын, безле́тне Пребоже́ственный,/ Тому́ воспои́м, я́ко просла́вися.

Катавасия , Глас 4:

Ирмос:
Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся све́тло торжеству́я,// и воспою́ ра́дуяся Тоя́ чудеса́.

Пе́снь 3.

  
Канон Пресвятой Богородице(На 6), глас 8
Ирмо́с:
Небе́снаго кру́га Верхотво́рче Го́споди, / и Це́ркве Зижди́телю, / Ты́ мене́ утверди́ в любви́ Твое́й, / жела́ний кра́ю, ве́рных утвержде́ние, // Еди́не Человеколю́бче.
(Дважды)
  
Хор или чтец:
Припев:
Пресвята́я Богоро́дице, спаси́ нас.
Тропарь:
Предста́тельство и покро́в жи́зни моея́ полага́ю Тя́, Богороди́тельнице Де́во: Ты́ мя́ окорми́ ко приста́нищу Твоему́, благи́х вино́вна, ве́рных Утвержде́ние, еди́на Всепе́тая.
Припев:
Пресвята́я Богоро́дице, спаси́ нас.
Тропарь:
Молю́, Де́во, душе́вное смуще́ние и печа́ли моея́ бу́рю разори́ти: Ты́ бо, Богоневе́стная, Нача́льника тишины́ Христа́ родила́ еси́, еди́на Пречи́ста.
Припев:
Пресвята́я Богоро́дице, спаси́ нас.
Тропарь:
Благоде́теля ро́ждши до́брых вино́внаго, благодея́ния бога́тство все́м источи́: вся́ бо мо́жеши, я́ко си́льнаго в кре́пости Христа́ ро́ждши, Богоблаже́нная.
Припев:
Пресвята́я Богоро́дице, спаси́ нас.
Тропарь:
Лю́тыми неду́ги и боле́зненными страстьми́ истяза́ему, Де́во, Ты́ ми́ помози́: исцеле́ний бо неоску́дное Тя́ зна́ю Сокро́вище, Пренепоро́чная, неиждива́емое.
  
Канон 1-й чудотво́рцов и безсре́бреников Космы́ и Дамиа́на(На 4), Глас 6:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Мир пое́т ва́ша, святи́и, мно́гая благодея́ния/ и чуде́с мно́жества, чудотво́рцы и вра́чеве,/ А́нгел всех равностоя́тели.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Вас обои́х, светода́телей, мо́лим,/ звезд на высоте́ лежа́щих Це́ркве та́йно, Космо́ и Дамиа́не,/ сердца́ ве́рных озари́те.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Ка́пли источа́юще при́сно, святи́и, исцеле́ния,/ омы́йте всех душе́вную скве́рну/ и страстны́я пло́ти то́ки вся уста́вите.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Се совокупи́вшеся лю́дие, святи́и, отвсю́ду/ ва́ша воспе́ти вели́кия да́ры внутрь це́ркве ва́шея,/ но всех моле́ния испо́лните.
  
Канон 2-й чудотво́рцов и безсре́бреников Космы́ и Дамиа́на(На 4), Глас 1:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Врачева́ний исто́чники, даро́в же Боже́ственных струи́,/ невеще́ственнаго Све́та светле́йшая прия́телища вси досто́йне воспои́м.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Я́ко теле́сныя и душе́вныя врачу́юще стра́сти/ и боле́зни приходя́щих к вам, всечестни́и,/ усе́рдно ны́не я́ко благоде́телие исцеля́ете.
Сла́ва Отцу́ и Сы́ну и Свято́му Ду́ху.
Тропарь:
Пло́дными доброде́тельми украша́еми,/ вся́ку тле́емую сла́дость жите́йскую я́ве отрази́сте,/ к Бо́жией добро́те непреста́нно взира́юще.
И ны́не и при́сно и во ве́ки веко́в. Ами́нь.
Богородичен:
В ви́де на́шем пре́жде Неви́димый яви́ся, о Богороди́тельнице,/ сте́кшуся с пло́тию Божеству́ во утро́бе Твое́й пресвяте́й, Богоневе́сто.

Катавасия , Глас 4:

Ирмос:
Твоя́ песносло́вцы, Богоро́дице,/ живы́й и незави́стный Исто́чниче,/ ли́к себе́ совоку́пльшыя духо́вно утверди́/ в Боже́ственней Твое́й сла́ве,// венце́в сла́вы сподо́би.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Ты еси́ Бог наш, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Седален чудотво́рцов и безсре́бреников Космы́ и Дамиа́на , Глас 8:

  
Подо́бен: Прему́дрости:
От исто́чника бе́здны, Иису́са,/ чуде́с струи́ благоле́пно поче́рпше, святи́и,/ та́йными ту́чами страсте́й мра́чныя о́блаки отгоня́ете/ и неду́гующим челове́ком исцеле́ния подае́те./ Тем, получи́вше здра́вое весе́лие,/ ва́ми, пресла́внии, удивля́еми, зове́м:/ Богоно́снии безсре́бреницы, моли́те Христа́ Бо́га/ согреше́ний оставле́ние дарова́ти/ пра́зднующим любо́вию святу́ю па́мять ва́шу.
(Дважды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Богородичен:
Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище/ и бесо́м игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная, Нетле́нная,/ отжени́ о́блак страсте́й, и Вы́шняго прича́стия сподо́би,/ и Све́та невече́рняго моли́твами Твои́ми.

Пе́снь 4.

  
Канон Пресвятой Богородице(На 6), глас 8
Ирмо́с:
Услы́шах Го́споди, / смотре́ния Твоего́ та́инство, / разуме́х дела́ Твоя́, // и просла́вих Твое́ Божество́.
(Дважды)
  
Хор или чтец:
Припев:
Пресвята́я Богоро́дице, спаси́ нас.
Тропарь:
Страсте́й мои́х смуще́ние, Ко́рмчию ро́ждшая Го́спода, и бу́рю утиши́ мои́х прегреше́ний, Богоневе́стная.
Припев:
Пресвята́я Богоро́дице, спаси́ нас.
Тропарь:
Милосе́рдия Твоего́ бе́здну призыва́ющу пода́ждь ми́, Я́же Благосе́рдаго ро́ждшая, и Спа́са все́х пою́щих Тя́.
Припев:
Пресвята́я Богоро́дице, спаси́ нас.
Тропарь:
Наслажда́ющеся, Пречи́стая, Твои́х дарова́ний, благода́рственное воспева́ем пе́ние, ве́дуще Тя́ Богома́терь.
Припев:
Пресвята́я Богоро́дице, спаси́ нас.
Тропарь:
На одре́ боле́зни моея́ и не́мощи низлежа́щу ми́, я́ко Боголюби́ва, помози́, Богоро́дице, еди́на Присноде́во.
  
Канон 1-й чудотво́рцов и безсре́бреников Космы́ и Дамиа́на(На 4), Глас 6:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Боже́ственное ро́ждие вои́стинну благопло́дно,/ ло́зы Боже́ственныя, та́йное вино́ иска́пающия,/ в весе́лии му́дрыя безсре́бреники ублажи́м.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Ору́жие яви́стеся, устреля́ющее враги́ неви́димыя,/ и́хже и нас стрел изба́вите, заступа́юще на́шу жизнь,/ му́дрии безсре́бреницы.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Не есть челове́к, и́же кто не стяжа́ благи́я вас моли́твенники ко Христу́,/ святи́и безсре́бреницы,/ Его́же моли́те огня́ ве́чнаго нас изба́вити.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Вас, блаже́ннии, и́же призыва́ет,/ и на земли́, и в мо́ри бед вся́ких свобожда́ется,/ тем изба́вите нас сопроти́внаго обстоя́ния.
  
Канон 2-й чудотво́рцов и безсре́бреников Космы́ и Дамиа́на(На 4), Глас 1:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Рече́нию Боже́ственному я́ве8 возсле́дующе,/ не зла́та блиста́ния, ниже́ сребра́, Боже́ственнии, стяжа́сте.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Сия́юще Боже́ственными чудесы́, безсре́бреницы/ вся благоде́тельствуют, благода́ть подаю́ще.
Сла́ва Отцу́ и Сы́ну и Свято́му Ду́ху.
Тропарь:
Вра́чеве му́дрии показа́стеся страсте́й боле́знем,/ исцели́тельныя ру́ки простира́юще.
И ны́не и при́сно и во ве́ки веко́в. Ами́нь.
Богородичен:
Да залани́тствятся ны́не ли́ца, Богоро́дицу Тя не испове́дающих,/ Пречи́стая Влады́чице.

Катавасия , Глас 4:

Ирмос:
Седя́й в сла́ве/ на Престо́ле Божества́,/ во о́блаце ле́гце/ прии́де Иису́с Пребоже́ственный,/ нетле́нною дла́нию, и спасе́ зову́щыя:// сла́ва, Христе́, си́ле Твое́й.

Пе́снь 5.

  
Канон Пресвятой Богородице(На 6), глас 8
Ирмо́с:
Просвети́ на́с повеле́нии Твои́ми Го́споди, / и мы́шцею Твое́ю высо́кою / Тво́й ми́р пода́ждь на́м, // Человеколю́бче.
(Дважды)
  
Хор или чтец:
Припев:
Пресвята́я Богоро́дице, спаси́ нас.
Тропарь:
Испо́лни, Чи́стая, весе́лия се́рдце мое́, Твою́ нетле́нную даю́щи ра́дость, весе́лия ро́ждшая Вино́внаго.
Припев:
Пресвята́я Богоро́дице, спаси́ нас.
Тропарь:
Изба́ви на́с от бе́д, Богоро́дице Чи́стая, ве́чное ро́ждши Избавле́ние, и Ми́р, вся́к у́м преиму́щий.
Припев:
Пресвята́я Богоро́дице, спаси́ нас.
Тропарь:
Разреши́ мглу́ прегреше́ний мои́х, Богоневе́сто, просвеще́нием Твоея́ све́тлости, Све́т ро́ждшая Боже́ственный и преве́чный.
Припев:
Пресвята́я Богоро́дице, спаси́ нас.
Тропарь:
Исцели́, Чи́стая, души́ моея́ неможе́ние, посеще́ния Твоего́ сподо́бльшая, и здра́вие моли́твами Твои́ми пода́ждь ми́.
  
Канон 1-й чудотво́рцов и безсре́бреников Космы́ и Дамиа́на(На 4), Глас 6:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Боже́ственное привлеко́ша просвеще́ние,/ сия́ния исто́чник всеусе́рдне возлюби́вше,/ и просвеща́ют нас всегда́ чуде́с заря́ми великоимени́тии.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Кра́сный сопру́г су́ще, му́дрии,/ бразды́ возде́лавше душ Богозна́меньми,/ при́сно пожина́юще стра́сти, я́коже пле́велы,/ и здра́вия клас стори́чествующе .
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Вжиля́еми кре́постию Христо́вою,/ в зло́бе си́льнаго всю кре́пость погуби́сте,/ его́же мучи́тельства нас изба́вите,/ неусы́пнии предста́тели на́ши, безсре́бреницы.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Ше́ствовати стези́ нам пра́выя/ и твори́ти во́лю Бо́жию укрепи́те, святи́и,/ уставляю́ще стра́сти серде́ц на́ших/ и теле́с неду́ги облегчева́юще.
  
Канон 2-й чудотво́рцов и безсре́бреников Космы́ и Дамиа́на(На 4), Глас 1:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Я́ко пото́ки Богото́чныя, источа́ете ве́рным благодея́ния во́ды,/ душе́вныя же ку́пно и теле́сныя исцеля́юще неду́ги,/ сла́внии безсре́бреницы.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Исто́чник благода́ти, честни́и безсре́бреницы, разверза́юще,/ всем здра́вие раздае́те,/ ве́рою и любо́вию к вам ны́не притека́ющим.
Сла́ва Отцу́ и Сы́ну и Свято́му Ду́ху.
Тропарь:
Све́тлии и всему́дрии зве́зды,/ и́же зе́млю я́ве онебеси́вше подо́бием све́тлости А́нгельския,/ непреста́нно озаря́ют нас.
И ны́не и при́сно и во ве́ки веко́в. Ами́нь.
Богородичен:
Превы́шша яви́лася еси́ всех,/ Творца́, Отцу́ собезнача́льнаго, заче́нши, Ма́ти Де́во,/ и ро́ждшая ми́ру Спа́са и Го́спода.

Катавасия , Глас 4:

Ирмос:
Ужасо́шася вся́ческая/ о Боже́ственней сла́ве Твое́й:/ Ты́ бо, неискусобра́чная Де́во,/ име́ла еси́ во утро́бе над все́ми Бо́га,/ и родила́ еси́ безле́тнаго Сы́на,/ все́м воспева́ющым Тя́// ми́р подава́ющая.

Пе́снь 6.

  
Канон Пресвятой Богородице(На 6), глас 8
Ирмо́с:
Моли́тву пролию́ ко Го́споду, / и Тому́ возвещу́ печа́ли моя́, / я́ко зо́л душа́ моя́ испо́лнися, / и живо́т мо́й а́ду прибли́жися, / и молю́ся я́ко Ио́на: // от тли́ Бо́же, возведи́ мя.
(Дважды)
  
Хор или чтец:
Припев:
Пресвята́я Богоро́дице, спаси́ нас.
Тропарь:
Сме́рти и тли́ я́ко спа́сл е́сть, Са́м Ся́ изда́в сме́рти, тле́нием и сме́ртию мое́ естество́ я́то бы́вшее, Де́во, моли́ Го́спода и Сы́на Твоего́, враго́в злоде́йствия мя́ изба́вити.
Припев:
Пресвята́я Богоро́дице, спаси́ нас.
Тропарь:
Предста́тельницу Тя́ живота́ ве́м, и Храни́тельницу тве́рду, Де́во, и напа́стей реша́щу молвы́, и нало́ги бесо́в отгоня́ющу; и молю́ся всегда́, от тли́ страсте́й мои́х изба́вити мя́.
Припев:
Пресвята́я Богоро́дице, спаси́ нас.
Тропарь:
Я́ко сте́ну прибе́жища стяжа́хом, и ду́ш всесоверше́нное спасе́ние, и простра́нство в ско́рбех, Отрокови́це, и просвеще́нием Твои́м при́сно ра́дуемся: о Влады́чице, и ны́не на́с от страсте́й и бе́д спаси́.
Припев:
Пресвята́я Богоро́дице, спаси́ нас.
Тропарь:
На одре́ ны́не немощству́яй лежу́, и не́сть исцеле́ния пло́ти мое́й; но Бо́га и Спа́са ми́ру, и Изба́вителя неду́гов ро́ждшая, Тебе́ молю́ся Благо́й: от тли́ неду́г возста́ви мя́.
  
Канон 1-й чудотво́рцов и безсре́бреников Космы́ и Дамиа́на(На 4), Глас 6:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Живу́ще, му́ченицы, ра́достно на Небесе́х,/ в честны́й храм ваш приити́ потщи́теся/ и на́ша неду́ги теле́сныя и серде́чныя стра́сти исцели́те.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
В Боже́ственное благоле́пие оде́явшеся кра́сно, я́ко в сугу́бицу , святи́и,/ на́ги ны су́ща доброде́телей Боже́ственно оде́йте/ и страсте́й безче́стия ны́не обнажи́те.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Я́ко украше́нием чуде́с оде́яни всегда́,/ спаси́телие ми́ру яви́стеся,/ мирска́го у́бо вре́да вся ны изба́вите, святи́и,/ и страсте́й нече́стия и муче́ния.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Умертви́вше, святи́и, стра́сти вся пло́ти смертоно́сныя благода́тию,/ животво́рными чуде́с приложе́ньми оживли́ете стра́ждущия/ и врат сме́рти избавля́ете.
  
Канон 2-й чудотво́рцов и безсре́бреников Космы́ и Дамиа́на(На 4), Глас 1:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Спаси́тельныя цели́тели, благоде́тели Богому́дрыя,/ Косму́ же и Дамиа́на Боже́ственныя, усе́рдно да почти́м.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Целому́дрие соблю́дше и ра́зумом укра́шени,/ Косма́ и Дамиа́н Боже́ственнии со Христо́м ра́дуются.
Сла́ва Отцу́ и Сы́ну и Свято́му Ду́ху.
Тропарь:
Единому́дренно пожи́вше, единоду́шно по́стничествовавше,/ ку́пно врачева́ния подая́ти нам вве́рени бы́сте.
И ны́не и при́сно и во ве́ки веко́в. Ами́нь.
Богородичен:
Све́т Непристу́пный родила́ еси́ пло́тию, Пречи́стая,/ ве́сь ми́р просвеща́юща заря́ми Божества́.

Катавасия , Глас 4:

Ирмос:
Боже́ственное сие́ и всечестно́е/ соверша́юще пра́зднество,/ богому́дрии Богома́тере,/ прииди́те рука́ми воспле́щим,// от Нея́ ро́ждшагося Бо́га сла́вим.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Ты бо еси́ Ца́рь ми́ра и Спас душ на́ших, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Кондак чудотво́рцов и безсре́бреников Космы́ и Дамиа́на, Глас 2:

  
Подо́бен: Тве́рдыя:
Хор:
Благода́ть прии́мше исцеле́ний,/ простира́ете здра́вие су́щим в ну́ждах,/ вра́чеве, чудотво́рцы пресла́внии,/ но ва́шим посеще́нием ра́тников де́рзости низложи́те,/ мир исцеля́юще чудесы́.

Икос:

Вся́каго ра́зума и му́дрости прехо́дит сло́во му́дрых враче́в,/ и всем зна́ние подаю́т:/ Высоча́йшаго бо благода́ть прие́мше,/ неви́димо здра́вие да́руют всем./ Отню́дуже и мне по́вести благода́ть дарова́ся пе́ти,/ я́ко Богоно́сныя уго́дники Христо́вы и служи́тели,/ исцеле́ний мно́жество подаю́щия,/ боле́зней бо вся избавля́ют,/ мир исцеля́юще чудесы́.

Пе́снь 7.

  
Канон Пресвятой Богородице(На 6), глас 8
Ирмо́с:
На́ше спасе́ние я́коже восхоте́л еси́, Спа́се, устро́ити, во утро́бу Де́выя всели́лся еси́, Ю́же ми́ру Предста́тельницу показа́л еси́: оте́ц на́ших Бо́же, благослове́н еси́.
(Дважды)
  
Хор или чтец:
Припев:
Пресвята́я Богоро́дице, спаси́ нас.
Тропарь:
Воли́теля ми́лости, Его́же родила́ еси́, Ма́ти Чи́стая, умоли́ изба́витися от прегреше́ний и душе́вных скве́рн ве́рою зову́щим: оте́ц на́ших Бо́же, благослове́н еси́.
(Дважды)
Припев:
Пресвята́я Богоро́дице, спаси́ нас.
Тропарь:
Сокро́вище спасе́ния и исто́чник нетле́ния, Тя́ ро́ждшую, и сто́лп утвержде́ния, и две́рь покая́ния, зову́щим показа́л еси́: оте́ц на́ших Бо́же, благослове́н еси́.
Припев:
Пресвята́я Богоро́дице, спаси́ нас.
Тропарь:
Теле́сныя сла́бости и душе́вныя неду́ги, Богороди́тельнице, любо́вию приступа́ющих к кро́ву Твоему́, Де́во, исцели́ти сподо́би, Спа́са Христа́ на́м ро́ждшая.
  
Канон 1-й чудотво́рцов и безсре́бреников Космы́ и Дамиа́на(На 4), Глас 6:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Впери́сте ум на Небе́сная до́брых приложе́ньми/ и бы́сте о́бщницы Боже́ственных даро́в,/ крила́ти су́ще орли́, всю прохо́дите зе́млю, чудоде́йствующе при́сно.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Просвети́стеся, я́коже добросия́нное, безсре́бреницы, зла́то,/ Боже́ственною благода́тию исцеле́ний обогати́сте мно́жества./ Тем уще́дрите ны, обурева́емыя лю́тых нахожде́ний искуше́ньми.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Преложи́вше Го́споду чи́сты ва́ша ду́хи, безсре́бреницы,/ дар от Него́ прия́сте нечи́стыя ду́хи прогони́ти всегда́,/ и́хже зло́бы го́рькия изба́вите всех нас.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Усну́сте пра́ведно до́лжным сном, му́дрии безсре́бреницы,/ и неусы́пнии моли́твенницы есте́ о ве́рных;/ тем душ на́ших при́сно и теле́с лю́тыя стра́сти успи́те.
  
Канон 2-й чудотво́рцов и безсре́бреников Космы́ и Дамиа́на(На 4), Глас 1:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Всеце́лы Бо́гу Богому́дренне яви́стеся, вси Бо́га вмести́тельны,/ мир бо весь Бо́га ра́ди оста́висте,/ стопа́м после́дующе Спа́совым, всесла́внии,/ Боголе́пне отце́в Бо́га почита́юще.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Преесте́ственно, вра́чеве всеизря́днейшии,/ немощны́х я́звы рукоде́йствы та́инственными вся исцеля́ете,/ лечбы́ спаси́тельныя от сокро́вищ почерпа́юще Боже́ственных/ и воспева́юще Бо́га пресла́внаго.
Сла́ва Отцу́ и Сы́ну и Свято́му Ду́ху.
Тропарь:
Венце́м Твоего́ Ца́рствия, Влады́ко, и багряни́цею све́тлою/ украси́л еси́ Боголе́пне превозлю́бльшия добро́ту непости́жную, Христе́, Твоея́ красоты́,/ и ве́рным благоде́тели о́бщия сия́ показа́л еси́.
И ны́не и при́сно и во ве́ки веко́в. Ами́нь.
Богородичен:
Восто́ку свы́ше, Пречи́стая, я́вльшуся на земли́,/ показа́лася еси́ всеблаголе́пная дверь и всесве́тлая,/ мир озаря́ющи луча́ми чистоты́/ и ве́рным лучи́ чуде́с при́сно посыла́ющи.

Катавасия , Глас 4:

Ирмос:
Не послужи́ша тва́ри богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся пою́ще:// препе́тый отце́в Госпо́дь и Бо́г благослове́н еси́.

Пе́снь 8.

  
Канон Пресвятой Богородице(На 6), глас 8
Ирмо́с:
Царя́ Небе́снаго, / Его́же пою́т во́и А́нгельстии, // хвали́те и превозноси́те во вся́ ве́ки.
(Дважды)
  
Хор или чтец:
Припев:
Пресвята́я Богоро́дице, спаси́ нас.
Тропарь:
По́мощи я́же от Тебе́ тре́бующия не пре́зри, Де́во, пою́щия и превознося́щия Тя́ во ве́ки.
Припев:
Пресвята́я Богоро́дице, спаси́ нас.
Тропарь:
Неможе́ние души́ моея́ исцеля́еши, и теле́сныя боле́зни, Де́во, да Тя́ просла́влю, Чи́стая, во ве́ки.
Припев:
Пресвята́я Богоро́дице, спаси́ нас.
Тропарь:
Исцеле́ний бога́тство излива́еши ве́рно пою́щим Тя́, Де́во, и превознося́щим неизрече́нное Твое́ Рождество́.
Припев:
Пресвята́я Богоро́дице, спаси́ нас.
Тропарь:
Напа́стей Ты́ прило́ги отгоня́еши, и страсте́й нахо́ды, Де́во: те́мже Тя́ пое́м во вся́ ве́ки.
  
Канон 1-й чудотво́рцов и безсре́бреников Космы́ и Дамиа́на(На 4), Глас 6:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Неду́гов вся́ческих су́ще ра́тницы , посо́бием Боже́ственнаго Ду́ха, святи́и, утоли́те на́ших душ неду́гования/ и теле́с облегчи́те боле́зни.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Ви́дителие Госпо́дни ны́не красоты́ су́ще и́стинно,/ присеща́йте сей кра́сный Богоно́сный храм ваш/ и исто́чник чуде́с мно́гих соверша́йте.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
От исто́чника ра́йска исходя́ще, я́ко ре́ки две,/ все напая́ете лице́ земли́ исцеле́ний струя́ми,/ неду́гов изсуша́юще ту́чи.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Блаже́нныя наде́жды прии́мше, от всех досто́йно блажите́ся/ я́ко испо́лнителие, блаже́ннии, Бо́га на́шего Боже́ственных хоте́ний,/ безсре́бреницы я́вльшеся.
  
Канон 2-й чудотво́рцов и безсре́бреников Космы́ и Дамиа́на(На 4), Глас 1:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Уме́рше ми́ра сего́ кра́сным и сребролю́бия неду́г отсе́кше,/ наименова́ни бы́сте, му́дрии, все́ми безсре́бреницы, вопию́щими:/ вся дела́ Го́спода по́йте и превозноси́те во вся ве́ки.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Ве́чныя прича́стницы жи́зни бы́сте проявле́нне,/ жизни бо тле́емыя вся оста́висте кра́сная, согласне зову́ще:/ благослови́те вся дела́ Господа, пойте и превозноси́те во вся веки.
Благословим Отца и Сына и Святаго Духа, Господа
Тропарь:
Изба́ви вся, Владыко Христе, лю́тых боле́зней моли́твами безсре́бреников/ и сподо́би при́сно согла́сне зва́ти Тебе́:/ благослови́те вся дела́ Го́спода, по́йте и превозноси́те во вся ве́ки.
И ны́не и при́сно и во ве́ки веко́в. Ами́нь.
Богородичен:
Ра́дующеся, вси ве́рнии, и благода́тию укре́пльшеся,/ и́же Рождество́м Твои́м изба́влени бы́вше, Чи́стая Ма́ти Де́во, непреста́нно вопие́м:/ благослови́те вся дела́ Го́спода, по́йте и превозноси́те во вся ве́ки.

Катавасия , Глас 4:

Хор:
Хва́лим, благослови́м, покланя́емся Го́сподеви, пою́ще и превоз-нося́ще во вся ве́ки.
Ирмос:
О́троки благочести́выя в пещи́,/ Рождество́ Богоро́дичо спасло́ е́сть:/ тогда́ у́бо образу́емое,/ ны́не же де́йствуемое,/ вселе́нную всю́ воздвиза́ет пе́ти Тебе́:/ Го́спода по́йте дела́,// и превозноси́те Его́ во вся́ ве́ки.
Диа́кон:
Богоро́дицу и Ма́терь Све́та в пе́снех возвели́чим.

Песнь Пресвято́й Богоро́дицы:

Хор:
Вели́чит душа́ Моя́ Го́спода,/ и возра́довася дух Мой о Бо́зе Спа́се Мое́м.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Я́ко призре́ на смире́ние рабы́ Своея́,/ се бо от ны́не ублажа́т Мя вси ро́ди.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Я́ко сотвори́ Мне вели́чие Си́льный,/ и свя́то И́мя Его́, и ми́лость Его́ в ро́ды родо́в боя́щимся Его́.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Сотвори́ держа́ву мы́шцею Свое́ю,/ расточи́ го́рдыя мы́слию се́рдца их.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Низложи́ си́льныя со престо́л, и вознесе́ смире́нныя;/ а́лчущия испо́лни благ, и богатя́щияся отпусти́ тщи.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Восприя́т Изра́иля о́трока Своего́, помяну́ти ми́лости,/ я́коже глаго́ла ко отце́м на́шим, Авраа́му и се́мени его́, да́же до ве́ка.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.

Пе́снь 9.

  
Канон Пресвятой Богородице(На 6), глас 8
Ирмо́с:
Вои́стинну Богоро́дицу / Тя́ испове́дуем, / спасе́нии Тобо́ю, Де́во Чи́стая, // с Безпло́тными Ли́ки Тя́ велича́юще.
(Дважды)
  
Хор или чтец:
Припев:
Пресвята́я Богоро́дице, спаси́ нас.
Тропарь:
То́ка сле́з мои́х не отврати́ся, Я́же от вся́каго лица́ вся́ку сле́зу отъе́мшаго, Де́во, Христа́ ро́ждшая.
Припев:
Пресвята́я Богоро́дице, спаси́ нас.
Тропарь:
Ра́дости мое́ се́рдце испо́лни, Де́во, Я́же ра́дости прие́мшая исполне́ние, грехо́вную печа́ль потребля́ющи.
Припев:
Пресвята́я Богоро́дице, спаси́ нас.
Тропарь:
Приста́нище и предста́тельство к Тебе́ прибега́ющих бу́ди, Де́во, и стена́ неруши́мая, прибе́жище же и покро́в и весе́лие.
Припев:
Пресвята́я Богоро́дице, спаси́ нас.
Тропарь:
Све́та Твоего́ заря́ми просвети́, Де́во, мра́к неве́дения отгоня́ющи, благове́рно Богоро́дицу Тя́ испове́дающих.
  
Канон 1-й чудотво́рцов и безсре́бреников Космы́ и Дамиа́на(На 4), Глас 6:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Сей храм ваш чудесы́ всеблаголе́пно, я́ко звезда́ми све́тлыми, украша́ется/ и, согла́сно веселя́ся, всегда́ блажи́т/ и честну́ю ва́шу па́мять пра́зднует благоче́стно,/ честни́и безсре́бреницы.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Я́ко свет, я́ко два вели́ка со́лнца,/ разу́мную твердь украша́ете, безсре́бреницы,/ и зна́мений заря́ми просвеща́ете всех ве́рных сердца́./ Тем зове́м: разреши́те тьму страсте́й на́ших, моли́мся.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
В се́ла Вы́шняя вселя́еми, святи́и,/ посреде́ нас бы́ти неви́димо милосе́рдуйте,/ и́же посреде́ Боже́ственнаго хра́ма ва́шего/ пе́сни возсыла́ющих Вседержи́телю/ и блажа́щих приле́жно вас, всехва́льнии.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Земля́ с Вы́шними весели́тся в све́тлый Боже́ственный пра́здник ваш, святи́и:/ его́же соверша́ющих, нас изба́вите тьмы, и боле́зней, и вся́кия тесноты́,/ и е́же во а́де лю́таго, му́дрии, муче́ния.
  
Канон 2-й чудотво́рцов и безсре́бреников Космы́ и Дамиа́на(На 4), Глас 1:
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Пе́сньми му́друю дво́ицу Све́та у́мнаго,/ облиста́ющую зарю́ и просвеще́ние всем подаю́щу,/ непреста́нно ублажа́ем.
Припев:
Святи́и безсре́бреницы Космó и Дамиáне, моли́те Бо́га о на́с.
Тропарь:
Кре́пость душе́внаго здра́вия творя́ще ве́рным,/ и теле́сныя врачу́ете вве́рении вам стра́сти, я́ко спаси́телие,/ те́мже и воспева́еми есте́ при́сно.
Сла́ва Отцу́ и Сы́ну и Свято́му Ду́ху.
Тропарь:
Богосве́тлая свети́ла, у́мне Не́бо честны́я Це́ркве светодая́ния ли́тием,/ ны́не свет подаю́ще, непреста́нне озаря́ют.
И ны́не и при́сно и во ве́ки веко́в. Ами́нь.
Богородичен:
Тебе́, све́та о́блак, и святы́й киво́т,/ и всесве́тлую дверь мы́сленнаго Со́лнца,/ я́ко Богоро́дицу пе́сньми велича́ем.

Катавасия , Глас 4:

Ирмос:
Вся́к земноро́дный/ да взыгра́ется Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, всеблаже́нная Богоро́дице,// Чи́стая Присноде́во.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Тя хва́лят вся си́лы небе́сныя, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Светилен чудотво́рцов и безсре́бреников Космы́ и Дамиа́на

  
Подо́бен: Ду́хом во святи́лищи:
Хор:
Благода́ть врачева́ний от Бо́га прие́мше, безсре́бреницы блаже́ннии,/ е́же врачева́ти неду́жныя/ и исцеля́ти вся ве́рно притека́ющия к Боже́ственному ва́шему хра́му./ Сего́ ра́ди согла́сно ублажа́ем досто́йне честну́ю ва́шу па́мять.
(Дважды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Родила́ еси́, Пречи́стая, Бо́жие Бо́га Сло́во,/ ми́рови спаси́тельное соверша́ющаго всему́дре строе́ние изря́дное./ Сего́ ра́ди Тя вси песносло́вим досто́йне,/ я́ко моля́щуюся к Нему́, изба́витися нам неду́гов и вся́ких бед.

Хвали́тны псалмы́, глас 1:

Хор:
Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.
Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.
  
Стихиры чудотво́рцов и безсре́бреников Космы́ и Дамиа́на, глас 1:
На 4. Стих:
Хвали́те Его́ на си́лах Его́,/ хвали́те Его́ по мно́жеству вели́чествия Его́.
Стихира:
Благода́ть исцеле́ний от Бо́га прие́мше,/ безсре́бренно стра́сти душ и теле́с на́ших те́пле исцеля́ете,/ всеми́рнии безсре́бреницы,/ те́мже ва́ми Христо́с, ве́рным да́нное здра́вие да́руя,/ свети́ла неле́стная вас показу́ет вселе́нней./ Того́ умоли́те спасти́ся душа́м на́шим.
Стих:
Хвали́те Его́ во гла́се тру́бнем,/ хвали́те Его́ во псалти́ри и гу́слех.
Стихира:
От Вы́шняго Про́мысла/ бе́здну исцеле́ний поче́рпше,/ всем источа́ете ве́рным исцеле́ния, безсре́бреницы:/ преесте́ственне бо неду́гующих стра́сти/ рукоде́йствии та́инственными,/ от сокро́вищ Ду́ха лечбы́ предлага́юще спаси́тельныя,/ стра́ждущих исцеля́ете./ Те́мже храм че́стен бы́вше Живонача́льныя Тро́ицы,/ в вас бо я́ве оби́тель сотвори́:/ Е́йже моли́теся/ спасти́ся душа́м на́шим.
На 2. Стих:
Хвали́те Его́ в тимпа́не и ли́це,/ хвали́те Его́ во стру́нах и орга́не.
Стихира:
(Глас 2): Ра́дуется лик святы́х во ве́ки,/ Ца́рство бо Небе́сное насле́доваша,/ земля́, мо́щи их прие́мши,/ благово́ние возве́я:/ раби́ Христо́вы бы́ша,/ всели́вшеся в жизнь ве́чную.
Стих:
Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.
Стихира:
Вра́чеве немощству́ющих,/ сокро́вища врачева́ний,/ спаси́телие ве́рных, безсре́бреницы всесла́внии,/ в ну́ждах зову́щия и боля́щия исцели́те,/ с Феодо́тиею моля́ще Бо́га блага́го/ изба́витися нам от се́тей вра́жиих.
Сла́ва Отцу́ и Сы́ну и Свято́му Ду́ху
  
Глас 4:
Стихира:
Исто́чник исцеле́ний иму́ще,/ святи́и безсре́бреницы,/ исцеле́ния подае́те всем тре́бующим,/ я́ко велича́йших даро́в сподо́бльшеся/ от приснотеку́щаго Исто́чника, Спа́са Христа́./ Рече́ бо к вам Госпо́дь,/ я́ко единоревни́телем апо́столов:/ се дах вам власть над ду́хи нечи́стыми,/ я́коже ты́я изгони́ти,/ и лечи́ти всяк неду́г и вся́кую я́зю./ Те́мже в повеле́ниих Его́ до́бре пожи́вше,/ ту́не прия́сте, ту́не подае́те,/ врачу́юще стра́сти душ и теле́с на́ших.
И ны́не и при́сно и во ве́ки веко́в. Ами́нь.
  
Глас 4, Подо́бен: Я́ко до́бля::
Богородичен:
Ра́дуйся, прибе́жище христиа́н и утвержде́ние;/ ра́дуйся, ле́ствице Небе́сная;/ ра́дуйся, сокро́вище де́вства;/ ра́дуйся, Богоро́дице, киво́те слове́сный Боже́ственныя сла́вы./ Ра́дуйся, похвало́ всего́ ми́ра и утвержде́ние,/ па́дших воззва́ние,/ ски́ния всесве́тлая, свята́я и всекра́сная.
Иере́й:
Сла́ва Тебе́, показа́вшему нам све́т.

Славосло́вие вели́кое:

Хор:
Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.
На всяк день благословлю́ Тя, и восхвалю́ И́мя Твое́ во ве́ки, и в век ве́ка.
Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.
Бу́ди, Го́споди, ми́лость Твоя́ на нас, я́коже упова́хом на Тя.
Благослове́н еси́, Го́споди, научи́ мя оправда́нием Твои́м.
(Трижды)
Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Трисвятое:

Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Святы́й Безсме́ртный, поми́луй нас.
Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропарь чудотво́рцов и безсре́бреников Космы́ и Дамиа́на, Глас 8:

Святи́и безсре́бреницы и чудотво́рцы, Космо́ и Дамиа́не,/ посети́те не́мощи на́ша:/ ту́не прия́сте, ту́не дади́те нам.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
  
Богородичен из третьего приложения по гласу Тропаря
И́же нас ра́ди рожде́йся от Де́вы / и, распя́тие претерпе́в, Благи́й, / испрове́ргий сме́ртию смерть / и Воскресе́ние явле́й я́ко Бог, / не пре́зри, я́же созда́л еси́ руко́ю Твое́ю, / яви́ человеколю́бие Твое́, Ми́лостиве. / Приими́ ро́ждшую Тя, Богоро́дицу, моля́щуюся за ны, / и спаси́, Спа́се наш, лю́ди отча́янныя.

Ектения́ сугу́бая:

Диа́кон:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Трижды, на каждое прошение)
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем Высокопреосвяще́ннейшем митрополите (или: архиепи́скопе, или: преосвяще́ннейшем епи́скопе имярек), и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.
Еще́ мо́лимся о ми́лости, жи́зни, мире, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих настоя́теля, бра́тии и прихо́жан свята́го хра́ма сего́.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Иере́й:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Ектения́ проси́тельная:

Диа́кон:
Испо́лним у́тренюю моли́тву на́шу Го́сподеви.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Дне́ всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение.)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Бог ми́лости и ще́дрот и человеколю́бия еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.
Иере́й:
Мир всем.
Хор:
И ду́хови твоему́.
Диа́кон:
Главы́ на́ша Го́сподеви прикло́ним.
Хор:
Тебе́, Господи.
Иере́й:
Твое́ бо е́сть, е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.
Диа́кон:
Прему́дрость.
Хор:
Благослови́.
Иере́й:
Сый благослове́н Христо́с Бог наш, всегда́, ны́не и при́сно и во ве́ки веко́в.
Хор:
Ами́нь. Утверди́, Бо́же, святу́ю правосла́вную ве́ру, правосла́вных христиа́н во век ве́ка.
Иере́й:
Пресвята́я Богоро́дице, спаси́ нас.
Хор:
Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Иере́й:
Сла́ва Тебе́, Христе́ Бо́же, Упова́ние на́ше, сла́ва Тебе́.
Хор:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Го́споди, поми́луй.
(Трижды)
Благослови́.

Отпу́ст:

Иере́й:
Христо́с, И́стинный Бог наш, моли́твами Пречи́стыя Своея́ Ма́тере…

Многоле́тие:

ЧИТА́ЕТСЯ ПЕ́РВЫЙ ЧАС:

Чтец:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 5:

Глаго́лы моя́ внуши́, Го́споди, разуме́й зва́ние мое́. Вонми́ гла́су моле́ния моего́, Царю́ мой и Бо́же мой, я́ко к Тебе́ помолю́ся, Го́споди. Зау́тра услы́ши глас мой, зау́тра предста́ну Ти, и у́зриши мя. Я́ко Бог не хотя́й беззако́ния, Ты еси́: не присели́тся к Тебе́ лука́внуяй, ниже́ пребу́дут беззако́нницы пред очи́ма Твои́ма: возненави́дел еси́ вся де́лающия беззако́ние. Погуби́ши вся глаго́лющия лжу: му́жа крове́й и льсти́ва гнуша́ется Госпо́дь. Аз же мно́жеством ми́лости Твоея́, вни́ду в дом Твой, поклоню́ся ко хра́му свято́му Твоему́, в стра́се Твое́м. Го́споди, наста́ви мя пра́вдою Твое́ю, враг мои́х ра́ди испра́ви пред Тобо́ю путь мой. Я́ко несть во усте́х их и́стины, се́рдце их су́етно, гроб отве́рст горта́нь их: язы́ки свои́ми льща́ху. Суди́ им, Бо́же, да отпаду́т от мы́слей свои́х, по мно́жеству нече́стия их изри́ни я́, я́ко преогорчи́ша Тя, Го́споди. И да возвеселя́тся вси упова́ющии на Тя, во век возра́дуются, и всели́шися в них, и похва́лятся о Тебе́ лю́бящии и́мя Твое́. Я́ко Ты благослови́ши пра́ведника, Го́споди: я́ко ору́жием благоволе́ния венча́л еси́ нас.

Псало́м 89:

Го́споди, прибе́жище был еси́ нам в род и род. Пре́жде да́же гора́м не бы́ти и созда́тися земли́ и вселе́нней, и от ве́ка и до ве́ка Ты еси́. Не отврати́ челове́ка во смире́ние, и рекл еси́: обрати́теся, сы́нове челове́честии. Я́ко ты́сяща лет пред очи́ма Твои́ма, Го́споди, я́ко день вчера́шний, и́же мимои́де, и стра́жа нощна́я. Уничиже́ния их ле́та бу́дут. Утро я́ко трава́ мимои́дет, у́тро процвете́т и пре́йдет: на ве́чер отпаде́т ожесте́ет и и́зсхнет. Я́ко исче́зохом гне́вом Твои́м, и я́ростию Твое́ю смути́хомся. Положи́л еси́ беззако́ния на́ша пред Тобо́ю: век наш в просвеще́ние лица́ Твоего́. Я́ко вси дни́е на́ши оскуде́ша, и гне́вом Твои́м исчезо́хом, ле́та на́ша я́ко паучи́на поуча́хуся. Дни́е лет на́ших, в ни́хже се́дмьдесят лет, а́ще же в си́лах, о́смьдесят лет, и мно́жае их труд и боле́знь: я́ко прии́де кро́тость на ны, и нака́жемся. Кто весть держа́ву гне́ва Твоего́, и от стра́ха Твоего́, я́рость Твою́ исчести́? Десни́цу Твою́ та́ко скажи́ ми, и окова́нныя се́рдцем в му́дрости. Обрати́ся, Го́споди, доко́ле? И умоле́н бу́ди на рабы́ Твоя́. Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны их. И бу́ди све́тлость Го́спода Бо́га на́шего на нас, и дела́ рук на́ших испра́ви на нас, и де́ло рук на́ших испра́ви.

Псало́м 100:

Ми́лость и суд воспою́ Тебе́, Го́споди. Пою́ и разуме́ю в пути́ непоро́чне, когда́ прии́деши ко мне? Прехожда́х в незло́бии се́рдца моего́ посреде́ до́му моего́. Не предлага́х пред очи́ма мои́ма вещь законопресту́пную: творя́щия преступле́ние возненави́дех. Не прильпе́ мне се́рдце стропти́во, уклоня́ющагося от мене́ лука́ваго не позна́х. Оклевета́ющаго тай и́скренняго своего́, сего́ изгоня́х: го́рдым о́ком, и несы́тым се́рдцем, с сим не ядя́х. О́чи мои́ на ве́рныя земли́, посажда́ти я́ со мно́ю: ходя́й по пути́ непоро́чну, сей ми служа́ше. Не живя́ше посреде́ до́му моего́ творя́й горды́ню, глаго́ляй непра́ведная, не исправля́ше пред очи́ма мои́ма. Во у́трия избива́х вся гре́шныя земли́, е́же потреби́ти от гра́да Госпо́дня вся де́лающия беззако́ние.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Три́жды)
Го́споди, поми́луй.
(Три́жды)
Сла́ва Отцу́ и Сы́ну и Свято́му Ду́ху.

Тропарь чудотво́рцов и безсре́бреников Космы́ и Дамиа́на, Глас 8:

Святи́и безсре́бреницы и чудотво́рцы, Космо́ и Дамиа́не,/ посети́те не́мощи на́ша:/ ту́не прия́сте, ту́не дади́те нам.
Чтец:
И ны́не и при́сно и во ве́ки веко́в. Ами́нь.
Что Тя нарече́м, о Благода́тная? Не́бо, я́ко возсия́ла еси́ Со́лнце Пра́вды. Рай, я́ко прозябла́ еси́ цвет нетле́ния Де́ву, я́ко пребыла́ еси́ нетле́нна. Чи́стую Ма́терь, я́ко име́ла еси́ на святы́х Твои́х объя́тиях Сы́на, всех Бо́га. Того́ моли́ спасти́ся душа́м на́шим.
Стопы́ моя́ напра́ви по словеси́ Твоему́ и да не облада́ет мно́ю вся́кое беззако́ние. Изба́ви мя от клеветы́ челове́ческия, и сохраню́ за́поведи Твоя́. Лице́ Твое́ просвети́ на раба́ Твоего́ и нау́чи мя оправда́нием Твои́м.
Да испо́лнятся уста́ моя́ хвале́ния Твоего́, Го́споди, я́ко да воспою́ сла́ву Твою́, весь день великоле́пие Твое́.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Кондак чудотво́рцов и безсре́бреников Космы́ и Дамиа́на, Глас 2:

  
Подо́бен: Тве́рдыя:
Хор:
Благода́ть прии́мше исцеле́ний,/ простира́ете здра́вие су́щим в ну́ждах,/ вра́чеве, чудотво́рцы пресла́внии,/ но ва́шим посеще́нием ра́тников де́рзости низложи́те,/ мир исцеля́юще чудесы́.
Ко а́ду, Спа́се мой, соше́л еси́,/ и врата́ сокруши́вый я́ко всеси́лен,/ уме́рших, я́ко Созда́тель, совоскреси́л еси́,/ и сме́рти жа́ло сокруши́л еси́,/ и Ада́м от кля́твы изба́влен бысть, Человеколю́бче;/ те́мже вси зове́м:// спаси́ нас, Го́споди.
Го́споди, поми́луй.
(40 раз)
И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.
Го́споди поми́луй.
(Три́жды.)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
И́менем Госпо́дним благослови́, о́тче.
Иере́й:
Бо́же, уще́дри ны и благослови́ ны, просвети́ лице́ Твое́ на ны и поми́луй ны.
Чтец:
Ами́нь.
Иере́й:
Христе́, Све́те И́стинный, просвеща́яй и освяща́яй вся́каго челове́ка, гряду́щаго в мир, да зна́менается на нас свет лица́ Твоего́, да в нем у́зрим Свет Непристу́пный: и испра́ви стопы́ на́ша к де́ланию за́поведей Твои́х, моли́твами Пречи́стыя Твоея́ Ма́тере, и всех Твои́х святы́х, ами́нь.

Конда́к, глас 8:

Взбра́нной Воево́де победи́тельная,/ я́ко изба́вльшеся от злы́х,/ благода́рственная воспису́ем Ти́ раби́ Твои́, Богоро́дице;/ но я́ко иму́щая держа́ву непобеди́мую,/ от вся́ких на́с бе́д свободи́, да зове́м Ти́:// ра́дуйся, Неве́сто Неневе́стная.
Иере́й:
Сла́ва Тебе́, Христе́ Бо́же, упова́ние на́ше, сла́ва Тебе́.
Хор:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Го́споди, поми́луй.
(Три́жды)
Благослови́.

Отпу́ст.

Иере́й:
Христо́с, и́стинный Бог наш, моли́твами пречи́стыя Своея́ Ма́тере, преподо́бных и Богоно́сных оте́ц на́ших и всех святы́х, поми́лует и спасе́т нас, я́ко Благ и Человеколю́бец.
Хор:
Го́споди, поми́луй.
(Три́жды)

Тре́тий час:

Иере́й:
Благослове́н Бог наш всегда́, ны́не и при́сно, и во ве́ки веко́в.
Чтец:
Ами́нь. Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.
Чтец:
Ами́нь.
Го́споди, поми́луй.
(12 раз)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 16:

Услы́ши, Го́споди, пра́вду мою́, вонми́ моле́нию моему́, внуши́ моли́тву мою́ не во устна́х льсти́вых. От лица́ Твоего́ судьба́ моя́ изы́дет, óчи мои́ да ви́дита правоты́. Искуси́л eси́ се́рдце мое́, посети́л eси́ но́щию, искуси́л мя eси́, и не обре́теся во мне непра́вда. Я́ко да не возглаго́лют уста́ моя́ дел челове́ческих, за словеса́ усте́н Твои́х аз сохрани́х пути́ же́стоки. Соверши́ стопы́ моя́ во стезя́х Твои́х, да не подви́жутся стопы́ моя́. Аз воззва́х, я́ко услы́шал мя eси́, Бо́же, приклони́ у́хо Твое́ мне и услы́ши глаго́лы моя́. Удиви́ ми́лости Твоя́, спаса́яй упова́ющия на Тя от проти́вящихся десни́це Твое́й. Сохрани́ мя, Го́споди, я́ко зе́ницу óка, в кро́ве крилу́ Твоéю покры́еши мя. От лица́ нечести́вых остра́стших мя, врази́ мои́ ду́шу мою́ одержа́ша. Тук свой затвори́ша, уста́ их глаго́лаша горды́ню. Изгоня́щии мя ны́не обыдо́ша мя, óчи свои́ возложи́ша уклони́ти на зе́млю. Объя́ша мя я́ко лев гото́в на лов и я́ко ски́мен обита́яй в та́йных. Воскресни́, Го́споди, предвари́ я́ и запни́ им, изба́ви ду́шу мою́ от нечести́ваго, oру́жие Твое́ от враг руки́ Твоея́. Го́споди, от ма́лых от земли́, раздели́ я́ в животе́ их, и сокрове́нных Твои́х испо́лнися чре́во их, насы́тишася сыно́в, и оста́виша оста́нки младе́нцeм свои́м. Аз же пра́вдою явлю́ся лицу́ Твоему́, насы́щуся, внегда́ яви́ти ми ся сла́ве Твое́й.

Псало́м 24:

К Тебе́, Го́споди, воздвиго́х ду́шу мою́, Бо́же мой, на Тя упова́х, да не постыжу́ся во век, ниже́ да посмею́т ми ся врази́ мои́, и́бо вси терпя́щии Тя не постыдя́тся. Да постыдя́тся беззако́ннующии вотще́. Пути́ Твоя́, Го́споди, скажи́ ми, и стезя́м Твои́м научи́ мя. Наста́ви мя на и́стину Твою́, и научи́ мя, я́ко Ты еси́ Бог Спас мой, и Тебе́ терпе́х весь день. Помяни́ щедро́ты Твоя́, Го́споди, и ми́лости Твоя́, я́ко от ве́ка суть. Грех ю́ности моея́, и неве́дения моего́ не помяни́, по ми́лости Твое́й помяни́ мя Ты, ра́ди бла́гости Твоея́, Го́споди. Благ и прав Госпо́дь, сего́ ра́ди законоположи́т согреша́ющим на пути́. Наста́вит кро́ткия на суд, научи́т кро́ткия путе́м Свои́м. Вси путие́ Госпо́дни ми́лость и и́стина, взыска́ющим заве́та Его́, и свиде́ния Его́. Ра́ди и́мене Твоего́, Го́споди, и очи́сти грех мой, мног бо есть. Кто есть челове́к боя́йся Го́спода? Законоположи́т eму́ на пути́, eго́же изво́ли. Душа́ eго́ во благи́х водвори́тся, и се́мя eго́ насле́дит зе́млю. Держа́ва Госпо́дь боя́щихся Его́, и заве́т Его́ яви́т им. О́чи мои́ вы́ну ко Го́споду, я́ко Той исто́ргнет от се́ти но́зе мои́. При́зри на мя и поми́луй мя, я́ко единоро́д и нищ есмь аз. Ско́рби се́рдца моего́ умно́жишася, от нужд мои́х изведи́ мя. Виждь смире́ние мое́, и труд мой, и оста́ви вся грехи́ моя́. Виждь враги́ моя́, я́ко умно́жишася, и ненавиде́нием непра́ведным возненави́деша мя. Сохрани́ ду́шу мою́, и изба́ви мя, да не постыжу́ся, я́ко упова́х на Тя. Незло́бивии и пра́вии прилепля́хуся мне, я́ко потерпе́х Тя, Го́споди. Изба́ви, Бо́же, Изра́иля от всех скорбе́й eго́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Три́жды)
Го́споди, поми́луй.
(Три́жды)
Сла́ва Отцу́ и Сы́ну и Свято́му Ду́ху.

Тропарь чудотво́рцов и безсре́бреников Космы́ и Дамиа́на, Глас 8:

Святи́и безсре́бреницы и чудотво́рцы, Космо́ и Дамиа́не,/ посети́те не́мощи на́ша:/ ту́не прия́сте, ту́не дади́те нам.
И ны́не и при́сно и во ве́ки веко́в. Ами́нь.
Богоро́дице, Ты еси́ лоза́ и́стинная, возрасти́вшая нам Плод живота́, Тебе́ мо́лимся: моли́ся, Влады́чице, со святы́ми апо́столы поми́ловати ду́ши на́ша.
Госпо́дь Бог благослове́н, благослове́н Госпо́дь день дне,/ поспеши́т нам Бог спасе́ний на́ших, Бог наш, Бог спаса́ти.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Кондак чудотво́рцов и безсре́бреников Космы́ и Дамиа́на, Глас 2:

  
Подо́бен: Тве́рдыя:
Хор:
Благода́ть прии́мше исцеле́ний,/ простира́ете здра́вие су́щим в ну́ждах,/ вра́чеве, чудотво́рцы пресла́внии,/ но ва́шим посеще́нием ра́тников де́рзости низложи́те,/ мир исцеля́юще чудесы́.
Го́споди, поми́луй.
(40 раз)
И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.
Го́споди поми́луй.
(Три́жды.)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
И́менем Госпо́дним благослови́, о́тче.
Иере́й:
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас.
Чтец:
Ами́нь. Влады́ко Бо́же О́тче Вседержи́телю, Го́споди Сы́не Единоро́дный Иису́се Христе́, и Святы́й Ду́ше, Еди́но Боже́ство, Еди́на Си́ла, поми́луй мя, гре́шнаго, и и́миже ве́си судьба́ми, спаси́ мя, недосто́йнаго раба́ Твоего́, я́ко благослове́н еси́ во ве́ки веко́в, ами́нь.

Шесто́й час:

Чтец:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 53:

Бо́же, во и́мя Твое́ спаси́ мя, и в си́ле Твое́й суди́ ми. Бо́же, услы́ши моли́тву мою́, внуши́ глаго́лы уст мои́х. Я́ко чу́ждии воста́ша на мя и кре́пции взыска́ша ду́шу мою́, и не предложи́ша Бо́га пред собо́ю. Се бо Бог помога́ет ми, и Госпо́дь Засту́пник души́ мое́й. Отврати́т зла́я враго́м мои́м, и́стиною Твое́ю потреби́ их. Во́лею пожру́ Тебе́, испове́мся и́мени Твоему́, Го́споди, я́ко бла́го, я́ко от вся́кия печа́ли изба́вил мя еси́, и на враги́ моя́ воззре́ о́ко мое́.

Псало́м 54:

Внуши́, Бо́же, моли́тву мою́ и не пре́зри моле́ния моего́. Вонми́ ми и услы́ши мя: возскорбе́х печа́лию мое́ю и смято́хся. От гла́са вра́жия и от стуже́ния гре́шнича, я́ко уклони́ша на мя беззако́ние и во гне́ве враждова́ху ми. Се́рдце мое́ смяте́ся во мне и боя́знь сме́рти нападе́ на мя. Страх и тре́пет прии́де на мя и покры́ мя тьма. И рех: кто даст ми криле́, я́ко голубине́, и полещу́, и почи́ю? Се удали́хся бе́гая и водвори́хся в пусты́ни. Ча́ях Бо́га, спаса́ющаго мя от малоду́шия и от бу́ри. Потопи́, Го́споди, и раздели́ язы́ки их: я́ко ви́дех беззако́ние и пререка́ние во гра́де. Днем и но́щию обы́дет и́ по стена́м eго́. Беззако́ние и труд посреде́ eго́ и непра́вда. И не оскуде́ от стогн eго́ ли́хва и лесть. Я́ко а́ще бы враг поноси́л ми, претерпе́л бых у́бо, и а́ще бы ненави́дяй мя на мя велере́чевал, укры́л бых ся от него́. Ты же, челове́че равноду́шне, влады́ко мой и зна́емый мой, и́же ку́пно наслажда́лся еси́ со мно́ю бра́шен, в дому́ Бо́жии ходи́хом единомышле́нием. Да прии́дет же смерть на ня, и да сни́дут во ад жи́ви, я́ко лука́вство в жили́щах их, посреде́ их. Аз к Бо́гу воззва́х, и Госпо́дь услы́ша мя. Ве́чер и зау́тра, и полу́дне пове́м, и возвещу́, и услы́шит глас мой. Изба́вит ми́ром ду́шу мою́ от приближа́ющихся мне, я́ко во мно́зе бя́ху со мно́ю. Услы́шит Бог и смири́т я́, Сый пре́жде век. Несть бо им измене́ния, я́ко не убоя́шася Бо́га. Простре́ ру́ку свою́ на воздая́ние, оскверни́ша заве́т Его́. Раздели́шася от гне́ва лица́ Его́, и прибли́жишася сердца́ их, умя́кнуша словеса́ их па́че еле́а, и та суть стре́лы. Возве́рзи на Го́спода печа́ль твою́, и Той тя препита́ет, не даст в век молвы́ пра́веднику. Ты же, Бо́же, низведе́ши их во студене́ц истле́ния, му́жие крове́й и льсти не преполовя́т дней свои́х. Аз же, Го́споди, упова́ю на Тя.

Псало́м 90:

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: Засту́пник мой еси́ и Прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи и от словесе́ мяте́жна, плещма́ Свои́ма осени́т тя, и под криле́ Его́ наде́ешися: ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тме преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тма одесну́ю тебе́, к тебе́ же не прибли́жится, оба́че очи́ма твои́ма смо́триши, и воздая́ние гре́шников у́зриши. Я́ко Ты, Го́споди, упова́ние мое́, Вы́шняго положи́л еси́ прибе́жище твое́. Не прии́дет к тебе́ зло и ра́на не прибли́жится телеси́ твоему́, я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́, на а́спида и васили́ска насту́пиши, и попере́ши льва и зми́я. Я́ко на Мя упова́ и изба́влю и́, покры́ю и́, я́ко позна́ и́мя Мое́. Воззове́т ко Мне и услы́шу eго́, с ним есмь в ско́рби, изму́ eго́ и просла́влю eго́, долгото́ю дний испо́лню eго́ и явлю́ eму́ спасе́ние Мое́.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же.
(Три́жды)
Го́споди, поми́луй.
(Три́жды)
Сла́ва Отцу́ и Сы́ну и Свято́му Ду́ху.

Тропарь чудотво́рцов и безсре́бреников Космы́ и Дамиа́на, Глас 8:

Святи́и безсре́бреницы и чудотво́рцы, Космо́ и Дамиа́не,/ посети́те не́мощи на́ша:/ ту́не прия́сте, ту́не дади́те нам.
И ны́не и при́сно и во ве́ки веко́в. Ами́нь.
Я́ко не и́мамы дерзнове́ния за премно́гия грехи́ на́ша, Ты и́же от Тебе́ Ро́ждшагося моли́, Богоро́дице Де́во, мно́го бо мо́жет моле́ние Ма́тернее ко благосе́рдию Влады́ки. Не пре́зри гре́шных мольбы́, Всечи́стая, я́ко ми́лостив есть и спасти́ моги́й, И́же и страда́ти о нас изво́ливый.
Ско́ро да предваря́т ны щедро́ты Твоя́, Го́споди, я́ко обнища́хом зело́; помози́ нам, Бо́же, Спа́се наш, сла́вы ра́ди И́мене Твоего́, Го́споди, изба́ви нас и очи́сти грехи́ на́ша, И́мене ра́ди Твоего́.

Трисвято́е по О́тче наш:

Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Кондак чудотво́рцов и безсре́бреников Космы́ и Дамиа́на, Глас 2:

  
Подо́бен: Тве́рдыя:
Хор:
Благода́ть прии́мше исцеле́ний,/ простира́ете здра́вие су́щим в ну́ждах,/ вра́чеве, чудотво́рцы пресла́внии,/ но ва́шим посеще́нием ра́тников де́рзости низложи́те,/ мир исцеля́юще чудесы́.
Го́споди, поми́луй.
(40 раз)
И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.
Го́споди поми́луй.
(Три́жды.)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
И́менем Госпо́дним благослови́, о́тче.
Иере́й:
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас.
Чтец:
Ами́нь. Бо́же и Го́споди сил и всея́ тва́ри Соде́телю, И́же за милосе́рдие безприкла́дныя ми́лости Твоея́ Единоро́днаго Сы́на Твоего́, Го́спода на́шего Иису́са Христа́, низпосла́вый на спасе́ние ро́да на́шего, и честны́м Его́ Кресто́м рукописа́ние грех на́ших растерза́вый, и победи́вый тем нача́ла и вла́сти тьмы. Сам, Влады́ко Человеколю́бче, приими́ и нас, гре́шных, благода́рственныя сия́ и моле́бныя моли́твы и изба́ви нас от вся́каго всегуби́тельнаго и мра́чнаго прегреше́ния и всех озло́бити нас и́щущих ви́димых и неви́димых враг. Пригвозди́ стра́ху Твоему́ пло́ти на́ша и не уклони́ серде́ц на́ших в словеса́ или́ помышле́ния лука́вствия, но любо́вию Твое́ю уязви́ ду́ши на́ша, да, к Тебе́ всегда́ взира́юще и е́же от Тебе́ све́том наставля́еми, Тебе́, непристу́пнаго и присносу́щнаго зря́ще Све́та, непреста́нное Тебе́ испове́дание и благодаре́ние возсыла́ем, Безнача́льному Отцу́ со Единоро́дным Твои́м Сы́ном и Всесвяты́м, и Благи́м, и Животворя́щим Твои́м Ду́хом ны́не, и при́сно, и во ве́ки веко́в, ами́нь.

Боже́ственная литурги́я:

Диа́кон:
Благослови́, влады́ко.
Иере́й:
Благослове́но Ца́рство Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Аминь.

Вели́кая ектения́:

Диа́кон:
Ми́ром Го́споду помо́лимся.
Хор:
Го́споди, поми́луй.
(На каждое прошение)
Диа́кон:
О Свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих во_нь, Го́споду помо́лимся.
О вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем, Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имярек), честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея, Го́споду помо́лимся.
О гра́де сем (или о ве́си сей), вся́ком гра́де, стране́ и ве́рою живу́щих в них, Го́споду помо́лимся.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Пе́рвый антифо́н, псало́м 102:

Хор:
Благослови́, душе́ моя́, Го́спода,/ благослове́н еси́ Го́споди./
Благослови́, душе́ моя́, Го́спода,/ и вся вну́тренняя моя́/ и́мя свя́тое Его́./ Благослови́, душе́ моя́, Го́спода,/ и не забыва́й всех воздая́ний Его́,/ очища́ющаго вся беззако́ния твоя́,/ исцеля́ющаго вся неду́ги твоя́,/ избавля́ющаго от истле́ния живо́т твой,/ венча́ющаго тя ми́лостию и щедро́тами,/ исполня́ющаго во благи́х жела́ние твое́:/ обнови́тся я́ко о́рля ю́ность твоя́./ Творя́й ми́лостыни Госпо́дь,/ и судьбу́ всем оби́димым./ Сказа́ пути́ Своя́ Моисе́ови,/ сыново́м Изра́илевым хоте́ния Своя́:/ Щедр и Ми́лостив Госпо́дь,/ Долготерпели́в и Многоми́лостив./ Не до конца́ прогне́вается,/ ниже́ в век вражду́ет,/ не по беззако́нием на́шим сотвори́л есть нам,/ ниже́ по грехо́м на́шим возда́л есть нам./ Я́ко по высоте́ небе́сней от земли́,/ утверди́л есть Госпо́дь ми́лость Свою́ на боя́щихся Его́./ Ели́ко отстоя́т восто́цы от за́пад,/ уда́лил есть от нас беззако́ния на́ша./ Я́коже ще́дрит оте́ц сы́ны,/ уще́дри Госпо́дь боя́щихся Его́./ Я́ко Той позна́ созда́ние на́ше,/ помяну́, я́ко персть есмы́./ Челове́к, я́ко трава́ дни́е eго́,/ я́ко цвет се́льный, та́ко оцвете́т,/ я́ко дух про́йде в нем,/ и не бу́дет, и не позна́ет ктому́ ме́ста своего́./ Ми́лость же Госпо́дня от ве́ка и до ве́ка на боя́щихся Его́,/ и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́./ Госпо́дь на Небеси́ угото́ва Престо́л Свой,/ и Ца́рство Его́ все́ми облада́ет./ Благослови́те Го́спода вси А́нгели Его́,/ си́льнии кре́постию, творя́щии сло́во Его́, услы́шати глас слове́с Его́./ Благослови́те Го́спода вся Си́лы Его́,/ слуги́ Его́, творя́щии во́лю Его́./ Благослови́те Го́спода вся дела́ Его́, на вся́ком ме́сте влады́чествия Его́./
Благослови́, душе́ моя́, Го́спода,/ и вся вну́тренняя моя́/ и́мя свя́тое Его́.// Благослове́н еси́, Го́споди.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Твоя́ держа́ва, и Твое́ есть Ца́рство, и си́ла, и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.
Хор:
Ами́нь.

Второ́й антифо́н, псало́м 145:

Хор:
Хвали́, душе́ моя́, Го́спода./ Восхвалю́ Го́спода в животе́ мое́м,/ пою́ Бо́гу моему́, до́ндеже есмь./ Не наде́йтеся на кня́зи, на сы́ны челове́ческия,/ в ни́хже несть спасе́ния./ Изы́дет дух eго́/ и возврати́тся в зе́млю свою́./ В той день поги́бнут вся помышле́ния eго́./ Блаже́н, eму́же Бог Иа́ковль Помо́щник его́,/ упова́ние eго́ на Го́спода Бо́га своего́,/ сотво́ршаго не́бо и зе́млю,/ мо́ре и вся, я́же в них,/ храня́щаго и́стину в век,/ творя́щаго суд оби́димым,/ даю́щаго пи́щу а́лчущим./ Госпо́дь реши́т окова́нныя./ Госпо́дь умудря́ет слепцы́./ Госпо́дь возво́дит низве́рженныя./ Госпо́дь лю́бит пра́ведники./ Госпо́дь храни́т прише́льцы,/ си́ра и вдову́ прии́мет/ и путь гре́шных погуби́т./ Воцари́тся Госпо́дь во век,// Бог твой, Сио́не, в род и род.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Единоро́дный Сы́не:

Единоро́дный Сы́не и Сло́ве Бо́жий, Безсме́ртен Сый/ и изво́ливый спасе́ния на́шего ра́ди/ воплоти́тися от Святы́я Богоро́дицы и Присноде́вы Мари́и,/ непрело́жно вочелове́чивыйся,/ распны́йся же, Христе́ Бо́же, сме́ртию смерть попра́вый,/ Еди́н Сый Святы́я Тро́ицы,// спрославля́емый Отцу́ и Свято́му Ду́ху, спаси́ нас.

Ектения́ ма́лая:

Диа́кон:
Па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко благ и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.

Тре́тий антифо́н, Блаже́нны:

Хор:
Во Ца́рствии Твое́м помяни́ нас, Го́споди, егда́ прии́деши, во Ца́рствии Твое́м.
На 12:
Блаже́ни ни́щии ду́хом, я́ко тех есть Ца́рство Небе́сное.
Блаже́ни пла́чущии, я́ко ти́и уте́шатся.
На 10:
Блаже́ни кро́тции, я́ко ти́и насле́дят зе́млю.
Блаже́ни а́лчущии и жа́ждущии пра́вды, я́ко ти́и насы́тятся.
На 8:
Блаже́ни ми́лостивии, я́ко ти́и поми́ловани бу́дут.
  
Песнь 3 Канона 1-го чудотво́рцов и безсре́бреников Космы́ и Дамиа́на, Глас 6:
Ирмо́с:
Несть свят,/ я́коже Ты, Го́споди, Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.
Блаже́ни чи́стии се́рдцем, я́ко ти́и Бо́га у́зрят.
Тропарь:
Мир пое́т ва́ша, святи́и, мно́гая благодея́ния/ и чуде́с мно́жества, чудотво́рцы и вра́чеве,/ А́нгел всех равностоя́тели.
На 6:
Блаже́ни миротво́рцы, я́ко ти́и сы́нове Бо́жии нареку́тся.
Тропарь:
Вас обои́х, светода́телей, мо́лим,/ звезд на высоте́ лежа́щих Це́ркве та́йно, Космо́ и Дамиа́не,/ сердца́ ве́рных озари́те.
Блаже́ни изгна́ни пра́вды ра́ди, я́ко тех есть Ца́рство Небе́сное.
Тропарь:
Ка́пли источа́юще при́сно, святи́и, исцеле́ния,/ омы́йте всех душе́вную скве́рну/ и страстны́я пло́ти то́ки вся уста́вите.
На 4:
Блаже́ни есте́, егда́ поно́сят вам, и изжену́т, и реку́т всяк зол глаго́л на вы, лжу́ще Мене́ ра́ди.
  
Песнь 6 Канона 2-го чудотво́рцов и безсре́бреников Космы́ и Дамиа́на, Глас 1:
Тропарь:
Спаси́тельныя цели́тели, благоде́тели Богому́дрыя,/ Косму́ же и Дамиа́на Боже́ственныя, усе́рдно да почти́м.
Ра́дуйтеся и весели́теся, я́ко мзда ва́ша мно́га на Небесе́х.
Тропарь:
Целому́дрие соблю́дше и ра́зумом укра́шени,/ Косма́ и Дамиа́н Боже́ственнии со Христо́м ра́дуются.
Сла́ва Отцу́ и Сы́ну и Свято́му Ду́ху.
Тропарь:
Единому́дренно пожи́вше, единоду́шно по́стничествовавше,/ ку́пно врачева́ния подая́ти нам вве́рени бы́сте.
И ны́не и при́сно и во ве́ки веко́в. Ами́нь.
Богородичен:
Све́т Непристу́пный родила́ еси́ пло́тию, Пречи́стая,/ ве́сь ми́р просвеща́юща заря́ми Божества́.

Ма́лый вход (с Ева́нгелием):

Диа́кон:
Прему́дрость, про́сти.
Хор:
Прииди́те, поклони́мся и припаде́м ко Христу́. Спаси́ ны, Сы́не Бо́жий, во святы́х ди́вен сый, пою́щия Ти: Аллилу́иа.

В храме Господском И Богородичном

  
[Тропарь ХРАМА]
  
Тропарь чудотво́рцов и безсре́бреников Космы́ и Дамиа́на, Глас 8:
Святи́и безсре́бреницы и чудотво́рцы, Космо́ и Дамиа́не,/ посети́те не́мощи на́ша:/ ту́не прия́сте, ту́не дади́те нам.
Сла́ва Отцу́ и Сы́ну и Свято́му Ду́ху.
  
Кондак чудотво́рцов и безсре́бреников Космы́ и Дамиа́на, Глас 2:
Благода́ть прии́мше исцеле́ний,/ простира́ете здра́вие су́щим в ну́ждах,/ вра́чеве, чудотво́рцы пресла́внии,/ но ва́шим посеще́нием ра́тников де́рзости низложи́те,/ мир исцеля́юще чудесы́.
И ны́не и при́сно и во ве́ки веко́в. Ами́нь.
  
[Кондак ХРАМА]

В храме Святого

  
Тропарь чудотво́рцов и безсре́бреников Космы́ и Дамиа́на, Глас 8:
Святи́и безсре́бреницы и чудотво́рцы, Космо́ и Дамиа́не,/ посети́те не́мощи на́ша:/ ту́не прия́сте, ту́не дади́те нам.
Сла́ва Отцу́ и Сы́ну и Свято́му Ду́ху.
  
Кондак чудотво́рцов и безсре́бреников Космы́ и Дамиа́на, Глас 2:
Благода́ть прии́мше исцеле́ний,/ простира́ете здра́вие су́щим в ну́ждах,/ вра́чеве, чудотво́рцы пресла́внии,/ но ва́шим посеще́нием ра́тников де́рзости низложи́те,/ мир исцеля́юще чудесы́.
И ны́не и при́сно и во ве́ки веко́в. Ами́нь.

Богоро́дичен, гла́с 6‑й:

Хор:
Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я,/ на по́мощь нас, ве́рно зову́щих Ти;/ ускори́ на моли́тву и потщи́ся на умоле́ние,// предста́тельствующи при́сно, Богоро́дице, чту́щих Тя.
Диа́кон:
Го́споду помо́лимся.
Хор:
Го́споди, поми́луй.
Иере́й:
Я́ко Свят́ еси́, Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно.
Диа́кон:
Го́споди, спаси́ благочести́выя.
Хор:
Го́споди, спаси́ благочести́выя.
Диа́кон:
И услы́ши ны.
Хор:
И услы́ши ны.
Диа́кон:
И во ве́ки веко́в.
Хор:
Ами́нь.

Трисвято́е:

Хор:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Три́жды)
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Святы́й Безсме́ртный, поми́луй нас.
Святы́й Бо́же, Святы́й Кре́пкий, Святы́й Безсме́ртный, поми́луй нас.
Диа́кон:
Во́нмем.
Иере́й:
Мир всем.
Чтец:
И ду́хови твоему́.
Диа́кон:
Прему́дрость.

Прокимен чудотво́рцов и безсре́бреников Космы́ и Дамиа́на, глас 4:

Чтец:
Прокимен, глас четве́ртый: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.
Хор:
Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.
Чтец:
Предзре́х Го́спода пре́до мно́ю вы́ну,/ я́ко одесну́ю мене́ есть, да не подви́жуся.
Хор:
Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.
Чтец:
Святы́м, и́же суть на земли́ Его́
Хор:
удиви́ Госпо́дь вся хоте́ния Своя́ в них.

Чтение Апостола:

Диа́кон:
Прему́дрость.
Чтец:
К Кори́нфяном пе́рваго посла́ния свята́го апо́стола Па́вла чте́ние.
Диа́кон:
Во́нмем.
  
Чтение чудотво́рцов и безсре́бреников Космы́ и Дамиа́на (Зачало 153,1 Кор.12:27-13:8):
Чтец:
Бра́тие, вы есте́ те́ло Христо́во и у́ди от ча́сти. И о́вы у́бо положи́ Бог в Це́ркви, пе́рвее апо́столы, второ́е проро́ки, тре́тие учи́тели, пото́м же си́лы, та́же дарова́ния исцеле́ний, заступле́ния, правле́ния, ро́ди язы́ков. Еда́ вси апо́столи? Еда́ вси проро́цы? Еда́ вси учи́тели? Еда́ вси си́лы? Еда́ вси дарова́ния и́мут исцеле́ний? Еда́ вси язы́ки глаго́лют? Еда́ вси сказу́ют? Ревну́йте же дарова́ний бо́льших, и еще́ по превосхожде́нию путь вам показу́ю. А́ще язы́ки челове́ческими глаго́лю и а́нгельскими, любве́ же не и́мам, бых я́ко медь звеня́щи, или́ кимва́л звяца́яй. И а́ще и́мам проро́чество и вем та́йны вся, и весь ра́зум, и а́ще и́мам всю ве́ру, я́ко и го́ры преставля́ти, любве́ же не и́мам, ничто́же есмь. И а́ще разда́м вся име́ния моя́, и а́ще преда́м те́ло мое́, во е́же сжещи́ е́, любве́ же не и́мам, ника́я по́льза ми есть. Любы́ долготерпи́т, милосе́рдствует, любы́ не зави́дит, любы́ не превозно́сится, не горди́тся, ни безчи́нствует, не и́щет своя́ си, не раздража́ется, не мы́слит зла, не ра́дуется о непра́вде, ра́дуется же о и́стине; вся лю́бит, всему́ ве́ру е́млет, вся упова́ет, вся терпи́т. Любы́ николи́же отпа́дает.
Иере́й:
Мир ти.
Чтец:
И ду́хови твоему́.
Диа́кон:
Прему́дрость.

Аллилуарий чудотво́рцов и безсре́бреников Космы́ и Дамиа́на, глас 2:

Чтец:
Аллилу́ия, глас вторы́й:
Хор:
Аллилу́ия, аллилу́ия, аллилу́ия.
Чтец:
Се что добро́, или́ что красно́,/ но е́же жи́ти бра́тии вку́пе.
Хор:
Аллилу́ия, аллилу́ия, аллилу́ия.
Чтец:
Мно́ги ско́рби пра́ведным, и от всех их изба́вит я́ Госпо́дь.
Хор:
Аллилу́ия, аллилу́ия, аллилу́ия.
Диа́кон:
Благослови́, влады́ко, благовести́теля свята́го Апо́стола и Евангели́ста Матфе́я
Иере́й:
Бог, моли́твами свята́го, сла́внаго, всехва́льнаго Апо́стола и Евангели́ста Матфе́я, да да́ст тебе́ глаго́л благовеству́ющему си́лою мно́гою, во исполне́ние Ева́нгелия возлю́бленнаго Сы́на Своего́, Го́спода на́шего Иису́са Христа́.
Диа́кон:
Аминь.
2й диа́кон:
Прему́дрость, про́сти, услы́шим свята́го Ева́нгелия.
Иере́й:
Мир всем.
Хор:
И ду́хови твоему́.
Диа́кон:
От Матфе́я Свята́го Ева́нгелия чте́ние.
Хор:
Сла́ва Тебе́, Го́споди, сла́ва Тебе́.
2й диа́кон:
Во́нмем.

Чтение Евангелия:

  
Чтение чудотво́рцов и безсре́бреников Космы́ и Дамиа́на (зачало 34Б.,Мф.10:1, 5-8):
Диа́кон:
Во вре́мя о́но, призва́ Иису́с обана́десять ученики́ Своя́, даде́ им власть на дусе́х нечи́стых, я́ко да изго́нят их, и цели́ти всяк неду́г и вся́ку боле́знь. Сия́ обана́десять посла́ Иису́с, запове́да им, глаго́ля: на путь язы́к не иди́те и во град Самаря́нский не вни́дите. Иди́те же па́че ко овца́м поги́бшым до́му Изра́илева. Ходя́ще же пропове́дуйте, глаго́люще, я́ко прибли́жися Ца́рствие Небе́сное. Боля́щыя изцеля́йте, прокаже́нныя очища́йте, ме́ртвыя воскреша́йте, бе́сы изгоня́йте, ту́не прия́сте, ту́не дади́те.
Хор:
Сла́ва Тебе́, Го́споди, сла́ва Тебе́.

Ектения́ сугу́бая:

Диа́кон:
Рце́м вси от всея́ души́, и от всего́ помышле́ния на́шего рцем.
Хор:
Го́споди, поми́луй.
Диа́кон:
Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.
Хор:
Го́споди, поми́луй.
Диа́кон:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Хор:
Го́споди, поми́луй.
(Три́жды, на каждое прошение)
Диа́кон:
Еще́ мо́лимся о Вели́ком Господи́не и Отце́ на́шем Святе́йшем Патриа́рхе (Имярек), и о Господи́не на́шем Высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе имяре́к), и всей во Христе́ бра́тии на́шей.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Еще́ мо́лимся о бра́тиях на́ших, свяще́нницех, священномона́сех, и всем во Христе́ бра́тстве на́шем.
Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих настоя́теля, бра́тии и прихо́жан свята́го хра́ма сего́.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Иере́й:
Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор:
Ами́нь.

Ектения́ об оглаше́нных:

Диа́кон:
Помоли́теся, оглаше́ннии, Го́сподеви.
Хор:
Го́споди, поми́луй.
(На каждое прошение)
Диа́кон:
Ве́рнии, о оглаше́нных помо́лимся, да Госпо́дь поми́лует их.
Огласи́т их сло́вом и́стины.
Откры́ет им Ева́нгелие пра́вды.
Соедини́т их святе́й Свое́й собо́рней и апо́стольстей Це́ркви.
Спаси́, поми́луй, заступи́ и сохрани́ их, Бо́же, Твое́ю благода́тию.
Оглаше́ннии, главы ва́ша Го́сподеви приклони́те.
Хор:
Тебе́, Го́споди.
Иере́й:
Да и ти́и с на́ми сла́вят пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Хор:
Ами́нь.

Ектения́ ве́рных, пе́рвая:

Диа́кон:
Ели́цы оглаше́ннии, изыди́те, оглаше́ннии, изыди́те, ели́цы оглаше́ннии, изыди́те, да никто от оглаше́нных, ели́цы ве́рнии, па́ки и па́ки ми́ром Го́споду помо́лимся.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Прему́дрость.
Иере́й:
Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.

Ектения́ ве́рных, втора́я:

Диа́кон:
Па́ки и па́ки, ми́ром Го́споду помо́лимся.
Хор:
Го́споди, поми́луй.
(На ка́ждое проше́ние)
Диа́кон:
О свы́шнем ми́ре и спасе́нии душ на́ших, Го́споду помо́лимся.
О ми́ре всего́ мира, благостоя́нии святы́х Бо́жиих церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Прему́дрость.
Иере́й:
Я́ко да под держа́вою Твое́ю всегда́ храни́ми, Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.

Херуви́мская песнь:

Хор:
И́же Херуви́мы та́йно образу́юще и животворя́щей Тро́ице Трисвяту́ю песнь припева́юще, вся́кое ны́не жите́йское отложи́м попече́ние.

Вели́кий вход:

Диа́кон:
Вели́каго господи́на и отца́ на́шего (Имярек), Святе́йшаго Патриа́рха всея́ Ру́си, и господи́на на́шего (Высо́ко-) Преосвяще́ннейшаго (имярек), (архи-)епи́скопа (митрополита (титул)), да помяне́т Госпо́дь Бог во Ца́рствии Свое́м всегда́, ны́не и при́сно, и во ве́ки веко́в.
Иере́й:
Преосвяще́нныя митрополи́ты, архиепи́скопы и епи́скопы, и весь свяще́ннический и мона́шеский чин, и при́чет церко́вный, бра́тию свята́го хра́ма сего́, всех вас, правосла́вных христиа́н, да помяне́т Госпо́дь Бог во Ца́рствии Свое́м, всегда́, ны́не и при́сно, и во ве́ки веко́в.
Хор:
Ами́нь. Я́ко да Царя́ всех поды́мем, А́нгельскими неви́димо дориноси́ма чи́нми. Аллилу́иа, аллилу́иа, аллилу́иа.

Ектения́ проси́тельная:

Диа́кон:
Испо́лним моли́тву на́шу Го́сподеви.
Хор:
Го́споди, поми́луй.
(На каждое прошение)
Диа́кон:
О предложе́нных Честны́х Даре́х, Го́споду помо́лимся.
О святе́м хра́ме сем, и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Дне всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и дру́г дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Щедро́тами Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Хор:
Ами́нь.
Иере́й:
Мир всем.
Хор:
И ду́хови твоему́.
Диа́кон:
Возлю́бим друг дру́га, да единомы́слием испове́мы.
Хор:
Отца́, и Сы́на, и Свята́го Ду́ха, Тро́ицу единосу́щную и неразде́льную.
Диа́кон:
Две́ри, две́ри, прему́дростию во́нмем.

Си́мвол ве́ры:

Лю́ди:
Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Евхаристи́ческий Кано́н:

Диа́кон:
Ста́нем до́бре, ста́нем со стра́хом, во́нмем, свято́е возноше́ние в ми́ре приноси́ти.
Хор:
Ми́лость ми́ра, же́ртву хвале́ния.
Иере́й:
Благода́ть Го́спода на́шего Иису́са Христа́, и любы́ Бо́га и Отца́, и прича́стие Свята́го Ду́ха, бу́ди со все́ми ва́ми.
Хор:
И со ду́хом твои́м.
Иере́й:
Горе́ име́им сердца́.
Хор:
И́мамы ко Го́споду.
Иере́й:
Благодари́м Го́спода.
Хор:
Досто́йно и пра́ведно есть покланя́тися Отцу́ и Сы́ну, и Свято́му Ду́ху, Тро́ице единосу́щней и неразде́льней.
Иере́й:
Побе́дную песнь пою́ще, вопию́ще, взыва́юще и глаго́люще.
Хор:
Свят, свят, свят Госпо́дь Савао́ф, испо́лнь не́бо и земля́ сла́вы Твоея́; оса́нна в вы́шних, благослове́н Гряды́й во и́мя Госпо́дне, оса́нна в вы́шних.
Иере́й:
Приими́те, яди́те, сие́ есть Те́ло Мое́, е́же за вы ломи́мое во оставле́ние грехо́в.
Хор:
Ами́нь.
Иере́й:
Пи́йте от нея́ вси, сия́ есть Кровь Моя́ Но́ваго Заве́та, я́же за вы и за мно́гия излива́емая, во оставле́ние грехо́в.
Хор:
Ами́нь.
Иере́й:
Твоя́ от Твои́х Тебе́ принося́ще, о всех и за вся.
Хор:
Тебе́ пое́м, Тебе́ благослови́м, Тебе́ благодари́м, Го́споди, и мо́лим Ти ся, Бо́же наш.
Иере́й:
Изря́дно о Пресвяте́й, Пречи́стей, Преблагослове́нней, Сла́вней Влады́чице на́шей Богоро́дице и Присноде́ве Мари́и.

Досто́йно есть:

Хор:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и славне́йшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Иере́й:
В пе́рвых помяни́, Го́споди, вели́каго господи́на и отца́ на́шего (Имярек), Святе́йшаго Патриа́рха всея́ Руси́, и господи́на на́шего (Высо́ко-) Преосвяще́ннейшаго (Имярек), (архи-)епи́скопа (митрополита (титул)), и́хже да́руй святы́м Твои́м це́рквам, в ми́ре, це́лых, честны́х, здра́вых, долгоде́нствующих, пра́во пра́вящих сло́во Твоея́ и́стины.
Хор:
И всех, и вся.
Иере́й:
И даждь нам еди́неми усты́ и еди́нем се́рдцем сла́вити и воспева́ти пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Хор:
Ами́нь.
Иере́й:
И да бу́дут ми́лости вели́каго Бо́га и Спа́са на́шего Иису́са Христа́ со все́ми ва́ми.
Хор:
И со ду́хом твои́м.

Ектения́ проси́тельная:

Диа́кон:
Вся святы́я помяну́вше, па́ки и па́ки ми́ром Го́споду помо́лимся.
Хор:
Го́споди, поми́луй.
(На каждое прошение)
Диа́кон:
О принесе́нных и освяще́нных Честны́х Даре́х, Го́споду помо́лимся.
Я́ко да человеколю́бец Бог наш, прие́м я́ во святы́й и пренебе́сный и мы́сленный Свой же́ртвенник, в воню́ благоуха́ния духо́внаго, возниспо́слет нам Боже́ственную благода́ть и дар Свята́го Ду́ха, помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
Дне всего́ соверше́нна, свя́та, ми́рна и безгре́шна у Го́спода про́сим.
Хор:
Пода́й, Го́споди.
(На каждое прошение)
Диа́кон:
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Проще́ния и оставле́ния грехо́в и прегреше́ний на́ших у Го́спода про́сим.
До́брых и поле́зных душа́м на́шим и ми́ра ми́рови у Го́спода про́сим.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.
Соедине́ние ве́ры и прича́стие Свята́го Ду́ха испроси́вше, са́ми себе́, и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
И сподо́би нас, Влады́ко, со дерзнове́нием, неосужде́нно сме́ти призыва́ти Тебе́, Небе́снаго Бо́га Отца́, и глаго́лати:

Моли́тва Госпо́дня:

Лю́ди:
О́тче наш, И́же еси́ на небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иере́й:
Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Хор:
Ами́нь.
Иере́й:
Мир всем.
Хор:
И ду́хови твоему́.
Диа́кон:
Главы́ ва́ша Го́сподеви приклони́те.
Хор:
Тебе́, Го́споди.
Иере́й:
Благода́тию, и щедро́тами, и человеколю́бием Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Хор:
Ами́нь.
Диа́кон:
Во́нмем.
Иере́й:
Свята́я святы́м.
Хор:
Еди́н свят,/ еди́н Госпо́дь,/ Иису́с Христо́с,/ во сла́ву Бо́га Отца́./ Ами́нь.

Причастен чудотво́рцов и безсре́бреников Космы́ и Дамиа́на:

Хор:
Радуйтеся, праведнии, о Господе, правым подобает похвала.
Аллилуйа
(Трижды)

Прича́стие:

Диа́кон:
Со стра́хом Бо́жиим и ве́рою приступи́те.
Хор:
Благослове́н Гряды́й во и́мя Госпо́дне, Бог Госпо́дь и яви́ся нам.
Иере́й:
Ве́рую, Го́споди, и испове́дую, я́ко Ты еси́ вои́стинну Христо́с, Сын Бо́га жива́го, прише́дый в мир гре́шныя спасти́, от ни́хже пе́рвый есмь аз. Еще́ ве́рую, я́ко сие́ есть са́мое пречи́стое Те́ло Твое́, и сия́ есть са́мая честна́я Кровь Твоя́. Молю́ся у́бо Тебе́: поми́луй мя и прости́ ми прегреше́ния моя́, во́льная и нево́льная, я́же сло́вом, я́же де́лом, я́же ве́дением и неве́дением, и сподо́би мя неосужде́нно причастити́ся пречи́стых Твои́х Та́инств, во оставле́ние грехо́в и в жизнь ве́чную. Ами́нь.
Ве́чери Твоея́ та́йныя днесь, Сы́не Бо́жий, прича́стника мя приими́; не бо враго́м Твои́м та́йну пове́м, ни лобза́ния Ти дам, я́ко Иу́да, но я́ко разбо́йник испове́даю Тя: помяни́ мя, Го́споди, во Ца́рствии Твое́м.
Да не в суд или́ во осужде́ние бу́дет мне причаще́ние Святы́х Твои́х Та́ин, Го́споди, но во исцеле́ние души́ и те́ла.
  
Во время Причащения людей:
Хор:
Те́ло Христо́во приими́те, Источника безсме́ртнаго вкусите.
  
После Причащения людей:
Хор:
Аллилу́ия, аллилу́ия, аллилу́ия.
Иере́й:
Спаси́, Бо́же, лю́ди Твоя́, и благослови́ достоя́ние Твое́.
Хор:
Ви́дехом свет и́стинный,/ прия́хом Ду́ха Небе́снаго,/ обрето́хом ве́ру и́стинную,/ неразде́льней Тро́ице покланя́емся,// Та бо нас спасла́ есть.
Иере́й:
Всегда́, ны́не и при́сно, и во ве́ки веко́в.
Хор:
Ами́нь. Да испо́лнятся уста́ на́ша/ хвале́ния Твоего́ Го́споди,/ я́ко да пое́м сла́ву Твою́,/ я́ко сподо́бил еси́ нас причасти́тися/ Святы́м Твои́м, Боже́ственным, безсме́ртным и животворя́щим Та́йнам,/ соблюди́ нас во Твое́й святы́ни/ весь день поуча́тися пра́вде Твое́й.// Аллилу́иа, аллилу́иа, аллилу́иа.

Ектения́ заключи́тельная:

Диа́кон:
Про́сти прии́мше Боже́ственных, святы́х, пречи́стых, безсме́ртных, небе́сных и животворя́щих, стра́шных Христо́вых Та́ин, досто́йно благодари́м Го́спода.
Хор:
Го́споди, поми́луй.
Диа́кон:
Заступи́, спаси́, поми́луй и сохрани́ нас, Бо́же, Твое́ю благода́тию.
Хор:
Го́споди, поми́луй.
Диа́кон:
День весь соверше́н, свят, ми́рен и безгре́шен испроси́вше, са́ми себе́ и друг дру́га, и весь живо́т наш Христу́ Бо́гу предади́м.
Хор:
Тебе́, Го́споди.
Иере́й:
Я́ко Ты еси́ освяще́ние на́ше, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь.
Иере́й:
С ми́ром изы́дем.
Хор:
О и́мени Госпо́дни.
Диа́кон:
Го́споду помо́лимся.
Хор:
Го́споди, поми́луй.

Заамво́нная моли́тва:

Иере́й:
Благословля́яй благословя́щия Тя, Го́споди, и освяща́яй на Тя упова́ющия, спаси́ лю́ди Твоя́ и благослови́ достоя́ние Твое́, исполне́ние Це́ркве Твоея́ сохрани́, освяти́ лю́бящия благоле́пие до́му Твоего́: Ты тех возпросла́ви Боже́ственною Твое́ю си́лою, и не оста́ви нас, упова́ющих на Тя. Мир мирови Твоему́ да́руй, це́рквам Твои́м, свяще́нником, во́инству и всем лю́дем Твои́м. Я́ко вся́кое дая́ние бла́го, и всяк дар соверше́н свы́ше есть, сходя́й от Тебе́ Отца́ све́тов, и Тебе́ сла́ву, и благодаре́ние, и поклоне́ние возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Хор:
Ами́нь. Бу́ди И́мя Госпо́дне благослове́но от ны́не и до ве́ка.
(Три́жды)

Псало́м 33:

Хор:
Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тции, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и,/ и от все́х скорбе́й его́ спасе́ и./ Ополчи́тся А́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода не лиша́тся вся́каго бла́га./ Прииди́те, ча́да, послу́шайте мене́,/ стра́ху Госпо́дню научу́ вас./ Кто́ есть челове́к хотя́й живо́т,/ любя́й дни ви́дети бла́ги?/ Удержи́ язы́к твой от зла,/ и устне́ твои́, е́же не глаго́лати льсти./ Уклони́ся от зла и сотвори́ бла́го./ Взыщи́ ми́ра, и пожени́ и́./ О́чи Госпо́дни на пра́ведныя,/ и у́ши Его́ в моли́тву их./ Лице́ же Госпо́дне на творя́щия зла́я,/ е́же потреби́ти от земли́ па́мять их./ Воззва́ша пра́веднии, и Госпо́дь услы́ша их,/ и от всех скорбе́й их изба́ви их./ Близ Госпо́дь сокруше́нных се́рдцем,/ и смире́нныя ду́хом спасе́т./ Мно́ги ско́рби пра́ведным,/ и от всех их изба́вит я́ Госпо́дь./ Храни́т Госпо́дь вся ко́сти их,/ ни еди́на от них сокруши́тся./ Смерть гре́шников люта́,/ и ненави́дящии пра́веднаго прегре́шат./ Изба́вит Госпо́дь ду́ши раб Свои́х,/ и не прегреша́т// вси, упова́ющии на Него́.
Иере́й:
Благослове́ние Госпо́дне на ва́с, Того́ благода́тию и человеколю́бием, всегда́, ны́не и при́сно, и во ве́ки веко́в.
Хор:
Ами́нь.
Иере́й:
Сла́ва Тебе́, Христе́ Бо́же, упова́ние на́ше, сла́ва Тебе́.
Хор:
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Го́споди, поми́луй.
(Три́жды)
Благослови́.

Иерей произносит Отпуст

[Многолетие]

Полезная информация о празднике чудотво́рцов и безсре́бреников Космы́ и Дамиа́на

Святые бессребреники Косма и Дамиан были родные братья. Отечество их – Асия. Так в древние времена называлась часть Малой Азии. Ни время их рождения, ни время смерти неизвестно. Несомненно только то, что они жили не позднее IV века. Так нужно думать, во-первых, потому, что в первой половине V века, при императоре Феодосии младшем, устрояли во имя их святые храмы, во-вторых, потому, что копты, отделившиеся от православия со времен Халкидонского собора (431 г.), признают их в лике святых, тогда как живших после сего времени святых они не принимают.

Отец их был грек и язычник, мать – христианка, по имени Феодотия. В ранних летах они лишились своего родителя, но это послужило к их счастию. Мать могла свободнее заняться воспитанием детей. Решившись на всю жизнь остаться вдовою, она ревностно исполняла закон христианский; отказавшись от всех радостей жизни, она о том только заботилась, чтобы угодить Господу. Словом, была истинною вдовицею, каких восхваляет апостол Павел: истинная вдовица и уединена, уповает на Бога и пребывает в молитвах и молениих день и нощь (1Тим.5:5).

Поэтому Святая Церковь причла ее к лику святых, наименовала преподобною и творит память ее вместе с ее чадами. Можно понять, какое воспитание получили дети под руководством такой матери. С самого младенчества она старалась внушить им страх Божий и любовь к добродетели. А как скоро дети стали приходить в возраст, она отдала их в научение грамоте к некоему богобоязненному мужу. Здесь, конечно, главной наукой было Божественное Писание, но в то же время они, движимые любовью к страждущему человечеству, изучали врачебную науку, узнавали целительные свойства трав и растений.

Господь благословил благое их намерение и даровал им особенную благодать – дар исцелений и чудотворений. Болезни прекращались, как скоро начинали лечить Косма и Дамиан. Это, разумеется, привлекало к ним множество болящих всякого рода.

Слепые, хромые, расслабленные, бесноватые окружали чудотворцев. Но святые этим не отягощались. Мало того, чтобы быть доступнее для болящих, они сами искали их и для сего переходили из города в город, из веси в весь, и всем больным, без различия пола и возраста, звания и состояния, подавали исцеление.

И это делали они не для того, чтобы обогатиться или прославиться, но с самою чистою, высокою целью – служить страждущим ради Бога, любовь к Богу выразить в любви к ближним. Поэтому они ни от кого никогда не принимали никакой награды за свои труды, никаких даже знаков благодарности за собственные благодеяния. Они твердо знали и верно сохранили заповедь Спасителя: болящия исцеляйте, прокаженныя очищайте, мертвыя воскрешайте, бесы изгоняйте: туне приясте, туне дадите (Мф.10:8).

Даром получили они благодать от Бога, даром и раздавали ее. Об одном только просили они исцеленных ими: чтобы те твердо веровали во Христа, свято жили во Христе; если же врачуемые еще не были просвещены светом Евангелия, то старались обратить их к христианской вере. Таким образом, врачуя телесные недуги, они в то же время врачевали и недуги душевные.

За это бескорыстное служение страждущему человечеству, за эти чудесные исцеления болезней неисцельных Святая Церковь величает их бессребрениками и чудотворцами.

Но не на людей только простиралась врачебная сила святых врачей. Они не забывали и бессловесных животных. Праведник милует души скотов, говорит слово Божие (Притч.12:10). Верные сей заповеди, они ходили по домам, пустыням и лесам, сами отыскивали болящих животных и подавали им исцеление. Благодарные животные чувствовали их благодеяния, знали своих благодателей и, как скоро сии показывались в пустынях, ходили вслед за ними целыми стадами.

Однажды случилось им зайти в одно пустынное место. Здесь они нашли едва живого верблюда. Сюда загнал и здесь разбил его диавол; святые сжалились над животным, исцелили его и отпустили здоровым в свое место. После, как увидим, животное не осталось неблагодарным к ним.

В таких делах милосердия прошла вся жизнь святых бессребреников. Братья никогда не расставались друг с другом, вместе молились, вместе ходили, вместе врачевали. И это они делали не без цели. Дав обет никогда ни от кого ничего не брать, они опасались, чтобы кто-нибудь тайно друг от друга не взял от исцеленных каких-либо даров. Всю свою жизнь хранили они обет свой, и только под конец ее одному из них Господь попустил нарушить его.

В те времена была некоторая жена, именем Палладия. Несколько лет страдая тяжкою болезнию, не получая облегчения ни от каких врачей, чувствуя уже приближение смерти, она вдруг услыхала о святых врачах, которые исцеляют всякие болезни.

С верою в чудодейственную их силу она послала просить их к себе. Святые исполнили ее просьбу, и, как только вошли в дом ее, больная получила исцеление и встала совершенно здоровою. В благодарность за исцеление она готова была отдать им все свое имение, предлагала богатые подарки, но святые ничего не принимали.

Тогда она придумала средство хотя бы одного из них упросить принять от нее ничтожный дар. Взяв три яйца, она тайно пришла к святому Дамиану и заклинала его именем Божиим взять от нее эти три яйца во имя Святой Троицы. Дамиан долго отказывался, но ради клятвы жены, ради имени Божия, уступил ее просьбе.

Косма об этом узнал, весьма огорчился и тогда же сделал завещание, чтобы по преставлении их не полагали вместе с ним тело Дамиана, как нарушившего обет Господу, взявшего мзду за исцеление. В ту же ночь явился Господь Косме и сказал: «Для чего ты скорбишь ради взятых трех яиц? Они взяты не ради мзды, но ради клятвы жены в Мое имя...» Косма утешился, но никому не сказал о своем видении. Сотворив после сего еще много знамений и чудес, с миром почил святой Косма.

Чрез несколько времени после его кончины почил с миром и святой Дамиан. Люди, чтившие их память, окружили тело Дамиана и недоумевали, где положить его. Завещание Космы было у всех в свежей памяти, нарушить его страшились.

И вот, когда они в недоумении стояли при святом теле, внезапно подошел к ним верблюд. Люди молчали, заговорил верблюд. «Человецы Божии, – так начал речь бессловесный, – много насладившиеся знамений и чудес от святых Космы и Дамиана, и не только вы, но и мы, животные, данные вам на службу Богом. Как слуга я пришел к вам поведать тайну Космы, чтобы не разлучать их друг от друга, но вместе положить их».

Верблюд этот был тот самый, который некогда был исцелен святыми. Люди, окружившие тело святого, возблагодарили Господа, так чудесно открывшего тайну Свою, и, положив святые мощи бессребреников в одну раку, погребли их на месте, называемом Фереман (ныне не существует, разрушен турками). Судя по описаниям подлинников, они скончались в средних летах.

Вскоре на месте их погребения устроена была церковь чудная и преславная, как говорит их жизнеописатель. В эту церковь из ближних и дальних стран стекались всякого рода болящие.

Видя такое неоскудное и неиждиваемое богатство святых, недужные постоянно окружали их храм. После сего можно судить, как много совершено было чудотворений святыми бессребрениками. Недаром жизнеописатель их говорит, что легче измерить море и пересчитать звезды, нежели поведать все чудеса святых. Из множества чудес он описал двенадцать, и довольно подробно. Димитрий, митр. Ростовский, в своих Четьях–минеях описал только два чуда. Мы из двенадцати кратко расскажем о шести.

В Феремане жил некто Малх. Однажды, отправляясь в далекий путь, он привел жену свою к церкви святых бессребреников и сказал ей: «Вот, я отхожу далеко, а тебя оставляю под покровительством святых Космы и Дамиана. Живи дома до тех пор, пока я не пришлю к тебе какой-нибудь знак, который ты верно узнаешь, что он мой». Сказав это, они расстались.

Через несколько времени диавол, приняв на себя вид знакомого человека, пришел к жене Малховой, показал ей тот самый знак, о котором говорил муж ее, и сказал: «Муж твой прислал меня, чтобы я проводил тебя к нему».

Жена, увидев знак, данный мужем, поверила, но идти к нему решилась не прежде, как провожатый дал клятву в церкви святых бессребреников на пути ничем не оскорблять ее. Но что значила клятва для беса? Ему нужно было ослабить в людях веру в покровительство святых бессребреников.

И вот, как только приехали они в дикое, пустынное место, дьявол столкнул женщину с ослицы, на которой она ехала, и хотел убить. Жена в ужасе вскричала: «Святии Космо и Дамиане, помозите ми и избавите мя!»

Святые всегда близки ко всем призывающим их. Внезапно явились два всадника. Злой дух узнал, кто были эти всадники, побежал на высокую гору, бросился в пропасть и исчез. А всадники, взяв жену, благополучно возвратили в дом ее. Жена кланялась им и благодарила, но только просила сказать, кто они, спасители ее? «Мы, – отвечали святые, – Косма и Дамиан, которым вручил тебя муж твой, отходя в путь». Сказав это, они стали невидимы. Жена же от страха и радости упала на землю.

Пришед в себя, она поспешила в храм святых бессребреников и там слезно благодарила их, и всем рассказала о своем спасении.

Некоторый юноша, от испуга лишившийся ума, приведен был в храм святых бессребреников с надеждою получить исцеление. Несколько дней и ночей провел он при церкви святых, не получив исцеления.

Чрез несколько времени пришел к нему отец его, благочестивый старец. Молитва родителя была услышана. Сын, доселе не узнававший отца, стал узнавать его. Наконец святые, невидимо возложив на него руки, совершенно исцелили его и, явившись отцу, повелели ему идти в свой дом, славя Бога.

Некоторый муж, страдавший болезнию в легких, сопровождавшейся кровохарканием, пришел к раке мощей святых бессребреников просить исцеления. Болезнь его была так опасна, что все считали его уже близким к смерти, а жена его даже готовила все нужное для погребения. Нужно заметить, что больной доселе не верил в чудодейственную силу святых и нередко изрыгал хулу на Бога.

Святые исцелили его от того и другого недуга. В ночном видении они возвестили, чтобы ищущий исцеления отселе никогда не говорил хульных слов и целый год воздерживался от употребления мяса. Больной с радостью принял то предложение и верно исполнил его. Тогда повелением святых кровь, шедшая гортанью, остановилась, легкие укрепились, и больной, возблагодарив чудных врачей, с радостию пошел в дом свой.

Пришла в церковь святых бессребреников некоторая жена немая и глухая. Страдая много лет этою тяжкою болезнию, она, кроме небесной, никакой не могла ожидать себе помощи. Долго, неотступно, со слезами молила она святых врачей исцелить ее от того и другого недуга. Наконец, молитва ее была услышана. Немая и глухая часто в уме своем повторяла Трисвятое. Чрез Трисвятое явили чудо и святые бессребреники.

Во время вечернего богослужения в храме их, когда, по обычаю, пето было Трисвятое, внезапно глухая услышала поющих и, доселе немая, с поющими начала петь Трисвятое. Пораженная необыкновенным чудом, она громогласно исповедала величие Божие, явленное чрез святых бессребреников.

Святые бессребреники совершали чудеса и в странах языческих. Случилось одному эллину, поклоннику Кастора и Поллукса (боги языческие), впасть в тяжкий, невыносимый недуг. Друзья его советовали ему идти в храм святых бессребреников Космы и Дамиана. Больной послушался. Здесь, видя множество недужных, множество исцелеваемых, он, наконец, и сам убедился в чудодейственной силе врачей и с верою начал просить их о помиловании.

Святые, явившись ему оба вместе, сказали: «Друг! Для чего ты пришел к нам? Для чего ты просишь нас! Да и не сам ты пришел к нам, а другими послан. Мы не Кастор и Поллукс, но рабы Христа – бессмертного Царя, именем Косма и Дамиан. Итак, если верою познаешь нашего Владыку, то получишь от Него исцеление».

Эллин, страдая нестерпимыми муками, познал Бога Истинного, непрестанно взывал к святым о помиловании и дал обет принять христианскую веру. Святые, провидя чистоту его веры, возложили на него руки и подали совершенное избавление. Исцелевший исполнил обет свой – принял Святое Крещение. Возвратившись в дом свой совершенно здоровым, он с великою радостью рассказывал всем о чудесах святых бессребреников, о ничтожестве Кастора и Поллукса, о превосходстве учения христианского. Многие из слушателей умилялись и, презрев свою веру, принимали христианство.

Некто – любитель народных зрелищ – страдал болезнью в груди. Ни в чем не находя себе облегчения, он, наконец, вынужден был идти в храм святых бессребреников. Святые врачи, видя его усердие, умилосердились над больным.

В следующую же ночь они явились ему и повелели выпить одну чашу смолы (пекла). Больной не исполнил их повеления. Святые явились ему во второй раз и к одной чаше прибавили другую. Когда же он и этого не исполнил, явились ему в третий раз и велели ему выпить три чаши.

Несмотря на болезнь, которая увеличивалась в нем с каждым днем, он никак не хотел исполнить повеления святых. Наконец, они снова явились ему во сне и с веселыми лицами сказали: «Друг, что так вопиешь к нам? Если тебе неприятно для своего здравия выпить три чаши смолы, то вылей их в один сосуд и, дождавшись глубокого вечера, иди с ним в гору, на место зрелищ, и там зарой его так, чтобы никто тебя не видел. Если это сделаешь, то получишь исцеление».

Больной с радостью исполнил все, как было приказано. Но все, что он делал, видел один запоздалый на том месте человек. Объясняя его странный поступок чародейством, он, заметив место, пошел и привел с собою многих других людей. Те, удостоверившись в истине показания, взяли и представили мнимого волхва на суд. Стали допрашивать. Он рассказал всю правду – ему не верили.

Наконец, решили, что если действительно таково было повеление святых бессребреников, то в виду всех он должен выпить эти три чаши и получить исцеление. Больной с радостью принял сосуд, который казался ему неприятным, в виду всех выпил его и тотчас же силою святых бессребреников получил исцеление; с радостью пошел он в храм их и, воздав благодарение, всем рассказывал, как святые бессребреники и от болезни его исцелили, и послушанию научили, и от народных зрелищ отучили.

Все эти чудеса совершены святыми бессребрениками во Асии, и большею частью в их храме, при святых мощах. Конечно, там же составлялось и описание их. На славянский язык оно переведено с греческого, что доказывают многие слова, оставленные в славянском тексте без перевода. Нет сомнений, что благодать чудотворений святых бессребреников проявлялась и в нашем Отечестве. Недаром предки наши так много воздвигли святых храмов во имя их.

В нашем Отечестве святые бессребреники Косма и Дамиан (Асийские) преимущественно считаются покровителями детей. К ним прибегают с молитвою при начале учения грамоте, чтобы они укрепили еще слабые детские силы и содействовали их правильному развитию.

Конечно, такое убеждение в нашем народе составилось недаром. Основанием для него могли послужить отчасти самое житие их, отчасти и церковная им служба: во-первых, в житии их есть сказание о том, как они были отведены своею матерью в научение грамоте. Этот случай из их жизни изображается и на иконах, во-вторых, в церковной службе они прославляются как мудрые врачи, тайноучимые живописным словесам, всякого разума и мудрости исполненным, которые всем знание подают.

В четьях–минеях митрополита Макария есть поучение на память святых бессребреников Космы и Дамиана (1 ноября), в котором из дневного Евангелия избрана тема: «Каковому должно быть учителю». В развитии ее есть такие выражения: «Святые учители тело врачевали чудесами, душу поучением. Они прихождаху к ним чудес ради, они же поучения ради. Ничто же ино так подобает учителю, яко же смирение и нестяжание имения». Все это так близко подходит к святым бессребреникам. Конечно, в древние времена это поучение читалось в храме. Народ его слышал и начал приходить к святым бессребреникам не только «чудес ради, но и поучения ради».

Православный народ, видя на иконах, читая в их житии сказание о научении грамоте их самих, слыша в храмах, что они всем знание подают, не мог не прийти к тому заключению, что они особенно покровительствуют учащимся. А благодать святых бессребреников бесконечна есть, как поет Святая Церковь. Они не только мудрые врачи, но и мудрые наставники; помогая всем, приходящим к ним с верою, могут ли они отказать детям?

Оканчивая описание жизни святых бессребреников, иже от Асии, нельзя не упомянуть о похвальном им слове, которое в древних списках помещалось вслед за описанием их жизни, и которое, конечно, в память их читалось при богослужении. Происхождение его, как думают ученые, русское, потому что в конце его упоминается о правоверном князе. В нем после витиеватого вступления содержится похвала или величание святым бессребреникам, изложенное в форме акафиста, а в конце делается молитвенное к ним обращение.